ཐོན་མིའི་ལེགས་བཤད་སུམ་ཅུ་བའི་སྙིང་པོ་ལེགས་བཤད་ལྗོན་པའི་དབང་པོ་བཞུགས་སོ། །

     ན་མོ་གུ་རུ་མཉྫུ་གྷོ་ཥཱ་ཡ། བླ་མ་མཆོག་དང་དབྱེར་མེད་པའི ། །འཇམ་པའི་དབྱངས་ལ་གུས་བཏུད་ནས། །ཐོན་མིའི་ལེགས་བཤད་སུམ་ཅུ་པའི། །སྙིང་པོ་མདོར་བསྡུས་བཤད་པར་བྱ། །དབྱངས་ཀྱི་བྱ་བ་གསལ་བོ་རུ། །བྱེད་པ་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ད་དང་ས་གཉིས་ཡང་འཇུག་སྟེ། །ད་ནི་ན་ར་ལ་གསུམ་དང༌། །ས་ནི་ག་ང་བ་མར་འཐོབ། །ག་ད་བ་མ་འ་སྔོན་འཇུག ། གོ་ངོ་དོ་ནོ་བོ་མོ་འོ། །རོ་ལོ་སོ་ཏོ་སླར་བསྡུ་སྟེ། །རྫོགས་ཚིག་ཟླ་སྡུད་ཅེས་ཀྱང་བྱ། །དྲག་ཡོད་ཏོ་དང་མཐའ་མེད་འོ། །གཞན་རྣམས་མིང་མཐའི་རྗེས་མཐུན་སྦྱར། །སུ་ར་རུ་དུ་ན་ལ་ཏུ། །ལ་དོན་རྣམ་པ་བདུན་ཡིན་ཏེ། །རྣམ་དབྱེ་གཉིས་བཞི་བདུན་པ་དང༌། །དེ་ཉིད་ཚེ་སྐབས་རྣམས་ལ་འཇུག ། ས་སུ་ག་བ་དྲག་མཐར་ཏུ། །ང་ད་ན་མ་ར་ལ་དུ། །འ་དང་མཐའ་མེད་ར་དང་རུ། །གི་ཀྱི་གྱི་འི་ཡི་ལྔ་པོ། །རྣམ་དབྱེ་དྲུག་པ་འབྲེལ་སྒྲ་དང༌། །དེ་རྣམས་ས་མཐའ་ཅན་ལྔ་ནི། །རྣམ་དབྱེ་གསུམ་པ་བྱེད་སྒྲ་སྟེ། །སྦྱོར་ཚུལ་ན་མ་ར་ལ་གྱི། །ད་བ་ས་ཀྱི་ག་ང་གི ། འ་དང་མཐའ་མེད་འི་དང་ཡི། །ཀྱང་ཡང་འང་གསུམ་རྒྱན་སྡུད་དེ། །ག་ད་བ་ས་དྲག་མཐར་ཀྱང༌། །ང་ན་མ་ར་ལ་མཐར་ཡང༌། །འ་དང་མཐའ་མེད་འང་དང་ཡང༌། །ཏེ་དེ་སྟེ་གསུམ་ལྷག་བཅས་ཏེ། །ན་ར་ལ་ས་དྲག་མཐར་ཏེ། །ད་དེ་ག་ང་བ་མ་འ། །མཐའ་མེད་རྣམས་ལ་ས་སྟེ་འཐོབ། །གམ་ངམ་དམ་ནམ་བམ་མམ་འམ། །རམ་ལམ་སམ་ཏམ་འབྱེད་སྡུད་དེ། །སྦྱོར་ཚུལ་སླར་བསྡུའི་སྐབས་དང་མཚུངས། །ར་རུ་འི་ཡི་འང་ཡང་རྣམས། །རྐང་པ་མི་སྐོང་སྐོང་བའི་ཁྱད། ། འོ་འུ་འམ་གྱི་གོང་དུ་ཚེག ། མེད་དང་ཡོད་པའང་དེ་བཞིན་ཡིན། །ནས་ལས་འབྱུང་ཁུངས་དགར་སྡུད་དེ། །འབྱུང་ཁུངས་དངོས་ལ་གང་སྦྱར་འཐུས། །རིགས་མཐུན་དགར་ནས་མི་མཐུན་ལས། །སྡུད་ལ་ནས་སྒྲ་ཁོ་ན་འཇུག ། ཀྱེ་དང་ཀྭ་ཡེ་བོད་སྒྲ་སྟེ། །ཕལ་ཆེར་མིང་གི་ཐོག་མར་སྦྱོར། །ནི་ནི་དགར་དང་བརྣན་པའི་སྒྲ། །དང་ནི་སྡུད་འབྱེད་རྒྱུ་མཚན་དང༌། །ཚེ་སྐབས་གདམས་ངག་ལྔ་ལ་འཇུག ། མིང་གི་ཐོག་མའི་དེ་སྒྲ་ནི། །ཐ་སྙད་འདས་མ་ཐག་པ་དང༌། །རྣམ་གྲངས་གཞན་ཅན་གཉིས་ལ་འཇུག ། ཅི་ཇི་སུ་གང་སྤྱི་སྒྲ་སྟེ། །ཞིག་སྟེ་སླད་འདྲ་ཕྱིར་ལ་ཅི། །སྙེད་སྲིད་ལྟར་བཞིན་སྐད་ལ་ཇི། །སུ་ནི་གང་ཟག་གང་ཀུན་ལའོ། །ན་རོ་ཡོད་མེད་པ་བ་མ། །བདག་པོའི་སྒྲ་སྟེ་ག་ད་ན། །བ་མ་ས་དང་དྲག་མཐར་པ། །ང་འ་ར་ལ་མཐའ་མེད་ལ། །བདག་སྒྲ་ཡར་གྱུར་བ་དང་ནི། །ཆ་ལ་པ་ཉིད་སྦྱོར་བ་ལེགས། །མིང་མཐའི་པ་བའང་ཕལ་ཆེར་འདྲ། །མ་ནི་ངེས་མེད་སྐབས་དང་སྦྱར། །མ་མི་མེད་མིན་དགག་སྒྲ་སྟེ། །མ་མི་ཐོག་མ་མེད་མིན་མཇུག ། མ་ནི་བར་གྱི་གསལ་བྱེད་ལའང༌། །ཚིག་ཕྲད་ཞིང་སོགས་ང་ན་མ། །འ་དང་ར་ལ་མཐའ་མེད་མཐར། །ཞིང་ཞེས་ཞེ་འོ་ཞེ་ན་ཞིག ། ག་ད་བ་དང་ད་དྲག་མཐར། །ཅིང་ཅེས་ཅེ་འོ་ཅེ་ན་ཅིག ། ས་མཐར་དམིགས་བསལ་ཞེས་མ་གཏོགས། །ཤིང་ཤིག་ཤེ་འོ་ཤེ་ན་འཐོབ། །འོན་ཀྱང་ཁ་ཅིག་ལྷན་ཅིག་སོགས། །མིང་གི་ཆ་དང་མ་ནོར་གཅེས། །རྐྱང་པ་འཕུལ་ལ་འ་མཐའ་དགོས། །གུག་ཀྱེད་བརྩེགས་འདོགས་ཅན་ལ་སྤང༌། །ལྷུག་པའི་དོན་མང་མིང་མཚམས་དང༌། །དོན་འབྲིང་འབྱེད་དང་དོན་ཉུང་རྫོགས། །ཚིགས་བཅད་ག་མཐར་ཆིག་ཤད་བྱ། །རྫོགས་ཚིག་མཐའ་ཅན་ལྷུག་པ་དང༌། །ཚིགས་བཅད་རྐང་མཐར་ཉིས་ཤད་འཐོབ། །དོན་ཚན་ཆེན་མོ་རྫོགས་པ་དང༌། །ལེའུའི་མཚམས་སུ་བཞི་ཤད་དགོས། །ང་ཡིག་མ་གཏོགས་ཡིག་ཤད་བར། །ཚེག་མེད་དེ་སོགས་ཞིབ་ཏུ་འབད། །ཚིག་གི་ལོ་མས་མ་བསྒྲིབས་ཤིང༌། །དོན་གྱི་འབྲས་བུ་གཡུར་ཟ་བའི། །ལེགས་བཤད་ལྗོན་པའི་དབང་པོ་འདི། །དབྱངས་ཅན་གྲུབ་པའི་རྡོ་རྗེས་སྤེལ། །ཤུབྷཾ།། །

རྟགས་འཇུག་གི་སྙིང་པོ་དཀའ་གནད་གསལ་མེ་བཞུགས་སོ། །

    ན་མོ་མཉྫུ་ཤྲི་ཡེ། རྒྱལ་ཀུན་མཁྱེན་པའི་ཡེ་ཤེས་དཔྱིད། །གཞོན་ནུའི་གཟུགས་ཀྱིས་རྣམ་རོལ་བ། །རྗེ་བཙུན་བརྟན་པའི་འཁོར་ལོ་དང༌། །དབྱེར་མེད་བླ་མའི་ཞབས་བཏུད་ནས། །མཁས་མཆོག་ཐོན་མིའི་ཐུགས་མཚོ་ལས། །བྱུང་བའི་བརྡ་སྤྲོད་ཕྱི་མོ་མཆོག ། རྟགས་ཀྱི་འཇུག་པའི་སྙིང་པོའི་དོན། །མདོར་བསྡུས་ཚིག་གིས་གསལ་བར་བྱ། །སྤྱིར་ན་དབྱངས་མོ་གསལ་བྱེད་ཕོ། །དེ་ཕྱིར་ཀ་ལི་སུམ་ཅུ་པོ། །ཕོ་ཡི་ཡི་གེ་འབའ་ཞིག་ལ། །ནང་གསེས་སྡེ་ཚན་ལྔར་དབྱེ་སྟེ། །ཀ་ཅ་ཏ་པ་ཙ་རྣམས་ཕོ། །ཁ་ཆ་ཐ་ཕ་ཚ་མ་ནིང༌། །ག་ཇ་ད་བ་ཛ་ཝ་ཞ། །ཟ་འ་ཡ་ཤ་ས་རྣམས་མོ། །ང་ཉ་ན་མ་ཤིན་ཏུ་མོ། །ར་ལ་ཧ་ཨ་མོ་གཤམ་སྟེ། །ཨ་ནི་མཚན་མེད་ཅེས་ཀྱང་བྱ། །སྔོན་འཇུག་ལྔ་ཡི་བ་ཡིག་ཕོ། །ག་ད་མ་ནིང་འ་མོ་ཡིག ། མ་ནི་ཤིན་ཏུ་མོ་ཡིན་ནོ། །དེ་རྣམས་གང་ལ་གང་འཇུག་ན། །ཕོ་ཡིག་བ་ནི་ཀ་ཅ་ཏ། །ཙ་ག་ང་ཇ་ཉ་ད་ན། །ཛ་ཞ་ཟ་ར་ཤ་སར་འཇུག ། མ་ནིང་ག་ནི་ཅ་ཏ་ཙ། །ཉ་ད་ན་ཞ་ཟ་ཡ་ཤ ། སར་འཇུག་མ་ནིང་ད་ཡིག་ནི། །ཀ་པ་ག་བ་ང་མར་འཇུག ། མོ་ཡིག་འ་ནི་ག་ཇ་ད། །བ་ཛ་ཁ་ཆ་ཐ་ཕ་ཚར། །ཤིན་ཏུ་མོ་ཡི་མ་ཡིག་ནི། །ཁ་ཆ་ཐ་ཚ་ག་ཇ་ད། །ཛ་ང་ཉ་ན་རྣམས་ལ་འཇུག ། ཇི་ལྟར་འཇུག་པར་བྱེད་ཅེ་ན། །ཕོ་ནི་སྒྲ་རྩོལ་དྲག་པར་འཇུག ། མ་ནིང་རན་པར་འཇུག་པ་ཡིན། །མོ་ནི་ཞན་པའི་ཚུལ་གྱིས་ཏེ། །ཤིན་ཏུ་མོ་ནི་མཉམ་པས་སོ། །ཅི་ཕྱིར་འཇུག་པར་བྱེད་ཅེ་ན། །ཐོག་མར་འདི་ལྟར་ཤེས་དགོས་ཏེ། །ལས་གང་ཞིག་ལ་བྱེད་པ་པོ། །གཞན་དང་དངོས་སུ་འབྲེལ་བ་ཡི། །དབང་དུ་བྱས་ནས་བྱེད་པོ་དང༌། །དེ་ཡི་བྱེད་པ་གཉིས་པོ་ནི། །དངོས་པོ་བདག་ཡིན་བྱ་ཡུལ་དང༌། །བྱ་བ་གཉིས་པོ་དངོས་པོ་གཞན། །དེ་བཞིན་བྱེད་པ་པོ་གཞན་དང༌། །དངོས་སུ་འབྲེལ་མིན་ཇི་ལྟར་ཡང༌། །བྱ་བ་བྱས་ཟིན་འདས་པ་དང༌། །བྱ་བ་བྱེད་འགྱུར་མ་འོངས་དང༌། །བྱེད་བཞིན་པ་ནི་ད་ལྟ་བ། །དེ་ཕྱིར་དུས་གསུམ་དབྱེ་བས་ནི། །བྱེད་ལས་དང་འབྲེལ་ངག་གི་ནི། །སྦྱོར་བ་ཀུན་ལ་ཁྱབ་པ་ཡིན། །བདག་གཞན་དབྱེ་བས་དེ་ཙམ་དུ། །ཁྱབ་པ་མིན་ཡང་བྱེད་པོ་དང༌། །བྱ་ཡུལ་བསྡུ་ཕྱིར་དབྱེ་བ་དེ། །མཛད་ནས་བདག་གཞན་དང་འབྲེལ་བའི། །བྱ་བྱེད་རྣམས་ཀྱང་དེ་ཁོངས་བསྡུས། །དེས་ན་དུས་གསུམ་དུ་དབྱེ་བས། །བདག་གཞན་དབྱེ་བས་མ་ཁྱབ་པ། །བསྡུ་བའི་དོན་དུ་ཤེས་དགོས་པར། །གསུངས་ཀྱང་སྔོན་འཇུག་འ་ཡིག་སྐབས། །བྱེད་ལས་ཙམ་དང་འབྲེལ་བ་ཡི། །དངོས་པོ་བདག་ལའང་འཇུག་པ་མཐོང༌། །དེ་ལྟར་ངེས་ནས་ཕོ་ཡིག་བ། །བསྒྲུབས་སོ་ལྟ་བུ་འདས་པ་དང༌། །བསྒྲུབ་བྱའི་ལྟ་དང་བསྒྲུབ་པར་བྱ། །ཞེས་སོགས་དངོས་པོ་གཞན་ལ་འཇུག ། མ་ནིང་ག་ད་གཉིས་པོ་ནི། །གཅོད་པ་པོ་དང་གཅོད་པར་བྱེད། །གཅོད་པར་འགྱུར་དང་དཀྲི་བ་པོ། །དཀྲི་བར་བྱེད་དང་དཀྲི་བར་འགྱུར། །ཞེས་སོགས་དངོས་པོ་བདག་དོན་དང༌། །གཅད་བྱའི་ཤིང་དང་གཅད་པར་བྱ། །དཀྲི་བྱའི་སྣལ་མ་དཀྲི་བར་བྱ། །ཞེས་སོགས་དངོས་པོ་གཞན་དོན་དང༌། །གཅོད་བཞིན་པ་དང་དཀྲི་བཞིན་པ། །ཞེས་སོགས་ད་ལྟ་བསྒྲུབ་ཆེད་འཇུག ། མོ་ཡིག་འ་ནི་འཆད་པ་པོ། །འཆད་པར་བྱེད་དང་འཆད་པར་འགྱུར། །ཞེས་སོགས་དངོས་པོ་བདག་དངོས་དང༌། །འགྲོ་བ་པོ་དང་འགྲོ་བར་བྱེད། །ཅེས་སོགས་བདག་དོན་ཕལ་བ་དང༌། །འཁྱིལ་ལོ་ཞེས་སོགས་ད་ལྟ་དང༌། །འཁྱིལ་བར་འགྱུར་སོགས་མ་འོངས་འཇུག ། ཤིན་ཏུ་མོ་ཡི་མ་ཡིག་ནི། །བདག་གཞན་དུས་གསུམ་མཉམ་པར་འཇུག ། འོན་ཀྱང་བྱེད་པོ་གཞན་དངོས་དང༌། །འབྲེལ་བའི་འདས་ལ་འའི་སྔོན་འཇུག ། མེད་པར་ངེས་ཤིང་ག་ད་ཉུང༌། །ད་ལྟ་བ་ལ་བའི་སྔོན་འཇུག ། ཉུང་ཞིང་མགོ་ཅན་ད་ལྟ་བར། །བས་འཕུལ་མེད་པར་ངེས་པར་ཙམ། །གཞན་ཡང་བས་འཕུལ་ཅན་ཕལ་ཆེར། །བྱེད་པ་པོ་ནི་ད་ལྟ་དང༌། །བྱ་ཡུལ་མ་འོངས་པར་བསྡུས་ནས། །འདས་ལ་བས་འཕུལ་ཡང་འཇུག་ཡོད། །ད་ལྟ་བ་ལ་གཉིས་ཀ་མེད། །མ་འོངས་འཕུལ་ཡོད་ཡང་འཇུག་མེད། །བསྐུལ་ཚིག་འཕུལ་མེད་ཡང་འཇུག་ཡོད། །སྐབས་འགར་འདས་དང་བསྐུལ་ཚིག་ལ། །ས་རྐྱང་སྦྱར་བས་འཐུས་པའང་ཡོད། །རྗེས་འཇུག་ཡི་གེ་བཅུ་པོ་ཡི། །ག་ད་བ་ས་བཞི་རྣམས་ཕོ། །ང་མ་འ་གསུམ་མོ་ཡིན་ཅིང༌། །ན་ར་ལ་གསུམ་མ་ནིང་སྟེ། །མིང་གཞིའི་ཡི་གེ་ཀུན་ལ་འཇུག ། ཇི་ལྟར་འཇུག་ཚུལ་གཉིས་ཡིན་ཏེ། །དང་པོ་སྒྲ་ཡི་འཇུག་ཚུལ་ནི། །ཕོ་ཡི་ག་ཡིག་ཡང་འཇུག་ཅན། །སྐྱེས་བུ་རབ་དང་ཕོ་ཡིག་བ། །ཡང་འཇུག་ཅན་ནི་སྐྱེས་བུ་འབྲིང༌། །ག་བ་ཡང་འཇུག་མེད་པ་དང༌། །ད་སའི་མཐའ་ཅན་ཐ་མ་སྟེ། །དྲག་པ་ཕོ་ལའང་ནང་གསེས་ཀྱིས། །དྲག་ཞན་བར་མ་གསུམ་དུ་དབྱེ། །དེ་བཞིན་ཞན་པ་མོ་ལ་ཡང༌། །ནང་གསེས་དྲག་ཞན་གཉིས་དབྱེ་སྟེ། །ང་མ་ཡང་འཇུག་ཅན་མོ་དང༌། །ང་མ་ཡང་འཇུག་མེད་པ་དང༌། །འ་མཐའ་ཅན་རྣམས་ཤིན་ཏུ་མོ། །བར་མ་མ་ནིང་ན་ར་ལ། །ཡང་འཇུག་ཡོད་དམ་མེད་ཀྱང་རུང༌། །མིང་གཞི་ཕོ་ཡིག་མཐར་ཡོད་དང༌། །མིང་གཞི་མ་ནིང་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་དང་ཕྲད་པས་དྲག་པར་འགྱུར། །མིང་གཞི་མོ་ཡིག་རྗེས་སུ་ནི། །ཡང་འཇུག་མེད་པར་ཞུགས་པ་ན། །ཞན་དང་ཕྲད་པས་ཞན་པར་འགྱུར། །དེ་གཉིས་འགྱུར་བ་མ་ནིང་ཡིན། །མིང་གཞི་མོ་ཡིག་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་ཞན་གཉིས་ཀའི་ཆ་ལྡན་ཕྱིར། །མཚན་གཉིས་མ་ནིང་ཞེས་སུ་གྲགས། །མིང་གཞི་མ་ནིང་རྗེས་སུ་ནི། །ཡང་འཇུག་མེད་པར་ཞུགས་པ་ན། །དྲག་ཞན་གང་དུའང་མི་འགྱུར་བས། །མཚན་མེད་མ་ནིང་ཞེས་སུ་འདོད། །གཉིས་པ་དོན་ལ་གཉིས་ཡོད་པའི། །སྔ་མ་གང་ལྟར་འགྱུར་བ་ནི། །རྗེས་འཇུག་གང་ལ་ཞུགས་པ་ཡི། །མིང་དེས་བདག་གཞན་སོགས་གང་སྟོན། །ཕལ་ཆེར་མིང་དེའི་སྔོན་འཇུག་གི ། ནུས་པར་སྦྱར་ནས་རྟོགས་པར་བྱ། །ཕྱི་མ་ཇི་ལྟར་འགྱུར་བ་ནི། །རྗེས་འཇུག་ཕོ་ཡིས་ཕོ་ཡིག་གི ། མིང་མཐའ་གཞན་དྲང་དེ་བཞིན་དུ། །མོ་ཡིས་མོ་ཡི་མིང་མཐའ་དང༌། །མ་ནིང་གིས་ནི་མ་ནིང་དྲང༌། །དེ་རྣམས་རྟགས་མཚུངས་འདྲེན་ཚུལ་ཏེ ། །བརྗོད་བདེ་འདྲེན་པའང་ཤིན་ཏུ་མང༌། །གཞན་ཡང་མིང་མཐའ་དེ་ཉིད་ཀྱིས། །རྟགས་མཚུངས་པའམ་སྒྲ་མཐུན་པར། །རྣམ་དབྱེ་བརྒྱད་དང་སླར་བསྡུ་སོགས། །སྔ་མའི་ཤུགས་དང་མཐུན་པའི་འདྲེན། །དེ་དག་ནང་གསེས་གང་འཇུག་ནི། །རྣམ་དབྱེའམ་འཕྲད་བཅས་མིང་ཚིག་དེའི། །མཐར་སྦྱར་མིང་དོན་ལས་ཤེས་བྱ། །དེ་ཡང་ཆོས་རྣམས་ངོ་བོ་ཙམ། །བརྗོད་པ་རྣམ་དབྱེ་དང་པོ་སྟེ། །དཔེར་ན་བུམ་པ་ཀ་བ་བཞིན། །གསལ་བྱེད་བོད་ཀྱི་སྐད་ལ་ཉུང༌། །ལས་དང་བྱ་ཡུལ་དོན་གཅིག་སྟེ། །དེ་ལྟའི་བྱ་བའི་ཡུལ་ཞིག་ལ། །བྱ་བ་བྱས་པར་སྟོན་པ་ལ། །གཉིས་པ་ལས་སུ་བྱ་བ་དང༌། །གཉིས་པའི་ནང་ཚན་དེ་ཉིད་དང༌། །བཞི་བ་དགོས་ཆེད་གསུམ་འདྲ་ཡང༌། །བྱ་བ་བྱས་པས་བྱ་བའི་ཡུལ། །དེ་འམ་དེ་དང་འབྲེལ་བ་ལ། །ཕན་ཐོགས་མེད་ན་གཉིས་པ་སྟེ། །དཔེར་ན་ཤར་དུ་འགྲོ་ལྟ་བུ། །ཕན་ཐོགས་ཡོད་ན་བཞི་པ་སྟེ། །དཔེར་ན་སློང་ལ་སྦྱིན་ལྟ་བུ། །ཕན་ཐོགས་མེད་ཀྱང་བྱ་ཡུལ་དང༌། །བྱ་བ་ངོ་བོ་གཅིག་ཡིན་ན། །གཉིས་པའི་ནང་ཚན་དེ་ཉིད་དེ། །དཔེར་ན་ལྷ་རུ་གསལ་ལྟ་བུ། །གང་ཞིག་གང་ལ་བརྟེན་པ་འམ། །གནས་དང་ཡོད་པའི་དོན་ཙམ་ལས། །བྱ་བ་གཏན་ནས་མི་བྱེད་ན། །རྣམ་དབྱེ་བདུན་པ་གནས་གཞི་སྟེ། །དཔེར་ན་སྟེང་དུ་མི་ཡོད་ལྟར། །ཚེ་སྐབས་གཉིས་དང་དོན་འདྲ་ན། །བདུན་པའི་ནང་ཚན་ཚེ་སྐབས་ཏེ། །དཔེར་ན་མཆུ་ཟླ་ཤར་བ་ན། །ཆོ་འཕྲུལ་དུས་ཆེན་ཚུགས་ལྟ་བུ། །རྣམ་དབྱེ་གཉིས་བཞི་བདུན་པ་དང༌། །དེ་ཉིད་ཚེ་སྐབས་གསལ་བྱེད་སྒྲ། །སུ་ར་རུ་དུ་ན་ལ་ཏུ། །ཡིན་ཞིང་ཕལ་ཆེར་ལ་སྒྲ་དང༌། །མཐུན་པས་ལ་དོན་རྣམ་དབྱེའང་ཟེར། །འོན་ཀྱང་ན་ལ་དེ་ཉིད་ལ། །མི་འཇུག་སྨྲ་བའི་སྒོ་ལས་གསུངས། །རྣམ་དབྱེ་གང་ལ་སྦྱོར་ཡུལ་དེས། །ཉེ་འགྱངས་གང་དུ་བྱ་བ་ཞིག ། བྱས་ན་གསུམ་པ་བྱེད་སྒྲ་སྟེ། །དཔེར་ན་བདག་གིས་བཤད་ལྟ་བུ། །བྱ་བ་གཏན་ནས་མི་བྱེད་པར། །སྔ་ཕྱི་འབྲེལ་བྱེད་ཙམ་སྟོན་ན། །རྣམ་དབྱེ་དྲུག་པ་འབྲེལ་སྒྲ་སྟེ། །དཔེར་ན་བདག་གི་མིག་ལྟ་བུ། །རྣམ་དབྱེ་གསུམ་དྲུག་གསལ་བྱེད་སྒྲ། །ས་མཐའ་ཡོད་དང་མེད་པ་ཡི། །གི་ཀྱི་གྱི་འི་ཡི་ལྔ་ཡིན། །གང་ཞིག་གང་ལས་བྱུང་བ་འམ། །བྱེ་དང་ལྷུང་བའི་དོན་ལྡན་ན། །རྣམ་དབྱེ་ལྔ་པ་འབྱུང་ཁུངས་ཏེ། །དཔེར་ན་ཞལ་ནས་ཐོས་ལྟ་བུ། །གསལ་བྱེད་སྒྲ་ནི་ནས་ལས་ཏེ། །དགར་དང་སྡུད་པའང་ལྔ་པར་གཏོགས། །གཞན་ཡང་ཚིག་དོན་གོང་འོག་ཏུ། །བསྡུ་རྒྱུ་ཡོད་ན་སྡུད་པའི་སྒྲ། །དང་དང་ཀྱང་ཡང་འང་སོགས་སྦྱོར། །རྣམ་གྲངས་དུ་མས་དོན་བསྐྱར་ན། །འབྱེད་སྡུད་སྒྲ་འཇུག་དགག་པ་དང༌། །བདག་དོན་ཡོད་ན་ཐོག་མཐའ་རུ། །པ་སྡེའི་རྟགས་རྣམས་ཅི་རིགས་འཇུག ། རྒྱན་དུ་གྱུར་པའི་ཚིག་ཕྲད་ཀྱང༌། །དོན་ལ་བསྙེགས་པ་ཡོད་ན་སྦྱོར། །དེ་བཞིན་བསྟན་བྱ་ལྷག་ཡོད་ན། །ལྷག་བཅས་སྒྲ་སྦྱོར་ཚིག་དོན་ནི། །རྫོགས་ན་སླར་བསྡུའི་སྒྲ་རྣམས་སྦྱོར། །དགོས་པ་ཅི་ཕྱིར་འཇུག་ཅེ་ན། །མོ་ཡིག་དབྱངས་དང་མི་ལྡན་ན། །ཕོ་ཡིག་གསལ་བྱེད་བརྗོད་མི་ནུས། །དེ་ཕྱིར་དབྱངས་ལྔར་བཞེད་པ་བདེ། །ཕོ་ཡིག་དབྱངས་ལྡན་དེ་དག་ལའང༌། །རྗེས་འཇུག་བཅུ་པོ་མ་ཞུགས་ན། །དོན་གྱི་ངོ་བོ་ཙམ་སྟོན་པའི། །མིང་དང་དོན་གྱི་ཁྱད་པར་རྣམས། །སྟོན་པའི་ཚིག་དང་དོན་ལྡན་པའི། །ངག་གི་བརྗོད་པ་ཡོད་མིན་ཏེ། །ཡི་གེའི་ཁོངས་ནས་མིང་དབྱུང་ཞིང༌། །མིང་གི་ཁོངས་ནས་ཚིག་ཕྱུང་ནས། །ཚིག་གིས་དོན་རྣམས་སྟོན་པས་སོ། །མིང་ཚིག་བརྗོད་པ་མེད་ན་ནི། །མཐུན་མོང་མཐུན་མོང་མ་ཡིན་པའི། །ཤེས་བྱ་སྟོན་པའང་མེད་པར་འགྱུར། །དེ་ཕྱིར་འཕགས་ཡུལ་མཁས་རྣམས་ཀྱི། །རྗེས་སུ་འབྲངས་ནས་གསུངས་པ་འདི། །སྐྱེ་བོ་ཀུན་གྱིས་རྟོགས་གྱུར་ཅིག ། ཚིག་གི་སྒྲ་ཙམ་འདྲ་ན་ཡང༌། །དོན་ལ་ཁྱད་པར་ཤིན་ཏུ་ཆེ། །དེ་ཕྱིར་བརྡ་དག་ལ་བརྟེན་ནས། །མ་ནོར་དོན་རྣམས་འཚོལ་བ་གཅེས། །དོན་ལ་མི་རྨོངས་རྨོངས་པ་ཡང༌། །ལུགས་འདིར་མཁས་མིན་གྱིས་བྱེད་དེ། །སྒྲ་ཤེས་དོན་ལ་མི་རྨོངས་ཞེས། །མཁས་པའི་གསུང་ལ་ཡོངས་སུ་གྲགས། །འདི་ལ་མ་སྦྱངས་རྨོངས་ཚོད་ཀྱིས། །འཆད་རྩོད་རྩོམ་པའི་གྲལ་འཇུག་ན། །ཝ་སྐྱེས་སེང་ལྤགས་གྱོན་པ་བཞིན། །ནམ་ཞིག་རྗེས་ངན་གསལ་བར་འགྱུར། །དེ་ཕྱིར་བློ་གསལ་དོན་གཉེར་རྣམས། །རྟགས་འཇུག་དཀའ་གནད་གཟུགས་བརྙན་ཀུན། །གསལ་བར་འཆར་བའི་མེ་ལོང་འདིར། །ལ་འུར་གཟིགས་མོར་སྤྱོན་དང་ཀྱེ། །འདི་ལ་ནོངས་པའི་ཚོགས་མཆིས་ན། །གཟུར་གནས་མཁས་པའི་སྤྱན་སྔར་འཆགས། །ཅུང་ཟད་འབད་ལས་ཐོབ་པའི་དགེས། །ཀུན་གྱིས་འདི་དོན་རྟོགས་པར་ཤོག ། ཅེས་རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་ཞེས་བྱ་བ་འདི་ནི། རང་གི་སློབ་བུ་རྗེས་དྲུང་སངས་རྒྱས་རྒྱ་མཚོ་དང་དོན་གྲུབ་ཕུན་ཚོགས་གཉིས་ཀྱིས་དགོས་ཚུལ་ལྟར། མཁས་མཆོག་སི་ཏུ་པཎ་ཆེན་དང་ཐམས་ཅད་མཁྱེན་པ་དྷརྨ་བྷ་དྲ་དཔལ་བཟང་པོའི་བཞེད་པ་དང་མཐུན་པར་དབྱངས་ཅན་གྲུབ་པའི་རྡོ་རྗེས་སྦྱར་བའོ།། །།

སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོའི་འགྲེལ་བ་གསལ་བྱེད་ཉི་མའི་འོད་སྣང་བཞུགས་སོ། །

    མཆོད་བརྗོད་དང་རྩོམ་པར་དམ་བཅའ་བ། ཕུལ་བྱུང་མཁྱེན་པའི་ཡེ་ཤེས་ཡོངས་རྫོགས་སྟོན་མཆོག་མཉམ་མེད་ཟླ་ཤེལ་དབང༌། །གཞན་ཕན་བརྩེ་བའི་སྙིང་རྗེའི་བསིལ་ཟེར་མཁའ་ཁྱབ་འགྲོ་ལ་ལེགས་སྙོམས་ཤིང༌། །གང་འདུལ་ཕྲིན་ལས་སྣ་ཚོགས་ཐབས་ཀྱིས་རེ་འབྲས་ཀུ་མུད་ཅིག་ཅར་བཞད། །གསང་གསུམ་ཡོན་ཏན་བྱེ་བའི་མངའ་བདག་གུས་པས་འདུད་དོ་བདག་སྐྱོངས་ཤིག ། རང་སྣང་རིག་པ་གདོད་ནས་ཡོངས་དག་རྒྱལ་ཀུན་ཐུགས་ཀྱི་ཆུ་གཏེར་ཆེ། །ཡོངས་སུ་བསྲུབས་ལས་མཁྱེན་རབ་མཆོག་ཉིད་དམར་སེར་དྷིཿཡིག་ཁམས་སུ་རྩེན། །འཁོར་འདས་ཡེ་དག་ཆོས་དབྱིངས་ཀློང་ན་མཁྱེན་གཉིས་ཡེ་ཤེས་རླབས་ཕྲེང་ངོམ། །བསྔགས་བརྗོད་སྙན་པའི་སྒྲ་བརྒྱ་ལྡིར་བའི་འཇམ་དཔལ་ལྷ་གཅིག་ཕྱག་གི་ཡུལ། །ཚོགས་གཉིས་རྒྱ་མཚོའི་རྦ་རླབས་ཁྲོད་ནས་དམ་ཆོས་ཉི་མ་མཁའ་རུ་ཤར། །མཁའ་ཁྱབ་འགྲོ་བའི་སྡུག་ཀུན་མུན་པ་ཧུབ་ཀྱིས་གཞིབ་པའི་རྩེ་དགའ་ལས། །རྟེན་འབྱུང་དགེ་བའི་ལམ་བཟང་བརྒྱུད་དེ་ཟླ་མེད་གོ་འཕང་མཆོག་གི་སར། །འདྲེན་པའི་དེད་དཔོན་ཁྱེད་ལས་མི་འདུག་སྙིང་གི་དབུས་སུ་ལན་བརྒྱར་བསྙེན། །གངས་རིའི་མུ་ཁྱུད་འཛུམ་པའི་ཞིང་དུ་གཙུག་ལག་ཉི་ཟླའི་དཀྱིལ་འཁོར་ཆེ། །ལེགས་པར་གསལ་བྱེད་ཡི་གེའི་བྱེད་པོ་དཔལ་ལྡན་ཐུ་མི་སམ་བྷོ་ཊས། །  རྨད་བྱུང་རྒྱལ་བསྟན་གསེར་གྱི་སྒྲོན་མེ་བརྒྱ་ཕྲག་ངལ་བས་ལྗོངས་འདིར་དྲངས། །རྨོངས་མུན་བསལ་བའི་བརྗེད་དཀའི་བཀའ་དྲིན་གདོང་དམར་འགྲོ་བའི་སྙིང་ལ་ལྕི། །སྐ་ཅོག་ཞང་སོགས་སྔོན་བྱོན་ལོ་ཙཱ་བརྒྱས། །རྣམ་དཔྱོད་སྤྲིན་སྔོན་དཀྲིགས་པའི་ཁང་བཟང་ལས། །བརྡ་སྤྲོད་གཙུག་ལག་སྙན་པའི་རྔ་གསང་སྒྲ། །ཆོས་སྲིད་ལྷ་ལམ་རྒྱན་དུ་ལན་དགུར་བསྒྲགས། །དམ་པའི་གཞུང་བཟང་སྐབས་གསུམ་ལྷ་ཡི་ཆབ། །བདག་བློའི་ཁྲོན་པར་ཆུ་ཡི་རླན་ཐིགས་ཙམ། །བྱུང་བ་སྐལ་མཉམ་གཞན་ལ་ཕན་སེམས་ཀྱིས། །སྨྲ་འདོད་རོ་འཛིན་གཡོ་ལ་འགལ་བ་ཅི། །གཞུང་ལུགས་རབ་འབྱམས་སྨྲ་བའི་མཁས་པ་མིན། །ལོངས་སྤྱོད་མཛོད་ལ་དབང་བའི་བདག་པོ་མིན། །གྲྭ་རྐྱང་ང་ལ་མཁས་པའི་གྲགས་སྙན་སྟོངས། །དེ་ཕྱིར་སུ་དང་གང་གིས་ཚད་མར་ལྟ། །རབ་འབྱམས་ཤེས་བྱ་རྒྱ་མཚོའི་ཕ་རོལ་ལ། །བགྲོད་བྱེད་བསྟན་བཅོས་རིག་པའི་གྲུ་གཟིངས་ཆེར། །གང་འདོད་ཁ་ལོ་སྒྱུར་བའི་མཐུ་མེད་ཀྱང༌། །བློ་གསལ་བློ་ཡིས་བསྐུལ་བ་མ་བཟློགས་ཙམ། །མང་མང་མཁས་པ་དགྱེས་པའི་གཞུང་མིན་ཡང༌། །དག་དག་ཁུངས་ལྡན་གཞུང་ལ་འགྲེལ་བ་ཙམ། །གསལ་གསལ་ཚིག་གི་བརྗོད་བྱ་ལ་བརྟེན་ནས། །ལྷོད་ལྷོད་སྨྲ་བའི་འབབ་སྟེགས་ཅུང་ཟད་རྐྱོང༌། །དེ་ཡང་སྙན་ངག་མེ་ལོང་ལས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་གསུངས་པ་ལྟར་ཚིགས་སུ་བཅད་པ་ཉུང་ངུའི་ངག་གིས་ལམ་ཡངས་པོར་བྱས་ཏེ་གང་གླེང་བར་བྱ་བ་ནི། འདིར་མཁས་པའི་དབང་པོ་དབྱངས་ཅན་གྲུབ་པའི་རྡོ་རྗེས་མཛད་པའི་བོད་ཀྱི་བརྡ་སྤྲོད་པའི་བྱེ་བྲག་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོ་དང༌། རྟགས་འཇུག་དཀའ་གནད་གསལ་བའི་མེ་ལོང་འདི་གཉིས་དེང་དུས་མཁས་པ་བྱིངས་ལ་གྲགས་ཆེ་ཞིང་ཚད་མར་འཛིན་པ་དང༌། བློ་གྲོས་གསར་བུ་བ་དག་གིས་ཀྱང་བློར་འཛིན་བདེ་བ་ཞིག་ཏུ་གྱུར་ཡོད་པ་ཡིན་ལ། དེ་ཕྱིར་གཞུང་འདི་གཉིས་ལས་དང་པོ་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོ་འདི་ཉིད་འཆད་པར་བྱེད་པ་ལ། ཀླད་དོན། གཞུང་དོན། མཇུག་དོན་གསུམ་ལས།དང་པོ། ཐུ་མིའི་ལེགས་བཤད་སུམ་ཅུ་པའི་སྙིང་པོ་ལྗོན་པའི་དབང་པོ་བཞུགས་སོ། །ཞེས་པ་སྟེ། འཕགས་པ་འཇམ་དཔལ་དབྱངས་ཀྱི་རྣམ་རོལ་ཐུ་མིའི་ཞེས་ཐུ་མི་སཾ་བྷོ་ཊས། བོད་འདིར་བརྡ་སྤྲོད་པའི་བསྟན་བཅོས་ཆེན་པོ་བརྒྱད་མཛད（སུམ་རྟགས་གཉིས་དང༌། ཡི་གེའི་རྣམ་འགྱུར་གྱི་བཟོ། ཀ་མད་སུམ་ཅུར་བསྒྱུར་བ། སྡེབ་སྦྱོར་སྒྲིག་པའི་གཞི་མ། ཐུ་མིའི་མདོ་རྫིའི་སྒྲ་མདོ། སྔགས་ཀྱི་བཀླག་ཐབས་མུན་པའི་སྒྲོན་མེ། ཀླུ་དབང་མགུལ་རྒྱན་བཅས་བརྒྱད་ཡོད་པར་མངོན།）སོགས་ལེགས་པར་བཤད་པའི་གཞུང་རྣམས་ལས། འདིར་སུམ་ཅུ་པའི་གཞུང་ལས་ཉེ་བར་མཁོ་བའི་སྙིང་པོའི་དོན་རྣམས་ཕྱོགས་གཅིག་ཏུ་དྲིལ་བའི་བསྟན་བཅོས་ལྗོན་པའི་དབང་པོ་ཞེས་བྱ་བ་བཞུགས་སོ། །ཞེས་པས་བསྟན་བཅོས་འདི་ལ་དཔེའི་སྒོ་ནས་མིང་བཏགས་པའོ། །གཉིས་པ་གཞུང་དོན་ལ། བསྟན་བཅོས་རྩོམ་པ་ལ་འཇུག་པའི་ཡན་ལག བསྟན་བཅོས་ཀྱི་ལུས་དངོས་བཤད་པ་གཉིས་ལས།
      དང་པོ་ལ། མཆོད་བརྗོད་དང༌། རྩོམ་པར་དམ་བཅའ་བ། དང་པོ་ལ་བསྟན་བཤད་གཉིས་ལས།
      དང་པོ། ན་མོ་གུ་རུ་མཉྫུ་གྷོ་ཥཱ་ཡ། ཞེས་གསུངས་པའི་དོན་ནི། བླ་མ་འཇམ་པའི་དབྱངས་ལ་ཕྱག་འཚལ་ལོ། །ཞེས་པའོ། །གཉིས་པ། བླ་མ་མཆོག་དང་དབྱེར་མེད་པའི། །འཇམ་པའི་དབྱངས་ལ་གུས་བཏུད་ནས། །ཞེས་པ་སྟེ། སངས་རྒྱས་ཀུན་འདུས་ཀྱི་ངོ་བོ་རྩ་བའི་བླ་མ་མཆོག་དང་ངོ་བོ་དབྱེར་མེད་པའི། ངག་གི་ཉེས་པའི་རྩུབ་རེག་དང་བྲལ་ཞིང་འཇམ་པའི་ཡོན་ཏན་དང་ལྡན་པའི་རྒྱལ་བ་ཀུན་ཀྱི་ཐུགས་གཉིས་སུ་མེད་པའི་ཡེ་ཤེས་ཀྱི་ངོ་བོ། གསུང་དབྱངས་ཀྱི་བདག་ཉིད་རྗེ་བཙུན་འཇམ་པའི་དབྱངས་དེ་ཉིད་ལ་སྒོ་གསུམ་གུས་པས་བཏུད་པ་སྔོན་དུ་བཏང་བར་བྱས་པའོ། །ནས་ཞེས་པ་མཚམས་སྦྱོར་ལྷག་བཅས་ཀྱི་སྒྲའོ། །གཉིས་པ། རྩོམ་པར་དམ་བཅའ་བ། ཐུ་མིའི་ལེགས་བཤད་སུམ་ཅུ་པའི། །སྙིང་པོ་མདོར་བསྡུས་བཤད་པར་བྱ། །ཞེས་པ་སྟེ། ལོ་ཙཱ་བ་ཆེན་པོ་ཐུ་མིའི་ཞེས་ཐུ་མི་སཾ་བྷོ་ཊས་སུམ་ཅུ་པ་དང་རྟགས་ཀྱི་འཇུག་པ་གཙོ་བོར་གྱུར་བའི་བསྟན་བཅོས་བརྒྱད་མཛད་པར་གྲགས་པ་ལས་འདིར་ལེགས་པར་བཤད་པ་སུམ་ཅུ་པའི་གཞུང་གི་སྙིང་པོའི་དོན་ནམ་ཉེར་མཁོའི་ཆ་རྣམས་མདོར་བསྡུས་ཏེ་བཤད་པར་བྱའོ་ཞེས་སོ། །
      གཉིས་པ་གཞུང་དོན་བཤད་པ་ལ། སྦྱར་བྱ་ཡི་གེའི་རྣམ་བཞག་བཤད་པ། སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་གཉིས་ལས། དང་པོ། བོད་ཡིག་གི་དབྱངས་གསལ་ངོས་བཟུང་བ། ཁྱད་པར་གྱི་དབྱེ་བ་བསྟན་པ་གཉིས་ལས། དང་པོ། བོད་ཡིག་གི་དབྱངས་གསལ་ངོས་བཟུང་བ། དབྱངས་ཀྱི་བྱ་བ་གསལ་པོ་རུ། །བྱེད་པ་ཨི་ཨུ་ཨེ་ཨོ་བཞི། །གསལ་བྱེད་ཀ་སོགས་སུམ་ཅུ་ཡིན། །ཞེས་པས་བསྟན་ཏེ། ལེགས་སྦྱར་བརྡ་སྤྲོད་པའི་གཞུང་ལ་དབྱངས་བཅུ་དྲུག་དང་གསལ་བྱེད་སོ་བཞི་སོགས་ཡོད་མོད་ཀྱང༌། བོད་འདིར་མིང་ཚིག་བརྗོད་པ་མཐའ་དག་གི་གཞིར་གྱུར་བའི་ཡི་གེ་ལ་དབྱངས་གསལ་གཉིས་ལས། ལེགས་སྦྱར་གྱི་ཨཱ་ལི་སྟེ་དབྱངས་བཅུ་དྲུག་སོགས་དབྱངས་ཀྱི་བྱ་བ་མཐའ་དག་བོད་ཀྱི་སྐད་གདངས་ལ་གསལ་བོ་རུ་མཚོན་པར་བྱེད་ནུས་པའི་ཡི་གེ་ཨི་ཨུ་ཨེ་ཨོ་བཞི་སྟེ། གི་གུ ཞབས་ཀྱུ། འགྲེང་བུ། རྣ་རུ་བཅས་དབྱངས་བཞི་དང༌། ལེགས་སྦྱར་གྱི་ཀཱ་ལི་སྟེ་གསལ་བྱེད་སོ་བཞིའི་བྱ་བ་གསལ་བར་བྱེད་པ་བོད་ཀྱི་སྐད་གདངས་ལ་ཀ་སོགས་གསལ་བྱེད་སུམ་ཅུ་ཡིན་ཏེ། ཀ་ཁ་ག་ང༌། ཅ་ཆ་ཇ་ཉ། ཏ་ཐ་ད་ན། པ་ཕ་བ་མ། ཙ་ཚ་ཛ་ཝ། ཞ་ཟ་འ་ཡ། ར་ལ་ཤ་ས། ཧ་ཨ་སྟེ་ཡིག་འབྲུ་བཞི་བཞི་སྡེ་བ་རེ་བྱས་པས་སྡེ་བ་ཕྱེད་དང་བརྒྱད་དུ་གནས་སོ། །ཕྱེད་དང་བརྒྱད་ནི་སྡེ་བ་ཕྱེད་ལོངས་ཚེ་བརྒྱད་ཡོད་པའི་དོན་ནམ་དོན་དུ་བདུན་དང་ཕྱེད་ཡོད་པའི་དོན་ནོ། །གཉིས་པ་ཁྱད་པར་གྱི་དབྱེ་བ་བསྟན་པ་ལ། རྗེས་འཇུག་བཤད་པ། ཡང་འཇུག་བཤད་པ། སྔོན་འཇུག་བཤད་པ། ཞར་བྱུང་མི་འཇུག་པ་བཤད་པ་སྟེ་བཞི་ལས།
     དང་པོ། རྗེས་འཇུག་བཤད་པ། ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ཞེས་པ་ལྟར། མིང་གཞིའི་ཡི་གེའི་རྗེས་སུ་འཇུག་པའི་ཡི་གེ་ག་ང་ད་ན་བ་མ་འ་ར་ལ་ས་རྣམས་རྗེས་འཇུག་བཅུའམ་མཐའ་རྟེན་གྱི་ཡི་གེ་བཅུ་ནི། མིང་གཞིའི་ཡི་གེ་ཐམས་ཅད་ལ་ཁྱབ་མཉམ་དུ་འཇུག་པའོ། །སྦྱོར་ཚུལ་ནི་དཔེར་ན། བདག མཐོང༌། བཀོད། ཡིན། བཏབ། གསུམ། དགའ། སྦྱར། གསལ། དགོས་ལྟ་བུའོ། ། 
     གཉིས་པ། ཡང་འཇུག་བཤད་པ། ད་དང་ས་གཉིས་ཡང་འཇུག་སྟེ། ། ད་ནི་ན་ར་ལ་གསུམ་དང༌། ། ས་ནི་ག་ང་བ་མར་འཐོབ། །ཅེས་པ་སྟེ། རྗེས་འཇུག་བཅུ་པོ་དེ་ལས་ད་དང་ས་གཉིས་པོ་ནི་རྗེས་འཇུག་ཡིན་པར་མ་ཟད་རྗེས་འཇུག་གི་རྗེས་སུའང་འཇུག་པས་ཡང་འཇུག་སྟེ། ཡང་འཇུག་དེ་གཉིས་འཇུག་ཡུལ་གང་ལ་འཇུག་ཅེ་ན། ཡང་འཇུག་ད་ནི་རྗེས་འཇུག་ན་ར་ལ་གསུམ་དང༌། ཡང་འཇུག་ས་ནི་རྗེས་འཇུག་ག་ང་བ་མར་བཅས་ཀྱི་མཐར་འཐོབ་པ་ཡིན་ནོ། །དཔེར་ན། ཕྱིནད། གྱུརད། རོལད་ལྟ་བུ་དང༌། འཁྲིགས། དགོངས། ཐབས། གདམས་ལྟ་བུ་མང་དུ་སྦྱར་བར་བྱའོ། །
     གསུམ་པ། སྔོན་འཇུག་བཤད་པ། ག་ད་བ་མ་འ་སྔོན་འཇུག །ཅེས་པ་སྟེ། གོང་གི་རྗེས་འཇུག་བཅུ་པོ་རྣམས་ལས་ག་ད་བ་མ་འ་བཅས་ནི་རྗེས་འཇུག་ཡིན་པར་མ་ཟད། ཡི་གེ་རྣམས་ཀྱི་སྔོན་དུའང་འཇུག་པས་སྔོན་འཇུག་ལྔ་ཞེས་བརྗོད་དོ། །སྔོན་འཇུག་དེ་དག་གི་འཇུག་ཚུལ་ནི་འོག་ཏུ་རྟགས་འཇུག་དཀའ་གནད་གསལ་མེའི་འགྲེལ་བའི་གཞུང་ལས་རྒྱས་པར་འཆད་དོ། །
     བཞི་པ། ཞར་བྱུང་མི་འཇུག་པ་བཤད་པ། སྔོན་རྗེས་གང་དུའང་མི་འཇུག་པའི་ཡི་གེ་ཉི་ཤུ་སྟེ། ཀ་ཁ་ཅ་ཆ་ཇ་ཉ་ཏ་ཐ་པ་ཕ་ཙ་ཚ་ཛ་ཝ་ཞ་ཟ་ཡ་ཤ་ཧ་ཨ་བཅས་ལ་མི་འཇུག་པ་ཉི་ཤུ་ཞེས་བརྗོད་དོ། །སྤྱིར་མིང་གཞི་ལ་གསུམ་སྟེ། མིང་ཚིག་བརྗོད་པ་ཀུན་ཀྱི་གཞིར་གྱུར་པའི་མིང་གཞི་དབྱངས་གསལ་སོ་བཞི་དང༌། རྗེས་འཇུག་འཇུག་རུང་གི་མིང་གཞི་གསལ་བྱེད་སུམ་ཅུ་དང༌། སྔོན་རྗེས་མིང་གསུམ་ལས་མིང་གཞི་ནི་མི་འཇུག་པ་ཉི་ཤུ་བཅས་དབྱེ་བ་ཡོད་པའང་རྟོགས་པར་བྱེད་དགོས་སོ། །གཉིས་པ་སྦྱོར་ཚུལ་ཚིག་ཕྲད་ཀྱི་འཇུག་པ་བཤད་པ་ལ། རྗེས་འཇུག་ལ་ལྟོས་དགོས་པའི་ཕྲད་རྣམ་དབྱེ་དང་བཅས་པ་བཤད་པ་དང༌། ཕྲད་རང་དབང་ཅན་བཤད་པ་གཉིས་ལས། དང་པོ་ལ། སླར་བསྡུ། ལ་དོན། ཨི་ལྡན། རྒྱན་སྡུད། ལྷག་བཅས། འབྱེད་སྡུད། འབྱུང་ཁུངས། བོད་སྒྲ་བཅས་བརྒྱད་ལས། དང་པོ། སླར་བསྡུ་བཤད་པ། གོ་ངོ་དོ་ནོ་བོ་མོ་འོ། །རོ་ལོ་སོ་ཏོ་སླར་བསྡུ་སྟེ། །རྫོགས་ཚིག་ཟླ་སྡུད་ཅེས་ཀྱང་བྱ། །དྲག་ཡོད་ཏོ་དང་མཐའ་མེད་འོ། །གཞན་རྣམས་མིང་མཐའི་རྗེས་མཐུན་སྦྱར། །ཞེས་པས་བསྟན་ཏེ། རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་སྟེ་བཅུ་པོ་རྣམས་ལ། རྣ་རུ་རེ་སྦྱར་བ་ན་གོ་ངོ་དོ་ནོ་བོ་མོ་འོ་རོ་ལོ་སོ་བཅས་དང༌། ད་དྲག་ཅན་གྱི་མཐར་འཇུག་པའི་ཏོ་བཅས་བཅུ་གཅིག་པོ་མིང་ཚིག་སོགས་ཀྱི་མཐར་སྦྱར་ཚེ་དེ་ལ་སླར་བསྡུ་ཞེས་བྱ་སྟེ། མིང་ཚིག་བརྗོད་པ་གང་གི་མཐར་སྦྱར་ཡང་སླར་རང་གི་ཚིག་གྲོགས་འབྱུང་བ་བསྡུ་བའམ་མི་འབྱུང་བར་བྱས་པས་དེ་སྐད་ཅེས་བརྗོད་པ་དང༌། སྐབས་བབ་ཀྱི་དོན་དེ་རྫོགས་པར་སྟོན་པས་ན་རྫོགས་ཚིག་ཏུ་གྲགས་པ་དང༌། རང་གི་མཇུག་ཐོགས་ཀྱི་ཚིག་གི་ཟླ་བོ་གཞན་མི་འབྱུང་བར་བྱས་པས་ན་སྨྲ་སྒོ་ལས་ཟླ་སྡུད་ཅེས་ཀྱང་བྱའོ། །འདི་རྗེས་འཇུག་ལ་ལྟོས་པའི་ཕྲད་ཡིན་ལ་རྣམ་དབྱེ་མ་ཡིན་པ་ཡིན་ནོ། །ཕྲད་འདིའི་སྒྲ་སྦྱོར་ནི་ད་དྲག་ཡོད་པའི་མཐར་ཏོ་འཐོབ་པ་དང༌། མཐའ་རྟེན་མེད་པ་དག་གི་རྗེས་སུ་འོ་ཉིད་སྦྱར་བར་བྱ་ཞིང༌། ཕྲད་གཞན་རྣམས་ནི་མིང་ཚིག་གང་ཡང་རུང་བའི་མཐའི་རྗེས་འཇུག་གི་ཡི་གེ་གང་ཡིན་པ་དེ་དང་མཐུན་པར་སྦྱར་དགོས་པ་ཡིན་ནོ། །དཔེར་ན། སྙན་པའི་ངག་གོ ། ཤིན་ཏུ་བཟང་ངོ་། །དེ་རུ་ཡོད་དོ། །བདེན་པ་ཡིན་ནོ། །བགོ་སྐལ་འཐོབ་བོ། །ཡང་དག་པའི་ལམ་མོ། །འདི་ནི་བླ་རུང་ཆོས་གྲྭའོ། །ལྷ་སྐུ་འདི་ནི་གསེར་རོ། །སྐྱིད་པའི་ཞིང་ས་ནི་བདག་གི་ཕ་ཡུལ་ལོ། །ཞིབ་ཏུ་བརྟགས་སོ། །བཀའ་བསྩལད་ཏོ་ལྟ་བུའོ། །སྐབས་འདིར་སླར་བསྡུ་ཞེས་པ་ནི་གཙོ་བོ་མིང་ཚིག་བརྗོད་པ་གང་རུང་གི་མཐའི་རྗེས་འཇུག་རང་དང་འདྲ་བའི་མཐར་སྦྱར་བ་ཡིན་ན་རྫོགས་ཚིག་ཏུ་འགྱུར་བ་ལས་གོ་སོགས་ཡིག་འབྲུ་བཅུ་གཅིག་པོ་ཡིན་ན་སླར་བསྡུའི་ཕྲད་ཡིན་པས་ཁྱབ་བམ་ཞེ་ན་མ་ཁྱབ་སྟེ། དཔེར་ན་བྱ་ཚིག་ལ་འཇུག་པ། དོན་རྟོགས་པའི་གོ་དང༌། མིང་ལ་འཇུག་པ། གདོང་གི་ངོ༌། གྲངས་ལ་འཇུག་པ་དོ། ཕོ་མོ་གཉིས་ཀྱི་མོ། ཤི་ཟིན་པའི་རོ། ལོ་གྲངས་ཀྱི་ལོ། ཁའི་སོ་སོགས་སླར་བསྡུའི་ཕྲད་མ་ཡིན་པ་དང༌། བྱེད་པ་པོ། ཚོར་བ་པོ། བཙུན་མོ། བུ་མོ་སོགས་ཀྱང་སླར་བསྡུའི་ཕྲད་མིན་པ་ཤེས་དགོས། སླར་བསྡུའི་ཕྲད་རྣམས་དོན་ཅི་འདྲ་ཞིག་སྟོན་བྱེད་དུ་འཇུག་ཅེ་ན། སྤྱིར་བོད་ཀྱི་བརྗོད་པ་ཇི་སྙེད་པ་ནི་ཆོས་ཆོས་ཅན་བརྗོད་ཀྱི་མིང་དང༌། བྱ་ཚིག་ཕྲད་རྣམ་དབྱེ་བཅས་གྲུབ་ཆ་གསུམ་ལས་གྲུབ་པ་ཞིག་ཡིན་ལ། དེ་གསུམ་གྱི་མཐར་སླར་བསྡུའི་ཕྲད་འཇུག་པ་ཡིན་ནོ། །སྤྱིར་སླར་བསྡུ་ལ་དངོས་དང་ཙམ་པོ་བའི་ཁྱད་པར་དང་རྣམ་དབྱེ་དང་པོའི་དོན་དུ་བཤད་པ་དག་ཀྱང་འཐད་པར་མ་མཐོང་སྟེ། འོན་ཀྱང་འདིར་བློ་གྲོས་གསར་བུ་བ་དག་འཇུག་བདེ་བའི་ཕྱིར་ཚིག་འགྲེལ་ཙམ་ལས། གཞན་གྱི་འདོད་པ་སོགས་བཀོད་དེ་དགག་བཞག་གི་སྤྲོས་པ་ཆེར་མི་བྱའོ། །འདིར་ཞར་བྱུང་དུ་རྣམ་དབྱེ་དང་པོ་ཤེས་དགོས་ཏེ། དེ་ནི་ཆོས་རང་རང་གི་ངོ་བོ་དེ་གཞན་དང་མ་འདྲེས་པར་རྣམ་པར་དབྱེ་ཞིང་དོན་གྱི་ངོ་བོ་ཙམ་སྟོན་པ་ཞིག་ལ་རྣམ་དབྱེ་དང་པོ་ཞེས་བྱ་སྟེ། དཔེར་ན། ས་གཞི། ནམ་མཁའ། རི་བོ། ལྗོན་ཤིང༌། རྒྱལ་ཁབ། གཞུང་ལམ། བོད་ལྗོངས་སོགས་མིང་ཙམ་ལས་ལོགས་སུ་མེད། དཔེར་ན་བུམ་པ་ཞེས་བརྗོད་པའི་སྒྲ་དེ་ལས་གཞན་ས་ཆུ་མེ་རླུང་ལྗོན་ཤིང་སོགས་ཀྱི་མིང་གང་ལའང་མ་འདྲེས་པར་སོ་སོར་འབྱེད་པའི་ནུས་པ་ཞིག་ཡོད་པ་དེ་ལ་རྣམ་དབྱེ་དང་པོ་མིང་ཙམ་བརྗོད་པ་ཞེས་བྱའོ། །
གཉིས་པ་ལ་དོན་བཤད་པ་ལ། ངོ་བོ་ངོས་བཟུང་བ། དོན་གྱི་འཇུག་ཚུལ། སྒྲ་ཡི་འཇུག་ཚུལ་བཤད་པ་གསུམ་ལས།
       དང་པོ། སུ་ར་རུ་དུ་ན་ལ་ཏུ། །ལ་དོན་རྣམ་པ་བདུན་ཡིན་ཏེ། །ཞེས་པ་སྟེ། རྗེས་འཇུག་ལ་ལྟོས་དགོས་པའི་ཕྲད་དང་རྣམ་དབྱེ་གཉིས་ཀ་ཡིན་པའི། སུ་ར་རུ་དུ་ན་ལ་ཏུ་བཅས་ལ་དོན་གྱི་རྐྱེན་ལ་རྣམ་པ་བདུན་དུ་གྲངས་ངེས་པ་ཡིན་ཏེ། དེ་ལ་ལ་དོན་ཞེས་བརྗོད་དོན་ནི། ལ་སྒྲ་དེ་ལས་སུ་བྱ་བ་སོགས་དོན་ལྔ་བོ་ཕལ་ཆེར་ལ་སུ་སོགས་ལ་དོན་གཞན་དྲུག་པོ་དང་འཇུག་པ་མཚུངས་པ་དང༌། དངོས་བསྟན་དུ་ལ་སོགས་པ་དྲུག་པོའི་ཐ་མ་ལ་ཡིག་ཡིན་པས། དེ་བཟུང་ནས་ཐམས་ཅད་ལ་ལ་སྒྲ་ཞེས་པའི་མིང་གིས་བཏགས་པ་ཡིན་ཏེ། དཔེར་ན་གསལ་བྱེད་སུམ་ཅུའི་ཐོག་མ་ཀ་ཡིན་པས་ཀ་མད་སུམ་ཅུ་ཞེས་བཏགས་པ་ལྟ་བུའོ། །དེ་ལའང་ལ་དོན་བདུན་པོ་ནང་ཕན་ཚུན་སྦྱོར་བདེ་མིན་གྱི་ཁྱད་པར་མང་དུ་ཡོད་དེ། དཔེར་ན། རྣམ་དབྱེ་གཉིས་པའི། གཟུགས་ལ་ལྟ། དྲི་ལ་སྣོམ། ལྷ་ལ་ཕྱག་འཚལ། ཁྱོད་ལ་སྟེར་སོགས་ལ་ལ་ཡིག་སྦྱོར་རུང་བ་ལས། གཟུགས་སུ་ལྟ། དྲི་ན་སྣོམ། ལྷ་ན་ཕྱག་འཚལ། ཁྱོད་དུ་སྟེར་སོགས་སྦྱོར་མི་བདེ། དེ་བཞིན་བཞི་བར་ཤིང་གཅོད་དུ་སྟ་རེ་ཉོ། ལྟོ་འགྲངས་སུ་ཟས་ཟ་ལྟ་བུ་ལ་ན་ཡིག་སྦྱོར་མི་བདེ། བདུན་པར་ཤར་ན་ཤིང་ཡོད་དང༌། ལྷོ་ན་ཆུ་ཡོད་ལྟ་བུ་ལ་ལ་ཡིག་སྦྱོར་མི་བདེ། དེ་ཉིད་ལ་ཤིན་ཏུ་བཟང༌། ལྷག་པར་མཛེས་སོགས་ལ་ལ་ཡིག་སྦྱོར་མི་བདེ། ཚེ་སྐབས་ལ་རྟག་ཏུ་བརྩོན། ཉི་མ་ཤར་བ་ན་འགྲོ་སོགས་ལ་ལ་ཡིག་སྦྱོར་མི་བདེ་བ་སོགས་ཀྱི་ཁྱད་པར་མང་དུ་ཡོད་པ་དག་ཀྱང་གསལ་བོར་ཤེས་པར་བྱའོ། །
      གཉིས་པ་དོན་གྱི་འཇུག་ཚུལ། རྣམ་དབྱེ་གཉིས་བཞི་བདུན་པ་དང༌། ། དེ་ཉིད་ཚེ་སྐབས་རྣམས་ལ་འཇུག །ཅེས་པ་སྟེ། ལ་དོན་རྣམས་དོན་ལྔ་ལ་འཇུག་པར་བཤད་པ་སྟེ། རྣམ་དབྱེ་གཉིས་པ་ལས་སུ་བྱ་བ་དང༌། བཞི་པ་དགོས་ཆེད། བདུན་པ་གནས་གཞིའམ་རྟེན་གནས་དང་དེ་ཉིད། ཚེ་སྐབས་རྣམས་ལ་འཇུག་གོ ། དང་པོ། གཉིས་པ་ལས་སུ་བྱ་བ་ནི། སྐབས་འདིར་སྤྱིར་རྣམ་དབྱེ་ཞེས་པའི་གོ་དོན་ངེས་དགོས་ཏེ། ཆོས་གང་ཡང་རུང་བ་ཞིག་གི་མིང་ཚིག་དེ་གཞན་དང་མ་འདྲེས་པར་སོ་སོར་དབྱེ་ཞིང་འབྱེད་ནུས་པའི་སྒྲའི་ཆ་ཤས་སུ་གྱུར་པའི་ཚིག་ཕྲད་ཅིག་ལ་རྣམ་དབྱེ་ཞེས་བྱའོ། །དེ་ལས་རྣམ་དབྱེ་གཉིས་པ་ནི་བྱེད་པ་པོ་གང་གིས་བྱ་བའི་ཡུལ་ཞིག་ལ་བྱ་བ་བྱས་པ་ཙམ་སྟོན་པ་དང༌། བྱ་བའི་ཡུལ་གཙོ་བོར་སྟོན་པ་ཞིག་དགོས་ལ། འདི་ལ། བྱ་ཡུལ་དང༌། བྱེད་པོ། དེས་བྱས་པའི་བྱ་བ་སྟེ་གསུམ་ཚང་དགོས་པ་ཡིན། དེ་ཡང་བྱེད་པོ་དངོས་ཤུགས་གང་རུང་དུ་བསྟན་པ་ཞིག་སྟེ། དཔེར་ན། བྲམ་ཟེ་དབེན་གནས་སུ་གཤེགས། ལྷ་ལྡན་དུ་བཏང༌། ལྟ་བུའི་བྱེད་པོ་དངོས་བསྟན་དང་ཤུགས་བསྟན་གཉིས་འབྱུང༌། བྱ་ཡུལ་དབེན་རི་དང་ལྷ་ལྡན། བྱེད་པོ་བྲམ་ཟེ་དངོས་བསྟན་དང་གཞན་ཤུགས་བསྟན། བྱ་བ་གཤེགས་པ་དང་བཏང་བ་སྟེ་གསུམ་ག་ཚང་བ་ཡིན་ནོ། །གཉིས་པ། བཞི་བ་དགོས་ཆེད། བྱེད་པ་པོ་གང་གིས་བྱ་བ་བྱེད་པའི་ཚེ།  བྱ་བ་དེ་བྱ་བའི་ཡུལ་དེའམ་དེ་དང་འབྲེལ་བའི་ལས་ལ་ཕན་པའམ། གཙོ་བོ་བྱ་བའི་དོན་གྱི་ཡུལ་ལ་ཕན་འདོགས་པར་སྟོན་པ་ཞིག་དགོས་ཏེ། དཔེར་ན། ལྟད་མོ་ལྟ་བར་ཕེབས་སྐབས་སྐུ་ལ་ངལ་བ་མ་བྱུང་ངམ། མཛེས་པའི་ཕྱིར་དུ་རྒྱན་གྱིས་བརྒྱན། ཁྱེད་ལ་ན་བཟའ་ཉོས། ལྟ་བུར་མཚོན་ན་ལྟད་མོ་ལྟ་བ་དང་མཛེས་པའི་ཕྱིར་དང་ཁྱེད་གསུམ་པོ་དེ་བྱ་བའི་དོན་གྱི་ཡུལ་དང༌། ར་དུ་ལ་གསུམ་རྣམ་དབྱེ་བཞི་པའི་རྐྱེན། ཕེབས་དང་རྒྱན་ཉོས་གསུམ་བྱ་བ་ཡིན་པ་ལྟ་བུའི་བྱ་བའི་ཡུལ་ལ་ཕན་ཐོགས་པ་དང༌། གཞན་ལ་ཕན་ཐབས་སུ་ཧུར་བརྩོན་བྱེད་དགོས། ཤིང་གཅོད་དུ་སྟ་རེ་བརྡར། རི་དྭགས་བདའ་རུ་རི་མགོར་སོང༌། ལྟ་བུར་མཚོན་ན་གོང་དང་མི་འདྲ་བར། ཕན་པ་སྒྲུབ་པ་དང་གཅོད་པ་བདའ་བ་གསུམ་ནི་བྱ་བའི་དོན་གྱི་ཡུལ་ཡིན་པ་ལས། གཞན་ཤིང་རི་དྭགས་རྣམས་དོན་གྱི་ཡུལ་མིན་པས་འདི་རིགས་ལ་ཡུལ་དེ་དང་འབྲེལ་བའི་ལས་ལ་ཕན་འདོགས་པར་དངོས་སུ་བསྟན་པ་ལྟ་བུའོ། །གཞན་ཆེད་ཕྱིར་སླད་དོན་སོགས་དགོས་པ་གསལ་བྱེད་ཀྱི་སྒྲ་དངོས་སུ་ཡོད་པ་རྣམས་ལྷག་པར་བཞི་བ་ཡིན་པར་གསལ། རྣམ་དབྱེ་གཉིས་པ་དང་བཞི་བའི་ཁྱད་པར་བྱ་བ་བྱས་པ་ཙམ་འདྲ་ན་ཡང༌། བྱ་བའི་དོན་གྱི་ཡུལ་ཚིག་ཟིན་དུ་དངོས་སུ་ཡོད་མེད་ཇི་ལྟར་ཡང་ཡུལ་དང་དེ་འབྲེལ་ལས་ལ་ཕན་དངོས་སུ་འདོགས་པར་དངོས་ཤུགས་གང་རུང་དུ་བསྟན་པ་ལྟ་བུ་བཞི་པ་དང༌། བྱ་ཡུལ་གསལ་བར་བསྟན་ནས་དེ་ལ་ཕར་བྱ་བ་བྱས་ཙམ་ལས་གཞན་མི་སྟོན་པ་གཉིས་པའོ། །གཉིས་པ་དང་བཞི་བ་ཡིན་མིན་གཙོ་བོ་དགོས་པ་གསལ་མི་གསལ་གྱི་ཆ་ནས་གསལ་བ་དགོས་ཆེད་དང༌། མི་གསལ་བ་གཉིས་པ་ཡིན། དཔེར་ན། རྟ་ལ་དུག་སྦྱིན་དང་ལམ་དུ་འགྲོ་ལྟ་བུ་གཉིས་ནི་ཅིག་ཤོས་གསོད་པའི་ཆེད་ཡིན་པ་གསལ་བ་དང༌། ཅིག་ཤོས་གང་དུ་འགྲོ་བ་དང་དོན་ཅི་ཡིན་པ་མི་གསལ་བ་ལྟ་བུའོ། །འདི་ལྟར་ཁྱད་པར་བྱས་ན་ཚིག་དོན་གཉིས་ཕན་ཚུན་མི་འཆོལ་ཞིང་དོན་གྱི་གོ་བ་ལེན་ཕྱོགས་ལའང་འཐད་པར་སྣང་ངོ༌། །ཡང་བྱ་བའི་དོན་གྱི་ཡུལ་དངོས་སུ་ཚིག་ཟིན་ལ་མི་གསལ་བ། ཞིང་ལ་ཆུ་འདྲེན་ལྟ་བུའི་བྱ་བའི་དོན་གྱི་ཡུལ་ལོ་ཏོག་རྒྱས་པ་ཡིན་ཡང་དངོས་སུ་མི་གསལ་བ་ལྟ་བུ་ནི། དེ་འབྲེལ་ལས་ལ་ཕན་ཐོགས་པའོ། །རྣམ་དབྱེ་བཞི་པའི་རྐྱེན་ཡིན་ན་བྱ་ཚིག་གཉིས་ཀྱི་བར་དུ་སྦྱོར་དགོས་ཞེས་བཤད་པ་ཡོད་ཀྱང་དེར་ངེས་པ་མེད་དེ། སྐབས་འགར་སློང་མོ་བ་ལ་ཟས་སྦྱིན་ལྟ་བུ་མིང་གི་མཐར་སྦྱར་བའང་མང་དུ་འབྱུང་བ་ཡིན་ནོ། །