དག་ཡིག་ཚིག་གསལ་སྒྲོན་མེ་ཞེས་བྱ་བ་བཞུགས་སོ། །

     གྲོང་རྡལ་ཐོག་རྡིབ་ས་རྡོའི་རྡུལ། །རྡེའུ་རྡོག་པོ་ཐབས་རྡུགས་རྡེགས། །རྡོ་རྗེ་ཕེབ་རྡོབ་ཆ་ལང་རྡོབ། །ལག་རྡུམ་གློ་རྡོལ་དབུ་བ་རྡོས། །གྲི་རྡོར་ལ་སོགས་རར་བཏགས་དའོ། །འཕུར་ལྡིང་འབྲུག་ལྡིར་སྐད་ལྡབ་ལྡིབ། །ལྡ་ལྡི་ལྡེ་མིག་ལྟོ་ལྡིར་ལྡན། །སེང་ལྡེང་ལྡེམ་ལྡེམ་ལྡེར་བཟོའི་ལྡེབས། །ལྡོང་རོས་ངད་ལྡང་ལྡེ་གུ་བྱུག །ཕྱིར་ལྡོག་མི་ལྡོག་བཏུང་བ་ལྡུད། །མེ་ལྡེ་ལྡུམ་རར་ལྡུམ་བུ་སྐྱེས། །བཅོམ་ལྡན་ལྡེམ་དགོངས་དྲིན་ལན་ལྡོན། །བསྐྱར་ལྡབ་ལྡོབ་སྐྱེན་ལར་བཏགས་དའོ། །སྡེ་པ་སྡེ་ཚན་སྡོང་པོ་སྡོམ། །ཞེ་སྡང་སྡང་མིག་སྡིགས་མཛུབ་ཅན། །སྡིག་སྡུག་ཕྱོགས་སྡེབ་སྡོམ་པས་སྡོམས། །མཛེས་སྡུག་མཆོད་སྡོང་དོ་སྡོ་བ། །སྡེར་མ་བཀའ་སྡོད་སྡེར་མོ་རྣོ། །སྡེ་སྣོད་ལ་སོགས་སར་བཏགས་དའོ། །གྲི་བརྡར་བརྡེག་བྱ་བརྡུང་བྱ་བརྡུང༌། །ཁ་བརྡར་བརྡ་བྱས་བླ་བརྡོལ་སྨྲ། །བས་འཕུལ་ར་མགོ་ལྡན་པའི་དའོ། །བལྡབས་ནས་བལྡག་ཅིང་མུར་བའི་བལྡད། །བས་འཕུལ་ལ་མགོ་ལྡན་པའི་དའོ། །བསྡུ་བྱ་བསྡུ་བསྡུས་ཕན་ཚུན་བསྡུར། །སྲོག་བསྡོས་ཉེར་བསྡོགས་ཕྱོགས་གཅིག་བསྡོམས། །ཉེས་པ་བསྡམས་བྱས་གཞན་ལ་བསྡིགས། །སྣ་ཐག་བསྡོགས་སོགས་སྟན་ལ་བསྡད། །བས་འཕུལ་ས་མགོ་ལྡན་པའི་དའོ། །
     ན༽ འདུག་གནས་གནོད་བྱེད་ཟིལ་གྱིས་གནོན། །གནད་དོན་གནོད་སྦྱིན་སྔོན་གྱི་གནའ། །གནས་བརྟན་གཉེར་གནས་གནས་སྐབས་བདེ། །གནས་ལུགས་ཞེ་གནོང་གནས་ངན་ལེན། །གནམ་དང་གནག་སོགས་གས་འཕུལ་ནའོ། །ལུང་མནོས་མནལ་གཟིམས་བསམ་མནོ་གཏོང༌། །མནའ་མ་དྲི་མནམ་མནར་མེད་མནར། ། མནའ་བསྐྱལ་མནར་སེམས་མས་འཕུལ་ནའོ། །རྣམ་མཁྱེན་རྣམ་ཤེས་རྣལ་འབྱོར་རྣོ། །རྣམ་རྟོག་རྣམ་གྲངས་རྣམ་པ་མང༌། །རྣ་བ་རྣག་ཁྲག་རྣམ་དབྱེ་རྣམས། །རྣལ་མ་ལ་སོགས་རར་བཏགས་ནའོ། །སྣ་ལྕེ་བར་སྣང་སྣོན་དང་སྣུབས། །སྣར་མ་སྣག་ཚ་སྣ་ཚོགས་སྣུར། །སྣམ་སྦྱར་སྣམ་བུ་སྣ་ཡི་སྣབས། །སྣང་གསལ་སྣུམ་དྲི་སྣོམ་ཞིང་སྣང༌། །སེར་སྣ་སྣྲེལ་ཞི་མང་དུ་སྣོན། །ལྟར་སྣང་ལ་སོགས་སར་བཏགས་ནའོ། །བརྣབ་སེམས་ངེས་བཟུང་ནན་ཏན་བརྣན། །བསམ་པའི་བརྣག་དང་བཟོད་དཀའི་བརྣག །ཟས་ཀྱིས་བརྣངས་དང་འཐེན་པའི་བརྣར། །བས་འཕུལ་ར་མགོ་ལྡན་པའི་ནའོ། །ནུ་མ་མདའ་བསྣུན་མང་དུ་བསྣན། །སྲོལ་བསྣུབས་མཚོན་བསྣམས་གོང་འོག་བསྣོར། །དུས་བསྣུར་མཇུག་བསྣར་ཞིབ་མོར་བསྣུར། །བས་འཕུལ་ས་མགོ་ལྡན་པའི་ནའོ། །
     པ༽ རང་གི་པང་པར་པི་ཝང་འཛིན། །གཅིག་པུར་པིར་གྱིས་པ་ཏྲ་བྲིས། །མཁར་གྱི་པུ་ཤུ་བྱ་པུ་ཤུད། །པུས་བཙུགས་པོག་པོར་ག་པུར་འཐུལ། །པར་བཏབ་པོ་ཏི་པོ་ཏ་ལ། །པྲོག་ཞུ་འོག་པག་པི་པི་ལིང༌། །པ་སངས་སེམས་པ་བསམ་པ་བཟང༌། །པར་གྱིས་འཕར་སོགས་པ་རྐྱང་ངོ༌། །དཔའ་བོ་དཔག་ཚད་རྗེས་སུ་དཔག །བྱང་ཆུབ་སེམས་དཔའ་དཔག་བྱ་དཔོག །དཔྱ་ཁྲལ་དར་དཔྱངས་དཔང་པོ་དཔེ། །དཔུང་པ་དཔངས་མཐོ་དམག་དཔུང་དཔོན། །དཔག་མེད་དཔལ་ལྡན་རྣམ་དཔྱོད་དཔྱད། །སློབ་དཔོན་དཔྱིད་ཀ་དཔྱས་མི་འདོགས། །དཔྲལ་བ་དཔྱི་མགོ་དས་འཕུལ་པའོ། །མཛེས་པའི་སྤ་བ་སྤང་སྤོས་སྤུ། །སྤུན་ཟླ་སྤང་བྱ་སྤངས་པས་སྤྲོ། །སྤྲིན་སྤྲོས་ལོངས་སྤྱོད་སྤྱད་པ་སྤྱོད། །སྤེན་མ་སྤྱི་བོ་རྒྱན་གྱིས་སྤུད། །གོས་སྤུག་ནོར་སྤེལ་སྤྲ་ཚིལ་སྤྲིངས། །གནས་སྤར་མེ་སྤོར་གཡུལ་སྤྲད་སྤྲོད། །འཕར་སྤྱང་སྤྲེའུ་སྤྲུལ་པའི་སྤྱན། །གོས་སྤོ་ཚིག་གིས་སྤྱོས་ནས་སྤྱུགས། །ཚུར་སྤྱོན་སྤྱང་པོ་སྤོབས་པ་ཆེ། །ཁེ་སྤོག་རྒྱན་སྤྲས་འབྱར་བྱེད་སྤྱིན། །དགའ་སྤྲོ་གདུང་སྤུར་རི་ཡི་སྤོ། །ཐབས་ཀྱི་སྤུན་སོགས་སར་བཏགས་པའོ། །སྟག་ལྤགས་ལ་སོགས་ལར་བཏགས་པའོ། །
     ཕ༽ ཕ་མ་མི་ཕམ་ཕྱིན་ཆད་ཕྲད། །ཕྲུ་གུ་ཕན་ཚུན་རྡུལ་ཕྲན་ཕྲ། །བཅུ་ཕྲག་ཕྱོགས་སུ་ཕྱུག་པོ་ཕྱིན། །ཕྱགས་མས་ཕྱི་སའི་ཕྱེ་མ་ཕྱགས། །ནས་ཕྱེ་ཕྱིང་པ་ཕྱག་དར་ཕྱོར། །ཕྱི་དྲོ་ནམ་ཕྱེད་ཕྱེན་གཏོང་ཕྱུང༌། །ཕོངས་ནས་ཕྲག་དོག་ཕྲ་མ་བྱས། །ཕྱུགས་ཀྱི་ཕྲུ་མ་ཕྱེ་མ་ལེབ། །སྒོ་ཕྱེ་ཕྲན་ཚེགས་ཕྲེང་བ་ཕྲོགས། །ཕྱག་གི་ཕྲག་པ་སྨིན་ཕྲག་བར། །ཚིག་ཕྲད་ལ་སོགས་ཕ་རྐྱང་ངོ༌། །གཞན་ལ་འཕྱ་འཕྱས་འོད་འཕྲོ་འཕྲོས། །འཕྱི་བར་མདའ་འཕེན་འཕངས་ཚེ་འཕོག །གོ་འཕང་དུང་འཕྱུར་འཕྲལ་དུ་འཕངས། །དར་འཕྱར་འཕྱང་དང་ཕྱག་དར་འཕྱག །ལྟོ་འཕྱེ་འཕྱེ་བོ་འཕོང་སྐྱེན་གྲག །འཕོངས་ཀྱིས་འཕག་འཕག་མགོ་འཕུར་འཕུར། །སེམས་ལ་འཕྲེང་སོགས་འས་འཕུལ་ཕའོ། །
     བ༽ བླ་མ་བླ་གོས་བླ་བྲེ་བྲེས། །བྱམས་པ་བྱང་ཆུབ་བླ་ན་མེད། །བྱེ་མས་བྱད་བྱུར་བྱབས་པས་བྲེལ། ། བྲན་གཡོག་བྱེས་བྱོན་བྱུག་པ་བྱིན། །བྱིས་པས་བྱ་རའི་བྱ་བ་བྱོས། །བྱ་བྱིའུ་བྱི་བ་བྱི་ལའི་བྲུན། །བྱོལ་སོང་བྲང་འགྲོའི་བྲང་བྱིལ་བྱིལ། །བླ་གབ་བླུན་པོས་བླུས་ཀྱང་བླ། །བྱད་བཞིན་འདམ་བྱིང་བློ་བློང་བློང༌། །བྲོ་ནད་དང་བྲལ་བྲོས་ཤིང་བྱེར། །བྱི་བོ་བྲོ་བརྡུང་ཡི་གེ་བྲིས། །སོས་བླད་ཆུ་བླུད་ཟས་སོགས་བྲིམས། །ཡོ་བྱད་བྲེ་གང་བྱུར་བུར་བླུགས། །བླ་ཚེ་བྱང་བུ་བླ་ཐབས་སུ། །བླ་གདགས་སྐྲ་བྱི་ཆ་བྱད་བླངས། །བྱེ་བྲག་རྒྱལ་བློན་རྣ་བ་བླགས། །རོ་བྲོ་བྲ་བ་བྱི་རུ་བྱས། །བྱང་ཕྱོགས་བྱུང་སོགས་བ་རྐྱང་ངོ༌། །
     དབུ་སྐྲ་དབུ་མ་དབུ་བ་དབུས། །རྣམ་དབྱེ་དབྱེན་བྱས་ཁ་ཡི་དབུགས། །ཆོས་དབྱིངས་དབྱིབས་ལེགས་དབྱེར་མི་ཕྱེད། །དབྱུ་གུ་དབྱིག་པ་དབྱུག་པ་དབྱུགས། །དབང་ཕྱུག་དབང་བསྐུར་དབང་ལྡན་ཕྱོགས། །དབུལ་པོ་ཕྱིར་དབྱུང་དབེན་པའི་གནས། །དབོན་པོས་དབྱངས་བྱས་གཏན་ལ་དབབ། །དབང་ཐང་བྱིན་དབབ་དབྱར་གྱི་དུས། །དབྱིག་གི་གཉེན་སོགས་དས་འཕུལ་བའོ། །འབྲས་འབྲུ་རབ་འབྱམས་འབའ་ཞིག་འབྱོར། །འབྱུང་བ་འབྲེལ་ཆགས་འབྲས་བུ་འབྱུང༌། །འབྲིང་པོ་འབྲོག་པ་འབྲི་འབྲོང་གཡག །འབེལ་གཏམ་སྒོ་འབྱེད་འབྲོམ་སྟོན་འབྱོན། །ཕྱིར་འབྲང་འབྱུང་པོ་འབྲོས་ཤིང་འབྱེར། །འབྲུབ་ཁུང་ཁ་འབྱེད་འབྲུམ་ནད་འབྱིན། །མཚང་འབྲུ་ཆང་འབྱོ་སྦྱར་ནས་འབྱར། །སྐྲ་འབལ་ལ་སོགས་འས་འཕུལ་བའོ། །ཁྱི་རྦད་རྦབ་སྒྲིལ་ཁ་རྦད་ཆེ། །ཐགས་རྦད་བཅད་སོགས་རར་བཏགས་བའོ། །ལྦུ་བ་ལྦ་བ་ལར་བཏགས་བའོ། །སྦྱིན་བདག་ནོར་སྦྱིན་གནོད་སྦྱིན་དབང༌། །སྦུན་པ་སྦང་མ་རྟ་སོགས་སྦངས། །སྦུབ་ཏུ་སྦོས་སྦས་སྦ་ཞིང་སྦེད། །ཉིས་སྦྲགས་སྦྲ་འབུབས་སྦྲེལ་ནས་སྦྱར། །སྦུར་མར་མེ་སྦར་སྦལ་པ་སྦོས། །སྦྲུམ་མ་ལྟོ་སྦོ་གྲོག་སྦུར་སྦྲུལ། །སྐད་སྦྲོན་ལུས་སྦྲིད་ས་ལེ་སྦྲམ། །དགེ་སྦྱོར་སྡིག་སྦྱངས་གཙང་སྦྲ་སྦྱོར། །ཆུར་སྦངས་སྦུད་ལྕགས་འདོམ་གྱི་སྦ། །སྦ་འཁར་ལ་སོགས་སར་བཏགས་བའོ། །
     མ༽ ཉམས་མྱོང་རོ་མྱང་མྱ་ངན་འདའ། །མྱུ་གུ་རོ་མྱགས་ཆང་གིས་མྱོས། །མྱུར་དུ་ནགས་མྱུལ་མ་རྐྱང་ངོ༌། །
     དམིགས་བསལ་ཉེས་དམིགས་དམྱལ་བར་ལྟུང༌། །དམུ་ཆུ་ཉམས་དམས་དམངས་རིགས་དམན། །དམུས་ལོང་དམིགས་བུ་དམིགས་པ་མེད། །བུ་གའི་དམིག་པུ་དམུ་རྒོད་དམག །དམེ་བོ་མདོག་དམར་དམོད་པ་བྱས། །འཛུམ་དམུལ་དམའ་བ་དས་འཕུལ་མའོ། །ངོ་མཚར་རྨད་བྱུང་རྨི་ལམ་རྨིས། །ཞིང་རྨོ་རྨོངས་རྨུགས་ཁྱིས་རྨུར་རྨུགས། །རྨ་བྱུང་རྟ་རྨིག་སྒ་ཡི་རྨེད། །རྨ་བྱ་རྨོག་གྱོན་དབུ་རྨོག་བཙན། །བལ་རྨེལ་རྨུགས་འཛིན་རར་བཏགས་མའོ། །སྨན་པས་སྨན་གྱི་གཏམ་སྨྲ་སྨྲོས། །སྨེ་བ་སྨོན་ལམ་ལུས་ཀྱི་སྨད། །སྨིག་རྒྱུ་འབྲས་སྨིན་སྨག་རུམ་འཐིབས། །མིང་སྨོས་སྨན་ལྗོངས་སྨད་རས་སྨོད། །སྨ་བབ་སྨྲེ་སྔགས་སྨོས་ཅི་དགོས། །ངུར་སྨྲིག་རྣམ་སྨིན་སྨོན་འགྲིན་ཆེ། །སྨུག་པོ་སྨིན་དྲུག་སྨེ་ཤ་ཅན། །སྨྱོ་གཏམ་སྨྱུང་གནས་བཟའ་བུ་སྨད། །སྨ་ར་སྨིན་མ་སར་བཏགས་མའོ། །
     ཙ༽ ཙན་དན་དེ་ཙམ་དེ་ཙུག་ལགས། །ཙབ་ཙུབ་མི་བྱ་ཙོག་ཙོག་པུ། །ཙ་ན་ཀ་དང་ཙ་ཀོ་ར། །ཙུག་ཙུག་སྒྲ་དང་ཙམ་པ་ཀ །ནེ་ཙོ་ལ་སོགས་ཙ་རྐྱང་ངོ༌། །གཙོ་བོ་གཙུག་ཏོར་གཙུག་ལག་ཁང༌། །སྤྱི་གཙུག་གཙུབ་ཤིང་གནོད་པས་གཙེས། །གཙང་མ་གཙང་པོ་མཆེ་བ་གཙིགས། །གཙག་བུས་གཙག་སོགས་གས་འཕུལ་ཙའོ། །བཙན་པོ་བཀའ་བཙན་རྫོང་བཙན་དང༌། །བཙུན་མོ་བུ་བཙས་ངན་བཙོག་བཙལ། །བཙུན་པ་མིག་བཙུམ་བཙོན་རར་བཙུད། །གོས་བཙེམས་བཙག་དང་བཙོད་ཀྱིས་བཙོས། །འདྲེ་བཙན་བཙན་དུག་ཚགས་ཀྱིས་བཙགས། །མཐོ་བཙམས་རྡེག་བཙོག་སྒོག་བཙོང་བཙུགས། །བཙན་ཐབས་ནོར་བཙོངས་ལྕགས་ཀྱི་བཙའ། །སྲོལ་བཙུགས་ཆུ་བཙིར་གྲུ་བཙས་བྱིན། །བཙོ་མའི་གསེར་སོགས་བས་འཕུལ་ཙའོ། །རྩ་བ་རྩེ་མོ་ཚོན་རྩི་རྩིང༌། །རྩྭ་སྔོན་རྩི་ཤིང་རྩི་ཐོག་རྩུབ། །རྩེད་མོ་རྩོད་པ་རྩིས་རྩིས་མཁན། །རྩ་རྒྱུས་སྟོབས་རྩལ་འབད་རྩོལ་ཆེ། །རྩམ་པ་རྩད་གཅོད་རྩོམ་པ་རྩོམས། །ནོར་གྱི་རྩིད་པ་འཁོར་ལོའི་རྩིབས། །རྩིབ་མ་རྩིག་པ་རར་བཏགས་ཙའོ། །བཀའ་སྩོལ་དངོས་གྲུབ་སྩལ་དང་སྩོལ། །སྦྱིན་པ་བགྱིད་སྩལ་སར་བཏགས་ཙའོ། །བརྩོན་འགྲུས་སྙིང་བརྩེ་བརྩེ་བ་ཅན། །བརྩད་ཅིང་བསྟན་བཅོས་བརྩམ་བྱ་བརྩམས། །སོ་བརྩེ་རིམ་བརྩེགས་བརྩིགས་ཤིང་བརྩིས། །བས་འཕུལ་ར་མགོ་ལྡན་པའི་ཙའོ། །
     ཚ༽ ནགས་ཚལ་སྐྱེད་ཚལ་ཚི་གུའི་ཚིགས། །ཚོགས་པ་སྡེ་ཚན་ལུས་ལང་ཚོ། །ཚོན་རྩི་ཕྲ་ཚོམ་ཚར་དུ་དངར། །ཐེ་ཚོམ་ཚམ་རྔམ་ཚྭ་ཚ་ལ། །ཁང་པའི་ཚོམས་སོགས་ཚ་རྐྱང་ངོ༌། །ངོ་མཚར་མཚར་སྡུག་མཚོན་བྱེད་མཚན། །ཕྱོགས་མཚམས་རྒྱ་མཚོ་མཚེ་མ་སྐྱེས། །མཚོན་བྱ་མཚན་གཞི་མཚན་ཉིད་མཚུངས། །སྐྱོན་མཚང་མཚན་མོ་ཚོན་གྱི་མཚལ། །རྒྱལ་མཚན་ཁྱིམ་མཚེས་མིང་གི་མཚན། །ཕྱག་མཚན་མཚོན་ཆ་མས་འཕུལ་ཚའོ། །ཕྱག་འཚལ་ནོར་འཚོལ་ཕྱུགས་མ་འཚོ། །བློ་འཚབས་ཆུ་འཚག་ནང་དུ་འཚངས། །འཚང་རྒྱ་འོད་འཚེར་བློ་དང་འཚམས། །འཚག་བཟང་གདུང་འཚོབ་སྐྱིན་པའི་འཚབ། །རླུང་འཚུབས་ལོངས་འཚར་བར་དུ་འཚིར། །ཤ་འཚོ་འཚག་བྱེད་དགའ་བའི་འཚེངས། །བརྡེག་འཚོག་འཚོག་ཆས་ངལ་འཚོ་བ། །འཚེ་བ་མེད་སོགས་འས་འཕུལ་ཚའོ། །
     ཛ༽ ཛ་ལང་ལ་སོགས་ཛ་རྐྱང་ངོ༌། །མཛའ་བོ་བང་མཛོད་ལེགས་པའི་མཛེས། །དཔའ་མཛངས་མཛངས་མ་མཛད་པ་མཛོད། །མཛུབ་མོ་མཛོད་སྤུ་ཤིང་གི་མཛེར། །མཛེ་ནད་མཛོ་རྟ་མས་འཕུལ་ཛའོ། །འཛམ་གླིང་བཞིན་འཛུམ་གོས་འཛད་འཛེམ། །ཆུ་འཛག་འཛིར་ལངས་སྣོད་དུ་འཛུད། །འོག་འཛུལ་སྐས་འཛེག་འཛུགས་ཤིང་འཛིན། །སྐད་འཛེར་འདུ་འཛི་ཆུད་མི་འཛའ། །ནོར་བའི་འཛོལ་སོགས་འས་འཕུལ་ཛའོ། །ཀུན་རྫོབ་རྫུན་གྱི་རྫབ་རྫུབ་མང༌། །ཕྱུགས་རྫིའི་རྫོངས་སུ་རྫིའུ་བྱིན། །རྫིང་བུར་རྫུས་སྐྱེས་འདམ་རྫབ་རྫོགས། །རྫི་ཕྱོགས་རྫ་མ་མཁར་གྱི་རྫོང༌། །ནོར་རྫས་རྫུ་འཕྲུལ་རྫོགས་སངས་རྒྱས། །རྫི་མེད་རྫི་མ་རར་བཏགས་ཛའོ། །གནོད་པས་མི་བརྫི་ཁྲོ་བོར་བརྫུས། །གྱེན་བརྫེས་ཟན་བརྫིས་རྐང་པས་བརྫིས། །མདོས་བརྫངས་བས་འཕུལ་རར་བཏགས་ཛའོ། །
     ཝ༽ ཝ་སྐྱེས་ཕ་ཝང་ཆུ་ཡི་ཝ། །འགིའུ་ཝང་པི་ཝང་སྐད་ཝང་ཝང༌། །ཡིད་ལ་ཝལ་ལེ་ཝ་རྐྱང་སྟེ། །ཀྭ་ཡེ་ཁྭ་ཏ་གྲྭ་པ་སོགས། །ཝ་བཏགས་ཅན་དུ་ཤེས་པར་བྱ། །
     ཞ༽ ཞྭ་མོ་ཞ་ལོང་ཞེན་ཅིང་ཆགས། །འོ་ཞོ་ཞེ་དམ་ཞ་རྐྱང་ངོ༌། །གཞི་གྲུབ་གཞི་མ་གཞུང་ལུགས་གཞན། །མཉམ་གཞག་གཞལ་བྱའི་རྣམ་གཞག་བྱེད། །གཞོན་ནུ་གཞུང་བཟང་ནམ་གཞག་དུས། །མདའ་གཞུས་བདུད་གཞོམ་ཡིད་ལ་གཞོག །གཞོང་པ་གཡང་གཞི་སྦོ་གཞོག་གཞང༌། །གཞའ་ཚོན་གཞའ་གསང་བརྟག་གཞིག་གཞུག །མངག་གཞུག་ཡིད་གཞུངས་ཁུ་བ་གཞིབས། །གཞར་ཡང་གཞོབ་འཐུལ་གླུ་གཞས་བྱེད། །ཡིད་གཞོལ་ནང་གཞུག་གས་འཕུལ་ཞའོ། །བཞི་ལྔ་དགོངས་བཞེད་བཞད་གད་བྱེད། །བཞབས་ནས་སྐྲ་བཞར་གནས་སུ་བཞག །དེ་བཞིན་བཞེངས་བཞུགས་བཞོན་པས་བཞུད། །བཞོན་མར་འོ་བཞོ་མར་བཞུ་བཞེས། །བརླན་བཞའ་ཁུར་བཞེས་བས་འཕུལ་ཞའོ། །
     ཟ༽ ཟ་མ་ཟ་ཟོས་ཟྭ་ཚོད་ཟད། །སྔགས་ཟློས་ཟློས་གར་ཉི་ཟླ་ཟླུམ། །ཟླ་གམ་ཟླ་ཕྱེད་གཞན་ལ་ཟློ། །ཟློག་པ་ཟླ་གྲོགས་ལོ་ཟླ་བ། །བསྐྱར་ཟློས་ལ་སོགས་ཟ་ཉིད་དོ། །མཁྱེན་གཟིགས་གཅན་གཟན་གཟིག་གི་གཟུགས། །གཟའ་སྐར་གཟི་བརྗིད་རིན་ཆེན་གཟི། །གཟན་ཤམ་ཕྲག་པར་གཟེད་ཅིང་གཟར། །གཟོང་གིས་གཟེར་ཐོབ་གཟེར་བུ་གཟུག །གནད་གཟིར་མདའ་གཟས་ཆུད་མི་གཟོན། །ད་གཟོད་དྲིན་གཟོ་ཟས་ཀྱི་གཟན། །གྲུ་གཟིངས་གཟར་བུ་དགང་བླུགས་གཟར། །རི་གཟར་གཟུངས་ཐག་གཟུངས་སྔགས་གཟབས། །གཟེངས་བསྟོད་གཟི་མདངས་གས་འཕུལ་ཟའོ། །བཟའ་བཏུང་བཟའ་བཅའ་ཆང་གིས་བཟི། །བཟའ་མིའི་ན་བཟའ་བཟང་པོར་བཟུང༌། །བཟོ་བོས་ལྷུང་བཟེད་བཟེད་ཞལ་བཟེད། །མི་བཟད་ལས་ལ་བཟུར་བཟོད་པ། །སྔགས་བཟླ་མི་བཟློག་མྱ་ངན་བཟླ། །གཅིག་ཏུ་བཟླུམས་སོགས་བས་འཕུལ་ཟའོ། །
     ཡ༽ ཡི་དམ་ཡི་གེ་ཆ་མིན་ཡ། །ཡ་ལད་ཡ་ཡོ་ཡལ་ག་ཡང༌། །ཡི་རང་ཡི་དྭགས་ཡ་རྐྱང་ངོ༌། །གཡས་གཡོན་གཡབ་མོ་གཡབ་ཅིང་གཡུག །གཡང་ས་གཡུང་དྲུང་མི་གཡོ་བ། །གཡང་ལེན་གཡང་གཞི་གཡོག་མ་གཡོགས། །ལོག་གཡེམ་གཡུལ་སྤྲོད་གཡེང་བས་གཡེངས། །ཟངས་གཡའ་གཡི་ལྤགས་གཡར་ཁྲལ་གཡུ། །འབྲོང་གཡག་གཡེར་མ་གཡར་ནས་ཟོས། །མིག་གཡོར་གཡེར་ཁ་གས་འཕུལ་ཡའོ། །
     ར༽ ར་ལུག་རྭ་ཅོ་རྡུལ་དུ་རློག །མངོན་རློམ་རློམ་སེམས་བྱིན་རླབས་ཆེ། །བྱིན་གྱིས་རློབས་ཤིག་རྦ་རླབས་རླུང༌། །རླངས་པ་རློན་པ་འདོམས་ཀྱི་རླིག །རླབས་ཆེན་རླག་བྱེད་འཕུལ་ཡིག་མེད། །རྩུབ་པའི་བརླང་དང་བརླག་བྱ་བརླག །བརླ་ཤ་ཆུས་བརླན་ཡ་མ་བརླ། །སྲ་བརླིང་བྱིན་གྱིས་བརླབས་པར་བྱས། །གདོན་གྱིས་བརླམས་སོགས་བས་འཕུལ་རླའོ། །
     ལ༽ ལྭ་དང་ལ་ལ་ལང་ལིང་ལོང༌། །ལམ་དང་ལམ་ལམ་ལག་ལེན་ལོ། །ཕལ་ཆེར་བཤད་ཟིན་ཁོངས་སུ་གཏོགས། །
     ཤ༽ཤར་གྱི་ཤིང་ཁར་ཤང་ཤང་ཤི །ཤུལ་དུ་ཤིད་ཟན་ཤེལ་གྱི་ཤུབས། །ཤུགས་ཕྱུང་ཤུན་ལྤགས་ཤམ་ཐབས་བཅིངས། །ཤེས་ལྡན་ཤེས་པ་ཤིན་ཏུ་ཟབ། །ཤྭ་བ་ཤུབ་བུ་ཤ་རྐྱང་ངོ༌། །བདེ་གཤེགས་གཤིས་ལུགས་དེ་བཞིན་གཤེགས། །གཤིན་པོའི་གཤགས་འགྱེད་གཤིན་རྗེའི་གཤེད། །གཤེན་རབས་བཤང་དཀྲོལ་དབུ་སྐྲ་གཤོར། །གཤིས་ངན་གཡུལ་གཤོམ་མོ་གཤམ་བུ། །གཤེ་སྨོད་བརླན་གཤེར་བྲེ་ལ་གཤོར། །ཆུ་གཤོ་ཤིང་གཤགས་ཐོང་གཤོལ་རྨོ། །གཤོག་པ་གཤིབས་ནས་གཤམ་དུ་འཕུར། །སྤང་གཤོངས་མཉེན་གཤིན་གས་འཕུལ་ཤའོ། །དགེ་བཤེས་ཆོས་བཤད་སྡིག་པ་བཤགས། །མཛའ་བཤེས་ལྷ་བཤོས་མཆོད་པ་བཤམས། །བགོ་བཤའ་ཕྱི་བཤོལ་བྲེ་ལ་བཤར། །གོས་བཤུས་བཤལ་དྲུད་བཤན་པས་བཤས། །མཁར་བཤིག་ཆུས་བཤལ་འཕྲང་ལ་བཤར། །བཤང་གཅི་ལ་སོགས་བས་འཕུལ་ཤའོ། །
     ས༽ སངས་རྒྱས་ས་ཡ་ས་ཕྱོགས་སེར། །སོར་མོ་སེན་མོ་སོ་སིལ་སྙན། །སོ་སོར་སིལ་སིལ་སེ་མོ་དོ། །ཚེ་སྲོག་འོད་སྲུང་དྲང་སྲོང་སྲས། །སྲོལ་ཚུགས་སྲོད་ལ་སྲིད་པ་སྲིད། །གོས་སྲབ་སྲ་བརྟན་ས་སྲུང་བུ། །སྲིན་པོ་སྲིང་མོ་སྲེག་པ་སྲམ། །སྲིན་བུ་སྲོ་མ་སྲད་བུ་སྲ། །རྟ་སྲབ་ལམ་སྲང་འདེགས་བྱེད་སྲང༌། །སྲེག་བྱེད་སྲན་མ་སློང་མོ་སློང༌། །སློབ་དཔོན་སློབ་མ་སློབ་གཉེར་སླ། །རྒྱལ་སྲིད་སླར་ཡང་སླད་མའི་དུས། །གར་སླ་གྱེན་སློང་ཅི་ཡི་སླད། །འདིར་སླེབ་སློག་པ་ཕྱི་ནང་སློག །སླ་ང་སླད་རོལ་ས་ཉིད་དོ། །གསང་སྔགས་གསང་བ་གསུང་རབ་གསུངས། །གསོལ་འདེབས་གསར་པ་གསན་ཞིང་གསོན། །གསེར་བཟང་འཁར་གསིལ་གསེག་གཤང་འཛིན། །ཁ་གསག་གསོག་གསོབ་གསད་བྱ་གསོད། །གསོན་པོའི་ཚིག་གསོལ་རྟ་ཡི་གསེབ། །སྐད་གསང་གསོག་འཇོག་ཆུད་མ་གསན། །ཁ་གསོ་གསོས་ནས་གསོར་གྱིས་གསིལ། །འོད་གསལ་ནང་གསེས་རལ་པ་གསིགས། །གསུར་དང་གསུམ་སོགས་གས་འཕུལ་སའོ། །ཚོགས་བསགས་སྐྱོན་བསལ་བསམ་བྱ་བསམས། །དམིགས་བསལ་དྲིན་བསབས་དྲི་མ་བསངས། །ཚེ་བསྲིང་བསོད་ནམས་བསོད་སྙོམས་བསགས། །ཡོ་བསྲང་རྒྱང་བསྲིང་བཟོད་བསྲན་ཆེ། །དྲི་བསུང་གིས་བསུས་བསེ་རུ་བསད། །བསྲུང་བྱ་བསྲུངས་པ་བསྲེག་བྱ་བསྲེགས། །ཇ་བསྲོ་ཞོ་བསྲུབས་ཕན་ཚུན་བསྲེས། །རིང་བསྲེལ་ལྷ་བསང་ངལ་བསོས་བསྡད། །རྗེས་བསུབ་བསང་གཏོར་ཞབས་བསིལ་བསིལ། །བསླད་བྱ་བསླད་ནས་བསླུ་བྱ་བསླུས། །བསླབ་བྱ་བསླབ་པ་གྱེན་དུ་བསླངས། །ཡི་གེ་བསྲིངས་སོགས་བས་འཕུལ་སའོ། །
     ཧ༽ ཧ་ཧ་ཧི་ཧི་ཧུ་ཧུ་ཟེར། །ཧ་ཅང་ཧྲལ་ཧྲུལ་མིག་ཧྲིག་ཧྲིག །ཧྭ་ཤང་རྩབ་ཧྲལ་ཧ་ཉིད་དོ། །
     ཨ༽ ཨ་ཏ་ཨ་མ་ཨ་ལ་ལ། །ཨ་ཀ་རུ་དང་ཨ་ཡུ་ཤི །ཨ་རུ་ར་དང་ཨུཏྤ་ལ། །ཨེ་མ་ཨ་མྲ་ལ་སོགས་ཨའོ། ། དག་ཡིག་ཚིག་གསལ་སྒྲོན་མེ་ལས་ཡི་གེའི་སྦྱོར་བ་རྒྱས་པར་བཤད་པ་སྟེ་གཉིས་པའོ།། །།
རྣམ་དབྱེ་དང་ཚིག་ཕྲད་བཤད་པ། 
     ད་ནི་རྣམ་དབྱེ་ཚིག་ཕྲད་སོགས། །བསྡུས་ཏེ་གསལ་བར་བསྟན་པར་བྱ། །དེ་ལ་རྣམ་དབྱེ་བརྒྱད་ཅེས་པ། །ངོ་བོ་ལས་དང་བྱེད་པ་ཆེད། །འབྱུང་ཁུངས་འབྲེལ་བ་གནས་གཞི་དང༌། །བོད་པའི་སྒྲ་སྟེ་རིམ་པ་བཞིན། །ལྷ་ཀླུ་མི་དང་ས་རྡོ་ཤིང༌། །ལ་སོགས་རེ་རེའི་དངོས་མིང་ནས། །བརྗོད་པ་རྣམ་དབྱེ་དང་པོའོ། །ཤིང་ལ་འཛེགས་དང་ཕྱོགས་སུ་འགྲོ། །མདུན་དུ་འདུག་ཅེས་བརྗོད་ལ་སོགས། །གཉིས་པ་ལས་སུ་བྱ་བའི་སྒྲ། །བདག་གིས་འདི་བྱས་ཁྱོད་ཀྱིས་ཤེས། །ནོར་གྱིས་དྲིན་གྱིས་བསྐྱངས་པ་སོགས། །རྣམ་དབྱེ་གསུམ་པ་བྱེད་ལས་སྒྲ། །བཀྲེས་ལ་ཟས་བྱིན་ནད་ལ་སྨན། །ཕོངས་ལ་ནོར་བྱིན་ཞིང་ལ་ཆུ། །དྲོངས་སོགས་བཞི་པ་དགོས་ཆེད་ཡིན། །མཁའ་ལས་ཆར་འབབས་ས་ལས་ལོ། །རི་ལས་ཤིང་དང་མ་ལས་བུ། །སྐྱེས་སོགས་ལྔ་པ་འབྱུང་ཁུངས་ཚིག །ཁྱོད་ཀྱི་མགོ་དང་ཤིང་གི་རྩེ། །གཏམ་གྱི་བརྗོད་བྱ་དེ་ཡི་དོན། །ལ་སོགས་དྲུག་པ་འབྲེལ་བའི་སྒྲ། །གནམ་ལ་ཉི་ཟླ་མཚོ་ལ་ཉ། །སྟེང་ན་ལྷ་བཞུགས་འོག་ཏུ་ཀླུ། །གནས་སོགས་བདུན་པ་གནས་གཞིའོ། །ལྷ་དང་ཀླུ་སོགས་མིང་གི་སྔོན། །ཀྱེ་སྦྱར་བརྒྱད་པ་བོད་པའི་སྒྲ། །བརྒྱད་པོ་རེ་རེར་གཅིག་ཚིག་དང༌། །གཉིས་ཚིག་མང་ཚིག་གསུམ་གསུམ་ལས། །གོང་དུ་བཤད་རྣམས་གཅིག་ཚིག་སྟེ། །ལྷ་དག་ཀླུ་དག་སོགས་སྦྱར་བ། །གཉིས་ཚིག་ཡིན་ནོ་ལྷ་རྣམས་དང༌། །ཀླུ་རྣམས་སོགས་སྦྱར་མང་ཚིག་གོ །དེ་ཡང་གིས་གི་ལ་ལས་སོགས། །རྣམ་དབྱེ་དངོས་ཡིན་ཚིག་གྲོགས་གཞན། །ཕྱེ་བའི་ངག་ཡིན་རྣམ་དབྱེ་མིན། །ད་བ་ས་ཀྱི་ག་ང་གི །ན་མ་ར་ལ་བཞི་པོ་གྱི། །མཐའ་རྟེན་མེད་མཐར་འི་ཐོབ་ཅིང༌། །རྐང་པ་སྐོང་ཕྱིར་ཡི་སྟེ་དཔེར། །ཁྱོད་ཀྱི་རྒྱབ་ཀྱི་ངོས་ཀྱི་ཆ། །བདག་གི་གདོང་གི་མདུན་གྱི་ཕྱོགས། །ལམ་གྱི་སྐོར་གྱི་གཞོལ་གྱི་གཞིའི། །དེ་ཡི་ཞེས་དང་ད་དྲག་མཐར། །ཀྱི་ཐོབ་གྱུར་ཀྱི་བརྒྱན་ཀྱི་ཟེར། །འོ་འུ་འམ་གྱི་ཚེག་ཁྱིམ་ཡང༌། །རྐང་པ་སྐོང་མི་སྐོང་གིས་དབྱེ། །འི་དང་འང་སོགས་ཚེག་བར་མིན། །མཐའ་རྟེན་ཅན་དང་བརྩེགས་པ་དང༌། །གུག་ཀྱེད་ཅན་ལ་འ་མཐའ་མེད། །ག་ད་བ་ཡི་རྗེས་སུ་ནི། །ཅིང་ཅེས་ཅེའོ་ཅེ་ན་ཅིག །ལྔ་པོ་ལེགས་ཏེ་དཔེ་རིམ་བཞིན། །རྟག་ཅིང་རྟོག་ཅེས་དཔག་ཅེའོ། །གར་འདུག་ཅེ་ན་འདིར་འདུག་ཅིག །བཤད་ཅིང་ཡོད་ཅེས་མེད་ཅེའོ། །ཅི་འཆད་ཅེ་ན་འདི་ཤོད་ཅིག །བརྒྱབ་ཅིང་ཐོབ་ཅེས་ཆུབ་ཅེའོ། །གང་རྒྱོབ་ཅེ་ན་མདའ་རྒྱོབ་ཅིག །ང་ན་མ་འ་ར་ལ་དང༌། །མཐའ་རྟེན་མེད་མཐར་ཞིང་ཞེས་ཞེའོ། །ཞེ་ན་ཞིག་སྟེ་དཔེ་རིམ་བཞིན། །སོང་ཞིང་དྲང་ཞེས་འབྱུང་ཞེའོ། །གང་གཟུང་ཞེ་ན་འདི་གཟུང་ཞིག །ཡིན་ཞིང་མིན་ཞེས་འཛིན་ཞེའོ། །ཟས་ཡིན་ཞེ་ན་དོན་ཞིག་གཉེར། །ཞིམ་ཞིང་འཇམ་ཞེས་འཛུམ་ཞེའོ། །ལེན་ནམ་ཞེ་ན་ནམ་ཞིག་ལེན། །བཟའ་ཞིང་དགའ་ཞེས་གདའ་ཞེའོ། །དུ་གདའ་ཞེ་ན་དགའ་ཞིག་སྣང༌། །འཕྱར་ཞིང་འཕུར་ཞེས་འགྱུར་ཞེའོ། །ཅི་འཕྱར་ཞེ་ན་དར་ཕྱོར་ཞིག །དལ་ཞིང་ཉལ་ཞེས་དལ་ཞེའོ། །གང་ཚོལ་ཞེ་ན་ཟས་ཚོལ་ཞིག །ཟ་ཞིང་བདེ་ཞེས་སྤྲོ་ཞེའོ། །ཨེ་འགྲོ་ཞེ་ན་མ་འགྲོ་ཞིག །དམིགས་བསལ་ས་མཐར་ཤེས་དོར་ཏེ། །ཤིང་ཞེས་ཤེའོ་ཤེ་ན་ཤིག །འདུས་ཤིང་ངེས་ཞེས་བྱས་ཤེའོ། །བརྗོད་ཅེས་ཤེ་ན་ད་སྨྲོས་ཤིག །འདས་ཚིག་ན་ར་ལ་གསུམ་གྱི། །རྗེས་སུ་ད་དྲག་ཐོབ་པའི་ཕྱིར། །འཛིན་ཅིང་བཀལ་ཅེས་བསྟན་ཅེའོ། །ཅི་མཁྱེན་ཅེ་ན་གྲོལ་ཅིག་དང༌། །གྱུར་ཅིག་ཅེས་པ་ལྟ་བུའོ། །དྲི་བའམ་དགག་པའི་ཚིག་དག་ལ། །རང་རང་མཐའ་རུ་མ་སྦྱར་དཔེར། །འདུག་གམ་བྱུང་ངམ་ཡོད་དམ་སོགས། །རྫོགས་མཚམས་རང་འདྲར་ན་རོ་སྟེ། །ཕྱུག་གོ་བཟང་ངོ་བསྟོད་དོ་སོགས། །མཐའ་རྟེན་མེད་མཐར་འོ་དང་ནི། །ད་དྲག་ཅན་ལ་ཏོ་སྟེ་དཔེར། །དགེ་འོ་འཛིན་ཏོ་མཁྱེན་ཏོ་དང༌། །གྱུར་ཏོ་ཞེས་པ་ལྟ་བུའོ། །ན་ར་ལ་ས་ད་དྲག་གི །རྗེས་སུ་ཏེ་རྐྱང་ད་མཐར་དེ། །ཡིན་ཏེ་སྦྱར་ཏེ་བཙལ་ཏེ་དང༌། །རྒྱས་ཏེ་གྱུར་ཏེ་དོན་ཡོད་དེ། །ག་ང་བ་མ་འ་དང་ནི། །མཐའ་རྟེན་མེད་མཐར་ས་སྟེ་དཔེར། །རྟག་སྟེ་འབྱུང་སྟེ་འགྲུབ་སྟེ་གདའ། །འཇོམ་སྟེ་དགའ་སྟེ་བདེ་སྟེ་བཞིན། །ག་བ་ད་དྲག་ཅན་མཐར་ཏུ། །རྟག་ཏུ་རབ་ཏུ་གཏན་ཏུ་བདེ། །ང་ད་ན་མ་ར་ལ་དུ། །ནང་དུ་སྣོད་དུ་རྒྱུན་དུ་ཟོ། །ལམ་དུ་མྱུར་དུ་མཇལ་དུ་འོང༌། །ས་སུ་རྟེན་མེད་འ་མཐར་རུ། །རྗེས་སུ་འདི་རུ་དགའ་རུ་གནས། །ག་ད་བ་ས་ད་དྲག་ཀྱང༌། །བདག་ཀྱང་འབད་ཀྱང་ཐོབ་ཀྱང་དོན། །བྱས་ཀྱང་འོན་ཀྱང་བསྟན་ཀྱང་ངོ༌། །ང་འ་ན་མ་ར་ལ་ཡང༌། །བྱུང་ཡང་འགའ་ཡང་བྱོན་ཡང་ནི། །ནམ་ཡང་སླར་ཡང་མཇལ་ཡང་བཞིན། །མཐའ་རྟེན་མེད་མཐར་འང་འཐོབ་ཅིང༌། །ཚིག་རྐང་སྐོང་ཚེ་ཡང་སྟེ་དཔེར། །ཡིན་དུའང་ཟིན་ལ་འདི་ན་ཡང༌། །ག་ད་ན་བ་མ་ས་དང༌། །ད་དྲག་ཅན་མཐར་པ་དང་ནི། །ང་འ་ར་ལ་རྟེན་མེད་མཐར། །བ་ཕྱེད་ཝར་འབོད་རྣམས་ལ་བ། །གཞན་ལ་པ་ཉིད་སྦྱར་ཏེ་དཔེར། །ཟག་པ་མེད་པ་ཕན་པ་མཆོག །ཐོབ་པ་དམ་པ་མཁས་པ་རུ། །གྱུར་པ་འོང་བ་ལ་དགའ་བ། །མྱུར་བ་མཇལ་བ་སྤྲོ་བ་དང༌། །ལུང་པ་མདའ་པ་འབྱོར་པ་སོགས། །གཅོད་མཚམས་ག་མཐར་ཆིག་ཤད་དང༌། །ང་ཡིག་མ་གཏོགས་ཤད་གོང་དུ། །ཕྱི་ཚེག་མི་བྱེད་ཚིགས་བཅད་དང༌། །ན་རོ་ཅན་མཐར་ཉིས་ཤད་བྱ། །ལེའུ་མཚམས་ལྟ་བུར་བཞི་ཤད་ཐོབ། །དག་ཡིག་ཚིག་གསལ་སྒྲོན་མེ་ལས་རྣམ་དབྱེ་དང་ཚིག་ཕྲད་བཤད་པ་སྟེ་གསུམ་པའོ།། །།
འཁྲུལ་སེལ་བཤད་པ།
     ད་ནི་གོང་དུ་བརྗོད་རྣམས་ལ། །འཁྲུལ་སེལ་ཅུང་ཟད་བརྗོད་བྱ་སྟེ། །དྲན་པ་ཉེར་གཞག་ཉེ་བར་བཞག །རིན་ཆེན་རྒྱན་གྱིས་རྣམ་པར་བརྒྱན། །བསྒྲུབ་བྱ་ལེགས་པར་བསྒྲུབ་པར་བྱ། །བསྒོམ་བྱ་བསྒོམ་པར་བྱ་བ་སོགས། །དེ་དག་རྣམས་ཀྱི་སྔ་མ་མིང༌། །ཕྱི་མ་བྱ་བའི་སྒྲ་རུ་འདོད། །བྱ་བྱེད་ལས་ནི་བཞི་ཡིན་ཏེ། །བྱེད་ལས་ད་ལྟ་བ་དང་ནི། །མ་འོངས་གཉིས་ཏེ་བྱ་བའི་ལས། །ད་ལྟར་དང་ནི་འདས་པ་གཉིས། །བྱ་བ་གང་གི་མ་མཐའ་རུ། །བྱེད་དང་འགྱུར་བའི་གསལ་བྱེད་སྒྲ། །དངོས་སམ་དོན་གྱིས་ཐོབ་གྱུར་ན། །བྱེད་ལས་ཡིན་ནོ་དེ་ལ་ནི། །བྱེད་ཅེས་བྱ་བའི་སྒྲ་ཡོད་ན། །བྱེད་ལས་ད་ལྟ་བ་ཡིན་ལ། །འགྱུར་ཞེས་ཐོབ་ན་མ་འོངས་ཚིག །གལ་ཏེ་མ་མཐར་བྱ་བྱས་ཞེས། །དངོས་སུ་ཡོད་པའམ་དོན་གྱིས་ཐོབ། །བྱ་བའི་ལས་ཏེ་བྱ་ཞེས་པ། །ཐོབ་ན་བྱ་བ་ད་ལྟར་དང༌། །བྱས་ཟིན་ཞེས་པའི་སྒྲ་བྱུང་ན། །བྱ་བའི་ལས་ནི་འདས་པར་འདོད། །དཔེར་བརྗོད་སྒོམ་བྱེད་སྒོམ་པར་འགྱུར། །བསྒོམ་པར་བྱའོ་བསྒོམས་པར་བྱས། །སྲུང་བར་བྱེད་དོ་སྲུང་བར་འགྱུར། །བསྲུང་བར་བྱའོ་བསྲུངས་ཟིན་ཏོ། །སྒྲུབ་པར་བྱེད་དོ་སྒྲུབ་པར་འགྱུར། །བསྒྲུབ་པར་བྱའོ་བསྒྲུབས་ཟིན་སོགས། །བྱེད་འགྱུར་བྱ་བྱས་ཟིན་ཞེས་པའི། །གསལ་བྱེད་སྒྲ་ལས་ཤེས་པར་བྱ། །དེ་ཕྱིར་བསྒོམ་བྱ་བསྒོམས་ཟིན་པའི། །ཚིག་བསྡུས་བསྒོམ་བསྒོམས་སྔོན་འཇུག་འཐོབ། །སྒོམ་བྱེད་སྒོམ་འགྱུར་ཚིག་བསྡུས་པའི། །སྒོམ་སྒོམ་ལ་ནི་སྔོན་འཇུག་མེད། །དེ་བཞིན་བསྒྲུབ་པར་བྱའོ་སོགས། །སྔོན་འཇུག་ཡོད་དང་མེད་པ་གཉིས། །བྱ་བའི་སྒྲ་ལ་ཨོ་ཡིག་ནི། །སྦྱར་བ་བྱེད་ལས་མ་སྦྱར་བ། །བྱ་བ་གཞི་ལ་ཡོད་པའི་ལས། །རྐང་པ་རྐྱོང་བྱེད་བརྐྱང་བར་བྱ། །དེ་བཞིན་ཀློག་དང་བཀླག་པར་བྱ། །སྐོང་བསྐང་གཏོང་བཏང་སྒྲོལ་བསྒྲལ་དང༌། །རྒྱོབ་བརྒྱབ་སྟོན་པར་བྱེད་པ་དང༌། །བསྟན་པར་བྱ་སོགས་ཤེས་པར་བྱ། །སྒྲུབས་ཤིག་སྒོམས་ཤིག་བྱིན་རློབས་ཤིག །ལ་སོགས་སྐུལ་ཚིག་བས་འཕུལ་མེད། །བསྒྲུབ་བྱ་བསྒོམ་བྱ་ལ་སོགས་པར། །ས་མཐའ་མི་འཐོབ་བསྒྲུབས་པར་བྱས། །བསྒོམས་ཟིན་སོགས་ལ་ས་མཐའ་འཐོབ། །གཞན་ཡང་རྔ་ཡབ་གེ་སར་དང༌། །སིལ་སྙན་མངོན་སུམ་གས་འཕུལ་མེད། །གཤའ་མ་གཤགས་འབྱེད་མེད་ན་ནོར། །སར་པ་ལྟ་བུར་གང་ཡང་རུང༌། །སྐྱིལ་ཀྲུང་སོགས་ལ་དས་འཕུལ་མེད། །དགུང་ལོ་ལ་སོགས་མེད་ན་ནོར། །སྙན་དངགས་ལ་སོགས་གང་ཡང་རུང༌། །གད་མོ་སྐྲ་ཤད་བས་འཕུལ་སྤོང༌། །བསེར་བུ་སྐྱོ་བསངས་མེད་ན་ནོར། །སྔོ་བསངས་ལྟ་བུར་གང་ཡང་རུང༌། །ཐ་གྲུ་ཐ་མ་ཚར་དུ་དངར། །ཚོན་རྩི་སོགས་ལ་མས་འཕུལ་དོར། །མཐེ་བོ་མཚེ་མ་རིན་ཆེན་མཚལ། །ཁྱིམ་མཚེས་སོགས་ལ་མེད་ན་ནོར། །ཐུན་མོངས་སོགས་ལ་གང་ཡང་རུང༌། །ཚོང་པ་ཁམས་དང་ཚོགས་པ་ཚོམས། །ཕྲ་མ་ཁོན་འཛིན་ཁྲོ་བོ་ཁྲོས། །རིམ་གྲོ་ཡོ་བྱད་ཕོངས་པ་དང༌། །ཕྱུག་པོ་སོགས་ལ་འས་འཕུལ་མེད། །མཐའ་འཁོབ་ཚུལ་འཆོས་སོགས་མེད་ནོར། །ཕྲིན་ལས་ཕྲེང་སོགས་གང་ཡང་རུང༌། །ཡི་གེ་ཉུང་ངུ་ལུ་གུ་རྒྱུད། །ཤཱཀྱ་སོགས་ལ་ག་མཐའ་སྤང༌། །ཕྲག་དོག་ཕྲུག་གུར་མེད་ན་ནོར། །ཁ་མཆུ་ར་མདའ་ན་བཟའ་དང༌། །རྒྱ་མཚོ་སོགས་ལ་མ་མཐའ་སྤང༌། །བྱ་རྒོད་རྡོ་རྗེར་ར་མཐའ་མེད། །མདོར་བསྡུས་སོགས་ལ་མེད་ན་ནོར། །བདེ་གཤེགས་སོགས་ལ་གང་ཡང་རུང༌། །པུས་མོའི་ལྷ་ང་སླ་ང་དང༌། །སྒོ་ང་སོགས་ལ་ང་མཐའ་དོར། །ཡི་དམ་ཡི་རང་ཡི་དྭགས་དང༌། །སྲི་ཞུ་སོགས་ལ་ད་མཐའ་ནོར། །སེ་མོ་དོ་ལ་ན་མཐའ་མེད། །གདུ་བུ་ལེ་རྒན་བ་མཐའ་ནོར། །རིག་སྔགས་གསུང་རབ་མཁྱེན་རབ་དང༌། །གོ་འཕང་བསྐྱེད་རིམ་རྫོགས་རིམ་དང༌། །ཉམ་ཆུང་ཉམ་ཐག་ཉམ་ང་བ། །ལོག་རྟོག་སོམ་ཉི་ཆོམ་རྐུན་དང༌། །ནམ་མཁའ་སོགས་ལ་ས་མཐའ་ནོར། །སྐྱེས་རབས་སོགས་ལ་མེད་ན་མིན། །དྲི་བཟངས་རྒྱུད་མངས་གོ་རིམས་དང༌། །འཁོར་ལོས་སྒྱུར་སོགས་གང་ཡང་རུང༌། །ཀླད་ཀོར་སྟོད་ཀོར་འོད་ཀོར་དང༌། །ཨ་མྲ་ལ་སོགས་ས་མགོ་མེད། །ངུར་སྨྲིག་སྨིག་རྒྱུར་མེད་ན་ནོར། །གཞན་ཡང་སྙིང་ཀ་སྙིང་ཁ་དང༌། །དཀོན་མཆོག་དང་ནི་དཀོན་ཅོག་དང༌། །ཇི་ལྟར་ཅི་ལྟར་བརྫུན་དང་རྫུན།། འོད་གཟེར་འོད་ཟེར་རིན་ཆེན་དང༌། །རིན་ཅེན་ཁྱད་པར་ཆེར་མེད་གསུང༌། །དག་ཡིག་ཚིག་གསལ་སྒྲོན་མེ་ལས་འཁྲུལ་སེལ་བཤད་པ་སྟེ་བཞི་པའོ།། །།
     སྨྲས་པ། གཞུང་ལུགས་སྨྲ་བ་རྣམས་ཀྱི་མིག་གཅིག་པོ། །མིང་ཚིག་ཀུན་གྱི་གཞིར་གྱུར་ཡི་གེ་སྟེ། །སྦྱོར་ཚུལ་ལེགས་ཤེས་དོན་ལ་མི་རྨོངས་ཤིང༌། །གཞན་དུ་ཚིག་འཁྲུལ་དོན་ཀྱང་ག་ལ་ཞིག །ཐོན་མིའི་ལེགས་བཤད་ཡི་གེའི་སྦྱོར་བ་ཀུན། །ཇི་བཞིན་ཤེས་པའང་དཀོན་ན་གང་གི་ཚེ། །སོ་སོ་ཡང་དག་རིག་བཞི་མ་ཐོབ་པར། །དེ་སྲིད་སྡེབ་སྦྱོར་མཐའ་དག་སུ་ཡིས་ཤེས། །འོན་ཏེ་འདི་ལྟར་ཕྱོགས་རེའི་བརྡ་ལ་ཡང༌། །སྦྱངས་གང་བླུན་རྨོངས་གཞན་ལས་ཁྱད་འཕགས་ཕྱིར། །མཁས་པའི་སྟན་ལ་འདུག་པར་འོས་སོ་ཞེས། །ཞ་ལུ་བློ་ལྡན་ཤེས་རབ་སོགས་ཀྱིས་བཤད། །དམ་པའི་མན་ངག་ཡན་ལག་བརྒྱད་ལྡན་ཆབ། །མང་ཐོས་ལྷ་ཆེན་རལ་པའི་ནགས་ཀླུང་དུ། །ཡོངས་བཟུང་བློ་གསལ་སྐལ་ལྡན་ཛ་ཧྣུའི། །ལོངས་སྤྱོད་ཆེད་དུ་འདི་ན་དལ་གྱིས་འབབ། །རབ་དཀར་ཕན་འདོད་ཡིད་ཀྱིས་ཉེར་དྲངས་ཏེ། །རབ་འབྱམས་མཁས་པའི་གཞུང་བཟང་དུ་མ་ལ། །རབ་ཏུ་དཔྱད་ནས་བཀོད་པ་ཡིན་མོད་ཀྱི། །རབ་རིབ་ནོངས་པར་གང་གྱུར་བདག་གིས་འཆགས། །འདིར་འབད་ལས་འོངས་དགེ་ལེགས་ཆར་གྱི་རྒྱུན། །ཇི་སྙེད་མཆིས་དེ་དགེ་བའི་ཀླུང་གཞན་དང༌། །ལྷན་ཅིག་ཕན་བདེའི་འཇུག་ངོགས་ལ་ཞུགས་ཏེ། །ཀུན་མཁྱེན་རྒྱ་མཚོར་རོ་གཅིག་འགྱུར་ཕྱིར་བསྔོ།། །།
     དག་ཡིག་ཚིག་གསལ་སྒྲོན་མེ་ཞེས་བྱ་བ་འདི་ནི་རྣམ་དཔྱོད་ཅན་གྲགས་པ་དཔལ་འབྱོར་གྱིས་བསྐུལ་བས་རྐྱེན་བྱས། གཞན་ལའང་ཕན་སྲིད་སྙམ་པའི་འདུན་པས། དག་ཡིག་ཉེར་མཁོ། ཟ་མ་ཏོག འོད་ཟེར་བརྒྱ་པ། དོན་གསལ་སྒྲོན་མེ། རིན་ཆེན་སྒྲོན་མེ་སོགས་དང༌། སུམ་རྟགས་རྩ་འགྲེལ་ལའང་ལེགས་པར་འདྲིས་པ་སྔོན་དུ་བཏང༌། བཞེད་པ་ཅུང་མི་འདྲ་བ་རེ་སྣང་ཡང༌། ངག་སྒྲོན་གྱི་དགོངས་པ་གཙོ་བོར་བྱས་ཏེ་འཇུག་པ་ཆུང་བ་ཕལ་ཆེར་དོར། གཞན་དག་ལས་ཀྱང་ལེགས་ཆ་བླངས་ཏེ་བརྒྱན་ནས་འཇུག་པ་བདེ་བར་མཐོན་པོའི་རིགས་སུ་འཁྲུངས་ཤིང་མདོ་སྔགས་དང་ཐ་སྙད་ཀྱི་རིག་གནས་དུ་མ་ལ་བློ་གྲོས་ཀྱི་སྣང་བ་རྒྱས་པ་ཀོའུ་ཤྲི་ནང་སོ་ཡེས་ཀྱི་བཀས་ཅོ་ནེའི་མཁན་ས་དང་མཚན་ཉིད་ཀྱི་བཤད་གྲྭ་ཟུང་འབྲེལ་གྱིས་སྐྱོང་བ་ཤཱཀྱའི་དགེ་སློང་རབ་འབྱམས་སྨྲ་བ་གྲགས་པ་བཤད་སྒྲུབ་ཀྱིས་དགེ་བྱེད1722ལོར་སྦྱར་བའོ། །བཀྲ་ཤིས།། །།