ཐོན་མིའི་ལེགས་བཤད་སུམ་ཅུ་བའི་སྙིང་པོ་ལེགས་བཤད་ལྗོན་པའི་དབང་པོ་བཞུགས་སོ། །
རྩོམ་པ་པོ།：རྨེ་གྲྭ ཚེ་རིང་བསམ་འགྲུབ།
ཡོང་ཁུངས།：མཚོ་སྔོན་པོ་དྲ་བ།
དུས་ཚོད།：2014-03-11
ཀློག་གྲངས།：
གཉིས་པ། དུས་གསུམ་ལ་བས་འཕུལ་ཅན་འཇུག་པ་བྱེ་བྲག་ཏུ་བཤད་པ།
གཞན་ཡང་བས་འཕུལ་ཅན་ཕལ་ཆེར། །བྱེད་པ་པོ་ནི་ད་ལྟ་དང༌། །བྱ་ཡུལ་མ་འོངས་པར་བསྡུས་ནས། །འདས་ལ་བས་འཕུལ་ཡང་འཇུག་ཡོད། །ད་ལྟ་བ་ལ་གཉིས་ཀ་མེད། །མ་འོངས་འཕུལ་ཡོད་ཡང་འཇུག་མེད། །བསྐུལ་ཚིག་འཕུལ་མེད་ཡང་འཇུག་ཡོད། །སྐབས་འགར་འདས་དང་བསྐུལ་ཚིག་ལ། །ས་རྐྱང་སྦྱར་བས་འཐུས་པའང་ཡོད། །ཅེས་པ་ལྟར། གཞན་ཡང་བྱ་བྱེད་ཐ་དད་པའི་ལས་ཚིག་བས་འཕུལ་ཅན་ཕལ་ཆེར་དུས་གསུམ་གྱི་ནང་དུ་བསྡུས་ནས་རྗོད་སྐབས། བྱེད་པ་པོའམ་བྱེད་པ་ནི་དུས་ད་ལྟ་བར་བསྡུ་བ་དང༌། བྱ་བའི་ཡུལ་ལམ་ལས་དེ་དུས་མ་འོངས་པར་བསྡུས་ནས། འདས་པ་ལ་དཔེར་ན། སྲོག་བསྐྱབས་པར་བྱས། བྱ་བ་བསྒྲུབས་པར་བྱས། གྲི་བརྡརད་བར་བྱས། དགྲ་བརླགས་པར་བྱས། ལྟ་བུ་རྣམས་ལ་བས་འཕུལ་དང་ཡང་འཇུག་གཉིས་ཀ་ཡོད་པ་ཡིན་ལ། ད་ལྟ་བ་ལ་དཔེར་ན། སྲོག་སྐྱོབ་བཞིན་པ། བྱ་བ་སྒྲུབ་བཞིན་པ། གྲི་རྡར་བཞིན་པ། དགྲ་རློག་བཞིན་པ། ལྟ་བུ་རྣམས་ལ་སྔོན་འཇུག་དང་ཡང་འཇུག་གཉིས་ཀ་མེད་པ་ཡིན། མ་འོངས་པ་དཔེར་ན། སྲོག་བསྐྱབ་པར་བྱ། བྱ་བ་བསྒྲུབ་པར་བྱ། གྲི་བརྡར་བར་བྱ། ལྟ་བུ་རྣམས་ལ་བས་འཕུལ་ཡོད་ཅིང་ཡང་འཇུག་མེད། ཡང་སྐུལ་ཚིག་ལ་དཔེར་ན། སྲོག་སྐྱོབས་ཤིག བྱ་བ་སྒྲུབས་ཤིག དགྲ་རློགས་ཤིག ལྟ་བུ་རྣམས་ལ་འཕུལ་མེད་ཅིང་ཡང་འཇུག་ཡོད་པ་དང༌། སྐབས་འགར་འདས་པ་དང་སྐུལ་ཚིག་ལའང་དཔེར་ན། ཤིང་གས། ཕྱོགས་གཉིས་སུ་གྱེས། ལོ་ན་རྒས། ཅ་ལག་ཉོས། བྱ་བ་བྱས། ལྟ་བུ། སྐུལ་ཚིག་ལ། མེ་ཏོག་ཐུས་ཤིག སྐད་ཆ་དྲིས་ཤིག དབང་དུ་སྡུས་ཤིག ཟན་སྣོས་ཤིག ལྟ་བུ་རྣམས་ལ་ས་རྐྱང་སྦྱར་བས་འཐུས་པའམ་ཆོག་པའང་ཡོད་དོ། །ཞེས་པ་ལྟར་ཐ་དད་པའི་ལས་ཚིག་ལ། བྱེ་བྲག་བས་འཕུལ་གྱི་མགོ་ཅན་སྐབས་སམ་དུས་གསུམ་བྱེ་བྲག་པ་ཙམ་གྱི་དབང་དུ་བྱས་ནས་བཤད་པ་ཡིན་པའི་ཁྱད་པར་ཤེས་དགོས་པ་ལས། སྤྱིར་ཐ་དད་པའི་ལས་ཚིག་རྣམས་ཀྱི་འཕུལ་རྟེན་འདི་བཞིན་སྦྱར་དགོས་པ་དང་འཐོབ་པའི་ངེས་པ་མེད་པ་དེ་རྟོགས་པར་སླའོ། །གཉིས་པ། རྗེས་འཇུག་གི་རྟགས་ཀྱི་འཇུག་པ་བཤད་པ་ལ། རྗེས་འཇུག་གི་རྟགས་ཀྱི་དབྱེ་བ་བཤད་པ། དེའི་འཇུག་ཚུལ་བཤད་པ་གཉིས་ལས།དང་པོ། རྗེས་འཇུག་གི་རྟགས་ཀྱི་དབྱེ་བ་བཤད་པ། རྗེས་འཇུག་ཡི་གེ་བཅུ་པོ་ཡི། །ག་ད་བ་ས་བཞི་རྣམས་ཕོ། །ང་མ་འ་གསུམ་མོ་ཡིན་ཅིང༌། །ན་ར་ལ་གསུམ་མ་ནིང་སྟེ། །ཞེས་པ་ལྟར། རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་བཅས་བཅུ་པོ་ཡི་ནང་ནས་ནང་གསེས་དབྱེ་ན། ག་ད་བ་ས་བཞི་རྣམས་ཕོ་ཡི་ཡི་གེ་དང༌། ང་མ་འ་གསུམ་པོ་མོ་ཡིན་ཞིང༌། ན་ར་ལ་གསུམ་མ་ནིང་གི་ཡི་གེ་སྟེ། དེ་ལྟར་དབྱེ་དགོས་པའི་རྒྱུ་མཚན་ཡང་རྗེས་འཇུག་རྣམས་རང་རང་གི་འཇུག་ཡུལ་མིང་གཞིའི་ཡི་གེ་རྣམས་ལ། སྦྱར་ནས་ཀློག་སྐབས་སྒྲ་ཤུགས་ཆེ་ཆུང་གི་དབང་གིས་དེ་ལྟར་བཞག་པར་བྱས་སོ། །གཉིས་པ། རྗེས་འཇུག་གི་ཡི་གེ་རྣམས་གང་ལ་འཇུག་པ། གང་གིས་འཇུག་པ། ཇི་ལྟར་འཇུག་པ། ཅི་ཕྱིར་འཇུག་པ་བཞི་ལས། དང་པོ། རྗེས་འཇུག་གི་ཡི་གེ་གང་གིས་འཇུག་པ་དང་མིང་གཞི་གང་ལ་འཇུག་པ་བཤད་པ། མིང་གཞིའི་ཡི་གེ་ཀུན་ལ་འཇུག ། ཅེས་པ་ལྟར། གང་གིས་འཇུག་ན་རྗེས་འཇུག་གི་ཡི་གེ་བཅུ་པོ་དེས་འཇུག་པ་དང༌། གང་ལ་འཇུག་ན་མིང་གཞའི་ཡི་གེ་ཀུན་ལ་འཇུག་པའམ་གསལ་བྱེད་སུམ་ཅུ་ཐམས་ཅད་ལ་འཇུག་པའོ། །
གསུམ་པ། རྗེས་འཇུག་རྣམས་སྒྲ་དྲག་ཞན་སོགས་ཇི་ལྟར་འཇུག་པར་བཤད་པ་ལ། སྒྲ་ཡི་འཇུག་ཚུལ་དང༌། དོན་གྱི་འཇུག་ཚུལ་གཉིས་ལས།
དང་པོ། སྒྲའི་འཇུག་ཚུལ། ཇི་ལྟར་འཇུག་ཚུལ་གཉིས་ཡིན་ཏེ། །དང་པོ་སྒྲ་ཡི་འཇུག་ཚུལ་ནི། །ཕོ་ཡི་ག་ཡིག་ཡང་འཇུག་ཅན། །སྐྱེས་བུ་རབ་དང་ཕོ་ཡིག་བ། །ཡང་འཇུག་ཅན་ནི་སྐྱེས་བུ་འབྲིང༌། །ག་བ་ཡང་འཇུག་མེད་པ་དང༌། །ད་སའི་མཐའ་ཅན་ཐ་མ་སྟེ། །དྲག་པ་ཕོ་ལའང་ནང་གསེས་ཀྱིས། །དྲག་ཞན་བར་མ་གསུམ་དུ་དབྱེ། །དེ་བཞིན་ཞན་པ་མོ་ལ་ཡང༌། །ནང་གསེས་དྲག་ཞན་གཉིས་དབྱེ་སྟེ། །ང་མ་ཡང་འཇུག་ཅན་མོ་དང༌། །ང་མ་ཡང་འཇུག་མེད་པ་དང༌། །འ་མཐའ་ཅན་རྣམས་ཤིན་ཏུ་མོ། །བར་མ་མ་ནིང་ན་ར་ལ། །ཡང་འཇུག་ཡོད་དམ་མེད་ཀྱང་རུང༌། །མིང་གཞི་ཕོ་ཡིག་མཐར་ཡོད་དང༌། །མིང་གཞི་མ་ནིང་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་དང་ཕྲད་པས་དྲག་པར་འགྱུར། །མིང་གཞི་མོ་ཡིག་རྗེས་སུ་ནི། །ཡང་འཇུག་མེད་པར་ཞུགས་པ་ན། །ཞན་དང་ཕྲད་པས་ཞན་པར་འགྱུར། །དེ་གཉིས་འགྱུར་བ་མ་ནིང་ཡིན། །མིང་གཞི་མོ་ཡིག་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་ཞན་གཉིས་ཀའི་ཆ་ལྡན་ཕྱིར། །མཚན་གཉིས་མ་ནིང་ཞེས་སུ་གྲགས། །མིང་གཞི་མ་ནིང་རྗེས་སུ་ནི། །ཡང་འཇུག་མེད་པར་ཞུགས་པ་ན། །དྲག་ཞན་གང་དུའང་མི་འགྱུར་བས། །མཚན་མེད་མ་ནིང་ཞེས་སུ་འདོད། །ཅེས་པ་ལྟར། ཇི་ལྟར་འཇུག་པའི་ཚུལ་བཤད་པ་ལ་རྣམ་པ་གཉིས་ཡིན་ཏེ། དེ་ལ་དང་པོ་རྗེས་འཇུག་རྣམས་ཀྱི་སྒྲ་ཡི་འཇུག་ཚུལ་བཤད་པ་ནི། རྗེས་འཇུག་རྣམས་ལ་ཕོ་མོ་མ་ནིང་གསུམ་དུ་དབྱེ་ཚུལ་གོང་དུ་བསྟན་ཟིན་པ་ལྟར་ལ། འདིར་ནང་གསེས་བརྒྱད་དུ་དབྱེ་བར་བྱེད་པ་ལ། རྗེས་འཇུག་ཕོ་ཡི་ག་ཡིག་ཡང་འཇུག་ཅན་ནམ་རྗེས་འཇུག་ག་ལ་ཡང་འཇུག་ས་ཡིག་ཞུགས་པ་ནི། རྗེས་འཇུག་ནང་ཕྲད་ཀྱི་སྟོབས་ལས་སྒྲ་དྲག་པའི་དྲག་པར་འགྱུར་བ་སྐྱེས་བུ་རབ་སྟེ། དཔེར་ན། གྲགས། རགས། བཀླགས། འགྲིགས། ལྟ་བུའོ། །རྗེས་འཇུག་ག་ལ་ནང་ཕྲད་ཡོད་པ་སྐྱེས་བུ་རབ་དང༌། དེ་བཞིན་རྗེས་འཇུག་ཕོ་ཡིག་བ་ལ་ཡང་འཇུག་ས་ཡིག་ཞུགས་པ་ཅན་ནི། སྒྲ་དྲག་པའི་འབྲིང་དུ་འགྱུར་བས་སྐྱེས་བུ་འབྲིང་ཡིན་ཏེ། དཔེར་ན། བསྒྲུབས། རྔུབས། ཆིབས། སྐྱོབས། ལྟ་བུའོ། །རྗེས་འཇུག་ག་བ་གཉིས་ཀྱི་མཐར་ཡང་འཇུག་མེད་པ་དང༌། རྗེས་འཇུག་ད་ས་གཉིས་ཀྱི་མཐའ་ཅན་ནམ་རྗེས་འཇུག་ཅན་རྣམས་ནི། སྒྲ་དྲག་པའི་ཞན་པར་འགྱུར་བས་སྐྱེས་བུ་ཐ་མ་སྟེ། དཔེར་ན། བཀག གུག བྲག གཅོག ལྕེབ། འཇབ། གཙབ། འཁྲབ། ལྟ་བུ་དང༌། འཁྲིད། བསྐྱེད། སྐྱིད། བགྲོད། མཁས། གུས། འགྲས། བྱས། ལྟ་བུ་སོགས་དྲག་པ་ཕོ་ལའང་ནང་གསེས་རྗེས་འཇུག་ནང་ཕྲད་ཡོད་མེད་ཀྱིས། སྒྲ་དྲག་པའི་དྲག་པ་དྲག་པའི་ཞན་པ་དྲག་པའི་བར་མ་སྟེ་རྣམ་པ་གསུམ་དུ་དབྱེ་བར་བྱས་པའོ། །དེ་བཞིན་སྒྲ་ཞན་པ་མོ་ལའང་ནང་གསེས་ཀྱི་སྒྲ་དྲག་པ་དང་ཞན་པ་གཉིས་སུ་དབྱེ་སྟེ། རྗེས་འཇུག་མོ་ཡིག་ང་མ་གཉིས་ལ་ཡང་འཇུག་ས་ཡིག་ཞུགས་པ་ཅན་ནི་སྒྲ་ཞན་པའི་དྲག་པར་འགྱུར་བས་མོ་ཙམ་དང༌། རྗེས་འཇུག་ང་མ་གཉིས་ལ་ཡང་འཇུག་མེད་པ་དང༌། རྗེས་འཇུག་འ་ཡིག་གི་མཐའ་ཅན་རྣམས་ནི་སྒྲ་ཤིན་ཏུ་ཞན་པར་འགྱུར་བས་ཤིན་ཏུ་མོ་ཡིན་ཏེ། དཔེར་ན། བསྐྱངས། བཏུངས། འཐུངས། བསྐྱམས། གཏམས། བལྟམས་ལྟ་བུ་མོ་དང༌། ཐུང་། གདང༌། གནང༌། འཐུང༌། སྡོམ། སྣོམ། ལྟ་བུ་དང༌། དཔའ། མདའ། མཁའ། དཀའ། ལྟ་བུ་ཤིན་ཏུ་མོའོ། །རྗེས་འཇུག་གི་ཡི་གེ་སྒྲ་བར་མ་མ་ནིང་ན་ར་ལ་གསུམ་ལ་ཡང་འཇུག་ད་ཡིག་ཞུགས་པ་ཡོད་དམ་མེད་ཀྱང་རུང་མིང་གཞི་ཕོ་ཡིག་གི་མཐར་ཞུགས་པ་ཡོད་པ་ཞིག་དང༌། དེ་དཔེར་ན། བརྟནད། སྟོན། བསྐྲུནད། དཀོན། སྐོན། སྐོར། སྐོལ། ལྟ་བུ་ཕོ་ཡིག་མཐར་ཡང་འཇུག་ཡོད་མེད་དུ་ཞུགས་པ་དང༌། མིང་གཞི་མ་ནིང་གི་རྗེས་སུ་ནི་ཡང་འཇུག་ད་ཡིག་དང་བཅས་ཞུགས་པ་ན། སྒྲ་བར་མའི་དྲག་པའམ་ཞན་པར་འགྱུར་ཏེ། དཔེར་ན། ཕྱིནད། མཁྱེནད། ཐརད། འཚལད། ལྟ་བུ་མ་ནིང་གི་རྗེས་སུ་ཡང་འཇུག་དང་བཅས་ཞུགས་པ་དེ་རྣམས་ནི་སྒྲ་དྲག་པའི་མིང་གཞི་དང་ཡང་འཇུག་ཕོ་ཡིག་རྣམས་དང་ཕྲད་པས་དྲག་པར་འགྱུར་བ་དང༌། མིང་གཞི་མོ་ཡིག་གི་རྗེས་སུ་ནི་ཡང་འཇུག་ད་ཡིག་མེད་པར་ཞུགས་པ་ན། དཔེར་ན། འགྲན། མངར། སྦྱོར། མཇལ། ལྟ་བུ་སྒྲ་ཞན་པ་མོ་ཡིག་དང་ཕྲད་པས་སྒྲ་ཞན་པར་འགྱུར་བ་སྟེ། དྲག་པར་འགྱུར་བ་དང་ཞན་པར་འགྱུར་བ་དེ་གཉིས་ཀ་ལ་ནི་འགྱུར་བ་མ་ནིང་ཞེས་ཟེར་བ་ཡིན་ནོ། །མིང་གཞི་མོ་ཡིག་གི་རྗེས་སུ་ནི་ཡང་འཇུག་ད་ཡིག་དང་བཅས་ཞུགས་པ་ན། དཔེར་ན། འཛིནད། འབྱོརད། བསྒྲལད། ལྟ་བུ་དྲག་པ་ཕོ་དང་ཞན་པ་མོ་གཉིས་ཀའི་སྒྲའི་ཆ་ཤས་དང་ལྡན་པའི་ཕྱིར་ན་མཚན་གཉིས་མ་ནིང་ཞེས་སུ་གྲགས་པ་ཡིན་ནོ། །མིང་གཞི་མ་ནིང་གི་རྗེས་སུ་ནི་ཡང་འཇུག་ད་ཡིག་མེད་པར་ཞུགས་པ་ན། དཔེར་ན། མཁྱེན། འཐོར། འཚལ། ལྟ་བུ་རྣམས་ནི་སྒྲ་བར་མ་ཙམ་ལས་དྲག་ཞན་གང་དུའང་མི་འགྱུར་བས་མཚན་མེད་མ་ནིང་ཞེས་སུ་འདོད་པ་ཡིན་ནོ། །གཉིས་པ་དོན་གྱི་སྦྱོར་ཚུལ་བཤད་པ་ལ། སྔ་མ་གང་ལྟར་འགྱུར་བ་དང༌། ཕྱི་མ་གང་ལྟར་འགྱུར་བ་གཉིས་ལས། དང་པོ། སྔ་མ་གང་ལྟར་འགྱུར་བ། གཉིས་པ་དོན་ལ་གཉིས་ཡོད་པའི། །སྔ་མ་གང་ལྟར་འགྱུར་བ་ནི ། །རྗེས་འཇུག་གང་ལ་ཞུགས་པ་ཡི། །མིང་དེས་བདག་གཞན་སོགས་གང་སྟོན། །ཕལ་ཆེར་མིང་དེའི་སྔོན་འཇུག་གི ། ནུས་པར་སྦྱར་ནས་རྟོགས་པར་བྱ། །ཞེས་པ་ལྟར། གཉིས་པ་རྗེས་འཇུག་རྣམས་དོན་གྱི་སྦྱོར་ཚུལ་ལ་རྣམ་པ་གཉིས་ཡོད་པའི། སྔ་མ་རྗེས་འཇུག་ཉིད་གང་ལ་ཞུགས་ཤིང་གནས་པའི་མིང་དེ་མིང་མཐའ་ཚེག་བར་ཕྱི་མ་ལ་ལྟོས་ནས་སྔ་མར་གྲུབ་པས། དེས་བདག་གཞན་སོགས་དོན་གང་ལྟར་ཏེ་ཇི་ལྟ་བུ་ཞིག་སྟོན་པར་འགྱུར་བ་ནི། རྗེས་འཇུག་གང་ལ་ཞུགས་ཡོད་པ་དེ་ཡི་མིང་དེས་བདག་གཞན་དུས་གསུམ་སོགས་དོན་གང་སྟོན་པ། གཙོ་བོའམ་ཕལ་ཆེར་མིང་དེའི་སྔོན་དུ་གནས་པ་སྔོན་འཇུག་གང་རུང་གི་ནུས་པས་དོན་ཇི་སྟོན་པ་དེ་བཞིན་དུ་རྗེས་འཇུག་རྣམས་ཀྱིས་ཀྱང་དེ་དང་མཚུངས་པར་སྦྱར་ནས་དོན་སྟོན་པ་རྟོགས་པར་བྱའོ། །དཔེར་ན། སྐོར་བ་པོ། སྐོར་བྱེད། བསྐོར་བར་བྱ། བསྐོར་བྱའི་འཁོར་ལོ། ལྟ་བུ་བདག་གཞན་སོགས་མང་ཆེ་བར་སྔོན་འཇུག་དང་སྦྱར་ནས་རྗེས་འཇུག་གིས་ཀྱང་དེ་བཞིན་དོན་སྟོན་པ་ཡིན་ལ། སྔོན་འཇུག་མེད་ཀྱང་རྗེས་འཇུག་གི་དོན་སྟོན་པ་ཡོད་པའང་ཤེས་པར་བྱའོ། །གཉིས་པ་ཕྱི་མ་ཇི་ལྟར་འགྱུར་བ་ལ། མིང་མཐའ་དྲག་ཞན་འདྲེན་ཚུལ། རྣམ་དབྱེ་སྔ་ཤུགས་འདྲེན་ཚུལ། ནང་གསེས་གང་ཞིག་འདྲེན་ཚུལ་གསུམ་ལས།དང་པོ། མིང་མཐའ་དྲག་ཞན་འདྲེན་ཚུལ་བཤད་པ། ཕྱི་མ་ཇི་ལྟར་འགྱུར་བ་ནི། །རྗེས་འཇུག་ཕོ་ཡིས་ཕོ་ཡིག་གི ། མིང་མཐའ་གཞན་དྲང་དེ་བཞིན་དུ། །མོ་ཡིས་མོ་ཡི་མིང་མཐའ་དང༌། །མ་ནིང་གིས་ནི་མ་ནིང་དྲང༌། །དེ་རྣམས་རྟགས་མཚུངས་འདྲེན་ཚུལ་ཏེ ། །བརྗོད་བདེ་འདྲེན་པའང་ཤིན་ཏུ་མང༌། །ཞེས་པས་བསྟན་ཏེ། རྗེས་འཇུག་གི་ཡི་གེ་བཅུ་པོ་དེ་དག་སྦྱར་བའི་མིང་ཚིག་དེས་མིང་མཐའ་ཚེག་བར་ཕྱི་མ་རྣམ་དབྱེའི་ཐོབ་ཐང་དང༌། མིང་མཐའ་སོགས་ཇི་ལྟར་འཇུག་པར་འགྱུར་བ་ནི། སྔ་མའི་རྗེས་འཇུག་དང་ཕྱི་མའི་བརྗོད་བྱ་དག་ལ་ཅི་རིགས་པར་ལྟོས་པའི་སྒོ་ནས་འདྲེན་པ་ཡིན་ལ། དེ་ཡང་མིང་སྔ་མའི་མཐའི་རྗེས་འཇུག་གི་ཡི་གེ་ཕོ་ཡིས་དེ་ཉིད་ཀྱི་ཚེག་བར་ཕྱི་མའི་མིང་མཐའ་སོགས་ཀྱི། མིང་གཞིའི་ཕོ་ཡིག་གི་མིང་མཐའ་གཞན་དྲང་བ་ཡིན་པ། དཔེར་ན། རྒོད་པོ། དཔྱིད་ཀ སྟོནད་ཀ ལྟ་བུར་སྦྱར་ནས་ཤེས་པར་བྱའོ། །དེ་བཞིན་དུ་རྗེས་འཇུག་མོ་ཡིས་མིང་གཞིའི་མོ་ཡི་མིང་མཐའ་དྲང་དང་པ། དཔེར་ན། མཐོང་བ། བསྐང་བ། མཐིང་ག ཐམ་ག དགའ་བ། ལྟ་བུའོ། །རྗེས་འཇུག་མ་ནིང་གིས་ནི་མིང་གཞིའི་མ་ནིང་ཡང་དྲང་སྟེ། དཔེར་ན། དགུན་ཁ། དབྱར་ཁ། རྒྱལ་ཁ་བླངས་ལྟ་བུ་སོགས་སོ། །དེ་རྣམས་ནི་སྤྱིར་རྟགས་མཚུངས་འདྲེན་ཚུལ་ཡང་ཡིན་ལ་བརྗོད་བདེ་འདྲེན་པའང་ཡིན་ཏེ། དེ་ལས་གཞན་མིང་མཐའ་སོགས་རྟགས་མཚུངས་ཀྱང་བརྗོད་པ་མི་བདེ་ན་བརྗོད་བདེ་འདྲེན་པ་གཙོ་ཆེ་བར་གསུངས་པས། དེ་ཕྱིར་བརྗོད་བདེ་འདྲེན་པའང་ཤིན་ཏུ་མང་བ་ཡིན་ནོ། །
གཉིས་པ། རྣམ་དབྱེ་སྔ་ཤུགས་འདྲེན་ཚུལ་བཤད་པ། གཞན་ཡང་མིང་མཐའ་དེ་ཉིད་ཀྱིས། །རྟགས་མཚུངས་པའམ་སྒྲ་མཐུན་པར། །རྣམ་དབྱེ་བརྒྱད་དང་སླར་བསྡུ་སོགས། །སྔ་མའི་ཤུགས་དང་མཐུན་པའི་འདྲེན། །དེ་དག་ནང་གསེས་གང་འཇུག་ནི། །རྣམ་དབྱེའམ་འཕྲད་བཅས་མིང་ཚིག་དེའི། །མཐར་སྦྱར་མིང་དོན་ལས་ཤེས་བྱ། །ཞེས་པ་ལྟར། མིང་མཐའ་འདྲེན་ཚུལ་སོགས་གོང་ལྟར་ཤེས་པར་བྱ་ལ། གཞན་ཡང་མིང་མཐའ་འམ་རྗེས་འཇུག་དེ་དག་ཉིད་ཀྱིས་མིང་མཐའ་གཞན་རྟགས་མཚུངས་པའམ་སྒྲ་མཐུན་པར། རྣམ་དབྱེ་བརྒྱད་དང་ཚིག་ཕྲད་སླར་བསྡུ་སོགས། མིང་ཚིག་སྔ་མའི་རྗེས་འཇུག་སོགས་ཀྱི་ནུས་པའམ་ཤུགས་དང་མཐུན་པར་འདྲེན་དགོས་པ་ཡིན་ལ། རྣམ་དབྱེ་དང་ཕྲད་སོགས་དེ་དག་གི་ནང་གསེས་གང་ཞིག་འཇུག་པ་དང་མི་འཇུག་པ་ནི་གཙོ་བོ། རྣམ་དབྱེ་འམ་ཕྲད་དང་བཅས་པའི་མིང་ཚིག་སྔ་མ་དེའི་མཐར་སྦྱར་རྒྱུའི་མིང་དོན་འོག་མ་ལས་ཤེས་པར་བྱའོ། །དཔེར་ན། གོང་དུ་མིང་ཤར་ཕྱོགས་ལྟ་བུ་དང་འོག་ཏུ་མིང་དོན་འགྲོ་ལྟ་བུའི་བྱ་ཚིག་ཡོད་ན་བར་དུ་རྣམ་དབྱེ་གཉིས་པའི་རྐྱེན་བརྗོད་བདེ་འདྲེན་པ་སུ་ཡིག་སོགས་སྦྱར་ཏེ་ཤར་ཕྱོགས་སུ་འགྲོ་ཞེས་པ་ལྟ་བུའོ། །
གསུམ་པ། དེས་ནང་གསེས་གང་ཞིག་འདྲེན་ཚུལ་བཤད་པ་ལས། རྣམ་དབྱེ་དང་པོ་འདྲེན་ཚུལ།དེ་ཡང་ཆོས་རྣམས་ངོ་བོ་ཙམ། །བརྗོད་པ་རྣམ་དབྱེ་དང་པོ་སྟེ། །དཔེར་ན་བུམ་པ་ཀ་བ་བཞིན། །གསལ་བྱེད་བོད་ཀྱི་སྐད་ལ་ཉུང༌། །ཞེས་པས་བསྟན་ཏེ། དེ་ཡང་རྣམ་དབྱེ་དང་པོ་ཞེས་པ་གང་འདྲ་ཞིག་ཡིན་ཟེར་ན། བོད་འདིར་མིང་རྐྱང་དང་རྣམ་དབྱེ་དང་པོ་སོ་སོར་མཚོན་མི་ནུས་པས་མིང་རྐྱང་དེ་གར་རྣམ་དབྱེ་དང་པོ་ཡིན་ལ། ཆོས་རང་རང་རྣམས་ཀྱི་ངོ་བོ་ཙམ་བརྗོད་པ་དེ་རྣམ་དབྱེ་དང་པོ་སྟེ། དཔེར་ན། བུམ་པ། ཀ་བ། ཉི་མ། ཟླ་བ་ལྟ་བུ་ཆོས་རང་གི་ངོ་བོ་ཙམ་ལས་གཞན་མི་སྟོན་པ་བཞིན་ནོ། །རྒྱ་གར་གྱི་སྐད་ལ་རྣམ་དབྱེ་དང་པོ་མིང་གི་མཐར་རྐྱེན་ཞིག་གིས་གསལ་བར་བྱེད་དགོས་ཀྱང༌། དེ་འདྲ་བོད་ཀྱི་སྐད་ལ་ཉུང་བའམ་མེད་པར་དོན་གྱི་ངོ་བོ་ཙམ་སྟོན་པ་རྣམ་དབྱེ་དང་པོ་ཞེས་བརྗོད་པ་ལས་རྐྱེན་གཞན་ལ་ལྟོས་དགོས་པ་མ་ཡིན་ནོ། །རྣམ་དབྱེ་གཉིས་པ་སོགས་འདྲེན་ཚུལ་བཤད་པ། ལས་དང་བྱ་ཡུལ་དོན་གཅིག་སྟེ། །དེ་ལྟའི་བྱ་བའི་ཡུལ་ཞིག་ལ། །བྱ་བ་བྱས་པར་སྟོན་པ་ལ། །གཉིས་པ་ལས་སུ་བྱ་བ་དང༌། །གཉིས་པའི་ནང་ཚན་དེ་ཉིད་དང༌། །བཞི་བ་དགོས་ཆེད་གསུམ་འདྲ་ཡང༌། །བྱ་བ་བྱས་པས་བྱ་བའི་ཡུལ། །དེ་འམ་དེ་དང་འབྲེལ་བ་ལ། །ཕན་ཐོགས་མེད་ན་གཉིས་པ་སྟེ། །དཔེར་ན་ཤར་དུ་འགྲོ་ལྟ་བུ། །ཕན་ཐོགས་ཡོད་ན་བཞི་པ་སྟེ། །དཔེར་ན་སློང་ལ་སྦྱིན་ལྟ་བུ། །ཕན་ཐོགས་མེད་ཀྱང་བྱ་ཡུལ་དང༌། །བྱ་བ་ངོ་བོ་གཅིག་ཡིན་ན། །གཉིས་པའི་ནང་ཚན་དེ་ཉིད་དེ། །དཔེར་ན་ལྷ་རུ་གསལ་ལྟ་བུ། །གང་ཞིག་གང་ལ་བརྟེན་པ་འམ། །གནས་དང་ཡོད་པའི་དོན་ཙམ་ལས། །བྱ་བ་གཏན་ནས་མི་བྱེད་ན། །རྣམ་དབྱེ་བདུན་པ་གནས་གཞི་སྟེ། །དཔེར་ན་སྟེང་དུ་མི་ཡོད་ལྟར། །ཚེ་སྐབས་གཉིས་དང་དོན་འདྲ་ན། །བདུན་པའི་ནང་ཚན་ཚེ་སྐབས་ཏེ། །དཔེར་ན་མཆུ་ཟླ་ཤར་བ་ན། །ཆོ་འཕྲུལ་དུས་ཆེན་ཚུགས་ལྟ་བུ། །རྣམ་དབྱེ་གཉིས་བཞི་བདུན་པ་དང༌། །དེ་ཉིད་ཚེ་སྐབས་གསལ་བྱེད་སྒྲ། །སུ་ར་རུ་དུ་ན་ལ་ཏུ། །ཡིན་ཞིང་ཕལ་ཆེར་ལ་སྒྲ་དང༌། །མཐུན་པས་ལ་དོན་རྣམ་དབྱེའང་ཟེར། །འོན་ཀྱང་ན་ལ་དེ་ཉིད་ལ། །མི་འཇུག་སྨྲ་བའི་སྒོ་ལས་གསུངས། །ཞེས་པ་ལྟར། སྐབས་འདིར་ལས་ཞེས་པ་དང་བྱ་བའི་ཡུལ་ཞེས་པ་གཉིས་དོན་གཅིག་པ་སྟེ། དེའང་དཔེར་ན། སྒྲ་ལ་ཉན་ལྟ་བུའི་སྒྲ་ནི་མཉན་པར་བྱ་བའི་ཡུལ་ལམ་ལས་ཀྱང་ཡིན་ལ་མཉན་བྱའམ་བྱ་ཡུལ་ཡང་སྒྲ་ལས་གཞན་པ་མེད་པའི་ཕྱིར་དང༌། དེ་བཞིན། དྲི་ལ་སྣོམ། ཟློས་གར་ལ་བལྟ་ལྟ་བུ་སོགས་ལས་དང་བྱ་ཡུལ་དོན་གཅིག་པའི་རིགས་འདི་ཉུང་ཤས་ལས་མེད་པ་ཡིན་ནོ། །ཡང་དཔེར་ན་ཤར་ཕྱོགས་སུ་འགྲོ་ལྟ་བུའི་རྣམ་དབྱེ་གཉིས་པའི་ལ་དོན་འཇུག་ཡུལ་ཤར་ཕྱོགས་ལྟ་བུའི་ཡུལ་དང་འགྲོ་བ་གཉིས་དོན་གཅིག་པར་ནམ་ཡང་གོ་བར་མི་བྱའོ། །དེ་ལྟའི་བྱ་བའི་ཡུལ་གང་ཞིག་ལ་བྱ་བ་བྱས་པར་སྟོན་པའམ་བྱ་བ་བྱས་ཙམ་སྟོན་པ་ལ་ནི་རྣམ་དབྱེ་གཉིས་པ་ལས་སུ་བྱ་བ་ཞེས་བརྗོད་པ་དང༌། རྣམ་དབྱེ་གཉིས་པའི་ནང་ཚན་དེ་ཉིད་དེ། ཡུལ་གང་ལ་བྱ་བ་བྱས་ཙམ་ལ་འདྲ་ནའང་བྱ་ལས་ངོ་བོ་གཅིག་པ་ལ་དེ་ཉིད་ཅེས་བརྗོད་པ་དེ་དང༌། རྣམ་དབྱེ་བཞི་པ་དགོས་ཆེད་གསུམ་གར། ལ་དོན་གྱི་ཕྲད་བདུན་པོས་འཇུག་ཚུལ་ཕལ་ཆེར་འདྲ་བ་དང༌། གང་ལ་བྱ་བ་བྱས་ཙམ་གྱི་ཆ་ནས་འདྲ་བ་ཡོད་ན་ཡང༌། ཞིབ་པར་དཔྱད་ཚེ་ཐུན་མོང་མ་ཡིན་པའི་ཁྱད་པར་རེ་ཡོད་ལ། དེ་དག་དཔེར་ན། བྱ་བའི་ཡུལ་གང་ལ་བྱ་བ་ཞིག་བྱས་པའི་ཚིག་དེས་བྱ་བ་བྱས་པ་ཙམ་སྟོན་པ་དང༌། བྱ་བའི་ཡུལ་དེའམ་དེ་དང་འབྲེལ་བ་ཡི་ལས་ལ་ཕན་ཐོགས་པ་མེད་པའམ་དེའི་ཆེད་དུ་སོང་བ་མེད་ན་གཉིས་པ་སྟེ། དཔེར་ན། ཤར་དུ་འགྲོ་དང༌། རི་རྩེ་རུ་བསྐྱོད། སྡོད་ཁང་དུ་འགྲོ་ལྟ་བུ། འགྲོ་བ་སོགས་ཀྱིས་རྣམ་དབྱེ་སྦྱར་ཡུལ་ཤར་ཕྱོགས་སོགས་ལ་ཕན་ཐོགས་གང་ཡང་མེད་པ་ལྟ་བུའོ། །བྱ་བའི་ཡུལ་གང་ཞིག་ལ་བྱ་བ་ཞིག་བྱས་པ་དེས། བྱ་བའི་ཡུལ་དེ་ལ་ཕན་ཐོགས་པ་དང་ཡུལ་དེ་དང་འབྲེལ་བའི་ལས་ལ་ཕན་ཐོགས་པ་ཞིག་ཡོད་ན་རྣམ་དབྱེ་བཞི་པ་སྟེ། དཔེར་ན་སློང་ལ་སྦྱིན་ལྟ་བུ། ཡུལ་དེ་ལ་ཕན་ཐོགས་པ་དང༌། ཟས་བཟའ་བར་དཀར་ཡོལ་འཁྱེར་ལྟ་བུ། དཀར་ཡོལ་འཁྱེར་བ་དེས་ཟས་བཟའ་བའི་བྱ་བ་ལ་ཕན་ཐོགས་པ་ལྟ་བུ། ཟས་དེ་དང་འབྲེལ་བའི་བཟའ་བའི་བྱ་བ་ལ་ཕན་ཐོགས་པ་སྟེ་དེ་དང་འབྲེལ་བའི་ལས་ལ་ཕན་ཐོགས་པའོ། །ཡུལ་དང་དེ་འབྲེལ་ལས་ལ་ཕན་ཐོགས་གང་ཡང་མེད་ཀྱང༌། རྣམ་དབྱེ་སྦྱོར་ཡུལ་བྱ་བའི་ཡུལ་དེ་དང་བྱ་བ་གཉིས་ཐ་དད་དབྱེ་རྒྱུ་མེད་པར་ངོ་བོ་གཅིག་ཏུ་གྱུར་པ་ཞིག་ཡིན་ན། དེ་ནི་རྣམ་དབྱེ་གཉིས་པའི་ནང་ཚན་དེ་ཉིད་དེ། དཔེར་ན། ལྷ་རུ་གསལ་དང་འོད་དུ་འཚེར་ལྟ་བུ། དེའང་ལྷ་རུ་གསལ་བར་བྱེད་པ་པོ་རང་ཉིད་དང་གསལ་བར་བྱ་རྒྱུའང་རང་ཉིད་ལྷ་ཡིན་པར་གསལ་བ་ལས་གཞན་མེད་ལ། དེ་ཕྱིར་གསལ་བྱ་གསལ་བྱེད་རང་ཉིད་ལས་ཐ་དད་དུ་མེད་པའི་ཕྱིར་དེ་ཉིད་ཅེས་བརྗོད་པ་ཡིན་ནོ། །བྱ་བ་དང་དངོས་པོ་གང་ཞིག་ཡིན་རུང༌། བརྟེན་ཆོས་གང་ཞིག་རྟེན་གང་ལ་བརྟེན་པའམ། དེར་གནས་པ་དང་ཡོད་པ་སྟོན་པའི་དོན་ཙམ་ལས་བྱ་བ་གཏན་ནས་མི་བྱེད་པའམ། བྱ་བ་བྱས་པ་གཙོ་བོར་མི་སྟོན་པ་ཞིག་ཡིན་ན། དེ་ནི་རྣམ་དབྱེ་བདུན་པ་གནས་གཞི་སྟེ། དཔེར་ན། སྟེང་དུ་མི་ཡོད་ལྟར་དང༌། ལྷ་ས་རུ་པོ་ཏཱ་ལ་ཡོད་ལྟ་བུའོ། །བྱ་བ་གཏན་ནས་མི་བྱེད་ཅེས་པས་ལ་དོན་གྱི་འོག་ཏུ་བྱ་ཚིག་ཙམ་ཡང་ཡོད་མི་འོས་པ་ག་ལ་ཡིན་ཏེ། དཔེར་ན། སི་ཏུས། གཡུལ་དུ་བསད་དང༌། པྲ་ཏིས། རབ་གསལ་དུ་དཔོན་པོ་བཞུགས། ལྟ་བུ་བྱ་ཚིག་ཅན་གྱི་བདུན་པ་མང་དུ་ཡོད་དོ། །དེས་ན་བྱ་བ་བྱས་པ་གཙོ་བོར་མི་སྟོན་པར་གནས་དང་ཡོད་པའི་དོན་གཙོ་བོར་སྟོན་པ་ཞིག་ལ་གོ་དགོས། །ལ་དོན་གང་རུང་ཞུགས་པའི་ཚིག་དེས་ཚེ་ཞེས་པ་དང་སྐབས་ཞེས་པ་གཉིས་དང་དོན་འདྲ་བ་ཞིག་སྟོན་ན། རྣམ་དབྱེ་བདུན་པའི་ནང་ཚན་ནམ་བདུན་པ་ཉིད་དུས་སྟོན་པ་ལ་གཙོ་བོར་འཇུག་པ་ཚེ་སྐབས་ཞེས་བརྗོད་པ་ཡིན་ཏེ། དཔེར་ན། མཆུ་ཟླ་ཤར་བ་ན་ཆོ་འཕྲུལ་དུས་ཆེན་ཚུགས་ལྟ་བུ་དང༌། ཞག་བདུན་ན་ཆར་འབབ། ལྟ་བུ་དེ་འདྲའི་ལ་དོན་གྱི་རྐྱེན་ན་སྒྲ་དེས་མཆུ་ཟླ་ཤར་བའི་ཚེ་ཞེས་པ་དང་མཆུ་ཟླ་ཤར་སྐབས་ཞེས་པ་དང༌། དོན་མཚུངས་པར་སྟོན་པས་དེ་ལ་ཚེ་སྐབས་ཞེས་བརྗོད་པ་ཡིན་ནོ། །རྣམ་དབྱེ་གཉིས་པ་དང༌། བཞི་པ། བདུན་པ་དང་། དེ་ཉིད་ཚེ་སྐབས་དག་གསལ་བར་བྱེད་པའི་རྐྱེན་ནམ་སྒྲ། སུ་ར་རུ་དུ་ན་ལ་ཏུ་བཅས་ཡིན་ཞིང༌། དེ་དག་ཕལ་ཆེར་ལ་སྒྲ་དང་འཇུག་པ་མཐུན་པས་ན་དེ་དག་ལ། ལ་དོན་གྱི་རྣམ་དབྱེའང་ཟེར་བ་སྟེ་མིང་དེ་ལྟར་བརྗོད། འོན་ཀྱང་དམིགས་བསལ་དུ་ན་དང་ལ་གཉིས་དེ་ཉིད་ལ་མི་འཇུག་པར་སྨྲ་བའི་སྒོ་ལས་ཞེས་པ་སྟེ། པཎྜི་ཏ་སྨྲྀ་ཏིས་མཛད་པའི། སྨྲ་སྒོ་མཚོན་ཆ་ཞེས་པའི་གཞུང་ལས། དུ་ལ་སོགས་པ་ལ་དང་མཐུན། །དེ་ཉིད་དག་ནི་ལྷག་པ་ཡིན། །ཞེས་དུ་ལ་སོགས་པ་དེ་ཉིད་ལ་ལྷག་པར་འཇུག་པ་ལས་ན་དང་ལ་མི་འཇུག་པར་གསུངས་པའི་ཕྱིར་རོ། །དེའང་དཔེར་ན་ལྷ་རུ་གསལ་དང་འོད་དུ་འཚེར་ལྷ་བུ་ལ། ལྷ་ལ་གསལ་འོད་ན་འཚེར་ལྟ་བུ་སྦྱར་ཚེ། ལྷ་དེ་ལ་གསལ་བའི་བྱ་བ་ཞིག་བྱེད་པོ་གཞན་ཞིག་གིས་བྱས་པ་ལྟ་བུའི། བརྗོད་ཚུལ་ཙམ་ལ་བྱ་བྱེད་ཐ་དད་དུ་གསལ་བའམ་སྟོན་པའི་སྒྲ་ཡིན་པའི་ཕྱིར། ན་ལ་གཉིས་དེ་ཉིད་དུ་བརྗོད་མི་བདེ་བ་དང་འཇུག་པར་དཀའ་བའི་རྒྱུ་མཚན་གྱིས། སྨྲ་སྒོ་དང་སི་ཏུའི་འགྲེལ་ཆེན་སོགས་གཞུང་ཚད་ལྡན་དག་ལས་ཀྱང་མི་འཇུག་པར་གསུངས་པའང་དོན་དེ་ལ་དགོངས་པར་སྣང་ངོ༌། །ཨི་ལྡན་གྱི་རྣམ་དབྱེ་འདྲེན་ཚུལ་བཤད་པ། རྣམ་དབྱེ་གང་ལ་སྦྱོར་ཡུལ་དེས། །ཉེ་འགྱངས་གང་དུ་བྱ་བ་ཞིག ། བྱས་ན་གསུམ་པ་བྱེད་སྒྲ་སྟེ། །དཔེར་ན་བདག་གིས་བཤད་ལྟ་བུ། །བྱ་བ་གཏན་ནས་མི་བྱེད་པར། །སྔ་ཕྱི་འབྲེལ་བྱེད་ཙམ་སྟོན་ན། །། རྣམ་དབྱེ་དྲུག་པ་འབྲེལ་སྒྲ་སྟེ། །དཔེར་ན་བདག་གི་མིག་ལྟ་བུ། །རྣམ་དབྱེ་གསུམ་དྲུག་གསལ་བྱེད་སྒྲ། ། ས་མཐའ་ཡོད་དང་མེད་པ་ཡི། །གི་ཀྱི་གྱི་འི་ཡི་ལྔ་ཡིན། །ཞེས་པས་བསྟན་ལ། རྣམ་དབྱེའི་རྐྱེན་ནམ་ཕྲད་གིས་ཀྱིས་གྱིས་འིས་ཡིས་རྣམས་གང་ལ་སྦྱོར་ཡུལ་མིང་ཚིག་གང་དེས། ཉེ་འགྱངས་གང་རུང་དུ་བྱ་བ་ཞིག་བྱས་པའམ་བྱེད་པ་ཞིག་སྟོན་ན་དེ་ནི་རྣམ་དབྱེ་གསུམ་པ་བྱེད་པའི་སྒྲ་སྟེ། དཔེར་ན། བདག་གིས་བཤད། ཁྱེད་ཀྱིས་གསོན། མིག་གིས་བལྟས། ལྟ་བུ་ཉེ་བའི་བྱ་བ་སྟེ་ཚིག་གཞན་གྱིས་བར་མ་ཆོད་པ་དང༌། སློབ་དཔོན་གྱིས་མདོ་སྨད་གསེར་ལྗོངས་བླ་རུང་རིག་པ་འབྱུང་བའི་གྲོང་ཁྱེར་གྱི་ཉེ་འདབས་ཤིག་ནས་སློབ་མའི་ཚོགས་ལ་རྒྱུན་དུ་དཔེ་ཁྲིད་གནང༌། ལྟ་བུ་ཅུང་འགྱངས་སར་བྱ་བ་བྱས་པ་དང༌། ཡང་རྣམ་དབྱེའི་རྐྱེན་དེ་དག་སྦྱར་ཡུལ་དེས་བྱ་བ་གཏན་ནས་མི་བྱེད་པར། འབྲེལ་གཞི་དང་འབྲེལ་ཆོས་སོགས་ཀྱི་མིང་ཚིག་སྔ་ཕྱི་འབྲེལ་བར་བྱེད་པ་ཙམ་སྟོན་པ་ན། རྣམ་དབྱེ་དྲུག་པ་འབྲེལ་སྒྲ་སྟེ། དཔེར་ན་བདག་གི་མིག ཤིང་གི་ཡལ་ག བྲག་སྟེང་གི་བྱ། བདག་གི་དཔེ་ཆ། ཁྱེད་ཀྱི་བུམ་པ། ལྟ་བུའོ། །རྣམ་དབྱེ་གསུམ་པ་དང་རྣམ་དབྱེ་དྲུག་པ་གསལ་བྱེད་ཀྱི་སྒྲའམ། རྣམ་དབྱེའི་རྐྱེན་ནི་ཀྱིས་སོགས་ས་མཐའ་ཡོད་པ་རྣམས་རྣམ་དབྱེ་གསུམ་པའི་རྐྱེན་དང༌། མེད་པ་ཡི་རྣམ་དབྱེ་དྲུག་པའི་རྐྱེན་རྣམས་ནི། གི་ཀྱི་གྱི་འི་ཡི་ལྔ་པོ་དེ་ཡིན་ནོ། །རྣམ་དབྱེ་ལྔ་བ་འདྲེན་ཚུལ། གང་ཞིག་གང་ལས་བྱུང་བ་འམ། །བྱེ་དང་ལྷུང་བའི་དོན་ལྡན་ན། །རྣམ་དབྱེ་ལྔ་པ་འབྱུང་ཁུངས་ཏེ། །དཔེར་ན་ཞལ་ནས་ཐོས་ལྟ་བུ། །གསལ་བྱེད་སྒྲ་ནི་ནས་ལས་ཏེ། །དགར་དང་སྡུད་པའང་ལྔ་པར་གཏོགས། །ཞེས་པས་བསྟན་ལ། ནས་ལས་ཀྱི་ཕྲད་གཉིས་ནི། བྱ་བ་དང་དངོས་པོ་སོགས་ཀྱི་བྲལ་ཆོས་གང་ཞིག་འབྱུང་ཁུངས་སམ་བྲལ་གཞི་གང་ལས་བྱུང་བའམ། སོ་སོར་བྱེ་བ་དང་ལྷུང་པའི་དོན་ལྡན་པ་ཞིག་སྟོན་ན། དེ་ནི་རྣམ་དབྱེ་ལྔ་པ་འབྱུང་ཁུངས་ཡིན་ཏེ། དཔེར་ན། ཞལ་ནས་ཐོས། བ་ལས་འོ་མ། ས་འོག་ནས་གཏེར་རྡོ། ལྟ་བུ་འབྱུང་ཁུངས་དངོས་ཏེ་དེ་གསལ་བར་བྱེད་པའི་སྒྲ་ནི་ནས་དང་ལས་གཉིས་ཅི་བདེར་སྦྱར་བས་འཐུས་ཏེ། ཡང་གང་ཞིག་གང་ལས་བྱུང་བ་དང་བྱེ་བའི་དོན་གཉིས་ཀ་དང་མི་ལྡན་པ་འབྱུང་ཁུངས་ཆ་འདྲ་སྟེ། དཔེར་ན། གཡང་ལས་ལྷུང༌། ལྟ་བུ་ལ་བྱེ་བའི་དོན་ལྡན་ཡང་བྱུང་བའི་དོན་ལྡན་པ་མ་ཡིན་པ་དང༌། ས་བོན་ལས་མྱུ་གུ་ལྟ་བུ་ལ་བྱུང་བའི་དོན་ཙམ་ལྡན་ཡང་བྱེ་བའི་དོན་མི་ལྡན་པས་ཆ་འདྲ་བའོ། །དེ་བཞིན་ཕྲད་དེ་གཉིས་འཇུག་ཡུལ་དགར་བ་སྟེ། དཔེར་ན། བྱ་ཡི་ནང་ནས་ཁྱུང་ཆེན། དངུལ་ལས་གསེར་ལྕི་ལྟ་བུ་དང༵༌། སྡུད་པ་སྟེ། མདོ་སྨད་ནས་ལྷ་སའི་བར། གསུམ་ནས་ལྔའི་བར། ལྟ་བུ་སྡུད་པའང་རྣམ་དབྱེ་ལྔ་པར་གཏོགས་སོ། །ཚིག་ཕྲད་སོགས་འདྲེན་ཚུལ།གཞན་ཡང་ཚིག་དོན་གོང་འོག་ཏུ། །བསྡུ་རྒྱུ་ཡོད་ན་སྡུད་པའི་སྒྲ། །དང་དང་ཀྱང་ཡང་འང་སོགས་སྦྱོར། །རྣམ་གྲངས་དུ་མས་དོན་བསྐྱར་ན། །འབྱེད་སྡུད་སྒྲ་འཇུག་དགག་པ་དང༌། །བདག་དོན་ཡོད་ན་ཐོག་མཐའ་རུ། །པ་སྡེའི་རྟགས་རྣམས་ཅི་རིགས་འཇུག ། རྒྱན་དུ་གྱུར་པའི་ཚིག་ཕྲད་ཀྱང༌། །དོན་ལ་བསྙེགས་པ་ཡོད་ན་སྦྱོར། །དེ་བཞིན་བསྟན་བྱ་ལྷག་ཡོད་ན། །ལྷག་བཅས་སྒྲ་སྦྱོར་ཚིག་དོན་ནི། །རྫོགས་ན་སླར་བསྡུའི་སྒྲ་རྣམས་སྦྱོར། །ཞེས་པ་ལྟར། གཞན་ཡང་ཚིག་དོན་གོང་འོག་ཀུན་ཏུ་བསྡུ་རྒྱུ་ཡོད་པ་ཞིག་ཡིན་ན་སྡུད་པའི་སྒྲ་དང་དང༌། ཀྱང་ཡང་འང་དང་གམ་སོགས་ཕྲད་བཅུ་གཅིག་རྣམས་སྦྱོར་དགོས་ཏེ། དཔེར་ན། སྒྲ་དང༌། ཚད་མ་དང༌། བཟོ་དང༌། གསོ་བ་དང༌། ནང་དོན་རིག་པ་བཅས་ནི་རིག་གནས་ལྔའོ། །ལྟ་བུ་དང༌། གཟུགས་སམ། སྒྲ་འམ། དྲི་འམ། རོ་འམ། རེག་བྱ་རྣམས་ནི་ལྟ་བུ་གམ་སོགས་ཀྱིས་སྡུད་པ་དང༌། ཡོན་ཏན་མེད་ཀྱང་ཕན་སེམས་ཆེ། དཔོན་པོ་མིན་ཡང་སེམས་སྟོབས་ཆེ། ལྟ་བུ་སོགས་སོ། །ཚིག་དོན་སོགས་རྣམ་གྲངས་དུ་མས་དོན་གཅིག་ཡང་བསྐྱར་དུ་བརྗོད་ན་འབྱེད་སྡུད་ཀྱི་སྒྲ་སོགས་འཇུག་ལ། དཔེར་ན། རྟ་བདུན་དབང་པོ་འམ། རྟ་ལྗང་ཅན་ནམ། སྣང་བྱེད་དམ། འོད་ཟེར་བརྒྱ་པ་རྣམས་ནི་ཉི་མའི་མིང་ངོ་ལྟ་བུ་དང༌། ཡང་གསུངས་པ། ཡང་ནས་ཡང༌། སླར་ཡང་། ལྟ་བུའོ། །དེ་བཞིན་དགག་པའི་དོན་ཅན་དང་བདག་པོའི་དོན་སྟོན་པ་ཅན་ཡོད་ན། མིང་ཚིག་དེ་དག་གི་ཐོག་མ་དང་མཐའ་མ་རུ་པ་སྡེའི་རྟགས་ཅན་ནམ་སྡེ་བ་བཞི་པ་པ་སྡེའི་ཡི་གེ་ཅི་རིགས་པ་འཇུག་སྟེ། དཔེར་ན། མ་ཡིན་ནོ། །མི་མཛའ། གཟུགས་མེད། ཡོད་པ་མིན་ལྟ་བུ་དགག་སྒྲ་དང༌། གསེར་པ། རྟ་པ། སྒྲུབ་པ་པོ། ཁ་ལོ་བ། གཏོང་བ་བོ། ཇ་མ། བཙུན་མོ། རིག་པ་ཅན། ཤེས་ལྡན་ལྟ་བུ་བདག་སྒྲའི་དོན་ཅན་སོགས་ལ་སྦྱར་བར་བྱའོ། །མཐུན་མི་མཐུན་སོགས་ཀྱི་ཚིག་གི་རྒྱན་དུ་གྱུར་པའི་ཚིག་ཕྲད་ཀྱང་ཡང་འང་གསུམ་སོགས་ཀྱང་ངེས་པར་དོན་ལ་བསྙེགས་པ་ཡོད་ན་སྟེ། ཕན་པ་དང་དགོས་པ་ཡོད་ན་སྦྱོར་དགོས་པ་ཡིན་ཏེ། དཔེར་ན། མཐུན་ཡང་མཐུན། སོན་བཏབ་ཀྱང་མ་སྐྱེ་ལྟ་བུ་སྔ་ཕྱི་ཚིག་གི་རྒྱན་དུ་འཇུག་པའོ། །དེ་བཞིན་དུ་ད་དུང་དེ་མ་ཐག་ཏུ་བསྟན་པར་བྱ་རྒྱུའི་ཚིག་དོན་ལྷག་མ་ཡོད་ན། སྔ་མ་ལ་ལྷག་བཅས་ཀྱི་སྒྲ་ཏེ་དེ་སྟེ་གསུམ་སོགས་སྦྱོར་དགོས་ཏེ། དཔེར་ན། མནན་ཏེ་བཞག བློ་གཏད་དེ་ཕྱིན། བཅག་སྟེ་དོར་ལྟ་བུ་ལྷག་བཅས་ལ་འཇུག་པའོ། །མིང་དང་ཚིག་གི་དོན་ནི་དེ་ཉིད་ཀྱི་འཕྲོ་དེ་མ་ཐག་ཏུ་རང་གི་བསྟན་བྱ་མེད་པར་རྫོགས་པ་ཡིན་ན། སླར་བསྡུའི་སྒྲ་གོ་སོགས་མིང་ཚིག་གི་མཐའ་རྣམས་སུ་སྦྱོར་དགོས་ཏེ། དཔེར་ན། མཆོག་གོ ། བདག་སོང་ངོ༌། །དེ་ཡོད་དོ། །ལྟ་བུ་རྫོགས་ཚིག་ལ་འཇུག་པའོ། །བཞི་པ། རྗེས་འཇུག་རྣམས་དགོས་པ་ཅི་ཕྱིར་འཇུག་པ་བཤད་པ། དགོས་པ་ཅི་ཕྱིར་འཇུག་ཅེ་ན། །མོ་ཡིག་དབྱངས་དང་མི་ལྡན་ན། །ཕོ་ཡིག་གསལ་བྱེད་བརྗོད་མི་ནུས། །དེ་ཕྱིར་དབྱངས་ལྔར་བཞེད་པ་བདེ། །ཕོ་ཡིག་དབྱངས་ལྡན་དེ་དག་ལའང༌། །རྗེས་འཇུག་བཅུ་པོ་མ་ཞུགས་ན། །དོན་གྱི་ངོ་བོ་ཙམ་སྟོན་པའི། །མིང་དང་དོན་གྱི་ཁྱད་པར་རྣམས། །སྟོན་པའི་ཚིག་དང་དོན་ལྡན་པའི། །ངག་གི་བརྗོད་པ་ཡོད་མིན་ཏེ། །ཡི་གེའི་ཁོངས་ནས་མིང་དབྱུང་ཞིང༌། །མིང་གི་ཁོངས་ནས་ཚིག་ཕྱུང་ནས། །ཚིག་གིས་དོན་རྣམས་སྟོན་པས་སོ། །ཞེས་པས་བསྟན་ཏེ། རྗེས་འཇུག་རྣམས་དགོས་པ་ཅི་ཕྱིར་འཇུག་པར་བྱེད་ཅེ་ན། སྤྱིར་དབྱངས་མོ་དང་གསལ་བྱེད་ཕོ་ཡིན་པའི་ཕྱིར་ན། མོ་ཡིག་གི་དབྱངས་དང་མི་ལྡན་པའམ་མེད་པར་གྱུར་ན། ཕོ་ཡིག་ཁོ་ནའི་བརྗོད་དོན་མཐའ་དག་སྟོན་མི་ནུས་པ་དང༌། ཕོ་ཡིག་གི་གསལ་བྱེད་སུམ་ཅུ་པོ་རྣམས་ཀྱང་ཨའི་སྒྲ་དང་མི་ལྡན་པར་བརྗོད་ཙམ་ཡང་མི་ནུས་ལ། དེའི་ཕྱིར་བོད་རང་ལའང་ཨ་དང་བཅས་དབྱངས་ལྔར་བཞེད་པའང་བདེ་བ་ལས་འགལ་བ་ཅུང་ཟད་ཙམ་ཡང་མེད་པར་སྣང་ངོ་ཞེས་གསུངས་པའོ། །ཕོ་ཡིག་རྣམས་དབྱངས་གང་རུང་རེ་དང་ལྡན་པར་གྱུར་པ་དེ་དག་ལའང༌། རྗེས་འཇུག་བཅུ་པོ་གང་རུང་ཞིག་མ་ཞུགས་ན་ཕོ་ཡིག་དབྱངས་ལྡན་རྐྱང་པས་དོན་གྱི་ངོ་བོ་ཙམ་སྟོན་པའི་མིང་དང༌། དོན་གྱི་ཁྱད་པར་རྣམས་སྟོན་པའི་ཚིག་དང༌། དོན་དང་ལྡན་པའི་བརྗོད་པ་བཅས་ངག་གི་བརྗོད་པ་མཐའ་དག་ལས་གཅིག་ཀྱང་ཡོང་བའམ་ཡོད་པ་མིན་ཏེ། དཔེར་ན། ཀ སྒོ། ཅི། འདྲ། ལྟ་བུ་རྣམས་ཀྱང་རྗེས་འཇུག་འ་ཡིག་རེ་མ་ཞུགས་པར་དོན་གང་ཡང་མི་སྟོན་པ་ལྟ་བུའོ། །དེ་ཕྱིར་ཡི་གེ་གཉིས་ཡན་ཆད་ཅིག་འདུས་པ་དེའི་ཁོངས་ནས་དོན་གྱི་ངོ་བོ་སྟོན་པའི་མིང་གྲུབ་པའམ་མིང་དབྱུང་བར་བྱ་ཞིང༌། དཔེར་ན། བརྡ། སྐད། རང༌། གཞན། ལྟ་བུ་དང༌། མིང་གི་ཡི་གེ་གཉིས་ཡན་ཆད་ཅིག་འདུས་པ་དེའི་ཁོངས་ནས། དོན་གྱི་ཁྱད་པར་སྟོན་པའི་ཚིག་ཕྱུང་ནས་ཞེས་མིང་ལས་ཚིག་གྲུབ་པ་ཡིན་ཏེ། དཔེར་ན། ཀ་བ་ཟུར་བརྒྱད་པ་ཅན། གསེར་གྱི་བུམ་པ་སྐེ་རིང༌། ལྟ་བུའོ། །ཚིག་དེ་དག་གིས་དོན་རྣམས་སྟོན་པ་ཡིན་ཏེ། ཚིག་གཉིས་ཡན་ཆད་ཅིག་འདུས་པའི་བརྗོད་པ་དེས་སྐབས་བབ་བསྟན་བྱའི་དོན་དེ། རྒྱས་བསྡུས་ཅི་རིགས་པར་བསྟན་ནས་དོན་རྣམས་གསལ་བར་བྱེད་པའམ་སྟོན་པར་བྱེད་པས་སོ། །གསུམ་པ། མཇུག་གི་དོན། ཡི་གེའི་འཇུག་པ་སྤྱིའི་དགོས་པ་བརྡ་སྤྲོད་པའི་བསྟན་བཅོས་ཀྱི་དགོས་པ་གཉིས་ལས། དང་པོ། ཡི་གེའི་འཇུག་པ་སྤྱིའི་དགོས་པ་སོགས་བཤད་པ། མིང་ཚིག་བརྗོད་པ་མེད་ན་ནི། །མཐུན་མོང་མཐུན་མོང་མ་ཡིན་པའི། །ཤེས་བྱ་སྟོན་པའང་མེད་པར་འགྱུར། །དེ་ཕྱིར་འཕགས་ཡུལ་མཁས་རྣམས་ཀྱི། །རྗེས་སུ་འབྲངས་ནས་གསུངས་པ་འདི། །སྐྱེ་བོ་ཀུན་གྱིས་རྟོགས་གྱུར་ཅིག ། དེ་ལྟར་མིང་དང་ཚིག་བརྗོད་པ་མཐའ་དག་མེད་ན་ནི་འཇིག་རྟེན་འདིར་དོན་མཚོན་པའི་བརྗོད་པ་སྟེ། ལུང་དུ་སྟོན་པའི་སྒྲ་སྐད་ཐམས་ཅད་མི་འབྱུང་བས། དེ་ལ་ལྟོས་པའི་འཇིག་རྟེན་པ་དང་མཐུན་མོང་བའི་བཟོ་རྩིས་དང་སྙན་ངག་སོགས་རིག་བྱེད་སྨྲ་བ་རྣམས་ཀྱང་ཡོད་པར་མི་འགྱུར་ཞིང༌། མཐུན་མོང་མ་ཡིན་པ་འཇིག་རྟེན་ལས་འདས་པར་འཇུག་པའི་ཤེས་བྱ་ཉན་ཐོས་རང་རྒྱལ་དང༌། རྫོགས་པའི་སངས་རྒྱས་ཀྱི་བསླབ་པ་རྣམས་ཀྱི་དོན་སྨྲ་ཞིང་སྟོན་པའང་མེད་པར་འགྱུར་བ་དེའི་ཕྱིར། ཐུ་མི་སམ་བྷོ་ཊས་རྒྱ་གར་འཕགས་པའི་ཡུལ་གྱི་མཁས་དབང་པཎྜི་ཏ་ལྷ་རིག་པའི་སེངྒེ་དང་བྲམ་ཟེ་ལི་བི་ཀ་ར། ཡིག་མཁན་བདེ་བྱེད་དགའ་བ་སོགས་མཁས་པ་རྣམས་དང༌། སྒྲ་ཀ་ཙན་དབྱངས་སོགས་སྒྲ་རིག་པའི་བསྟན་བཅོས་རྣམས་ཀྱི་རྗེས་སུ་འབྲང་ནས་བོད་འདིར་བརྡ་སྤྲོད་པའི་བསྟན་བཅོས་བརྒྱད་སོགས་མཛད་པ་དེ་དག་ལས་སུམ་ཅུ་པ་དང་རྟགས་འཇུག་གི་གཞུང་དེ་དག་ལ་བརྟེན་ནས་གསུངས་པའི་རྟགས་འཇུག་གི་སྙིང་དོན་གསལ་བོར་བྱེད་པའི་བསྟན་བཅོས་འདི་སྐྱེ་བོ་མཆོག་དམན་ཀུན་ཀྱིས་འདིས་དོན་ཚུལ་བཞིན་དུ་རྟོགས་པར་གྱུར་ཅིགགཉིས་པ། བརྡ་སྤྲོད་པའི་བསྟན་བཅོས་ཀྱི་དགོས་པ་སོགས་བཤད་པ། ཚིག་གི་སྒྲ་ཙམ་འདྲ་ན་ཡང༌། །དོན་ལ་ཁྱད་པར་ཤིན་ཏུ་ཆེ། །དེ་ཕྱིར་བརྡ་དག་ལ་བརྟེན་ནས། །མ་ནོར་དོན་རྣམས་འཚོལ་བ་གཅེས། །དོན་ལ་མི་རྨོངས་རྨོངས་པ་ཡང༌། །ལུགས་འདིར་མཁས་མིན་གྱིས་བྱེད་དེ། །སྒྲ་ཤེས་དོན་ལ་མི་རྨོངས་ཞེས། །མཁས་པའི་གསུང་ལ་ཡོངས་སུ་གྲགས། །འདི་ལ་མ་སྦྱངས་རྨོངས་ཚོད་ཀྱིས། །འཆད་རྩོད་རྩོམ་པའི་གྲལ་འཇུག་ན། །ཝ་སྐྱེས་སེང་ལྤགས་གྱོན་པ་བཞིན། །ནམ་ཞིག་རྗེས་ངན་གསལ་བར་འགྱུར། །དེ་ཕྱིར་བློ་གསལ་དོན་གཉེར་རྣམས། །རྟགས་འཇུག་དཀའ་གནད་གཟུགས་བརྙན་ཀུན། །གསལ་བར་འཆར་བའི་མེ་ལོང་འདི། །ལ་འུར་གཟིགས་མོར་སྤྱོན་དང་ཀྱེ། །འདི་ལ་ནོངས་པའི་ཚོགས་མཆིས་ན། །གཟུར་གནས་མཁས་པའི་སྤྱན་སྔར་འཆགས། །ཅུང་ཟད་འབད་ལས་ཐོབ་པའི་དགེས། །ཀུན་གྱིས་འདི་དོན་རྟོགས་པར་ཤོག ། ཅེས་པས་བསྟན་ཏེ། དེའང་དཔེར་ན། རྟགས་མཚན་དང༌། རྟག་པ གཉིས་ཀྱི་རྟག་ཞེས་པའི་སྒྲ་འདྲ་བ་ཙམ་དང༌། སྤྱན་གྱིས་གཟིགས་དང་སྟག་གཟིག་དང༌། ཁོངས་གཏོགས་དང་དོན་རྟོགས་སོགས་ཚིག་གི་སྒྲ་ཙམ་ཞིག་འདྲ་བ་ཡོད་ནའང༌། དོན་ལ་ཁྱད་པར་ཤིན་ཏུ་ཆེ་སྟེ། དཔེར་ན། སྡང་བའི་སྒྲ་ཞེས་བྲིས་ན་མཉན་བྱའི་སྒྲ་སྡང་བ་ལྟ་བུ་ལས། སྡང་དགྲ་ལ་གོ་བར་མི་འགྱུར་བས། མཉན་བྱའི་སྒྲ་དང་སྡང་བའི་དགྲ་ཞེས་སོ་སོར་མ་ནོར་བར་འབྲི་དགོས་པ་ཡིན་ཏེ་དོན་གྱི་ཁྱད་པར་ཚིག་གི་ནུས་པ་ལ་བརྟེན་པའི་ཕྱིར། ཁྱད་པར་མང་དུ་ཡོད་པས་དེ་ཕྱིར་སུམ་རྟགས་དག་གསུམ་སོགས་བརྡ་དག་རྣམས་ལ་ལེགས་པར་བརྟེན་པའམ་སྦྱངས་བར་བྱས་ནས། བརྡ་སྐད་ཐམས་ཅད་ཀྱི་སྦྱོར་བ་མ་ནོར་བའི་དོན་ཡང་དག་པ་རྣམས་ལེགས་པར་འཚོལ་བ་ནི་ཤིན་ཏུ་གཅེས་སོ་ཞེས་གསུངས། སྒྲ་ཤེས་པའམ་བརྡ་སྤྲོད་པའི་བསྟན་བཅོས་ཤེས་ན་དོན་ལ་མི་རྨོངས་བར་འགྱུར་བ་དང༌། དོན་ལ་རྨོངས་པའི་སྐྱེ་བོ་ཡང་བརྡ་དག་པར་སྦྱོར་བའི་བསྟན་བཅོས་ཀྱི་ལུགས་འདིར་མཁས་པ་མིན་པའི་རྐྱེན་གྱིས་བྱེད་པ་དེའམ། བརྡ་དག་པར་སྦྱོར་བའི་ལུགས་འདིར་མཁས་དང་མི་མཁས་པས་སྐྱེ་བོ་ཀུན་ཀྱང་རྨོངས་དང་མི་རྨོངས་པའི་ཁྱད་པར་འབྱེད་པའང་སུམ་རྟགས་མ་ཤེས་པས་ལན་པ་ཡིན་ནོ། །སྤྱིར་སྒྲ་རིག་པའི་བསྟན་བཅོས་འདི་ཤེས་ན་དོན་གང་དང་གང་ལ་མི་རྨོངས་པའམ་རྨོངས་པར་མི་འགྱུར་ཞེས། སྔོན་བྱོན་མཁས་པའི་གསུང་ལ་ཡོངས་སུ་གྲགས་པའི་ཕྱིར་རོ། །གལ་ཏེ་སྒྲ་རིག་པའི་བསྟན་བཅོས་འདི་དག་ལ་ཐོག་མར་མ་སྦྱངས་བར་རྨོངས་པ་རྣམས་ཀྱི་བློས་དཔག་ཚོད་ཀྱིས། གཞུང་འཆད་པ་དང་རྩོད་པ་རྩོམ་པའི་ཚོགས་གྲལ་དུ་འཇུག་པ་ན། དེ་ནི། དཔེར་ན། ཝ་སྐྱེས་དེ་སྔོན་ཝ་རྒན་པོ་ཞིག་གིས་སེང་གེའི་པགས་པ་གྱོན་པའམ་ཚོན་གྱིས་བསྒྱུར་བའི་ཝ་མོ་དེས་རྫུན་གྱིས། སྐབས་ཞིག་རི་དྭགས་རྣམས་ཀྱིས་རྒྱལ་པོར་བཀུར་ཀྱང༌། ནམ་ཞིག་ཝ་ཡིན་པར་ཤེས་ནས་རང་གི་སྲོག་ཀྱང་འདོར་དགོས་བྱུང་བ་བཞིན་དུ། རེ་ཞིག་འཆད་རྩོད་རྩོམ་པའི་གྲལ་དུ་ཞུགས་ཀྱང་ནམ་ཞིག་བརྡ་དག་པའི་བསྟན་བཅོས་མི་ཤེས་པའི་རྗེས་ངན་ནམ་སྐྱོན་དེ་གསལ་བར་འགྱུར་བ་ཡིན་ནོ། །དེ་ཕྱིར་བློ་གསལ་ལ་བརྡ་སྤྲོད་དོན་དུ་གཉེར་བར་འདོད་པ་རྣམས་ཀྱིས་རྟགས་འཇུག་གི་དཀའ་གནད་ཀྱི་གཟུགས་བརྙན་ཀུན་གསལ་བར་འཆར་བའི་གཞུང་མེ་ལོང་ལྟ་བུ་འདིར། མྱུར་མོར་ཏེ་ལ་འུར་གཟིགས་མོར་བྱོན་པར་གྱིས་དང་ཀྱེ་བློ་གསལ་དོན་གཉེར་དང་ལྡན་པ་རྣམས། ཞེས་སློབ་གཉེར་ནན་ཏན་བྱེད་པར་བསྐུལ་མ་གནང་བའོ། །རྟགས་ཀྱི་འཇུག་པའི་གཞུང་འདི་ལ་ནོངས་པའམ་ནོར་འཁྲུལ་ཉེས་པའི་ཚོགས་ཅི་ཞིག་མཆིས་ནའམ་ཡོད་པ་རྣམས་ཀྱང༌། བློ་གཟུར་གནས་མཁས་པའི་སྤྱན་སྔར་འཆགས་པའམ་བཤག་པར་བྱེད་དོ། །གཞུང་འདི་ལ་ཅུང་ཟད་འབད་པ་ལས་ཐོབ་པའི་དགེས་སམ་དགེ་བ་དེས། གངས་ཅན་ཀྱི་སྐྱེ་བོ་ཀུན་གྱིས་ཡི་གེའི་འཇུག་པ་ལེགས་པར་སྦྱར་བའི་ཚུལ་འདིའི་དོན་རྟོགས་ནས་མིང་ཚིག་བརྗོད་པ་ཐམས་ཅད་ལ་རྨོངས་པ་མེད་པར་སྨྲ་བའི་དབང་ཕྱུག་ཆེན་པོར་ཐོབ་པར་ཤོག་ཅིག ཅེས་རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་ཞེས་བྱ་བ་འདི་ནི། རང་གི་སློབ་བུ་རྗེས་དྲུང་སངས་རྒྱས་རྒྱ་མཚོ་དང་དོན་གྲུབ་ཕུན་ཚོགས་གཉིས་ཀྱིས་དགོས་ཚུལ་ལྟར། མཁས་མཆོག་སི་ཏུ་པཎ་ཆེན་དང་ཐམས་ཅད་མཁྱེན་པ་དྷརྨ་བྷ་དྲ་དངུལ་ཆུ་ཆོས་བཟང་དཔལ་བཟང་པོའི་བཞེད་པ་དང་མཐུན་པར་དབྱངས་ཅན་གྲུབ་པའི་རྡོ་རྗེས་སྦྱར་བའོ། །ཞེས་པའོ། །དེ་ལྟར་རྟགས་འཇུག་གི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་གི་ཚིག་དོན་གྱི་ཆ་རྣམས་རང་བློས་གང་དཔོག་ཙམ་རེ་ཞིག་བཤད་ཟིན་ཏོ།། །། སླར་སྨྲས་པ། མཐའ་བྲལ་ཆོས་དབྱིངས་ཀུན་ཁྱབ་ལྷ་ལམ་གྱི་དབྱིངས་སུ། །སྒྱུ་འཕྲུལ་སྟངས་སྟབས་རྩེན་པའི་ངེས་དོན་གྱི་ཟླ་གཞོན། །མིང་ཚིག་ཡི་གེའི་སྦྱོར་བའི་གཤོག་ཟུང་ལ་བརྟེན་དང༌། །འོད་དཀར་ཟེགས་མ་སྙིང་གི་གདུང་སེལ་དུ་ལེན་ཆོག ། རིག་གཞུང་རླབས་ཕྲེང་འཛུམ་པའི་ཆུ་གཏེར་གྱི་ཀློང་ནས། །བཅུ་ཕྲག་རིན་ཆེན་ཁུར་བའི་མཁས་དབང་གི་གྲལ་དུ། །རྣམ་དཔྱོད་གོམ་སྟབས་སྒྱུར་བའི་དཔའ་ཉམས་ཞིག་ལྡན་ན། །བརྡ་དག་གྲུ་ལ་མ་བརྟེན་བགྲོད་ཐབས་ནི་མི་འདུག ། གྲགས་པ་བླ་ན་འབར་པའི་ཁང་བཟང་གི་དབུས་སུ། །ཡོན་ཏན་བྱེ་བའི་མཛོད་ཅིག་རྒྱང་རིང་ན་བཀྲ་ཡང༌། །ཐ་སྙད་སྦྱོར་བའི་ཐེམ་སྐས་རང་ལག་ཏུ་མེད་ན། །མཁས་པའི་ཁང་བཟང་རྩེ་མོར་འཛེག་འདོད་ཅིག་མ་སྐྱེ། །ངག་རིག་སྨྲ་བའི་ཡིད་དབང་ཀུ་མུད་ཀྱི་འདབ་བརྒྱ། །ཅིག་ཅར་བཞད་པའི་སྙན་ངག་དཔག་བསམ་གྱི་ལྗོན་པ། །བརྡ་སྤྲོད་རིག་པའི་རྒྱ་མཚོ་བསྲུབས་པ་ཞིག་མེད་ན། །སྐྱིད་ཉལ་ལོ་ཟླའི་ཀློང་ནས་འཆར་བ་ནི་མ་ལགས། །མཁས་རློམ་སྙེམས་པའི་ཁྲི་ལ་བག་ཕེབས་སུ་འགྱིངས་ནས། །ཐ་སྙད་ཡིག་སྡེབ་ཙམ་ལ་བློ་མིག་དང་བྲལ་བཞིན། །འཆད་ཉན་བྱིས་པའི་ཟློས་གར་སྒྱུར་བ་ལ་བལྟས་ན། །ལུང་ལ་མ་བརྟེན་རྟོགས་པའི་བསྟན་པ་ཞིག་རྙེད་སྐད། །བློ་གསལ་བློ་ཡི་ལང་ཚོ་དབྱར་གསུམ་གྱི་མེ་ཏོག ། མི་བཟད་ལེ་ལོའི་སད་ཀྱིས་འཇོམས་པ་ལ་ཉེ་བས། །གུས་རྟག་བརྩོན་པ་གཉིས་ཀྱི་ར་བ་རུ་ཕེབས་དང༌། །ལེགས་བཤད་ཉི་མའི་འོད་འདིས་ལ་འུར་དུ་སྲུང་ཆོག ། གཏིང་ཟབ་རྟོགས་དཀའ་བརྡ་སྤྲོད་རིག་པ་ཡི་གཞུང་ལུགས། །གང་འདིར་བློ་དམན་བདག་གིས་མ་རྟོགས་པའི་འཁྲུལ་བ། །མཁྱེན་ལྡན་མཁས་དབང་རྣམས་ཀྱིས་སྤྱན་སྔར་དུ་བཤགས་ན། །ལབ་བརྡོལ་སྨྲ་བ་བདག་ལ་བཟོད་སྒོམ་ཞིག་གནང་རོགས། །ཞེས་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོའི་འགྲེལ་བ་གསལ་བྱེད་ཉི་མའི་འོད་སྣང་དང༌། རྟགས་འཇུག་གི་སྙིང་པོ་དཀའ་གནད་གསལ་བའི་མེ་ལོང་གི་འགྲེལ་བ་ལེགས་བཤད་ཟླ་བའི་ཟེགས་མ། འདི་ཉིད་རང་དང་སྐལ་བ་མཉམ་པའི་གསར་སློབ་འགའ་ཞིག་ལ་སྤྱི་ལོ ༢༠༠༥ ལོའི་རིག་གནས་འཛིན་གྲྭར་དཔེ་ཁྲིད་བྱེད་སྐབས། ཆོས་ཀྱི་གྲོགས་པོ་འགའ་ཞིག་གིས་ཡང་ཡང་བསྐུལ་ངོར་མ་བཟློགས་ཙམ་དང༌། རང་བློ་རིག་པའི་གནས་ལ་གོམ་ཕྱིར་དུ་དཔལ་སྔ་འགྱུར་རྙིང་མའི་གདན་ས་གངས་ལྗོངས་མཁས་དབང་འདུས་པའི་ཆོས་གྲྭ། བླ་རུང་ལྔ་རིག་ནང་བསྟན་སློབ་གླིང་གི་གྲལ་མཐར་སྙེག་པའི་སྙོམ་ལས་པ། རྨེ་གྲྭ་ཚེ་རིང་བསམ་འགྲུབ་ཏུ་འབོད་པས་རབ་བྱུང་བཅུ་བདུན་པའི་ཤིང་བྱ་ལོའི་ཆུ་སྟོད་ཟླ་བའི་དཀར་ཕྱོགས་ལ། ས་སྙིང་དུང་སྒྲུབ་ཆེན་མོའི་སྐབས་ཐུན་མཚམས་རྣམས་སུ་གང་དྲན་ཞིག་ཡི་གེར་བཀོད་ནས་གྲུབ་བར་བྱས་པ་འདིས་ཀྱང་བསྟན་འགྲོ་ལ་ཕན་པའི་རྒྱུར་གྱུར་ཅིག། །།
གཞན་ཡང་བས་འཕུལ་ཅན་ཕལ་ཆེར། །བྱེད་པ་པོ་ནི་ད་ལྟ་དང༌། །བྱ་ཡུལ་མ་འོངས་པར་བསྡུས་ནས། །འདས་ལ་བས་འཕུལ་ཡང་འཇུག་ཡོད། །ད་ལྟ་བ་ལ་གཉིས་ཀ་མེད། །མ་འོངས་འཕུལ་ཡོད་ཡང་འཇུག་མེད། །བསྐུལ་ཚིག་འཕུལ་མེད་ཡང་འཇུག་ཡོད། །སྐབས་འགར་འདས་དང་བསྐུལ་ཚིག་ལ། །ས་རྐྱང་སྦྱར་བས་འཐུས་པའང་ཡོད། །ཅེས་པ་ལྟར། གཞན་ཡང་བྱ་བྱེད་ཐ་དད་པའི་ལས་ཚིག་བས་འཕུལ་ཅན་ཕལ་ཆེར་དུས་གསུམ་གྱི་ནང་དུ་བསྡུས་ནས་རྗོད་སྐབས། བྱེད་པ་པོའམ་བྱེད་པ་ནི་དུས་ད་ལྟ་བར་བསྡུ་བ་དང༌། བྱ་བའི་ཡུལ་ལམ་ལས་དེ་དུས་མ་འོངས་པར་བསྡུས་ནས། འདས་པ་ལ་དཔེར་ན། སྲོག་བསྐྱབས་པར་བྱས། བྱ་བ་བསྒྲུབས་པར་བྱས། གྲི་བརྡརད་བར་བྱས། དགྲ་བརླགས་པར་བྱས། ལྟ་བུ་རྣམས་ལ་བས་འཕུལ་དང་ཡང་འཇུག་གཉིས་ཀ་ཡོད་པ་ཡིན་ལ། ད་ལྟ་བ་ལ་དཔེར་ན། སྲོག་སྐྱོབ་བཞིན་པ། བྱ་བ་སྒྲུབ་བཞིན་པ། གྲི་རྡར་བཞིན་པ། དགྲ་རློག་བཞིན་པ། ལྟ་བུ་རྣམས་ལ་སྔོན་འཇུག་དང་ཡང་འཇུག་གཉིས་ཀ་མེད་པ་ཡིན། མ་འོངས་པ་དཔེར་ན། སྲོག་བསྐྱབ་པར་བྱ། བྱ་བ་བསྒྲུབ་པར་བྱ། གྲི་བརྡར་བར་བྱ། ལྟ་བུ་རྣམས་ལ་བས་འཕུལ་ཡོད་ཅིང་ཡང་འཇུག་མེད། ཡང་སྐུལ་ཚིག་ལ་དཔེར་ན། སྲོག་སྐྱོབས་ཤིག བྱ་བ་སྒྲུབས་ཤིག དགྲ་རློགས་ཤིག ལྟ་བུ་རྣམས་ལ་འཕུལ་མེད་ཅིང་ཡང་འཇུག་ཡོད་པ་དང༌། སྐབས་འགར་འདས་པ་དང་སྐུལ་ཚིག་ལའང་དཔེར་ན། ཤིང་གས། ཕྱོགས་གཉིས་སུ་གྱེས། ལོ་ན་རྒས། ཅ་ལག་ཉོས། བྱ་བ་བྱས། ལྟ་བུ། སྐུལ་ཚིག་ལ། མེ་ཏོག་ཐུས་ཤིག སྐད་ཆ་དྲིས་ཤིག དབང་དུ་སྡུས་ཤིག ཟན་སྣོས་ཤིག ལྟ་བུ་རྣམས་ལ་ས་རྐྱང་སྦྱར་བས་འཐུས་པའམ་ཆོག་པའང་ཡོད་དོ། །ཞེས་པ་ལྟར་ཐ་དད་པའི་ལས་ཚིག་ལ། བྱེ་བྲག་བས་འཕུལ་གྱི་མགོ་ཅན་སྐབས་སམ་དུས་གསུམ་བྱེ་བྲག་པ་ཙམ་གྱི་དབང་དུ་བྱས་ནས་བཤད་པ་ཡིན་པའི་ཁྱད་པར་ཤེས་དགོས་པ་ལས། སྤྱིར་ཐ་དད་པའི་ལས་ཚིག་རྣམས་ཀྱི་འཕུལ་རྟེན་འདི་བཞིན་སྦྱར་དགོས་པ་དང་འཐོབ་པའི་ངེས་པ་མེད་པ་དེ་རྟོགས་པར་སླའོ། །གཉིས་པ། རྗེས་འཇུག་གི་རྟགས་ཀྱི་འཇུག་པ་བཤད་པ་ལ། རྗེས་འཇུག་གི་རྟགས་ཀྱི་དབྱེ་བ་བཤད་པ། དེའི་འཇུག་ཚུལ་བཤད་པ་གཉིས་ལས།དང་པོ། རྗེས་འཇུག་གི་རྟགས་ཀྱི་དབྱེ་བ་བཤད་པ། རྗེས་འཇུག་ཡི་གེ་བཅུ་པོ་ཡི། །ག་ད་བ་ས་བཞི་རྣམས་ཕོ། །ང་མ་འ་གསུམ་མོ་ཡིན་ཅིང༌། །ན་ར་ལ་གསུམ་མ་ནིང་སྟེ། །ཞེས་པ་ལྟར། རྗེས་འཇུག་གི་ཡི་གེ་ག་ང་ད་ན་བ་མ་འ་ར་ལ་ས་བཅས་བཅུ་པོ་ཡི་ནང་ནས་ནང་གསེས་དབྱེ་ན། ག་ད་བ་ས་བཞི་རྣམས་ཕོ་ཡི་ཡི་གེ་དང༌། ང་མ་འ་གསུམ་པོ་མོ་ཡིན་ཞིང༌། ན་ར་ལ་གསུམ་མ་ནིང་གི་ཡི་གེ་སྟེ། དེ་ལྟར་དབྱེ་དགོས་པའི་རྒྱུ་མཚན་ཡང་རྗེས་འཇུག་རྣམས་རང་རང་གི་འཇུག་ཡུལ་མིང་གཞིའི་ཡི་གེ་རྣམས་ལ། སྦྱར་ནས་ཀློག་སྐབས་སྒྲ་ཤུགས་ཆེ་ཆུང་གི་དབང་གིས་དེ་ལྟར་བཞག་པར་བྱས་སོ། །གཉིས་པ། རྗེས་འཇུག་གི་ཡི་གེ་རྣམས་གང་ལ་འཇུག་པ། གང་གིས་འཇུག་པ། ཇི་ལྟར་འཇུག་པ། ཅི་ཕྱིར་འཇུག་པ་བཞི་ལས། དང་པོ། རྗེས་འཇུག་གི་ཡི་གེ་གང་གིས་འཇུག་པ་དང་མིང་གཞི་གང་ལ་འཇུག་པ་བཤད་པ། མིང་གཞིའི་ཡི་གེ་ཀུན་ལ་འཇུག ། ཅེས་པ་ལྟར། གང་གིས་འཇུག་ན་རྗེས་འཇུག་གི་ཡི་གེ་བཅུ་པོ་དེས་འཇུག་པ་དང༌། གང་ལ་འཇུག་ན་མིང་གཞའི་ཡི་གེ་ཀུན་ལ་འཇུག་པའམ་གསལ་བྱེད་སུམ་ཅུ་ཐམས་ཅད་ལ་འཇུག་པའོ། །
གསུམ་པ། རྗེས་འཇུག་རྣམས་སྒྲ་དྲག་ཞན་སོགས་ཇི་ལྟར་འཇུག་པར་བཤད་པ་ལ། སྒྲ་ཡི་འཇུག་ཚུལ་དང༌། དོན་གྱི་འཇུག་ཚུལ་གཉིས་ལས།
དང་པོ། སྒྲའི་འཇུག་ཚུལ། ཇི་ལྟར་འཇུག་ཚུལ་གཉིས་ཡིན་ཏེ། །དང་པོ་སྒྲ་ཡི་འཇུག་ཚུལ་ནི། །ཕོ་ཡི་ག་ཡིག་ཡང་འཇུག་ཅན། །སྐྱེས་བུ་རབ་དང་ཕོ་ཡིག་བ། །ཡང་འཇུག་ཅན་ནི་སྐྱེས་བུ་འབྲིང༌། །ག་བ་ཡང་འཇུག་མེད་པ་དང༌། །ད་སའི་མཐའ་ཅན་ཐ་མ་སྟེ། །དྲག་པ་ཕོ་ལའང་ནང་གསེས་ཀྱིས། །དྲག་ཞན་བར་མ་གསུམ་དུ་དབྱེ། །དེ་བཞིན་ཞན་པ་མོ་ལ་ཡང༌། །ནང་གསེས་དྲག་ཞན་གཉིས་དབྱེ་སྟེ། །ང་མ་ཡང་འཇུག་ཅན་མོ་དང༌། །ང་མ་ཡང་འཇུག་མེད་པ་དང༌། །འ་མཐའ་ཅན་རྣམས་ཤིན་ཏུ་མོ། །བར་མ་མ་ནིང་ན་ར་ལ། །ཡང་འཇུག་ཡོད་དམ་མེད་ཀྱང་རུང༌། །མིང་གཞི་ཕོ་ཡིག་མཐར་ཡོད་དང༌། །མིང་གཞི་མ་ནིང་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་དང་ཕྲད་པས་དྲག་པར་འགྱུར། །མིང་གཞི་མོ་ཡིག་རྗེས་སུ་ནི། །ཡང་འཇུག་མེད་པར་ཞུགས་པ་ན། །ཞན་དང་ཕྲད་པས་ཞན་པར་འགྱུར། །དེ་གཉིས་འགྱུར་བ་མ་ནིང་ཡིན། །མིང་གཞི་མོ་ཡིག་རྗེས་སུ་ནི། །ཡང་འཇུག་དང་བཅས་ཞུགས་པ་ན། །དྲག་ཞན་གཉིས་ཀའི་ཆ་ལྡན་ཕྱིར། །མཚན་གཉིས་མ་ནིང་ཞེས་སུ་གྲགས། །མིང་གཞི་མ་ནིང་རྗེས་སུ་ནི། །ཡང་འཇུག་མེད་པར་ཞུགས་པ་ན། །དྲག་ཞན་གང་དུའང་མི་འགྱུར་བས། །མཚན་མེད་མ་ནིང་ཞེས་སུ་འདོད། །ཅེས་པ་ལྟར། ཇི་ལྟར་འཇུག་པའི་ཚུལ་བཤད་པ་ལ་རྣམ་པ་གཉིས་ཡིན་ཏེ། དེ་ལ་དང་པོ་རྗེས་འཇུག་རྣམས་ཀྱི་སྒྲ་ཡི་འཇུག་ཚུལ་བཤད་པ་ནི། རྗེས་འཇུག་རྣམས་ལ་ཕོ་མོ་མ་ནིང་གསུམ་དུ་དབྱེ་ཚུལ་གོང་དུ་བསྟན་ཟིན་པ་ལྟར་ལ། འདིར་ནང་གསེས་བརྒྱད་དུ་དབྱེ་བར་བྱེད་པ་ལ། རྗེས་འཇུག་ཕོ་ཡི་ག་ཡིག་ཡང་འཇུག་ཅན་ནམ་རྗེས་འཇུག་ག་ལ་ཡང་འཇུག་ས་ཡིག་ཞུགས་པ་ནི། རྗེས་འཇུག་ནང་ཕྲད་ཀྱི་སྟོབས་ལས་སྒྲ་དྲག་པའི་དྲག་པར་འགྱུར་བ་སྐྱེས་བུ་རབ་སྟེ། དཔེར་ན། གྲགས། རགས། བཀླགས། འགྲིགས། ལྟ་བུའོ། །རྗེས་འཇུག་ག་ལ་ནང་ཕྲད་ཡོད་པ་སྐྱེས་བུ་རབ་དང༌། དེ་བཞིན་རྗེས་འཇུག་ཕོ་ཡིག་བ་ལ་ཡང་འཇུག་ས་ཡིག་ཞུགས་པ་ཅན་ནི། སྒྲ་དྲག་པའི་འབྲིང་དུ་འགྱུར་བས་སྐྱེས་བུ་འབྲིང་ཡིན་ཏེ། དཔེར་ན། བསྒྲུབས། རྔུབས། ཆིབས། སྐྱོབས། ལྟ་བུའོ། །རྗེས་འཇུག་ག་བ་གཉིས་ཀྱི་མཐར་ཡང་འཇུག་མེད་པ་དང༌། རྗེས་འཇུག་ད་ས་གཉིས་ཀྱི་མཐའ་ཅན་ནམ་རྗེས་འཇུག་ཅན་རྣམས་ནི། སྒྲ་དྲག་པའི་ཞན་པར་འགྱུར་བས་སྐྱེས་བུ་ཐ་མ་སྟེ། དཔེར་ན། བཀག གུག བྲག གཅོག ལྕེབ། འཇབ། གཙབ། འཁྲབ། ལྟ་བུ་དང༌། འཁྲིད། བསྐྱེད། སྐྱིད། བགྲོད། མཁས། གུས། འགྲས། བྱས། ལྟ་བུ་སོགས་དྲག་པ་ཕོ་ལའང་ནང་གསེས་རྗེས་འཇུག་ནང་ཕྲད་ཡོད་མེད་ཀྱིས། སྒྲ་དྲག་པའི་དྲག་པ་དྲག་པའི་ཞན་པ་དྲག་པའི་བར་མ་སྟེ་རྣམ་པ་གསུམ་དུ་དབྱེ་བར་བྱས་པའོ། །དེ་བཞིན་སྒྲ་ཞན་པ་མོ་ལའང་ནང་གསེས་ཀྱི་སྒྲ་དྲག་པ་དང་ཞན་པ་གཉིས་སུ་དབྱེ་སྟེ། རྗེས་འཇུག་མོ་ཡིག་ང་མ་གཉིས་ལ་ཡང་འཇུག་ས་ཡིག་ཞུགས་པ་ཅན་ནི་སྒྲ་ཞན་པའི་དྲག་པར་འགྱུར་བས་མོ་ཙམ་དང༌། རྗེས་འཇུག་ང་མ་གཉིས་ལ་ཡང་འཇུག་མེད་པ་དང༌། རྗེས་འཇུག་འ་ཡིག་གི་མཐའ་ཅན་རྣམས་ནི་སྒྲ་ཤིན་ཏུ་ཞན་པར་འགྱུར་བས་ཤིན་ཏུ་མོ་ཡིན་ཏེ། དཔེར་ན། བསྐྱངས། བཏུངས། འཐུངས། བསྐྱམས། གཏམས། བལྟམས་ལྟ་བུ་མོ་དང༌། ཐུང་། གདང༌། གནང༌། འཐུང༌། སྡོམ། སྣོམ། ལྟ་བུ་དང༌། དཔའ། མདའ། མཁའ། དཀའ། ལྟ་བུ་ཤིན་ཏུ་མོའོ། །རྗེས་འཇུག་གི་ཡི་གེ་སྒྲ་བར་མ་མ་ནིང་ན་ར་ལ་གསུམ་ལ་ཡང་འཇུག་ད་ཡིག་ཞུགས་པ་ཡོད་དམ་མེད་ཀྱང་རུང་མིང་གཞི་ཕོ་ཡིག་གི་མཐར་ཞུགས་པ་ཡོད་པ་ཞིག་དང༌། དེ་དཔེར་ན། བརྟནད། སྟོན། བསྐྲུནད། དཀོན། སྐོན། སྐོར། སྐོལ། ལྟ་བུ་ཕོ་ཡིག་མཐར་ཡང་འཇུག་ཡོད་མེད་དུ་ཞུགས་པ་དང༌། མིང་གཞི་མ་ནིང་གི་རྗེས་སུ་ནི་ཡང་འཇུག་ད་ཡིག་དང་བཅས་ཞུགས་པ་ན། སྒྲ་བར་མའི་དྲག་པའམ་ཞན་པར་འགྱུར་ཏེ། དཔེར་ན། ཕྱིནད། མཁྱེནད། ཐརད། འཚལད། ལྟ་བུ་མ་ནིང་གི་རྗེས་སུ་ཡང་འཇུག་དང་བཅས་ཞུགས་པ་དེ་རྣམས་ནི་སྒྲ་དྲག་པའི་མིང་གཞི་དང་ཡང་འཇུག་ཕོ་ཡིག་རྣམས་དང་ཕྲད་པས་དྲག་པར་འགྱུར་བ་དང༌། མིང་གཞི་མོ་ཡིག་གི་རྗེས་སུ་ནི་ཡང་འཇུག་ད་ཡིག་མེད་པར་ཞུགས་པ་ན། དཔེར་ན། འགྲན། མངར། སྦྱོར། མཇལ། ལྟ་བུ་སྒྲ་ཞན་པ་མོ་ཡིག་དང་ཕྲད་པས་སྒྲ་ཞན་པར་འགྱུར་བ་སྟེ། དྲག་པར་འགྱུར་བ་དང་ཞན་པར་འགྱུར་བ་དེ་གཉིས་ཀ་ལ་ནི་འགྱུར་བ་མ་ནིང་ཞེས་ཟེར་བ་ཡིན་ནོ། །མིང་གཞི་མོ་ཡིག་གི་རྗེས་སུ་ནི་ཡང་འཇུག་ད་ཡིག་དང་བཅས་ཞུགས་པ་ན། དཔེར་ན། འཛིནད། འབྱོརད། བསྒྲལད། ལྟ་བུ་དྲག་པ་ཕོ་དང་ཞན་པ་མོ་གཉིས་ཀའི་སྒྲའི་ཆ་ཤས་དང་ལྡན་པའི་ཕྱིར་ན་མཚན་གཉིས་མ་ནིང་ཞེས་སུ་གྲགས་པ་ཡིན་ནོ། །མིང་གཞི་མ་ནིང་གི་རྗེས་སུ་ནི་ཡང་འཇུག་ད་ཡིག་མེད་པར་ཞུགས་པ་ན། དཔེར་ན། མཁྱེན། འཐོར། འཚལ། ལྟ་བུ་རྣམས་ནི་སྒྲ་བར་མ་ཙམ་ལས་དྲག་ཞན་གང་དུའང་མི་འགྱུར་བས་མཚན་མེད་མ་ནིང་ཞེས་སུ་འདོད་པ་ཡིན་ནོ། །གཉིས་པ་དོན་གྱི་སྦྱོར་ཚུལ་བཤད་པ་ལ། སྔ་མ་གང་ལྟར་འགྱུར་བ་དང༌། ཕྱི་མ་གང་ལྟར་འགྱུར་བ་གཉིས་ལས། དང་པོ། སྔ་མ་གང་ལྟར་འགྱུར་བ། གཉིས་པ་དོན་ལ་གཉིས་ཡོད་པའི། །སྔ་མ་གང་ལྟར་འགྱུར་བ་ནི ། །རྗེས་འཇུག་གང་ལ་ཞུགས་པ་ཡི། །མིང་དེས་བདག་གཞན་སོགས་གང་སྟོན། །ཕལ་ཆེར་མིང་དེའི་སྔོན་འཇུག་གི ། ནུས་པར་སྦྱར་ནས་རྟོགས་པར་བྱ། །ཞེས་པ་ལྟར། གཉིས་པ་རྗེས་འཇུག་རྣམས་དོན་གྱི་སྦྱོར་ཚུལ་ལ་རྣམ་པ་གཉིས་ཡོད་པའི། སྔ་མ་རྗེས་འཇུག་ཉིད་གང་ལ་ཞུགས་ཤིང་གནས་པའི་མིང་དེ་མིང་མཐའ་ཚེག་བར་ཕྱི་མ་ལ་ལྟོས་ནས་སྔ་མར་གྲུབ་པས། དེས་བདག་གཞན་སོགས་དོན་གང་ལྟར་ཏེ་ཇི་ལྟ་བུ་ཞིག་སྟོན་པར་འགྱུར་བ་ནི། རྗེས་འཇུག་གང་ལ་ཞུགས་ཡོད་པ་དེ་ཡི་མིང་དེས་བདག་གཞན་དུས་གསུམ་སོགས་དོན་གང་སྟོན་པ། གཙོ་བོའམ་ཕལ་ཆེར་མིང་དེའི་སྔོན་དུ་གནས་པ་སྔོན་འཇུག་གང་རུང་གི་ནུས་པས་དོན་ཇི་སྟོན་པ་དེ་བཞིན་དུ་རྗེས་འཇུག་རྣམས་ཀྱིས་ཀྱང་དེ་དང་མཚུངས་པར་སྦྱར་ནས་དོན་སྟོན་པ་རྟོགས་པར་བྱའོ། །དཔེར་ན། སྐོར་བ་པོ། སྐོར་བྱེད། བསྐོར་བར་བྱ། བསྐོར་བྱའི་འཁོར་ལོ། ལྟ་བུ་བདག་གཞན་སོགས་མང་ཆེ་བར་སྔོན་འཇུག་དང་སྦྱར་ནས་རྗེས་འཇུག་གིས་ཀྱང་དེ་བཞིན་དོན་སྟོན་པ་ཡིན་ལ། སྔོན་འཇུག་མེད་ཀྱང་རྗེས་འཇུག་གི་དོན་སྟོན་པ་ཡོད་པའང་ཤེས་པར་བྱའོ། །གཉིས་པ་ཕྱི་མ་ཇི་ལྟར་འགྱུར་བ་ལ། མིང་མཐའ་དྲག་ཞན་འདྲེན་ཚུལ། རྣམ་དབྱེ་སྔ་ཤུགས་འདྲེན་ཚུལ། ནང་གསེས་གང་ཞིག་འདྲེན་ཚུལ་གསུམ་ལས།དང་པོ། མིང་མཐའ་དྲག་ཞན་འདྲེན་ཚུལ་བཤད་པ། ཕྱི་མ་ཇི་ལྟར་འགྱུར་བ་ནི། །རྗེས་འཇུག་ཕོ་ཡིས་ཕོ་ཡིག་གི ། མིང་མཐའ་གཞན་དྲང་དེ་བཞིན་དུ། །མོ་ཡིས་མོ་ཡི་མིང་མཐའ་དང༌། །མ་ནིང་གིས་ནི་མ་ནིང་དྲང༌། །དེ་རྣམས་རྟགས་མཚུངས་འདྲེན་ཚུལ་ཏེ ། །བརྗོད་བདེ་འདྲེན་པའང་ཤིན་ཏུ་མང༌། །ཞེས་པས་བསྟན་ཏེ། རྗེས་འཇུག་གི་ཡི་གེ་བཅུ་པོ་དེ་དག་སྦྱར་བའི་མིང་ཚིག་དེས་མིང་མཐའ་ཚེག་བར་ཕྱི་མ་རྣམ་དབྱེའི་ཐོབ་ཐང་དང༌། མིང་མཐའ་སོགས་ཇི་ལྟར་འཇུག་པར་འགྱུར་བ་ནི། སྔ་མའི་རྗེས་འཇུག་དང་ཕྱི་མའི་བརྗོད་བྱ་དག་ལ་ཅི་རིགས་པར་ལྟོས་པའི་སྒོ་ནས་འདྲེན་པ་ཡིན་ལ། དེ་ཡང་མིང་སྔ་མའི་མཐའི་རྗེས་འཇུག་གི་ཡི་གེ་ཕོ་ཡིས་དེ་ཉིད་ཀྱི་ཚེག་བར་ཕྱི་མའི་མིང་མཐའ་སོགས་ཀྱི། མིང་གཞིའི་ཕོ་ཡིག་གི་མིང་མཐའ་གཞན་དྲང་བ་ཡིན་པ། དཔེར་ན། རྒོད་པོ། དཔྱིད་ཀ སྟོནད་ཀ ལྟ་བུར་སྦྱར་ནས་ཤེས་པར་བྱའོ། །དེ་བཞིན་དུ་རྗེས་འཇུག་མོ་ཡིས་མིང་གཞིའི་མོ་ཡི་མིང་མཐའ་དྲང་དང་པ། དཔེར་ན། མཐོང་བ། བསྐང་བ། མཐིང་ག ཐམ་ག དགའ་བ། ལྟ་བུའོ། །རྗེས་འཇུག་མ་ནིང་གིས་ནི་མིང་གཞིའི་མ་ནིང་ཡང་དྲང་སྟེ། དཔེར་ན། དགུན་ཁ། དབྱར་ཁ། རྒྱལ་ཁ་བླངས་ལྟ་བུ་སོགས་སོ། །དེ་རྣམས་ནི་སྤྱིར་རྟགས་མཚུངས་འདྲེན་ཚུལ་ཡང་ཡིན་ལ་བརྗོད་བདེ་འདྲེན་པའང་ཡིན་ཏེ། དེ་ལས་གཞན་མིང་མཐའ་སོགས་རྟགས་མཚུངས་ཀྱང་བརྗོད་པ་མི་བདེ་ན་བརྗོད་བདེ་འདྲེན་པ་གཙོ་ཆེ་བར་གསུངས་པས། དེ་ཕྱིར་བརྗོད་བདེ་འདྲེན་པའང་ཤིན་ཏུ་མང་བ་ཡིན་ནོ། །
གཉིས་པ། རྣམ་དབྱེ་སྔ་ཤུགས་འདྲེན་ཚུལ་བཤད་པ། གཞན་ཡང་མིང་མཐའ་དེ་ཉིད་ཀྱིས། །རྟགས་མཚུངས་པའམ་སྒྲ་མཐུན་པར། །རྣམ་དབྱེ་བརྒྱད་དང་སླར་བསྡུ་སོགས། །སྔ་མའི་ཤུགས་དང་མཐུན་པའི་འདྲེན། །དེ་དག་ནང་གསེས་གང་འཇུག་ནི། །རྣམ་དབྱེའམ་འཕྲད་བཅས་མིང་ཚིག་དེའི། །མཐར་སྦྱར་མིང་དོན་ལས་ཤེས་བྱ། །ཞེས་པ་ལྟར། མིང་མཐའ་འདྲེན་ཚུལ་སོགས་གོང་ལྟར་ཤེས་པར་བྱ་ལ། གཞན་ཡང་མིང་མཐའ་འམ་རྗེས་འཇུག་དེ་དག་ཉིད་ཀྱིས་མིང་མཐའ་གཞན་རྟགས་མཚུངས་པའམ་སྒྲ་མཐུན་པར། རྣམ་དབྱེ་བརྒྱད་དང་ཚིག་ཕྲད་སླར་བསྡུ་སོགས། མིང་ཚིག་སྔ་མའི་རྗེས་འཇུག་སོགས་ཀྱི་ནུས་པའམ་ཤུགས་དང་མཐུན་པར་འདྲེན་དགོས་པ་ཡིན་ལ། རྣམ་དབྱེ་དང་ཕྲད་སོགས་དེ་དག་གི་ནང་གསེས་གང་ཞིག་འཇུག་པ་དང་མི་འཇུག་པ་ནི་གཙོ་བོ། རྣམ་དབྱེ་འམ་ཕྲད་དང་བཅས་པའི་མིང་ཚིག་སྔ་མ་དེའི་མཐར་སྦྱར་རྒྱུའི་མིང་དོན་འོག་མ་ལས་ཤེས་པར་བྱའོ། །དཔེར་ན། གོང་དུ་མིང་ཤར་ཕྱོགས་ལྟ་བུ་དང་འོག་ཏུ་མིང་དོན་འགྲོ་ལྟ་བུའི་བྱ་ཚིག་ཡོད་ན་བར་དུ་རྣམ་དབྱེ་གཉིས་པའི་རྐྱེན་བརྗོད་བདེ་འདྲེན་པ་སུ་ཡིག་སོགས་སྦྱར་ཏེ་ཤར་ཕྱོགས་སུ་འགྲོ་ཞེས་པ་ལྟ་བུའོ། །
གསུམ་པ། དེས་ནང་གསེས་གང་ཞིག་འདྲེན་ཚུལ་བཤད་པ་ལས། རྣམ་དབྱེ་དང་པོ་འདྲེན་ཚུལ།དེ་ཡང་ཆོས་རྣམས་ངོ་བོ་ཙམ། །བརྗོད་པ་རྣམ་དབྱེ་དང་པོ་སྟེ། །དཔེར་ན་བུམ་པ་ཀ་བ་བཞིན། །གསལ་བྱེད་བོད་ཀྱི་སྐད་ལ་ཉུང༌། །ཞེས་པས་བསྟན་ཏེ། དེ་ཡང་རྣམ་དབྱེ་དང་པོ་ཞེས་པ་གང་འདྲ་ཞིག་ཡིན་ཟེར་ན། བོད་འདིར་མིང་རྐྱང་དང་རྣམ་དབྱེ་དང་པོ་སོ་སོར་མཚོན་མི་ནུས་པས་མིང་རྐྱང་དེ་གར་རྣམ་དབྱེ་དང་པོ་ཡིན་ལ། ཆོས་རང་རང་རྣམས་ཀྱི་ངོ་བོ་ཙམ་བརྗོད་པ་དེ་རྣམ་དབྱེ་དང་པོ་སྟེ། དཔེར་ན། བུམ་པ། ཀ་བ། ཉི་མ། ཟླ་བ་ལྟ་བུ་ཆོས་རང་གི་ངོ་བོ་ཙམ་ལས་གཞན་མི་སྟོན་པ་བཞིན་ནོ། །རྒྱ་གར་གྱི་སྐད་ལ་རྣམ་དབྱེ་དང་པོ་མིང་གི་མཐར་རྐྱེན་ཞིག་གིས་གསལ་བར་བྱེད་དགོས་ཀྱང༌། དེ་འདྲ་བོད་ཀྱི་སྐད་ལ་ཉུང་བའམ་མེད་པར་དོན་གྱི་ངོ་བོ་ཙམ་སྟོན་པ་རྣམ་དབྱེ་དང་པོ་ཞེས་བརྗོད་པ་ལས་རྐྱེན་གཞན་ལ་ལྟོས་དགོས་པ་མ་ཡིན་ནོ། །རྣམ་དབྱེ་གཉིས་པ་སོགས་འདྲེན་ཚུལ་བཤད་པ། ལས་དང་བྱ་ཡུལ་དོན་གཅིག་སྟེ། །དེ་ལྟའི་བྱ་བའི་ཡུལ་ཞིག་ལ། །བྱ་བ་བྱས་པར་སྟོན་པ་ལ། །གཉིས་པ་ལས་སུ་བྱ་བ་དང༌། །གཉིས་པའི་ནང་ཚན་དེ་ཉིད་དང༌། །བཞི་བ་དགོས་ཆེད་གསུམ་འདྲ་ཡང༌། །བྱ་བ་བྱས་པས་བྱ་བའི་ཡུལ། །དེ་འམ་དེ་དང་འབྲེལ་བ་ལ། །ཕན་ཐོགས་མེད་ན་གཉིས་པ་སྟེ། །དཔེར་ན་ཤར་དུ་འགྲོ་ལྟ་བུ། །ཕན་ཐོགས་ཡོད་ན་བཞི་པ་སྟེ། །དཔེར་ན་སློང་ལ་སྦྱིན་ལྟ་བུ། །ཕན་ཐོགས་མེད་ཀྱང་བྱ་ཡུལ་དང༌། །བྱ་བ་ངོ་བོ་གཅིག་ཡིན་ན། །གཉིས་པའི་ནང་ཚན་དེ་ཉིད་དེ། །དཔེར་ན་ལྷ་རུ་གསལ་ལྟ་བུ། །གང་ཞིག་གང་ལ་བརྟེན་པ་འམ། །གནས་དང་ཡོད་པའི་དོན་ཙམ་ལས། །བྱ་བ་གཏན་ནས་མི་བྱེད་ན། །རྣམ་དབྱེ་བདུན་པ་གནས་གཞི་སྟེ། །དཔེར་ན་སྟེང་དུ་མི་ཡོད་ལྟར། །ཚེ་སྐབས་གཉིས་དང་དོན་འདྲ་ན། །བདུན་པའི་ནང་ཚན་ཚེ་སྐབས་ཏེ། །དཔེར་ན་མཆུ་ཟླ་ཤར་བ་ན། །ཆོ་འཕྲུལ་དུས་ཆེན་ཚུགས་ལྟ་བུ། །རྣམ་དབྱེ་གཉིས་བཞི་བདུན་པ་དང༌། །དེ་ཉིད་ཚེ་སྐབས་གསལ་བྱེད་སྒྲ། །སུ་ར་རུ་དུ་ན་ལ་ཏུ། །ཡིན་ཞིང་ཕལ་ཆེར་ལ་སྒྲ་དང༌། །མཐུན་པས་ལ་དོན་རྣམ་དབྱེའང་ཟེར། །འོན་ཀྱང་ན་ལ་དེ་ཉིད་ལ། །མི་འཇུག་སྨྲ་བའི་སྒོ་ལས་གསུངས། །ཞེས་པ་ལྟར། སྐབས་འདིར་ལས་ཞེས་པ་དང་བྱ་བའི་ཡུལ་ཞེས་པ་གཉིས་དོན་གཅིག་པ་སྟེ། དེའང་དཔེར་ན། སྒྲ་ལ་ཉན་ལྟ་བུའི་སྒྲ་ནི་མཉན་པར་བྱ་བའི་ཡུལ་ལམ་ལས་ཀྱང་ཡིན་ལ་མཉན་བྱའམ་བྱ་ཡུལ་ཡང་སྒྲ་ལས་གཞན་པ་མེད་པའི་ཕྱིར་དང༌། དེ་བཞིན། དྲི་ལ་སྣོམ། ཟློས་གར་ལ་བལྟ་ལྟ་བུ་སོགས་ལས་དང་བྱ་ཡུལ་དོན་གཅིག་པའི་རིགས་འདི་ཉུང་ཤས་ལས་མེད་པ་ཡིན་ནོ། །ཡང་དཔེར་ན་ཤར་ཕྱོགས་སུ་འགྲོ་ལྟ་བུའི་རྣམ་དབྱེ་གཉིས་པའི་ལ་དོན་འཇུག་ཡུལ་ཤར་ཕྱོགས་ལྟ་བུའི་ཡུལ་དང་འགྲོ་བ་གཉིས་དོན་གཅིག་པར་ནམ་ཡང་གོ་བར་མི་བྱའོ། །དེ་ལྟའི་བྱ་བའི་ཡུལ་གང་ཞིག་ལ་བྱ་བ་བྱས་པར་སྟོན་པའམ་བྱ་བ་བྱས་ཙམ་སྟོན་པ་ལ་ནི་རྣམ་དབྱེ་གཉིས་པ་ལས་སུ་བྱ་བ་ཞེས་བརྗོད་པ་དང༌། རྣམ་དབྱེ་གཉིས་པའི་ནང་ཚན་དེ་ཉིད་དེ། ཡུལ་གང་ལ་བྱ་བ་བྱས་ཙམ་ལ་འདྲ་ནའང་བྱ་ལས་ངོ་བོ་གཅིག་པ་ལ་དེ་ཉིད་ཅེས་བརྗོད་པ་དེ་དང༌། རྣམ་དབྱེ་བཞི་པ་དགོས་ཆེད་གསུམ་གར། ལ་དོན་གྱི་ཕྲད་བདུན་པོས་འཇུག་ཚུལ་ཕལ་ཆེར་འདྲ་བ་དང༌། གང་ལ་བྱ་བ་བྱས་ཙམ་གྱི་ཆ་ནས་འདྲ་བ་ཡོད་ན་ཡང༌། ཞིབ་པར་དཔྱད་ཚེ་ཐུན་མོང་མ་ཡིན་པའི་ཁྱད་པར་རེ་ཡོད་ལ། དེ་དག་དཔེར་ན། བྱ་བའི་ཡུལ་གང་ལ་བྱ་བ་ཞིག་བྱས་པའི་ཚིག་དེས་བྱ་བ་བྱས་པ་ཙམ་སྟོན་པ་དང༌། བྱ་བའི་ཡུལ་དེའམ་དེ་དང་འབྲེལ་བ་ཡི་ལས་ལ་ཕན་ཐོགས་པ་མེད་པའམ་དེའི་ཆེད་དུ་སོང་བ་མེད་ན་གཉིས་པ་སྟེ། དཔེར་ན། ཤར་དུ་འགྲོ་དང༌། རི་རྩེ་རུ་བསྐྱོད། སྡོད་ཁང་དུ་འགྲོ་ལྟ་བུ། འགྲོ་བ་སོགས་ཀྱིས་རྣམ་དབྱེ་སྦྱར་ཡུལ་ཤར་ཕྱོགས་སོགས་ལ་ཕན་ཐོགས་གང་ཡང་མེད་པ་ལྟ་བུའོ། །བྱ་བའི་ཡུལ་གང་ཞིག་ལ་བྱ་བ་ཞིག་བྱས་པ་དེས། བྱ་བའི་ཡུལ་དེ་ལ་ཕན་ཐོགས་པ་དང་ཡུལ་དེ་དང་འབྲེལ་བའི་ལས་ལ་ཕན་ཐོགས་པ་ཞིག་ཡོད་ན་རྣམ་དབྱེ་བཞི་པ་སྟེ། དཔེར་ན་སློང་ལ་སྦྱིན་ལྟ་བུ། ཡུལ་དེ་ལ་ཕན་ཐོགས་པ་དང༌། ཟས་བཟའ་བར་དཀར་ཡོལ་འཁྱེར་ལྟ་བུ། དཀར་ཡོལ་འཁྱེར་བ་དེས་ཟས་བཟའ་བའི་བྱ་བ་ལ་ཕན་ཐོགས་པ་ལྟ་བུ། ཟས་དེ་དང་འབྲེལ་བའི་བཟའ་བའི་བྱ་བ་ལ་ཕན་ཐོགས་པ་སྟེ་དེ་དང་འབྲེལ་བའི་ལས་ལ་ཕན་ཐོགས་པའོ། །ཡུལ་དང་དེ་འབྲེལ་ལས་ལ་ཕན་ཐོགས་གང་ཡང་མེད་ཀྱང༌། རྣམ་དབྱེ་སྦྱོར་ཡུལ་བྱ་བའི་ཡུལ་དེ་དང་བྱ་བ་གཉིས་ཐ་དད་དབྱེ་རྒྱུ་མེད་པར་ངོ་བོ་གཅིག་ཏུ་གྱུར་པ་ཞིག་ཡིན་ན། དེ་ནི་རྣམ་དབྱེ་གཉིས་པའི་ནང་ཚན་དེ་ཉིད་དེ། དཔེར་ན། ལྷ་རུ་གསལ་དང་འོད་དུ་འཚེར་ལྟ་བུ། དེའང་ལྷ་རུ་གསལ་བར་བྱེད་པ་པོ་རང་ཉིད་དང་གསལ་བར་བྱ་རྒྱུའང་རང་ཉིད་ལྷ་ཡིན་པར་གསལ་བ་ལས་གཞན་མེད་ལ། དེ་ཕྱིར་གསལ་བྱ་གསལ་བྱེད་རང་ཉིད་ལས་ཐ་དད་དུ་མེད་པའི་ཕྱིར་དེ་ཉིད་ཅེས་བརྗོད་པ་ཡིན་ནོ། །བྱ་བ་དང་དངོས་པོ་གང་ཞིག་ཡིན་རུང༌། བརྟེན་ཆོས་གང་ཞིག་རྟེན་གང་ལ་བརྟེན་པའམ། དེར་གནས་པ་དང་ཡོད་པ་སྟོན་པའི་དོན་ཙམ་ལས་བྱ་བ་གཏན་ནས་མི་བྱེད་པའམ། བྱ་བ་བྱས་པ་གཙོ་བོར་མི་སྟོན་པ་ཞིག་ཡིན་ན། དེ་ནི་རྣམ་དབྱེ་བདུན་པ་གནས་གཞི་སྟེ། དཔེར་ན། སྟེང་དུ་མི་ཡོད་ལྟར་དང༌། ལྷ་ས་རུ་པོ་ཏཱ་ལ་ཡོད་ལྟ་བུའོ། །བྱ་བ་གཏན་ནས་མི་བྱེད་ཅེས་པས་ལ་དོན་གྱི་འོག་ཏུ་བྱ་ཚིག་ཙམ་ཡང་ཡོད་མི་འོས་པ་ག་ལ་ཡིན་ཏེ། དཔེར་ན། སི་ཏུས། གཡུལ་དུ་བསད་དང༌། པྲ་ཏིས། རབ་གསལ་དུ་དཔོན་པོ་བཞུགས། ལྟ་བུ་བྱ་ཚིག་ཅན་གྱི་བདུན་པ་མང་དུ་ཡོད་དོ། །དེས་ན་བྱ་བ་བྱས་པ་གཙོ་བོར་མི་སྟོན་པར་གནས་དང་ཡོད་པའི་དོན་གཙོ་བོར་སྟོན་པ་ཞིག་ལ་གོ་དགོས། །ལ་དོན་གང་རུང་ཞུགས་པའི་ཚིག་དེས་ཚེ་ཞེས་པ་དང་སྐབས་ཞེས་པ་གཉིས་དང་དོན་འདྲ་བ་ཞིག་སྟོན་ན། རྣམ་དབྱེ་བདུན་པའི་ནང་ཚན་ནམ་བདུན་པ་ཉིད་དུས་སྟོན་པ་ལ་གཙོ་བོར་འཇུག་པ་ཚེ་སྐབས་ཞེས་བརྗོད་པ་ཡིན་ཏེ། དཔེར་ན། མཆུ་ཟླ་ཤར་བ་ན་ཆོ་འཕྲུལ་དུས་ཆེན་ཚུགས་ལྟ་བུ་དང༌། ཞག་བདུན་ན་ཆར་འབབ། ལྟ་བུ་དེ་འདྲའི་ལ་དོན་གྱི་རྐྱེན་ན་སྒྲ་དེས་མཆུ་ཟླ་ཤར་བའི་ཚེ་ཞེས་པ་དང་མཆུ་ཟླ་ཤར་སྐབས་ཞེས་པ་དང༌། དོན་མཚུངས་པར་སྟོན་པས་དེ་ལ་ཚེ་སྐབས་ཞེས་བརྗོད་པ་ཡིན་ནོ། །རྣམ་དབྱེ་གཉིས་པ་དང༌། བཞི་པ། བདུན་པ་དང་། དེ་ཉིད་ཚེ་སྐབས་དག་གསལ་བར་བྱེད་པའི་རྐྱེན་ནམ་སྒྲ། སུ་ར་རུ་དུ་ན་ལ་ཏུ་བཅས་ཡིན་ཞིང༌། དེ་དག་ཕལ་ཆེར་ལ་སྒྲ་དང་འཇུག་པ་མཐུན་པས་ན་དེ་དག་ལ། ལ་དོན་གྱི་རྣམ་དབྱེའང་ཟེར་བ་སྟེ་མིང་དེ་ལྟར་བརྗོད། འོན་ཀྱང་དམིགས་བསལ་དུ་ན་དང་ལ་གཉིས་དེ་ཉིད་ལ་མི་འཇུག་པར་སྨྲ་བའི་སྒོ་ལས་ཞེས་པ་སྟེ། པཎྜི་ཏ་སྨྲྀ་ཏིས་མཛད་པའི། སྨྲ་སྒོ་མཚོན་ཆ་ཞེས་པའི་གཞུང་ལས། དུ་ལ་སོགས་པ་ལ་དང་མཐུན། །དེ་ཉིད་དག་ནི་ལྷག་པ་ཡིན། །ཞེས་དུ་ལ་སོགས་པ་དེ་ཉིད་ལ་ལྷག་པར་འཇུག་པ་ལས་ན་དང་ལ་མི་འཇུག་པར་གསུངས་པའི་ཕྱིར་རོ། །དེའང་དཔེར་ན་ལྷ་རུ་གསལ་དང་འོད་དུ་འཚེར་ལྷ་བུ་ལ། ལྷ་ལ་གསལ་འོད་ན་འཚེར་ལྟ་བུ་སྦྱར་ཚེ། ལྷ་དེ་ལ་གསལ་བའི་བྱ་བ་ཞིག་བྱེད་པོ་གཞན་ཞིག་གིས་བྱས་པ་ལྟ་བུའི། བརྗོད་ཚུལ་ཙམ་ལ་བྱ་བྱེད་ཐ་དད་དུ་གསལ་བའམ་སྟོན་པའི་སྒྲ་ཡིན་པའི་ཕྱིར། ན་ལ་གཉིས་དེ་ཉིད་དུ་བརྗོད་མི་བདེ་བ་དང་འཇུག་པར་དཀའ་བའི་རྒྱུ་མཚན་གྱིས། སྨྲ་སྒོ་དང་སི་ཏུའི་འགྲེལ་ཆེན་སོགས་གཞུང་ཚད་ལྡན་དག་ལས་ཀྱང་མི་འཇུག་པར་གསུངས་པའང་དོན་དེ་ལ་དགོངས་པར་སྣང་ངོ༌། །ཨི་ལྡན་གྱི་རྣམ་དབྱེ་འདྲེན་ཚུལ་བཤད་པ། རྣམ་དབྱེ་གང་ལ་སྦྱོར་ཡུལ་དེས། །ཉེ་འགྱངས་གང་དུ་བྱ་བ་ཞིག ། བྱས་ན་གསུམ་པ་བྱེད་སྒྲ་སྟེ། །དཔེར་ན་བདག་གིས་བཤད་ལྟ་བུ། །བྱ་བ་གཏན་ནས་མི་བྱེད་པར། །སྔ་ཕྱི་འབྲེལ་བྱེད་ཙམ་སྟོན་ན། །། རྣམ་དབྱེ་དྲུག་པ་འབྲེལ་སྒྲ་སྟེ། །དཔེར་ན་བདག་གི་མིག་ལྟ་བུ། །རྣམ་དབྱེ་གསུམ་དྲུག་གསལ་བྱེད་སྒྲ། ། ས་མཐའ་ཡོད་དང་མེད་པ་ཡི། །གི་ཀྱི་གྱི་འི་ཡི་ལྔ་ཡིན། །ཞེས་པས་བསྟན་ལ། རྣམ་དབྱེའི་རྐྱེན་ནམ་ཕྲད་གིས་ཀྱིས་གྱིས་འིས་ཡིས་རྣམས་གང་ལ་སྦྱོར་ཡུལ་མིང་ཚིག་གང་དེས། ཉེ་འགྱངས་གང་རུང་དུ་བྱ་བ་ཞིག་བྱས་པའམ་བྱེད་པ་ཞིག་སྟོན་ན་དེ་ནི་རྣམ་དབྱེ་གསུམ་པ་བྱེད་པའི་སྒྲ་སྟེ། དཔེར་ན། བདག་གིས་བཤད། ཁྱེད་ཀྱིས་གསོན། མིག་གིས་བལྟས། ལྟ་བུ་ཉེ་བའི་བྱ་བ་སྟེ་ཚིག་གཞན་གྱིས་བར་མ་ཆོད་པ་དང༌། སློབ་དཔོན་གྱིས་མདོ་སྨད་གསེར་ལྗོངས་བླ་རུང་རིག་པ་འབྱུང་བའི་གྲོང་ཁྱེར་གྱི་ཉེ་འདབས་ཤིག་ནས་སློབ་མའི་ཚོགས་ལ་རྒྱུན་དུ་དཔེ་ཁྲིད་གནང༌། ལྟ་བུ་ཅུང་འགྱངས་སར་བྱ་བ་བྱས་པ་དང༌། ཡང་རྣམ་དབྱེའི་རྐྱེན་དེ་དག་སྦྱར་ཡུལ་དེས་བྱ་བ་གཏན་ནས་མི་བྱེད་པར། འབྲེལ་གཞི་དང་འབྲེལ་ཆོས་སོགས་ཀྱི་མིང་ཚིག་སྔ་ཕྱི་འབྲེལ་བར་བྱེད་པ་ཙམ་སྟོན་པ་ན། རྣམ་དབྱེ་དྲུག་པ་འབྲེལ་སྒྲ་སྟེ། དཔེར་ན་བདག་གི་མིག ཤིང་གི་ཡལ་ག བྲག་སྟེང་གི་བྱ། བདག་གི་དཔེ་ཆ། ཁྱེད་ཀྱི་བུམ་པ། ལྟ་བུའོ། །རྣམ་དབྱེ་གསུམ་པ་དང་རྣམ་དབྱེ་དྲུག་པ་གསལ་བྱེད་ཀྱི་སྒྲའམ། རྣམ་དབྱེའི་རྐྱེན་ནི་ཀྱིས་སོགས་ས་མཐའ་ཡོད་པ་རྣམས་རྣམ་དབྱེ་གསུམ་པའི་རྐྱེན་དང༌། མེད་པ་ཡི་རྣམ་དབྱེ་དྲུག་པའི་རྐྱེན་རྣམས་ནི། གི་ཀྱི་གྱི་འི་ཡི་ལྔ་པོ་དེ་ཡིན་ནོ། །རྣམ་དབྱེ་ལྔ་བ་འདྲེན་ཚུལ། གང་ཞིག་གང་ལས་བྱུང་བ་འམ། །བྱེ་དང་ལྷུང་བའི་དོན་ལྡན་ན། །རྣམ་དབྱེ་ལྔ་པ་འབྱུང་ཁུངས་ཏེ། །དཔེར་ན་ཞལ་ནས་ཐོས་ལྟ་བུ། །གསལ་བྱེད་སྒྲ་ནི་ནས་ལས་ཏེ། །དགར་དང་སྡུད་པའང་ལྔ་པར་གཏོགས། །ཞེས་པས་བསྟན་ལ། ནས་ལས་ཀྱི་ཕྲད་གཉིས་ནི། བྱ་བ་དང་དངོས་པོ་སོགས་ཀྱི་བྲལ་ཆོས་གང་ཞིག་འབྱུང་ཁུངས་སམ་བྲལ་གཞི་གང་ལས་བྱུང་བའམ། སོ་སོར་བྱེ་བ་དང་ལྷུང་པའི་དོན་ལྡན་པ་ཞིག་སྟོན་ན། དེ་ནི་རྣམ་དབྱེ་ལྔ་པ་འབྱུང་ཁུངས་ཡིན་ཏེ། དཔེར་ན། ཞལ་ནས་ཐོས། བ་ལས་འོ་མ། ས་འོག་ནས་གཏེར་རྡོ། ལྟ་བུ་འབྱུང་ཁུངས་དངོས་ཏེ་དེ་གསལ་བར་བྱེད་པའི་སྒྲ་ནི་ནས་དང་ལས་གཉིས་ཅི་བདེར་སྦྱར་བས་འཐུས་ཏེ། ཡང་གང་ཞིག་གང་ལས་བྱུང་བ་དང་བྱེ་བའི་དོན་གཉིས་ཀ་དང་མི་ལྡན་པ་འབྱུང་ཁུངས་ཆ་འདྲ་སྟེ། དཔེར་ན། གཡང་ལས་ལྷུང༌། ལྟ་བུ་ལ་བྱེ་བའི་དོན་ལྡན་ཡང་བྱུང་བའི་དོན་ལྡན་པ་མ་ཡིན་པ་དང༌། ས་བོན་ལས་མྱུ་གུ་ལྟ་བུ་ལ་བྱུང་བའི་དོན་ཙམ་ལྡན་ཡང་བྱེ་བའི་དོན་མི་ལྡན་པས་ཆ་འདྲ་བའོ། །དེ་བཞིན་ཕྲད་དེ་གཉིས་འཇུག་ཡུལ་དགར་བ་སྟེ། དཔེར་ན། བྱ་ཡི་ནང་ནས་ཁྱུང་ཆེན། དངུལ་ལས་གསེར་ལྕི་ལྟ་བུ་དང༵༌། སྡུད་པ་སྟེ། མདོ་སྨད་ནས་ལྷ་སའི་བར། གསུམ་ནས་ལྔའི་བར། ལྟ་བུ་སྡུད་པའང་རྣམ་དབྱེ་ལྔ་པར་གཏོགས་སོ། །ཚིག་ཕྲད་སོགས་འདྲེན་ཚུལ།གཞན་ཡང་ཚིག་དོན་གོང་འོག་ཏུ། །བསྡུ་རྒྱུ་ཡོད་ན་སྡུད་པའི་སྒྲ། །དང་དང་ཀྱང་ཡང་འང་སོགས་སྦྱོར། །རྣམ་གྲངས་དུ་མས་དོན་བསྐྱར་ན། །འབྱེད་སྡུད་སྒྲ་འཇུག་དགག་པ་དང༌། །བདག་དོན་ཡོད་ན་ཐོག་མཐའ་རུ། །པ་སྡེའི་རྟགས་རྣམས་ཅི་རིགས་འཇུག ། རྒྱན་དུ་གྱུར་པའི་ཚིག་ཕྲད་ཀྱང༌། །དོན་ལ་བསྙེགས་པ་ཡོད་ན་སྦྱོར། །དེ་བཞིན་བསྟན་བྱ་ལྷག་ཡོད་ན། །ལྷག་བཅས་སྒྲ་སྦྱོར་ཚིག་དོན་ནི། །རྫོགས་ན་སླར་བསྡུའི་སྒྲ་རྣམས་སྦྱོར། །ཞེས་པ་ལྟར། གཞན་ཡང་ཚིག་དོན་གོང་འོག་ཀུན་ཏུ་བསྡུ་རྒྱུ་ཡོད་པ་ཞིག་ཡིན་ན་སྡུད་པའི་སྒྲ་དང་དང༌། ཀྱང་ཡང་འང་དང་གམ་སོགས་ཕྲད་བཅུ་གཅིག་རྣམས་སྦྱོར་དགོས་ཏེ། དཔེར་ན། སྒྲ་དང༌། ཚད་མ་དང༌། བཟོ་དང༌། གསོ་བ་དང༌། ནང་དོན་རིག་པ་བཅས་ནི་རིག་གནས་ལྔའོ། །ལྟ་བུ་དང༌། གཟུགས་སམ། སྒྲ་འམ། དྲི་འམ། རོ་འམ། རེག་བྱ་རྣམས་ནི་ལྟ་བུ་གམ་སོགས་ཀྱིས་སྡུད་པ་དང༌། ཡོན་ཏན་མེད་ཀྱང་ཕན་སེམས་ཆེ། དཔོན་པོ་མིན་ཡང་སེམས་སྟོབས་ཆེ། ལྟ་བུ་སོགས་སོ། །ཚིག་དོན་སོགས་རྣམ་གྲངས་དུ་མས་དོན་གཅིག་ཡང་བསྐྱར་དུ་བརྗོད་ན་འབྱེད་སྡུད་ཀྱི་སྒྲ་སོགས་འཇུག་ལ། དཔེར་ན། རྟ་བདུན་དབང་པོ་འམ། རྟ་ལྗང་ཅན་ནམ། སྣང་བྱེད་དམ། འོད་ཟེར་བརྒྱ་པ་རྣམས་ནི་ཉི་མའི་མིང་ངོ་ལྟ་བུ་དང༌། ཡང་གསུངས་པ། ཡང་ནས་ཡང༌། སླར་ཡང་། ལྟ་བུའོ། །དེ་བཞིན་དགག་པའི་དོན་ཅན་དང་བདག་པོའི་དོན་སྟོན་པ་ཅན་ཡོད་ན། མིང་ཚིག་དེ་དག་གི་ཐོག་མ་དང་མཐའ་མ་རུ་པ་སྡེའི་རྟགས་ཅན་ནམ་སྡེ་བ་བཞི་པ་པ་སྡེའི་ཡི་གེ་ཅི་རིགས་པ་འཇུག་སྟེ། དཔེར་ན། མ་ཡིན་ནོ། །མི་མཛའ། གཟུགས་མེད། ཡོད་པ་མིན་ལྟ་བུ་དགག་སྒྲ་དང༌། གསེར་པ། རྟ་པ། སྒྲུབ་པ་པོ། ཁ་ལོ་བ། གཏོང་བ་བོ། ཇ་མ། བཙུན་མོ། རིག་པ་ཅན། ཤེས་ལྡན་ལྟ་བུ་བདག་སྒྲའི་དོན་ཅན་སོགས་ལ་སྦྱར་བར་བྱའོ། །མཐུན་མི་མཐུན་སོགས་ཀྱི་ཚིག་གི་རྒྱན་དུ་གྱུར་པའི་ཚིག་ཕྲད་ཀྱང་ཡང་འང་གསུམ་སོགས་ཀྱང་ངེས་པར་དོན་ལ་བསྙེགས་པ་ཡོད་ན་སྟེ། ཕན་པ་དང་དགོས་པ་ཡོད་ན་སྦྱོར་དགོས་པ་ཡིན་ཏེ། དཔེར་ན། མཐུན་ཡང་མཐུན། སོན་བཏབ་ཀྱང་མ་སྐྱེ་ལྟ་བུ་སྔ་ཕྱི་ཚིག་གི་རྒྱན་དུ་འཇུག་པའོ། །དེ་བཞིན་དུ་ད་དུང་དེ་མ་ཐག་ཏུ་བསྟན་པར་བྱ་རྒྱུའི་ཚིག་དོན་ལྷག་མ་ཡོད་ན། སྔ་མ་ལ་ལྷག་བཅས་ཀྱི་སྒྲ་ཏེ་དེ་སྟེ་གསུམ་སོགས་སྦྱོར་དགོས་ཏེ། དཔེར་ན། མནན་ཏེ་བཞག བློ་གཏད་དེ་ཕྱིན། བཅག་སྟེ་དོར་ལྟ་བུ་ལྷག་བཅས་ལ་འཇུག་པའོ། །མིང་དང་ཚིག་གི་དོན་ནི་དེ་ཉིད་ཀྱི་འཕྲོ་དེ་མ་ཐག་ཏུ་རང་གི་བསྟན་བྱ་མེད་པར་རྫོགས་པ་ཡིན་ན། སླར་བསྡུའི་སྒྲ་གོ་སོགས་མིང་ཚིག་གི་མཐའ་རྣམས་སུ་སྦྱོར་དགོས་ཏེ། དཔེར་ན། མཆོག་གོ ། བདག་སོང་ངོ༌། །དེ་ཡོད་དོ། །ལྟ་བུ་རྫོགས་ཚིག་ལ་འཇུག་པའོ། །བཞི་པ། རྗེས་འཇུག་རྣམས་དགོས་པ་ཅི་ཕྱིར་འཇུག་པ་བཤད་པ། དགོས་པ་ཅི་ཕྱིར་འཇུག་ཅེ་ན། །མོ་ཡིག་དབྱངས་དང་མི་ལྡན་ན། །ཕོ་ཡིག་གསལ་བྱེད་བརྗོད་མི་ནུས། །དེ་ཕྱིར་དབྱངས་ལྔར་བཞེད་པ་བདེ། །ཕོ་ཡིག་དབྱངས་ལྡན་དེ་དག་ལའང༌། །རྗེས་འཇུག་བཅུ་པོ་མ་ཞུགས་ན། །དོན་གྱི་ངོ་བོ་ཙམ་སྟོན་པའི། །མིང་དང་དོན་གྱི་ཁྱད་པར་རྣམས། །སྟོན་པའི་ཚིག་དང་དོན་ལྡན་པའི། །ངག་གི་བརྗོད་པ་ཡོད་མིན་ཏེ། །ཡི་གེའི་ཁོངས་ནས་མིང་དབྱུང་ཞིང༌། །མིང་གི་ཁོངས་ནས་ཚིག་ཕྱུང་ནས། །ཚིག་གིས་དོན་རྣམས་སྟོན་པས་སོ། །ཞེས་པས་བསྟན་ཏེ། རྗེས་འཇུག་རྣམས་དགོས་པ་ཅི་ཕྱིར་འཇུག་པར་བྱེད་ཅེ་ན། སྤྱིར་དབྱངས་མོ་དང་གསལ་བྱེད་ཕོ་ཡིན་པའི་ཕྱིར་ན། མོ་ཡིག་གི་དབྱངས་དང་མི་ལྡན་པའམ་མེད་པར་གྱུར་ན། ཕོ་ཡིག་ཁོ་ནའི་བརྗོད་དོན་མཐའ་དག་སྟོན་མི་ནུས་པ་དང༌། ཕོ་ཡིག་གི་གསལ་བྱེད་སུམ་ཅུ་པོ་རྣམས་ཀྱང་ཨའི་སྒྲ་དང་མི་ལྡན་པར་བརྗོད་ཙམ་ཡང་མི་ནུས་ལ། དེའི་ཕྱིར་བོད་རང་ལའང་ཨ་དང་བཅས་དབྱངས་ལྔར་བཞེད་པའང་བདེ་བ་ལས་འགལ་བ་ཅུང་ཟད་ཙམ་ཡང་མེད་པར་སྣང་ངོ་ཞེས་གསུངས་པའོ། །ཕོ་ཡིག་རྣམས་དབྱངས་གང་རུང་རེ་དང་ལྡན་པར་གྱུར་པ་དེ་དག་ལའང༌། རྗེས་འཇུག་བཅུ་པོ་གང་རུང་ཞིག་མ་ཞུགས་ན་ཕོ་ཡིག་དབྱངས་ལྡན་རྐྱང་པས་དོན་གྱི་ངོ་བོ་ཙམ་སྟོན་པའི་མིང་དང༌། དོན་གྱི་ཁྱད་པར་རྣམས་སྟོན་པའི་ཚིག་དང༌། དོན་དང་ལྡན་པའི་བརྗོད་པ་བཅས་ངག་གི་བརྗོད་པ་མཐའ་དག་ལས་གཅིག་ཀྱང་ཡོང་བའམ་ཡོད་པ་མིན་ཏེ། དཔེར་ན། ཀ སྒོ། ཅི། འདྲ། ལྟ་བུ་རྣམས་ཀྱང་རྗེས་འཇུག་འ་ཡིག་རེ་མ་ཞུགས་པར་དོན་གང་ཡང་མི་སྟོན་པ་ལྟ་བུའོ། །དེ་ཕྱིར་ཡི་གེ་གཉིས་ཡན་ཆད་ཅིག་འདུས་པ་དེའི་ཁོངས་ནས་དོན་གྱི་ངོ་བོ་སྟོན་པའི་མིང་གྲུབ་པའམ་མིང་དབྱུང་བར་བྱ་ཞིང༌། དཔེར་ན། བརྡ། སྐད། རང༌། གཞན། ལྟ་བུ་དང༌། མིང་གི་ཡི་གེ་གཉིས་ཡན་ཆད་ཅིག་འདུས་པ་དེའི་ཁོངས་ནས། དོན་གྱི་ཁྱད་པར་སྟོན་པའི་ཚིག་ཕྱུང་ནས་ཞེས་མིང་ལས་ཚིག་གྲུབ་པ་ཡིན་ཏེ། དཔེར་ན། ཀ་བ་ཟུར་བརྒྱད་པ་ཅན། གསེར་གྱི་བུམ་པ་སྐེ་རིང༌། ལྟ་བུའོ། །ཚིག་དེ་དག་གིས་དོན་རྣམས་སྟོན་པ་ཡིན་ཏེ། ཚིག་གཉིས་ཡན་ཆད་ཅིག་འདུས་པའི་བརྗོད་པ་དེས་སྐབས་བབ་བསྟན་བྱའི་དོན་དེ། རྒྱས་བསྡུས་ཅི་རིགས་པར་བསྟན་ནས་དོན་རྣམས་གསལ་བར་བྱེད་པའམ་སྟོན་པར་བྱེད་པས་སོ། །གསུམ་པ། མཇུག་གི་དོན། ཡི་གེའི་འཇུག་པ་སྤྱིའི་དགོས་པ་བརྡ་སྤྲོད་པའི་བསྟན་བཅོས་ཀྱི་དགོས་པ་གཉིས་ལས། དང་པོ། ཡི་གེའི་འཇུག་པ་སྤྱིའི་དགོས་པ་སོགས་བཤད་པ། མིང་ཚིག་བརྗོད་པ་མེད་ན་ནི། །མཐུན་མོང་མཐུན་མོང་མ་ཡིན་པའི། །ཤེས་བྱ་སྟོན་པའང་མེད་པར་འགྱུར། །དེ་ཕྱིར་འཕགས་ཡུལ་མཁས་རྣམས་ཀྱི། །རྗེས་སུ་འབྲངས་ནས་གསུངས་པ་འདི། །སྐྱེ་བོ་ཀུན་གྱིས་རྟོགས་གྱུར་ཅིག ། དེ་ལྟར་མིང་དང་ཚིག་བརྗོད་པ་མཐའ་དག་མེད་ན་ནི་འཇིག་རྟེན་འདིར་དོན་མཚོན་པའི་བརྗོད་པ་སྟེ། ལུང་དུ་སྟོན་པའི་སྒྲ་སྐད་ཐམས་ཅད་མི་འབྱུང་བས། དེ་ལ་ལྟོས་པའི་འཇིག་རྟེན་པ་དང་མཐུན་མོང་བའི་བཟོ་རྩིས་དང་སྙན་ངག་སོགས་རིག་བྱེད་སྨྲ་བ་རྣམས་ཀྱང་ཡོད་པར་མི་འགྱུར་ཞིང༌། མཐུན་མོང་མ་ཡིན་པ་འཇིག་རྟེན་ལས་འདས་པར་འཇུག་པའི་ཤེས་བྱ་ཉན་ཐོས་རང་རྒྱལ་དང༌། རྫོགས་པའི་སངས་རྒྱས་ཀྱི་བསླབ་པ་རྣམས་ཀྱི་དོན་སྨྲ་ཞིང་སྟོན་པའང་མེད་པར་འགྱུར་བ་དེའི་ཕྱིར། ཐུ་མི་སམ་བྷོ་ཊས་རྒྱ་གར་འཕགས་པའི་ཡུལ་གྱི་མཁས་དབང་པཎྜི་ཏ་ལྷ་རིག་པའི་སེངྒེ་དང་བྲམ་ཟེ་ལི་བི་ཀ་ར། ཡིག་མཁན་བདེ་བྱེད་དགའ་བ་སོགས་མཁས་པ་རྣམས་དང༌། སྒྲ་ཀ་ཙན་དབྱངས་སོགས་སྒྲ་རིག་པའི་བསྟན་བཅོས་རྣམས་ཀྱི་རྗེས་སུ་འབྲང་ནས་བོད་འདིར་བརྡ་སྤྲོད་པའི་བསྟན་བཅོས་བརྒྱད་སོགས་མཛད་པ་དེ་དག་ལས་སུམ་ཅུ་པ་དང་རྟགས་འཇུག་གི་གཞུང་དེ་དག་ལ་བརྟེན་ནས་གསུངས་པའི་རྟགས་འཇུག་གི་སྙིང་དོན་གསལ་བོར་བྱེད་པའི་བསྟན་བཅོས་འདི་སྐྱེ་བོ་མཆོག་དམན་ཀུན་ཀྱིས་འདིས་དོན་ཚུལ་བཞིན་དུ་རྟོགས་པར་གྱུར་ཅིགགཉིས་པ། བརྡ་སྤྲོད་པའི་བསྟན་བཅོས་ཀྱི་དགོས་པ་སོགས་བཤད་པ། ཚིག་གི་སྒྲ་ཙམ་འདྲ་ན་ཡང༌། །དོན་ལ་ཁྱད་པར་ཤིན་ཏུ་ཆེ། །དེ་ཕྱིར་བརྡ་དག་ལ་བརྟེན་ནས། །མ་ནོར་དོན་རྣམས་འཚོལ་བ་གཅེས། །དོན་ལ་མི་རྨོངས་རྨོངས་པ་ཡང༌། །ལུགས་འདིར་མཁས་མིན་གྱིས་བྱེད་དེ། །སྒྲ་ཤེས་དོན་ལ་མི་རྨོངས་ཞེས། །མཁས་པའི་གསུང་ལ་ཡོངས་སུ་གྲགས། །འདི་ལ་མ་སྦྱངས་རྨོངས་ཚོད་ཀྱིས། །འཆད་རྩོད་རྩོམ་པའི་གྲལ་འཇུག་ན། །ཝ་སྐྱེས་སེང་ལྤགས་གྱོན་པ་བཞིན། །ནམ་ཞིག་རྗེས་ངན་གསལ་བར་འགྱུར། །དེ་ཕྱིར་བློ་གསལ་དོན་གཉེར་རྣམས། །རྟགས་འཇུག་དཀའ་གནད་གཟུགས་བརྙན་ཀུན། །གསལ་བར་འཆར་བའི་མེ་ལོང་འདི། །ལ་འུར་གཟིགས་མོར་སྤྱོན་དང་ཀྱེ། །འདི་ལ་ནོངས་པའི་ཚོགས་མཆིས་ན། །གཟུར་གནས་མཁས་པའི་སྤྱན་སྔར་འཆགས། །ཅུང་ཟད་འབད་ལས་ཐོབ་པའི་དགེས། །ཀུན་གྱིས་འདི་དོན་རྟོགས་པར་ཤོག ། ཅེས་པས་བསྟན་ཏེ། དེའང་དཔེར་ན། རྟགས་མཚན་དང༌། རྟག་པ གཉིས་ཀྱི་རྟག་ཞེས་པའི་སྒྲ་འདྲ་བ་ཙམ་དང༌། སྤྱན་གྱིས་གཟིགས་དང་སྟག་གཟིག་དང༌། ཁོངས་གཏོགས་དང་དོན་རྟོགས་སོགས་ཚིག་གི་སྒྲ་ཙམ་ཞིག་འདྲ་བ་ཡོད་ནའང༌། དོན་ལ་ཁྱད་པར་ཤིན་ཏུ་ཆེ་སྟེ། དཔེར་ན། སྡང་བའི་སྒྲ་ཞེས་བྲིས་ན་མཉན་བྱའི་སྒྲ་སྡང་བ་ལྟ་བུ་ལས། སྡང་དགྲ་ལ་གོ་བར་མི་འགྱུར་བས། མཉན་བྱའི་སྒྲ་དང་སྡང་བའི་དགྲ་ཞེས་སོ་སོར་མ་ནོར་བར་འབྲི་དགོས་པ་ཡིན་ཏེ་དོན་གྱི་ཁྱད་པར་ཚིག་གི་ནུས་པ་ལ་བརྟེན་པའི་ཕྱིར། ཁྱད་པར་མང་དུ་ཡོད་པས་དེ་ཕྱིར་སུམ་རྟགས་དག་གསུམ་སོགས་བརྡ་དག་རྣམས་ལ་ལེགས་པར་བརྟེན་པའམ་སྦྱངས་བར་བྱས་ནས། བརྡ་སྐད་ཐམས་ཅད་ཀྱི་སྦྱོར་བ་མ་ནོར་བའི་དོན་ཡང་དག་པ་རྣམས་ལེགས་པར་འཚོལ་བ་ནི་ཤིན་ཏུ་གཅེས་སོ་ཞེས་གསུངས། སྒྲ་ཤེས་པའམ་བརྡ་སྤྲོད་པའི་བསྟན་བཅོས་ཤེས་ན་དོན་ལ་མི་རྨོངས་བར་འགྱུར་བ་དང༌། དོན་ལ་རྨོངས་པའི་སྐྱེ་བོ་ཡང་བརྡ་དག་པར་སྦྱོར་བའི་བསྟན་བཅོས་ཀྱི་ལུགས་འདིར་མཁས་པ་མིན་པའི་རྐྱེན་གྱིས་བྱེད་པ་དེའམ། བརྡ་དག་པར་སྦྱོར་བའི་ལུགས་འདིར་མཁས་དང་མི་མཁས་པས་སྐྱེ་བོ་ཀུན་ཀྱང་རྨོངས་དང་མི་རྨོངས་པའི་ཁྱད་པར་འབྱེད་པའང་སུམ་རྟགས་མ་ཤེས་པས་ལན་པ་ཡིན་ནོ། །སྤྱིར་སྒྲ་རིག་པའི་བསྟན་བཅོས་འདི་ཤེས་ན་དོན་གང་དང་གང་ལ་མི་རྨོངས་པའམ་རྨོངས་པར་མི་འགྱུར་ཞེས། སྔོན་བྱོན་མཁས་པའི་གསུང་ལ་ཡོངས་སུ་གྲགས་པའི་ཕྱིར་རོ། །གལ་ཏེ་སྒྲ་རིག་པའི་བསྟན་བཅོས་འདི་དག་ལ་ཐོག་མར་མ་སྦྱངས་བར་རྨོངས་པ་རྣམས་ཀྱི་བློས་དཔག་ཚོད་ཀྱིས། གཞུང་འཆད་པ་དང་རྩོད་པ་རྩོམ་པའི་ཚོགས་གྲལ་དུ་འཇུག་པ་ན། དེ་ནི། དཔེར་ན། ཝ་སྐྱེས་དེ་སྔོན་ཝ་རྒན་པོ་ཞིག་གིས་སེང་གེའི་པགས་པ་གྱོན་པའམ་ཚོན་གྱིས་བསྒྱུར་བའི་ཝ་མོ་དེས་རྫུན་གྱིས། སྐབས་ཞིག་རི་དྭགས་རྣམས་ཀྱིས་རྒྱལ་པོར་བཀུར་ཀྱང༌། ནམ་ཞིག་ཝ་ཡིན་པར་ཤེས་ནས་རང་གི་སྲོག་ཀྱང་འདོར་དགོས་བྱུང་བ་བཞིན་དུ། རེ་ཞིག་འཆད་རྩོད་རྩོམ་པའི་གྲལ་དུ་ཞུགས་ཀྱང་ནམ་ཞིག་བརྡ་དག་པའི་བསྟན་བཅོས་མི་ཤེས་པའི་རྗེས་ངན་ནམ་སྐྱོན་དེ་གསལ་བར་འགྱུར་བ་ཡིན་ནོ། །དེ་ཕྱིར་བློ་གསལ་ལ་བརྡ་སྤྲོད་དོན་དུ་གཉེར་བར་འདོད་པ་རྣམས་ཀྱིས་རྟགས་འཇུག་གི་དཀའ་གནད་ཀྱི་གཟུགས་བརྙན་ཀུན་གསལ་བར་འཆར་བའི་གཞུང་མེ་ལོང་ལྟ་བུ་འདིར། མྱུར་མོར་ཏེ་ལ་འུར་གཟིགས་མོར་བྱོན་པར་གྱིས་དང་ཀྱེ་བློ་གསལ་དོན་གཉེར་དང་ལྡན་པ་རྣམས། ཞེས་སློབ་གཉེར་ནན་ཏན་བྱེད་པར་བསྐུལ་མ་གནང་བའོ། །རྟགས་ཀྱི་འཇུག་པའི་གཞུང་འདི་ལ་ནོངས་པའམ་ནོར་འཁྲུལ་ཉེས་པའི་ཚོགས་ཅི་ཞིག་མཆིས་ནའམ་ཡོད་པ་རྣམས་ཀྱང༌། བློ་གཟུར་གནས་མཁས་པའི་སྤྱན་སྔར་འཆགས་པའམ་བཤག་པར་བྱེད་དོ། །གཞུང་འདི་ལ་ཅུང་ཟད་འབད་པ་ལས་ཐོབ་པའི་དགེས་སམ་དགེ་བ་དེས། གངས་ཅན་ཀྱི་སྐྱེ་བོ་ཀུན་གྱིས་ཡི་གེའི་འཇུག་པ་ལེགས་པར་སྦྱར་བའི་ཚུལ་འདིའི་དོན་རྟོགས་ནས་མིང་ཚིག་བརྗོད་པ་ཐམས་ཅད་ལ་རྨོངས་པ་མེད་པར་སྨྲ་བའི་དབང་ཕྱུག་ཆེན་པོར་ཐོབ་པར་ཤོག་ཅིག ཅེས་རྟགས་ཀྱི་འཇུག་པའི་སྙིང་པོའི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་ཞེས་བྱ་བ་འདི་ནི། རང་གི་སློབ་བུ་རྗེས་དྲུང་སངས་རྒྱས་རྒྱ་མཚོ་དང་དོན་གྲུབ་ཕུན་ཚོགས་གཉིས་ཀྱིས་དགོས་ཚུལ་ལྟར། མཁས་མཆོག་སི་ཏུ་པཎ་ཆེན་དང་ཐམས་ཅད་མཁྱེན་པ་དྷརྨ་བྷ་དྲ་དངུལ་ཆུ་ཆོས་བཟང་དཔལ་བཟང་པོའི་བཞེད་པ་དང་མཐུན་པར་དབྱངས་ཅན་གྲུབ་པའི་རྡོ་རྗེས་སྦྱར་བའོ། །ཞེས་པའོ། །དེ་ལྟར་རྟགས་འཇུག་གི་དོན་མདོ་ཙམ་བརྗོད་པ་དཀའ་གནད་གསལ་བའི་མེ་ལོང་གི་ཚིག་དོན་གྱི་ཆ་རྣམས་རང་བློས་གང་དཔོག་ཙམ་རེ་ཞིག་བཤད་ཟིན་ཏོ།། །། སླར་སྨྲས་པ། མཐའ་བྲལ་ཆོས་དབྱིངས་ཀུན་ཁྱབ་ལྷ་ལམ་གྱི་དབྱིངས་སུ། །སྒྱུ་འཕྲུལ་སྟངས་སྟབས་རྩེན་པའི་ངེས་དོན་གྱི་ཟླ་གཞོན། །མིང་ཚིག་ཡི་གེའི་སྦྱོར་བའི་གཤོག་ཟུང་ལ་བརྟེན་དང༌། །འོད་དཀར་ཟེགས་མ་སྙིང་གི་གདུང་སེལ་དུ་ལེན་ཆོག ། རིག་གཞུང་རླབས་ཕྲེང་འཛུམ་པའི་ཆུ་གཏེར་གྱི་ཀློང་ནས། །བཅུ་ཕྲག་རིན་ཆེན་ཁུར་བའི་མཁས་དབང་གི་གྲལ་དུ། །རྣམ་དཔྱོད་གོམ་སྟབས་སྒྱུར་བའི་དཔའ་ཉམས་ཞིག་ལྡན་ན། །བརྡ་དག་གྲུ་ལ་མ་བརྟེན་བགྲོད་ཐབས་ནི་མི་འདུག ། གྲགས་པ་བླ་ན་འབར་པའི་ཁང་བཟང་གི་དབུས་སུ། །ཡོན་ཏན་བྱེ་བའི་མཛོད་ཅིག་རྒྱང་རིང་ན་བཀྲ་ཡང༌། །ཐ་སྙད་སྦྱོར་བའི་ཐེམ་སྐས་རང་ལག་ཏུ་མེད་ན། །མཁས་པའི་ཁང་བཟང་རྩེ་མོར་འཛེག་འདོད་ཅིག་མ་སྐྱེ། །ངག་རིག་སྨྲ་བའི་ཡིད་དབང་ཀུ་མུད་ཀྱི་འདབ་བརྒྱ། །ཅིག་ཅར་བཞད་པའི་སྙན་ངག་དཔག་བསམ་གྱི་ལྗོན་པ། །བརྡ་སྤྲོད་རིག་པའི་རྒྱ་མཚོ་བསྲུབས་པ་ཞིག་མེད་ན། །སྐྱིད་ཉལ་ལོ་ཟླའི་ཀློང་ནས་འཆར་བ་ནི་མ་ལགས། །མཁས་རློམ་སྙེམས་པའི་ཁྲི་ལ་བག་ཕེབས་སུ་འགྱིངས་ནས། །ཐ་སྙད་ཡིག་སྡེབ་ཙམ་ལ་བློ་མིག་དང་བྲལ་བཞིན། །འཆད་ཉན་བྱིས་པའི་ཟློས་གར་སྒྱུར་བ་ལ་བལྟས་ན། །ལུང་ལ་མ་བརྟེན་རྟོགས་པའི་བསྟན་པ་ཞིག་རྙེད་སྐད། །བློ་གསལ་བློ་ཡི་ལང་ཚོ་དབྱར་གསུམ་གྱི་མེ་ཏོག ། མི་བཟད་ལེ་ལོའི་སད་ཀྱིས་འཇོམས་པ་ལ་ཉེ་བས། །གུས་རྟག་བརྩོན་པ་གཉིས་ཀྱི་ར་བ་རུ་ཕེབས་དང༌། །ལེགས་བཤད་ཉི་མའི་འོད་འདིས་ལ་འུར་དུ་སྲུང་ཆོག ། གཏིང་ཟབ་རྟོགས་དཀའ་བརྡ་སྤྲོད་རིག་པ་ཡི་གཞུང་ལུགས། །གང་འདིར་བློ་དམན་བདག་གིས་མ་རྟོགས་པའི་འཁྲུལ་བ། །མཁྱེན་ལྡན་མཁས་དབང་རྣམས་ཀྱིས་སྤྱན་སྔར་དུ་བཤགས་ན། །ལབ་བརྡོལ་སྨྲ་བ་བདག་ལ་བཟོད་སྒོམ་ཞིག་གནང་རོགས། །ཞེས་སུམ་ཅུ་པའི་སྙིང་པོ་ལེགས་བཤད་ལྗོན་པའི་དབང་པོའི་འགྲེལ་བ་གསལ་བྱེད་ཉི་མའི་འོད་སྣང་དང༌། རྟགས་འཇུག་གི་སྙིང་པོ་དཀའ་གནད་གསལ་བའི་མེ་ལོང་གི་འགྲེལ་བ་ལེགས་བཤད་ཟླ་བའི་ཟེགས་མ། འདི་ཉིད་རང་དང་སྐལ་བ་མཉམ་པའི་གསར་སློབ་འགའ་ཞིག་ལ་སྤྱི་ལོ ༢༠༠༥ ལོའི་རིག་གནས་འཛིན་གྲྭར་དཔེ་ཁྲིད་བྱེད་སྐབས། ཆོས་ཀྱི་གྲོགས་པོ་འགའ་ཞིག་གིས་ཡང་ཡང་བསྐུལ་ངོར་མ་བཟློགས་ཙམ་དང༌། རང་བློ་རིག་པའི་གནས་ལ་གོམ་ཕྱིར་དུ་དཔལ་སྔ་འགྱུར་རྙིང་མའི་གདན་ས་གངས་ལྗོངས་མཁས་དབང་འདུས་པའི་ཆོས་གྲྭ། བླ་རུང་ལྔ་རིག་ནང་བསྟན་སློབ་གླིང་གི་གྲལ་མཐར་སྙེག་པའི་སྙོམ་ལས་པ། རྨེ་གྲྭ་ཚེ་རིང་བསམ་འགྲུབ་ཏུ་འབོད་པས་རབ་བྱུང་བཅུ་བདུན་པའི་ཤིང་བྱ་ལོའི་ཆུ་སྟོད་ཟླ་བའི་དཀར་ཕྱོགས་ལ། ས་སྙིང་དུང་སྒྲུབ་ཆེན་མོའི་སྐབས་ཐུན་མཚམས་རྣམས་སུ་གང་དྲན་ཞིག་ཡི་གེར་བཀོད་ནས་གྲུབ་བར་བྱས་པ་འདིས་ཀྱང་བསྟན་འགྲོ་ལ་ཕན་པའི་རྒྱུར་གྱུར་ཅིག། །།
འབྲེལ་ཡོད་འོས་སྦྱོར།
