ཁམས་མི་ཉག་ཡུལ་གྱི་སྐོར་བྲོ་དང་བྲོ་ཤགས་ཀྱི་བྲོ་ཚིག་ཁག་ཅིག

                                               5
                            ས་ལ་བདེ་ཀླུང་བདེ་ལུང་པ་བདེ།།
                            ས་བདེ་ས་གཅིག་ལ་དགོན་ཆེན་ཆགས།།
                            དགོན་ཆེན་པོ་ཕྱི་ཡག་ནང་ཡག་རེད།།
                            ཕྱི་ཡག་ཡག་མཆོད་རྟེན་བརྒྱ་རྩ་ཡག།
                            ནང་ཡག་ཡག་བླ་མ་བཟང་པོ་ཡག།
                            ས་ལ་བདེ་ཀླུང་བདེ་ལུང་པ་བདེ།།
                            ས་བདེ་ས་གཅིག་ལ་རྫོང་ཆེན་ཆགས།།
                            རྫོང་ཆེན་པོ་ཕྱི་ཡག་ནང་ཡག་རེད།།
                            ཕྱི་ཡག་ཡག་དམག་དང་གོ་ཚོན་ཡག།
                            ནང་ཡག་ཡག་དཔོན་པོ་བཟང་པོ་ཡག།
                            ས་ལ་བདེ་ཀླུང་བདེ་ལུང་པ་བདེ།།
                            ས་བདེ་ས་གཅིག་ལ་གྲོང་ཆེན་ཆགས།།
                            གྲོང་ཆེན་པོ་ཕྱི་ཡག་ནང་ཡག་རེད།།
                            ཕྱི་ཡག་ཡག་བུ་ཚ་རིགས་རྒྱུད་ཡག།
                            ནང་ཡག་ཡག་ཕ་མ་བཟང་པོ་ཡག།
                                               6
                            ཤྭ་བ་ཆུང་ཆུང་ལ་མོ་བརྒལ་ནས་འགྲོ།
                            ལ་མོ་མ་བརྒལ་སྨོན་ལམ་ཚིག་གསུམ་བཏབ།།
                            ཤྭ་བ་ལུས་ལ་བར་ཆད་མ་འོང་དགོས།།
                            ཐང་དཀར་ཆུང་ཆུང་བྲག་དཀར་བརྒལ་ནས་འགྲོ།
                            བྲག་དཀར་མ་བརྒལ་སྨོན་ལམ་ཚིག་གསུམ་བཏབ།།
                            ཐང་དཀར་ལུས་ལ་བར་ཆད་མ་འོང་དགོས།།
                            གྲས་མཉམ་ཆུང་ཆུང་གྲོང་ཆེན་བརྒལ་ནས་འགྲོ།
                            གྲོང་ཆེན་མ་བརྒལ་སྨོན་ལམ་ཚིག་གསུམ་བཏབ།།
                            གྲས་མཉམ་ལུས་ལ་བར་ཆད་མ་འོང་དགོས།།
                                               7
                            རི་ནོར་བུ་འདྲ་ལེའི་རི་འགོ་མཛེས།།
                            ཤིང་ཡར་འཁྲུངས་ཐམས་ཅད་ཐང་ཤིང་འཁྲུངས།།
                            ཡར་འཁྲུངས་འཁྲུངས་རྩེ་མོ་དགུང་དང་མཉམ།།
                            མར་འཁྱིལ་འཁྱིལ་ལོ་མ་ས་ལ་འཁྱིལ།།
                            མར་ས་ལ་འཁྱིལ་བཞིན་བསོད་ནམས་འཁོར།།
                            རི་ནོར་བུ་འདྲ་ལེའི་རི་སྐེད་མཛེས།།
                            ཤིང་ཡར་འཁྲུངས་ཐམས་ཅད་ཙནྡན་འཁྲུངས།།
                            ཡར་འཁྲུངས་འཁྲུངས་རྩེ་མོ་བྲག་དང་མཉམ།།
                            མར་འཁྱིལ་འཁྱིལ་ལོ་མ་ས་ལ་འཁྱིལ།།
                            མར་ས་ལ་འཁྱིལ་བཞིན་བསོད་ནམས་འཁོར།།
                            རི་ནོར་བུ་འདྲ་ལེའི་རི་མདའ་མཛེས།།
                            ཤིང་ཡར་འཁྲུངས་ཐམས་ཅད་རྒྱ་ཤིང་འཁྲུངས།།
                            ཡར་འཁྲུངས་འཁྲུངས་རྩེ་མོ་གྲོང་དང་མཉམ།།
                            མར་འཁྱིལ་འཁྱིལ་ལོ་མ་ས་ལ་འཁྱིལ།།
                            མར་ས་ལ་འཁྱིལ་བཞིན་བསོད་ནམས་འཁོར།།
                                               8
                            ཨ་སྔོན་དགུང་ལ་ཡར་ཡར་འགྲོ་ན་འགྲོ།
                            ཉི་ཟླ་ངེད་གཉིས་རྩེད་མོ་རྩེ་ན་རྩེ།།
                            སྨིན་དྲུག་ང་ཚོ་ཉམས་དགའ་རྒྱས་ན་རྒྱས།།
                            བྲག་དཀར་སྟེང་ལ་ཡར་ཡར་འགྲོ་ན་འགྲོ།
                            ཐང་དཀར་ངེད་གཉིས་རྩེད་མོ་རྩེ་ན་རྩེ།།
                            གཤོག་སྒྲོ་ང་ཚོ་ཉམས་དགའ་རྒྱས་ན་རྒྱས།།
                            རྒྱ་གྲོང་སྟེང་ལ་ཡར་ཡར་འགྲོ་ན་འགྲོ།
                            གྲས་མཉམ་རང་གཉིས་རྩེད་མོ་རྩེ་ན་རྩེ།།
                            མི་སེར་ང་ཚོ་ཉམས་དགའ་རྒྱས་ན་རྒྱས།།
                                               9
                            རྒྱ་གར་རྡོ་དང་རྡོ་གཅིག།
                            རྒྱ་ནག་རྡོ་དང་རྡོ་གཉིས།།
                            རང་ཡུལ་རྡོ་དང་རྡོ་གསུམ།།
                            རྡོ་གསུམ་འབྱུང་ས་མི་གཅིག།
                            ལ་ལུང་པ་ཁ་ཁ།།
                            རྡོ་གསུམ་འཛོམས་ས་ཡག་མོ།།
                            ལྷ་སའི་རྡོ་ར་ཕྲ་མོ།།
                            ལྷ་ས་རྡོ་དང་རྡོ་གཅིག།
                            མོན་ཡུལ་རྡོ་དང་རྡོ་གཉིས།།
                            རང་ཡུལ་རྡོ་དང་རྡོ་གསུམ།།
                            རྡོ་གསུམ་འབྱུང་ས་མི་གཅིག།
                            ལ་དང་ལུང་པ་ཁ་ཁ།།
                            རྡོ་གསུམ་འཛོམས་ས་ཡག་མོ།།
                            དྭགས་པོའི་རྡོ་ར་ཕྲ་མོ།།
                            གངས་རི་རྡོ་དང་རྡོ་གཅིག།
                            རྫ་རི་རྡོ་དང་རྡོ་གཉིས།།
                            རང་ཡུལ་རྡོ་དང་རྡོ་གསུམ།།
                            རྡོ་གསུམ་འབྱུང་ས་མི་གཅིག།
                            ལ་དང་ལུང་པ་ཁ་ཁ།།
                            རྡོ་གསུམ་འཛོམས་ས་ཡག་མོ།།
                            མི་ཉག་རྡོ་ར་ཕྲ་མོ།།
                                               10
                            དགུང་ཨ་སྔོན་གཡང་གཞི་གཡང་ཁང་ནང་།།
                            སེར་ཉི་ཟླ་གསུམ་གྱིས་གཡང་འབོད་བྱེད།།
                            གཡང་ཕྱི་ལ་མ་འགྲོ་ནང་ལ་འཁོར།།
                            བྲག་དཀར་ཡག་གཡང་གཞི་གཡང་ཁང་ནང་།།
                            རྒོད་ཐང་དཀར་གསུམ་གྱིས་གཡང་འབོད་བྱེད།།
                            གཡང་ཕྱི་ལ་མ་འགྲོ་ནང་ལ་འཁོར།།
                            གྲོང་རྒྱ་གྲོང་གཡང་གཞི་གཡང་ཁང་ནང་།།
                            སྡེ་མི་སེར་གསུམ་གྱིས་གཡང་འབོད་བྱེད།།
                            གཡང་ཕྱི་ལ་མ་འགྲོ་ནང་ལ་འཁོར།།