༄༅།།རྒྱལ་མཆོག་སྐུ་ཕྲེང་ལྔ་བ་ཆེན་པོ་ངག་དབང་བློ་བཟང་རྒྱ་མཚོའི་སྐབས་གསོ་རིག་འགྲོ་ཕན་གླིང་དང་དྲང་སྲོང་འདུས་པའི་གླིང་བཙུགས་པ།

སྤྱི་ལོ1617ལོར་རྒྱལ་མཆོག་སྐུ་ཕྲེང་ལྔ་བ་ཆེན་པོ་ངག་དབང་བློ་བཟང་རྒྱ་མཚོ་གང་ཉིད་ལྷོ་ཁ་འཕྲོངས་རྒྱས་འཕྱིང་བ་སྟག་རྩེར་སྐུ་འཁྲུངས་ཤིང་། སྐུ་ནར་སོན་རྗེས་སྔ་ཕྱིར་པཎ་ཆེན་བློ་བཟང་ཆོས་ཀྱི་རྒྱལ་མཚན་དང་། གཏེར་བདག་གླིང་པ་སོགས་མཁས་གྲུབ་གཉིས་ལྡན་གྱི་དགེ་བའི་བཤེས་གཉེན་དུ་མ་ཡོངས་འཛིན་དུ་བསྟེན་ཏེ་ཤེས་བྱ་རིག་པའི་གནས་མཐའ་དག་ཐུགས་ཀྱི་བུམ་པར་ཡོངས་སུ་གཏམས། མདོ་སྔགས་གསར་རྙིང་གཉིས་སུ་མ་འདུས་པ་མེད་པའི་ཤེས་བྱ་སྤྱི་བྱེ་བྲག་དང་བཅས་པའི་བསྟན་པ་ཡོངས་རྫོགས་ཀྱི་མངའ་བདག་ཆེན་པོར་གྱུར། བོད་ཀྱི་གསོ་བ་རིག་པའི་བསྟན་པ་ཡར་སྐུལ་དང་བརྒྱུད་འཛིན་སློབ་མ་སྐྱེད་སྲིང་འོང་བའི་སླད།
སྤྱི་ལོ1643ལོར་འབྲས་སྤུངས་ཕོ་བྲང་ནུབ་མར་ཉི་ཐང་དྲུང་ཆེན་བློ་བཟང་རྒྱ་མཚོས་སློབ་དཔོན་དང་། བྱང་ངོས་པ་ནང་སོ་དར་རྒྱས་ནས་དོ་དམ་མཛད་པའི་གསོ་རིག་འགྲོ་ཕན་གླིང་དང་། གཞིས་ཀ་རྩེ་བསམ་གྲུབ་རྩེར་ཚ་རོང་པས་དོ་དམ་བྱས་པའི་དྲང་སྲོང་འདུས་པའི་གླིང་སྟེ་སློབ་གྲྭ་ཁག་གཉིས་རྒྱུན་འཛུགས། དུས་དེ་མཚུངས་སུ་ཉི་ཐང་བློ་བཟང་རྒྱ་མཚོའི་དངོས་སློབ་དར་མོ་སྨན་རམས་པ་བློ་བཟང་ཆོས་གྲགས་གསོ་དཔྱད་ལ་སྦྱངས་པ་བླ་ལྷག་ཏུ་མཛད་པའི་ནུས་མཐུ་ལས་སྨན་རམས་པའི་དེང་གི་གསོ་རིག་འབུམ་རམས་པ་དང་བསླབ་གནས་ཧ་ལམ་གཅིག  མཚན་སྙན་ཐོབ། དུས་ཕྱིས་རྒྱལ་བ་ལྔ་བ་ཆེན་པོའི་སྐུའི་བླ་སྨན་པ་གནང་ཞིང་མཁས་པའི་སྙན་གྲགས་ཀྱང་ཆེ་བ་བྱུང་། ཁོང་གི་བརྩམས་ཆོས་སུ། 《བཅུད་ལེན་འཆི་གསོ་བདུད་རྩིའི་ཉིང་ཁུ་འདོད་ལྡན་དགའ་སྐྱེད་མཐོང་བ་འཛུམ་ཤོར་ནོར་བུའི་བང་མཛོད》དང་། 《རིན་ཆེན་གྲང་སྦྱོར་གྱི་གསལ་བྱེད་འཆི་མེད་བདུད་རྩིའི་ཉིང་ཁུ》སོགས་སྨན་དཔེ་ཕུལ་བྱུང་མང་དག་མཆིས། ལྷག་པར་རྒྱུད་ཀྱི《གསེར་མཆན་རྣམ་བཀྲ་གན་མཛོད》ནང་བཤད་རྒྱུད་ལེའུ་བཞི་པ་ལུས་ཀྱི་གནས་ལུགས་འཆད་པའི་སྐབས། རུས་པའི་དུམ་བུ་སུམ་བརྒྱ་དྲུག་ཅུའི་སྐོར་ལ་དཔྱད་པ་གནང་ཆེད་ཀླུ་སྦུག་གཏན་ལ་ཕབ་པ་སོགས་རང་རེའི་གསོ་དཔྱད་ཀྱི་བསྟན་པ་འདིར་བཀའ་དྲིན་བླ་ལྷག་ཏུ་ཆེ་བ་ཞིག་ཡིན།