བོད་ཀྱི་གསོ་རིག་མཁས་དབང་བྱམས་པ་འཕྲིན་ལས་མཆོག་ནས་རྒྱུད་བཞིའི་སྨན་ཐང་སྐོར་གྱི་གནས་ཚུལ་ངོ་སྤྲོད་གནང་བའི་ཟིན་ཐོ།

རྩོམ་པ་པོ་ངོ་སྤྲོད།
       རྒྱལ་སྨན་སློབ་དཔོན་བྱམས་པ་འཕྲིན་ལས་ནི་ཉེ་རབས་བོད་ཀྱི་སྨན་རྩིས་རིག་པའི་བསྟན་པར་མཛད་རྗེས་བླ་ལྷག་ཏུ་ཆེ་བའི་མཁས་དབང་དང་དོ་དམ་ལ་མཁས་པའི་དབུ་འཛིན་ཞིག་ཡིན། ཁོང་གིས་ལྕགས་རི་འགྲོ་ཕན་གླིང་དང་སྨན་རྩིས་ཁང་གི་སྔར་སྲོལ་རྒྱུན་འཛིན་དང་། དུས་རབས་དང་མཐུན་པར་ཡར་རྒྱས་གོང་འཕེལ་གཏོང་ཆེད། ཕྱོགས་དང་རིས་སུ་མེད་པའི་མཁས་དབང་གདན་འདྲེན་དང་། དཔེ་རྙིང་པར་ཤིང་དང་གནའ་ཤུལ་རིག་དངོས་སྲུང་སྐྱོབ། སྨན་ཐང་འགྲེལ་པ་དང་། གསོ་རིག་ཀུན་བཏུས། རྩིས་རིག་ཀུན་བཏུས་སོགས་རྩོམ་སྒྲིག་གི་གཙོ་འགན་བཞེས་པ། སྔར་ལས་ལྷག་པའི་མི་སྣ་གསོ་སྐྱོང་ཆེད་དུ་གསོ་རིག་སློབ་གྲྭ་ཆེ་འབྲིང་བཙུགས་པ་དང་ཟབ་སྦྱོང་འཛིན་གྲྭ་གཉེར་བ། སྨན་ཁང་གི་ནད་སྡོད་ཚན་པ་གསར་འཛུགས་དང་། བོད་སྨན་བཟོ་གྲྭ་ཆེད་འཛུགས། ཚན་ཁག་རྒྱ་བསྐྱེད་དང་དེང་རབས་གཞོགས་འདེགས་བརྟག་དཔྱད་འཕྲུལ་ཆས་སྤྱད་པ། གནམ་རིག་སྐར་རྩིས་སློབ་ཚོགས་བཙུགས་པ་དང་ལོ་ཐོ་རྩོམ་སྒྲིག་རྒྱུན་མཐུད་ཡར་རྒྱས་བཏང་བ་སོགས་མིང་དོན་མཚུངས་པའི་སྒོ་ནས་བོད་ལྗོངས་ཀྱི་ས་གནས་ཁག་ཙམ་མ་ཟད་མཚོ་སྔོན་སོགས་ལྗོངས་དང་ཞིང་ཆེན་ཁག་གི་བོད་ཀྱི་སྨན་རྩིས་བསྟན་པའི་དེད་དཔོན་ཆེན་པོར་གྱུར་ཡོད་ལ། བོད་ཀྱི་གསོ་རིག་ལོ་རྒྱུས་ཐོག་ཐེངས་དང་པོ་ཡིན་པའི་རྒྱལ་སྨན་སློབ་དཔོན་ཆེན་མོའི་མཚན་གནས་ཀྱང་བཞེས་ཡོད།