༄༅། ཟས་ཀྱི་ཚུལ་ཤེས་པར་བྱ་བ།

    ཟས་ཀྱི་ཚུལ་ཤེས་པར་བྱ་བ་ལའང་འབྲུ་དང་ཤ་དང་སྣུམ་དང་སྔོ་ངད་དང་གཡོས་སུ་སྦྱར་བ་སྟེ་རྣམ་པ་ལྔ་ཡོད་ལ། འབྲུའི་ཚུལ་ཤེས་པར་བྱ་བ་ལའང་གཉིས་ཏེ། གྲ་མ་ཅན་གྱི་རིགས་དང༌། གང་བུ་ཅན་གྱི་རིགས་སོ།། ཟས་ཀྱི་ཚུལ་ཤེས་པར་བྱ་བ་དེ་ལ་གྲ་མ་ཅན་གྱི་འབྲུའི་སྡེ་ལ་ཉེ་བར་བསྡུ་ན། འབྲས་དང་ཁྲེ་དང་ཁྲ་མ་དང་གྲོ་དང་ནས་དང་སོ་བ་དང་སྲ་[སྲེ]ད་དང་ལ་སོགས་པ་ཞེས་པའི་སྒོ་ནས་རང་རང་གི་བྱེ་བྲག་སོ་སོ་དང་བཅས་པ་ཀུན་ཀྱང་རགས་པའི་དབང་དུ་བྱས་ན་རོ་དང་ཞུ་རྗེས་གཉིས་ཀ་མངར་ཞིང་ནུས་པས་རོ་ཙ་བ་དང༌། རླུང་འཇོམས་པ་དང༌། ལུས་སྟོབས་དང་བད་ཀན་དག་ཀྱང་ཉེ་བར་སྐྱེད་པར་བྱེད་པ་ཡིན་ནོ།། གྲ་མ་ཅན་དེ་ལ་བྱེ་བྲག་ཏུ་འབྲས་ནི་ལྗང་པ་གྲོ་བཞིན་ཕྲ་བ་སྙེ་མ་འདམ་སྙེ་འདྲ་བ་རྩེ་ཐུར་བལྟས་དེའི་འབྲུ་དཀར་མོ་དེ་ནི་སྣུམ་འཇམ་བསིལ་ལ་ཡང་བའི་ནུས་པ་དང་ལྡན་པས་ཉེས་པ་གསུམ་ག་སེལ་ཞིང་རོ་ཙ་བ་དང་འཁྲུ་སྐྱུག་གཅོད་པར་བྱེད།