༄༅། །«རྒྱུད་བཞི»དང«སྙིང་པོ་བསྡུས་པའི»ཁྱད་འབྲེལ།

དཔལ་ཆེན་གསང་བདག
        དྲི་བ། ད་ལྟའི་དུས་འདིར་མི་རིགས་ཀྱི་ཁྱད་པར་ལ་མ་ལྟོས་པར་བོད་ལུགས་གསོ་རིག་སྨྲ་བ་དག་གི་ཁྲོད་དུ་གཞུང་ལུགས་ཆེན་པོ་དཔལ་ལྡན་རྒྱུད་བཞི་དང་ཡན་ལག་བརྒྱད་པའི་སྙིང་བོ་བསྡུས་པ་གཉིས་ཀྱི་ནང་དོན་ཕལ་ཆེར་འདྲ་མཚུངས་རེད་ཟེར་མཁན་དང་། དེ་ལས་ལྡོག་སྟེ་རིགས་པ་འདྲེན་སྟངས་དང་གཞུང་ལུགས་ཀྱི་གོ་རིམ་འཇོག་སྟངས་སོགས་ལ་བལྟས་ན་ཁྱད་པར་ཤིན་ཏུ་ཆེ་བར་འདོད་མཁན་བཅས་ལུགས་གཉིས་མཆིས། གཞུང་ལུགས་ཆེན་པོ་འདི་གཉིས་ཆེ་ས་ནས་བསྡུར་ཏེ་བལྟས་ན་སོ་སོའི་ཁྱད་ཆོས་དང་། ཕན་ཚུན་དབར་གྱི་འབྲེལ་བ་ཇི་ལྟར་ཡིན་ནམ།
བྱ་མདོ་ཀླུ་བྱམས་རྒྱལ།
        ལན། རྒྱ་གར་ནུབ་ཕྱོགས་སུ་འཁྲུངས་པའི་མཁས་པ་ཆེན་པོ་དྲང་སྲོང་ཕ་ཁོལ་གྱིས་སྤྱི་ལོ་དུས་རབས་དྲུག་པའི་ཡས་མས་སུ་མཛད་པའི་ཚེའི་རིག་བྱེད་ཀྱི་གསུང་རབ་བསྟན་བཅོས་ལེགས་སྦྱར་སྐད་དུ་ཨཥྚཨཾ་ག་ཧྲྀ་ད་ཡ་ཞེས་བྱ་བ་བོད་སྐད་དུ་ཡན་ལག་བརྒྱད་པའི་སྙིང་བོ་བསྡུས་པ་དང་། བོད་ཡུལ་དབུས་ཀྱི་སྟོད་ལུང་སྐྱིད་སྣར་འཁྲུངས་པའི་རྗེ་བཙུན་གཡུ་ཐོག་རྙིང་མ་ཡོན་ཏན་མགོན་པོས་སྤྱི་ལོ་དུས་རབས་བརྒྱད་པར་བརྩམས་ཤིང་བོད་གངས་ཅན་པའི་ཡུལ་དུས་དབང་པོའི་སྒོ་དང་ཉེ་བར་འཚམ་པའི་དཔལ་ལྡན་རྒྱུད་བཞི་གཉིས་ནི། གནའ་བོའི་རྒྱ་གར་དང་བོད་རིགས་མི་དམངས་ཀྱིས་འཛམ་གླིང་གསོ་དཔྱད་འཕེལ་རྒྱས་ལ་བཞག་པའི་རླབས་ཆེན་གྱི་ཕྱག་རྗེས་ལགས་པ་དང་། འཛམ་གླིང་སྲོན་རྒྱུན་གསོ་རིག་གི་གསུང་རབ་བསྟན་བཅོས་གྲགས་ཅན་ཡིན་པ་ཕལ་ཆེར་འདྲ་འདྲ་རེད། འོན་ཀྱང་གཞུང་དེ་གཉིས་བརྩམས་གྲུབ་བྱུང་བའི་དུས་རབས་དང་ཡུལ་ཁམས་ཁོར་ཡུག་གི་ཆ་ནས་བཤད་ན་ཧེ་བག་དང་བར་ཐག་ཡོད་པ་མ་ཟད། བྱེ་བྲག་གི་རྗོད་བྱེད་དང་ཞིབ་ཕྲའི་ནང་དོན་ཐད་ནས་འདྲ་ས་དང་མི་འདྲ་ས། ཡང་ན་ཁྱད་པར་ཕྲ་མོ་མང་མང་ཞིག་འབྱུང་མོད། འདིར་ཐོག་མར་གཞུང་དེ་གཉི་གའི་སྤྱི་ཁོག་ལ་བམ་ལྟ་བྱས་པས། དཔལ་ལྡན་རྒྱུད་བཞི་ནི་སྐབས་ཆེན་པོ་བཞི་དང་། སྙིང་བོ་བསྡུས་པ་དྲུག་གིས་གྲུབ་པ་དང་། ལེའུའི་གྲངས་ལ་སྔ་མ་ལེའུ་བརྒྱ་དང་ལྔ་བཅུ་ང་དྲུག་དང་། ཕྱི་མ་བརྒྱད་དང་ཉི་ཤུ་རྐྱང་ཡིན་པ་བཅས་ཀྱི་ཁྱད་པར་མཐོང་ལ། གཞུང་དེ་གཉི་ག་གྲུབ་པའི་རྒྱབ་ལྗོངས་ལ་བསམ་ན་གཞུང་གི་བྱེད་པོ་གང་གཉིས་ཀ་ནང་པ་སངས་རྒྱས་པ་ཡིན་ཞིང་སྔ་ཕྱིའི་དུས་རབས་སུ་རྒྱ་གར་དང་བོད་དུ་སངས་རྒྱས་ཀྱི་བསྟན་པ་སྒོ་ཀུན་ནས་དར་རྒྱས་ཆེན་པོ་འབྱུང་བཞིན་པའི་སྤྱི་ཚོགས་ནང་བརྩམས་གྲུབ་བྱུང་བ་བཅས་གཅིག་པར་སྣང་བ་མ་ཟད། གཞུང་མཚན་གྱི་ཐད་ནས་བཤད་ནའང་གཉིས་ཀའི་མཚན་བྱང་དུ་ཡན་ལག་བརྒྱད་པ་ཞེས་དང་སྙིང་བོ་ཞེས་མཆིས་པའང་འདྲ་འདྲ་རེད། 
        འོན་ཏེ་ཅུང་ཞིབ་ཏུ་བཏང་ན། གཞུང་ཆེན་དེ་གཉིས་ཀྱི་སྤྱི་ཆིངས་དང་། ས་བཅད། ལེའུ་གྲངས་སོགས་ལ་ཁྱད་པར་མཆིས་པ་མ་ཟད། ད་དུང་གནད་ཆེ་བ་ཞིག་ལ་བརྗོད་བྱའི་ཁྱབ་ཁོངས་ཐད་ནས་མི་འདྲ་ས་མང་དུ་སྣང་སྟེ། ཐོག་མར་ལུས་ནད་སོགས་ཀྱི་གཞུང་ལུགས་སྐོར་ལ་མཚོན་ན། རྩ་རྒྱུད་ནི་གཞི་རྟགས་གསོ་གསུམ་གྱི་དགོངས་དོན་ཚུད་ཅིང་སྡོང་འགྲེམས་ཀྱི་ལམ་ནས་སྤེལ་བའི་བོད་ཀྱི་གསོ་བ་རིག་པའི་བརྗོད་བྱེད་ཇི་སྙེད་འདུས་པའི་སྡོམ་ཆིངས་སམ་དཀར་ཆག་ཀུན་གསལ་མ་ཞིག་ཏུ་བལྟས་ཆོག་པས། སྙིང་བོ་བསྡུས་པར་དེ་ལྟའི་ཕྱི་རྣམ་ཙམ་ཡང་མི་སྣང་བ་དང་། བཤད་རྒྱུད་ལས་གྲུབ་པ་ལུས་འཆད་སྐབས་བདུན་ཕྲག་སོ་བརྒྱད་ཀྱི་ཞིབ་ཕྲའི་འཕེལ་ཚུལ་དང་གནས་སྐབས་གསུམ་གྱི་བསྟན་དོན་སོགས་དང་། རྩ་འཁོར་སོགས་གནས་ལུགས་ཀྱི་གསང་གནད་སྐོར་བརྒྱད་པ་མཁན་པོས་ཚིག་མགོ་ཙམ་ཡང་གླེང་མེད་ལ། དེ་བཞིན་འཕེལ་འགྲིབ་ནད་ལས་ནད་ཀྱི་རྒྱུ་གསུམ་དང་རྐྱེན་བཞི་དང་འཇུག་སྒོ་དྲུག་དང་ལྡོག་རྒྱུ་བཅུ་གཉིས་དང་ནད་ཀྱི་མཚན་ཉིད་ལས་འཁྲུགས་པའི་རྟགས་སོགས་སྙིང་བསྡུས་སུ་མི་སྣང་བ་དང་། གསོ་བྱེད་ཐབས་སྐོར་ནས་སྤྱི་དང་བྱེ་བྲག་ཁྱད་པར་གསུམ་གྱིས་བསྡུས་པའི་གསོ་ཚུལ་གྱི་ཤེས་བྱ་རྣམས་ནི་བོད་ལུགས་ཀྱི་ཐུན་མོང་མ་ཡིན་པའི་སྨན་བཅོས་རྩ་དོན་དུ་མངོན་ཅིང་། སྙིང་བསྡུས་སུ་གསོ་ཐབས་དངོས་ཀྱི་གཉེན་པོ་དང་བཅས་པའི་ཆོ་ག་མང་དུ་ཡོད་པར་ཁ་ཤས་ནི་ཕྱི་བཅོས་ཀྱི་ཆོ་ག་དང་མང་ཆེ་བ་སྨན་གྱི་སྦྱོར་བ་རེད་ལ། དེ་ལས་ནད་རིགས་སྔོན་འགོག་དང་བཅུད་ལེན་རོ་ཙ་སྐོར་གྱི་སྦྱོར་བ་ཧ་ཅང་མང་བའི་ཚོད་དུ་འདུག་ཀྱང་གཏན་ཚིགས་ཀྱི་རང་བཞིན་ལྡན་པའི་གསོ་ཚུལ་གྲས་ཆེར་མི་མཐོང་། གཞན་བྱ་བྱེད་སྨན་པ་ནི་རང་རེའི་རྒྱུད་དུ། གསོ་བྱ་གསོ་བྱེད་ཇི་ལྟར་གསོ་བ་དང་གསོ་བ་བོ་སྟེ་གསོ་རིག་གི་མདོ་དོན་རྩ་བ་བཞིར་བསྡུས་པའི་ཡ་གྱལ་ཞིག་ཏུ་བཞག་ཅིང་། སྙིང་རྗེ་བྱམས་པ་བཅས་ཚད་མེད་བཞི་དང་དམ་ཚིག་ལྡན་པ་སོགས་ནང་རིག་གི་ལྟ་བ་དང་སྦྱར་ནས་འཚོ་བྱེད་སྨན་པའི་ཆ་རྐྱེན་དང་ལས་དང་དབྱེ་བ་སོགས་ཞིབ་རྒྱས་སུ་བསྟན་ཡོད་མོད་བརྒྱད་པའི་སྙིང་བསྡུས་ནང་དེའི་སྐོར་གྱི་གྲིབ་མ་ཙམ་ཡང་མི་སྣང་ངོ་།།
        ནད་ཐོག་ལག་ལེན་གྱི་སྐོར་ནས་བཤད་ན། ནད་ཀུན་གྱི་སྣ་འདྲེན་དུ་གསུངས་པའི་རླུང་ནད་ཉིང་སྙིང་བོ་བསྡུས་པར་ནད་གཞི་དང་གསོ་བའི་གནས་ཀྱི་མཇུག་ཏུ་བསྟན་ཡོད་པ་དང་། གཞན་མཁྲིས་པ་དང་ལྷག་ཏུ་བད་ཀན་ནད་གསོ་བའི་ནང་དོན་ལོགས་སུ་ལེའུ་བྱས་ནས་གསུངས་མེད་ཚུལ་སོགས་ལ་གཞིགས་ན་ཚེ་རིག་གཞུང་དུ་ཉེས་གསུམ་གསོ་བའི་གཞུང་ལུགས་ཆ་ཚང་མིན་ཞིང་གཏན་ཚིགས་སུ་གྲུབ་མེད་པ་ངང་གིས་ཤེས་ཤིང་། དེ་བཞིན་ཚད་པ་གསོ་བ་དང་། དོན་སྣོད་གསོ་བ། མོ་ནད་གསོ་བ་བཅས་ཀྱི་བརྗོད་བྱའང་ཆད་འདུག་པ་བཅས་ཀྱི་སྟེང་ནས་རྒྱ་གཞུང་སྙིང་བོ་བསྡུས་པ་དང་བོད་གཞུང་དཔལ་ལྡན་རྒྱུད་བཞི་གཉིས་ཀྱི་ནད་གསོ་སྨན་བཅོས་དབར་དུ་ཧེ་བག་ཆེན་པོ་ཡོད་ཚུལ་རྟོགས་ནུས་ལ། མན་ངག་ཡོན་ཏན་རྒྱུད་དུ་ནད་རེ་རེའི་རྒྱུ་རྐྱེན་དང་། དབྱེ་བ། རྟགས། བཅོས་ཐབས། ཕྱི་རྗེས། ལོག་གནོན། ཐ་ན་སྲུང་འགོག་དང་བཅས་གོ་རིམ་མ་འཆོལ་བར་སྡེབ་གཅིག་ཏུ་བཀོལ་བ་ནི་དེང་རབས་གསོ་རིག་ཚན་རིག་གི་ནད་ཐོག་རིགས་ལམ་ལའང་ཅོ་འདྲི་བའི་ཚད་དུ་སླེབས་འདུག་ཕྱིར། ཡན་ལག་བརྒྱད་པའི་སྙིང་བསྡུས་ཀྱི་ནད་གསོ་བའི་བརྗོད་བྱ་དང་བསྡུར་བས་རིགས་འགྲོས་དང་། རྗོད་སྟངས། སྤྱི་ཁོག་བཅས་ཕྱོགས་གང་ཐད་ནས་ཐོད་བརྒལ་གསར་བ་བྱུང་འདུག
        ལྷག་ཏུ་ཕྱི་རྒྱུད་ཀྱི་བརྟག་པ་རྩ་ཆུའི་མདོ་ལྟ་བུར་མཚོན་ན། བོད་ཀྱི་ཡུལ་དུ་རྩ་ཆུའི་བརྟག་པ་བསྟན།། ཞེས་གསུངས་པ་ལྟར། སྨན་པའི་རྣམ་དཔྱོད་ཕྲ་མོའི་ཐབས་རྩལ་དང་ཉམས་མྱོང་ཟུང་འབྲེལ་གྱིས་བརྟག་པའི་རྩ་དང་། དུས་གསུམ་བརྟག་ཚུལ་དགུ་སོགས་དཔྱད་པའི་དྲི་ཆུའི་བརྟག་ཐབས་གཉིས་ནི་ནམ་ཡང་བོད་ལུགས་གསོ་རིག་གི་ཐུན་མིན་ཁྱད་ཆོས་ཤིན་ཏུ་ལྟ་སྟེ། སྙིང་བོ་བསྡུས་པ་གཙོས་རྒྱ་གར་ཚེ་རིག་སྐོར་གྱི་གཞུང་དང་མན་ངག་ལོ་རྒྱུས་སོགས་གང་དུའང་མཇལ་བའི་གོ་སྐབས་ཡེ་ནས་དབེན་བའི་ཕྱིར། གཞན་ཞི་བྱེད་སྨན་གྱི་མདོར་ཐང་ཕྱེ་རིལ་བུ་སོགས་སྔ་ཕྱི་རིམ་པས་གཏན་ཚིགས་སུ་གྲུབ་སྟངས་དང་། མེ་བཙའ་དང་རྩ་སྦྱོངས་དང་ལུམས་བཅོས་སོགས་གསལ་ཁ་ལྡན་ཞིང་ལྷུ་ལག་ཚང་བར་བསྟན་ཡོད་པ་དག་ཀྱང་རྒྱུད་ཀྱི་རྒྱལ་པོ་གསང་བ་མན་ངག་གི་རྒྱུད་འདིའི་དགེ་མཚན་ཞིག་སྟེ་བརྒྱད་པ་མཁན་པོའི་གཞུང་དུ་ཆད་པའི་མཐའ་རུ་ལྷུང་བ་མངོན་གསལ་ལོ།། དེ་མིན་གཞུང་ཆེན་གཉིས་ཀྱི་སྤྱི་ཁོག་རྩོམ་སྒྲིག་གི་ཁྱད་པར་ནི། གཅིག་ནི་བརྗོད་བྱ་གཅིག་ཏུ་མ་ངེས་ཤིང་གཏན་ཚིགས་ཀྱི་གོ་རིམ་འཆོལ་བ་དང་། དོན་ལ་བསྐྱར་ཟློས་མང་ཞིང་ནང་དོན་ཐར་ཐོར་བ། རིགས་པའི་གཞུང་ལུགས་ཀྱི་རང་བཞིན་དམན་པ་སོགས་ཀྱི་ཞན་ཆ་མཆིས་མོད། ཅིག་ཤོས་ནི་དེ་ལས་ལྡོག་སྟེ་གཞི་རྟགས་གསོ་གསུམ་དང་ལུས་ནད་གཉེན་པོ་སོགས་གང་གི་སྐབས་ནའང་གཏན་ཚིགས་ལྡན་ཞིང་རིགས་ལམ་གསལ་བ། བརྗོད་བྱ་ཆ་ཚང་ཞིང་ཅི་ཡང་བཟླས་མེད་ལ་རྗོད་བྱེད་ཚགས་དམ་ཞིང་ཚིག་བརླིང་བ། གཞུང་ལུགས་རང་བཞིན་དང་མ་ལག་རང་བཞིན་ཆེས་ཆེར་ལྡན་པའི་གསུང་རབ་བསྟན་བཅོས་ཤིག་ཏུ་མངོན་པས་ན་འདས་པའི་འཛམ་གླིང་སྲོལ་རྒྱུན་གསོ་དཔྱད་ཀྱི་གཞུང་ལུགས་ཁྲོད་དུ་དོ་ཟླ་ཕེར་བ་ཉུང་བར་སྣང་།