ནག་ཆུའི་སློབ་གསོའི་འཕེལ་རྒྱས་ཁྲོད་ངེས་པར་དུ་སེལ་དགོས་པའི་རྐྱེན་གླེང་བ།
འབྲོག་པ་མང་ཚོགས་རྣམས་ཀྱང་ཕན་ཚུན་འབྲེལ་འདྲིས་དཀོན་ཞིང་ཕྱོགས་སོ་སོར་ཐར་ཐོར་དུ་གནས་ཡོད་པས་དེས་ན་སྡོད་གནས་དབང་གིས་ཕྱི་རོལ་ཡུལ་གྱི་གསར་བྱུང་གི་བྱ་དངོས་རྣམས་ལ་མྱོང་རོལ་དང་བསམ་གཞིགས་བྱེད་རྒྱུ་ལྟ་ཞོག་དེ་མཐོང་ཐོས་ཀྱི་ཡུལ་དུ་འགྱུར་དཀའ་བས་རྒྱུན་མཁོའི་ཚན་རིག་ཤེས་བྱ་དང་བུ་ཕྲུག་གི་རིག་གནས་སློབ་གསོ་མྱོང་རྒྱུའི་ཁ་ཚ་དགོས་གཏུགས་ཀྱི་རང་བཞིན་དེ་རྟོགས་མི་ཐུབ་ལ་རྟོགས་ཐབས་ཀྱང་འབྲལ་བས་སློབ་གསོས་གཙོ་བྱས་བྱ་བ་ཅི་ཞིག་བསྒྲུབ་དགོས་ཀྱང་སྟབས་མི་བདེ་ལ་ཤིན་ཏུ་ནས་དཀའ་ཚེགས་ཆེ་བའི་བྱ་བ་ཞིག་ཡིན་པ་ནི་སློབ་གསོའི་ཐོག་ཕྱག་ལས་གནང་མཁན་ཚང་མས་རྒྱུས་མངའ་ཡོད་ཤག་རེད་ལ་དེ་བས་ཀྱང་ཕ་མའི་ཚུལ་བཟུང་བའི་མི་རྒན་ཁ་ཤས་ཀྱི་ཕྲུ་གུ་སློབ་གྲྭར་གཏོང་རྒྱུ་ལྟ་ཞོག་ད་དུང་ཡང་བུ་ཕྲུག་ལ“ངེད་ཚང་ཕ་མེས་ཡང་མེས་ཀྱིས་ཡི་གེ་ཀ་བོང་བུའི་མགོ་ཙམ་མ་ཤེས་ཀྱང་མི་རབས་ནས་མི་རབས་བར་དཀོན་མཆོག་གྱི་ཐུགས་རྗེ་དང་ཕྱུགས་ཟོག་གི་དྲིན་གྱིས་ལྟོགས་སྐོམ་མྱོང་མི་དགོས་པ་ལྟོ་གོས་ཁ་འཕྱིས་ཙམ་ཞིག་འདུག་པས་ཁྱོད་སློབ་གྲྭར་སོང་ནས་ཅི་བྱེད།།ཁྱོད་སློབ་གྲྭར་སོང་ཡང་ཡིག་འཁྱོག་འགའ་ཤེས་ཀྱང་འདིས་ལྟོ་གོས་ལ་ཕན་གྱི་རེད་པས།དེང་སང་སློབ་གྲྭ་ཆེན་མོ་ཐོན་ཀྱང་ལས་བགོས་མེད་པས་རྗེས་མར་ཁྱོད་རིག་གནས་སྦྱང་བའི་སྒོ་ཡང་མི་ཐོན་ཕྱུགས་འཚོ་སྟངས་ཡང་མ་ཤེས་པའི་ཟ་འདྲེ་ཞིག་ཆགས་ངེས་དེ་ཙམ་མ་ཟད་ཁྱོད་སློབ་གྲྭར་གཏོང་བར་ནང་ལ་འགྲོ་སོང་མང་པོ་དེ་འདྲ་གཏོང་ཡས་མེད་པས་དེ་ལས་ཁྱོད་ཕྱུགས་འཚོ་བར་སོང་ན་དེ་ལས་ཡག་པ་མེད་ཅེས་དང།”ལྷག་པར་དུ་རང་ཉིད་ལ་དངོས་སུ་མཐོང་ཐོས་སུ་བྱུང་བ་ནི་རྨང་གཉིས་རྒྱལ་བཤེར་སྐབས་སུ་འབྲོག་པ་མང་པོ་འབྲེལ་ཡོད་ཚན་པའི་བཀའ་མ་ལྡོག་པའམ་ཡང་ན་དངུལ་ཆད་ལ་ཞེད་ནས་བུ་ཕྲུག་མི་ཉུང་བ་སློབ་གྲྭར་བསྐྱལ་ཀྱང་ཉིན་ཤས་མ་འགོར་བར་ཕྲུ་གུ་དེ་ཚོ་སློབ་གྲྭར་མ་བསྡད་པར་བྲོས་བྱོལ་དུ་འགྲོ་གྱི་འདུག་ཅི་ནས་སློབ་གྲྭར་མི་སྡོད་པའི་རྒྱུ་རྐྱེན་གང་ཡིན་འདྲི་སྐབས་ཁོ་ཚོས་བཤད་དོན་“པ་ཕ་དང་ཨ་མས་གཙོས་ཤ་ཉེ་སྤུན་མཆེད་རྣམས་ཀྱི་སློབ་གྲྭར་སྐྱིད་པོ་མིན་འདུག་ན་ལོག་ཤོག་དང་དགེ་རྒན་གྱི་ཉེས་རྡུང་གཏང་ན་ལོག་ཤོག”ཅེས་པའི་སྐད་ཆ་དེ་ཚོས་བྱིས་པའི་ལྷད་མེད་དྭངས་གཙང་གི་སེམས་པ་འདི་ལ་དབང་ཤེས་ཀྱིས་ཁ་ལོ་བཙན་བསྒྱུར་བྱས་པས་དགེ་རྒན་ཁ་ལ་ལ་མི་ཉན་པར་ཕ་མས་ཆུང་དུས་ནས་བསྟན་པའི་ཁེར་ལམ་དུ་མི་འགྲོ་ཀ་མེད་རེད་རྒྱུ་མཚན་ནི“ཕ་མ་ནི་བུ་ཕྲུག་གི་དགེ་རྒན་དང་པོ་རེད”ཟེར་བའི་གཏམ་འདི་ལས་ར་སྤྲོད་ཐུབ་པས་སོ།
༢ ད་འོ་ན་ཇི་ལྟར་བྱས་ཏེ་མིག་སྔའི་དཀའ་ངལ་འདི་ལས་གྲོལ་ཐབས་བྱེད་པའི་སྐོར་ལ་རང་ཉིད་ཀྱི་བསམ་ཚུལ་མདོ་ཙམ་གླེང་བ།
༢.༡ ཁྱིམ་བདག་ཚོར་སྐབས་བབ་དུས་བསྟུན་དང་གོམ་པ་རིམ་བགྲོད་ཀྱིས་རང་གི་བུ་ཕྲུག་སློབ་གསོ་མྱོང་བའི་དགོས་པ་བསྟན་དགོས།
དེ་ཡང་མི་རིགས་ཅི་འདྲ་ཞིག་ཡིན་ཡང་བླུན་རྨོངས་ནས་ཤེས་དཔལ་ཡ་རབས་དང་རྗེས་ལུས་ནས་སྔོན་ཐོན་ཅན་སྔར་མེད་པ་ནས་ད་ལྟའི་ཡོད་པའི་བར་ཡར་རྒྱས་དང་འཕེལ་རྒྱས་གོམ་ཁ་ཕྱོགས་པར་དུས་ཐུང་གོམ་པ་རེ་གཉིས་ཀྱི་ལེགས་སྒྲུབ་ཐུབ་པ་ཞིག་རྩ་བ་ནས་མིན་པར་ངེས་པར་དུ་ལོ་ངོ་མང་པོ་དང་མི་རབས་མང་པོ་ཞིག་གི་འབད་རྩོལ་བརྒྱུད་དགོས་པ་ནི་སྨོས་མེད་ཡིན།
མིག་སྔར་འབྲོག་ཁུལ་སློབ་གསོ་འདི་ཡང་མེད་པ་ནས་ཡོད་པའི་བརྒྱུད་རིམ་འདི་འདྲ་ཞིག་གི་ནང་ཁྱིམ་བདག་མང་པོས་བུ་ཕྲུག་སློབ་གྲྭར་བསྐྱོད་པར་མཐའ་གཅིག་གི་ངོ་རྒོལ་བྱེད་པ་འདི་ཁོ་ཚོས་རྒྱལ་ཁབ་སློབ་གསོའི་སྲིད་ཇུས་ལ་རྒྱབ་གཏོད་དང་སློབ་གསོ་སྤེལ་མཁན་ལ་མི་འདོད་པ་མ་ཡིན་པར་འདི་ན་མི་རབས་རབས་ནས་མི་རབས་བར་ཕྱུགས་རིགས་འཚོ་སྐྱོང་ཁོ་ནར་གཙིགས་ཆེན་བྱེད་པ་ལས་དེ་མིན་གྱི་གནས་ཚུལ་ལ་དོ་སྣང་དང་ཤེས་རྟོགས་བྱེད་པ་ཉུང་ཉུང་ཡིན་པས་གློ་བུར་དུ་སློབ་གྲྭར་གཏོང་དགོས་ལུགས་དང་སློབ་གསོ་མྱོང་དགོས་ལུགས་བཤད་ན་འདི་ནི་འབྲས་བུ་མེད་པར་ངལ་བའི་རྒྱུ་ཁོ་ན་ཡིན། བྱ་དངོས་གསར་པ་ཞིག་དང་བསམ་བློ་གསར་པ་ཞིག་དང་ལེན་བྱེད་སའི་ཡུལ་ལ་མ་ལྟོས་པར་ཡུན་ཐུང་ངང་བཙན་པོ་དབང་ཡོད་དང་ཨ་ན་ཨུ་ཚུགས་ཀྱི་ཕ་རོལ་པོས་དང་ལེན་དང་ཁས་བླངས་བྱེད་དགོས་ཟེར་ན་འདི་ནི་དམག་ཤེད་ཅན་གྱི་བྱེད་སྟངས་འབའ་ཞིག་ལས་མངོན་རྒྱུ་ལས་མ་འདས། འདི་ན་གང་ཉིད་ཀྱི་སྟོན་པ་ཤྰཀྱ་ཐུབ་པས་ཀྱང་བསྲེགས་བཅད་བརྡར་བའི་གསེར་བཞིན་དུ་ལེགས་པར་བརྟགས་པ་ང་ཡི་བཀའ་བླང་བར་བྱ་ཡི་གུས་ཕྱིར་མིན་ཞེས་པ་ལས་ང་ཚོར་ནང་པའི་ཆོས་ལུགས་འདི་ངེས་པར་དུ་གོང་དུ་བཀུར་དགོས་དང་ངེས་པར་དུ་དེའི་རྗེས་སུ་འཇུག་དགོས་ཞེས་བཤད་མེད་པར་རྗེས་འབྲངས་པས་ལག་ལེན་དངོས་ཀྱི་བརྡར་གཅོད་བྱས་ནས་དགེ་སྐྱོན་འཚོལ་བསྡུ་བྱེད་པའི་དགོས་པ་བཤད་ཡོད་པས་ང་ཚོས་ཀྱང་ཁྱིམ་བདག་ཚོར་རང་ཕྲུག་སློབ་གྲྭར་གཏང་ན་དོན་དངོས་ཀྱི་ལེགས་ཆ་དང་ཁེ་ཕན་གང་ཡོད་པ་ཤེས་རྟོགས་བྱེད་པའི་གོ་སྐབས་དང་དུས་ཚོད་སྤྲོད་དགོས་པ་ནི་ཤིན་ཏུ་གལ་ཆེ་བར་སྙམ།
༢.༢ སློབ་གསོའི་སྲིད་འཛིན་ཚན་པས་ནུས་ལྡན་གྱི་སློབ་ཞུགས་ལམ་ལུགས་བཟོ་དགོས།
སློབ་གསོའི་སྲིད་འཛིན་ཚན་པས་གཙོས་པའི་འབྲེལ་ཡོད་ཚན་པས་བྱིས་པ་སློབ་གྲྭར་བསྐྱལ་རྒྱུའི་གནད་དོན་ཐད་ནུས་ལྡན་གྱི་ལམ་ལུགས་གཏན་འབེབས་བྱས་ཏེ་ཁ་ཙམ་མིན་པར་དོན་དངོས་ལག་ལེན་དུ་འཁྱོལ་བ་བྱེད་དགོས། དེ་ཡང་སྲིད་ཇུས་དེ་ཚོ་མང་ཚོགས་ཚོའི་ཁམས་དང་མོས་པ་ལ་བསྟུན་དགོས་པ་ནི་ཤིན་ཏུ་གལ་ཆེན་པོ་ཡིན་རྒྱུ་མཚན་ནི་འབྲོག་པ་མང་ཚོགས་ཚོའི་བསམ་བློའི་གོ་རྟོགས་དང་རིག་གནས་ཆུ་ཚད་དམའ་པོ་ཡོད་དུས་དེ་ལ་དེ་བསྟུན་དང་ཡུལ་དུས་དང་འཚམས་པའི་གཏན་འབེབས་བྱེད་རྒྱུ་ལས་ཚད་དང་མི་མཐུན་ན་བོང་རྒན་ལ་ཆོས་བཤད་པ་དང་ཆུ་འཐུང་དོད་མེད་པའི་གླང་རྒན་གཉའ་བཀུག་པ་ལྟར་བྱས་ན་དོན་མེད་དཀའ་ལས་འབའ་ཞིག་གོ།།
༢.༣ ཁྱིམ་བདག་འཐུས་མི་རྣམས་སྒྲིག་འཛུགས་བྱས་ནས་སློབ་གསོ་སྔོན་ཐོན་ས་ཆར་ལྟ་སྐོར་ལ་འཁྲིད་དགོས།
རིམ་ཁག་གི་སྲིད་གཞུང་དང་སློབ་གསོའི་ཚན་པས་མ་དངུལ་དང་འགྲོ་གྲོན་གཏང་ནས་ཁྱིམ་བདག་གི་འཐུས་མི་སྒྲིག་འཛུགས་ཡོད་པའི་ཐོག་ནས་མེས་རྒྱལ་ནང་ཁུལ་དང་རང་ལྗོངས་ཁུལ་དུ་སློབ་གསོ་དང་ཚན་རྩལ་སྔོན་ཐོན་ས་ཆར་ལྟ་སྐོར་དང་ཉམས་མྱོང་སྤེལ་རེས་ཀྱི་གོ་སྐབས་བསྐྲུན་ནས་འབྲོག་པ་མང་ཚོགས་ཚོའི་ལྟ་བ་གསར་བརྗེ་དང་བསམ་བློར་བཅིངས་འགྲོལ་ཐུབ་པ་བྱས་ནས་ཁོ་ཚོར་བུ་ཕྲུག་སློབ་གྲྭར་བཏང་ན་རང་ཕྲུག་གི་མདུན་ལམ་ཙམ་མ་ཟད་རྗེས་མར་ཁྱིམ་ཚང་འཚོ་བའི་ཆ་རྐྱེན་ལེགས་སུ་འགྲོ་བར་ཁ་ཡོད་ལག་ཡོད་དང་མིག་མཐོང་ལག་ཟིན་གྱི་ཕན་འབྲས་དང་རིག་གནས་སྔྱངས་མ་སྦྱངས་ཁྱད་པར་ཤེས་སུ་འཇུག་དགོས།
༢.༤ ངེས་པར་དུ་འབྲོག་པའི་སྡོད་གནས་ཐ་ཐོར་ནས་གཅིག་སྡུད་ཅན་དུ་གཏོང་གང་ཐུབ་བྱེད་དགོས།
གོང་རིམ་འབྲེལ་ཡོད་ཚན་པ་དང་ལྷག་དོན་བདེ་སྡོད་ལས་གྲའི་བཀོད་འདོམས་ཁང་སོགས་ཀྱི་འབྲོག་ཁུལ་གྱི་སྡོད་གནས་ཐར་ཐོར་ཡིན་པའི་གནས་ཚུལ་ལ་དམིགས་ནས་འབྲོག་པའི་གཏན་སྡོད་ས་ཚིགས་བཀོད་སྒྲིག་དང་ཚོང་ལས།འཕྲོད་བསྟེན།རིག་གནས་སོགས་རྨང་གཞིའི་སྒྲིག་བཀོད་ཀྱི་འཛུགས་སྐྲུན་ཐད་དམིགས་ཡུལ་དང་འཆར་གཞི་ཡོད་པའི་སྒོ་ནས་སྔར་ལས་ལྷག་པའི་མཐོང་ཆེན་དང་ཤུགས་སྣོན་རྒྱབ་ནས་སྡོད་གནས་ཐར་ཐོར་ཡིན་པ་ནས་རིམ་བཞིན་ཐོར་ཇེ་ཆུང་དང་གཅིག་སྡུད་ཀྱི་འབྲོག་པ་མང་ཚོགས་ཀྱི་བསམ་བློ་དང་མཐོང་ཐོས་སོགས་ཕན་ཚུན་སྤེལ་རེས་བྱས་པར་སྟབས་བདེ་བསྐྲུན་ན་སློབ་གསོའི་ལས་དོན་སྤེལ་བར་ཡང་ཕན་འབྲས་བཟང་པོ་ཐོབ་ངེས།
༢.༥ གློག་འཕྲིན་གློག་བརྙན་བརྙན་འཕྲིན་གྲོང་ཚོ་ཀུན་ཁྱབ་དང་གྲོང་ཚོར་བཅའ་སྡོད་ལས་དོན་ལེགས་པོ་སྤེལ་ནས་འབྲོག་པ་མང་ཚོགས་རྣམས་ལ་བསམ་པའི་རིག་གནས་འཚོ་བ་འདི་ཕུན་སུམ་ཇེ་ཚོགས་སུ་གཏོང་དགོས།
ཆ་འཕྲིན་ཞབས་ཞུ་ཚན་པས་འབྲོག་ཁུལ་དུ་དེང་རབས་ཅན་གྱི་ཆ་འཕྲིན་ཞབས་ཞུའི་མ་ལག་རྣམས་འཐུས་སྒོ་ཇེ་ཚང་གཏང་ནས་མང་ཚོགས་རྣམས་ཀྱི་བལྟ་རྒྱ་དང་ཐོས་རྒྱ་ཇེ་ཆེར་གཏོང་དགོས།དེ་ཡང་ས་ཁུལ་དང་རྫོང་རིམ་པའི་བརྙན་འཕྲིན་རླུང་འཕྲིན་ལས་ཁུངས་ཀྱི་གཙོ་བོ་བྱས་པའི་སློབ་གསོའི་འབྲས་བཟང་ངོ་སྤྲོད་དང་སློབ་གསོའི་དམངས་ཕན་སྲིད་ཇུས་གསར་པ་རྣམས་མང་ཚོགས་ལ་དུས་ཐོག་ཏུ་བརྒྱུད་བསྒྲགས་བྱེད་དགོས།
དེ་བཞིན་གྱི་གྲོང་ཚོར་བཅའ་སྡོད་ལས་དོན་མི་སྣས་འབྲོག་པ་མང་ཚོགས་དང་འབྲིལ་དྲིས་མང་ཙམ་བྱས་ནས་ཁོ་ཚོའི་བསམ་པའི་འགྱུར་བ་དང་བདེ་སྡུག་ཤེས་པར་བྱས་ནས་བུ་ཕྲུག་སློབ་གསོ་མྱོང་བར་རོགས་པ་དང་སློབ་གསོ་གང་མང་བྱེད་དགོས།
སློབ་གསོའི་སྲིད་འཛིན་ཚན་པ་དང་དྲིལ་བསྒྲགས་ཚན་པ་སོགས་མཉམ་འབྲེལ་ཐོག་འཆར་གཞི་དང་དམིགས་ཡུལ་ཡོད་པའི་སྒོ་ནས་འབྲོག་ཁུལ་དུ་གཤམ་བསྐྱོད་ཀྱི་སློབ་སོའི་སྐོར་གྱི་སྲིད་ཇུས་དྲིལ་བསྒྲགས་བྱེད་དགོས་པ་དང་ལྷག་དོན་དུ་གོ་སྐོན་བློ་འགུགས་དང་སློབ་གསོའི་དོན་སྙིང་ལྡན་པའི་རིག་རྩལ་ལྟད་མོ་སོགས་འཁྲབ་སྟོན་སོགས་བྱས་ནས་འབྲོག་པ་མང་ཚོགས་ཀྱི་བསམ་བློ་རྙིང་པ་རྣམས་བཅིངས་འགྲོལ་དང་སློབ་གསོར་འཛིན་པའི་ལོག་རྟོག་རྣམས་སེལ་དགོས།
༢.༧ བུ་ཕྲུག་སློང་གྲྭར་གཏང་ན་འབྲོག་པའི་འཚོ་བར་ཁ་ཡོད་ལག་ཡོད་ཀྱི་ཕན་པ་ཡོད་པ་འདི་ཤེས་སུ་འཇུག་དགོས།
རྒྱལ་ཁབ་ནས་ལས་རིགས་ལག་རྩལ་སློབ་གསོ་ལ་མཐོང་ཆེན་བྱེད་པའི་གོ་སྐབས་བཟང་པོ་འདི་དམ་དུ་བཟུང་ནས་རྫོང་རིམ་པའི་ལས་རིགས་ལག་རྩལ་སློབ་གྲྭ་འཛུགས་གཉེར་དང་ལག་རྩལ་སྣེ་ཁ་འཐུས་སྒོ་ཇེ་ཚང་གཏང་ནས་སློབ་འབྲིང་ནས་རྒྱུགས་མཐར་མ་ཕྱིན་པའི་སློབ་མ་རྣམས་ལ་མུ་མཐུད་ལས་རིགས་ལག་རྩལ་སློབ་གྲྭར་ལག་རྩལ་སྦྱངས་ནས་རང་མགོ་ཐོན་པ་དང་ལག་རྩལ་སྣེ་གཅིག་ཤེས་པ་འདི་ཡང་དབུལ་གྲོལ་ཕྱུག་འགྱུར་ཡོང་བའི་ཐབས་ལམ་ཉག་ཅིག་ཡིན་པ་དང་དེ་ཡང་དོན་སྙིང་ལྡན་པའི་མི་ཚེའི་འགྲོ་ལམ་ཅིག་ཡིན་པ་ཤེས་དགོས་རྒྱུ་མཚན་ནི་འབྲོག་པ་མང་ཚོགས་ཀྱི་ཁ་ཚ་དགོས་གཏུགས་ཀྱི་བསམ་བློའི་འཁྱེར་ཕྱོགས་དང་བུ་ཕྲུག་སློབ་གྲྭར་སོང་ནས་དཔལ་འབྱོར་གྱི་ཁ་གསབ་དང་དངུལ་ལོར་མང་ཙམ་རགས་ཐབས་བྱེད་པ་ནི་ཁོ་ཚོའི་དམིགས་ཡུལ་གཅིག་པུ་འདི་ཡིན་པས་གཅིག་ནས་འབྲོག་བའི་ཁྱིམ་ཚང་ཡོབ་འབབ་མཐོ་རུ་གཏོང་བ་དང་སྤྱི་ཚོགས་ཀྱི་ཁུར་པོ་ཡང་རུ་གཏོང་གཏོང་བར་ལས་རིགས་སློབ་གསོ་འདི་གོང་དུ་སྤེལ་དགོས།
༢.༨ད་ལྟ་སློབ་གསོ་མྱོང་བཞིན་པའི་སློབ་མ་རྣམས་ལ་་ཡང་དག་པའི་ལམ་ལ་འཁྲིད་དགོས།
དགེ་རྒན་ཚོས་སེམས་ནུས་ཡོད་རྒུས་སློབ་ཕྲུག་ལ་བརྩེ་བའི་སེམས་ཁུར་གང་མང་བྱས་ནས་སློབ་མ་ཚོ་ཤེས་ཡོན་དང་འཇོན་ནུས་སྤྱོད་བཟང་གསོ་སྐྱོང་བྱེད་པ་གཙོ་བོར་འཛིན་ནས་སློབ་གྲྭའི་ནང་དྲོ་སྐྱིད་དང་དགེ་རྒན་གྱི་ཕ་མ་དངོས་དང་མཉམ་པ་སློབ་མ་གསོ་སྐྱོང་བྱེད་པ་ནི་མི་རབས་རྗེས་མ་རྣམས་ཀྱི་ཁྱིམ་བདག་གསོ་སྐྱོང་བྱས་པ་ཡིན་པས་འདི་ནི་དཀའ་བ་ཁྱུད་དུ་གསད་དུ་རུང་བ་དང་དོན་སྙིང་ཤིན་ཏུ་ཆེ་བ་ཞིག་ཀྱང་ཡིན།
དེ་བས་ཀྱང་སློབ་གསོ་མྱོང་བ་ལས་མི་ཚད་ལྡན་དང་ཡ་རབས་ཆགས་ཀྱི་ཡོད་པའི་གནས་ལུགས་འདི་ཤེས་སུ་བཅུག་ན་རྟིང་སོར་རང་ཉིད་ཀྱི་བུ་ཕྲུག་ཀྱང་སློབ་གསོ་མྱོང་བ་ལ་མཐོང་ཆེན་དང་སློབ་མའི་སློབ་སྦྱོང་ལ་སེམས་ཁུར་སློབ་གྲྭའི་བྱ་གཞག་ལ་གཙིགས་ཆེན་བྱེད་སྲིད་རྒྱུ་མཚན་ནི་ཁྱིམ་བདག་རྣམས་སློབ་གསོ་ཐོབ་མྱོང་བ་དང་སློབ་གསོའི་ཕན་འབྲས་དངོས་སུ་མྱོང་མི་ཡིན་པས་མདོར་ན་སྤྱི་ཚོགས་ཕྱོགས་ཀུན་ནས་ད་ལྟའི་མི་རབས་འདི་སློབ་གསོ་མྱོང་བའི་དགོས་དོན་འདི་ཁ་གསལ་པོ་ཤེས་དགོས།
༢.༩ འབྲོག་པ་མང་ཚོགས་ཚོར་ཤེས་ཡོན་གྱིས་རྒྱུ་དཔལ་འབྱོར་བསྐྲུན་ཐུབ་པ་ལས་རྒྱུ་དཔལ་འབྱོར་གྱིས་ཤེས་ཡོན་འདི་བསླུ་མི་ཐུབ་པའི་གནས་ལུགས་འདི་ཤེས་སུ་འཇུག་དགོས།
ནག་ཆུའི་ཤར་ངོས་ཀྱི་རྫོང་ཆུས་ཁག་ལ་རང་བྱུང་སྨན་རྩྭས་འབྲོག་པ་མང་ཚོགས་ཀྱི་འཚོ་བར་མཐུན་རྐྱེན་ལེགས་པོ་ཞིག་བསྐྲུན་ཡོད་ནའང་རང་བྱུང་གི་ཐོན་ཁུངས་དང་གཏེར་ཁ་ལ་ནི་ཚད་ཡོད་པ་ཞིག་ཡིན་པས་ཁྱིམ་བདག་དང་སློབ་མར་མི་དང་རང་བྱུང་ཁམས་དབར་ཞི་མཐུན་འབྲེལ་བ་འཛུགས་སྐྱོང་བྱ་རྒྱུ་ལས་མི་རབས་འདིའི་བདེ་སྐྱིད་འདི་མི་རབས་རྗེས་མ་རྣམས་ཀྱི་སྡུག་བསྔལ་ཐོག་འཛུགས་མི་རུང་བའི་བསླབ་བྱ་དང་ཁ་ཏ་གང་མང་བྱས་ནས་ཁོ་ཚོར་ཤེས་ཡོན་སྦྱོང་བའི་མཐར་ཐུག་གི་དམིགས་ཡུལ་ནི་མི་ཡ་རབས་ཞིག་དང་རང་རྒྱུད་དུ་ཤེས་བྱ་ཡོན་ཏན་ལེན་ནས་དེ་ལས་མང་བའི་མིར་ཞབས་ཞུ་དང་ཕན་པ་བསྐྲུན་དགོས་པ་ལས་རྒྱུ་ནོར་གྱི་བྲན་གཡོག་ཏུ་མི་འགྱུར་བ་བཀག་འགོག་བྱ་དགོས་པ་དང་ལྷག་པར་ཁྱིམ་བདག་དང་སློབ་མར་རྒྱུ་ནོར་ནི་དུས་ཚོད་ ངེས་མེད་ལ་བསགས་ཐུབ་པ་དང་ཤེས་བྱ་ཡོན་ཏན་ནི་ བྱིས་པའི་དུས་ནས་སྦྱངས་དགོས་ཏེ།
དེ་ཡང་། སྐྱེ་བོ་གསོ་ཐིགས་ལསརིག་པ་བཞོན་པའི་དུས་སུ་བསླབ།།
ཞོ་འདོད་བ་ནི་དགུན་ནས་གསོ།། ཞེས་པ་ལྟར། བློ་རིག་གསལ་བའི་རྩ་ཆེན་བྱིས་པའི་དུས་ཚོད་འདིར་ཤེས་བྱ་ཡོན་ཏན་སྦྱངས་དགོས་པ་ སྐུལ་མ་གཏོང་དགོས།
ཤེས་བྱ་ནི་ཚེ་འདི་ཡི་རང་གཞན་གཉིས་ཀར་ཕན་པའི་བྱ་བ་ཞིག་ཡིན་པ་མ་ཟད་ཚེ་ཕྱི་མར་ཕན་པའི་བྱ་བ་ཞིག་ཀྱང་རེད།དེ་ལས་ལྡོག་ཏེ།རྒྱུ་ལོངས་སྤྱོད་ནི་མི་རྟག་པའི་རང་བཞིན་དང་མ་ཟད་དེས་ང་ཚོར་སྦྱིན་པ་ནི་བདེ་བ་ལས་སྡུག་བསྔལ་ཤས་ཆེ་བ་ཤ་སྟག་རེད། བྱས་ཙང་ང་ཚོས་རྒྱུ་ལོངས་སྤྱོད་དང་ཤེས་བྱ་ཡོན་ཏན་ལ་གདམ་ཁ་མ་ནོར་བ་བྱ་རྒྱུ་ནི་གལ་ཆེན་གྱི་གནས་ཞིག་རེད།
༢.༡༠ ཁྱིམ་བདག་དང་སློབ་གྲྭ་དེ་བཞིན་གྱི་འཛིན་བདག་དབར་འབྲེལ་གཏུགས་བྱེད་པའི་གོ་སྐབས་བསྐྲུན་དགོས།
འབྲོག་པའི་ཁྱིམ་བདག་མང་པོ་ཞིག་གིས་རང་ཕྲུག་སློབ་གྲྭར་སོང་རྗེས་ཚང་མ་སློབ་གྲྭ་དང་དགེ་རྒན་ལ་རྩིས་སྤྲད་དང་བློས་འཇིངས་བཀལ་བྱས་ནས་རང་ཕྲུག་གི་དུས་རྒྱུན་ཟས་གོས་སྡོད་གསུམ་དང་དེ་བཞིན་གྱི་སློབ་སྦྱོང་ གཟུགས་པོ་ ཤེས་རིག་ ཀུན་སྤྱོད་སེམས་ཁམས་ཀྱི་གནས་ཚུལ་དང་འཕེལ་ཕྱོགས་འགྱུར་བ་སོགས་ལ་སེམས་འཁུར་དང་དོ་སྣང་བྱེད་རྒྱུ་ཕར་གཞོག་ནང་ལ་ལས་ཀ་ཐོན་ནས་དགོངས་པ་ཞུ་དུས་མ་གཏོག་སློབ་གྲྭའི་རྒྱལ་སྒོ་མཐོང་མྱོང་མེད་ལ་དེ་དུས་རང་ཕྲུག་ལོ་རིམ་ག་ཚོད་དང་།འཛིན་གྲྭ་ག་ཚོད་ཐ་ན་སློབ་གྲྭར་སོང་ནས་ལོ་ཇི་ཙམ་ཕྱིན་པ་ཡང་མི་ཤེས་པས་དེ་ལྟར་ཕར་འགྲོ་མར་འགྲོ་མེད་པའི་ཕ་མ་མང་པོས་རང་ཕྲུག་གི་རང་གི་གཡང་སར་གཡུག་གི་ཡོད། དེ་སྔོན་དང་བསྡུར་ན་དེང་སང་འབྲོག་པ་མང་ཚོགས་ཚོའི་འཚོ་བར་འགྱུར་ལྡོག་ཆེན་པོ་ཡོད་ལ་རྩྭ་ཐང་ཁ་གསབ་གྲོན་དངུལ་ལ་སོགས་རྒྱལ་ཁབ་ཀྱི་གཟིགས་སྐྱོང་སྲིད་ཇུས་བཟང་པོ་དེ་འདྲ་བས་འབྲོག་ཁྱིམ་མང་པོའི་འཚོ་བའི་མཐུན་རྐྱེན་བཟང་དུ་སོང་ཡོད་ལ་ཁ་པར་འཕྲིན་གཏོང་ཡོ་ཆས་སོགས་དེང་རབས་གསར་དར་ཚན་རྩལ་ཅ་དངོས་མང་པོ་ཡང་ཁོ་ཚོའི་འཚོ་བའི་ནང་མེད་དུ་མི་རུང་བ་ཞིག་ཆགས་ཡོད་པས་ཁྱིམ་བདག་དང་སློབ་གྲྭའི་དབར་འབྲེལ་གཏུག་སྟབས་བདེ་རུ་ཞེ་དྲག་ཕྱིན་ཡོད་དེས་ན་སློབ་གྲྭས་འཛིན་གྲྭའི་ཀྲུའུ་རེན་ལ་ཟླ་རེའི་ཁ་གསབ་གྲོན་དངུལ་འདང་ངེ་ཙམ་སྤྲད་ནས་དེ་བས་མང་བའི་ཁྱིམ་བདག་ཚོར་འབྲེལ་གཏུག་བྱེད་པའི་མཐུན་རྐྱེན་བསྐྲུན་དགོས།
མདོར་ན་ཁྱིམ་བདག་གི་ཡིད་ཆེས་ནི་སློབ་གྲྭའི་སློབ་གསོ་མདུན་དུ་བསྐྱོད་པའི་སྒུལ་ཤུགས་ཡིན་ལ་བུ་ཕྲུག་བདེ་ཐང་འཚར་ལོངས་དང་ཤེས་རིག་འབྲས་བུ་ལེན་པའི་གནད་འགག་ཡིན།
