ནག་ཆུའི་སློབ་གསོའི་འཕེལ་རྒྱས་ཁྲོད་ངེས་པར་དུ་སེལ་དགོས་པའི་རྐྱེན་གླེང་བ།

　　ནག་ཆུའི་ཕྱི་སྣོད་ཀྱི་ས་བབ་མཐོ་ཞིང་གསོ་རླུང་དཀོན་པ་སོགས་ཀྱི་རང་བྱུང་ཁོར་ཡུག་ཞན་པ་མ་ཟད་གཏན་སྡོད་མིན་པའི་འཚོ་སྟངས་སོགས་ཞན་ཆ་དེ་རིགས་ཀྱི་རྐྱེན་པ་དང་གཅིག་ནང་ཡུལ་ཅན་སློབ་མའི་ཁྱིམ་བདག་གི་སློབ་གསོའི་ངོས་འཛིན་དམའ་ཞིང་སྲོལ་རྒྱུན་འདུ་ཤེས་ཆེ་བ་སོགས་ཀྱི་བཀག་རྡོ་ཆེན་པོ་ཞིག་གིས་འབྲོག་ཁུལ་གྱི་སློབ་གསོ་འཕེལ་རྒྱས་ལ་འགོག་རྐྱེན་ཇི་ལྟ་བུ་ཡོད་པ་དང་དེ་ཇི་ལྟར་སེལ་བའི་སྐོར་ལ་དབྱེ་ཞིབ་མདོ་ཙམ་ཞུ་རྒྱུ་ཡིན།།

　　བརྡ་ཆད་གཙོ་བོ།  ནག་ཆུ།   སློབ་གསོ།   བཀག་རྡོ།  སེལ་ཐབས།        

　　མི་རིགས་ཤིག་ཕྱོགས་ཡོངས་ནས་འཕེལ་རྒྱས་འགྲོ་དགོས་ན་སློབ་གསོ་སྔོན་དུ་འཕེལ་རྒྱས་འགྲོ་དགོས་ཤིང་སློབ་གསོ་མྱོང་བ་ལས་མི་རིགས་ཤིག་ལ་རེ་བ་ཡོད་ལ་སློབ་གསོ་མྱོང་བལས་མི་སྒེར་ཅིག་གི་ལས་དབང་ལ་ཁ་ལོ་བསྒྱུར་ཐུབ་དེ་ཡང་ནག་ཆུ་ནི་བོད་ལྗོངས་བྱང་ཕྱོགས་བྱང་རྩྭ་ཐང་སྟེང་དུ་ཆགས་ཤིང་མཐོ་ཚད་རྒྱ་མཚོའི་ངོས་ལས་རྨིད་༤༥༠༠ཟིན་པ་དང་།ས་བབས་མཐོ་ལ་གྲང་ངར་ཆེ་ཞིང་གསོ་རླུང་དཀོན་པར་བརྟེན་འཚོ་གནས་ཀྱི་ཆ་རྐྱེན་ཞན་པས“འཛམ་གླིང་མཐོ་སྒང་གི་ཡང་རྩེར”འབོད་སྲོལ་ཡོད།ས་ཆ་འདིར་འཚོ་སྡོད་བྱེད་པའི་བོད་བྱང་ཐང་གི་མི་རིགས་ཁག་གི་མི་དམངས་ཁྲི་ཚོ༤༣གྱིས་མིའི་རིགས་ཀྱི་དེང་རབས་ཤེས་དཔལ་གྱི་འབྲས་བུ་ལོངས་སྤྱོད་བྱེད་པར་ཕུགས་རེ་བཅོལ་ཞིང་དར་རྒྱས་འགྲོ་བཞིན་པའི་ས་ཁུལ་གྱི་མི་རྣམས་དང་གཅིག་མཚུངས་ཀྱི་སློབ་གསོ་དང་ཞེན་དང་།གང་མགྱོགས་བླུན་རྨོངས་ཚོར་མེད་ཀྱི་གནས་ལས་གྲོལ་ཐོག་དེང་རབས་ཤེས་དཔལ་གྱི་གྲལ་དུ་སྐྱོད་ཐུབ་པ་དང་དེང་རབས་ཚན་རིག་རིག་གནས་ཤེས་བྱ་ཁོང་དུ་ཆུད་པར་བྱས་ནས་རང་ཉིད་ཀྱི་ལས་དབང་ལ་བསྒྱུར་བཀོད་གཏོང་ཐུབ་པའི་མི་ཞིག་ཆགས་པར་ཕུགས་རེ་བཅོལ་བཞིན་ཡོད་།ལྷག་དོན་དུ་ཉེ་བའི་ལོ་འགའ་ནང་ས་གནས་མི་དམངས་ཡོངས་ཀྱི་སྟོབས་ཤུགས་ལ་བརྟེན་པ་དང་དཀའ་སྤྱད་འབད་འཐབ་བྱེད་པ།རིམ་ཁག་འགོ་ཁྲིད་ཀྱིས་དམ་འཛིན་ལྷོད་མེད་གནང་བ་དང་སློབ་གསོའི་ལས་དོན་པའི་འབད་ཐབ་དང་སྤྱི་ཚོགས་ལས་རིགས་ཁག་ཚང་མའི་ཐུན་མོང་གི་རྒྱབ་སྐྱོར་ལ་བརྟེན་ནས་དུས་ཐུང་ལོ༨ཀྱི་ནང་དུ་རྩ་བའི་ཆ་ནས“གཞི་རྐང་གཉིས”ཀྱི་འགག་འགྲོལ་དམིགས་ཚད་མངོན་འགྱུར་བྱུང་ཞིང་། ནག་ཆུའི་སློབ་གསོའི་རྣམ་པ་རྙིང་པར་འགྱུར་ལྡོག་གསར་པ་བྱུང་བ་དང་། སློབ་གསོའི་བྱ་གཞག་བྱ་འཕུར་བ་ལྟར་གྱི་འཕེལ་རྒྱས་བྱུང་ཡོད་ལ་སློབ་གསོའི་སྤུས་ཚད་ཐད་ནས་མངོན་གསལ་དོད་པོས་གོང་འཕེལ་བྱུང་ཡོད་པ་དེས“སློབ་གྲྭ་ཡོད་ཀྱང་སྐྱོད་མི་ཐུབ་པའི་གནད་དོན”སྤྱིའི་ཆ་ནས་ཐག་ཆོད་ཐུབ་ཅིང་།བོད་བྱང་ཐང་དུ་སློབ་གསོའི་ལས་དོན་ཐོག་དོན་སྙིང་ལྡན་པའི་ལོ་རྒྱུས་ལེའུ་གསར་པ་ཞིག་བརྩམས་ཡོད།།ཡིན་ནའང་ཕྱི་སྣོད་ཀྱི་ས་བབ་མཐོ་ཞིང་སྡོད་གནས་ཐར་ཐོར་དང་།འགྲིམ་འགྲུལ་སྟབས་མི་བདེ་བ་སོགས་ཀྱི་རང་བྱུང་ཁོར་ཡུག་ཞན་པ་མ་ཟད་ནང་ཡུལ་ཅན་གྱི་སྟེང་ནས་སློབ་མའི་ཁྱིམ་བདག་གི་སློབ་གསོའི་ངོས་འཛིན་དམའ་ཞིང་སྲོལ་རྒྱུན་འདུ་ཤེས་ཆེ་བ་གཏན་སྡོད་མིན་པའི་འཚོ་སྟངས་སོགས་ཀྱི་ཞན་ཆ་དེ་རིགས་ཀྱི་རྐྱེན་པས་ནག་ཆུའི་སློབ་གསོ་འཕེལ་རྒྱས་ལ་བཀག་རྡོ་ཆེན་པོ་ཞིག་འཕྲད་ཡོད་ལ་སློབ་གསོ་འདི་སྤྱི་ཚོགས་ལ་ཁ་ཕྱོགས་པ་དང་།འབྱུང་འགྱུར་ལ་ཁ་ཕྱོགས་པ།དེང་རབས་ཅན་ལ་ཁ་ཕྱོགས་པ་བཅས་ཡོང་ཆེད་རང་ཉིད་ནས་ནག་ཆུའི་སློབ་གསོ་འཕེལ་རྒྱས་ཁྲོད་ཀྱི་བཀག་རྒྱ་འདི་ལ་ཕྱོགས་སུ་མ་ལྷུང་བར་དཔྱད་ཁུལ་བྱས་ཀྱང་སྐྱོན་དང་ནོར་འཁྲུལ་ནི་ནམ་མཁའི་སྐར་ཚོགས་ལྟར་བགྲངས་ཀྱིས་མི་ལང་བས་དཔྱོད་ལྡན་པ་རྣམས་ཀྱི་དགོངས་འཆར་ལྷུག་སྩོལ་དང་མ་འོངས་ཀྱི་ནག་ཆུའི་སློབ་གསོ་སྐྱོན་འབྲལ་འཚར་ལོངས་ཆེད“མཁས་བརྒྱ་འགྲན་གླེང་དང་མེ་ཏོག་མཉམ་བཞད”ཡོང་བའི་སེམས་པ་རྩེ་གཅིག་ནས་འཆང་བཞིན་ཡོད་དོ།།

　　༡  ནག་ཆུའི་མང་ཚོགས་རྣམས་ཀྱི་སྲོལ་རྒྱུན་གྱི་རྙིང་ཞེན་དང་བག་འཁུམས་ལྟ་བ་ཇི་ལྟ་བུ་ཡོད་པ་ལ་མདོར་ཙམ་བཤད་པ།
　　མི་རིགས་ཤིག་གི་བསམ་བློ་དང་འདུ་ཤེས་འཛིན་སྟངས་འདི་མི་རིགས་འདི་འཚོ་གནས་བྱེད་སའི་རང་བྱུང་ཁོར་ཡུག་དང་སྤྱི་ཚོགས་ཁོར་ཡུག་གཉིས་ནང་དུས་ཡུན་རིང་པོའི་ཐོན་སྐྱེད་ངལ་རྩོལ་དང་ཕན་ཚུན་འབྲེལ་འདྲིས་ལ་སོགས་ལས་གྲུབ་པའི་གཏན་ཆགས་རང་བཞིན་གྱི་བསམ་བློའི་འཁྱེར་སྟངས་ཤིག་ཡིན།དེའང་ནག་ཆུ་ས་ཁུལ་གྱི་ངོས་ནས་བཤད་ན་ཤར་ཕྱོགས་སུ་གནས་པའི་རྫོང་ཁ་ཤས་མ་གཏོགས་ཁྱབ་ཆེ་བའི་དབང་གིས་ཕྱུགས་ལས་ནི་འབྲོག་པ་མང་ཚོགས་རྣམས་ཀྱི་རྟེན་ས་ཡིན།མ་གཞི་ཏང་དང་རྒྱལ་ཁབ་ཀྱི་བཀའ་དྲིན་འོག་འབྲོག་པ་མང་ཚོགས་རྣམས་ལ་དཀར་ཤིང་གཙང་སྦྲ་འདོད་པའི་བདེ་སྡོད་ཀྱི་ཁང་པ་རྒྱབ་ཡོད་ཀྱང་ཕྱུགས་རིགས་ནི་ཁོ་ཚོའི་བརྟེན་ས་ཡིན་པས་རྩྭ་ཆུར་མ་ལྟོས་པར་ཉིན་ལྟར་བདེ་སྡོད་ཁང་པའི་གཡས་གཡོན་དུ་ཕྱུགས་རིགས་གྲོད་པ་འཕྱིས་པ་ནི་མི་ཡོང་བས་རྒྱུན་དུ་རྩྭ་ཆུར་བསྟུན་ནས་ཕྱུགས་ཟོག་དང་མཉམ་དུ་མཚམས་མེད་པའི་འཚོ་བ་ལ་རོལ་དགོས་པ་ནི་སྨོས་ཅི་དགོས།