མཚོ་ལྷོ་ཁུལ་བོད་སྨན་ཁང་གིས་གསོ་རིག་མཁས་པ་བཀྲ་རྒྱལ་གདན་དྲངས་ཏེ་ཁྲག་གཏར་གསོ་སྦྱོང་འཛིན་གྲྭ་བསྡུས་པ།

སྨན་པ་བཀྲ་རྒྱལ་ལགས་ཀྱིས་བོད་རིགས་སྨན་པ་རྣམས་ལ་ཁྲག་གཏར་གཞུང་ལུགས་ཤེས་བྱ་ཁྲིད་ཀྱིན་པ། 

            ཟླ8ཚེས21ནས་ཚེས30བར།   མཚོ་ལྷོ་ཁུལ་བོད་སྨན་ཁང་གིས་ཆེད་དུ་བོད་ལྗོངས་ཆབ་མདོ་ས་ཁུལ་གྱི་མིང་དུ་གྲགས་པའི་བོད་ཀྱི་གསོ་རིག་སྨན་པ་བཀྲ་རྒྱལ་ལགས་གདན་འདྲེན་ཞུས་ཏེ་དུས་ཡུན་ཉིན10ཡི་ཁྲག་གཏར་གསོ་སྦྱོང་འཛིན་གྲྭ་བསྡུས་ཤིང་།  མཚོ་ལྷོ་ཁུལ་བོད་སྨན་ཁང་གི་ལས་སྒྲུབ་མི་སྣ་ཡོངས་དང་།   མཚོ་སྔོན་ཞིང་ཆེན་བོད་སྨན་ཁང་། ཁུལ་ཡོངས་ཀྱི་རྫོང་སོ་སོའི་བོད་སྨན་ཁང་།  དེ་མིན་མཚོ་ལྷོ་ཁུལ་གྱི་གྲོང་རྡལ་དང་ཡུལ་ཚོའི་འཕྲོད་བསྟེན་ཁང་གི་ལས་རིགས་རྐང་འཛིན་མི་སྣ།   སྡེ་བའི་སྨན་པ་དང་དམངས་ཁྲོད་བོད་ཀྱི་སྨན་པ་སོགས་མི100ལྷག་ཐེངས་འདིའི་གསོ་སྦྱོང་ལ་ཞུགས་པ་རེད། 

སྨན་པ་བཀྲ་རྒྱལ་ལགས་ཀྱིས་བོད་རིགས་སྨན་པར་གསོ་རིག་ལག་རྩལ་ལག་ལེན་ཁྲིད་སྟོན་གནང་བཞིན་པ། 

            སྨན་པ་བཀྲ་རྒྱལ་ལགས་ཀྱིས་དུས་ཡུན་འདིའི་ནང་ཉིན་རྒྱུན་སྨན་ཁང་གི་ལས་སྒྲུབ་མི་སྣར་སྣེ་ཁྲིད་དེ་ཞག་སྡོད་ནད་ཁང་དུ་གཟིགས་ཞིབ་བྱས་ཤིང་།  ནད་པ་རེ་རེར་བོད་ཀྱི་གསོ་རིག་བྱེད་ཐབས་སྤྱད་དེ་ཚ་བ་བྱེར་བ། འཁྲུག་ཚད་རྙོགས་ཚད། དྲེག་ནད། གྲུམ་བུའི་ནད། ཆུ་སེར་གྱི་ནད་སོགས་ལ་ཁྲག་གཏར་པ་རེད།  དུས་ཡུན་འདིའི་ནང་སྨན་པ་བཀྲ་རྒྱལ་ལགས་ཀྱིས་ནད་པར་ཐེངས1000ལྷག་ལ་གསོ་བཅོས་བྱས་ཤིང་། དེ་ལས་ནད་པ100ལྷག་ལ་ཁྲག་གཏར་བ་རེད།  ཉིན་རེའི་ཕྱི་དྲོ།  ཁོང་གིས་བོད་རིགས་སྨན་པ100ལྷག་ལ་ཁྲག་གཏར་གཞུང་ལུགས་དང་ལག་ལེན་གྱི་མཛུབ་སྟོན་གནང་བས།  མཚོ་ལྷོ་ཁུལ་བོད་སྨན་ཁང་གི་གསོ་རིག་ལག་རྩལ་མི་སྣའི་ཁྲག་གཏར་གཞུང་ལུགས་ཤེས་བྱ་དང་གསོ་བཅོས་ལག་རྩལ་ལ་འཕེལ་རྒྱས་མི་དམན་པ་བྱུང་བ་རེད། 

སྨན་པ་བཀྲ་རྒྱལ་ལགས་ཀྱིས་ནད་པར་ཁྲག་གཏར་བཞིན་པ། 

            འདི་ལྟ་བུའི་གསོ་སྦྱོང་བྱེད་ཐབས་ཀྱིས་ནད་པར་སྟབས་བདེ་བཟོ་པ་དང་ནད་སྟོན་འགྲོ་གྲོན་ཇེ་ཡང་དུ་གཏོང་ཐུབ་པའི་ཁར།   རྒྱ་ཆེ་བའི་རོང་འབྲོག་མང་ཚོགས་ལ་ཁེ་ཕན་སྐྲུན།   ཐེངས་འདིའི་གསོ་སྦྱོང་བརྒྱུད་དེ་མཚོ་ལྷོ་ཁུལ་བོད་སྨན་ཁང་གི་གསོ་རིག་ལག་རྩལ་མི་སྣའི་གཞུང་ལུགས་ཤེས་བྱ་དང་གསོ་བཅོས་ལག་རྩལ་སྔར་ལས་ལྷག་པར་འཕེལ་རྒྱས་འབྱུང་ཞིང་སྣ་བསྡུས་ཞབས་ཞུའི་ནུས་ཤུགས་ཀྱང་སྔར་ལས་ལྷག་པར་གོང་འཕེལ་དུ་འགྲོ་ངེས་རེད།