མཚོ་ལྷོ་ཁུལ་བོད་སྨན་ཁང་གིས་སྨན་རྫས་རྩ་ཆེན་འགྲེམ་སྟོན་བྱས་པ།

ལས་རིགས་སོ་སོའི་མི་རྣམས་ཀྱིས་སྨན་རྫས་ལ་གཟིགས་ཞིབ་བྱེད་པ།

         ཟླ4བའི་ཚེས17ཉིན།  མཚོ་ལྷོ་ཁུལ་བོད་སྨན་ཁང་གིས་ཁུལ་རིམ་པའི་འགོ་ཁྲིད་དང་། ལས་འཁྱུར་མི་སྣ། དེ་མིན་འབྲེལ་ཡོད་ཆེད་ལས་མཁས་པ་སོགས་གདན་འདྲེན་ཞུས་ཏེ་སྨན་རྫས་རྩ་ཆེན་འགྲེམ་སྟོན་བྱེད་པར་གཟིགས་ཞིབ་ཏུ་ཕེབས་པ་རེད།

སྨན་རྫས་རྩ་ཆེན་དག

         ཁུལ་བོད་སྨན་ཁང་གི་འགོ་གཙོ་དབང་ཆེན་འབུམ་གྱིས་མཚམས་སྦྱོར་བྱས་པ་ལྟར་ན།  ཐེངས་འདིར་རིན་ཆེན་མང་སྦྱོར་དང་། མུ་ཏོག་བདུན་ཅུ་སོགས་བོད་ཀྱི་སྨན་རྫས་དག་སྦྱར་ཡོད་ཅིང་། མ་དངུལ་བསྡུ་བ་དང་སྨན་སྦྱོར་བ། དེ་མིན་བལ་བོ་དང་ལྷ་ས་སོགས་སུ་བསྐྱོད་དེ་སྨན་རྫས་འདེམས་ཉོ་སོགས་ཀྱི་བརྒྱུད་རིམ་ལས་དུས་ཡུན་ལོ་གསུམ་འགོར་བ་དང་། མ་དངུལ་སྒོར་ཁྲི200ལྷག་བཏང་སྟེ་ཐོབ་དཀའ་བའི་སྨན་རྫས་རྩ་ཆེན་བསེ་རུ་རྭ་དང་།   གླ་རྩི། རང་བྱུང་གི་ཝང་། རྡོ་མཉྫུར། ཤྭ་རྒྱུས།  དཔའ་རྒོད། ལྕགས་སྦྲུལ། མ་ན་ཧོ།  ཞི་མིག་སོགས་སྨན་སྣ་རྩ་ཆེན་གང་མང་ཉོས་ཡོད།

ཁུལ་བོད་སྨན་ཁང་གི་སྨན་པ་དང་དངོས་སྦྱོང་བ་རྣམས་ཀྱིས་སྨན་རྫས་ལ་གཟིགས་ཞིབ་བྱེད་པ།

         རྒྱུས་ལོན་པ་ལྟར་ན།  ལུགས་རྙིང་གི་ཟླ4བའི་ཚེས1ཉིན། བོད་ཀྱི་གསོ་རིག་སྨན་རྫས་ལ་མཁས་པའི་ཆེད་མཁས་པ་དང་། མཚོ་སྔོན་ཞིང་ཆེན་བོད་སྨན་ཁང་གི་སྨན་པ་ཉི་མ་སོགས་གདན་འདྲེན་ཞུས་ཏེ་བོད་ཀྱི་སྨན་རྫས་འདི་དག་སྲོལ་རྒྱུན་བྱ་ཐབས་ལྟར་ཞིབ་བསྟར་བྱ་རྒྱུ་ཡིན་ཞིང་།  སྔོན་དཔག་ལྟར་ན་ཟླ་ལྔ་བའི་ཟླ་མཇུག་ཏུ་དངོས་སུ་འགྲེམ་ཚོང་བྱ་རྒྱུ་ཡིན་པ་རེད།