ཞི་བདེ་ཉི་མའི་སྙན་ངག་འདམས་བཀོད།

ང་ཚོས་སྤྱང་ཀི་ལ་སློབ་སྦྱོང་བྱེད་དགོས།

སྤྱང་ཀི་ནི་ཧ་ཅང་རྩ་དོན་ཅན་ཞིག་རེད།
མཚན་མོར་སྐྱི་གཡའ་བའི་ཀུ་ཅོ་འདོན་ཞིང་།
ཉིན་མོར། སྨྲ་བ་མེད་པར་རི་ལུང་དུ་ཉུལ།
སྤྱང་ཀིའི་ཡར་སྔོན་དུ།  ཀུ་ཅོ་འདོན་མཁན་ཤིན་ཏུ་མང་།
ཡིན་ཡང ་། རྩ་དོན་གྱི་རང་བཞིན་ལྡན་པ་ཉུང་ཉུང་ཡིན།

སྤྱང་ཀི་ནི་ཤ་ཟ་རྒྱུར་དགའ་བོ་ཡོད།
ཁོས་ཤ་ཟ་དུས ། ཧ་ཅང་གོ་རིམ་ལྡན།
ཐོག་མར་ཁྲག་ཡིད་ཚིམས་པ་ཞིག་འཇིབས་ལ།
རྗེས་སུ་བྱང་ཆ་ལྡན་པའི་ངང་།
མགོ་སུག་གི་རྩེད་འཇོ་སྣ་ཚོགས་བྱེད།

སྤྱང་ཀི་ནི།  སྤྱང་གྲུང་ཅན་གྱི་མགྲོན་པོ་རེད།
ཀུ་རེ་དང་རྩེད་འཇོ་ཅི་ཡང་མེད།
ཁོའི་ནགས་ཚལ་འདིའི་གསོལ་སྟོན་ཁུ་སིམ་མེར་ཟོས་རྗེས།
ཡིད་ཚིམ་པའི་བཟོ་ལྟ་ཅི་ཡང་མེད་པར།
ད་དུང་། ཧ་ཅང་བག་ཡོད་ངང་ སོ་ལྟའི་ཚུལ་གྱིས་འགྲོ
སྤྱང་ཀི་ལོ་ན་ཆུང་དུས།  འོ་མ་འཐུང་མྱོང་།
འོ་མ་འཐུང་བའི་གོ་རིམ་ཧྲིལ་བོ་ནི་ཧ་ཅང་སྙིང་ཉེ་བ་ཞིག་རེད།
ཡིན་ཡང་། འོ་མ་འཐུང་མཁན་ཐམས་ཅད།
དཀར་བོ་ཡིན་པ།  སུ་ཞིག་གིས་ཀྱང་ཁ་ཚོན་གཅོད་མི་ཐུབ།

སྤྱང་ཀི་གྲགས་དུས།  རླུང་ལྡང་མཚམས་རེ་ཞིག་འཇོག་སྲིད།
རྔོན་པ་ཁ་ཤས་ཀྱང་།  མཚན་མོ་ཞིག་གི་མགོ་བརྩམས་པ་རྟོགས་ཤིང་།
རང་རང་གི་མདའ་གཞུ་ཁུར་ཏེ།
རི་སྒང་ནས་ཕྱིར་རང་ཁྱིམ་དུ་ལོག
དེ་དུས། ང་ཚོས་རང་ཁྱིམ་དུ་ཤ་ཟ་ཞིང་།
ད་དུང་།  ཉིན་མོ་དག་གི་འཆར་གཞི་གང་མང་བཟོ།

སྤྱང་ཀི་གྲགས་དུས།  ཁྱོད་ཀྱིས་ཀྱང་གླུ་ལོངས།
གླུ་ཚིག་ག་འདྲ་ཞིག་ཡིན་ཡང་། 
མཚན་མོ་འདི་དང་།   ཐང་ཆེན་འདི།
ད་དུང་དུས་ཚོད་འདིའི་དགོས་མཁོ་ཤ་སྟག་ཡིན་ལ།
སྤྱང་ཀི་ལ་སློབ་སྦྱོང་བྱེད་པའི་ཐབས་ལམ་ཉག་གཅིག་རེད།

སྤྱང་ཀི་དགོད་དུས། ཡུལ་མི་ཚོ་ཟང་ཟིང་གིས་འཚོ་ལ།
རང་ཉིད་ཀྱི་བུ་ཕྲུག་བྲང་ཁར་སྦྱོར།
མེ་ཕུང་གི་ཁ་གཏད་དུ།  གཟབ་ནན་གྱིས་བསྡད་དེ།
མཚན་མོ་དེ་ནི།  ཅི་འདྲའི་གཏིང་ཟབ་པར་བསམ་བློ་གཏོང་།
སྤྱང་ཀི་ནི།  ཧ་ཅང་འཇོན་ཐང་ཅན་ཞིག་ཡིན།
ཕྲུ་གུ་རེ་རེ་འཚར་ལོངས་འབྱུང་བར་འཁང་ར་ཅི་ཡང་མེད།
བཟའ་བཏུང་གི་ཆེད་དུ།  ཡུལ་མི་ཚོར་ཕོག་ཐུག་ཁ་ཤས་བཏང་ནའང་།
ང་ཚོས།  ཡུལ་འདིར་བསམ་བློ་རྒྱང་རིང་གཏོང་དགོས།

སྤྱང་ཀི་ལ་བཀུར་བསྟི་བྱེད་མཁན།   ནགས་ཚལ་འདིའི་ཁྲོད་མང་པོ་མེད།
ཆོམ་རྐུན་དང་གཡོ་སྒྱུའི་ཐ་སྙད་གང་མང་ཞིག་བཏགས་ཀྱང་།
ཡུལ་ལྗོངས་འདིར།  དགོས་མཁོ་མེད་པའི་མགྲོན་པོ་དག
འཛེམ་དོགས་མེད་པར་འཚར་ལོངས་འབྱུང་བཞིན་པ་སུས་རྟོགས།

སྤྱང་ཀི་མེད་ཚེ།  མཚན་མོ་མེད།
རི་ཚོགས་དག་གི་རྔམས་ཟིལ་མེད་ལ།
ཡུལ་མི་ཚོ་དང་མེ་ཕུང་གི་དྭངས་གཙང་མེད།
སྤྱང་ཀི་ནི ། ཡུལ་ལྗོངས་འདིའི་ཁ་དོག་ཉག་གཅིག་ཡིན་པས།
ང་ཚོས་སྤྱང་ཀི་ལ་དོ་ཁུར་བྱེད་དགོས་ལ།
ང་ཚོས་སྤྱང་ཀི་ལ་སློབ་སྦྱོང་བྱེད་པའང་རྒྱུན་འཁྱོངས་བྱེད་དགོས།
སྤྱང་ཀི་ལ་སློབ་སྦྱོང་བྱེད་ན།  མཚན་མོ་ལ་བསམ་བློ་གཏོང་དགོས།
1998.5.26ཉིན་གནའ་མཁར་ཟི་ལིང་ནས་བྲིས།

སྐྲག་མི་དགོས།  

སྒམ་ཆུང་དེ་ནམ་མཁའ་ནས་ལྷུང་ཡང་།
དེའི་ནང་གི་དྲག་ཆས་སྔ་མོ་ནས་རྒས་ཟིན།
ཁྱོད་ཀྱིས་མུ་མཐུད་དུ་སྔོག་བཤེར་བྱོས་དང་།
མཚན་བྱང་ཙམ་ལས་ཅི་ཡང་རྙེད་མི་སྲིད།

སྐུ་དྲག་དེ་ཞོགས་པར་ཡར་ལངས་ཏེ།
རིའི་རྩེ་མོ་ནས་སྒམ་ཆུང་དེར་གད་དར་བྱེད་ཅིང་།
སྒམ་ཆུང་དེའི་དཔའ་མཛངས་ཅི་དགར་བསྒྲག་ཀྱང་།
རྒྱལ་སྲས་དག་གིས།  
ཁྱིམ་གཞིས་ལས་སྣང་བརྙན་ཅི་ཡང་མ་མཐོང་།

སྒམ་ཆུང་དེའི་ཆེད་དུ།  
སྐུ་དྲག་ཚོ་གསང་སྟབས་ཀྱིས་འདས།
ཉི་ཤར་དང་ཉི་ནུབ་ལན་མང་འཁོར་ཀྱང་།
མཁར་གྲོང་ལས། 
མྱ་ངན་གྱི་སྣང་ཚུལ་ཅི་ཡང་མ་ཐོས།
ཡིན་ཡང་སྒམ་ཆུང་དེར་གཟབ་གཟབ་བྱེད་དགོས།
རྒས་ཟིན་པའི་དྲག་ཆས་ལའང་གཟབ་གཟབ་བྱེད་དགོས།

ནགས་ཚལ་ཁྲོད།    
མི་ལ་ལས་གླུ་ལེན་བཞིན་ཡོད།
དེ་ནི་སེམས་ཁྲལ་ཞིག་གམ།     
ཡང་ན་ཚོད་ལྟ་གཞན་ཞིག་རེད།
སྐྲག་མི་དགོས།   
ང་ཚོ་ཡུལ་འདིའི་ཞག་སྡོད་པ་ཡིན།

མཚན་གཅིག་གི་རྨི་ལམ་དེའི།    
ཁྱོད་ལ་ཁག་འཁུར་ཅི་ཡང་མི་དཀྲི
སྒམ་ཆུང་དེར་སྔོག་གཤེར་བྱེད་ཐེངས་རེར།
 ནམ་མཁའ་ནས་བྱ་ཁྱུ་མང་པོས་ངོ་མཚར་གྱི་ཀུ་ཅོ་འདོན་ངེས།
དེ་དུས།     ཁྱོད་ཀྱིས་གཞས་གཏོང་སྟངས་བསྒྱུར་དགོས་ལ།
གོམ་འདེགས་ཅི་ལྟར་ལེན་རྒྱུར་བསམ་བློ་གཏོང་དགོས།

སྐྲག་མི་དགོས།  
ཁྱོད་ཀྱི་མགྲིན་པ་ཤིན་ཏུ་བདེ་བོ་འདུག
ཁོས་གཞས་གཏོང་བར་འཚེར་སྣང་ཅི་ལ་བྱེད།
ང་ཚོའི་སྔས་འགྲམ་དུ་མཛེས་སྡུག་གི་ཕོ་བྲང་ཅི་ལྟར་མང་ཡང་།
བུད་མེད་ཚོའི་ཐུགས་ཁུར་འོག
རྣོ་དབལ་གྱི་གཞས་གདངས།  
དུས་སྟོན་གྱི་རྒྱབ་ནས་བཏང་ཡང་ཆོག

སྐྲག་མི་དགོས།    
མཚན་མོར་མི་སུས་ཀྱང་རྨི་ལམ་རྨིས་ཆོག་ལ།
ལམ་ཆེན་སྟེང་།    
ང་ཚོའི་དཔེ་རིས་ཅི་དགར་བྲིས་ཆོག

ལོ་དུ་མའི་རྗེས་སུ།     
ཁྱོད་ཀྱི་ཕ་གཞིས་ལ་སྒམ་ཆུང་ཞིག་ཟགས་ཡོང་།
དེ་དུས་ཁྱོད་ཀྱིས་ཧ་ཅང་བག་ཡོད་ངང་།
གཞས་གདངས་རེ་རེ་འཚར་ལོངས་བྱུང་བར་དྲན་གསོ་བྱེད་དགོས་ལ།
རྒས་འཁོགས་ཀྱི་བང་མཛོད་དག   
རྒྱུན་འཁྱོངས་བྱེད་པར་གཟབ་གཟབ་བྱེད་དགོས།

སྐྲག་མི་དགོས།     
ང་ཁྱོད་དང་མཉམ་དུ་ཅི་ཙམ་བར་གནས་བར་བྱ།
ངས་ཁྱོད་དང་ལྷན་དུ་ཅི་ཙམ་བར་གཟོད་པར་བྱ།