ལྷུག་རྩོམ་ཚན་པ་གཉིས།

       སྨིག་རྒྱུའི་གླིང་གི་གྲོང་ཁྱེར་འདི་ཉིད་ལྷིང་ཞིང་འཇགས། ལྷིང་འཇགས་སུ་གྱུར་པ་ཁོ་ནས། ད་ནི་གཙང་ཆུའི་ཀློང་དུ་རྡེའུ་ཞིག་འཕངས་ཀྱང་། གྲགས་འགུལ་ཅི་ཡང་མེད་པའི་ཚོད་རེད། ཡང་ན་ཅི་ཡང་མི་ཚོར་ཁུལ་བྱས་པ་ཡིན་ནམ། སྨིག་རྒྱུའི་གླིང་དུ། སྦལ་ལྕོང་རྣམས་ཀྱིས་སྒྲུང་བཤད། མགྲིན་བཟང་རྣམས་ཀྱིས་གླུ་ལེན་ཞིང་། གར་གྱི་སྟངས་སྟབས་འགྱེད། སྒྱུ་འཕྲུལ་གྱིས་ཞུགས་པའི་གྲོང་ཁྱེར་འདི་ཉིད། རྡོ་ལེབ་ཚ་མོའི་སྟེང་གི་གྲོག་མ་འདུར་བ་ཇི་བཞིན། མི་ཚོགས་ཀྱི་འདུ་འཛིའི་ཚན་ཁར་རྒྱུན་ཆད་དུ་མེད། མི་རྣམས་གྲོག་ཚང་ལྟ་བུའི་རང་ཤག་ཏུ་འཛུལ་དུས། ལམ་འགྲམ་གྱི་འབུ་སྲིན་དག་ཀོག་མ་ནུར་གྱིས་འགྲོ་བཞིན། ཁང་སྐམ་དུ་བཅུག་པའི་མི་རྣམས་ལ་འཕྱ་དགོད་བྱེད། ད་ནི་སུ་ཞིག་གིས་ཁྱེད་ཀྱི་ངོ་གདོང་མངོན་སུམ་དུ་མཐོང་ངམ།
       ཨ་ལན་མེད་པ་ནི་རི་བོ་ཁོ་ན་མ་རེད། ད་དུང་བཞུར་བཞིན་པའི་གཙང་པོ། དགུང་སྔོན་དབྱིངས་སུ་རྒྱུ་བའི་མིང་མེད་སྐར་ཕྲན་གྱི་ཚོགས། ཁྱེད་ལ་ཁག་མི་འདུག་པ་ཤེས་ཡོད། ཁྱེད་ཀྱིས་ཡོད་ཚད་རྟོགས་པ་ཡང་ཤེས་ཡོད། སྨིག་རྒྱུའི་གླིང་ཡ། སྨིག་རྒྱུའི་གླིང་། བདེ་སྐྱིད་དང་སྡུག་བསྔལ་མཐའ་དག་ལ་ཡང་ཡང་གསན་ཚེ། རང་ཉིད་ཀྱི་སྒྲ་དབྱངས་ནང་སེམས་ཀྱི་ཆགས་སྡང་གཙང་མ་ཁོ་ནས་དཀྲོལ་ཐུབ་པ་ཚོར་ངེས།
       ཆར་བ་ཟམ་ཟིམ་རེ་བབས་པས་ཀྱང་། སྨིག་རྒྱུའི་གླིང་ལ་འགྱུར་ལྡོག་ཅི་ཡང་མ་བྱུང་། རྡོ་ཁང་གྲུ་བཞི་མ་དག་སྔར་བཞིན་ཇེ་སྐམ་དུ་འགྲོ་བཞིན་ཡོད་པ་འདྲ། ཆར་ཞོད་རེའི་རྗེས་སུ་མི་རྣམས་ལ་རློན་ཤིག་ཤིག་གི་སྣང་བ་ཞིག་སྟེར་ནའང་། གནམ་ངོ་འཁྱུག་ཙམ་འཁྱུག་ཙམ་གྱིས། ཆར་བ་དེ་ཡང་བག་མ་ཞིག་ངུ་ཁུལ་བྱེད་པ་ལྟར། ཆུ་ཐིགས་འགའ་ལས་འབབ་རྒྱུ་མེད་པར། མི་རྣམས་ཀྱི་སྐོམ་གདུང་སོད་པའི་བདེ་བ་སྐད་ཅིག་ཉིད་དུ་ཡལ་བར་བྱས། ཆར་བ་ཁོ་ནར་སྒུག་པས་སྐོམ་གདུང་སོད་ཐུབ་པ་ཡིན་ནམ། ཚ་ཐག་ཆོད་པའི་རྡོ་གཅལ་དང་ཨར་འདམ་ངོས་སུ་ཉི་མའི་ཙད་ཀྱིས་གདུས་པར་བལྟས་ན། མི་རྣམས་ལ་སྐོམ་གདུང་གི་རེ་བ་ལྷག་ཏུ་ཆེ་བ་ཤེས་ཐུབ།
       ད་ལྟ་མི་རྣམས་ཁང་སྐམ་དག་ཏུ་སྙན་ཚིག་ཤི་རོ་རེ་འབྲི་བར་ལོབས། གཉིད་རྨུགས་པར་བྱེད་པའི་སྒྲ་གཟུགས་དག་མཐོང་ཐོས་སུ་གྱུར་དུས། བརྙན་དུམ་དང་གསར་འཕྲིན་གང་ཞིག་ནས་མཐོང་མྱོང་བ་ལྟར་སྔར་བཞིན་ཉོབ་པར་འགྱུར། དེ་ལས་མི་མེད་གླིང་ཕྲན་ནམ། འབྲོག་དགོན་པའམ། ས་སྟོང་ལུང་སྟོང་དག་ཏུ་ཕྱིན་ནས། གང་འདོད་དུ་འཁྱམ་ཞིང་ཉུལ་ན་ཅི་མ་རུང་། ཡིན་ནའང་། ད་ལྟ་དེ་ཙམ་གྱི་སྐལ་བའང་ག་ལ་ཡོད། མི་ཚང་མས་སྲོག་ཆགས་ལྟར་དགུན་སྐྱེལ་གྱིན་ཡོད་པ་མིན་ནམ།
       མིག་ཟུང་ཁྲི་ཕྲག་ལྕགས་དྲའི་མལ་ཁྲིར་འཚངས། མི་རྣམས་སྦྲུལ་ཤུན་དུ་འཛུལ། རྐང་ལག་མེད་པའི་ཉ་རྣམས་མི་རུ་སྤྲུལ། ཁྱི་དང་སྤྱང་ཀིས་ལྷ་དང་ལྷ་མོའི་ཟློས་གར་རོལ། མིག་ཟུང་འཕྲུལ་བའི་སྒྱུ་མའི་རོལ་རྩེད་ཕྱོགས་མཚམས་མེད་པར་འཕྱུར། ད་དུང་གཏམ་རྒྱུད་གསར་པ་གང་ཞིག་མངོན་གྱིན་ཡོད་དམ། སེམས་ཁུར་གང་ཞིག་གིས་གཏན་དུ་མི་གཏོང་བ་དེ། ཁུ་སིམ་སིམ་གྱི་སྨིག་རྒྱུའི་གླིང་། གཏམ་རྒྱུད་ཀྱི་འགྱིག་རྡེའུ་ཞིག་གསར་དུ་འཇོག་བཞིན་ཡོད་དམ། ཡང་ན་སྔར་ནས་བཞག་ཚར་པ་རེད།
       འཁང་ར་དང་སྨྲེང་སྐྱོས་ཅི་བྱེད། ད་ནི་ཡོད་ཚད་ལ་བསམ་བློ་གཏོང་རན། མངོན་སུམ་གྱི་གཟུགས་སྒྲ་དྲི་རོ་མཐའ་དག་ཚད་མར་སྒོམ་རན། ཧོན་འཐོར་བའི་ནང་སེམས་ཀྱི་སེང་རས་དེ་ཉིད་བཤུས་ནས། རང་བྱུང་ཁམས་ཀྱི་རོལ་དབྱངས་ལ་ཡང་ཡང་ཉན་པའམ། བྲེལ་འཚུབ་དབེན་པའི་ངལ་གསོ་ཞིག་གནང་རོགས། སྨིག་རྒྱུའི་གླིང་ཡ། སྨིག་རྒྱུའི་གླིང་། སྨུག་རྡུལ་གྱི་ཡོལ་བ་ངང་གིས་ཕྱེ་ནས། མཐིང་མདོག་གི་དགུང་སྔོན་གྱིས་དཀྱེལ་ཡངས་གནང་པར་སྨོན། །
       ཐག་རིང་ནས་མཆེད་པའི་རྩྭ་ཐང་གི་འོད་ཀྱི་གྲོང་ཁྱེར། ཁྱེད་ཀྱིས་བདག་གི་མུན་པ་སིལ་བར་གཤགས་ནས། རྨི་ལམ་མ་ཡིན་པའི་དག་ཞིང་ཞིག་ཡིད་དུ་བཀླུབས། རེ་སྒུག་ཁྲོད་ཀྱི་མི་ཚོགས་ཀྱི་རྦ་རླབས། སྦྲ་གུར་མང་པོའི་མཁའ་མཐར་མཆེད་པའི་བསང་དུད། སུ་ཞིག་གི་ལོག་ཕེབས་ལ་སྒུག་པ་བཞིན། ཉམ་ཆུང་བའི་མིག་ཟུང་ཁྲི་ཕྲག་ཕྱོགས་བཞི་མཚམས་བརྒྱད་ནས་འོང་།
       རྒྱ་གླིང་འབུད་པའི་སྐད་སྒྲར་མ་ཉན་པར་ག་ཚོད་འགོར་སོང་། ཡབ་ཆེན་སུ་ཞིག་གིས་བཞག་པའི་མཚེར་ཤུལ་དུ། དེ་རིང་། རི་ཆུ་ནགས་གསུམ་སླར་ཡང་འགུལ། རེད་ལགས། བདག་གི་ཨེ་ཤེ་ཡའི་རྨི་ལམ་གསོན་པོ། དེ་རིང་། གངས་ལྗོངས་ཀྱི་མཁའ་དབྱིངས་སུ་ཤུགས་ཀྱིས་འཕགས།
ཆུ་བོ་དག་སྐམ་ལ་ཉེ་དུས། མར་མེ་དག་གཟིམ་ལ་ཉེ་དུས། བདག་ལ་སྐོམ་གདུང་གི་དྲན་པ་གནང་བྱུང་། ཨེ་མ་ཧོ། ངུར་སྨྲིག་གི་ཚོགས་ཞིང་། རྟ་པ་ཁྲི་ཕྲག་གི་རྨིག་རྗེས་རྩྭ་ཐང་ལ་ཕབ་དུས། རྡུལ་འཚུབ་འཇགས་པའི་རྣམ་ཤེས་སླར་ཡང་དཀྲོགས།
       འདི་ནི་སྙིང་ཕུར་བྲག་ལ་བརྡབས་པའི་རོལ་དབྱངས་ཤིག འདི་ནི་འཇིགས་མེད་ཞི་བའི་རྡོ་རྗེ་བཀའ་ལུང་ཞིག སུ་ཞིག་གི་རེ་སྒུག་ཏུ་འཕྱུར་བའི་སྤྲིན་སྔོན། སླར་ཡང་གངས་ལྗོངས་རྩྭ་ཐང་དུ་ལྡང་། རེད་ལགས། འདི་ནི་བཀྲ་ཤིས་པའི་རེ་སྒུག་གི་མེ་ཏོག་སྟེ། རྐང་དྲུག་དང་བྱ་བྱེའུ་ཡི་ཚོགས་ཀྱིས། ཁྱེད་ལ་དགའ་བའི་འབོད་གླུ་སྒྲོག་པའང་། མ་འོངས་པའི་ཕེབས་བསུ་དང་སྟ་གོན་གྱི་ལེགས་སྐྱེས་མིན་ནམ། །