ཐབ་ཚང་ནང་ནས་གསོ་རིག་རྒྱུད་བཞི་བཀླགས་པའི་མྱོང་ཚོར།

       སྐད་ཆ་འདི་ནི་ཐོག་མའི་ཆ་འཕྲིན་ཙམ་ལས་ཞིབ་འཇུག་གི་དཔྱད་འབྲས་མིན་ན་ཡང་། གསོ་རིག་ཡིག་རྙིང་མང་པོ་ཞིག་བམ་ཀློག་གིས་བསྡུར་བ་བྱས་པའི་མྱོང་ཚོར་ལས་ད་ལྟའི་རྒྱུད་བཞི་འདི་ནི་སུམ་སྟོན་ཡེ་ཤེས་གཟུངས་ཀྱིས། གཡུ་ཐོག་མགོན་པོའི་གསུང་གཙོར་བྱས་གནའ་བོའི་གསོ་རིག་མང་པོའི་སྙིང་དོན་རྣམས་ཕྱོགས་སྒྲིག་གནང་བ་ཞིག་ཏུ་མཐོང་།
       དེ་ལས་རྒྱུད་བཞིའི་རྩ་རྒྱུད་ནི་བཻ་རོ་ཙ་ན་སོགས་ཀྱིས་བརྩམས་བསྒྱུར་གང་རུང་གནང་བ་ཞིག་ལ་འཕྲི་བསྣན་ཅུང་ཟད་ཡོད་པ་ཞིག་ཏུ་སྣང་། བཤད་རྒྱུད་ནི་གཡུ་ཐོག་མགོན་པོའི་རྩ་རྒྱུད་ཀྱི་འགྲོས་ལྟར་བརྩམས་པ་དང་། མན་ངག་རྒྱུད་དང་ཕྱི་མ་རྒྱུད་གཉིས་གཡུ་ཐོག་མགོན་པོའི་གསུང་གཙོར་བོར་གྱུར་པ་གནའ་བོའི་གསོ་རིག་མང་པོའི་སྙིང་པོའི་དོན་རྣམས། སུམ་སྟོན་གྱིས་གོང་འོག་བསྒྲིགས་ཏེ་གླིང་གཞི་སོགས་རྩ་རྒྱུད་ལྟར་བཀོད་རྗེས་སྔར་ཡོད་ཀྱི་རྩ་རྒྱུད་དང་། བཤད་རྒྱུད་བཅས་བཞི་པོ་དེ་ཕྱོགས་གཅིག་ཏུ་བསྒྲིགས་ནས་གྲུབ་པ་ཞིག་ཏུ་མཐོང་།
       འོན་ཀྱང་ད་ཡོད་ཀྱི་རྒྱུད་བཞི་སྤར་མ་རྣམས་ཀྱི་བར་ལ་ཡང་ཁྱད་པར་ཆེན་པོ་ཡོད་པ་དང་། དཔེ་རྙིང་བྲིས་མ་དང་ཉེ་བའི་ཤིང་སྤར་མའི་བར་ལ་དེ་བས་ཀྱང་བར་ཐག་རིང་པོ་ཡོད་པ་སོགས་ལ་བལྟས་ན། དུས་རབས་ཀྱི་འགྲོས་དང་མཐུན་པར་ཉམས་མྱོང་གིས་ལེགས་བཅོས་སམ་ཁ་གསལ་དུ་གཏོང་གི་ཡོད་པ་ཤེས་ཐུབ། དེས་ན་ཐོག་མའི་རྒྱུད་བཞི་ཇི་ལྟར་གྲུབ་པའི་སྐོར་ཤེས་པར་འདོད་ན་གསོ་རིག་དཔེ་རྙིང་ལ་ཞིབ་འཇུག་བྱ་རྒྱུ་གལ་ཆེན་པོ་རེད།
       དེ་ཡང་གསོ་རིག་རྒྱུད་བཞིའི་བརྗོད་དོན་ནི་ཟས་སྨན་གཉིས་ཀྱིས་ལུས་ཁམས་བདེ་ཐང་དུ་གནས་པར་བྱེད་པའི་ཐབས་ཤེས་ཤིག་ཡིན་ལ། དེ་ནི་ལོ་ངོ་ཁྲི་སྟོང་མང་པོའི་རིང་མདོ་དབུས་མཐོ་སྒང་གི་ས་ཆ་འདིར་གནས་པའི་མིའི་འཚོ་བའི་ཉམས་མྱོང་ལ། འཛམ་གླིང་ཡུལ་གྲུ་མང་པོའི་གསོ་རིག་གི་ཤེས་བྱ་དུ་མས་བརྒྱན་ཏེ་རིག་གཞུང་མ་ལག་ཅན་དུ་ཆག་པ་ལས། གཡུ་ཐོག་མགོན་པོས་ཡང་བསྐྱར་ནང་བསྟན་མཚན་ཉིད་རིག་པའི་གཞུང་གི་འགྲོས་དང་མཐུན་པར་སྒྲིག་པ་ནི། བདུད་རྩི་སྙིང་པོ་གསང་བ་མན་ངག་གི་རྒྱུད། ཅེས་བྱ་བ་དེ་ཡིན།
       དེ་རྗེས་སུ་སུམ་སྟོན་གྱིས་ཕྱོགས་སྒྲིག་གནང་བའི་སྐབས་སུ་ཡན་ལག་བརྒྱད་པའི་མིང་བསྣན་ཏེ། ད་ལྟའི་བདུད་རྩི་སྙིང་པོ་ཡན་ལག་བརྒྱད་པ་གསང་བ་མན་ངག་གི་རྒྱུད། ཅེས་པའི་མཚན་དང་། རྒྱུད་ཀྱི་གླིང་གཞི་དང་རྒྱུད་བཞི་པོ་སྔ་ཕྱིའི་གོ་རིམ་ལྟར་བྱུང་ཚུལ་དང་འབྲེལ་ཏེ་གླེགས་བམ་གཅིག་ཏུ་སྒྲིག་པ་ཞིག་ཡིན་པར་སྣང་།
       ད་ལྟ་སྐད་ཆ་འདི་འདྲ་ཞིག་བཤད་ཡོང་དུས་ཤེས་ཡོན་པའི་སྡེ་ཁག་ནས། གད་མོ་ཤོར་མཁན་ཡང་མི་ཉུང་བ་ཞིག་ཡོང་སྲིད་ལ། བཀའ་བཀྱོན་གནང་མི་ཡང་ཡོང་ཚོད་རེད། ཡང་ཐབ་ཚང་ནས་སྐད་ཆ་འདི་འདྲ་མ་གཏོགས་ཅི་བཤད་ཤེས་སྙམ་པའི་མཐོང་ཆུང་ཡང་གནང་སྲིད་རུང་། བོད་ཡུལ་དུ་ལས་རིགས་ཆེས་དམན་ཤོས་སུ་བརྩི་བའི་མ་ཆེན་ཞིག་གིས། ལོ་ཤས་རིང་བཟའ་བཏུང་ཉམས་ཞིབ་ཀྱི་ཞོར་ལས་ཐོབ་པའི་རྙེད་དོན་མདོར་བསྡུས་ཙམ་ཞིག་ཞུ་རྒྱུ་ཡིན།        འོན་ཀྱང་ད་ལྟའི་རྒྱུད་བཞི་ལ་ལེའུ་སུམ་ཅུ་ལས་མེད་པ་འདིའི་སྐོར་ལ་དཔྱད་པ་བྱ་དགོས་ལ། ཡང་རྒྱུད་རྒྱལ་རྒྱས་འབྲིང་བསྡུས་གསུམ་མཐའ་དག་ཐོག་མར་ཟབ་པའི་དབང་གིས། རེ་ཞིག་གསང་བའི་ཚུལ་གྱིས་སུམ་སྟོན་ཡེ་ཤེས་གཟུངས་ཁོ་ན་ལ་བཀའ་རྒྱས་བཏབ། ཅེས་སྨན་གྱི་ཆོས་འབྱུང་བསྐལ་བཟང་ཤིང་རྟ་ལས་གསལ་བའི་ནང་གི་འབྲིང་པོ་དེ་ཡིན་དགོས་རྒྱུ་འདྲ་བོ་ཞིག་ཆགས་ཡོད། བཤད་རྒྱུད་འདི་ལ་སུམ་སྟོན་ཡེ་ཤེས་གཟུངས་ཐོག་མར་བྱས་པའི་བོད་ཀྱི་མཁས་པ་མང་པོའི་རྒྱུད་འགྲེལ་ཁབ་གཙང་མང་པོ་བརྩམས་ཡོད་པ་དང་། དེ་དག་ལ་མགོའི་རྒྱ་བོད་ཤན་སྦྱར་དང་གླིང་གཞི་གླེང་སློང་ནས། མཇུག་དོན་ཡོངས་སུ་རྫོགས་པའི་བཤད་པ་འདིས་ཀྱང་གསལ་བཤད་གལ་ཆེན་ཞིག་བྱེད་ཀྱི་ཡོད་པ་དེ་རེད།        ཡང་བདུད་རྩི་སྙིང་པོ་གསང་བ་མན་ངག་གི་རྒྱུད། དཔེ་རྙིང་བྲིས་མའི་ལྡེབ༧༠ནང་བསྡུས་དོན་བཅོས་ཐབས་ཀྱི་ལེའུ་ཉེར་ལྔ་པ་དེའི་དཀྱིལ། རླུང་ནད་བུ་རམ་ཆང་དང་མར་ལུག་ཤ །ཉ་དང་འཕྱི་བ་རྟ་བོང་མིའི་ཤ །མར་རྙིང་སྒོག་པའི་ཚོད་མ་བཏང་། །སྤྱོད་ལམ་མུན་ཁུང་དྲོ་བའི་གནས་སུ་བསྡད། །སྙན་པའི་ཚིག་བསྒྲག་སྙིད་ལོག་གོས་དྲོས་བཏིབས། །སྨན་དུ་རུས་བཅུད་གསུམ་བསྡུས་ཁུ་བ་དང་། །ལུག་མགོ་རྙིང་པའི་མགོ་ཁྲོལ་སྦྱོར་བ་བྱ། །ཞེས་པ་སོགས། སྡེ་སྤར་རྒྱུད་བཞིའི་ནང་བཤད་རྒྱུད་ཀྱི་ལེའུ་སུམ་བཅུ་པ། གསོ་ཐབས་དངོས་བསྟན་པ་ཞེས་པའི་ལེའུ་ཞིག་བྱས་ཏེ་ལེའུ་དེའི་མགོར། དེ་ནས་ཡང་དྲང་སྲོང་རིག་པའི་ཡེ་ཤེས་ཀྱིས་འདི་སྐད་ཅེས་གསུངས་སོ། །ཀྱེ་དྲང་སྲོང་ཆེན་པོ་ཉོན་ཅིག །ཁྱད་པར་ཉེས་གསུམ་སོ་སོར་བཅོས་པ་ནི། །ཞེས་པ་ཞིག་གསར་དུ་བསྣན། དཔེ་རྙིང་གི་ཚིག་ཅུང་མི་འདྲ་ཞིང་དོན་མཚུངས་པར། ཟུང་འཇུག་རླུང་ལ་ཏིལ་མར་མཆོག་ཡིན་ཏེ། །བུ་རམ་ཆང་དང་མར་རྙིང་ལུག་ཤ་ཡིབ། །འཕྱི་བ་རྟ་བོང་མི་ཤ་སྒོག་བཙོང་སོགས། །ལྕི་སྣུམ་འཇམ་དྲོའི་ཟས་ཀྱིས་བཅོས་པར་བྱ། །སྤྱོད་ལམ་མུན་ཁུང་དྲོ་བའི་གནས་སུ་བསྡད། །ཡིད་འོང་ཚིག་སྙན་གཉིད་ལོག་གོས་དྲོན་བགོ། །སྨན་དུ་རུས་བཅུད་གསུམ་གྱི་ཁུ་བ་དང་། །ལུག་མགོ་རྙིང་པའི་མགོ་འཁྲོལ་སྦྱོར་བ་བྱ། །ཞེས་པ་སོགས་ད་ཡོད་རྒྱུད་བཞིའི་བཤད་རྒྱུད་དང་དཔེ་རྙིང་བདུད་རྩི་སྙིང་པོ་གསང་བ་མན་ངག་གི་རྒྱུད་གཉིས་བསྡུར་ན། ནང་དོན་བརྒྱ་ཆའི་བཅོ་ལྔ་ཡན་མན་ཞིག་འཐོར་བུའི་ཚུལ་གྱིས་གང་སར་བཀོད་ཡོད། འོན་ཀྱང་ཟས་ཀྱི་ཚུལ་ཤེས་པ་དང་། ཟས་བསྡམས་པ། ཟས་ཀྱི་ཚོད་རིག་པར་བྱ་བ་སོགས་བཟའ་བཏུང་སྐོར་དེ་བདུད་རྩི་སྙིང་པོ་གསང་བ་མན་ངག་གི་རྒྱུད་ཀྱི་དཔེ་རྙིང་དུ་མེད།
       ༣༽ མན་ངག་རྒྱུད་ལ་མཚོན་ན། དཔེ་རྙིང་ནང་དུ་མོ་ནད་སྐོར་བཅོས་པའི་སྐོར་མེད་ཅིང་མོ་མཚན་བཅོས་པའི་ལེའུ་དེ་ལེའུ་དགུ་བཅུ་ཐམ་པ་ཡིན།
       ཕོ་མཚན་བཅོས་པའི་ལེའུ་དེ་དཔེ་རྙིང་ལེའུ་གོ་གཅིག་པ་ཡིན་ཞིང་ཚིག་དོན་གཉིས་ཆར་མཚུངས་ཆེ་བའི་སྐོར་དེ་ཡིན། ཁྱོན་བསྡོམས་ལེའུ་ལྔ་བཅུ་ང་གཉིས་ཕལ་ཆེར་འདྲ་བོ་ཡོད་ཅིང་ད་དུང་གཞན་ནས་ཁ་སྣོན་མང་བ་དང་། ཚིག་སྦྱོར་དང་གོ་རིམ་ལ་བཅོས་བསྒྱུར་གྱི་རྣམ་པ་ཆེན་པོ་ཡོད། ལེའུའི་གོ་རིམ་ལ་དཔེར་ན་བྱང་ཁོག་སྟོད་སྨད་གསོ་བ་དང་། ཡན་ལག་བཅོས་པ་གཉིས་གོ་རིམ་འདྲ་བ་དང་། དེའི་བར་ན་སྐྱེ་འཇི་བཤོས་ཐབས་བཤད་པའམ་སྐྱེ་སླ་མ་བཅོས་པའི་ལེའུ་ཞིག་ཡོད་རུང་ད་ལྟའི་མན་རྒྱུད་ནང་དུ་མེད་པའི་ཚོད་རེད།
       ༤༽ ཕྱི་མ་རྒྱུད་ལ་མཚོན་ན། ཐོག་མར་སྨན་གྱི་བླ་ཏིང་ངེ་འཛིན་དེ་ལས་བཞེངས་ནས་འོད་ཟེར་སྤྲོས་ཚུལ། དྲང་སྲོང་རིག་པའི་ཡེ་ཤེས་དང་ཡིད་ལས་སྐྱེས་གཉིས་དྲི་བ་དྲིས་ལན་བྱས་ཚུལ་བཀོད་རྗེས། དཔེ་རྙིང་ལེའུ་གསུམ་པ་གསོ་ཐབས་རྩ་བ་རྟགས་དང་བཅོས་པའི་ཚུལ་ཞེས་པའི་ནང་ནས་ནང་དོན་ཅུང་ཟད་འདྲ་ལ་ཚིག་གོང་འོག་བཀྲུགས་པ་དང་ཚིག་སྦྱོར་ཅུང་ཟད་མི་འདྲ་བར་བྱས་ནས་བཀོད་པ་ལ་ཕྱི་མ་རྒྱུད་ཀྱི་སྡོམ་ཚིག་ཏུ་བཀོད། དེ་ནས་དཔེ་རྙིང་ལེའུ་བཞི་པ་རེག་པ་རྩ་དང་། ལྔ་པ་མཐོང་བ་ཆུ་སོགས་བཀོད་ཡོད། གཞན་ཡང་སྐྱུག་བཤལ་གཉིས་སོགས་ལ་མཚོན་ན་བརྒྱ་ཆ༦༠ཙམ་འདྲ་ཞིང་། སྡེ་སྤར་ལ་གཞན་ནས་ཁ་སྣོན་བྱས་པའི་རྣམ་པའང་གསལ་པོ་མངོན་ཡོད།        དཔེ་རྙིང་འདིའི་ཡིག་གཟུགས་དང་། བརྡ་སྤྲོད། ཚིག་སྦྱོར་སོགས་ཡིག་རྙིང་ཉམས་ཞིབ་ཀྱི་རིག་ལམ་ནས་དཔྱད་ན། དུས་རབས་བཅུ་གསུམ་ནང་གི་དཔེ་ཞིག་ཡིན་ངེས་རེད་ལ། གཅིག་བྱས་ན་གཡུ་ཐོག་མགོན་པོ་རང་གི་དུས་སུ་ཡང་ཡིན་སྲིད་གི་རེད།        རྒྱུད་བཞི་གཡུ་ཐོག་མགོན་པོ་སོགས་ཀྱིས་བརྩམས་པ་རེད་ཟེར་ཡོང་དུས། སྲོལ་རྒྱུན་ལ་ཤ་ཞེན་ཆེ་བ་དག་གིས་སྡང་མིག་བསྒྲད་ཡོང་བ་དང་། སངས་རྒྱས་ཀྱི་བཀའ་རེད་ཟེར་ཡོང་དུས། གཞོན་སྐྱེས་ཤེས་ཡོན་ཅན་མང་པོས་སྣ་གཉེར་བྱེད་ཡོང་བ་རྣམས་ཀྱིས། བོད་ཀྱི་རིག་གཞུང་གི་འགྲོ་སྟངས་འདི་ཤེས་རྒྱུ་གལ་ཆེན་པོ་རེད་བསམ།
       སངས་རྒྱས་ཀྱི་བཀའ་ལ་ཡང་ཞལ་ནས་གསུངས་པ་དང༌། བྱིན་གྱིས་བརླབས་པ། རྗེས་སུ་གནང་བ་བཅས་གསུམ་ལས།
       དང་པོ་ཞལ་ནས་གསུངས་པའི་བཀའ་ལ་སྟོན་པས་རང་བཞིན་གྱིས་གསུངས་པ་འཕགས་པ་སྡུད་པ་སོགས་དང་། འཁོར་གྱིས་ཞུས་ཏེ་གསུངས་པ་འཇམ་དཔལ་མཚན་བརྗོད་སོགས།
       གཉིས་པ་བྱིན་གྱིས་བརླབས་པའི་བཀའ་ལ་སྐུ་གསུང་ཐུགས་ཀྱིས་བྱིན་གྱིས་བརླབས་པ་སྟེ་གསུམ་ལས། དང་པོ་སངས་རྒྱས་ཀྱིས་ཕྱག་སྤྱི་བོར་བཞག་སྟེ་བྱིན་གྱིས་བརླབས་ནས་རྡོ་རྗེ་སྙིང་པོ་དང་། རྣམ་གྲོལ་ཟླ་བ་ལ་འཆད་པ་དང་དྲི་བའི་སྤོབས་པ་སྐྱེས་ནས་གསུངས་པ་མདོ་སྡེ་ས་བཅུ་པ་ལྟ་བུ།
       གཉིས་པ་གསུང་གིས་བྱིན་གྱིས་བརླབས་པ། སངས་རྒྱས་ཀྱིས་འཇམ་དཔལ་ལ་མ་སྐྱེས་དགྲའི་འགྱོད་པ་སོལ་ཅིག་ཅེས་གསུངས་ནས། འཇམ་དཔལ་གྱིས་མ་སྐྱེས་དགྲའི་འགྱོད་པ་བསལ་བའི་མདོ་གསུངས་པ་ལྟ་བུ།
       གསུམ་པ་ཐུགས་ཀྱིས་བྱིན་གྱིས་བརླབས་པ། ཏིང་ངེ་འཛིན་གྱིས། བཅོམ་ལྡན་འདས་ཀྱིས་ཟབ་མོ་སྣང་བའི་ཏིང་ངེ་འཛིན་ལ་མཉམ་པར་བཞག་པའི་མཐུས་ཤཱ་རིའི་བུ་དང་སྤྱན་རས་གཟིགས་ཀྱིས་དྲི་བ་དང་དྲི་ལན་གྱི་སྒོ་ནས་ཤེར་སྙིང་གསུངས་པ་ལྟ་བུ། ཐུགས་བདེན་པའི་སྟོབས་ཀྱིས། སངས་རྒྱས་མཐུས་རི་དང་ལྗོན་ཤིང་སོགས་ལས་ཀྱང་ཆོས་སྒྲ་བྱུང་བ་ལྟ་བུ་སྟེ། ཨ་ར་ལི་ལས། རི་དང་ཤིང་བུ་རྡེའུ་དང༌། པདྨ་དག་དང་དཔག་བསམ་ཤིང༌། །རྔ་བོ་ཆེ་ལས་བྱུང་བ་ཡང༌། །རྒྱལ་བས་བྱིན་གྱིས་བརླབས་པའི་ཕྱིར། །དེ་དག་བཀའ་ཞེས་བྱ་བར་འདོད། །ཅེས་དང་། ཐུགས་ཐུགས་རྗེའི་སྟོབས་ཀྱིས་བྱིན་གྱིས་བརླབས་པའི་བཀའ་ནི། སངས་རྒྱས་ཀྱི་མཐུས་ཉན་ཐོས་དང༌། །གནོད་སྦྱིན་སོགས་སེམས་ཅན་ཕལ་པས་སྨྲས་པའི་འབྲས་བུ་ཁྱད་པར་ཅན་འགྲུབ་ནུས་ཀྱི་སྔགས་ཚིག་བཀར་བསྡུས་པ་ལྟ་བུ་སྟེ། སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང༌། །འཆད་དང་རིགས་པ་དག་དང་ལྡན་པར་བརྗོད་པ་དང༌། །མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། །དེ་དག་ཀུན་ཀྱང་དེ་བཞིན་གཤེགས་པ་སྐྱེས་བུའི་མཐུ། །ཞེས་སོ། །
       གསུམ་པ་རྗེས་སུ་གནང་བའི་བཀའ་ནི། སྡུད་པ་པོ་རྣམས་ཀྱིས་བཀའ་བསྡུ་པའི་ཚེ་བཅུག་པའི་གླེང་གཞི། མཚམས་སྦྱོར། མཐུན་འགྱུར། ཡི་རང་རྣམས་ཏེ། སྟོན་པ་མྱ་ངན་ལས་འདས་པའི་འོག་ཏུ་རྒྱུད་ཐམས་ཅད་ཀྱི་འགོ་ལ། དང་པོར་ཕུན་སུམ་ཚོགས་པ་ལྔ་དང༌། སྒབ་ཏུ་མངོན་པར་བསྟོད་པ་ཡང་ཐོགས་ཤིག་པར་གསུངས་པ་ལྟར་རོ། །
       ད་ལྟ་བོད་ཀྱི་རྒྱལ་བའི་བཀའ་འགྱུར་ནང་དུ་བཞུགས་པ་ཀུན་རིག་གཞུང་གི་འགྲོ་སྟངས་འདི་འདྲ་ཞིག་གི་ཐོག་ནས་བཀའ་རུ་བརྩི་གི་ཡོད་རེད་ལ། མཁས་དབང་སོག་བཟློག་པས་རྒྱུད་བཞི་བཀའ་སྒྲུབ་ནང་དུའང་གཡུ་ཐོག་མགོན་པོས་མཛད་པ་ལ། སངས་རྒྱས་ཀྱི་བཀའ་རུ་རྩིས་པ་དེ་ཡང་རིག་གཞུང་གི་འགྲོས་ལྟར་བཤད་པ་ཞིག་རེད། །དེས་ན་སྤྱི་ཁོག་ནས་བོད་ཀྱི་རིག་གཞུང་གི་འགྲོ་སྟངས་འདི་ཤེས་པ་གལ་ཆེན་པོ་རེད་བསམ། །
མདོར་བསྡུས་ནས་བཤད་ན།        དེ་ཡང་མདོ་དྲི་མེད་གཟི་བརྗིད་ནང་དུ་གསལ་བ་ལྟར་ན་གནའ་དུས་སྲིད་པ་ཡེ་སྨོན་རྒྱལ་པོའི་ཕྱི་རབས་ཚ་རྒྱུད་རྣམས་ཀྱི་ཆེད་དུ་ཕ་ནོར་འཇོག་པའི་བསམ་བློ་གཏོང་སྐབས། རིན་པོ་ཆེ་གསེར་དངུལ་སོགས་བཞགས་ནའང་འཕེལ་རྒྱུ་མེད་པས་ཡུན་རིང་ཕན་མི་ཐོགས། དེས་ན་འཕེལ་ཁ་ཆེ་བའི་སྲོག་ཆག་གཡང་མོ་ལུག་བཞགས་པར་བཤད་པ་དང་། བོད་བཙན་པོའི་སྐབས་སུ་གསེར་གཡུ་རྟ་ཁྲབ་སོགས་ཕང་མེད་ཀྱིས་བཏང་ནས་ཤེས་རིག་མང་པོ་ཞིག་ནང་འདྲེན་བྱས་པ་དང་།
       སིལ་བུའི་དུས་སུ་སྤྱིའི་སྒྲིག་འཛུགས་གི་ལམ་ནས་སྔོན་ལྟར་གསེར་དངུལ་འབོར་ཆེན་གཏོང་ནས་རིག་གནས་ནང་འདྲེན་མི་ཐུབ་ན་ཡང་། གང་ཟག་སྒེར་པ་མང་པོས་ཁྱིམ་གཞིས་ས་ཁང་དང་བཅས་པ་གསེར་ལ་བརྗེས། རང་གི་ཚེ་སྲོག་ཡང་བློས་བཏང་ལྟ་བུའི་སྒོ་ནས་ཤེས་རིག་མང་པོ་ཞིག་ནང་འདྲེན་དང་གསར་གཏོད་བྱས་པའི་ཡ་གྱལ། ཟས་སྨན་གཉིས་ཀྱི་སྤྱི་གཞུང་དཔལ་ལྡན་གསོ་རིག་རྒྱུད་བཞི་འདི་ནི། མདོ་དབུས་མཐོ་སྒང་དཔལ་ཡོན་གྱི་མཚོན་དཔེ་ལྟ་བུ་ཞིག་ཏུ་ཆག་ཡོད་པ་དེ་རེད། །