༄༅།།ཐ་མལ་ནད་མེད་ལས་རྒྱུན་སྤྱོད་ཀྱི་སྐོར།

དུས་མིན་འཆི་དང་ནད་ཀྱི་རྒྱུ།།ལྷ་ཁང་རྙིང་བ་དག་ཏུ་གཅིག་མི་ཉལ།།སྒོར་མི་ཉལ་ཏེ་སྲང་མདོར་སྤང་།།ས་བདག་ཡོད་པའི་མཚོ་དང་ནི།།ན་གཉན་ཆུ་མིག་དག་ཏུ་དྲི་མི་བྱ།།ལྷ་འདྲེ་གཉན་པོ་གནས་པའི་བརྟེན་ས་ལ།།གནོད་པར་མི་བྱ་བན་བོན་ལ་ཡང་གནོད་མི་བྱ།།དོན་མེད་ཁང་སྟོངས་བྲག་ཕུག་དག་ཏུ་འགྲོ་མི་བྱ།།རོ་ཡི་སྔོན་དུ་མི་འགྲོ་བསྒྲུབ་གཏོར་སྔོན་མི་འགྲོ།།རི་སྣ་དྲག་པོ་མགོ་རྡུམ་དག་ཏུ་འགྲོ་འདུག་མི་བྱའོ།།བ་ལང་སྣ་འདྲ་སྲིན་མོས་བྲད་པ་འདྲ།།རྟ་རོ་ཁ་ཕྱེས་འདྲ་དང་ལྷ་འདྲེ་ཡོད་སར་གནས་མི་བཅའ།།དམ་བཅའ་མི་བྱ་ཡི་དམ་དུས་གཏོར་བཅག་མི་བྱ།།རིང་པོའི་སྐད་དང་ཁ་དང་མིག་མི་བགྲད།།འགོ་བའི་ནད་ཡོད་ཕྱོགས་སུ་མི་འགྲོ་འོ།།མཐུ་དང་དམ་ཆོས་ཉམས་པའི་ཕྱོགས་སུ་འགྲོ་མི་བྱ།།གཅན་གཟན་མ་རུངས་གནས་དང་མཚོན་གྱིས་མི་ཚད་དོ།།དབྱར་གྱི་གྲོང་པ་ངམ་གྲོགས་འཐིབ་འོག་ཏུ་འདུག་མི་བྱ།།ཆུ་བོ་ཆེན་པོ་དག་ལ་རྩེ་བར་ཉམས་མི་ཚད།།རྟ་དང་གླང་པོ་མ་རུངས་འདུག་པའི་སྔོན་མི་འགྲོ།།གཡང་ལ་མི་འཛེག་མཐོན་པོ་དག་ཏུ་འདུག་མི་བྱ།།བུད་མེད་རྒན་དང་ལྷན་ཅིག་ཉལ་བར་མི་བྱའོ།།ཤིང་གཅིག་ཆུ་གླིང་དག་དང་བླ་གབ་མེད་པར་ཉལ་མི་བྱ།།དུག་ལ་ཉམས་མི་ཚད་དེ་མཚོན་རྣོན་དག་ལ་དེ་བཞིན་ནོ།།མི་རྣམས་ཀུན་ལ་གདུག་དང་རྩུབ་པ་སྤང་བར་བྱ།།རྒན་པ་དག་ལ་མ་གུས་པ་ཡང་སྤང་།།འཆི་བ་བཟློག་པ་སྨན་དང་སྔགས།།དགེ་བས་བཟློག་སྟེ་དགེ་ལ་འབད།།ནད་ཀྱི་རྒྱུ་ནི་ལྟོགས་རྗེས་འགྲངས་པ་དང་།།སྣུམ་རྗེས་སྐྱ་བ་ནད་ཀྱི་རྒྱུ།།སྐྱ་རྗེས་ཟས་མང་ཟོས་པ་ནད་དུ་འགྲོ།།དལ་རྗེས་དྲག་ཤུལ་ནད་ཀྱི་རྒྱུ།།བཀུག་པ་དྲག་དང་གྲང་བ་རླན།།བཅུད་ཟོས་རླན་ལ་འདུག་པས་ནད།།འགྲངས་དང་སྐོམ་རྗེས་མ་བཅག་ནད།།ཤེད་ཆུང་དྲག་ཤུལ་བྱས་པས་ནད།།མཁྲིས་པ་ཅན་གྱིས་དྲོད་བསྟེན་མཁྲིས་པ་འཕེལ།།བད་ཀན་ཅན་གྱིས་བཅུད་བསྟེན་བད་ཀན་འཕེལ་བར་འགྱུར།།རླུང་ནད་བཅུད་མེད་བསྟེན་པས་རླུང་ནད་འཕེལ་བར་འགྱུར།།