ཏིག་ཏ

   ཏིག་ཏས་མཁྲིས་པའི་ཚ་བ་མ་ལུས་སེལ།། ཞེས་པ་ལ། རོ་སྐོར་ལས། ཏིག་ཏ་བསིལ་ལ་རྩུབ་པས་མཁྲིས་པ་སེལ།།ཞེས་དང༌། བདུད་རྩི་ཐིགས་པར། ཏིག་ཏ་སྐམ་ལ་སྙོམས་པས་ཁྲག་མཁྲིས་སེལ།། ཞེས་དང༌། དཔག་བསམ་ལྗོན་པར། ཏིག་ཏས་ཚ་མཁྲིས་ཚ་བ་སེལ།།ཞེས་དང༌། རང་བྱུང་པས། རྒྱ་ཏིག་ཚད་པ་ཀུན་ལ་ཕན།། ཞེས་གསུངས། མིང་ནི། རྒྱ་གར་དུ་ཏིགྟ། བོད་དུ་ཁ་བ། རྒྱ་ནག་ཏུ།ཏེ་ཟ་ར། ཕྲོམ་གྱིས་ཀླ་ཀླ། མེ་ཉག་པས། ཀོ་སོ་ལོ། དོལ་པོས། ཇི་ར་ཟེར་རོ།། འཁྲུངས་དཔེར། ཏིགྟ་དག་ལ་རིགས་གསུམ་སྟེ།རྒྱ་ཏིག་བལ་ཏིག་བོད་ཏིག་གོ། རྒྱ་ཏིག་ལོ་མ་སྔོ་ནག་མཐུག། བལ་ཏིག་ལོ་མ་ཅུང་ཙམ་སེར།། ཞེས་གསུང་བཞིན་རིགས་གསུམ་མོ།།རྒྱ་ཏིག་ནི། རྒྱ་གར་ནས་འོང་བའི་ཤིང་ཕྲན་འདྲ་བའི་ཁོང་སྟོང་སྲབ་ལ་མཁྲེགས་པ་འོད་ཅན་ཚིགས་པའི་རྣམ་པ་ཡོད་པ་རོ་ཁའོ།།