ལེགས་སྦྱར་སྒྲ་རིག་པའི་དྲིས་ལན་ལྔ་བཅུ་བ་སྐལ་བཟང་འཇུག་ངོགས་ཞེས་བྱ་བ།

སྔོན་བྱོན་སྒྲ་བ་རྣམས་ལ་གུས་པས་འདུད། །
བདག་བློ་སྒྲ་ལ་གོམས་པར་བྱིན་གྱིས་རློབས། །
སྒྲ་རིག་རྒྱ་མཚོའི་འཇིངས་ལས་ཉེར་མཁོའི་བཅུད། །
དྲི་བ་དྲིས་ལན་ཚུལ་དུ་མདོ་ཙམ་དགོད། །

ལེགས་སྦྱར་གྱི་དབྱངས་དང་གསལ་བྱེད་ཡི་གེའི་ངོས་འཛིན་བཤད་པ།

༡ ལེགས་སྦྱར་ལ་དབྱངས་ཀྱི་ཡི་གེ་དུ་ཡོད།  ཁྱོད་ཀྱིས་དེ་དག་རེ་རེ་བཞིན་ངོས་འཛིན་བྱེད་ནུས་སམ།
ལན།  ལེགས་སྦྱར་ལ་དབྱངས་ཡིག་བཅུ་དྲུག་ཡོད་ཅིང་།  དེ་དག་ནི།  ཨ ཨཱ  ཨི ཨཱི  ཨུ ཨཱུ རྀ རཱྀ ལྀ ལཱྀ  ཨེ ཨེེ  ཨོ ཨོོ  ཨཾ  ཨཿབཅས་སོ། །  གཞན་ཡང་ཨཾ  ཨཿགཉིས་ཕྲི་རྗེས་སུ་དབྱངས་ཡིག་ བཅུ་བཞི《དབྱངས་ཅན་སྒྲ་མདོའི་ལུགས》རུའང་བཤད།  ལཱྀ་རིང་བོར་མི་བཞེད། ༼ཨཾ༽
༢  ལེགས་སྦྱར་གྱི་དབྱངས་བཅུ་དྲུག་ལས་ཐུང་ངུའི་དབྱངས་ཡིག་ནི་གང་དག་ཡིན།
ལན།  ཨ  ཨི  ཨུ  རྀ  ལྀ་བཅས་ལྔ་ནི་ཐུང་ངུའི་དབྱངས་ཡིག་གོ།
༣  ལེགས་སྦྱར་གྱི་དབྱངས་བཅུ་དྲུག་ལས་རིང་པོའི་དབྱངས་ཡིག་ནི་གང་དག་ཡིན།
ལན།  ཨཱ  ཨཱི  ཨཱུ  རཱྀ  བཅས་བཞི་ནི་རིང་པོའི་དབྱངས་ཡིག་གོ།
༤  མཚམས་སྦྱོར་གྱི་ཡི་གེ་དུ་ཡོད།  ཁྱོད་ཀྱིས་དེ་དག་གི་མཚམས་སྦྱོར་ཚུལ་ཤེས་སམ།
ལན།  ཨེ་ཨེེ་ཨོ་ཨོོ་བཞི་ནི་མཚམས་སྦྱོར་གྱི་ཡི་གེའོ། །  དེ་དག་གི་མཚམས་སྦྱོར་ཚུལ་ནི། ཨ་དང་ཨི་མཚམས་སྦྱར་བ་ལས་ཨེ་ཡིག་འབྱུང་བ་དང་།  ཨ་དང་ཨེ་མཚམས་སྦྱར་བ་ལས་ཨེེ་ཡིག་འབྱུང་། ཨ་དང་ཨུ་མཚམས་སྦྱར་བ་ལས་ཨོ་ཡིག་འབྱུང་། ཨ་དང་ཨོ་མཚམས་སྦྱར་བ་ལས་ཨོོ་ཡིག་འབྱུང་བ་སོགས་སོ། ། ཡང་ན། ཨ་ཨི་ལ་ཨེའོ། །  ཨ་ཨུ་ལ་ཨོའོ། །  ཨེ་དང་ཨེེ་ལ་ ཨེེའོ། །  ཨོ་དང་ཨོོ་ལ་ཨོོའོ། །  ཞེས་སོ། །
༥  རྗེས་སུ་ང་རོ་ཞེས་པའི་ཡི་གེ་ནི་གང་ཡིན།
ལན།  ཡི་གེ་མགོ་ཐོག་གི་ཀླད་ཀོར་དེ་ལ་རྗེས་སུ་ང་རོ་ཞེས་བྱ་སྟེ།  དཔེར་ན་ཨཾ་གྱི་ཐོག་གི་ ཀླད་ཀོར་དེ་ནི་རྗེས་སུ་ང་རོའོ། །
༦  རྣམ་བཅད་ཅེས་པ་ནི་གང་ཡིན།
ལན།  རྣམ་བཅད་ཅེས་པ་ནིཿའདི་ལ་ཟེར་ཏེ། དཔེར་ན་ཨཿཞེས་པའིཿནི་རྣམ་བཅད་ཅེས་པའོ། །
༧  ལེགས་སྦྱར་ལ་གསལ་བྱེད་ཀྱི་ཡི་གེ་དུ་ཡོད། ཁྱོད་ཀྱིས་དེ་དག་རེ་རེ་བཞིན་ངོས་འཛིན་བྱེད་ནུས་སམ།
ལན།  ལེགས་སྦྱར་ལ་གསལ་བྱེད་ཀྱི་ཡི་གེ་སོ་བཞི་ཡོད་ཅིང་།  དེ་དག་ནི།  ཀ་ཁ་ག་གྷ་ང་།  ཙ་ཚ་ཛ་ཛྷ་ཉ།  ཊ་ཋ་ཌ་ཌྷ་ཎ།  ཏ་ཐ་ད་དྷ་ན།  པ་ཕ་བ་བྷ་མ།  ཡ་ར་ལ་ཝ།  ཤ་ཥ་ས་ཧ།  ཀྵ་ བཅས་སོ། །  ཡང་ན།  ཧ་ཡ་ཝ་ར་ལ།  ཉ་ཎ་ན་ང་མ།  ཛྷ་ཌྷ་དྷ་གྷ་བྷ།  ཛ་ཌ་ད་ག་བ།  ཁ་ཕ་ཚ་ཋ་ཐ།  ཙ་ཊ་ཏ་ཀ་པ། ཤ་ཥ་ས་བཅས་ལ་གསལ་བྱེད་ཀྱི་ཡི་གེ་སོ་གསུམ་དང་།  མཐར་ཟད་ཀྱི་ ཡི་གེ་ཀྵ་ཡིག་བསྣན་པས་གསལ་བྱེད་ཀྱི་ཡི་གེ་སོ་བཞིའོ། །
༨  ཀུ་ཙུ་ཊུ་ཏུ་པུ་ལྔས་རང་གི་སྡེ་ཚན་གྱི་ཡི་གེ་གང་དག་མཚོན་ནམ།  དེ་ལ་དབྱངས་ཨུ་ཡིག་ སྲོག་ཏུ་སྲོག་ཏུ་ཞུགས་དགོས་དོན་ག་རེ་ཡིན་ནམ།
ལན།  ཀུས་ཀ་ཁ་ག་གྷ་ང་དང་། ཙུས་ཙ་ཚ་ཛ་ཛྷ་ཉ་དང་། ཊུས་ཊ་ཋ་ཌ་ཌྷ་ཎ་དང་།  ཏུས་ཏ་ཐ་ད་དྷ་ན་དང་། པུས་པ་ཕ་བ་བྷ་མ་བཅས་མཚོན་ནོ། ། དེ་ལ་དབྱངས་ཨུ་ཡིག་ སྲོག་ཏུ་ཞུགས་དགོས་དོན་ནི་རང་རང་གི་སྡེ་བའི་ཡི་གེ་ལྔ་བོ་ཡོངས་སུ་གཟུང་བར་བྱ་བའི་ཕྱིར་རོ། །
༩  ལེགས་སྦྱར་གྱི་གསལ་བྱེད་སོ་བཞི་ལས་མཐར་གནས་ཀྱི་ཡི་གེ་བཞི་ནི་གང་དག་ཡིན།  དེ་དག་ནི་གང་གི་མཐར་གནས་སུ་བཞག་པ་ཡིན་ནམ།
ལན།  ཡ་ར་ལ་ཝ་བཞི་ནི་མཐར་གནས་ཀྱི་ཡི་གེ་ཡིན་ལ། ཡ་ནི་ཀ་ཙའི་མཐའ་དང་།  ར་ནི་ཊའི་མཐའ་དང་། ལ་ནི་ཏའི་མཐའ་དང་། ཝ་ནི་པའི་མཐའ་བཅས་སོ། །
༡༠  ལེགས་སྦྱར་གྱི་གསལ་བྱེད་སོ་བཞི་ལས་དྲོ་བའི་ཡི་གེ་བཞི་ནི་གང་དག་ཡིན།  དེ་ལ་དྲོ་བའི་ཡི་གེ་ཟེར་དོན་ག་རེ་ཡིན་ནམ།
ལན།  ཤ་ཥ་ས་ཧ་བཞི་ནི་དྲོ་བའི་ཡི་གེ་ཡིན་ཏེ།  དབུགས་དྲོ་བར་བྱ་བའི་ཕྱིར་རོ། །
༡༡  ལེགས་སྦྱར་གྱི་གསལ་བྱེད་སོ་བཞི་ལས་མཐར་ཟད་ཀྱི་ཡི་གེ་གཅིག་ནི་གང་ཡིན།  དེ་ལ་མཐར་ཟད་ཀྱི་ཡི་གེ་ཟེར་དགོས་དོན་ག་རེ་ཡིན་ནམ།
ལན།  ཀྵ་ལ་མཐའ་ཟད་ཀྱི་ཡི་གེ་ཞེས་བྱ་སྟེ།  ཡི་གེ་ཐམས་ཅད་ཀྱི་ཟད་མཐར་གནས་པའི་ཕྱིར་རོ། །
༡༢  ལེགས་སྦྱར་ཡི་གེ་དང་ལེགས་སྦྱར་སྒྲ་རིག་པའི་སྐོར་མདོ་ཙམ་གསུང་རོགས་གནང་།
ལན། སཾསྐྲྀ་ཏའི་སྐད་དེ་ལེགས་སྦྱར་སྐད་ནི་རྒྱ་གར་དང་ཡོ་རོབ་སྐད་ཁྱིམ་ནང་གི་སྐད་རིགས ་སྔ་ཤོས་ཤིག་ཡིན་ཞིང་།  དེ་ནི་ཧ་ལམ་སྤྱི་ལོ་སྔོན་གྱི1500ལོ་ནས་སྤྱི་ལོ་སྔོན་གྱི1200ལོར་གྲུབ། ལེགས་སྦྱར་ཡི་གེ་ནི་རྒྱ་གར་གནའ་བོའི་དུས་སུ་བྱུང་ཞིང་། སྤྱི་ལོ་དུས་རབས7པའི་ནང་ཙམ་ལ་དར་བའི་ནཱ་ག་རའི་ཡི་གེ། དུས་རབས11པའི་ནང་དེ་རྨང་གཞི་ལས་འཕེལ་བའི ་ད་ལྟའི་འཕགས་ཡིགདེ་ཝ་ན་ག་རའི་ཡི་གེའམ། ཧིན་རྡུ་ཡི་གེར་གྲགས་པ་དེ་ཉིད་གཞུང་ སྤྱོད་ཀྱི་ཡི་གེར་གཏན་འབེབས་གནང་། ལེགས་པར་སྦྱར་བའི་སྒྲ་རིག་པ་ནི་འཛམ་གླིང་ཐོག་གི་བརྡ་སྤྲོད་རིག་པ་ཡོངས་ཀྱི་ཆེས་སྔ་ཤོས་ཤིག་ཡིན་པར་ངོས་འཛིན་གྱིན་ཡོད།

སྒྲ་རིག་པ་སྤྱིར་བཤད་པ།

༡༣  ཅི་ཞིག་ལ་སྒྲ་རིག་པ་ཟེར།
ལན།  ས་པཎ་གྱི་སྒྲ་འཇུག་ལས། ལུང་སྟོན་པའམ་ཀུན་གསལ་བར་བྱེད་པའམ་ཀུན་གོ་བར་བྱེད་ཞེས་བྱ་བ་ལ་འཇུག་གོ།ཞེས་སོ། །
     འཇུ་མི་ཕམ་རྣམ་རྒྱལ་རྒྱ་མཚོས། ལེགས་སྦྱར་དང་སྐད་གཞན་དག་གང་དང་གང་ཡིན་ཀྱང་རུང་། ཡུལ་སོ་སོའི་ལུགས་ཀྱི་མིང་དང་དེ་ལ་རྐྱེན་ནམ་ཕྲད་སོགས་ཚུལ་བཞིན་དུ་སྦྱར་བས་བརྗོད་བྱའི་དོན་ལེགས་པར་བརྡ་འཕྲོད་པར་བྱེད་པའི་རྣམ་གཞག་སྟོན་པའི་བསྟན་བཅོས་དེ་དག་རང་རང་གི་ལུགས་ཀྱི་ལུང་སྟོན་པའམ་སྒྲ་རིག་པར་འགྱུར་ཞིང་ཞེས་དང་།  སྒྲ་རིག་པ་ཞེས་པ་སཾ་སྐྲྀ་ཏའི་སྐད་ཀྱིས་རྣམ་གཞག་སྟོན་པའི་གཞུང་ཁོ་ནར་འཛིན་མི་དགོས་ཏེ།  བོད་དུའང་སློབ་དཔོན་ཨ་ནུས་ལུང་སྟོན་པ་རྩ་བ་སུམ་ཅུ་པ་ཞེས་གསུངས་པ་འདི་ཡང་བོད་ཀྱི་སྒྲ་རིག་པའི་བསྟན་བཅོས་ཡིན་པ་བཞིན་ནོ། །ཞེས་སོ། །
     རིག་པའི་ཁུ་བྱུག་གི་ཞལ་ནས།  ལུང་དུ་སྟོན་པར་བྱེད་པའི་བརྡ་སྤྲོད་པའི། །  ཐུན་མོང་ཁྱད་ཆོས་མིང་ཚིག་ཡི་གེ་གསུམ། །  ཐུན་མིན་རང་བཞིན་རྐྱེན་དང་རྣམ་འགྱུར་གསུམ། །  བརྗོད་ བྱར་གྱུར་གང་སྒྲ་ཡི་རིག་པའོ། །ཞེས་སོ། །  དེ་ལ་སྒྲ་རིག་པ་ཞེས་བྱ་བའི་སྒྲ་ནི་ཟིན་པའི་སེམས་ཅན་དུ་སྟོན་ཅིང་ཚིག་ཏུ་ལྷུང་བའི་སྒོ་ནས་ལུང་དུ་སྟོན་པ་ལའོ། །
     སློབ་དཔོན་ཆེན་པོ་ལེགས་པར་སྨྲ་བའི་གྲགས་པའི་མཛད་པའི《སྒྲའི་བསྟན་བཅོས་སྨྲ་བ་ཀུན་ལ་འཇུག་པ》ལས།  ཟིན་པ་དང་ནི་མ་ཟིན་དང་། །  གཉི་ག་དག་ལས་བྱུང་བའི་སྒྲ། ། སེམས་ཅན་སྟོན་དང་མི་སྟོན་དག །  ལུང་དུ་སྟོན་དང་མི་སྟོན་པའོ། །
     རིག་གནས་བཅུའི་དྲིས་ལན་བློ་གསལ་ཉེར་མཁོ་ལས།  ཡི་གེ་དབྲི་བསྣན་བསྒྱུར་བ་ལ་སོགས་པས་ཚིག་དོན་རྣམ་པར་ཕྱེ་ནས་སྟོན་པའི་རྗོད་བྱེད་དེ།  སྒྲ་རིག་པའི་མཚན་ཉིད།  སྐྱེས་བུ་རྣམས་ཀྱིས་མཉན་པར་བྱ་བའི་རང་བཞིན་གྱི་རིག་པ་ཡིན་པས་ན་སྒྲ་རིག་པ་ཞེས་བྱའོ། །
༡༤  སྒྲ་རིག་པའི་བརྗོད་བྱ་ནི་ག་རེ་ཡིན་ནམ།
ལན།  དཔང་ལོ་ཙཱ་བ་བློ་གྲོས་བརྟན་པས། རང་བཞིན་རྐྱེན་དང་རྣམ་འགྱུར་གསུམ། ། བརྡ་སྤྲོད་གཞུང་གི་བརྗོད་བྱ་ཡིན། ། ཞེས་སོ། ། ༡ རང་བཞིན་དང་། ༢ རྐྱེན། ༣ རྣམ་འགྱུར་གསུམ་གྱིས་བརྡ་སྤྲོད་པའི་གཞུང་གི་བརྗོད་བྱ་མ་ལུས་པར་བསྡུས་ཡོད་དོ། །
     རྐྱེན་སོགས་ཀྱིས་བསྒྲུབ་པར་བྱ་བའི་གཞི་ནི་རང་བཞིན་ནོ། །
     རང་བཞིན་མིང་དང་བྱིངས་དེ་ལའང་། ། ཞེས་པ་ལྟར། རང་བཞིན་ལ་དབྱེ་ན། བྱིངས་དང་། མིང་གཉིས་སོ། ། བྱིངས་ལ་དབྱེ་ན། མདོའི་བྱིངས་དང་། རྐྱེན་གྱིས་བཅོས་པའི་བྱིངས། གླེགས་བམ་ལས་འབྱུང་བའི་བྱིངས་གསུམ་མོ། །
     རྣམ་དབྱེ་མེད་པ་ནི་མིང་ངོ་། ། བྱིངས་དང་རྣམ་དབྱེ་བོར་བའི་དོན་དང་ལྡན་པ་ནི་རྟགས་སོ། ། རྟགས་ལ་དབྱེ་ན།  སྐྱེས་པའི་རྟགས་དང་།  བུད་མེད་ཀྱི་རྟགས། མ་ནིང་གི་རྟགས་གསུམ་མོ། །
     རྐྱེན་གྱི་རང་བཞིན་དེ་ཉིད་རྣམ་འགྱུར་གཞན་དུ་སྒྲུབ་པར་བྱེད་པ་སྒྲའི་ཡན་ལག་ཅིག་གོ། །
     རྐྱེན་ལ་དབྱེ་ན། བྱིངས་ལས་མིང་དུ་སྒྲུབ་པར་བྱེད་པ་བྱེད་ལྡན་གྱི་རྐྱེན་དང་།  མིང་ལས་མིང་གཞན་སྒྲུབ་པར་བྱེད་པ་ལ་དེ་ཕན་གྱི་རྐྱེན་གཉིས་སོ། ། དེ་ལའང་སྤྱི་དང་། གྲགས་མེད།  དངོས་པོའི་རྐྱེན་གསུམ་དུ་འགྱུར་རོ། །
     དཔང་ལོ་ཙཱ་བ་བློ་གྲོས་བརྟན་པས། རང་བཞིན་རྐྱེན་དང་འབྲེལ་བ་དང་། ། ཡི་གེ་ཙམ་དང་འབྲེལ་བ་ཡི། ། བསྒྱུར་དང་དབྱི་བ་རྣམ་འགྱུར་ཏེ། །
༡༥ སྒྲ་རིག་པ་ལ་ཐུན་མོང་དང་ཐུན་མིན་གྱི་ཁྱད་ཆོས་གང་དག་ཡོད།
ལན།  རིག་པའི་ཁུ་བྱུག་གི་ཞལ་ནས།  མིང་ཚིག་ཡི་གེ་གསུམ་གྱི་རྣམ་གཞག་རྣམས། །  སྒྲ་རིག་ སྤྱི་ཡི་ཐུན་མོང་ཁྱད་ཆོས་དང་། །  རང་བཞིན་རྐྱེན་དང་རྣམ་འགྱུར་ནི། །  ལེགས་སྦྱར་སྒྲ་ཡི་ ཐུན་མིན་ཁྱད་པར་ཆོས། །ཞེས་སོ། ། ལེགས་སྦྱར་སྒྲ་རིག་པ་སྒྲུབ་པ་གཙོ།
༡༦ སྒྲ་རིག་པ་སློབ་པའི་དགོས་པ་ག་རེ་ཡིན་ནམ།
ལན།  དཔལ་མགོན་འཕགས་པ་ཀླུ་སྒྲུབ་གྱིས། ཐ་སྙད་ལ་ནི་མ་བརྟེན་པར། ། དམ་པའི་དོན་ནི་རྟོགས་མི་འགྱུར། ། དམ་པའི་དོན་ནི་མ་རྟོགས་ན། ། མྱ་ངན་འདས་པ་ཐོབ་མི་འགྱུར། །
     སློབ་དཔོན་ཐོན་མིས།  བསླབ་པ་ཀུན་གྱི་གཞིར་འཛིན་ཅིང་། །  རིག་བྱེད་སྨྲ་བ་རྣམས་ཀྱི་རྒྱུ། ། མིང་ཚིག་བརྗོད་པ་ཀུན་གྱི་གཞི། ། ཡི་གེའི་སྦྱོར་བ་བཤད་པར་བྱ། ། ཞེས་སོ། །
     འདར་ལོ་ངག་དབང་ཕུན་ཚོགས་ཀྱི《འགྲེལ་བ་གསལ་ལྡན》ལས། ཚུལ་འདི་རྟོགས་ན་ཤེས་བྱའི་གནས་ཀུན་ལ། ། ཐོགས་པ་མེད་པར་བདེ་བླག་བགྲོད་པའི་ལམ། །  བཅུ་ཕྲག་རིག་གནས་ཀུན་གྱི་དང་པོ་མཆོག །  རྣམ་དག་བརྡ་སྤྲོད་གཞུང་ལ་འཇུག་པར་རིགས། །  ཞེས་སོ། །
     ས་བཟང་མ་ཏི་པཎ་ཆེན་གྱི་ཞལ་ནས།  ཐོག་མར་སྒྲ་ལ་མཁས་པ་ཡིས། །  ཚིག་དོན་རྣམ་པར་ ཕྱེ་སྟེ་བསྟན། །  དེ་ནས་དོན་ལ་མཁས་པ་ཡིས། །  ལྷག་ཆད་འཁྲུལ་བ་མེད་པར་བཤད། །  ཞེས་དང་།  ཀུན་མཁྱེན་ཐོབ་པར་འདོད་རྣམས་ཀྱིས། །  རིག་པའི་གནས་ལྔ་ཤེས་བྱ་སྟེ། །  ཁྱད་པར ་སྒྲ་ཡི་རིག་པ་ལ། །  ཐོག་མ་ཉིད་དུ་འཇུག་པར་རིགས། ། ཞེས་སོ། །
     ཞུས་ཆེན་ཚུལ་ཁྲིམས་རིན་ཆེན་གྱི་ཞལ་ནས།  གང་ཞིག་ཤེས་ན་མཁས་པའི་གནས་ཐོབ་ ཅིང་། །  མཐར་ཐུག་ཀུན་མཁྱེན་གོ་འཕང་བདེ་བླག་བགྲོད། །  གཞུང་ལུགས་ཀུན་ལ་ཐོགས་མེད་འཇུག་པའི་སྒོ། །  བརྡ་སྤྲོད་རིག་གནས་བསྟན་བཅོས་རྣམ་དབྱེ་བགྱི། ། ཞེས་སོ། །
     སྒྲ་བ་སྐལ་བཟང་ངག་དབང་དམ་ཆོས་ཀྱི་ཞལ་ནས།  ཟབ་དོན་བསྟན་པའི་སྙིང་པོ་རྟོགས་པ་ལ། །  མང་ཐོས་སྡེ་སྣོད་གསུམ་གྱི་ཚིག་དོན་ཀུན། །  བདེ་ལེགས་རྟོགས་ལ་བརྡ་སྤྲོད་གཙུག་ལག་གཞུང་། །  ངེས་པར་བྱ་བ་མཁས་པས་མགྲིན་གཅིག་བསྔགས། །  ཞེས་སོ། །
     དབྱངས་ཅན་གྲུབ་པའི་རྡོ་རྗེའི་ཞལ་ནས།  སྒྲ་ཤེས་དོན་ལ་མི་རྨོངས་ཞེས། །  མཁས་པའི་གསུངས་ལ་ཡོངས་སུ་གྲགས། །  ཞེས་སོ། །
     མདོ་ལས།  བྱང་ཆུབ་སེམས་དཔའ་ཅིའི་ཕྱིར་སྒྲ་ལ་སློབ་པར་བྱེད་ཅེ་ན།  སྒྲའི་ཚིག་ཡོངས་སུ་དག་པར་བྱ་བ་དང་།  ཡོངས་སུ་མ་དག་པའི་ཚིག་གི་དོན་གསལ་བར་སྟོན་པ་དང་།  དོན་ ཐམས་ཅད་ཤེས་ཤིང་ཁོང་དུ་ཆུད་པར་བྱ་བ་དང་།  ཡང་དག་པའི་ཚིག་མི་ཉམས་པས་ང་རྒྱལ་གྱིས་མི་ཤིགས་པ་དང་།  ངན་པར་ལྟ་བ་ལས་ལྡོག་ཅིང་སེམས་ཅན་འདུལ་བའི་ཐབས་དང་མཁས་པས་ཤེས་པར་བྱ་བའི་ཕྱིར།  བྱང་ཆུབ་སེམས་དཔའ་སྒྲ་རིག་པའི་བསྟན་བཅོས་ལ་སློབ་པར་བྱེད་དོ། ། ཞེས་སོ། །
     དེའི་ཕྱིར་ཐ་སྙད་སྒྲ་ལ་མཁས་པ་ཡིས། །  དོན་དམ་གནས་ལུགས་ལེགས་རྟོགས་ནས། ། མི་ཤེས་མུན་པ་རབ་སྤངས་ཏེ། །  ཡེ་ཤེས་སྣང་བ་ཐོབ་གྱུར་ཅིག །
     ཆོས་རྗེ་ས་པཎ་གྱི་ཞལ་ནས།  རང་བློ་ཤེས་བྱའི་གནས་ལ་མ་སྦྱངས་ན། །  ཐམས་ཅད་ མཁྱེན་པ་ནམ་མཁའི་མཐའ་ལྟར་རིང་། །  དེ་ལྟར་དགོངས་ནས་རྒྱལ་དང་རྒྱལ་སྲས་ཀྱིས། །  ཤེས་བྱའི་གནས་ཀུན་སྦྱང་ཞེས་ལེགས་པར་གསུངས། །  ཞེས་དང་།  མཁས་གང་ཤེས་བྱའི་དེ་ཁོ་ན།  ཇི་བཞིན་རྟོགས་པ་ཡིན་པར་འདོད། །  བྱེ་བྲག་སྦྱངས་པའི་དོན་ཤེས་པ། །  དེ་ཡང་དེ་ ལ་མཁས་ཞེས་བྱ། །
     རིག་པའི་ཁུ་བྱུག་གི་ཞལ་ནས།  ཤེས་བྱ་སྤྱི་དང་བྱེ་བྲག་གི། །  གནས་ལུགས་ཡང་དག་རྟོགས་ བྱེད་པའི། །  རིག་པ་སྤྱི་ལ་འཇུག་པའི་སྒོ། །  སྒྲ་རིག་ཡིན་པ་མཁས་རྣམས་གསུངས། །  ཞེས་དང་།  རིག་པའི་གནས་ཆེ་ཆུང་ཀུན་གྱི་རྩ་བར་གྱུར་པ་ལྟ་བུ་སྒྲ་རིག་པ་ལ་ཐུག་པའི་ཕྱིར།  རིག་པའི་གནས་ཆེ་ཆུང་གང་ལ་བསླབ་ཀྱང་ཐོག་མར་སྒྲ་རིག་པ་ལ་བསླབ་དགོས། ཞེས་སོ། །

སྒྲ་རིག་པ་སློབ་ཚུལ་མདོར་བསྡུས་བཤད་པ།

༡༧  སྒྲའི་དུས་གཉན་བཞི་ནི་གང་དག་ཡིན་ནམ།
ལན།  ཚེས་བརྒྱད་ལ་ནི་སློབ་དཔོན་འཇོམས། །  བཅུ་བཞི་ལ་ནི་སློབ་མ་འཇོམས། །  གནམ་སྟོང་ལ་ནི་རིག་འཇོམས། །  ཚེས་གཅིག་ལ་ནི་ཐམས་ཅད་འཇོམས། །  བཅས་བཞིའོ། །
༡༨  སྒྲ་རིག་པ་ཇི་ལྟར་སློབ་ཚུལ་མདོ་ཙམ་གསུངས་རོགས། །
ལན།  རིག་པའི་ཁུ་བྱུག་གི་ཞལ་ནས།  སྒྲ་བྱེད་སམ་ཊ་ཞེས་པའི་ཤིང་གཞོང་ངོར། །  ལེགས་པར་བཏུལ་པའི་རུས་རྡུལ་བཀྲམ་པའི་སྟེང་། །  སྒྲ་ཐུར་རྩེ་མོས་རི་མོའི་འགོད་པ་ལས། །  རིག་པའི་ངོ་མཚར་སྒྲ་སྒྲུབ་ཀུན་ཏུ་བཀྲ། ། ཞེས་སོ། །

ལེགས་སྦྱར་སྒྲ་རིག་པའི་དར་ཚུལ་བཤད་པ།

༡༩  ལྷ་ཡུལ་དུ་ཐོག་མར་བྱུང་བའི་སྒྲའི་བསྟན་བཅོས་ཆེན་པོ་གཉིས་ནི་གང་ཡིན།
ལན།  སརྦ་ཛྙ་ན་དེ་བས་མཛད་པའི《སརྦ་ཛྙ་ན་བྱཱ་ཀ་ར་ཎ》ཞེས་པ་དང་།  ལྷའི་དབང་བོ་བརྒྱ་བྱིན་གྱིས་མཛད་པའི《ཨིནྡྲ་བྱཱ་ཀ་ར་ན》ཞེས་པ་གཉིས་སོ། །
     ཡང་ན་རིག་པའི་ཁུ་བྱུག་གི་ཞལ་ནས།  སུམ་ཅུ་རྩ་གསུམ་འཆི་མེད་ཕོ་བྲང་དུ། །  སརྦ་ཛྙ་ནས་བྱཱ་ཀ་ར་ཎའི་གཞུང་། །  ལྷ་ཡི་དབང་བོའི་ཨིནྡྲའི་བརྡ་སྤྲོད་ཅེས། །  མཛད་པ་ཐོག་མའི་ སྒྲ་གཞུང་གཉིས་སུ་གྲགས། །  ཞེས་སོ། །
༢༠  སྒྲ་རིག་པ་ལྷ་ཡུལ་དུ་དར་ཚུལ་མདོ་ཙམ་བརྗོད་ཐུབ་བམ།
ལན།  དེ་ཡང་སྒྲའི་བསྟན་བཅོས་ཐོག་མ་ནི་སྔོན་སུམ་ཅུ་རྩ་གསུམ་གྱི་གནས་སུ་སརྦ་ཛྙཱ་ན་དེ་བའམ་སརྦ་ཛྙཱ་ན་དེ་བ་སྟེ་ཐམས་ཅད་མཁྱེན་པ་ཞེས་པའི་ལྷའི་སྒྲ་མཁན་ཆེན་པོ་ཞིག་བྱུང་ཞིང་། དེས་བརྡ་སྤྲོད་པ་སྒྲའི་བསྟན་བཅོས་ཆེན་པོ《སརྦ་ཛྙ་ན་བྱཱ་ཀ་ར་ཎ》ཞེས་པ་ཞིག་ཐོག་མར་མཛད་ཅིང་ལྷ་རྣམས་ཀྱིས་སྤྱད། དེའི་སློབ་མ་ལྷའི་དབང་བོ་བརྒྱ་བྱིན་གྱིས《ཨིནྡྲ་བྱཱ་ ཀ་ར་ཎ》བརྩམས།  དེའི་སློབ་མ་ཕུར་བུ་ང་རྒྱལ་གྱིས་དྲེགས་པ་ན་བརྒྱ་བྱིན་གྱིས་ཕྱིའི་རྒྱ་མཚོ ་ལས་ཆུ་བུམ་པ་གང་བླངས།  དེ་ལས་ཀྱང་ཀུ་ཤས་ཐིགས་པ་གཅིག་བླངས་ཏེ།  སྒྲ་ཡི་རིག་པ་མཐའ་ཡས་པ། །  ཡོངས་སུ་རྫོགས་པ་རྒྱ་མཚོ་ཙམ། །  ང་ཡིསས་ཤེས་པ་བུམ་པ་གང་། །  ཁྱོད་ ཀྱིས་ཤེས་པ་ཆུ་ཐིགས་ཙམ། ། ཞེས་བརྗོད་པས་ཕུར་བུ་སྒྱིད་ལུག་པ་ན་ཇི་ལྟར་ཤེས་པ་བཞིན་ལྷ་རྣམས་ལ་སྟོན་ཅིག་པར་བསྒོ་བར་མཛད་པ་བཞིན་དར་བཤད་པས།  སྒྲ་མདོ་རྣམས་ལས་ཆེས་སྔ་བ་ལྷའི་དབང་བོས་མཛད་པར་གྲགས་ལ།  རྗེས་སུ་འགྲེལ་བ་དང་འགྲེལ་བཤད་ཀྱི་ཚུལ་དར།
༢༡  རྒྱ་གར་དུ་སྒྲ་མདོ་ཆེན་པོ་བརྒྱད་དམ་བཅུ་རུ་བགྲང་བ་ནི་གང་དག་ཡིན།
ལན།  ༡  བརྒྱ་བྱིན་གྱིས་མཛད་པའི《ཨཱིནྡྲ་བྱཱ་ཀ་ར་ཎ》༢  བྲམ་ཟེ་པཱ་ཎི་ནིས་མཛད་པའི《པཱ་ཎི་ནི་བྱཱ་ཀ་ར་ཎ》༣  སློབ་དཔོན་ཙནྡྲ་གོ་མིས་མཛད་པའི《ཙནྡྲ་བྱཱ་ཀ་ར་ཎ》༤  པི་ ཤ་ལི་བྱཱ་ཀ་ར་ཎ།  ༥  ཤཀོོཊ་ཡ་ན་བྱཱ་ཀ་ར་ཎ།  ༦  སུ་མནྟ་བྷ་དྲ་བྱཱ་ཀ་ར་ཎ།  ༧  པཏཉྫ་ལི་བྱཱ ་ཀ་ར་ཎ།  ༨  མ་ནུ་ཛནྡྲ་བྱཱ་ཀ་ར་ཎ་བཅས་བརྒྱད་དང་།  དེའི་ཁར་གཞོན་ནུ་གདོང་དྲུག་ གིས་སློབ་དཔོན་དབང་ཕྱུག་གོ་ཆ་ལ་གསུངས་པའི་སྒྲ་ཀ་ལཱ་པ་དང་།  ལྷ་མོ་དབྱངས་ཅན་ མས་གསུངས་ཤིང་སློབ་དཔོན་ཨ་ནུ་བྷུ་ཏིས་འགྲེལ་མཛད་པའི་དབྱངས་ཅན་སྒྲ་མདོ་བསྣན་པས་རྒྱ་གར་གྱི་སྒྲ་རིག་པའི་བསྟན་བཅོས་གྲགས་ཆེ་བ་བཅུའོ། །
༢༢  རྒྱ་གར་སྐད་རིགས་ཆེན་པོ་བཞི་ནི་གང་དག་ཡིན།
ལན།  ༡  ལེགས་པར་སྦྱར་བ་སཾ་སྐྲྀ་ཏ་ལྷའི་སྐད་དང་།  ༢  པྲ་ཀྲྀ་ཏ་ཡུལ་མི་རང་བཞིན་གྱི་ སྐད།  ༣  ཨ་པ་བྷྲཾ་ཤ་ཟུར་ཆག་གི་སྐད།  ༤  པི་ཤཱ་ཙི་ཤ་ཟའི་སྐད་བཅས་བཞིའོ། །
༢༣  སྒྲ་གཞུང་ཐོག་མར་བོད་དུ་བསྒྱུར་པ་པོ་དང་བོད་དུ་བསྒྱུར་པའི་སྒྲ་གཞུང་ཐོག་མ་ནི་ གང་ཡིན།
ལན།  མང་ཐོས་ཀླུ་སྒྲུབ་རྒྱ་མཚོས་མཛད་པའི《ཐ་སྙད་རིག་གནས་ལྔའི་བྱུང་ཚུལ》ལས།  ཐ་སྙན་རིག་པའི་གནས་ལྔར་གྲགས་རྣམས། །  ཆོས་རྗེ་ས་པཎ་ཡན་ལ་མ་དར་ཞིང་། །  ཐར་ལོ《ཉི་མ་རྒྱལ་མཚན》ཡན་ལ་སྒྲ་མདོ་འགྱུར་བ་མེད། །  ཅེས་སོ། །  ཐར་ལོ་ཉི་མ་རྒྱལ་མཚན་གྱིས་བསྒྱུར་པའི《སློབ་དཔོན་ཙནྡྲ་གོ་མཱིའི་ཉེར་བསྒྱུར་ཉི་ཤུ་བའི་འགྲེལ་པ》ཞེས་པ་ནི་བོད་ཡིག་ཏུ་སྒྲ་གཞུང་བསྒྱུར་པའི་ཐོག་མ་ཡིན་པར་བཤད།
༢༤  ལེགས་སྦྱར་སྒྲ་གཞུང་བོད་ལ་འགྱུར་བ་གང་དག་ཡོད།  དེ་དག་ཐོག་མར་བོད་དུ་བསྒྱུར་བའི་ལོ་ཙཱ་བ་ནི་སུ་སུ་ཡིན།  ཁྱོད་ཀྱིས་སྒྲ་མདོ་ཀ་ཙན་དབྱངས་གསུམ་གྱི་བོད་ཀྱི་འགྲེལ་ཆེན་གསུམ་འདྲེན་ནུས་སམ།
ལན།  སྒྲ་གཞུང་གི་མིང་།              རྩོམ་པ་པོ།                          བསྒྱུར་པ་པོ།
      པཱ་ཎི་པ།                སློབ་དཔོན་པཱ་ཎི་པ།                  འདར་བ་ངག་དབང་ཕུན་ཚོགས་ལྷུན་གྲུབ།
      ཙནྡྲ་བ།                སློབ་དཔོན་ཙནྡྲ་གོ་མི།                       ཤོང་སྟོན་རྡོ་རྗེ་རྒྱལ་མཚན།
      ཀ་ལཱ་པ།             གཞོན་ནུ་གདོང་དྲུག་གིས་དབང་ཕྱུག་གོ་ཆར་གསུངས་པ།    དཔང་བློ་གྲོས་བརྟན་པ།
སྒྲ་དབྱངས་ཅན་མ། ལྷ་མོ་དབྱངས་ཅན་མས་གསུངས་ཤིང་ལྷ་མཐོང་ལོ་ཙཱ་བ་བཤེས་གཉེན་སློབ་དཔོན་ཨ་ནུ་བྷུ་ཏིས་འགྲེལ་མཛད་པ། རྣམ་རྒྱལ་གྱིས་ཕྱེད་ཙམ་བསྒྱུར། ཇོ་ནང་ཏཱ་ར་ནཱ་ཐ་ཆ་ཚང་བསྒྱུར།
བོད་ཀྱི་འགྲེལ་ཆེན་གསུམ་ནི། ༡ ས་བཟང་མ་ཏི་པཎ་ཆེན། སྒྲའི་བསྟན་བཅོས་ཀ་ལཱ་པའི་མདོའི་རྣམ་བཤད་ལེགས་སྦྱར་རབ་གསལ་སྣང་བ།
༢  ཇོ་ནང་ཏཱ་ར་ནཱ་ཐ།  དབྱངས་ཅན་བརྡ་སྤྲོད་ཀྱི་མདོ་འགྲེལ་པ་མཆོག་ཏུ་གསལ་བ།
༣  སི་ཏི་པཎ་ཆེན་ཆོས་ཀྱི་འབྱུང་གནས།  ལེགས་སྦྱར་གྱི་སྒྲའི་བསྟན་བཅོས་ཙནྡྲ་པའི་རྣམ་བཤད་བརྡ་སྤྲོད་གཞུང་ལུགས་རྒྱ་མཚོར་འཇུག་པའི་གྲུ་གཟིངས།
༢༥  ལེགས་སྦྱར་སྒྲ་གཞུང་ཐམས་ཅད་ཀྱི་ཕྱི་མོ་ནི་གང་ཡིན།
ལན།  སྒྲ་གཞུང་པཱ་ཎི་པ་ནི་འཕགས་ཡུལ་སྒྲ་གཞུང་རྣམས་ལས་ཕྱི་མོ་ཡིན་པར་གྲགས།  དེ་ནི་སྤྱི་ལོ1658ལོར་བོད་ཀྱི་ལོ་ཙཱ་བ་འདར་བ་ངག་དབང་ཕུན་ཚོགས་ལྷུན་གྲུབ་གྱིས་ཆ་ཚང་བོད་ཀྱི་སྐད་ཡིག་ཏུ་བསྒྱུར་གནང་མཛད།