མཁས་དབང་ཐུབ་བསྟན་ཕུན་ཚོགས་ཀྱི《གསོ་རིག་འབུམ་བཞི》།
《གསོ་རིག་འབུམ་བཞི》
གཅིག གསོ་རིག་འབུམ་བཞི་ངོ་སྤྲོད།
ཆོས་ལུགས་གྲུབ་མཐའི་ཕྱོགས་རིས་དང༌། དགོས་མེད་ཀྱི་ཁ་ཕོ་ལ་རྒྱའི་ཞེན་པས་མ་བཅིངས་པར་ལོ་རྒྱུས་དངོས་གཙོ་སྨྲ་བའི་ ལྟ་བ་རྣམ་དག་དང༌། ལུང་རིག་དྲང་པོར་སྨྲ་བའི་སྤྱོད་བཟང་གི་སྒོ་ནས་བོད་ཀྱི་ཤེས་རིག་གི་ལོ་རྒྱུས་བདེན་པར་སྨྲ་བ་ནི་གཞོན་ནུ་ཤེས་ཡོན་ཅན་རྣམས་ཀྱི་འོས་འགན་ཡིན་ལ། ནང་བ་སངས་རྒྱས་པའི་ལྟ་སྤྱོད་དངོས་དང་ཡང་མཐུན་པ་ཞིག་ཡིན།
མིག་སྔར་མཐོང་ཆོས་སུ་གྱུར་པའི་ལོ་རྒྱུས་ཐོག་བོད་ཀྱི་གསོ་བ་རིག་པའི་གཞུང་ལུགས་སྔ་ཤོས་ནི་གསོ་རིག་འབུམ་བཞི་འདི་ཉིད་ཡིན་ཞིང༌། གསོ་རིག་ཐུགས་འབུམ་མཁའ་སྔོན་གྱི་མཇུག་བྱང་ལྟར་ན་གཞུང་འདི་སྟོན་པ་གཤེན་རབ་ཀྱི་ཞལ་རྒྱུན་གདམས་ངག་རྣམས་ཁོང་གི་སྲས་དཔྱད་བུ་ཁྲི་ཤེས་ཀྱིས་རྒྱུན་འཛིན་དང་དར་སྤེལ་བྱས་པ་ཞིག་ཡིན། གཤེན་རབ་མི་བོ་ཆེ་བྱོན་པའི་དུས་ཚོད་ནི་བོན་གྱི་ལོ་རྒྱུས་ཡིག་རྙིང་ལྟར་ན་སྤྱི་ལོའི་སྔོན་གྱི་ ལོ་ངོ་གཅིག་ཁྲི་དྲུག་སྟོང་ཐམ་པ་དང་བརྒྱད་ལོར་སྐུ་འཁྲུངས་པར་གསུངས། འོན་ཀྱང་བན་བོན་གྱི་ལོ་རྒྱུས་ཡིག་ཆ་རྙིང་པའི་ལོ་རྒྱུས་དོན་རྐྱེན་རྣམས་ཕན་ ཚུན་གོ་བསྡུར་ནས་བརྟགས་དཔྱད་དང༌། དེང་དུས་ས་འོག་ནས་ཐོན་པའི་གནའ་རྫས་དག་ལ་དཔྱད་ན་སྤྱི་ལོའི་སྔོན་གྱི་ལོ་ངོ་ ཉིས་སྟོང་ལྷག་ཙམ་གྱི་གོང་དུ་བྱུང་ཡོད་དགོས་པ་ཞིག་རེད། མཁས་དབང་ནམ་མཁའི་ནོར་བུས་བརྩམས་པའི་ཞང་བོད་ལོ་རྒྱུས་ཏི་སེའི་འོད་ལས་གཤེན་རབ་མི་བོ་ཆེ་འཁྲུངས་པའི་དུས་ནི་སྤྱི་ལོའི་སྔོན་གྱི1917པའི་ཤིང་བྱི་གཅིག་དཀར་ལོ་དེར་འཁྲུངས་ཡོད་པར་གསུངས། དེ་ལྟར་ན་བོད་ཀྱི་གསོ་རིག་གཞུང་ལུགས་ཐོག་མར་བྱུང་ནས་ད་བར་ལོ་ངོ་བཞི་སྟོང་གི་ལོ་རྒྱུས་ལ་ཉེ་འགྲོ་གི་ཡོད་པ་རེད།
གསོ་རིག་འབུམ་བཞི་ཐོག་མར་གསུངས་པའི་གནས་ནི། དེང་དུས་མངའ་རིས་ས་ཁུལ་གངས་ཏི་སེའི་ཉེ་འགྲམ་དུ་ཡིན་པར་གསལ་སྟེ། ཐུགས་འབུམ་མཁའ་སྔོན་ལས། གནས་མཆོག་དམ་པ་འོལ་མོ་གླིང་ཆེན་ཞེས་བྱ་བ། དབལ་སོ་གངས་ཀྱི་ར་བའི་ནང་དུ་ཆགས་ཏེ། དེ་ཡང་མཚོ་མུ་ཁྱུད་བདལ་བའི་འཁོར་མོ་འཁོར་ཁྱུད་ཀྱི་གླིང་ན། ཡངས་ལ་ཁོད་སྙོམས་ཤིང་བདལ་བ། ངོ་མཚར་གྱི་ལྟད་མོ་ཕུན་སུམ་ཚོགས་དུ་འཚོགས་པ། རི་བོ་དང་རི་ཕྲན་དང༌། རྒྱ་མཚོ་དང་ནེའུ་ཐང་དང༌། ཆུ་བོ་དང་ཆུ་ཕྲན་དང༌། ལུ་མ་དང་ལྡིང་ཀ་དང༌། དཔག་བསམ་དང་ནགས་ཚལ་དང༌། མེ་ཏོག་དང༌། སྨན་དང༌། གྲོང་དང་གྲོང་ཁྱེར་དང་གྲོང་བརྡལ་དང༌། རི་དྭགས་དང༌། གཅན་གཟན་དང༌། འདབ་ཆགས་དང༌། ཆུ་གནས་དང༌། གཡུང་དྭགས་དང༌། མི་ནོར་དང༌། ཡུལ་མཁར་དང༌། ལོངས་སྤྱོད་ཕུན་སུམ་འཚོགས་པ་རུ་མངའ་འོ། ཞེས་དང༌། ཡང༌། ཤར་ཕྱོགས་སུ་ཤམ་པོ་ལྷ་རྩེ། བྱང་ཕྱོགས་སུ་ཁོ་མ་ནེའུ་ཆུང༌། ནུབ་ཕྱོགས་སུ་ཁྲི་སྨོན་རྒྱལ་བཞེད། ལྷོ་ཕྱོགས་སུ་བལ་པོ་སོ་བརྒྱད། ཅེས་སོགས་གསོ་རིག་འབུམ་བཞི་གསུངས་ཡུལ་འོལ་མོ་གླིང་ཆེན་དང༌། དེའི་ཕྱོགས་བཞིའི་ཡུལ་གཙོ་བོ་བཞི། དེའི་ཕྱིའི་གླིང་ཆེན་བཅུ་གཉིས་དང་ཡུལ་ཆེན་བཅུ་དྲུག་སོགས་ངོ་སྤྲོད་བྱས་ཡོད་ པ་འདི་ལ་ཞིབ་དུ་བརྟག་ན་དེང་དུས་མངའ་རིས་གངས་ཏི་སེའི་ཕྱོགས་བཞི་མཚམས་བརྒྱད་ ལ་གནས་པའི་ཡུལ་གྲོང་དང་ས་ཆའི་མིང་ཤ་སྟག་སྣང་བས་འདི་ལ་བལྟས་པ་ཙམ་གྱིས་གསོ་ རིག་འབུམ་བཞི་གསུངས་ཡུལ་དེ་ལྷའི་ཞིང་ཁམས་སོགས་གནས་གཞན་གང་ཡང་མ་ཡིན་པ་འགྲོ་ བ་མིའི་ཡུལ་དང་དེ་ལས་ཀྱང་བོད་གངས་ཅན་གྱི་ཡུལ་དུ་གསུངས་ཡོད་པ་གནག་ཕྱུགས་ཀྱི་ རྫི་བོས་ཀྱང་ཤེས་སླ་བ་ཞིག་རེད།
གསོ་རིག་འབུམ་བཞིའི་ནང་དོན་གཙོ་བོ་ནི། ཕྱི་ནང་གི་དངོས་པོ་ཐམས་ཅད་ཀྱི་རང་རྒྱུ་འབྱུང་བ་བཞིའི་རྫས་ཡོད་པ་དང༌། ནད་ཀྱི་རྒྱུ་གཙོ་བོ་རླུང་དང༌། མཁྲིས་པ། བད་ཀན། འདུས་པ་ཁྲག་དང་བཞི་གཙོ་བོ་ཡིན་པར་དེའང་ངོ་བོ་འབྱུང་བ་བཞིའི་རྫས་ལས་མ་འདས་པ་ ཞིག་ཡིན་ནའང༌། རྩི་ཤིང་ལ་སོགས་དངོས་པོའི་སྨན་རྫས་རྣམས་ཀྱང་ངོ་བོ་འབྱུང་བཞིའི་རྫས་ཡིན་པ་ སོགས་ཀྱི་གཞུང་ལུགས་ཤིག་བསྟན་ཡོད། ལྷག་པར་དུ་སྨན་འབུམ་དཀར་པོའི་རྩ་ཆུའི་བརྟག་པའི་ལེའུ་གཉིས་པོ་ལས་ཕྱི་དུས་ བཞི་ཁམས་ལྔའི་འབྱུང་བ་དང༌། ནང་ལུས་ཁམས་ཀྱི་འབྱུང་བ་གཉིས་པོ་ཕན་ཚུན་འབྲེལ་ཚུལ་ལ་བརྟེན་ནས་གང་ཟག་སོ་ སོའི་ལུས་ཁམས་ཀྱི་བདེ་ཐང་གི་གནས་ལུགས་དང༌། གང་ཟག་དེ་དང་འབྲེལ་བའི་གཉེན་ཉེ་དང་ལས་དོན་སོགས་ཀྱི་ལེགས་ཉེས་གང་འབྱུང་བརྟག་ ཐབས་ཀྱི་ཁྱིམ་ཕྱྭ་དང༌། མགྲོན་ཕྱྭ་དང༌། དགྲ་ཕྱྭ། གྲོགས་ཕྱྭ། གདོན་ཕྱྭ་ལ་སོགས་པ་ངོ་མཚར་རྩ་བདུན་དང༌། ཆུ་ཕྱྭ་སྣ་ཚོགས་བསྟན་ཡོད་པ་འདི་ནི་བོད་ཀྱི་གནའ་བོའི་ཤེས་རིག་བོན་ཆོས་ཀྱི་ ལུགས་སྲོལ་མ་ཉམས་པ་ཞིག་ཡིན་པ་དང༌། རྒྱ་དཀར་ནག་གང་གི་ཤེས་རིག་ནང་དུ་རྙེད་ཡས་མེད་པའི་ཐ་སྙད་ཅིག་ཡིན་པ་ནི་བོད་ ཀྱི་ཤེས་རིག་རྣལ་མ་ཅུང་ཟད་མཁྱེན་མཁན་ཚང་མས་ཤེས་གསལ་ལྟར་རེད། དེས་ན་བོད་ཀྱི་གསོ་རིག་གཞུང་གི་རྩ་ཆུ་བརྟག་ཐབས་ཀྱི་ཤེས་རིག་འདིའི་ཐོག་མའི་ འབྱུང་ཁུངས་ནི་གངས་ཏི་སེའི་ཉེ་སྐོར་གྱི་གནའ་གྲོང་ཁག་ལས་བྱུང་རིག་གནས་ཤིག་ ཡིན་པ་བསྙོན་དུ་མེད་པར་མཐོང༌།
གཉིས། གསོ་རིག་འབུམ་བཞི་དང་དཔལ་ལྡན་རྒྱུད་བཞི་གཉིས་ཀྱི་ཁྱད་པར།
གསོ་རིག་འབུམ་བཞི་དང་རྒྱུད་བཞི་གཉིས་པོར་བརྗོད་བྱ་དོན་གྱི་ཆ་ནས་དཔྱད་ན་ ཁྱད་པར་ཆེར་མ་མཐོང་ཡང༌། རྗོད་བྱེད་ཚིག་གི་ཆ་ནས་བལྟས་ན་གསོ་རིག་འབུམ་བཞིའི་ཚིག་སྦྱོར་རྣམས་ཚིག་རྐང་ མི་སྙོམ་པ་དང༌། སྡེབ་སྦྱོར་མི་སྙན་པ་ལ་སོགས་པའི་ཚིག་སྐྱོན་མང་བ་མ་ཟད། ལྷག་པར་ནད་འབུམ་ནག་པོའི་རྗོད་ཚུལ་རྣམས་ཚིགས་བཅད་དང་ཚིག་ལྷུག་གང་དབྱེ་དཀའ་བ། གནའ་བོའི་ཡིག་རྙིང་གི་ཁྱད་ཆོས་མང་བ་སོགས་དཔལ་ལྡན་རྒྱུད་བཞི་ལས་བྱུང་སྔ་བའི་ རྟགས་མཚན་མང་བ་དང༌། དཔལ་ལྡན་རྒྱུད་བཞི་ནི་ཚིག་རྐང་སྙོམ་པ་དང༌། ཚིག་གི་སྡེབ་སྦྱོར་སྙན་པ། བརྡ་དག་དོན་གསལ་བ་སོགས་འབུམ་བཞི་ལས་བྱུང་ཕྱི་བ་དང་ཡར་རྒྱས་ཆེ་བའི་ཁྱད་ཆོས་ དང༌། བྱེ་བྲག་སོ་སོའི་ཁྱད་པར་ནི། གསོ་རིག་འབུམ་བཞིའི་ཐོག་མ་ཐུགས་འབུམ་མཁའ་སྔོན་དང༌། རྒྱུད་བཞིའི་ཐོག་མ་རྩ་རྒྱུད་གཉིས་ལས། ཐུགས་འབུམ་མཁའ་སྔོན་གྱི་དབུར་ཞང་ཞུང་སྐད་དུ། ཞེས་པ་དེ་རྩ་རྒྱུད་དུ་རྒྱ་སྐད་དུ་ཞེས་བསྒྱུར་འདུག ལེའུ་དང་པོའི་མཆོད་བརྗོད་སྐབས། ཐུགས་རྗེ་འགྲོ་བའི་དོན་མཛད་གཤེན་རབ་མཆོག་ཅེས་པ་དེ། ཐུགས་རྗེ་འགྲོ་བའི་དོན་མཛད་བཅོམ་ལྡན་འདས་ཞེས་བསྒྱུར་བ་ཙམ་ལས་གཞན་ཚིག་རྐང་ གསུམ་པོ་གཅིག་མཚུངས་སུ་སྣང༌། འབུམ་བཞི་ལས། གནས་མཆོག་དམ་པའ་འོལ་ལུང་རིང་ཞེས་པ། དབལ་སོ་གངས་ཀྱི་ར་བའི་ནང་དུ་ཆགས་པའི། མཚོ་མུ་ཁྱུད་བདལ་བའི་གླིང༌། ཞེས་པ་དེའི་ཕྱོགས་བཞི་མཚམས་བརྒྱད་ན་གནས་པའི་ཡུལ་གྲུ་རྣམས་དང༌། ཆུ་བོ་ཆེན་པོ་བཞི། དེའི་ཕྱི་རིམ་ན་གནས་པའི་ཡུལ་ཆེན་བཅུ་དྲུག་སོགས་མདོར་ན་གངས་ཏི་སེའི་ཉེ་སྐོར་ གྱི་ཞང་ཞུང་མངའ་རིས་ཡུལ་གྲུ་སོ་སོའི་ས་མིང་དང༌། གནས་བཀོད་གསལ་པོར་ཡོད་པ་དེ་དག་རྩ་རྒྱུད་དུ་ལྟ་ན་སྡུག་གི་ཞིང་ཁམས་ཞེས་ བསྒྱུར་འདུག རྩ་རྒྱུད་དུ་ལྟ་ན་སྡུག་གི་ཞིང་ཁམས་དང༌། རི་བོ་འབིགས་བྱེད་དང༌། གངས་ཅན། རྒྱུད་དུ་ཞུ་བ་པོ་དྲང་སྲོང་ཡིད་ལས་སྐྱེས་དང༌། གསུང་པ་པོ་དྲང་སྲོང་རིག་པའི་ཡེ་ཤེས་ལ་སོགས་པའི་རྣམ་བཤད་དེ་དག་དཔའ་བོ་གཙུག་ ལག་ཕྲེང་བའི་ཆོས་འབྱུང་མཁས་པའི་དགའ་སྟོན་དུ་འདི་ལྟར་གསལ་སྟེ། སྨད་ཆ། ཤོག་ངོས1522ཕྲེང5པར། པེ་ཅིན་པར། འདི་ཉིད་གཡུ་ཐོག་གསར་མ་མཆོག་གི་སྤྲུལ་སྐུ་དངོས་ཡིན་ཞིང་ཁོང་རང་གི་བཞུགས་ གནས་དེའི་ཤར་ན་སྤང་རི་སྔོ་སྨན་མང་པོ་སྐྱེ་བ་སྤོས་ངད་ལྡན་དང་འདྲ་བ་དང༌། ལྷོ་ན་སྔོ་སྨན་ཚ་བ་སྐྱེ་བ། བྱང་ན་གངས་རི་དང་བསིལ་སྨན་སྐྱེ་བ། ནུབ་ན་ནགས་ཚལ་སོགས་ཆ་མཐུན་ཡོད་པས་ཁོང་རང་གི་བཞུགས་གནས་དེ་སྨན་གྱི་གྲོང་ ཁྱེར་ལྟ་ན་སྡུག་པ། ཐུགས་ཆོས་ཀྱི་དབྱིངས་སངས་རྒྱས་སྨན་གྱི་བླ་དང༌། ཀུན་རྟོག་སྣ་ཚོགས་པ་རྣམས་འཁོར་སྡེ་བཞི་དང༌། རྩོམ་འདོད་ཀྱི་རྟོག་པ་དྲང་སྲོང་ཡིད་ལས་སྐྱེས་དང༌། རིག་པའི་ངོ་བོ་དྲང་སྲོང་རིག་པའི་ཡེ་ཤེས་སུ་མཛད་ནས་རྒྱུད་བཞི་བཤད་དོ་ཞེས་འཕྲིན་ལས་ཞབས་གསུངས་ལ། ཐུན་མོང་གི་སྣང་བ་དེ་ཉིད་ཡིན་ལ། སྣང་བ་དག་པའི་གདུལ་བྱའི་ངོར་གླེང་གཞི་ཇི་ལྟར་བཤད་པ་ལྟར་སྣང་བ་ཡང་མི་འགལ་ལོ་ ཞེས་བདག་གིས་སེམས་སོ། །ཞེས་གསུངས་སོ། ། དེ་ལྟར་ན་སྔོན་བྱོན་གྱི་མཁས་པ་ཆེན་པོ་རྗེ་ཕྱོན་ལས་ཞབས་དང༌། དཔའ་བོ་གཙུག་ལག་ཕྲེང་བ། ཟུར་མཁར་བློ་གྲོས་རྒྱལ་པོ། གླིང་སྨན་བཀྲ་འབུམ་པ་སོགས་གནས་ལུགས་དོན་དལ་མཁས་པའི་སྐྱེས་བུ་ཆེན་པོ་རྣམས་ ཀྱིས་རྗེ་གཡུ་ཐོག་པས་རྒྱུད་བཞི་འཆད་ཉན་མཛད་པའི་ཡུལ་གང་དེ་དག་པའི་སྣང་ངོར་ ལྟ་ན་སྡུག་གི་ཞིང་ཁམས་ཡིན་པ་ལས། གཞན་དུ་ལྟ་ན་སྡུག་གི་ཞིང་ཁམས་སུ་སངས་རྒྱས་ཀྱིས་གསུངས་པ་ཞིག་མིན་ཚུལ་ལུང་ རིག་གཉིས་ཀྱི་སྒོ་ནས་བསྒྲུབ་འདུག ཐུགས་འབུམ་མཁའ་སྔོན་གྱི་ལེའུ་བདུན་པ་འབུམ་བཞིའི་ཆེ་བ་བརྗོད་པ་འདི་རྩ་རྒྱུད་དུ་མེད་པས་རྩ་རྒྱུད་ལ་ལེའུ་དྲུག་ལས་མེད།
འབུམ་བཞིའི་གཉིས་པོ་གསོ་བྱེད་སྨན་འབུམ་དཀར་པོ་དང༌། རྒྱུད་བཞིའི་ཕྱི་མ་འཕྲིན་ལས་རྒྱུད་གཉིས་ལས། དང་པོ་སྨན་འབུམ་གསུངས་པ་པོ་སྟོན་པ་གཤེན་རབ་མི་བོ་དང༌། ཞུ་བ་པོ་སྲས་དཔྱད་བུ་ཁྲི་ཤེས། གསུང་པའི་ཡུལ་འོལ་མི་ལུང་རིང་ཞེས་གསལ་བ་དེ། ཕྱི་མ་རྒྱུད་ལས་གསུང་པ་པོ་དྲང་སྲོང་རིག་པའི་ཡེ་ཤེས་དང༌། ཞུ་བ་པོ་དྲང་སྲོང་ཡིད་ལས་སྐྱེས། གསུང་པའི་ཡུལ་ལྟ་ན་སྡུག་གི་ཞིང་ཞེས་བསྒྱུར་འདུག སྤྱིར་གཞུང་འདི་གཉིས་བརྗོད་དོན་ཕལ་ཆེར་མཚུངས་ཀྱང་རྗོད་བྱེད་ཚིག་སྦྱོར་གྱི་ ཁྱད་པར་ཆེ། ལེའུ་གཉིས་པ་ཆུ་བརྟག་ཐབས་ལས་གདོན་རིགས་རྣམས་ཀྱི་མིང་དང་གྲངས་ཅུང་ཙད་མི་འདྲ་ བར་འདུག སྨན་འབུམ་དཀར་པོར་ལེའུ་སོ་གཉིས་དང༌། ཕྱི་མ་རྒྱུད་ལ་ལེའུ་ཉེར་བདུན་ཏེ། དེ་ཡང་སྨན་འབུམ་དཀར་པོའི་ལེའུ་དང་པོ་གླེང་སློང་ལེའུ་དང༌། ལེའུ་ཉེར་བདུན་པ་གཉེན་པོ་གཅིག་རྒྱུད། ལེའུ་ཉེར་བརྒྱད་པ་འགོག་སྲུང༌། ལེའུ་སུམ་ཅུ་པ་རྒྱུད་ཀྱི་ཆེ་བ་བརྗོད་པ། ལེའུ་སོ་གཉིས་པ་འཁོར་གྱི་གཙོ་བོ་བསྟོད་པའི་ལེའུ་སྟེ་སྨན་འབུམ་ལ་ལེའུ་ལྔ་ ལྷག་པོ་བྱུང་འདུག འོན་ཀྱང་ཕྱི་མ་རྒྱུད་ཀྱི་ནང་དུ་གོང་གསལ་གྱི་ལེའུ་འདི་དག་གི་ནང་དོན་ཕལ་ཆེར་ ལེའུ་ཉེར་བདུན་གྱི་ནང་དུ་བསྡུས་འདུག
འབུམ་བཞིའི་གསུམ་པ་དཔྱད་འབུམ་ཁྲ་བོ་དང༌། རྒྱུད་བཞིའི་གཉིས་པ་བཤད་རྒྱུད་གཉིས་ལེའུའི་གྲངས་དང༌། བརྗོད་བྱའི་ནང་དོན། རྗོད་བྱེད་ཀྱི་ཚིག་སྦྱོར་སོགས་ཕྱོགས་གང་ཐད་ནས་ཕལ་ཆེར་གཅིག་མཐུན་དུ་འདུག འོན་ཀྱང་དཔྱད་འབུམ་གྱི་དབུར་གཞུང་གསུང་པ་པོ་དང༌། གསུང་པའི་ཡུལ། ཞུ་བ་པོ་སོགས་བོན་ལུགས་རྣམས་བཤད་རྒྱུད་དུ་ནང་པའི་ལུགས་སུ་བསྒྱུར་འདུག་པ་མ་ ཟད། གཞུང་འདིའི་བརྗོད་དོན་གཙོ་བོ་བོད་ཀྱི་སྨན་རྫས་ཀྱི་རོ་དྲུག་པོའི་ལྕི་སྣུམ་ལ་སོགས་འབྱུང་བའི་རྫས་ཀྱི་ནུས་པ་ཆེ་ཆུང་གི་གོ་རིམ་རྣམས་གཏན་འབེབས་བྱེད་ཐབས་སྐོར་ལ་གཞུང་གཉིས་པའི་ལྟ་བ་མི་འདྲ་བ་རེ་བྱུང་འདུག་སྟེ། དཔྱད་འབུམ་ཁྲ་བོ་ལས།
བསྐ་མངར་ལན་ཚྭ་རྣམས་གསུམ་རིམ་བཞིན་ལྕི།།
དེ་བཞིན་མངར་སྐྱུར་ལན་ཚྭ་སྣུམ་པ་ཡིན།།
བསྐ་མངར་ཁ་བསིལ་ཁ་བསྐ་མངར་བ་རྟུལ།།
སྐྱུར་ཚྭ་ཁ་བ་རྣམས་གསུམ་ཡང་ལ་རྩུབ།།
སྐྱུར་དང་ལན་ཚྭ་ཚ་གསུམ་ལ་རྣོ།། ཅེས་རོ་དྲུག་པོ་དག་སོ་སོའི་ནུས་པ་ལྕི་སྣུམ་གང་ཆེ་གོ་རིམ་འདི་བཞིན་དུ་དཔྱད་བརྗོད་བྱས་ཡོད་པ་དང༌། བཤད་རྒྱུད་ལས།
ལན་ཚྭ་བསྐ་མངར་རྣམས་གསུམ་རིམ་བཞིན་ལྕི།།
དེ་བཞིན་ལན་ཚྭ་མངར་སྐྱུར་སྣུམ་པ་ཡིན།།
བསྐ་ཁ་མངར་བའི་ཁ་བསྐ་མངར་བ་རྟུལ།།
སྐྱུར་ཚྭ་ཁ་བ་རྣམས་གསུམ་ཡང་ལ་རྩུབ།།
ཚ་སྐྱུར་ལན་ཚྭ་རྣམས་གསུམ་ཚ་ལ་རྣོ། །ཞེས་གསུངས་སོ།།
རིག་པ་འདི་ནི་བོད་ཀྱི་སྨན་རྫས་རིག་པའི་ནུས་པ་བརྟགས་ཐབས། འབྱུང་བཞིའི་ནུས་པའི་སྙིང་པོ་བསྡུས་པ་ཞིག་ཡིན་ལ། དེང་དུས་ཚན་རིག་ཤེས་བྱའི་ནང་གི་སྐྱེ་དངོས་སོགས་སྨན་རྫས་ཀྱི་དངོས་པོ་རྣམས་ ཀྱི་གྲུབ་ཆ་དང་ནུས་པ་གང་ཡིན་བརྟག་ཐབས་ཀྱི་རྫས་འགྱུར་རིག་པ་དང༌། སྐྱེ་དངོས་རིག་པའི་རྩ་བའི་གཞུང་དོན་དང་ནང་དོན་གཅིག་མཚུངས་སུ་སྣང༌།
