ལྷོ་ཁའི་བོད་སྨན་ཁང་གི་སྲོལ་རྒྱུན་གྱི་ཕྱིའི་དཔྱད་ཐབས་ལ་ཀུན་གྱིས་དགའ་བསུ་ཐོབ་པ།

ཁྲག་གཏར་བྱེད་ཀྱི་མཁོ་ཆས།

　　ལྷོ་ཁ་ས་ཁུལ་བོད་སྨན་ཁང་ནི་ས་ཁུལ་དེའི་བོད་ལུགས་ཕྱོགས་བསྡུས་སྨན་ཁང་ཁོ་ན་ཡིན་ཞིང་། ཡུལ་དེ་གའི་རོང་འབྲོག་མང་ཚོགས་འབུམ3ལྷག་ལ་བོད་ལུགས་སྨན་བཅོས་བྱེད་པའི་འགན་འཁྲི་ལྕི་མོ་ཕྲག་ཏུ་བླངས་ནས་བོད་ཀྱི་གསོ་བ་རིག་པའི་སྲོལ་རྒྱུན་གྱི་ཕྱིའི་བཅོས་ཐབས་འཛིན་སྤེལ་བྱེད་བཞིན་ཡོད།
　　རིག་གནས་བརྩི་མཐོང་དང་། ལོ་རྒྱུས་སྲོལ་ལུགས། ཁྱད་དུ་འཕགས་པའི་སྨན་བཅོས་བྱེད་ཐབས་སོགས་ཀྱི་དབང་གིས་བོད་དམངས་རྣམས་ཀྱིས་བོད་ཀྱི་གསོ་བ་རིག་པར་ཀུན་ལས་ལྷག་པའི་སྤྲོ་སེམས་ཤིག་མཆིས་ཤིང་དེ་ལ་ཁས་ལེན་ཡང་བྱེད་ཀྱིན་ཡོད་པ་རེད། ལྷོ་ཁའི་བོད་སྨན་ཁང་གི་ཕྱི་ནད་ཚན་ཁག་ནི་བོད་ལུགས་གསོ་རིག་གི་ཁྱད་ཆོས་གཟེངས་སུ་ཐོན་པའི་ཚན་ཁག་ཅིག་ཡིན་ཞིང་། འདི་ནི1990ལོར་བོད་ལུགས་སྨན་ལུམས་ཚན་ཁག་གི་རྨང་གཞིའི་སྟེང་རྒྱ་བསྐྱེད་ནས་བསྐྲུན་པའི་སྨན་ལུམས་དང་། སྨན་བཅོས། ནད་གསོ་བ་བཅས་ཀྱི་བདག་ཉིད་ཅན་གྱི་ཕྱི་ནད་སྨན་བཅོས་ལྟེ་གནས་ཤིག་ཡིན་པ་རེད།

སྨན་པས་ནད་པར་གསེར་ཁབ་ཀྱིས་སྨན་བཅོས་བྱེད་བཞིན་པ།

ནད་པར་སྨན་བཅོས་བྱེད་པའི་གཏེར་རྡོ་ཚ་མོར་བྱེད་པ།

　　“ཟས་སྤྱོད་སྨན་དཔྱད”བཞི་ནི་བོད་ལུགས་གསོ་རིག་གི་སྨན་བཅོས་བྱེད་ཐབས་ཤིག་ཡིན་ལ། ཕྱིའི་དཔྱད་ཐབས་ནི་སྨན་བཅོས་བྱེད་ཐབས་བཞིའི་རིགས་གཅིག་ཡིན་ཞིང་བོད་ལུགས་གསོ་རིག་གི་ཐུན་མོང་མ་ཡིན་པའི་བཅོས་ཐབས་ཤིག་ཀྱང་ཡིན་པ་རེད། བོད་ལུགས་གསོ་རིག་བསྟན་བཅོས་སྔ་ཤོས་ཏེ《སྨན་དཔྱད་ཟླ་བའི་རྒྱལ་པོ》(སྤྱི་ལོ710ལོ་ནས་སྤྱི་ལོ720ལོའི་བར)ཁྲོད་ཕྱིའི་དཔྱད་ཐབས་ཞིབ་རྒྱས་ངང་བཀོད་ཡོད། ལོ་ངོ་སྟོང་ཕྲག་དུ་མར་རྒྱུན་འཛིན་བྱས་པའི་བོད་ལུགས་གསོ་རིག་གི་ཕྱིའི་དཔྱད་ཐབས་ལ་མེ་བཙའ་དང་། ཕྱིའི་སྨན་བཅོས་ཀྱི་ཡོ་ཆས། ཁྲག་གཏར་བ། སྨན་བྱུགས་པ། གནོན་འཕུར། སྨན་ལུམས་སོགས་རིགས98འདུས། དེའི་ཁྲོད་ཁྲག་གཏར་བ་དང་མེ་བཙའ་འཇོག་པ་ནི་བོད་ལུགས་གསོ་རིག་གི་ཆེས་ཐུན་མོང་མ་ཡིན་པའི་བཅོས་ཐབས་ཤིག་ཡིན་ཞིང་། དཔྱད་དཀའ་བའི་ནད་རིགས་དང་སྨན་རྫས་ཀྱིས་ཕན་མི་ཐོགས་པའི་ནད་རིགས་ལ་སྨན་བཅོས་ཀྱི་ཕན་འབྲས་མངོན་སུམ་ལྡན་པ་རེད།

ལྷོ་ཁ་བོད་སྨན་ཁང་གི་སྨན་ལུམས་ཁང་།

　　ཚན་ཁག་དེའི་འགན་ཁུར་བ་བཀྲ་ཤིས་རྣམ་རྒྱལ་ལགས་ཀྱིས་མཚམས་སྦྱོར་བྱས་པ་ལྟར་ན་ཕྱི་ནད་ཚན་ཁག་གི་སྨན་པ་ཞིག་ཡིན་ཕྱིན་ཕྱིའི་དཔྱད་ཐབས་ཀྱི་གཞུང་ལུགས་དང་ལག་ལེན་གྱི་ལག་རྩལ་ངེས་ཅན་ཞིག་དགོས་པར་མ་ཟད། ཀྲུང་ལུགས་ཀྱི་བཅོས་ཐབས་ལག་རྩལ་ལ་ཡང་ཁོང་བྱན་ཆུད་ན་ད་བཟོད་ནད་པ་རྣམས་ལ་ཞབས་འདེགས་ལེགས་པོ་ཞུ་ཐུབ་ཅེས་བརྗོད་པ་རེད། བསྡོམས་རྩིས་བྱས་པ་ལྟར་ན2010ལོར་ལྷོ་ཁ་བོད་སྨན་ཁང་གིས་བོད་ལུགས་གསོ་རིག་གི་སྨན་ལུམས་དང་། ཁྲག་གཏར་བ། མེ་བུམ་རྒྱག་པ། མེ་བཙའ་། སྦྱོང་རྒྱག་པ་སོགས་ཀྱི་བཅོས་ཐབས་ལ་བརྟེན་ནས་ནད་པ་མི་ཐེངས8000ལྷག་སྨན་བཅོས་བྱས་པ་རེད།