རང་རྒྱལ་གྱི་བོད་སྨན་རུས་ནད་ཆེད་ལས་སྨན་ཁང་ཐོག་མ་དེ་ལྷ་ས་ནས་བཙུགས་པ།
ཟླ3ཚེས17ཉིན། ལྷ་སའི་བོད་སྨན་རུས་ནད་ཆེད་ལས་སྨན་ཁང་དེ་དངོས་སུ་སྒོ་ཕྱེ་བ་དང་། བོད་ཀྱི་གསོ་བ་རིག་པ་ནི་སྲོལ་རྒྱུན་གསོ་རིག་ཁྲོད་རིན་ཐང་གཞལ་དུ་མེད་པའི་རིན་པོ་ཆེ་ལྟ་བུ་ཞིག་ཡིན་ཞིང་། དེའི་ངོ་མཚར་ཆེ་བའི་གསོ་བཅོས་བྱ་ཐབས་ལ་རྒྱལ་ཁབ་ཕྱི་ནང་གི་ནད་པ་རྣམས་ཀྱི་དགའ་བསུ་མི་དམན་པ་ཐོབ་བཞིན་ཡོད།
མིག་སྔར་རྒྱལ་ནང་ན་བོད་ཀྱི་གསོ་རིག་སྐོར་གྱི་ཁེ་ལས་ཧ་ཅང་དཀོན་སྟབས། འདི་ལྟ་བུའི་གསོ་རིག་སྨན་ཁང་འཛུགས་པའི་དམིགས་ཡུལ་ཡང་བོད་ཀྱི་གསོ་རིག་རིག་གནས་སྔར་ལས་ལྷག་པའི་སྒོ་ནས་རྒྱུན་འཛིན་དང་གོང་སྤེལ་གཏོང་བའི་ཆེད་ཡིན་ཞིང་། སྨན་ཁང་གི་དོ་དམ་པས“ང་ཚོའི་སྨན་ཁང་ནི་རྒྱལ་ནང་དུ་ཆེས་ཐོག་མར་བཙུགས་པའི་བོད་སྨན་རུས་ནད་ཆེད་ལས་སྨན་ཁང་ཡིན་ལ། ཁྱད་དུ་འཕགས་པའི་སྨན་བཅོས་གསོ་ཐབས་ཀྱིས་ནད་པ་རྣམས་ལ་གཟིགས་སྐྱོང་ལེགས་ཤོས་གནང་ངེས་ཡིན” ཞེས་བཤད་བཞིན་ཡོད།
གསར་འགོད་པས་རྒྱུས་ལོན་བྱས་པ་ལྟར་ན། སྨན་ཁང་འདི་ནི་ཨ་མྲ་ཏ་བོད་ཀྱི་གསོ་རིག་ཚད་ཡོད་ཀུན་ཟིས་གསར་འཛུགས་གནང་བ་ཞིག་ཡིན་ཞིང་། རྡོ་རྗེ་དང་ཤེས་རབ་ཆོས་འཕེལ་སོགས་བོད་ཀྱི་གསོ་རིག་རུས་ནད་དང་ཁོང་ནད་ཚན་ཁག་སྐོར་གྱི་ཆེད་མཁས་གདན་དྲངས་ལ། སྨན་ཁང་འགན་ཁུར་བས་མཚམས་སྦྱོར་བྱས་པ་ལྟར་ན། གསོ་བཅོས་རྒྱུད་རིམ་ཁྲོད་ཁོ་ཚོས་གཙོ་བོ《རྒྱུད་བཞི》རྨང་གཞི་བྱས་ཐོག རུས་ནད་དེ་སྨན་ཁང་འདིའི་ཁྱད་ཐོན་ལས་གཞི་རུ་བཟུང་ནས་སྲོལ་རྒྱུན་བོད་ཀྱི་གསོ་རིག་ལག་རྩལ་གྱིས་ཕྱོགས་ཡོང་ནས་ནད་པར་གསོ་བཅོས་བྱེད་པ་དང་། རུས་ནད་གསོ་བཅོས་ཀྱི་རྩ་བའི་སྟེང་སྨན་ལུམས་ཁང་དང་སྐམ་ཁབ་ཁང་སོགས་བཙུགས་ཡོད་ཅིང་། ཁྱད་འཕགས་ཆེད་སྦྱོང་ཚན་ཁག་ལས་གཞན་ད་དུང་མཆིན་པ་དང་། མཁྲིས་བ། ཕོ་བ། རྒྱུ་མ། སྙིང་དང་ཀླད་པའི་ཁྲག་རྩའི་ནད་ཀྱི་ཚན་ཁག ཕྱི་ལུགས་ཁོང་ནད་ཚན་ཁག་སོགས་ཀྱང་བཙུགས་ཡོད། གཞན་སྨན་ཁང་གི་སྒོ་ཐོག་མར་ཕྱེས་པའི་སྐབས་སུ་ནད་པ་རྣམས་ལ་རིན་མེད་པའམ་རིན་ཕྱེད་ཙམ་བླངས་ཏེ་གསོ་བཅོས་བྱེད་ཀྱི་ཡོད་པ་རེད།
