འཆི་མེད་ལགས་ཀྱི་ལྷུག་རྩོམ།

       གཟའ་འཁོར་དེར་ང་རང་ལས་རེས་པ་ཡིན་པས་ལས་རེས་ཁང་ནས་དྲོས་ཇ་འཐུངས་རྗེས་ཅོག་ཙེ་ལ་བསྙེས་ཏེ་གཉིད་ལྕོག་ཙམ་བརྒྱབ་པ་ན། གློ་བུར་ང་དང་ཅོག་ཙེ་བཅས་པ་ཡོམ་ཡོམ་བྱས་ཤིང་། དེའི་མུར་མགོ་ན་བ་དང་སྐྱུར་མེར་ལྡང་བ། སྙིང་འཚང་བ་སོགས་བྱུང་བས་ང་རང་སྐྲག་སྣང་གིས་ལས་རེས་ཁང་གི་སྒོར་འབྲོ་ཞོར་མཁྲིག་མའི་དུས་ཚོད་ལ་བལྟས་པ་ན་དུས་ཚོད་གཉིས་དང་ཕྱེད་ཀར་འཐོན་ལ་ཉེ། ངས་དེར་ཡོད་ཀྱི་དགེ་གྲོགས་དང་སློབ་མ་ཚོར་ས་འགུལ་བརྒྱུགས་སོང་། ས་འགུལ་བརྒྱུགས་སོང་ཞེས་པ་ན། ཁོ་ཚོའི་ལ་ལར་མཚར་སྣང་སྐྱེས་ཤིང་ལ་ལ་གད་མོ་ཆེས་ཆེར་དགོད་བཞིན། ས་འགུལ་ལས་རེས་ཁང་དུ་ཁྱོད་སར་བརྒྱུགས་སོང་བ་རེད། ཁྱོད་ཀྱི་རྨི་ལམ་ལ་ས་འགུལ་བྱུང་བ་རེད་སོགས་ཡིད་མ་ཆེས་པའི་ཀུ་རེ་སྣ་ཚོགས་རྩེས།
       སྐབས་དེར་དེང་སང་ནང་བཞིན་སྐད་འཕྲིན་དར་མེད་ནའང་། ཅུང་ཙམ་གྱི་རྗེས་ལ་ཁ་པར་དུ་སི་ཁྲོན་ཁྲི་ཚང་ལ་གུང་ཡོལ་དུས་ཚོད་གཉིས་དང་སྐར་མ་ཉེར་བརྒྱད་སྟེང་ཚད་རིམ་བརྒྱད་ཅན་གྱི་ས་འགུལ་བྱུང་ཞིང་། མིག་སྔར་ཤི་རྨས་ཀྱི་གྲངས་འབོར་གསལ་བོར་ཐོན་མེད་ཚུལ་སོགས་ཀྱི་བརྡ་འཕྲིན་རབ་དང་རིམ་པར་འབྱོར་པ་ན་ད་གཟོད་དགེ་གྲོགས་ཚོས་ཁྱོད་འདི་ཡ་མཚན་རེད། ཁྲི་ཚང་ས་འགུལ་གྱིས་ཁྱོད་རང་གཉིད་ལས་བསླངས། ང་ཚོ་སད་དེ་ཡོད་ནའང་ཅི་ཡང་མ་ཚོར། ཁྱོད་ཀྱི་ཚོར་བར་རྒྱལ་ཁ་བྱིན་པ་ཡིན་ཞེས་ཀུ་རེ་རྩེས།
       ཉིན་དེ་ནི་སྤྱི་ལོ༢༠༠༨ལོའི་ཟླ་ལྔ་བའི་ཚེས་བཅུ་གཉིས་རེད། ཉིན་དེ་ནི་ཚ་བ་རོང་གི་ཁྱོད་དང་ཕན་ཚུན་མ་མཐོང་བར་མི་ལོ་བཅུ་བདུན་དང་ཕན་ཚུན་གྱི་སྐད་ཆ་ཙམ་ཡང་མ་གོ་བར་ལོ་ངོ་བཅུ་གཅིག་འཁོར་བའི་དུས་སྐབས་ཀྱང་རེད།
       ཁྲི་ཚང་དུ་ས་འགུལ་བྱུང་བ་ཐོས་མ་ཐག ཚེ་སྲོག་ཁྲི་ཕྲག་མང་བོ་རྨེག་མེད་དུ་གྱུར་ཡོད་པ་སྨོས་མེད་ཡིན་ནའང་། ཐོག་མར་ངའི་ཡིད་ལ་འཁོར་བ་ནི་ཁྲི་ཚང་དུ་གནས་ཆགས་པའི་རྔ་བ་ཁུལ་མི་རིགས་དགེ་ཐོན་སློབ་གྲྭ་རུ་དགེ་རྒན་བྱས་པའི་ཚ་བ་རོང་གི་ཁྱོད་རང་རེད།
       ཁྱོད་རང་ཚེ་སྲོག་གྲངས་མེད་ལས་ཀྱང་གལ་ཆེ་ཟེར་བ་གཏན་ནས་མིན། འོན་ཀྱང་ཁྲི་ཚང་ལུང་བ་ཞེ་ན་ང་ལ་དོན་སྤྱི་ཙམ་ཡང་ཡིད་ལ་འཆར་རྒྱུ་མེད་ཅིང་། ཡུལ་དེ་ན་རྒྱུས་ཡོད་ཅིག་ཡོད་པ་ནི་ཁྱོད་རང་ཁོ་ན་ཡིན་པས་ཡིན།
       ངས་རང་ཚོད་ཀྱིས་ཡར་མར་ལ་རྩད་བཅད་དེ་ཁྱོད་ཕྱོགས་ཀྱི་གནས་ཚུལ་རེ་ཨེ་ཐོས་ལ་འབད་པ་བྱས་ཀྱང་ཁྱོད་དང་འབྲེལ་ཡོད་ཀྱི་ཚིག་གཅིག་ཀྱང་གོ་མ་ཐུབ་ཅིང་སེམས་འཚབ་ངང་ཉིན་ཞག་གཅིག་འདས།
       ཕྱི་ཉིན་ང་ཚོའི་དགེ་གྲོགས་ཤིག་གིས་དགེ་རྒན་འགའ་ལ་རྔ་བ་ཁུལ་སློབ་གསོ་ཅུའུ་རུ་ལས་ཀ་བྱེད་ཀྱིན་པའི་གྲོགས་པོ་ཞིག་ལ་ད་སོ་མ་ཁ་པར་བཏང་མ་ཐག་ཡིན་སོགས་ས་འགུལ་གྱི་སྐོར་ལབ་ཀྱིན་འདུག་པ་ཐོས་པས། ངས་དགེ་གྲོགས་དེའི་ས་ནས་ཁ་པར་ཨང་གྲངས་དེ་བླངས་ཤིང་འུར་ཟིང་མེད་ས་ཞིག་ཏུ་སོང་ནས་ཁ་པར་བཏང་བ་ན། ཁ་པར་ལས་ཕོ་སྐད་རྫིག་ལ་ངག་སྒོ་འཇམ་པ་ཞིག་གིས། ཝེ་སུ་ཡིན་ཟེར། ངས་དེའི་མུར་ཁྱོད་བདེ་མོ། ང་ནི་ཁྱོད་ཀྱི་ངོ་ཤེས་ཤིག་མིན། ཡིན་ནའང་ཁྱོད་ལ་ཞུ་བྱ་ཞིག་འདུག་ཅེས་གནའ་གྲོགས་ཁྱོད་ཀྱི་གནས་ཚུལ་རགས་ཙམ་བཤད་པ་ན་ཏག་ཏག་ཁྱོད་གཉིས་གྲོགས་པོ་ཡིན་འདུག ཁ་པར་ཕར་སྣེའི་མི་དེས་ཉིན་ཤས་སྔོན་ངེད་གཉིས་མཉམ་དུ་ཇ་འཐུངས་པ་ཡིན། ལོ་ཤས་སྔོན་ནས་ཁོ་རང་ལས་གནས་སྤར་ཏེ་ད་ལྟ་འབར་ཁམས་ན་ཡོད། ཁོ་རང་བདེ་འཚམ་རེད། ཡིན་ནའང་ཉིན་འགར་ལས་ཁུངས་སོ་སོའི་མི་སྣ་ཧྲག་བསྡུས་ཀྱིས་ཁྲི་ཚང་དུ་རོགས་སྐྱོར་ལ་སོང་ཡོད་པ་དང་ཁོ་རང་ཡང་དེའི་གྲས་སུ་སོང་ཡོད། དེ་བས་ཁོའི་ཁ་པར་ལ་བརྡ་རྟགས་མི་འདུག ཁྱོད་ལ་བཤད་རྒྱུ་འདྲ་ཡོད་ན་ང་ལ་ཤོད་དང་ངས་ཁོ་ལ་སྐད་འཕྲོད་ངེས་ཟེར་བས། ངས་ཀྱང་ང་ལ་དམིགས་བསལ་བཤད་རྒྱུ་ཅང་མེད། ཁྱོད་རང་ཁོ་ལ་འཕྲད་པའམ་ཡང་ན་ཁ་པར་རེ་གཏང་ཐུབ་པ་བྱུང་ན། མི་ལོ་བཅུ་བདུན་ཡར་སྔོན་ཁྱོད་ཀྱིས་ངོ་ཤེས་པའི་རེབ་གོང་བ་དེས་ཁྱོད་ལ་འཚམས་འདྲི་ཞིག་བྱས་སོང་། ཁྱོད་རང་བདེ་འཚམས་ཡིན་པ་ཐོས་པས་ཧ་ཅང་དགའ་ཡོད་ཅེས་བཤད་རོགས་ཞུས་པ་ན། ཕ་རོལ་པོ་དེས་ཨོ་ཡ་ཨོ་ཡ། ལོས་ཡིན་ལོས་ཡིན། དེ་མིན་བཤད་རྒྱུ་གཞན་འདྲ་མེད་དམ་ཟེར་བར་ངས་གཞན་བཤད་རྒྱུ་མེད་ཅེས་ཞུས། དེ་ལྟར་ཁ་པར་གཏང་མཚམས་བཞག་པ་དང་ངའི་བློ་ཡང་བདེ་བར་གྱུར།
       དེ་ནས་ཉིན་གསུམ་པའི་ཕྱི་དྲོའི་དུས་ཚོད་བཞི་བ་ཙམ་ལ་ང་ལ་ཨང་གྲངས་རྒྱུས་མེད་ཡིན་པའི་ཁ་པར་ཞིག་འབྱོར་ཏེ་ཁ་པར་བླངས་པ་ན་ཚ་བ་རོང་གི་མི་དེ་རེད། ང་རང་དར་ཅིག་ངག་ཀྱང་མི་འཁྲོལ་བར་ལུས་ཤིང་དེའི་མུར་ཕ་རོལ་པོས་པདྨ་འཚོ་ཞེས་འབོད་ཀྱིན་འདུག ངས་ཁྱོད་བདེ་མོ་ལབ་པ་ན་ཁོས་ཀྱང་བདེ་ཟེར། དེའི་མུར་ངེད་གཉིས་སྐད་ཆ་མེད་པར་ལུས། སྒོས་སུ་ཁོས་རྒྱལ་རོང་སྐད་བཤད་པས་ངེད་གཉིས་ལྷག་ཏུ་ལབ་གླེང་མང་བོ་བྱ་ཐབས་བྲལ།
       ང་ནི་སྤྱིར་ན་སྐད་རིགས་ཐད་ནས་དམུན་པོ་ཧ་ལས་པ་ཞིག་ཡིན། ཉི་མ་ལྷ་སར་སོང་ནའང་ཕར་བཤད་གཞན་པས་མི་གོ་ཞིང་ཚུར་བཤད་རང་གིས་མི་གོ་བས། མཚམས་མཚམས་སུ་ངས་ལྐུགས་པའི་བརྟུལ་ཞུགས་མི་འཛིན་རང་འཛིན་ཡིན། འུ་ཐུག་དུས་དབུས་སྐད་རེ་གཉིས་ལབ་ཚེ་གྲོགས་ཚོས་ཨ་མདོའི་ཁྱད་ཆོས་ལྡན་པའི་དབུས་སྐད་བཤད་རྒྱུ་ཡིན་ནམ་ཟེར་དུས་ང་རང་ལྷག་ཏུ་དོགས་མི་བདེ་བས་ཅི་ཡང་བཤད་མི་ཕོད། དེའི་སྟབས་ཀྱིས་ཉིན་དེར་ཡང་ཚ་བ་རོང་བ་དང་ངེད་གཉིས་བར་ནས་མི་ལོ་མང་བོར་ཕན་ཚུན་གྱི་སྐད་ཙམ་ཡང་གོ་མ་ཐུབ་རྐྱེན། གློ་བུར་ཁ་པར་ལས་འཕྲད་དུས་སྐད་ཆ་ཅི་ཞིག་གང་ནས་གླེང་དགོས་པའང་མི་ཤེས་ཤིང་། ལྷག་ཏུ་ངེད་གཉིས་བར་གྱི་སྐད་རིགས་ཀྱི་བཀག་རྒྱས་ཀྱང་ངེད་གཉིས་ཀྱིས་ཅི་ཡང་གླེང་ཐབས་མེད་པ་འདྲ། དེ་ནས་ངས་སྐད་ཆ་ཚིག་འབྲུ་རེ་རེ་དལ་མོའི་ངང་གཅིག་གཅིག་གཉིས་གཉིས་བྱས་ཏེ་ཁྱོད་ཀྱིས་ངའི་ཁ་པར་ཨང་གྲངས་ཇི་ལྟར་ཤེས་པ་ཡིན་ཞེས་དྲིས་པ་ན། ཁོས་ངའི་གྲོགས་པོ་འཇམ་བཀྲས་ང་ལ་ཁ་པར་མང་བོ་བཏང་འདུག་ཀྱང་ང་རང་བརྡ་རྟགས་མེད་སར་སོང་བས་ལེན་མ་ཐུབ། ང་ད་སོ་མ་ཁུལ་ལ་ཐོན་པ་དང་འཇམ་བཀྲར་ཁ་པར་བཏང་བ་ན་རེབ་གོང་གི་ཡིན་ཟེར་བ་ཞིག་གིས་ཁ་པར་བཏང་སྟེ་ཁྱོད་ཀྱི་བདེ་འཚམ་དྲིས་སོང་། ཨང་གྲངས་འདི་རེད་ཟེར་ནས་ཁ་པར་ཨང་གྲངས་བསྐུར་བྱུང་། ཐག་རིང་དུ་ངའི་བདེ་འཚམ་ཡིད་ལ་འཁོར་མཁན་ཞིག་ཡོད་ན་ངེས་པར་ཁྱོད་ཡིན་སྲིད། དེ་བས་ཨང་གྲངས་འདི་ཁྱོད་ཀྱི་ཡིན་པ་སེམས་ཐག་གིས་ཁ་པར་བཏང་བ་ཡིན་ཟེར། ངས་ཀྱང་ལན་དུ་ཁྲི་ཚང་ལ་ས་འགུལ་བྱུང་བའི་གསར་འགྱུར་མཐོང་བ་དང་ཁྱོད་ཡིད་ལ་དྲན་བྱུང་། དེའང་ཁྲི་ཚང་དུ་ང་ལ་ཁྱོད་མ་གཏོགས་ངོ་ཤེས་པའི་མི་གཅིག་ཀྱང་མེད་པས་ཡིན་ཞེས་བཤད་པ་ན། ཁོ་རང་སྐད་དམའ་མོ་ཧ་ཅང་ཐང་ཆད་པའི་གདངས་ཤིག་གིས་ཧེ་ཧེ་ཟེར། དེའི་མུར་ངེད་གཉིས་སྐད་ཆ་མེད་པར་གྱུར་ཏེ་ཁ་བརྡའི་འཕྲོ་ཡང་བསྐྱང་མ་ཐུབ།
       ཉིན་དེ་ནས་བཟུང་ཁོས་ཉིན་བཞིན་ཁ་པར་ལན་དུ་མར་གཏོང་ཞིང་། ངེད་གཉིས་ཕན་ཚུན་གོ་བརྡ་འཕྲོད་དཀའ་དཀའི་ངང་ཁ་བརྡ་མང་བོ་བྱས་ལ། ངེད་གཉིས་ཕན་ཚུན་འཕྲིན་ཡིག་གི་འགྲོ་འོང་ཆད་ནས་ལོ་ངོ་བཅུ་གཅིག་འགོར་བའི་རྗེས་ནས་ཁོས་གཉེན་བསྒྲིགས་ཤིང་དེའི་མུར་ལས་གནས་སྤར་ཏེ་འབར་ཁམས་སུ་ཡོད་ཚུལ་དང་བུ་མོ་ཞིག་ཀྱང་སྐྱེས་ཏེ་ད་ལོར་ལོ་བཅུ་གཅིག་ཡིན་པ་སོགས་ཁོའི་འཚོ་བའི་གནས་ཚུལ་ཞིབ་ཅིང་ཕྲ་བའི་སྒོ་ནས་ང་ལ་བཤད།
       ངེད་གཉིས་ཕན་ཚུན་ངོ་ཤེས་དུས་ནི་སྤྱི་ལོ༡༩༩༡ལོའི་ཟླ་བཞི་བའམ་ལྔ་བའི་ནང་ཡིན་པ་འདྲ། གང་ལྟར་རྩི་ཤིང་དང་སྡོང་ལོར་ནེམ་ཤ་རྒྱས་དུས་ཤིག་རེད། སྐབས་དེར་ང་ནི་རེབ་གོང་རྫོང་མི་རིགས་སློབ་འབྲིང་དུ་དགེ་རྒན་བྱས་ཡོད།
       ཉིན་ཞིག་སློབ་གྲྭའི་དགེ་རྒན་ཚོས་སློབ་ཁང་སྟོང་བ་གཉིས་ལ་གད་བདར་བྱས་ཏེ་གཅིག་གི་ནང་དུ་མལ་ཁྲི་བསྒྲིགས་ཤིང་གཅིག་གི་ནང་དུ་གཞུང་སྒྲུབ་ཅོག་ཙེ་སོགས་བཀོད་སྒྲིག་བྱས། སློབ་གཙོས་བཤད་ན་སང་ཉིན་ནས་མཚོ་སྔོན་སློབ་གསོ་སློབ་གླིང་གི་འཛིན་གྲྭ་ཞིག་རང་རེའི་སློབ་གྲྭར་དངོས་སྦྱོང་དུ་འོང་རྒྱུ་རེད་ཟེར།
       ཕྱི་ཉིན་གུང་ཡོལ་ཙམ་ལ་འགྲུལ་སྐྱེལ་རླངས་འཁོར་ཆེ་བ་ཞིག་ལས་མི་མང་བོ་ཞིག་གིས་སྔ་ཉིན་ང་ཚོས་གད་བདར་བྱས་པའི་སློབ་ཁང་དེའི་ནང་དུ་ཅ་དངོས་སྐྱེལ་གྱིན་འདུག
       དངོས་སྦྱོང་བ་ཚོ་བསླེབས་པའི་ཉིན་གཉིས་པར་སློབ་གཙོས་ཚོགས་འདུ་སྟབས་བདེ་ཞིག་བསྡུས་ཏེ་འཛིན་གྲྭ་སོ་སོར་དངོས་སྦྱོང་སློབ་མ་གཅིག་རེ་གཉིས་རེ་བགོས་ཡོད། ཁོ་ཚོས་རང་རང་གི་ཆེད་ལས་ལྟར་སློབ་ཁྲིད་བྱ་རྒྱུ་རེད་ཟེར།
       ཉིན་ཞིག་གི་ཕྱི་དྲོའི་སློབ་ཐུན་དང་པོ་གྲོལ་ནས་ང་རང་སློབ་ཁང་སྒོར་བུད་པ་ན་ཕོ་གཞོན་ཞིག་གིས་བསྒུགས་འདུག་པ་དང་། ཁོས་ང་ལ་རང་ཉིད་ནི་ད་ཐེངས་ཀྱི་དངོས་སྦྱོང་སློབ་མ་ཡིན་ལ་འཛིན་གྲྭ་འདིར་དངོས་ལུགས་འཁྲིད་དགོས། རྗེས་ཕྱོགས་རྒན་ལགས་ཀྱིས་མཛུབ་སྟོན་གང་མང་གནང་རོགས། རྒན་ལགས་ལ་བྱ་བ་འདྲ་ཡོད་དུས་ཁྱོད་ཀྱི་སློབ་ཐུན་ལ་ངས་སློབ་ཁྲིད་བྱ་ཆོག་ཟེར། ང་རང་ཧ་ལས་པ་ཞིག་ལ་ཁོ་ནི་བོད་པ་ཤ་སྟག་ཅིག་ཡིན་པ་མཐོང་མ་ཐག་ཤེས་ཐུབ། ཡིན་ནའང་ཁོས་ང་ལ་བོད་སྐད་ཚིག་གཅིག་མི་བཤད་པར་སི་ཁྲོན་རྒྱ་སྐད་བྱང་ཆ་ལྡན་པ་ཞིག་བཤད་དོན་ཅི་ཡིན་ནམ་སྙམ་པ་ཞིག་སྐྱེས་མོད། ངས་ཁོར་ཡ་ཡ་ཞེས་ལན་སྟབས་བདེ་ཞིག་བཏབ་སྟེ་སོང་།
       གཟའ་འཁོར་རེར་ཁོ་ལ་སློབ་ཐུན་གཉིས་རེ་ལས་མེད་པས་ངེད་གཉིས་འཕྲད་རྒྱུ་ཉུང་ཉུང་ཡིན། རེས་གཟའ་ལྷག་པའི་དགོང་སྦྱོང་སྐད་ཡིག་ཡིན་པས། ནམ་རྒྱུན་རེས་གཟའ་ལྷག་པའི་ཕྱི་དྲོར་ལས་ཚོགས་གྲོལ་ན་ང་རང་ཡུལ་ལ་འགྲོ་བཞིན་མེད། ཡུལ་ལ་སོང་ནས་ཕྱིར་ཡོང་ན་དུས་ཚོད་ལམ་ནས་ཟད་འགྲོ་ཞིང་དགོང་སྦྱོང་གི་རྗེས་ཀྱང་ཆོད་དཀའ་ཙམ་ཡིན་པས། ཉིན་དེར་ཡང་གཞུང་སྒྲུབ་ཁང་ནས་ནངས་ཇའི་ཟ་འཕྲོར་ལྷག་པའི་གོ་རེ་ཉུང་ཙམ་ཡོད་པ་དེ་ཟོས་རྗེས་སྔ་ཙམ་ནས་སློབ་ཁང་དུ་སོང་བ་ན་དངོས་སྦྱོང་དགེ་རྒན་དེས་སློབ་ཁང་སྒོ་ཁར་བསྒུགས་འདུག་ཅིང་ཁོས་ང་ལ་ཁྱོད་ཡུལ་དུ་སོང་དང་། ངས་ཁྱོད་ཀྱི་ཚབ་ཏུ་སློབ་མ་ཚོར་སྐད་ཡིག་རང་སྦྱོང་བྱ་རུ་འཇུག་ཆོག་ཟེར། ངས་མི་སྐྱོན། མི་སྐྱོན། དབྱར་ཐོག་ཡིན་པས་དགོང་སྦྱོང་གྲོལ་དུས་ས་རུབ་ཙམ་རེད། དེ་ནས་ཡུལ་ལ་སོང་ན་འཕྱི་བོ་མི་འདུག ཡང་གཅིག་བཤད་ན་དགེ་རྒན་གཞན་ཚང་མ་ཡང་ང་རང་ནང་བཞིན་ཡིན། ང་ཚོ་དབྱར་དགུན་མེད་པར་འདི་ལྟར་ཡུལ་ནས་ཡོང་སྟེ་ཡུལ་ལ་ལོག་དགོས་པས་གོམས་འདུག་ཅེས་པ་ན། ཁོ་རང་ཅུང་དོགས་མ་བདེ་བའི་ཉམས་ཀྱིས་ཕྱི་ལྟག་ལ་འཕྲུག་འཕྲུག་དང་འཛུམ་ཙམ་བྱེད་པ་ལས་ཅི་ཡང་བཤད་མ་བྱུང་། དེ་ནས་ཉིན་བཅུ་ལྷག་ལ་ངས་ཁོ་རང་མཐོང་མ་བྱུང་།
       གཟའ་འཁོར་གཉིས་ཙམ་འགོར་རྗེས་གཟའ་ལྷག་པའི་དགོང་སྦྱོང་སྐབས་སུ་ཁྱིམ་ན་ངའི་བུ་ཆུང་ལ་ལྟ་མཁན་མེད་པས་ངས་བུ་ཆུང་ཁྲིད་དེ་སློབ་གྲྭར་ཡོང་བ་ན་ཁོས་ཐེངས་སྔོན་མ་ནང་བཞིན་སློབ་ཁང་སྒོ་ན་ང་ལ་བསྒུགས་འདུག
       ཁོས་ང་ལ་ཁྱོད་ཀྱིས་བུ་ཆུང་ཡང་ཁྲིད་ཡོང་ཡོད་པས། དོ་ནུབ་ངས་ཁྱོད་ཀྱི་ཚབ་ལ་སློབ་ཁྲིད་བྱ། འཛུམ་དང་བཅས་ཁྱོད་སེམས་བདེ་མོས་ཕྱིར་ཡུལ་ལ་སོང་དང་ཆོག་ཟེར། ངས་ཁོར་དོ་ནུབ་རྒྱུགས་ཆུང་ལེན་རྒྱུ་བྱས་ཡོད་ཅེས་པ་ན། ཁོས་དེས་ན་ཁྱོད་ཀྱི་བུ་ཆུང་ལ་ངས་བལྟ་ཟེར་ནས་བུ་ཆུང་ལ་ལག་པ་བསྲིངས་པ་ན། ངས་བུ་ཆུང་ད་རུང་ལོ་ཆུང་བས་མི་ཆ་མེད་དང་མཉམ་དུ་སྡོད་མི་སྲིད། དེ་བས་ཁྱོད་ལ་འོ་བརྒྱལ་མི་བཟོ། ཁྱོད་རང་སྡོད་ཁང་དུ་སོང་དང་ཆོག་ཅེས་པ་ན་མ་བསམས་ས་ནས་ལོ་གཉིས་ལ་བུད་མ་ཐག་པའི་ངའི་བུ་ཆུང་ཁོ་སར་གཡོན་ཏེ་ལག་པ་བསྲིངས་སོང་བས་ང་ལ་ཐབས་ཤེས་མ་བྱུང་།
       དགོང་སྦྱོང་གྲོལ་བ་དང་ཁོས་ངའི་བུ་ཆུང་པང་སྟེ་སློབ་གྲྭའི་ར་སྐོར་དུ་ང་ལ་བསྒུགས་འདུག ང་རང་ཁོའི་གམ་དུ་སོང་སྟེ་དཀའ་སོང་ངམ། བཀའ་དྲིན་ཆེ་ཞེས་བཤད་པ་ན་དཀའ་མ་སོང་། མི་སྐྱོན་གི་ཟེར། ངེད་གཉིས་འཛུམ་ཙམ་བྱས་རྗེས་རང་རང་སར་ལོག
       ཉིན་འགའ་འགོར་རྗེས་ཀྱི་ཕྱི་དྲོ་ཞིག་ལ་སློབ་གྲྭའི་མགོ་ཁྲིད་ཅིག་གིས་གཞུང་སྒྲུབ་ཁང་སོ་སོར་སང་ཉིན་དངོས་སྦྱོང་སློབ་མ་ཚོ་ཕྱིར་འགྲོ་དགོས་པས། དོ་ནུབ་དགེ་རྒན་ཚང་མར་གཞུང་ན་ཟ་མ་བཀོད་སྒྲིག་བྱས་ཡོད། སློབ་གྲྭའི་ནང་ཁུལ་དུ་དངོས་སྦྱོང་སློབ་མ་ཚོར་སྐྱེལ་མའི་སྤྲོ་ཚོགས་སྟབས་བདེ་ཞིག་ཀྱང་བསྡུ་རྩིས་ཡོད་པས་ཟ་མ་ཟོས་རྗེས་ཚང་མ་སྤྲོ་ཚོགས་ལ་ཞུགས་དགོས་ཞེས་བརྡ་བཏང་།
       ང་ཚོས་གཞུང་གི་ཟ་ཁང་ནས་ཟ་མ་ཟོས་རྗེས་སྤྲོ་ཚོགས་བསྡུ་སར་སོང་བ་ན་སློབ་གྲྭའི་ཚོགས་རའི་ནང་དུ་སྒྲ་སྒམ་ལས་གཞས་གྲག་གིན་འདུག་ཅིང་གྲལ་བསྟར་བའི་ཅོག་ཙེ་རེ་རེའི་སྟེང་དུ་སིལ་ཏོག་དང་ཉི་འབྲུ། ཀ་ར་ཐང་ཆུ་དང་ཝུ་ཆང་། སིལ་ཁུ་སོགས་སྣ་ཚོགས་བཤམས་འདུག་པས་དངོས་གནས་སྤྲོ་ཚོགས་ཀྱི་ཉམས་འདུག
       སྤྲོ་ཚོགས་མགོ་བརྩམས་པ་དང་དངོས་སྦྱོང་སློབ་མ་འགའ་རེས་གཞས་བཏང་ཞིང་འགའ་རེས་ཞབས་བྲོ་འཁྲབ། ང་ཚོའི་འཛིན་གྲྭའི་དངོས་ལུགས་དགེ་རྒན་ཁོས་ཀྱང་ང་ལྟར་ན་ཁོའི་བོད་སྐད་ཡིན་ལ་མ་ཡིན་པ་དེས་གཞས་ཧ་ལས་པ་སྙན་མོ་སྙན་མོ་ཞིག་བཏང་ཞིང་། ཁོའི་གཞས་དང་ཁོའི་འཛུམ་ནི་ཧ་ཅང་ཆ་འགྲིག་པ་ཞིག་འདུག
       ཅུང་ཙམ་ལ་ལྟད་མོར་གཡེངས་རྗེས་ང་རང་ཡུལ་ལ་འགྲོ་རྩིས་ཀྱིས་ཚོགས་རའི་སྒོར་བུད་པ་ན་དངོས་སྦྱོང་དགེ་རྒན་ཁོ་རང་ངའི་རྗེས་བསྙེགས་ཏེ་ཡོང་ནས་རྒན་ལགས་ཅུང་ཙམ་ལ་སྡོད་རོགས། སང་ཉིན་ང་ཚོ་འགྲོ་དགོས་པས་ད་རུང་ཅུང་ཙམ་སྡོད་རོགས། འཛུམ་དང་བཅས་འུ་ཚོ་མཉམ་དུ་སྐོར་བྲོ་རྩེད་ཟེར།
       སྐབས་དེར་སྐོར་བྲོའི་མིང་གོ་ཙམ་ལས་རེབ་གོང་ཕྱོགས་ལ་དར་མེད་པ་དང་། དེ་དུས་ཀྱི་ང་ཡང་ལོ་གཞོན་པས་སྡོད་འདོད་ཤིན་ཏུ་ཆེ་ནའང་། བུ་ཆུང་ཁྱིམ་དུ་བསྐྱུར་ཡོད་པ་དང་ང་རང་གཞན་གྱི་མི་ཡིན་པས་ང་ནི་འཛུམ་ཙམ་ལས་ཅི་ཡང་མ་བཤད་པར་ཤར་སེ་ཡུལ་ལ་ལོག་པ་ཡིན།
       ཕྱི་ཉིན་ནངས་མོ་ང་རང་ལས་ཚོགས་ལ་ཡོང་བ་ན་ང་ཚོའི་དགེ་གྲོགས་རྒན་པ(ལོ་ཉི་ཤུའི་ལྷག་གི་ཡར་སྔོན་སྐུ་གཤེགས།)ཞིག་ཡོད་པ་དེས་གཞུང་སྒྲུབ་ཁང་གི་སྒོ་ཁ་ན་ང་རང་འབོད་ཀྱིན་འདུག ང་རང་ཁོང་གི་གམ་དུ་སོང་བ་ན་ཁོས་ང་ལ་ཁྱོད་ཚོའི་འཛིན་གྲྭའི་དངོས་ལུགས་དངོས་སྦྱོང་བ་དེས་དངོས་པོ་འདི་ངེས་པར་ཁྱོད་ལ་སྤྲོད་ཟེར་ཞེས་ཚགས་པར་གྱིས་ཐུམ་སྒྲིལ་བྱས་པ་ཞིག་སྤྲད་སོང་།
       ཚགས་པར་སྦྱོར་ཆུས་སྦྱར་ཡོད་པའི་ཐུམ་སྒྲིལ་དེ་བཤིག་ནས་བལྟས་པ་ན་དེ་ནི་ཤོག་གྲངས་སོ་དྲུག་ཅན་གྱི་འཕྲིན་ཡིག་རིང་བོ་བྲིས་པའི་དེབ་ཅིག་རེད། ངས་འཕྲིན་ཡིག་དེའི་མགོ་ནས་ཅུང་ཙམ་བལྟས་རྗེས་སྒེའུ་ཁུང་ལས་དངོས་སྦྱོང་བ་ཚོའི་སྡོད་ཁང་ཕྱོགས་སུ་བལྟས་པ་ན་སྒོ་སྒེའུ་ཐམས་ཅད་ཕྱེས་ཏེ་ཡོད་ཅིང་སྒོའི་ཕྱི་ནང་གང་དུའང་མི་གཅིག་ཀྱང་མཐོང་རྒྱུ་མི་འདུག
       ཆར་ཟིམ་ཁྲོད་ཀྱི་སློབ་གྲྭའི་ར་སྐོར་དུ་རླངས་འཁོར་གྱི་འཁོར་ལོའི་རྗེས་ཤུལ་གཅིག་གིས་གཅིག་མནན་པ་ཞིག་གིས་གཡས་སྐོར་ཕྱེད་ཙམ་བརྒྱབ་སྟེ་སྒོ་ཆེན་ཕྱོགས་སུ་འཐེན་འདུག་པ་དེ་ལས་ཅི་ཡང་མཐོང་རྒྱུ་མ་བྱུང་།
       ང་ཕྱིར་རང་གི་འདུག་སྟེགས་སུ་བསྡད་དེ་འཕྲིན་ཡིག་མུ་མཐུད་བཀླགས་པ་ན་ཆར་བ་ངའི་སེམས་སུ་བབས། ཆར་བ་ངའི་མིག་ནས་བབས། ཚ་བ་རོང་གི་ཁྱོད་ཨང་། ཚ་བ་རོང་གི་ཁྱོད། འཕྲིན་ཡིག་དེས་ངས་ཉིན་དེར་སློབ་ཁྲིད་བྱ་མི་ཐུབ་ཅིང་། འཕྲིན་ཡིག་དེས་ང་རང་ཉིན་གང་བོར་ཉལ་དུ་བཅུག
       འཕྲིན་ཡིག་དེ་བཀླགས་པས་ད་གཟོད་དངོས་སྦྱོང་བ་ཁོ་རང་རྒྱལ་མོ་ཚ་བ་རོང་གི་ཡིན་པ་ཤེས་ཤིང་། རྒྱ་སྐད་ཀྱི་ལམ་ནས་མ་གཏོགས་ངེད་གཉིས་ཕན་ཚུན་བརྡ་མ་འཕྲོད་པར་ཡང་ཁག་མེད་པ་ཤེས།
       འཕྲིན་ཡིག་དེ་དུས་ཡུན་ངེས་ཅན་ཞིག་ལ་ཉར་ཚགས་བྱས། ཡིན་ནའང་འཕྲིན་ཡིག་དེ་བཀླགས་ཐེངས་རེ་རེར་ངའི་རང་སེམས་ལ་གཡོ་འགུལ་ཐེབས་ཀྱིན་ཡོད་པ་ངས་ཤེས་ཐུབ་པས་མི་འདོད་བཞིན་དུ་མེར་བསྲེགས།
       གལ་ཏེ་འཕྲིན་ཡིག་དེ་ད་ལྟའི་བར་དུ་ཉར་ཚགས་བྱས་ཡོད་ན་རྩོམ་འདི་ཅུང་བཀླག་རིན་ཡོད་པ་ཞིག་ཏུ་འགྱུར་སྲིད་མོད་ངས་ཀྱང་རང་ཚོད་ཀྱིས་གཏིང་རིང་བོ་ཞིག་ལ་བསམ་བློ་གཏང་ཁུལ་བགྱིས་ཏེ་འཕྲིན་ཡིག་མེད་བརླགས་བཏང་བར་དགོངས་དག་ཞུ། ང་ཡི་ཀློག་པ་པོ་ལགས།
       ཉིན་དེ་ནས་བཟུང་ངས་ཉིན་བཞིན་ཁོ་ཚོ་སྡོད་སའི་ཁང་བ་དེའི་ཕྱོགས་སུ་རེ་རེ་བལྟ་དགོས་ཤིང་། ཁོས་ལན་དུ་མར་ང་ལ་བསྒུགས་སའི་སློབ་ཁང་དེའི་སྒོ་ཁར་སོང་ན་ཁོ་རང་འཛུམ་བཞིན་ངའི་མདུན་དུ་ལངས་ཡོད་པ་དང་ཡང་འདྲ།
       ཉིན་ཤས་རྗེས་ལ་སློབ་གྲྭའི་སྒོ་ཆེན་ཁ་ནས་དམའ་འབྲིང་སྐབས་ངའི་སློབ་གྲོགས་ཡིན་པ་དང་སློབ་ཆེན་སྐབས་ཁོའི་སློབ་གྲོགས་ཡིན་པའི་པད་རྡོར་ལ་འཕྲད་ཅིང་། ཁོས་དོན་དག་ཙག་ཙིག་གི་དབང་གིས་ཉིན་དེར་སློབ་གྲོགས་ཚོ་དང་མཉམ་དུ་ཟི་ལིང་ལ་འགྲོ་མ་ཐུབ་པས་དེ་རིང་འགྲོ་བཞིན་ཡོད་སོགས་ཁ་བརྡ་སྟབས་བདེ་ཞིག་བྱས་པ་ཡིན།
       སྤྱིར་ན་ངས་སློབ་གྲོགས་པད་རྡོར་བརྒྱུད་དེ་ཁོ་ལ་ཡིག་ལན་ཞིག་བསྐུར་ན་ཆོག་མོད། ང་ནི་གཞན་གྱི་མི་ཡིན། བུ་ཆུང་ཞིག་གི་མ་ཡིན།
       ང་ལ་ཟི་ལིང་ནས་བསྐུར་པའི་ཡི་གེ་ཞིག་འབྱོར་བྱུང་། ཡིག་སྐོགས་སྟེང་གི་ཡིག་གཟུགས་ལས་ཁོས་བསྐུར་པ་ཤེས་ཐུབ། ཡི་གེ་དེར་ཁོ་རང་སློབ་གྲྭར་འབྱོར་རྗེས་ཀྱི་གནས་ཚུལ་རགས་ཙམ་དང་ད་ནི་སློབ་མཐར་ཕྱིན་པས་སང་ཉིན་ཕ་ཡུལ་ལ་ལོག་འགྲོ། གཤམ་གསལ་ནི་ངའི་ཕ་ཡུལ་གྱི་ས་གནས་ཀྱི་ཁ་བྱང་ཡིན། ང་ལ་ཡི་གེ་ཞིག་ཅིས་ཀྱང་ཡོད་རོགས་ཟེར་བ་ལས་ཁོ་རང་འགྲོ་ཁར་བཞག་པའི་འཕྲིན་ཡིག་རིང་བོ་དེའི་སྐོར་ཅི་ཡང་གླེང་མི་འདུག ཐ་ན་ཡི་གེ་དེ་ཨེ་འབྱོར་ཙམ་ཡང་དྲིས་མི་འདུག
       ཁོར་ཡིག་ལན་ཞིག་བྲི་བསམས་ཏེ་འཕྲིན་ཡིག་རིང་བོ་དེར་ལན་ཅི་བསློག་ལ་བསམ་བློ་ཡང་ཡང་བཏང་མོད། མཇུག་མཐར་ངས་ཁོ་ལ་ཡི་གེ་གཅིག་ཀྱང་མ་བྲིས། ང་ནི་གཞན་གྱི་མི་ཡིན། བུ་ཆུང་ཞིག་གི་མ་ཡིན།
       དེ་ནས་བདུན་ཕྲག་གཅིག་གི་རྗེས་སུ་འབར་ཁམས་ནས་ཡི་གེ་ཞིག་འབྱོར་ཅིང་ཚ་བ་རོང་བའི་འཕྲིན་ཡིག་ཡིན་པ་ངས་ཀྱང་ཤེས། ཡི་གེའི་ནང་དུ་ཁོ་རང་ཁྲི་ཚང་དུ་ཡོད་པའི་རྔ་བ་མི་རིགས་དགེ་ཐོན་སློབ་གྲྭ་རུ་ལས་བགོས་བྱས་ཡོད་ཚུལ། ཉིན་ཤས་རྗེས་སུ་ལས་རྐང་དུ་ཞུགས་དགོས་ཚུལ་དང་བཅས་ས་གནས་དེའི་ཁ་བྱང་སྦྲགས་ཨང་དང་བཅས་པ་གསལ་བོར་བྲིས་འདུག
       ཉིན་གཉིས་ཙམ་གྱི་རྗེས་སུ་ངས་ཀྱང་ཁོའི་འཕྲིན་ཡིག་རིང་བོ་དེའི་ནང་དོན་དང་འབྲེལ་བ་ཅི་ཡང་མེད་ཅིང་། དེའི་སྐོར་གྱི་ཚིག་གཅིག་ཀྱང་གླེང་མེད་པའི་འཕྲིན་ཡིག་སྟབས་བདེ་ཞིག་བྲིས་ཏེ་བསྐུར་པ་ཡིན། འཕྲིན་ཡིག་ཏུ་ཁྱོད་ཀྱིས་ད་ནས་བཟུང་ཡི་གེ་བོད་ཡིག་སྤྱད་དེ་ཕྲིས་ཤོག ཁྱོད་ཀྱིས་བརྗོད་འདོད་པ་གང་ཞིག་བོད་ཡིག་གི་ལམ་ནས་ང་ལ་བརྡ་ཇི་བཞིན་འཕྲོད་དཀའ་ནའང་འཛེམ་དོགས་མ་གནང་། ཁྱོད་རང་བོད་རེད། བོད་དག་མ་རེད། ང་ཚོས་སྐད་རིགས་གཞན་ཞིག་སྤྱད་དེ་ཕན་ཚུན་འཕྲིན་ཡིག་འབྲི་བ་དང་ཁ་བརྡ་བྱེད་པ་ནི་ང་ཚོའི་མཚང་རེད། ཁྱོད་ལ་བོད་ཡིག་སློབ་པའི་བགོ་སྐལ་མ་བྱུང་བར་ཁག་མི་འདུག་ཀྱང་ཕྱིན་ཆད་ཅི་ཐུབ་ཀྱིས་བོད་ཡིག་བཀོལ་རོགས་ཞེས་ཡིག་ལན་བཏང་།
       ཕན་ཚུན་འཕྲིན་ཡིག་བསྐུར་ཏེ་ལོ་ཤས་སོང་བའི་ཉིན་ཞིག་ཁོས་ཡིག་སྐོགས་སུ་ཚུགས་རིང་དང་འཁྱུག་བྲིས་སོགས་ཀྱི་ཡིག་གཟུགས་ཡགས་པོ་བལྟས་ན་ཧ་ལས་པ་སྐོར་ཞིག་བཅུག་འདུག་ཅིང་། ཡིག་གཟུགས་དེ་དག་ལ་གསལ་བཤད་ཀྱི་ཚུལ་དུ་འདི་དག་ནི་ང་ཚོའི་སློབ་གྲྭའི་བོད་ཡིག་དགེ་རྒན་རྒན་པ་ཨ་ཁུ་ཤེས་རབ་རྒྱ་མཚོ་ལགས་ཀྱི་ཕྱག་བྲིས་རེད། ཁོང་ནི་ང་ཚོའི་སློབ་གྲྭ་ཙམ་མ་ཟད་སྤྱིར་རྒྱལ་རོང་ཕྱོགས་སུ་སྙན་གྲགས་འབར་བའི་མཁས་པ་ཆེན་པོ་ཡིན། ངས་ཁོང་གི་གམ་ན་བོད་ཡིག་དང་བོད་ཡིག་ཡིག་གཟུགས་སྦྱོང་གིན་ཡོད། རྒན་ཁོང་ལགས་ཀྱིས་ཁྱོད་རང་ལས་གནས་སྤར་ཏེ་ང་ཚོའི་སློབ་གྲྭ་འདིར་ཕེབས་ཤོག་གསུང་གིན་འདུག་ཅེས་བྲིས་འདུག ངས་ཕྱིར་ཡིག་ལན་དུ་དོན་དམ་ང་རང་རྒན་ཁོང་གིས་བོས་སམ་ཁྱོད་ཀྱིས་བོས་པ་ཡིན་ཞེས་ཀུ་རེ་དང་དོན་གཏམ་འདྲེས་མ་ཞིག་བསྐུར་པའི་ལན་དུ། འབོད་མཁན་སུ་ཡིན་དྲང་མོར་བཤད་ན་ཁྱོད་རང་ཡོང་ཨེ་ཐུབ་ཅེས་ཀུ་རེ་དང་དོན་གཏམ་འདྲེས་མའི་ལན་ཞིག་བཏབ་འདུག
       ཁྱོད་དང་འུ་གཉིས་ལ་ཅི་ཁག ང་ནི་གཞན་གྱི་མི་ཡིན། བུ་ཆུང་ཞིག་གི་མ་ཡིན།
       ཕན་ཚུན་ཡི་གེ་བསྐུར་རེས་བྱས་ཏེ་ལོ་ངོ་དྲུག་ལྷག་འགོར་རྗེས་ང་རང་ལས་གནས་རབས་དང་རིམ་པར་བརྗེས། རྗེས་སུ་ཤེས་རྟོགས་བྱུང་དུས་ཁོ་ཡང་ཁྲི་ཚང་ནས་འབར་ཁམས་སུ་ལས་གནས་སྤར་འདུག དེ་བས་ངེད་གཉིས་བར་གྱི་འཕྲིན་ཡིག་གི་འགྲོ་འོང་ཙམ་པོ་ཡང་རྒྱུན་ཆད་པར་གྱུར།
       སྤྱི་ལོ༢༠༡༤ལོར་ངའི་མགོར་མི་འདོད་པ་ཡོང་བས་དགོས་དབང་གིས་ས་དེར་འབྲེལ་བ་བྱ་དགོས་བྱུང་ནའང་ངས་དངོས་སུ་ཁྱོད་ལ་འབྲེལ་གཏུག་མ་བྱས། ངས་ངའི་ཇོ་ཇོར་ཁྱོད་ཀྱི་ཁ་པར་ཨང་གྲངས་སྤྲད་པས་ཇོ་ཇོས་བཤད་ན་ཁྱོད་ཀྱིས་རོགས་རམ་ཆེན་པོ་བྱས་སོང་ཟེར། ཐུགས་རྗེ་ཆེ། ངའི་སེམས་ཀྱིས་ཟིན་ཡོད།
       དེའི་མུར་ཁྱོད་ཀྱིས་ང་ལ་ཁ་པར་མང་བོ་བཏང་ཡང་ངས་གཅིག་ཀྱང་ལེན་མ་ཕོད། ཁྱོད་ཀྱང་འཁོར་བ་ཞིག་གི་བདག་པོ་རེད། བུ་མོ་ཞིག་གི་ཕ་རྒན་རེད།
       མི་ལོ་ལྔའི་ཡར་སྔོན་ང་དང་གྲོགས་མོ་འགའ་དར་རྩེ་མདོ་དང་དཀར་མཛེས་སོགས་བརྒྱུད་དེ་འབར་ཁམས་སུ་འབྱོར་བའི་ཕྱི་དྲོ་དེར། ལམ་གྱི་གཡོན་ཟུར་ཞིག་ན། རྡོ་བ་ཆེན་པོ་ཞིག་གི་སྟེང་དུ་འབར་ཁམས་གྲོང་བརྡལ་པེ་ཅིན་གྲོང་ཚོ་ཞེས་ལྕགས་རྩི་དམར་བོས་བྲིས་ཡོད་པའི་ཡི་གེ་དེ་དག་མཐོང་བའི་མོད་ལ་དྲན་པ་རབ་རིབ་ཅིག་གིས་ང་རང་མི་ལོ་ཉེར་ལྔ་ལྷག་གི་ཡར་སྔོན་ལ་ཁྲིད། ངས་གྲོགས་མོ་ཚོར་འུ་ཚོས་འདི་ནས་ས་བལྟ་ཡུལ་བལྟ་རེ་བྱ་ཟེར་ནས་རླངས་འཁོར་ལས་བབས་ཏེ་སྡེ་བའི་ཕྱོགས་སུ་བསྐྱོད།
       ངས་ཁྱོད་ཀྱི་བྱིས་དུས་ཀྱི་རྩེད་ར་ཨེ་རྙེད་དམ་སྙམ། ངས་ཁྱོད་ཀྱི་ཕ་མ་ཟུང་བདེ་འཚམས་ཨེ་ཡིན་ནམ་དྲན།
       ངས་ཁྱོད་ལ་ཁ་པར་གཏང་འདོད་ཀྱིས་ཨང་གྲངས་མནན་པ་དང་གློ་བུར་གནོན་མཚམས་བཞག
       ཞག་དེར་ང་རང་ཁྱོད་དང་སྲང་ལམ་གཅིག་གི་མགོ་རྔ་ན་ཡོད། ཁུག་མ་ལས་ཁ་པར་ཡང་ཡང་བླངས་ཏེ་ཡང་ཡང་ཕྱིར་བཅུག ཁྱོད་རང་འཁོར་བ་ཞིག་གི་བདག་པོ་ཡིན། བུ་མོ་ཞིག་གི་ཕ་རྒན་ཡིན། ཕྱི་ཉིན་མཆོག་རྩེའི་གཞིས་ཀ་དང་བཻ་རོའི་སྒྲུབ་ཕུགས་སོགས་ལ་མཇལ་རྗེས་ཕྱིར་ལམ་བསྙེགས།
       རླངས་འཁོར་མདུན་ནས་མདུན་དུ་བརྒྱུགས་ཀྱང་སེམས་པས་ཕྱི་ནས་ཕྱི་ལ་འཐེན་གྱིན་མི་ཚེའི་དབྱར་གཞུང་གི་ཆེས་མཛེས་སྡུག་གི་ཆ་ཤས་དེ་ཚ་བ་རོང་ན་བསྐྱུར་ཡོད།
       ཁྱོད་ཀྱིས་འཕྲིན་ཡིག་རིང་བོ་ཞིག་ལས་ཀྱི་ཉིན་སྲིབ་ལ་བྲིས་ཏེ་ཏག་ཏག་མི་ལོ་སོ་གཉིས་འཁོར། ཁྱོད་རང་འཇིག་རྟེན་དཀར་ངོགས་འདི་ན་བདེ་འཚམས་ཡིན་པར་སྨོན། ཚ་བ་རོང་གི་མི་ལགས།