༄༅།།མཚོ་ལྷོ་ཁུལ་འབའ་རྫོང་གི་རྫོང་རུའི་རིག་གནས་སྐོར་ངོ་སྤྲོད་རགས་བསྡུས།

རྫོང་རུའི་རིག་གནས་གནའ་ཤུལ་ནི་ཐོ་རུ་ཐང་དབུས་མའི་གནའ་ཤུལ་དང་། ནགས་རའི་གདོད་མའི་རིག་གནས་གནའ་ཤུལ། ཐོ་རུ་ཐང་ཤར་མའི་གནའ་ཤུལ། ཐོ་རུ་ཐང་ནུས་མའི་གནའ་ཤུལ་བཅས་གནའ་ཤུལ་བཞི་ལས་གྲུབ་ཡོད།
ཐོ་རུ་ཐང་དབུས་མའི་གནའ་ཤུལ་ནི་རྡོ་ཆས་གསར་མའི་དུས་སྐབས་ཀྱི་རྫོང་རུའི་རིག་གནས་ཀྱི་གནའ་ཤུལ་ཡིན་ཞིང་། གནའ་ཤུལ་གྱི་ནུབ་ཏུ་རྡོ་དཀར་ལུང་བ་དང་རྫོང་རུའི་ཐང་དང་ལུང་བས་བཅད་ནས་ཡོད་པ་དང་། ཤར་དུ་བྱང་ནས་ལྷོ་རུ་བཏིངས་པའི་སྲ་འགྱུར་ལམ་ཡོད། ལྷོ་རུ་སྨི200མཚམས་ན་རྨ་ཆུ་དང་བྲག་དཀར་འབྲས་ཐང་དང་ཆོད་ཡོད་ལ། ཤར་དུ་ཐོ་རུ་ཐང་ཤར་མའི་གནའ་ཤུལ་དང་ཕལ་ཆེར་འབྲེལ་ཡོད། ཤར་དང་བྱང་ནི་མཐུན་སྒྲིལ་སྡེ་བ་ཡིན། མཐུན་སྒྲིལ་སྡེ་བ་དང་འབྲེལ་ནས་ཡོད་པ་ནི་འབའ་བྲག་གཞུང་ལམ་དང་། གནའ་ཤུལ་གྱི་ལྷོ་ཕྱོགས་ནི་བྲག་རོང་ཡིན་ལ། བྱང་དུ་ནགས་རའི་གདོད་མའི་རིག་གནས་གནའ་ཤུལ་ལ་འབྲེལ་ཡོད། ཤར་ཕྱོགས་སུ་ས་གནས་སྡེ་མི་རྣམས་ཀྱིས་ལྷོ་ནུབ་ནས་ཤར་བྱང་དུ་རྡུང་བའི་གྱང་ར་ཡིས་ནགས་རའི་ར་བསྐོར་ཡོད་པ་དང་། གནའ་ཤུལ་གྱི་ཁག་མང་ཤོས་ནི་ནགས་རས་བཟུང་ཡོད། ཤར་ནུབ་ཀྱི་རིང་ཚད་ལ་ཧ་ལམ་སྨི240དང་ལྷོ་བྱང་གི་ཞེང་ལ་སྨི140། གཞི་ཁྱོན་ཕལ་ཆེར་སྨི་གྲུ་བཞི་མ33600ཡིན། ས་ངོས་སུ་རྒྱ་ཚྭའི་རྫ་ཆས་ཆག་རོ་མང་པོ་གཏོར་ཡོད་པ་དང་། གནའ་ཤུལ་གྱི་ཤར་ནས་བྱང་དུ་ཕྱོགས་པའི་མཐའ་འགྲམ་དུ་རིག་གནས་ཀྱི་ངོས་རིམ་ཕྱིར་མངོན་ལ། ས་ངོས་དང་བར་ཐག་ལི་སྨི30དང་མཐུག་ཚད་ལི་སྨི8ཡོད་པ་དང་། ས་མདོག་ནག་སྐྱ་ཡིན།
ནགས་རའི་གདོད་མའི་རིག་གནས་གནའ་ཤུལ་ནི་རྫོང་རུའི་རིག་གནས་གནའ་ཤུལ་ཞིག་ཡིན་ལ། འབའ་རྫོང་འབའ་ལུང་ཡུལ་ཚོའི་མཐུན་སྒྲིལ་སྡེ་བའི་ལྷོ་ནུབ་ཟུར་གྱི་ཐོ་རུ་ཐང་དབུས་མའི་གནའ་ཤུལ་གྱི་བྱང་ངོས་སུ་ཆགས་ཤིང་། ནུབ་ཏུ་རྡོ་དཀར་ལུང་བ་དང་འབྲེལ་ལ། ལྷོ་རུ་ཧ་ལམ་སྨི300ཡི་བར་དུ་རྨ་ཆུ་ཡོད་པ་དང་། བྱང་དུ་མཐུན་སྒྲིལ་སྡེ་བ་དང་འབའ་བྲག་གཞུང་ལམ་དང་། ཤར་ངོས་སུ་བྱང་ནས་ལྷོ་རུ་བཏིངས་པའི་སྲ་འགྱུར་གཞུང་ལམ་ཡོད། ཤར་དུ་ཐོ་རུ་ཐང་ཤར་མའི་གནའ་ཤུལ་དང་འབྲེལ་ཡོད། གནའ་ཤུལ་གྱི་ལྷོ་ཕྱོགས་ནི་བྲག་རོང་ཡིན་ལ། བྲག་རོང་འདེབས་སུ་རྣང་ཞིང་དང་རྣང་ཞིང་ཕ་རོལ་ནི་འབའ་ཆུ་ཡིན། གནའ་ཤུལ་གྱི་ཤར་ནུབ་རིང་ཚད་སྨི180དང་ལྷོ་བྱང་གི་ཞེང་ཚད་སྨི80ཡིན་ལ། སྒོར་ཕྱེད་ཀྱི་རྣམ་པ་མངོན། ད་སྔ་དེ་ནི་ནགས་ར་ཡིན་ལ། གནའ་ཤུལ་ལ་གཏོར་བརླག་ངེས་ཅན་ཐེབས་ཡོད། ས་ངོས་སུ་ཤུལ་དངོས་མེད་པ་དང་རིག་གནས་ངོས་རིམ་ཡང་ཕྱིར་མངོན་མེད།
ཐོ་རུ་ཐང་དར་མའི་གནའ་ཤུལ་ནི་རྫོང་རུའི་རིག་གནས་ཀྱི་གནའ་ཤུལ་ཞིག་ཡིན་ལ། ལྷོ་ཕྱོགས་ནི་བྲག་རོང་ཡིན་པ་དང་བྲག་རོང་འདེབས་སུ་སྨི100མཚམས་ན་རྨ་ཆུ་ཡོད། བྲག་དཀར་རྫོང་འབྲས་ཐང་ལ་རྨ་ཆུས་བཅད་ནས་ཡོད་ཅིང་། ཤར་ངོས་ནི་རྣང་ཞིང་དང་འབའ་མདོ་སྡེ་བ་གཉིས་ལུང་བས་བཅད་ནས་ཡོད་པ་དང་། བྱང་ངོས་ཕལ་སེར་རྣང་ཞིང་ཡིན་ལ། བྱང་ཕྱོགས་དང་ལྷོ་ནུབ་གཉིས་ནི་མཐུན་སྒྲིལ་སྡེ་བ་ཡིན། གནའ་ཤུལ་དུ་ཅུང་ལྷོ་ཕྱོགས་སུ་སྡོད་དམངས་ཁྱིམ་ཚང་ལ་འཐེན་པའི་བྱང་ནས་ལྷོར་ཕྱོགས་པའི་ལམ་ཆུང་ཞིག་གནའ་ཤུལ་ལ་བརྒྱུད་པ་ཡིན། ལྷོ་ནུབ་ཏུ་རྨ་ཆུར་བརྒྱུད་པའི་ལམ་ཆུང་ཞིག་ཡོད་པ་དང་། ཤར་ནུབ་ཀྱི་རིང་ཚད་སྨི150དང་ལྷོ་བྱང་གི་ཞེང་ཚད་སྨི180ཡིན་ལ། གཞི་ཁྱོན་ཧ་ལམ་སྨི་གྲུ་བཞི་མ་25663ཡིན། བྱང་མཐོ་ལ་ལྷོ་དམའ་བ་དང་། གནས་ཡངས་པོ་ཡོངས་སུ་རྣང་ཞིང་ཡིན་ལ། ས་ངོས་སུ་ཚོན་ལྡན་རྫ་ཆག་མང་པོ་ཐོར་ཡོད་པ་དང་རིག་གནས་ངོས་རིམ་ཅི་ཡང་ཕྱིར་ཕྱུང་མེད། 1986ལོར་ཞིང་ཆེན་རིམ་པའི་རིག་དངོས་སྲུང་སྐྱོབ་སྡེ་ཁག་ཏུ་ཚུད།
ཐོ་རུ་ཐང་ནུབ་མའི་གནའ་ཤུལ་ནི་རྫོང་རུའི་རིག་གནས་ཀྱི་གནའ་ཤུལ་ཞིག་ཡིན་ཞིང་། ཤར་ནི་རྡོ་དཀར་ལུང་བ་དང་ཐོ་རུ་ཐང་དབུས་གནས་ལ་ལུང་བས་བཅད་ནས་ཡོད་པ་དང་། ལྷོ་ནི་རྨ་ཆུ་ཡིན་ལ། རྨ་ཆུ་དང་བྲག་དཀར་རྫོང་ཆུ་སྔོན་གྲོང་རྡལ་ལ་བར་བཅད་ནས་ཡོད། བྱང་ངོས་ནི་ཁ་སྒང་སྡེ་བའི་རྣང་ཞིང་དང་ཤར་བྱང་ནི་མཐུན་སྒྲིལ་སྡེ་བ་ཡིན་པ་དང་། ས་བབས་ཧྲིལ་བོར་བྱང་མཐོ་ཞིང་ལྷོ་དམའ་ལ། ལྷོ་བྱང་གི་ཞེང་ཚད་ལ་སྨི60དང་། ཤར་ནུབ་ཀྱི་རིང་ཚད་ལ་སྨི80། གཞི་ཁྱོན་ཧ་ལམ་སྨི་གྲུ་བཞི་མ4800ཡིན་ལ། ས་ངོས་སུ་རྫ་ཆག་དང་ཚོན་ལྡན་རྫ་ཆག་མང་པོ་ཐོར་ཡོད་པ་དང་རིག་གནས་ཀྱི་ངོས་རིམ་ཅི་ཡང་ཕྱིར་ཕྱུང་མེད།