མཚོ་སྔོན་འོད་ཟེར་ལིང་གྲིབ་གསོ་བཅོས་ལྟེ་གནས་དངོས་སུ་བཙུགས་པ།

མཚོ་སྔོན་འོད་ཟེར་ལིང་གྲིབ་གསོ་བཅོས་ལྟེ་གནས་དངོས་སུ་སྒོ་ཕྱེས་བའི་མཛད་སྒོ་བསྡུས་བ།

མཛད་སྒོར་ཞུགས་པའི་འགོ་ཁྲིད་ཀྱིས་མཛད་སྒོའི་དར་ཚོན་གཅོད་བཞིན་པ།

              མཚོ་སྔོན་འོད་ཟེར་ལིང་གྲིབ་གསོ་བཅོས་ལྟེ་གནས་དངོས་སུ་སྒོ་ཕྱེས་བའི་མཛད་སྒོ་དེ་ཟླ8པའི་ཚེས17ཉིན་ཟི་ལིང་གྲོང་ཁྱེར་དཔལ་འབྱོར་ལག་རྩལ་གསར་སྤེལ་ཁུལ་སྐྱེ་ཁམས་ཚན་རྩལ་ཐོན་ལས་གླིང་ནས་བསྡུས། རྒྱལ་ཡོངས་སྲིད་གྲོས་སློབ་སྦྱོང་དང་རིག་གནས་ལོ་རྒྱུས་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་སངས་རྒྱས་སྐྱབས་དང་ཞིང་ཆེན་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་སྔོན་ཆད་ཀྱི་ཀྲུའུ་རིན་གཞོན་པ་བློ་བཟང་གཉིས་ཀྱིས་མཛད་སྒོའི་དར་ཚོན་བཅད་དེ་མཚོ་སྔོན་འོད་ཟེར་ལིང་གྲིབ་གསོ་བཅོས་ལྟེ་གནས་དངོས་སུ་སྒོ་ཕྱེས་བར་རྟེན་འབྲེལ་ཞུས།

མཚོ་སྔོན་འོད་ཟེར་ལིང་གྲིབ་གསོ་བཅོས་ལྟེ་གནས་ཀྱིས་སྔོན་ཐོན་གྱི་འཕྲུལ་ཆས་བཀོལ་ནས་
ལིང་ཏོག་ནད་པར་རྟོག་དཔྱོད་བྱེད་བཞིན་པ།

              མཚོ་སྔོན་འོད་ཟེར་ལིང་གྲིབ་གསོ་བཅོས་ལྟེ་གནས་ནི2010ལོའི་ཟླ6པའི་ནང་བཙུགས་ཤིང་། གསོ་བཅོས་ལྟེ་གནས་ཀྱི་སྤྱིའི་རྒྱ་ཁྱོན་ལ་མུས་གྲུ་བཞི་མ1800ལྷག་ཡོད།
              མཚོ་སྔོན་དུ་ལིང་ཏོག་གི་ནད་པ་མང་པོའི་གནས་ཚུལ་དངོས་ལ་དམིགས་ཏེ་མིང་དུ་གྲགས་པའི་རྒྱལ་སྤྱིའི་མིག་ནད་ཚན་ཁག་གི་ཆེད་ལས་མཁས་པ། འབུམས་རམས་པ་རོས་ཐུའུ་ཡིས་མཚོ་སྔོན་དུ་ལིང་ཏོག་ནད་གསོ་བཅོས་ལྟེ་གནས་ཤིག་འཛུགས་པར་ཞིང་ཆེན་གྱི་འབྲེལ་ཡོད་མགོ་ཁྲིད་དང་འབྲེལ་འདྲིས་བྱས་པ་བརྒྱུུད་ནས། ཕྱིའི་རྒྱལ་ཁབ་ཀྱི་སྙིང་རྗེ་ཚོགས་པ་དང་སིང་གཱ་ཕོར་ཅིན་ཡུན་རྒྱལ་སྤྱིའི་ཚོགས་པའི་སྐུ་ཞབས་ཁྲེན་ཅིང་ཧུ་བཅས་ཀྱི་རོགས་སྐྱོར་འོག་གསོ་བཅོས་ལྟེ་གནས་འདི་བདེ་བླག་ངང་འཛུགས་ཐུབ་པ་བྱུང་། གསོ་བཅོས་ལྟེ་གནས་འདིའི་སྨན་བཅོས་རུ་ཁག་ལོ་རེར་རོང་འབྲོག་ཁུལ་དུ་སོང་ནས་བསྐོར་བསྐྱོད་སྨན་བཅོས་བྱས་ཏེ། གཤག་བཅོས་སྐབས་སུ་ཁེ་གཉེར་མི་བྱེད་པར་སྙིང་རྗེའི་འདུ་ཤེས་བཅངས་ནས་ལྔ་སྐྱོང་ཁྱིམ་ཚང་དང་དབང་བོ་སྐྱོན་ཅན། དཀའ་ངལ་ཆེ་བའི་ཁྱིམ་ཚང་བཅས་ལ་གཤག་བཅོས་ཀྱི་རིན་མི་ལེན་པ་དང་། ནད་པ་གཞན་དག་ལའང་དེ་བཞིན་དུ་སྨན་རིན་དམིགས་བསལ་བྱེད་བཞིན་ཡོད་ལ། ཉེ་བའི་ལོ་འགའི་རིང་ལ་ལིང་ཏོག་གི་ནད་པ་བཞི་སྟོང་ལྔ་བརྒྱ་ལྷག་ལ་གཤག་བཅོས་བྱས་ནས་ན་བའི་སྡུག་བསྔལ་གྱིས་མནར་བའི་ལིང་ཏོག་གི་ནད་པ་གང་མང་ཞིག་ལ་འོད་སྣང་གི་འཇིག་རྟེན་གསར་བ་ཞིག་བསྐྲུན་དང་སྐྲུན་བཞིན་ཡོད། །