དག་ཡིག་ཚིག་གསལ་སྒྲོན་མེ་ཞེས་བྱ་བ་བཞུགས་སོ། །

ཡི་གེའི་དབྱེ་བ་སྤྱིར་བསྟན་པ།
     ན་མོ་གུ་རུ་མཉྫུ་གྷོཥཱ་ཡ། རྒྱལ་ཀུན་ཀུན་མཁྱེན་ཕུང་པོ་གཅིག་བསྡུས་ནས། །མ་ལུས་ལུས་ཅན་འགྲོ་ལ་བློ་གྲོས་མཆོག །སྟེར་མཛད་མཛད་པ་ཕུལ་བྱུང་ལྷག་པའི་ལྷ། །འཇམ་དབྱངས་དབྱངས་ཅན་ལྷ་མོས་དགེ་ལེགས་སྩོལ། །བརྟན་པའི་འཁོར་ལོའི་རྣམ་འཕྲུལ་མི་ཡི་གར། །བོད་ཡུལ་ཡི་གེའི་སྲོལ་འབྱེད་ཐུ་མི་ཞེས། །གངས་ཁྲོད་མཁས་པའི་གཙུག་རྒྱན་སམྦྷོ་ཊའི། །བཀའ་དྲིན་ལན་བརྒྱར་དྲན་པས་རྟག་ཏུ་བསྔགས། །གང་ཐུགས་ཟབ་གསལ་དག་པའི་མཁའ་དབྱིངས་ནས། །ལེགས་བཤད་བདུད་རྩིའི་གྲུ་ཆར་བབས་པའི་རྒྱུན། །བདག་བློའི་ཟ་མ་ཏོག་ཏུ་ལེགས་འཁྱིལ་བ། །དོན་གཉེར་འགའ་ལ་ཕན་འདོད་ཡིད་ཀྱིས་སྦྱིན། །དེ་ཡང་ཐུ་མི་ལོ་ཙཱ་བས། །རྒྱ་གར་ཡི་གེ་ལྔ་བཅུ་ནི། །བོད་ཡིག་སུམ་ཅུར་གཏན་ཕབ་པ། །ཀ་སོགས་གསལ་བྱེད་སུམ་ཅུ་སྟེ། །དབྱངས་ཡིག་ཨི་ཨུ་ཨེ་ཨོ་བཞི། །གི་གུ་ཞབས་ཀྱུ་འགྲེང་བུ་དང༌། །ན་རོ་བཞིར་འགྱུར་ལོགས་སུ་མེད། །མིང་གཞིའི་ཡི་གེ་སུམ་ཅུ་ལས། །ཀ་ཅ་ཏ་པ་ཙ་རྣམས་ཕོ། །ཁ་ཆ་ཐ་ཕ་ཚ་མ་ནིང༌། །ག་ཇ་ད་བ་ཛ་ཝ་དང༌། །ཞ་ཟ་འ་ཡ་ཤ་ས་མོ། །ང་ཉ་ན་མ་ཤིན་ཏུ་མོ། །ར་ལ་ཧ་རྣམས་མོ་གཤམ་མོ། །འདི་ལས་ག་ད་བ་མ་འ། །སྔོན་འཇུག་ལྔའོ་ནང་གསེས་ཀྱིས། །བ་ཕོ་ག་ད་གཉིས་མ་ནིང༌། །འ་མོ་མ་ནི་ཤིན་ཏུ་མོ། །མིང་གཞི་གང་གི་སྔོན་འཇུག་པ། །བ་ནི་ཀ་ག་ཅ་ཏ་ད། །ཙ་ཞ་ཟ་ཤ་ས་བཅུར་འཇུག །ག་ནི་ཅ་ཉ་ཏ་ད་ན། །ཙ་ཞ་ཟ་ཡ་ཤ་ས་སྟེ། །བཅུ་གཅིག་ལ་འཇུག་དས་འཕུལ་ནི། །ཀ་ག་ང་པ་བ་མ་དྲུག །འ་ནི་ཁ་ག་ཆ་ཇ་ཐ། །ད་ཕ་བ་ཚ་ཛ་བཅུར་འཇུག །མ་ནི་ཁ་ག་ང་ཆ་ཇ། །ཉ་ཐ་ད་ན་ཚ་ཛ་སྟེ། །བཅུ་གཅིག་ལ་འོ་བརྩེགས་འཕུལ་ནི། །བ་ལས་གཞན་དུ་ཡོད་མ་ཡིན། །རྗེས་འཇུག་ག་ང་ད་ན་བ། །མ་འ་ར་ལ་ས་བཅུ་ལས། །ནང་གསེས་ད་བ་ས་གསུམ་ཕོ། །འ་ར་གཉིས་མོ་ག་ང་ན། །མ་ལ་ལྔ་པོ་མ་ནིང་ངོ༌། །རྗེས་འཇུག་ཕོ་མོ་མ་ནིང་གསུམ། །དྲག་ཞན་བར་མའི་ཚུལ་གྱིས་འཇུག །ཚེག་བར་གཅིག་ཏུ་ཕོ་གསུམ་ཉིད། །ནང་ཕྲད་དྲག་པོའི་དེ་ལ་ཡང༌། །རབ་འབྲིང་ཐ་གསུམ་ལ་སོགས་པ། །ལྷག་མ་གཞན་ཡང་ཤེས་པར་བྱ། །མགོ་ཅན་ར་ལ་ས་གསུམ་ནི། །ར་ལ་བཏགས་པ་བཅུ་གསུམ་སྟེ། །རྐ་རྒ་རྔ་རྗ་རྙ་རྟ་རྡ། །རྣ་རྦ་རྨ་རྩ་རྫ་རླའོ། །ལར་བཏགས་ལྐ་ལྒ་ལྔ་ལྕ་ལྗ། །ལྟ་ལྡ་ལྤ་ལྦ་ལྷ་སྟེ་བཅུ། །ས་མགོ་ཅན་ནི་བཅུ་གཉིས་ཏེ། །སྐ་སྒ་སྔ་སྙ་སྟ་སྡ་སྣ། །སྤ་སྦ་སྨ་སྩ་སླ་རྣམས་སོ། །ར་ཡ་ལ་ཝའི་འདོགས་བཞི་ནི། །ར་བཏགས་བཅུ་སྟེ་ཀྲ་ཁྲ་གྲ། །ཏྲ་དྲ་པྲ་ཕྲ་བྲ་མྲ་སྲའོ། །ཡ་བཏགས་བདུན་ཏེ་ཀྱ་ཁྱ་གྱ། །པྱ་ཕྱ་བྱ་མྱ་རྣམས་སུ་འདོད། །ལ་བཏགས་ཡི་གེ་ཀླ་གླ་བླ། །ཟླ་རླ་སླ་སྟེ་དྲུག་ཡིན་ནོ། །ཝ་བཏགས་ཀྭ་ཁྭ་གྭ་ཅྭ་དང༌། །ཙྭ་ཚྭ་ཞྭ་དང་ཟྭ་རྭ་ཤྭ། །སྭ་ཧྭ་རྣམ་པ་བཅུ་གཉིས་སོ། །དག་ཡིག་ཚིག་གསལ་སྒྲོན་མེ་ལས་ཡི་གེའི་དབྱེ་བ་སྤྱིར་བསྟན་པ་སྟེ་དང་པོའོ།། །།
ཡི་གེའི་སྦྱོར་བ་རྒྱས་པར་བཤད་པ།
     ཀ༽ དེ་ནས་ཀ་ལ་སོགས་པ་ཀུན། །རིམ་བཞིན་རྐྱང་འཕུལ་མགོ་ཅན་དང༌། །དབྱངས་བཞི་འདོགས་ལྡན་རྗེས་འཇུག་གིས། །བརྒྱན་ཏེ་རྒྱས་པར་བཤད་པར་བྱ། །ཀ་ལ་པིངྐ་ཀེ་ལ་ཤ །ཀུན་མཁྱེན་ཀུ་ཤ་ཀ་ཤི་ཀ །ཀླུ་རྒྱལ་ཆུ་ཀླུང་ཀ་མ་ལ། །ཀློང་ཡངས་ཀ་དག་ཀུ་མུ་ད། །ཀ་ར་ཝཱི་ར་ཀེ་ཏ་ཀ །ཀ་བ་ཀ་ར་ཀ་པཱ་ལ། །ཀེང་རུས་འདི་ཀོ་ཀེ་ཀེ་རུ། །ཀོ་བ་ཡུངས་ཀར་ཀ་ཅའི་དངོས། །ཀུ་ཤུ་གུར་ཀུམ་ལྕགས་ཀྱུས་བཏབ། །ཀྱེ་མ་ཀྱེ་ཧུད་ཀྱེ་ཀྱེ་འབོད། །ཀྲོག་ཀྲོག་ཀྲོང་ཀྲོང་མགོ་ཀྱོག་ཀྱོག །ཀོག་གི་ཀེར་ལངས་ཀུ་རེ་བྱས། །ཀུ་ཅོ་ཀྱལ་ཀ་ཀླན་ཀའི་རྒྱུ། །ཉེན་ཀོར་ཀེ་འུ་ཀུན་དོང་ཟ། །དོ་ཀེར་སྟོད་ཀོར་ཀླད་ཀོར་བྱིན། །ཀར་ཀར་ཟུག་ལངས་བད་ཀན་ནད། །ཀུ་ཡ་ཀླ་ཀློ་དཀྱིལ་ཀྲུང་བཅས། །ཀྭ་ཡེ་འབྱམས་ཀླས་ཀློག་ཀྱང་ཀློགས། །དཔྱིད་ཀ་ཀུ་ཧུ་ཀྱུར་ཀྱུར་སྐད། །མང་ཚིག་ཀུན་སོགས་ཀ་རྐྱང་ངོ༌། །
     མདོག་དཀར་དཀར་ཆག་ཆུ་མ་དཀྲུགས། །དཀོར་མཛོད་དཀྱིལ་འཁོར་དབུས་དཀྱིལ་དུ། །དཀྲོང་བསྐྱེད་དཀོན་ཅོག་དཀའ་ཐུབ་དཀོན། །དཀྱུས་རིང་དཀྱུས་མ་ཀུན་དཀྲིས་ཆེ། །སྤྲིན་དཀྲིགས་ཞོ་དཀྲོགས་རོལ་མོ་དཀྲོལ། །དཀར་ཡོལ་དཀའ་འགྲེལ་དཀྲིགས་ཕྲག་གཅིག །ལུས་ཀྱི་དཀུ་ལ་གོས་ཀྱིས་དཀྲིས། །དཀན་གཟར་ལ་སོགས་དས་འཕུལ་ཀའོ། །བཀྲ་ཤིས་བཀྲག་མདངས་ཁ་དོག་བཀྲ། །བཀའ་ལུང་ཁལ་བཀལ་སྐུད་པ་བཀལ། །ཕོ་ཉ་འོད་བཀྱེ་མེ་ཏོག་བཀྲམ། །བཅིངས་བཀྲོལ་དྲི་མ་བཀྲུ་བཀྲུས་བཀྲེན། །བཀྲེས་སྐོམ་ལོགས་བཀར་སྲོག་བཀུམ་བཀག །སྣོད་བཀང་བསྙེན་བཀུར་བཀུར་སྟིས་མཆོད། །བཀོད་ལེགས་བདེར་བཀོད་ཟུར་དུ་བཀོལ། །ཤིང་བཀུག་སྣོད་བཀས་གཡོག་ཏུ་བཀོལ། །གཞུ་བཀང་གོས་བཀབ་ཐག་པས་བཀྱིགས། །བཀའ་དྲིན་བཀའ་བཀྱོན་རྩ་བ་བཀོག །ཡར་བཀན་སྤ་བཀོང་རིམ་གྱིས་བཀྲི། །མདོ་བཀླགས་ཟིན་སོགས་བས་འཕུལ་ཀའོ། །རྐང་ལག་རྐན་ཕུག་འདོམས་ཀྱི་རྐུབ། །ཆོམ་རྐུན་རྒྱུ་རྐྱེན་ཕྱེ་རྐྱལ་རྐུ། །ས་རྐོ་གན་རྐྱལ་རྐེད་པ་རྐྱོང༌། །རྐ་མགོར་རྐྱལ་རྩེ་རི་དྭགས་རྐྱང༌། །ཆིག་རྐྱང་ལ་སོགས་ར་བཏགས་ཀའོ། །ལྐོག་གྱུར་ལྐོག་མ་ལྐོག་ཤལ་དང༌། །དིག་ལྐུགས་བྱས་སོགས་ལར་བཏགས་ཀའོ། །སྐ་ཅོག་རྣམ་གཉིས་སྐར་མ་སྐག །ལུས་སྐེམ་སྣུམ་སྐུད་སྐུད་པ་སྒྲིལ། །སྐྱོ་མ་སྐ་རགས་སྐྱུ་རུ་ར། །སྐྱེས་བུ་ཞལ་སྐྱེམས་སྐྱུར་བུ་སྐོལ། །བྱ་སྐོན་མྱུར་སྐྱེན་སྐྱོ་བསངས་བྱེད། །སྐེམ་བྱེད་སྐུལ་བྱེད་སྐོར་བ་བྱེད། །ཆང་སྐྱུགས་ཁ་སྐྱེངས་སྐྲན་གྱི་ནད། །སྐྱ་སྦབ་སྐྲངས་ཤིང་རི་སྐེགས་སྐད། །ཆུ་སྐྱར་སྐྱ་ག་སྐྲག་ནས་བྲོས། །དགེ་སྐོས་བྱ་སྐྲོག་སྐྱོ་ངོགས་བྱས། །སྐུད་པོའི་སྐེ་ལ་ཨོག་སྐོར་སྐྱེས། །རྒྱ་སྐྱེགས་སྐྱེད་ཚལ་ཤིང་སྐྱེར་པ། །ཐེམ་སྐས་སྐྱོན་སྐྱོབ་སྐྱབས་འགྲོ་སྐྱོར། །ཆོས་སྐྱོང་ས་སྐྱོང་རེ་སྐོང་སྐྱིད། །བྱ་སྐྲོད་སྲབ་སྐྱོགས་སྐྱོས་མ་སྐྱེལ། །ཇི་སྐད་འདི་སྐད་ཁ་སྐོང་སྐབས། །དབུ་སྐྲ་སྐད་ཅིག་སྐར་ཁུང་གསལ། །སྦས་སྐུང་མཐའ་སྐོར་སྐལ་བ་ལྡན། །སྒུལ་སྐྱོད་སྐྱེ་མཆེད་ཐུགས་དམ་སྐོང༌། །མཐའ་སྐྱོར་སྐྱ་རེངས་སར་བཏགས་ཀའོ། །འདོད་ལ་བརྐམ་པས་བརྐུ་བྱ་བརྐུས། །སྲ་བརྐྱང་ལག་བརྐྱང་བརྐོ་བྱ་བརྐོས། །བས་འཕུལ་ར་མགོ་ལྡན་པའི་ཀའོ། །བྱུག་པ་བསྐུ་བསྐུས་ལག་པ་བསྐུམས། །འཕྲིན་བསྐུར་དབང་བསྐུར་ཆོས་ལ་བསྐུལ། །ནོར་བསྐྱི་བསྐྱིས་བྱིན་སྐྱིན་པ་བསྐྱལ། །གོས་བསྐོན་རྟར་བསྐྱོན་སླར་ཡང་བསྐྱར། །བགེགས་བསྐྲད་བཅོམ་བསྐྱུངས་ས་བོན་བསྐྲུན། །བསྐལ་མེས་ཆུ་བསྐམས་བསྐལ་དོན་དང༌། །འཕོ་བསྐྱས་རྒྱང་བསྐྱུར་བྱ་བ་བསྐྱུངས། །མི་བསྐྱོད་བསྐོར་ནས་རྒྱལ་སར་བསྐོས། །རོ་བསྐ་ཁ་བསྐངས་ཐུགས་དམ་བསྐངས། །སེམས་བསྐྱེད་རྒྱ་བསྐྱེད་བརྗེད་པའི་བསྐྱུད། །བས་འཕུལ་ས་མགོ་ལྡན་པའི་ཀའོ། །
     ཁ༽ ཁོ་བོ་གོ་ཁྲབ་ཁྲི་ཁྲག་མང༌། །ཁྲག་ཁྲིག་ཁྲུས་བྱས་ཁྲོ་བ་དང༌། །ཁོང་ཁྲོ་ཁོན་འཛིན་ཁྲོ་བོ་ཁྲོས། །ཁོང་ཁྲག་ཁྲུང་ཁྲུང་ཁྭ་ཏའི་ཁྱུ། །ཚུལ་ཁྲིམས་ཁྲུ་གང་ཁྲི་ཡི་ཁྲོད། །ཁྲམ་ཁ་བཏབ་ཅིང་ཁང་ཁྱིམ་ཁྱམས། །བྱ་ཁྲ་ཁྱིས་ཁྱེར་ཁྲེ་ཁྱོར་གང༌། །ཁོ་ར་ཁོར་ཡུག་ཁྲོན་པའི་ཁ། །ཁ་དོག་ཁྲོ་གཉེར་སིལ་སྙན་ཁྲོལ། །ཁམས་གསུམ་དུར་ཁྲོད་སྣ་ཁྲིད་བྱས། །ཁྲུམས་སྟོད་ཁྲེལ་ཡོད་ཁ་རྐྱང་ངོ༌། །མཁས་པས་མཁྱེན་ཅིང་མཁན་པོ་མཁོ། །སྲ་མཁྲང་མཁྲེགས་ཤིང་དཔེ་མཁྱུད་བྱེད། །ཞུ་མཁན་མཁུར་ཚོས་མཁལ་མ་དང༌། །ནམ་མཁའ་མཁྲིག་མ་ས་ཡི་མཁར། །མཁྲིས་པ་ལ་སོགས་མས་འཕུལ་ཁའོ། །འཁོར་ལོ་འཁོར་བཅས་འཁོད་ནས་བསྐོར། །བློ་འཁུམས་ཞེ་འཁོན་མ་མགུ་འཁང༌། །འཁྱགས་ནས་མཐའ་འཁོབ་འཁྱར་ཞིང་འཁྱམས། །རྒས་འཁོགས་རྐང་འཁུམ་འཁྱོར་བས་འཁྱོག །འཁར་བ་ལ་འཁྲིལ་མགུལ་ནས་འཁྱུད། །འཁྲིག་ཚིག་ངག་འཁྱལ་འཐབ་འཁྲུགས་ལངས། །ནོར་འཁྲུལ་སྐུ་འཁྲུངས་བྲོ་གར་འཁྲབ། །སེམས་འཁྲུགས་ཁུར་འཁུར་འཁར་རྔ་འཁྲོལ། །འོད་འཁྱིལ་མ་འཁྱོག་སྲད་བུ་འཁེལ། །བསྐུར་བ་འཁྱོལ་སོགས་འས་འཕུལ་ཁའོ། །
     ག༽ གྲུབ་མཐའ་གྲུབ་ཐོབ་གྲངས་མེད་གྲགས། །འཆིང་གྲོལ་རལ་གྲི་གྲོ་གས་གྲིལ། །གྲང་ནད་གྲུམ་བུས་གྲོངས་པ་མེད། །སྐར་མ་མོན་གྲུ་གྲེ་གྲོ་བཞིན། །ཆོས་གྲྭའི་གྲལ་དུ་རིམ་གྲོ་བྱས། །ཡུལ་གྲུ་གྲུ་བཞི་ཆུ་ཡི་གྲུ། །གྲབས་བྱེད་གྲོང་ཁྱེར་འབྲུ་ནས་གྲོ །གྲོ་མ་གྲོད་པ་གྲུམ་ཞིང་གྲིམ། །གྲེ་བར་གྲོས་གླེང་གྲིབ་མ་བསིལ། །གྲོགས་བྱས་གླུད་བཏང་གླང་ལྟར་གླེན། །གླ་རྩི་གླ་རྔན་གླིང་བུའི་གླུ། །འཛམ་གླིང་གླེགས་བམ་ནང་ཁྲོལ་གློ། །གླང་ཆེན་གླགས་རྙེད་གློས་ཕབ་ཉལ། །བྱ་གླག་གློག་འཁྱུག་ལྷན་པ་གླན། །དངོས་གྲུབ་གཞི་གྲུབ་ཐ་གྲུ་ཡངས། །ལྷུན་གྲུབ་ལ་སོགས་ག་རྐྱང་ངོ༌། །དགེ་བ་དགེ་འདུན་དགེ་སྦྱོང་དགུ །དགེ་བསྙེན་དགེ་ཚུལ་དགའ་ནས་དགོད། །དགུང་སྔོན་དགེ་བཤེས་ཡི་གེར་དགོད། །དགྲ་བཅོམ་དགོངས་དགྲོལ་ཐུགས་དགེས་དགྱེས། །དགག་སྒྲུབ་ལོགས་དགར་དགོན་པར་གནས། །སྣོད་དགང་ཁ་དགབ་མེ་ཏོག་དགྲམ། །དགུན་ཀ་དགོང་མོ་རི་དྭགས་དགོ །དགུག་གཞུག་དགུང་ལོ་དས་འཕུལ་གའོ། །བཀའ་བགྲོ་བགྲོ་གླེང་བགྱིད་ཕྱིར་བགྲོད། །གོ་བགོས་བགེགས་བསྐྲད་ཚོད་བགམ་བགྱིས། །བགྲང་ཡས་ལོས་བགྲེས་སྤྱན་བགྲད་ལྟ། །བགོ་སྐལ་ནོར་བགོས་གད་མོ་བགད། །རྙོག་མ་བགྲུངས་སོགས་བས་འཕུལ་གའོ། །མགོ་མགུལ་མགྲིན་པས་མགུར་དབྱངས་བྱས། །མགྲོན་པོ་མགར་བ་མགུ་ནས་བྱོན། །མགོན་པོ་མགལ་མེ་མྱུར་བའི་མགྱོགས། །ཡ་མགལ་མ་མགལ་མས་འཕུལ་གའོ། །འགྲོ་བ་ལམ་འགྲོ་འགྲིམ་ཞིང་འགྲུལ། །ལོགས་འགྱིང་འགྲོས་འགོར་འགྲན་ཟླ་འགྲིབ། །འགོ་བ་ལྟོ་འགྲངས་གཞུ་འགེངས་འགྱངས། །ཆུ་འགོག་འགགས་ནས་འགའ་ཞིག་འགྲེང༌། །མཉམ་འགྲོགས་ཚིག་འགྲེལ་སྲོག་འགུམ་འགྱེལ། །འགུལ་ནས་ཆོས་དང་འགལ་བས་འགྱོད། །དབེན་པའི་འགོལ་སར་འགོ་ནད་འགོས། །བདེར་འགོད་འགོང་པོ་འཕེལ་འགྲིབ་བྱེད༌། །ལམ་གྱི་འགྲོན་འགུགས་མཁར་གྱི་འགྲམ། །བརྩོན་འགྲུས་དོན་འགྲུབ་ཐོག་མའི་འགོ །རིགས་འགྲེ་ཀླད་འགེམས་འཐབ་མོ་འགྱེད། །ཆུ་འགྲེམས་ལ་སོགས་འས་འཕུལ་གའོ། །རྒྱལ་བ་རྒྱལ་པོ་རྒྱ་མཚོར་རྒྱུ། །བྱ་རྒོད་རྒན་པོ་རྒ་ཤིས་རྒུད། །གཏམ་རྒྱུད་ཕྲེང་རྒྱུད་རྒྱུད་མང་སྒ། །དབུ་རྒྱན་ཕས་རྒོལ་རྒྱང་རིང་རྒྱུག །རྒོད་མ་ཤ་རྒྱས་ལུས་ཀྱི་རྒྱབ། །དམུ་རྒོད་བྱིང་རྒོད་ཁྱི་རྒྱ་བོ། །རྒྱ་ཚྭ་རྒྱ་མཚོ་རྒྱུ་མཚན་ཅན། །རྒྱུ་འབྲས་ང་རྒྱལ་དྲེགས་པའི་རྒྱགས། །རྒྱ་གྲམ་རྒྱོབ་ཅིག་རྒྱལ་མཚན་འཛིན། །ཉ་རྒྱར་རྒྱུས་པ་རྒྱུ་མ་བཟུང༌། །རྒྱ་གར་རྒྱ་ཆེར་ར་བཏགས་གའོ། །ལ་ལྒ་ལྒང་པ་ཉིད་དུ་ངེས། །འགའ་ཞིག་སྨན་གྱི་ལྒ་ལའང་བཞེད། །སྒོམ་ཆེན་སྒོར་མོ་ཁང་པའི་སྒོ། །བློ་སྒམ་ལྕགས་སྒྲོག་སྒྲིལ་བའི་སྒྲ། །ཞུམ་པའི་སྒྱིད་ལུག་སྒྱེད་བུ་སྒྱེལ། །སྒྱུ་རྩལ་གཡོ་སྒྱུ་སྒྱུ་མ་མཁན། །སྒྲུང་ཤོད་ཤིང་སྒྲོམ་སྒྲོ་བ་སྒྱེ། །སྒྱུག་མོ་སྒོ་ང་སྒོག་པ་ཟོས། །སྡིག་སྒྲིབ་ལས་སྒྲོལ་ཆོས་སྒྲ་སྒྲོགས། །སྒལ་ཚིགས་སྒྲེན་མོ་བགྱིས་ནས་སྒུག །སྒྱིད་ཁུང་སྒྲོ་གུའི་མདུད་པས་སྒྲོག །གྱེན་སྒྲེང་སྒར་བཏབ་རྟ་ཡི་སྒ། །བཤད་སྒྲུབ་སྒྲོལ་མ་ཀླུ་སྒྲུབ་སྒྲུབས། །མནའ་སྒོག་སྒྱོགས་འཕེན་སྒྱུར་བར་བྱེད། །སྒང་གཤོང་སྒྲོན་མེ་སྒོས་སུ་སྒྲོན། །སྒྲུབ་བྱེད་ལ་སོགས་སར་བཏགས་གའོ། །ཆུ་བརྒལ་བརྒལ་བརྟག་བརྒྱ་ཕྲག་བརྒྱད། །རྒྱན་གྱིས་བརྒྱན་ཅིང་གད་བརྒྱངས་ཆེ། །ཕྲེང་བརྒྱུས་འོ་བརྒྱལ་དྲན་མེད་བརྒྱལ། །བརྒྱུད་པ་རིམ་བརྒྱུད་བརྒྱུད་མར་བྱོན། །བརྒྱབ་ཟིན་ལ་སོགས་བས་འཕུལ་བའི། །ར་མགོ་ལྡན་པའི་ག་ཉིད་དོ། །ཆོས་དང་མདོག་བསྒྱུར་བཀའ་བསྒོ་བསྒོས། །ཆུར་བསྒྲལ་ཆོས་བསྒྲགས་དོན་བསྒོམས་ཟིན། །རིགས་བསྒྲེས་བློ་བསྒྲིམས་རྒྱལ་མཚན་བསྒྲེངས། །མནའ་བསྒགས་ལམ་བསྒུགས་བག་ཆགས་བསྒོས། །སྒྲ་བསྒྲགས་འོད་བསྒྲིབས་ཕྱོགས་གཅིག་བསྒྲིགས། །བསྒྲུན་པར་མི་ནུས་བསྒྱུབ་བྱ་བསྒྲུབས། །མི་བསྒུལ་བྱ་བའི་བསྒང་ལ་སོགས། །བས་འཕུལ་ས་མགོ་ལྡན་པའི་གའོ། །
     ང༽ སྙན་དངགས་ཟིལ་དངར་ཚར་དུ་དངར། །གསེར་དངུལ་དངོས་པོ་དངོས་མེད་ཆོས། །དངོས་གྲུབ་དངོས་གཞི་དངོས་དངོས་གནས། །སྐྲག་དངངས་ལ་སོགས་དས་འཕུལ་ངའོ། །མངའ་རིས་མངའ་ཞབས་མངའ་ཐང་ཆེ། །མངའ་མཛད་མངའ་བདག་མངག་བཞུག་མངགས།། མངོན་སུམ་མངོན་གྱུར་སྐྱེ་གནས་མངལ། །མངའ་བརྙེས་མངོན་ཤེས་ཐུགས་ལ་མངའ། །མངོན་སྤྱོད་ཆོས་མངོན་མངར་བའི་རོ། །གནོད་པའི་མངན་སོགས་མས་འཕུལ་ངའོ། །རྔ་བརྡུང་རྔ་ཡབ་རྔོམ་བརྗིད་ཅན། །རྔོན་པ་རྔམ་ནས་རྔ་མོང་འདེད། །དབུགས་རྔུབ་ཟུག་རྔུ་ནད་ཀྱི་རྔོ། །ལུས་རྔུལ་གླ་རྔན་མཐུག་པའི་རྔམ། །རྔ་རྔོག་ནས་རྔོ་རྩྭ་སོགས་རྔ༌། །རུས་ཀྱི་རྔོག་སོགས་རར་བཏགས་ངའོ། །ཞལ་སྔ་སྤྱན་སྔ་སྔ་མ་སྔོན། །སྔགས་པ་མདོག་སྔོ་གསང་སྔགས་སོ། །མདུན་གྱི་སྔུན་དུ་སྔོ་བར་བྱེད། །མཚང་ནས་སྔོག་སོགས་སར་བཏགས་ངའོ། །རྩྭ་སོགས་བརྔས་པ་རར་བཏགས་ངའོ། །བསྟོད་བསྔགས་དགེ་རྩ་བསྔོ་བྱ་བསྔོས། །སྡུག་བསྔལ་རྣམ་པར་བསྔོས་པ་སོགས། །བས་འཕུལ་ས་མགོ་ལྡན་པའི་ངའོ། །
     ཅ༽ ཅི་ལྟར་ཅི་སླད་ཅི་ཡི་ཕྱིར། །ཁྱེད་ཅག་ངེད་ཅག་མིག་ཅན་སོགས། །སུམ་ཅུ་དྲུག་ཅུ་བདུན་ཅུ་དང༌། །བརྒྱད་ཅུ་སེམས་ཅན་ཡིན་ནོ་ཅོག །ལྷན་ཅིག་སྐད་ཅིག་ཁ་ཅིག་ཟེར། །ཤོག་ཅིག་གྱུར་ཅིག་སྡོད་ཅིག་ཅེས། །ཅི་སྟེ་ཧ་ཅང་ཅ་ཅོ་བྱེད། །ཅི་ནས་ཅང་ཤེས་ཅིག་ཤོས་དགོས། །ཅོ་ཏོ་ཐོར་ཅོག་ཅོད་པན་འཆང༌། །བེ་ཅོན་ཅིག་ཅར་ཅམ་གྱིས་འཇོག །ཅོ་འདྲི་མུ་ཅོར་སྨྲས་ལྟ་ཅི། །ལན་ཅིག་ཅིས་ཀྱང་མིག་ཅེ་རེ། །ཅོང་དང་ཅང་ཏེའུ་ཅི་ཞིག་བརྡུངས། །ཅང་མི་ཤེས་པའི་བྲག་ཅས་ཅི། །ཅོག་ཙེ་ཅུ་གང་ཅ་རྐྱང་ངོ༌། །གཅད་བྱ་ཤིང་གཅོད་ཞལ་ལྕེ་གཅོད། །གྲོགས་ཀྱིས་ཡིད་གཅུགས་གཅེན་དང་གཅུང༌། །ལག་པ་གཅུས་ཤིང་གཅིན་གཅི་བ། །ཚར་གཅོད་གཅེས་པ་ཡིད་ལ་གཅགས། །སྒྲ་གཅན་གཅན་གཟན་གཅོང་རོང་ལྷུང༌། །གཅིག་པུ་རོ་གཅིག་རྫས་གཅིག་འདོད། །རྡོ་གཅོག་གཅེར་བུ་གཅམ་བུའི་ཚིག །གཅལ་དུ་བཀྲམ་སོགས་གས་འཕུལ་ཅའོ། །བཅོམ་ལྡན་དགྲ་བཅོམ་ཞབས་ཀྱིས་བཅགས། །དམ་བཅས་ཁྲིམས་བཅའ་ལག་པས་བཅངས། །ཤིང་བཅད་ཚིགས་བཅད་བཅའ་གཞིར་བཅིངས། །བསྟན་བཅོས་ལོགས་བཅར་བཟའ་བཅའི་བཅུད། །མིག་བཅར་ཕྱིར་བཅིལ་ནང་དུ་བཅུག །ཆུ་བཅུས་ལས་བཅོལ་རྟ་ལ་བཅིབས། །ཚར་བཅད་ནོར་བཅང་ཞལ་བཅེ་(ལྩེ)བཅད། །བཅས་རང་སྦས་བཅབས་ཆུང་ངུར་བཅུམས། །བཅའ་ལྒ་བཅོས་ལེགས་བས་འཕུལ་ཅའོ། །ལྕུག་ཕྲན་མཉེན་ལྕུག་མགོ་ལྕོག་ལྡེམས། །ལྕང་མའི་ལྕགས་དབྱུག་བློ་ཡིས་ལྕོགས། །ལྕགས་གོང་ལྕི་ཞིང་མེ་ལྕེ་འབར། །ལྕང་ལོ་ཅན་གྱི་ལྕགས་རིའི་ལྕོག །སྦལ་ལྕོང་ལྕུང་ཀ་གཡང་ཁར་ལྕེབ། །སྨྲ་བའི་ལྕེ་སོགས་ལར་བཏགས་ཅའོ། །
     ཆ༽ ཆ་ལང་ཆེམ་ཆེམ་ཆུ་ཡི་ཆར། །ཆགས་བྲལ་ཆེན་པོ་ཆོག་ཤེས་ཆེ། །བྱང་ཆུབ་ཆེད་དུ་རིན་ཆེན་ཆོས། །གོ་ཆ་ཆ་ལུགས་ཆབས་གཅིག་ཏུ། །ཆིབས་པ་ཆིབས་ལ་ཆད་པས་ཆོད། །ས་ཕྱོགས་ཆག་ཆག་འབྲས་ཆན་ཆང༌། །སྲོག་ཆགས་མཐར་ཆགས་ཆབ་འོག་ཆུག །ཆ་རྐྱེན་ཐག་ཆོད་ཆ་ཤས་ཆ། །ཐུགས་ཆུད་ཆུང་མ་ཆོ་རིགས་བཟང༌། །ཆབ་ཤོག་ཁ་ཆེམ་ཆམ་པའི་ནད། །བག་ཆགས་ཆོ་འཕྲུལ་ཆལ་ཆིལ་གཡོ། །ཆོ་ངེ་འདོན་སོགས་ཆ་རྐྱང་ངོ༌། །དཀོན་མཆོག་མཆོད་པ་མཆོག་ཏུ་དགེས། །སྐྱབས་མཆི་གྲོགས་མཆེད་ཡི་གེའི་མཆན། །མཆིས་འབྲང་མཆིལ་མ་མཆི་མ་ཕྱུང༌། །ཁ་མཆུ་བཀའ་མཆིད་མ་མཆིས་སོ། །སྐྱེ་མཆེད་མེ་མཆེད་རྒྱ་མཚོའི་མཆིང༌། །རིན་ཆེན་མཆིང་བུ་གཞུའི་མཆོག་མ། །ཁ་ཡི་མཆུ་སོགས་མས་འཕུལ་ཆའོ། །ཆོས་འཆད་ཁྲིམས་འཆའ་གར་འཆམས་བྱེད། །ཚུལ་འཆོས་སྲོག་འཆད་འདོད་ལ་འཆུམས། ། འཆར་སྒོ་མི་འཆུགས་སྦེད་པའི་འཆབ། །ཁས་འཆེ་འཆིང་ཞགས་འཆང་ཞིང་འཆུས། །ཉི་མ་འཆར་སོགས་འས་འཕུལ་ཆའོ། །
     ཇ༽ ཇི་ལྟ་ཇི་སྙེད་ཇི་བཞིན་མཁྱེན། །ཇི་ལྟར་ཇི་སྲིད་ཇི་སྐད་ཟེར། །ཇོ་བོ་ཇོ་མོ་ཇ་ཇེ་བཟང༌། །ཇག་པ་ལ་སོགས་ཇ་རྐྱང་ངོ༌། །རྟེན་མཇལ་མཇུག་མ་མཇིང་པ་མཁྲང༌། །རྟགས་ཀྱི་མཇེ་སོགས་མས་འཕུལ་ཇའོ། །འཇམ་མཉེན་སྙན་འཇེབས་མཉམ་པར་འཇོག །འཇིག་རྟེན་འཇིམ་རྫབ་མི་རྟག་འཇིག །སྐྲག་འཇིགས་འཇུས་ནས་ཁྲག་སོགས་འཇིབ། །རྗེས་འཇུག་ཁྲིམས་འཇགས་འདོད་པ་འཇོ། །ཟས་འཇུ་འཇོ་སྒེག་གོས་འཇོལ་འཇོལ། །འཇག་མར་འཇབས་ནས་ནོར་སོགས་འཇལ། །སྐྱོན་འཇིལ་འཇའ་ཚོན་སེར་སྣའི་འཇུངས། །འཇའ་བརྡེག་ཚུར་འཇུར་འཇོར་བུས་བརྐོས། །འཇུད་འཐུན་ལ་སོགས་འས་འཕུལ་ཇའོ། །རྗེ་བཙུན་རྡོ་རྗེ་ཐུགས་རྗེས་བཟུང༌། །རྗེ་དཔོན་རྗེས་འཇུག་རྐང་རྗེས་བཞག །རྗོད་བྱེད་ཤ་རྗེན་རྗེ་ངར་རྗུད། །སྙིང་རྗེ་རྗེའུ་སོགས་རར་བཏགས་ཇའོ། །བརྗོད་བྱ་བརྗོད་ཅིང་ཕན་ཚུན་བརྗེ། །བརྗིད་ཆེ་བརྗེད་བྱེད་མི་དྲན་བརྗེད། །བས་འཕུལ་ར་མགོ་ལྡན་པའི་ཇའོ། །ཡུལ་ལྗོངས་སྨན་ལྗོངས་ལྗན་ལྗིན་ཁྲོད། །ལྗོན་ཤིང་ལྗང་བུ་ལྗིད་ལྕི་བ། །ལྗང་ཁུ་ལྗགས་སོགས་ལར་བཏགས་ཇའོ། །
     ཉ༽ ཉམས་རྟོགས་ཉམས་ལེན་ཉག་གཅིག་པུ། །ཉིང་ཁུ་ཉིས་འགྱུར་ཉུང་ངུ་ཉོས། །ཉོན་མོངས་ཉིང་ཤས་ཉན་ཐོས་ཉམས། །ཉིན་པར་ཉམ་ཆུང་ཉམ་ཐག་ཉལ། །ཕོ་ཉ་ཉམས་དགར་འབྱུང་ཉེན་ཆེ། །ཉིང་དགོས་སྤོས་ཉུག་ཟླ་བ་ཉ། །ཉ་ཤ་ཉ་མང་ཉན་ཅིང་ཉོན། །ཉེ་བར་ཉེ་རེག་ཉག་ཕྲན་འཕེན། །ཉལ་ཉིལ་ལ་སོགས་ཉ་རྐྱང་ངོ༌། །དཔུང་གཉེན་བཤེས་གཉེན་ཉེ་དུའི་གཉེན། །གཉའ་ལྟག་གཉའ་ཤིང་དོན་གཉེར་ཆེ། །ཀླུ་གཉན་བཀའ་གཉན་ཁྲོ་གཉེར་བསྡུས། །གཉེར་པ་གཉིད་ལོག་གཉུག་མར་གནས། །མི་མཐུན་གཉེན་པོ་གས་འཕུལ་ཉའོ། །ཐུགས་མཉེས་འཇམ་མཉེན་རྣ་བས་མཉན། །མཉེད་མཉེས་ཆ་མཉམ་མཉམ་པར་བཞག །གྲུ་ཡི་མཉན་པ་མས་འཕུལ་ཉའོ། །རྙེད་བཀུར་རྙོག་མ་གསར་རྙིང་རྙེད། །སོ་རྙིལ་རྙིད་པ་རར་བཏགས་ཉའོ། །དོན་སྙིང་སྙིང་རྗེ་འབྲུའི་སྙེ་མ། །གོ་སྙོད་སྙིང་པོ་ཆང་སོགས་སྙོལ། །ཐ་སྙད་ཇི་སྙེད་དེ་སྙེད་སྙམ། །སྙུན་མེད་སྙོམ་ལས་ནོར་གྱིས་སྙེམས། །སྙོམས་འཇུག་བཏང་སྙོམས་རེག་བྱ་སྙི། །བསོད་སྙོམས་སྙུགས་རིང་སྙེག་སར་སྙོགས། །སྙད་འདོགས་ཚིག་སྙན་སྙིམ་པ་གང༌། །སྙིགས་དུས་ལ་སོགས་སར་བཏགས་ཉའོ། །གཟུགས་བརྙན་སྒྲ་བརྙན་སྐུ་བརྙན་བྱེད། །མངའ་བརྙེས་བརྙས་སྨོད་ཕྱག་བརྙན་སོགས། །བས་འཕུལ་ར་མགོ་ལྡན་པའི་ཉའོ། །དགེ་བསྙེན་བསྙེན་གནས་བསྙེན་པར་རྫོགས། །བསྙེན་སྒྲུབ་བསྙེན་བཀུར་ཕྱེ་མར་བསྙིལ། །གཏམ་བསྙད་ཕྱིར་བསྙིལ་མལ་དུ་བསྙལ། །ལག་བསྙབས་བསྙུང་གཞིས་བསྙུན་པ་བདེ། །ཟས་བསྙོད་རྗེས་བསྙེགས་འཇིགས་པའི་བསྙེངས། །ཁས་མི་ལེན་པའི་བསྙོན་པ་སོགས། །བས་འཕུལ་ས་མགོ་ལྡན་པའི་ཉའོ། །
     ཏ༽ གཙུག་ཏོར་ཐོར་ཏོ་དབྱུག་ཏོ་དང༌། །མུ་ཏིག་མེ་ཏོག་ཟ་མ་ཏོག །ཏོག་ཙེ་རྩི་ཏོག་རིན་ཆེན་ཏོག །ལོ་ཏོག་ཛ་ཏི་ཏིང་ངེ་འཛིན། །ཡོན་ཏན་ནན་ཏན་ཏིང་ལོ་སྤར། །གལ་ཏེ་ཁ་ཏོན་ཞལ་ཏ་བ། །ཤང་ཤང་ཏེའུ་ཏིང་ཤགས་ཏིང༌། །ཏང་ཏང་ཏོང་ཏོང་ཏོག་ཏོག་སྒྲ། །ལིང་ཏོག་ལ་སོགས་ཏ་རྐྱང་ངོ༌། །བསམ་གཏན་གཏན་ཚིགས་གཏན་གྱི་བདེ། །གཏུན་ཤིང་གཏུམ་པོའི་ལག་ཏུ་གཏད། །བརྡུང་གཏག་གཏོར་མ་གཏང་རག་གཏོང༌། །གཏེར་གྱིས་ནང་གཏམས་གཞན་ལ་གཏོད། །ཆུ་གཏོར་འབེམ་གཏོད་དམིགས་པར་གཏོད། །སྦྱིན་གཏོང་ཞབས་གཏུགས་ཟད་པའི་གཏུགས། །གཏི་མུག་མཚང་གཏོལ་སེ་གོལ་གཏོགས། །ཁྲག་གཏར་གཏིང་རིང་མུན་པ་གཏིབས། །སྒོ་གཏན་གཏུར་བུ་རི་ཡི་གཏོས། །སྤོས་གཏུལ་མགོ་གཏུམས་ཁོངས་སུ་གཏོགས། །གཏམ་གླེང་གཏན་འབེབས་གས་འཕུལ་ཏའོ། །མིང་བཏགས་སྒྲོ་བཏགས་ཁ་བཏགས་བཏགས། །སྤྱིར་བཏང་བློས་བཏང་མེ་ཏོག་བཏུ། །སྲོལ་བཏོད་གདན་བཏིང་ས་བོན་བཏབ། །ཞབས་བཏུད་གསོལ་བཏབ་གྱེན་དུ་བཏེག །བཟའ་བཏུང་རྒྱས་བཏབ་བྱེད་རུང་བཏུབ། །སྤུ་བཏོག་ཕྱེར་བཏགས་རྩ་ནས་བཏོན། །དགྲ་བོ་བཏུལ་སོགས་བས་འཕུལ་ཏའོ། །རྟག་དང་མི་རྟག་མཚོན་པའི་རྟགས། །མི་རྟོག་རྟོག་པ་དབང་རྟུལ་རྟ། །ལུང་རྟོགས་དོན་རྟོགས་ཡིད་རྟོན་པ། །རྨོངས་རྟུལ་ཕྱི་རྟིང་རྟོད་པས་བཅིངས། །རྟུལ་ཕོད་རྟ་བབས་བྱ་མ་རྟ། །རྟེན་འབྲེལ་རྟོག་གེ་མི་གཙང་རྟུག །རུ་རྟ་ལ་སོགས་རར་བཏགས་ཏའོ། །ལྟོས་འགྲོའི་ལྟོ་བ་དེ་ལྟ་བུ། །ལྟོ་འཕྱེའི་ལྟག་པར་ལྟད་མོ་ལྟ། །ལྟོགས་པས་ལྟོ་ཟོས་ལྟེམ་གྱིས་གང༌། །ལྟ་ངན་ལྟ་བ་ལོག་པར་ལྟུང༌། །ལྟུང་བ་ད་ལྟ་ཡོད་མེད་ལྟོས། །རེ་ལྟོས་ལྟ་ཅི་མདའ་ཡི་ལྟོང༌། ། ལྟར་ལྟར་པོ་སོགས་ལར་བཏགས་ཏའོ། །སྟོན་པའི་བཞུགས་སྟངས་བཀུར་སྟི་སྟོབས། །སྟབས་ལེགས་མུ་སྟེགས་བྱད་སྟེམས་ཤི། །ལྟ་སྟངས་མེ་སྟག་ཅང་མི་སྟོ། །སྟ་གོན་སྟོང་གྲོགས་ཤ་སྟག་བྱེད། །སྟག་གཡག་སྟོབས་ལྡན་སྟ་ཟུར་སྟོན། །གཞོགས་སྟེགས་རྐང་སྟབས་ནགས་སྟུག་པོ། །དགྲ་སྟ་སྟ་རེ་སྟེའུ་རྣོ། །སྟོན་དུས་སྟར་ཁའི་སྟོན་མོ་སྟེར། །ནོར་སྟོར་སྟན་བཏིང་མངལ་སྒོ་སྟུ། །རོ་སྟོད་སྟོང་ཉིད་སར་བཏགས་ཏའོ། །བརྟག་བྱ་བརྟག་དཔྱད་ཀུན་བརྟགས་བརྟགས། །གནས་བརྟན་ཡིད་བརྟན་བརྟུལ་ཞུགས་བརྟན། །སྦུབས་བརྟོལ་མཇུག་བརྟུལ་བརྩོན་པའི་བརྟུན། །གཞི་ལ་བརྟེན་ནས་ཐག་པས་བརྟོད། །བས་འཕུལ་ར་མགོ་ལྡན་པའི་ཏའོ། །སྐུ་བལྟམས་བལྟ་བྱ་ལེགས་པར་བལྟས། །བལྟོས་ས་བལྟོས་ཆོས་གོས་བལྟབ་སོགས། །བས་འཕུལ་ལ་མགོ་ལྡན་པའི་ཏའོ། །ཐུབ་བསྟན་ཆོས་བསྟན་བླ་མ་བསྟེན། །བསྟི་སྟང་འཕྲོ་བསྟུད་བྱི་དོར་བསྟར། །བསྟན་བཅོས་དང་བསྟུན་དེ་ལ་བསྟིམ། །བསྟི་གནས་བསྟིང་ཚིག་གྲོགས་ཀྱི་བསྟང༌། །བྱིན་ལེན་བསྟབས་ཟིན་བསྟོད་པས་བསྟོད། །བས་འཕུལ་ས་མགོ་ལྡན་པའི་ཏའོ། །
     ཐ༽ ཐུན་མོང་ཐུ་བོ་ཐ་གྲུ་ཆེ། །ཐུ་མི་ཐོར་ཅོག་ཐོར་ཚུགས་དང༌། །ངན་པའི་ཐ་མ་ཐ་མ་ཁ། །ཐ་ཆད་ཐུབ་སོགས་ཐ་རྐྱང་ངོ༌། །མཐོ་རིས་མཐའ་དག་མཐའ་ཡས་མཐོང༌། །ནུས་མཐུ་མཐར་ཕྱིན་མཐུན་མི་མཐུན། །ལག་མཐིལ་མཐེ་བོང་མཐེའུ་ཆུང༌། །མཐོན་ཀ་མཐོན་མཐིང་མཐང་གོས་མཐུག །མཐར་གྱིས་རྟ་མཐུར་མཐོ་ཡོར་མཐོ། །མཐོ་འཚམས་མཐོལ་བཤགས་རྒྱ་མཐོངས་མཐའ། །མཐོན་པོ་མཐིང་རིལ་མས་འཕུལ་ཐའོ། །འཐབ་མོར་འཐོན་ཡང་གྲོགས་སུ་འཐམས། །སྤྲིན་འཐིབ་ཆུ་འཐོར་དུ་བ་འཐུལ། །བློ་འཐུམས་མགོ་འཐོམས་སྲ་ཞིང་འཐས། །ཆུ་འཐུང་ཤ་འཐོག་སྐྲ་ནས་འཐེན། །ཕྱེར་འཐག་འབྲུ་འཐུ་དུམ་བུ་འཐུབ། །འཐུམ་བུ་འཐད་སོགས་འས་འཕུལ་ཐའོ། །
     ད༽ ཡ་རབས་དྲ་མ་བཀའ་དྲིན་དྲན། །གོས་དྲ་དྲུབ་དང་དྲི་བ་དྲིས། །དྲ་བ་དྲ་ཕྱེད་དྲིལ་བུ་དྲི། །དྲེད་པོ་ཁྲིམས་དྲལ་དྲུང་པོར་གྲགས། །གཞན་དྲིང་མི་འཇོག་དྲང་སྲོང་དྲང༌། །སྔ་དྲོ་དྲང་དོན་གཡུང་དྲུང་དྲུག །ཟས་དྲངས་དྲོངས་ཤིག་ས་ལ་དྲུད། །དོམ་དྲེད་དྲོད་ཆེ་ཟན་དྲོན་དྲིལ། །ནད་དྲག་དྲུང་འབྱིན་ནོར་གྱིས་དྲེགས། །དྲག་པོ་ལ་སོགས་ད་རྐྱང་ངོ༌། །གདུགས་དཀར་གདོང་པ་གདུགས་ཀྱིས་གདུངས། །གདུལ་བྱ་གདོལ་པ་གདུག་པ་ཅན། །གདམས་ངག་གསལ་གདབ་གདིང་བ་གདན། །གདུང་རུས་སྐད་གདངས་སྐས་ཀྱི་གདང། །གདུང་བརྒྱུད་གསོལ་གདབ་ས་བོན་གདབ། །བཅོལ་གདམས་མིང་གདགས་གདོན་དང་བྲལ། །ཁ་གདངས་མཚོན་གདེངས་གདོན་མི་ཟ། །ད་གདོད་སོས་གདལ་གདེང་ཐོབ་གདའ། །ཐུད་གདར་གདེངས་ཅན་དམ་ལ་གདགས། །དང་པོའི་གདོད་མ་གདགས་པའི་གཞི། །སྲང་ལ་གདེག་སོགས་གས་འཕུལ་དའོ། །བདེ་གཤེགས་བདེ་ལེགས་བདེན་པ་བདར། །བདག་གཞན་བདུད་བཅོམ་བདུག་སྤོས་བདུག །མདུན་བདར་ལྔ་བདོ་རོ་བདའ་བ། །གཞུ་བདུངས་བདུད་རྩི་ཕྱེ་མར་བདར། །བདོག་པའི་དངོས་པོ་རི་དྭགས་བདའ། །ཕྱག་བདར་ལ་སོགས་བས་འཕུལ་དའོ། །ལམ་མདོར་མདོས་འཕེན་མདའ་མདུང་མདེའུ། །སྒྲོ་མདོངས་མདོག་མདངས་མདོར་བསྡུས་མདོ། །མདུན་དུ་མདངས་སང་མདུད་པ་མདུད། །ར་མདའ་ལ་སོགས་མས་འཕུལ་དའོ། །མྱ་ངན་འདའ་འདས་འདུན་པས་འདུད། །འདམ་ཁྲོད་འདུར་འདུར་འདོང་ཞིང་འདུག །ནང་འདོམ་འདོམ་གང་སྨད་ཀྱི་འདོམས། །རྗེས་འདེད་གསོལ་འདེབས་འདོན་པ་འདོན། །ལྷ་འདྲེ་ཤིང་འདྲུ་ཁུང་བུ་འདྲུ། །འདུ་བྱེད་འདུས་བྱས་འདྲེས་མ་འདྲ། །ཆོས་འདོམས་གཏམ་འདྲི་ཡི་གེ་འདྲི། །འདོད་ཆགས་འདྲིས་པས་སྲོག་འདོར་འདར། །འདུལ་བ་འདྲེན་པས་དགེ་འདུན་འདུལ། །རི་འདབས་པད་འདབ་འདབ་ཆགས་འདུ། །ཁྲིམས་འདྲལ་འདོ་མེད་འདུ་ཤེས་ཆུང༌། །མིང་འདོགས་འདོད་སོགས་འས་འཕུལ་དའོ། །