ཀྲུང་གོའི་སོག་བོད་གསོ་རིག་ཞིབ་འཇུག་ཁང་ཐོག་མ་བཙུགས་པ།

       མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ནི་ཀྲུང་གོའི་སོག་རིགས་བོད་རིགས་རང་སྐྱོང་ཁུལ་གཅིག་པུ་དེ་ཡིན། ཚེས15ཉིན་གསར་འགོད་པས་འབྲེལ་ཡོད་སྡེ་ཁག་ནས་ཤེས་གསལ་ལྟར་ན། མཚོ་ནུབ་ཁུལ་སོག་བོད་གསོ་རིག་མཐུན་ཚོགས་ཀྱིས་སོག་བོད་གསོ་རིག་ཞིབ་འཇུག་ཁང་དངོས་སུ་བཙུགས།
       མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ནི་མཚོ་སྔོན་གྱི་ནུབ་རྒྱུད་དུ་གནས་ཤིང་། ཀྲུང་གོའི་མི་རིགས་རང་སྐྱོང་ཁུལ30ཁྲོད་ཀྱི་སོག་རིགས་བོད་རིགས་རང་སྐྱོང་ཁུལ་གཅིག་པུ་དེ་ཡིན་ལ། ཀྲུང་གོའི་ནང་ཁུལ་སྐམ་སའི་ཆེས་ཆེ་བའི་ཚྭ་མཚོ་མཚོ་སྔོན་པོའི་ནུབ་ཏུ་གནས་པས་མིང་དེ་ལྟར་ཐོགས།
       མཚོ་སྔོན་ཞིང་ཆེན་འཕྲོད་བསྟེན་བདེ་ཐང་ཨུ་ལྷན་གྱིས་བསྒྲགས་པའི་གནས་ཚུལ་ལྟར་ན། གོང་དུ་བརྗོད་པའི་ཞིབ་འཇུག་ཁང་དེར་མཚོ་ནུབ་ཁུལ་སྔོན་ཐོན་མི་རིགས་གསོ་རིག་འཇོན་ལྡན་མི་སྣ་དང“མཚོ་སྐོར་སྨན་བཅོས་རུ་ཁག”གི་ཆེད་མཁས་པ30ལ་ཉེ་བ་འཛོམས་ཤིང་། གནའ་དཔེ་བསྡུ་སྒྲིག་དང་སོག་བོད་གསོ་རིག་རྨང་གཞིའི་གཞུང་ལུགས་དང་སྨན་བཅོས་ལག་རྩལ་ཞིབ་འཇུག སོག་བོད་གསོ་སྨན་སྡེབ་སྦྱོར་གསར་སྤེལ། སོག་བོད་སྨན་རྩྭ་འདེབས་གསོ་དང་ཐོན་ཁུངས་བརྟག་དཔྱད་སོགས་ཞིབ་འཇུག་ཚོ་ཆུང4བཙུགས་ཡོད།
       ཤེས་གསལ་ལྟར་ན། གོང་དུ་བརྗོད་པའི་ཞིབ་འཇུག་ཁང་གིས་སོག་བོད་གསོ་རིག་གི་སྲོལ་རྒྱུན་གཞུང་ལུགས་དང་དེང་རབས་ནད་ཐོག་སྨན་བཅོས་ཚན་ཁག་གི་གསར་སྤེལ་དགོས་མཁོ་དང་ཟུང་འབྲེལ་དམ་ཟབ་བྱས་ཏེ། སོག་བོད་གསོ་རིག་གི་ཐོན་ཁུངས་ལེགས་ཆ་དང་སོག་བོད་གསོ་རིག་གི་རིག་གཞུང་རྒྱུད་འཛིན་དང་བརྗེ་རེས། འཇོན་མི་གསོ་སྐྱོང་། ཚན་རྩལ་ཁྱབ་སྤེལ་དང་དྲིལ་སྒྲོག རིག་གནས་འཛུགས་སྐྲུན་བཅས་གཅིག་ཏུ་བསྡུས་ནས། ནུས་ཤུགས་ཆེན་པོས་སོག་བོད་གསོ་རིག་གི་ལག་རྩལ་གསར་བ་དང་། རྣམ་གྲངས་གསར་བ། ཁྱད་ལྡན་བཅོས་བརྟག་ཞབས་ཞུ་སོགས་ཁྱབ་གདལ་དུ་བཏང་སྟེ། སོག་བོད་གསོ་རིག་ཐོན་ཁུངས་བརྟག་དཔྱད་དང་ཡིག་རིགས་རྒྱུ་ཆ་བསྡུ་སྒྲིག་ལ་སྐུལ་འདེད་གཏོང་བ་དང་། སྨན་རྩྭ་འདེབས་གསོ་དང་སྨན་སྣ་གསར་སྤེལ་གྱི་འབྲེལ་ཡོད་ཁ་ཕྱོགས་ལ་ཤུགས་སྣོན་པ། སོག་བོད་གསོ་རིག་གསུང་རབ་ཀྱི་ཞིབ་འཇུག་གསར་གཏོད་གྲུབ་འབྲས་བེད་སྤྱོད་ཁྱབ་གདལ་དང་ས་ཁོངས་མི་རིགས་ཀྱི་གསོ་རིག་སྨན་ཁང་གི་སྨན་བཅོས་ཆུ་ཚད་དང་ཚན་ཞིབ་ནུས་པ་མཐོར་འདེགས་བཅས་ལ་སྐུལ་འདེད་གཏོང་རྒྱུ་རེད།
       མཚོ་སྔོན་ཞིང་ཆེན་ཀྲུང་ལུགས་བོད་ལུགས་གསོ་རིག་དོ་དམ་ཅུའུ་ཡི་འབྲེལ་ཡོད་སྡེ་ཁག་གི་འགན་ཁུར་པས་བསྟན་པར། མཚོ་ནུབ་ཁུལ་སོག་བོད་གསོ་རིག་མཐུན་ཚོགས་ཀྱིས་སོག་བོད་གསོ་རིག་ཞིབ་འཇུག་ཁང་དངོས་སུ་བཙུགས་པ་དེས། སོག་བོད་གསོ་རིག་གི་རིག་གནས་ཁྱད་ཆོས་སྔར་བས་ལེགས་པའི་སྒོ་ནས་རྒྱུད་འཛིན་དར་སྤེལ་དང་། སོག་བོད་གསོ་རིག་གི་ཚན་ཞིབ་བྱ་བའི་ནུས་པ་དང་ཆུ་ཚད་མཐོར་འདེགས་སུ་གཏོང་ཐུབ་པ་མ་ཟད། དེ་སོག་བོད་གསོ་རིག་རིག་གནས་དྲིལ་སྒྲོག་བྱེད་པའི་གཡུལ་ས་དང་སྐར་ཁུང་ཞིག་ཏུ་འགྱུར་སྲིད།
       གཞན་ཤེས་རྟོགས་བྱུང་བར། ཉེ་བའི་ལོ་འགའི་རིང་། མཚོ་སྔོན་གྱིས་ཞིང་ཆེན་ཡོངས་སུ་ཀྲུང་བོད་ལུགས་གསོ་རིག་སྨན་བཅོས་སྒྲིག་གཞིའི་འདེགས་སྐྱོར་ནུས་པར་མུ་མཐུད་དུ་ཤུགས་བསྣན་པ་དང་། རྒྱལ་ཡོངས་ཀྲུང་བོད་ལུགས་གསོ་རིག་གི་མིང་གྲགས་ལྡན་པའི་ཆེད་མཁས་པའི་རྒྱུད་འཛིན་ལས་སྒྲུབ་ཁང16འཛུགས་སྐྲུན་བྱས་ལ། བོད་ལུགས་གསོ་རིག་ཀྱི་གནའ་དཔེ་རྒྱུ་ཆ2000ལྷག་མྱུར་སྐྱོབ་འཚོལ་བསྡུ་བྱས་ཤིང་། རིམ་པ་སོ་སོའི་ཀྲུང་བོད་ལུགས་གསོ་རིག་སྨན་ཁང་གིས་ཀྲུང་བོད་ལུགས་གསོ་རིག་གི་སྔོན་འགོག་དང་བདེ་ཐང་སྲུང་སྐྱོང་། ལུས་ཁམས་གསོ་བ། བདེ་ཐང་སླར་གསོ་སོགས་ཀྱི་ཕྱོགས་སུ་ནུས་པ་འདོན་དང་འདོན་བཞིན་ཡོད། །