ཁམས་མི་ཉག་ཡུལ་གྱི་སྐོར་བྲོ་དང་བྲོ་ཤགས་ཀྱི་བྲོ་ཚིག་ཁག་ཅིག

                                              བྲོ་ཤགས།
                            དགུང་ཨ་སྔོན་སྟེང་ལ་འཛོམས་གསུམ་སྣང་།།
                            འཛོམས་རེ་རེ་སྐབས་སུ་མིང་རེ་བཏགས།།
                            བཏགས་ཤེས་ན་མཁས་པའི་གྲས་ལ་བཞག།
                            བཏགས་མ་ཤེས་རྩིག་ཁུག་ཉི་མ་ལྡེ།།
                            བྲག་དཀར་ཡག་སྟེང་ལ་འཛོམས་གསུམ་སྣང་།།
                            འཛོམས་རེ་རེ་སྐབས་སུ་མིང་རེ་བཏགས།།
                            བཏགས་ཤེས་ན་མཁས་པའི་གྲས་ལ་བཞག།
                            བཏགས་མ་ཤེས་རྩིག་ཁུག་ཉི་མ་ལྡེ།།
                            གྲོང་རྒྱ་གྲོང་སྟེང་ལ་འཛོམས་གསུམ་སྣང་།།
                            འཛོམས་རེ་རེ་སྐབས་སུ་མིང་རེ་བཏགས།།
                            བཏགས་ཤེས་ན་མཁས་པའི་གྲས་ལ་བཞག།
                            བཏགས་མ་ཤེས་རྩིག་ཁུག་ཉི་མ་ལྡེ།།
                                              ལན་ནམ་དཀྲོལ་ཚིག
                            དགུང་ཨ་སྔོན་སྟེང་གི་འཛོམས་གསུམ་ནི།།
                            སེར་ཉི་མ་ཟླ་བ་ལྷོ་སྤྲིན་གསུམ།།
                            དགུང་ཨ་སྔོན་སྟེང་གི་འཛོམས་གསུམ་རེད།།
                            རྒོད་ཐང་དཀར་གླག་མོ་ཁྱུང་མོ་གསུམ།།
                            བྲག་དཀར་ཡག་སྟེང་གི་འཛོམས་གསུམ་རེད།།
                            དྲིན་ཕ་ལོ་མ་ལོ་བུ་རྒྱུད་གསུམ།།
                            གྲོང་རྒྱ་གྲོང་སྟེང་གི་འཛོམས་གསུམ་རེད།།
                                              བྲོ་ཚིག
                                               1
                            དགུང་ཨ་སྔོན་སྐྱིད་པོ་རི་ལ་ཆགས།།
                            སེར་ཉི་ཟླ་བདེ་མོ་སྤང་ལ་མཛེས།།
                            དཀར་ལྷོ་སྤྲིན་འཛོམས་པའི་སྨོན་ལམ་ཤོག།
                            བྲག་དཀར་ཡག་སྐྱིད་པོ་རི་ལ་ཆགས།།
                            རྒོད་ཐང་དཀར་བདེ་མོ་བྲག་ལ་མཛེས།།
                            རྒྱབ་གཤོག་སྒྲོ་འཛོམས་པའི་སྨོན་ལམ་ཤོག།
                            གྲོང་རྒྱ་གྲོང་སྐྱིད་པོ་རི་ལ་ཆགས།།
                            དྲིན་ཕ་མ་བདེ་མོ་གྲོང་ལ་མཛེས།།
                            ཚ་བུ་རྒྱུད་འཛོམས་པའི་སྨོན་ལམ་ཤོག།
                                               2
                            དགུང་ཨ་སྔོན་གཡང་གཞི་གཡང་ཁང་ནང་།།
                            སེར་ཉི་ཟླ་གཡང་གི་མདའ་དར་བཙུགས།།
                            དཀར་སྨིན་དྲུག་དར་ཚོན་སྣ་ལྔས་བརྒྱན།།
                            བྲག་དཀར་ཡག་གཡང་གཞི་གཡང་ཁང་ནང་།།
                            རྒོད་ཐང་དཀར་གཡང་གི་མདའ་དར་བཙུགས།།
                            རྒྱབ་གཤོག་སྒྲོ་དར་ཚོན་སྣ་ལྔས་བརྒྱན།།
                            གྲོང་རྒྱ་གྲོང་གཡང་གཞི་གཡང་ཁང་ནང་།།
                            རྒན་ཕ་ཁུ་གཡང་གི་མདའ་དར་བཙུགས།།
                            རང་མི་སེར་དར་ཚོན་སྣ་ལྔས་བརྒྱན།།
                                               3
                            དགུང་ཨ་སྔོན་སྟེང་ལ་ཡར་ཡར་འགྲོ།
                            སེར་ཉི་ཟླ་ཨ་བདེ་འདྲི་བཞིན་འགྲོ།
                            སེར་ཉི་ཟླ་བདེ་བའི་སྐད་ཅིག་གོ།
                            དཀར་ལྷོ་སྤྲིན་བསམ་པ་ལམ་སང་དགའ།།
                            བྲག་དཀར་ཡག་སྟེང་ལ་ཡར་ཡར་འགྲོ།
                            རྒོད་ཐང་དཀར་ཨ་བདེ་འདྲི་བཞིན་འགྲོ།
                            རྒོད་ཐང་དཀར་བདེ་བའི་སྐད་ཅིག་གོ།
                            རྒྱབ་གཤོག་སྒྲོ་བསམ་པ་ལམ་སང་དགའ།།
                            གྲོང་རྒྱ་གྲོང་སྟེང་ལ་ཡར་ཡར་འགྲོ།
                            དྲིན་ཕ་མ་ཨ་བདེ་འདྲི་བཞིན་འགྲོ།
                            དྲིན་ཕ་མ་བདེ་བའི་སྐད་ཅིག་གོ།
                            ང་བུ་ཆུང་བསམ་པ་ལམ་སང་དགའ།།
                                               4
                            དགུང་ཨ་སྔོན་སྦ་ཆེན་ས་ལ་ཕུབ།།
                            སེར་ཉི་ཟླ་འབྲི་བརྒྱས་མཐའ་ནས་བསྐོར།།
                            དཀར་སྨིན་དྲུག་འོ་མའི་རྒྱ་མཚོ་འཁྱིལ།།
                            བྲག་དཀར་ཡག་སྦ་ཆེན་ས་ལ་ཕུབ།།
                            རྒོད་ཐང་དཀར་འབྲི་བརྒྱས་མཐའ་ནས་བསྐོར།།
                            རྒྱབ་གཤོག་སྒྲོ་འོ་མའི་རྒྱ་མཚོ་འཁྱིལ།།
                            གྲོང་རྒྱ་གྲོང་སྦ་ཆེན་ས་ལ་ཕུབ།།
                            དྲིན་ཕ་མ་འབྲི་བརྒྱས་མཐའ་ནས་བསྐོར།།
                            རང་མི་སེར་འོ་མའི་རྒྱ་མཚོ་འཁྱིལ།།