མང་པོས་བཀུར་བའི་གདུང་རབས་ཀྱི་སྐབས།

        ༡.༥སྡེ་པ་བཅོ་བརྒྱད་དུ་གྱེས་པའི་སྐབས། སོ་སོ་ཐར་པའི་བསྟན་པ་ཡང་སྡེ་པ་རྣམ་པ་བཅོ་བརྒྱད་དུ་གྱེས་པ་ལས། རྣམ་པ་བཅོ་བརྒྱད་པོ་ཐམས་ཅད་ཀྱང་སངས་རྒྱས་ཀྱི་བསྟན་པ་ཉིད་ཡིན་པ་ནི། མ་ག་དྷཱ་བཟང་མོའི་རྟོགས་པ་བརྗོད་པ་ལས། སངས་རྒྱས་འོད་སྲུངས་ཀྱི་དུས་སུ་དེའི་སྦྱིན་བདག་རྒྱལ་པོ་ཀྲྀ་ཀྲི་ཞེས་བྱ་བ་བྱུང་བ། དེའི་རྨི་ལམ་དུ་གླང་པོ་ཆེའི་རྒྱལ་པོ་སྐར་ཁུང་ནས་བྱུང་བ་ལ། དེའི་མཇུག་མ་ཐོགས་པ་དང༌། སྐོམ་པའི་ཕྱི་ནས་ཁྲོན་པས་སྙེག་པ་དང༌། ཕྱེ་བྲེ་གང་དང་མུ་ཏི་བྲེ་གང་ཚོང་བྱེད་པ་དང༌། ཙན་དན་དང་ཤིང་ཕལ་པ་རིན་མཉམ་པར་བྱེད་པ་དང༌། ཀུན་དགའ་ར་བ་མེ་ཏོག་དང་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པས་ཕྲོགས་པ་དང༌། གླང་པོ་ཕྲུ་གུས་སྤོས་ཀྱི་གླང་པོ་འཇིགས་པར་བྱེད་པ་དང༌། སྤྲེའུ་མི་གཙང་བས་གོས་པས་གཞན་ལ་སྐུད་པ་དང༌། སྤྲེའུ་རྒྱལ་པོར་དབང་བསྐུར་བ་མཐོང་བ་དང༌། རས་ཡུག་གཅིག་མི་བཅོ་བརྒྱད་ཀྱིས་བགོས་པ་ལས་རེ་རེའི་ལག་ཏུ་ཡང་རས་ཡུག་ཚང་མ་རེ་བྱུང་བ་དང༌། སྐྱེ་བོའི་ཚོགས་ཆེན་པོ་འདུས་ནས་འཐབ་ཅིང་རྩོད་པ་མཐོང་བ་སྟེ། རྨི་ལམ་བཅུ་རྨིས་པས་བདག་ཉེས་སུ་དོགས་པས་འཇིགས་ཏེ། །བཅོམ་ལྡན་འདས་འོད་སྲུང་ལ་ཞུས་སོ། །བཅོམ་ལྡན་འདས་ཀྱིས་དེ་དག་རྒྱལ་པོ་ཁྱོད་ལ་ཉེས་དམིགས་སུ་འགྱུར་བ་མ་ཡིན་གྱི། མ་འོངས་པ་ན་ཚེ་ལོ་བརྒྱ་པའི་ཚེ། ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་བསྟན་པ་ལ་མ་སྦྱངས་པའི་དགེ་སློང་རྣམས་ཁྱིམ་ནས་བྱུང་ཡང་གཙུག་ལག་ཁང་དང་རྙེད་པ་ལ་ཆགས་པ་འབྱུང་བས། གླང་པོ་ལུས་ཐོན་ནས་མཇུག་མ་ཐོགས་པ་དེ་ནི། དེའི་ལྟས་སོ། །ཁྲོན་པས་སྐོམ་པའི་ཕྱིར་སྙེག་པ་ནི། གཙུག་ལག་ཁང་ན་གནས་པ་ལ་གཞན་གྱིས་ཆོས་བཤད་པ་ན་ཉན་པར་མི་བྱེད་པའི་ལྟས་སོ། ཕྱེ་དང་མུ་ཏིག་བརྗེ་བ་ནི། དེའི་ཚེ་ཉན་ཐོས་རྣམས་བཟའ་བའི་ཆེད་དུ་ཆོས་སྟོན་པ་འབྱུང་བས་དེའི་ལྟས་སོ། ཙན་དན་དང་ཤིང་གཞན་མཉམ་པར་མཐོང་བ་དེ་ནི། དེའི་ཚེ་ཉན་ཐོས་རྣམས་མུ་སྟེགས་ཀྱི་གཞུང་དང༌། སངས་རྒྱས་ཀྱི་བཀའ་མཉམ་པར་འཛིན་པ་འབྱུང་བས་དེའི་ལྟས་སོ། ཀུན་དགའ་ར་བའི་མེ་ཏོག་ལ་སོགས་པ་ཕུན་སུམ་ཚོགས་པ་ཆོམ་པོས་ཕྲོགས་པ་ནི། དེའི་ཚེ་ཉན་ཐོས་མ་བསྡམས་པ་རྣམས་དགེ་འདུན་གྱི་ལོངས་སྤྱོད་ཀྱིས་ཁྱིམ་པའི་ངོ་བསྲུང་བ་འབྱུང་བས་དེའི་ལྟས་སོ། །གླང་པོ་ཕྲུ་གུས་སྤོས་ཀྱི་གླང་པོ་འཇིགས་པར་བྱེད་པ་ནི། དགེ་སློང་སྡིག་པ་ཅན་གྱིས་ཚུལ་ཁྲིམས་དང་ལྡན་པའི་དགེ་སློང་ཟིལ་གྱིས་གནོན་པ་འབྱུང་བས་དེའི་ལྟས་སོ། །མི་གཙང་བས་གོས་པའི་སྤྲེའུས་གཞན་ལ་སྐུད་པ་ནི། ཚུལ་ཁྲིམས་ཉམས་པས་ཚུལ་ཁྲིམས་དང་ལྡན་པ་ལ་སྐུར་བ་འགྱུར་བས་དེའི་ལྟས་སོ། །སྤྲེའུ་རྒྱལ་པོར་དབང་བསྐུར་བ་ནི། དེའི་དུས་སུ་རྨོངས་པ་རྣམས་རྒྱལ་པོར་དབང་བསྐུར་བ་འབྱུང་བས་དེའི་ལྟས་སོ། །མི་བཅོ་བརྒྱད་ཀྱིས་རས་ཡུག་གཅིག་བགོས་པས་སོ་སོའི་ལག་ཏུ་མ་ཉམས་པར་བྱུང་བ་ནི། ཤཱཀྱ་ཐུབ་པའི་བསྟན་པ་སྡེ་པ་བཅོ་བརྒྱད་དུ་གྱེས་ཀྱང་ཐམས་ཅད་རྣམ་པར་གྲོལ་བའི་སྐལ་བ་ཅན་ཡིན་པས་དེའི་ལྟས་སོ། །སྐྱེ་བོའི་ཚོགས་འདུས་ནས་འཐབ་རྩོད་བྱེད་པ་ནི། ཤཱཀྱ་ཐུབ་པའི་བསྟན་པ་རྩོད་པའི་ཆོས་ཀྱིས་ནུབ་པར་འགྱུར་བས་དེའི་ལྟས་སོ། ཞེས་བྱ་བའི་དོན་འདི་འབྱུང་ངོ༌། །ཉེས་པ་དགུ་པོ་རྣམས་ནི་ཡུལ་སྣ་ཚོགས་པ་རྣམས་སུ་བྱུང་ནས་ཡུན་རིང་ཞིག་ཏུ་ལོན་ཏེ་སྡེ་པ་བཅོ་བརྒྱད་དུ་གྱེས་པ་ཡང༌། རྒྱལ་པོ་མྱ་ངན་མེད་ཀྱི་རིང་ལ་རྩོད་པའི་རྐྱེན་འགའ་ཞིག་གིས་གྱེས་ཏེ། འདི་ལྟར། དང་པོར་གནས་བརྟན་པ་དང་དགེ་འདུན་ཕལ་ཆེན་པ་གཉིས་སུ་གྱེས། ཕལ་ཆེན་པ་ཡང་རིམ་གྱིས་དགེ་འདུན་ཕལ་ཆེན་སྡེ་པ་དང༌། ཐ་སྙད་གཅིག་པ་དང༌། འཇིག་རྟེན་ལས་འདས་པར་སྨྲ་བ་པ་དང༌། མང་དུ་ཐོས་པ་བ་དང༌། བཏགས་པར་སྨྲ་བ་པ་དང༌། མཆོད་རྟེན་པ་དང༌། ཤར་གྱི་རི་བོ་པ་དང༌། ནུབ་ཀྱི་རི་བོ་པ་སྟེ་བརྒྱད་དོ། །གནས་བརྟན་པ་ཡང་རིམ་གྱིས་བྱེ་བ་ན། གནས་བརྟན་པ་ཉིད་ལ་གངས་རི་པ་ཞེས་ཀྱང་བརྗོད་པ་དང༌། ཐམས་ཅད་ཡོད་པར་སྨྲ་བ་ཉིད་ལ་རྣམ་པར་ཕྱེ་སྟེ་སྨྲ་བའམ། ཁ་ཅིག་མུ་རུན་ཏ་ཀ་བ་ཞེས་ཟེར་བ་དང༌། གནས་མའི་བུ་བ་དང༌། ཆོས་མཆོག་པ་དང༌། བཟང་པོའི་ལམ་པ་དང༌། ཀུན་གྱིས་བཀུར་བ་ལ་ཁ་ཅིག་ཨཱ་བནྟ་ཀ་པ་ཡང་ཟེར། ཁ་ཅིག་ནི་ཀུ་རུ་ཀུ་ལླ་པ་ཞེས་ཀྱང་ཟེར་བ་དང༌། མང་སྟོན་པ་དང༌། ཆོས་སྦས་པ་དང༌། ཆར་བཟང་འབེབས་པ་ལ་ཁ་ཅིག་འོད་སྲུངས་པ་ཟེར་བ་དང༌། བླ་མ་པ་ལ་ཁ་ཅིག་ཕོ་བར་སྨྲ་བ་པ་ཟེར་བ་སྟེ་རྣམ་པ་བཅུར་གྱེས་སོ། །དེ་ནི་ལུགས་དང་པོའོ། །ལུགས་གཉིས་པ་ནི། གཞི་སྔ་མ་བཞིན་ལས་གནས་བརྟན་པ་དང༌། དགེ་འདུན་ཕལ་ཆེན་པ་དང༌། རྣམ་པར་ཕྱེ་སྟེ་སྨྲ་བ་པ་སྟེ་རྩ་བའི་སྡེ་གསུམ་མོ། །གནས་བརྟན་པ་ཡང་ཐམས་ཅད་ཡོད་པར་སྨྲ་བ་དང་གནས་མ་བུའི་སྡེ་པ་གཉིས་སུ་གྱེས་སོ། །ཐམས་ཅད་ཡོད་པར་སྨྲ་བ་ཡང་རྣམ་པ་གཉིས་ཏེ། ཐམས་ཅད་ཡོད་པར་སྨྲ་བ་དང༌། མདོ་སྡེ་སྨྲ་བའོ། །གནས་མ་བུ་པ་ཡང་མང་བཀུར་བ་དང༌། ཆོས་མཆོག་པ་དང༌། བཟང་པོའི་ལམ་པ་དང༌། གྲོང་ཁྱེར་དྲུག་པ་སྟེ་གནས་བརྟན་པ་ལ་ཡན་ལག་ལན་གཉིས་དང༌། ཉིང་ལག་དྲུག་ཏུ་གྱེས་སོ། །དགེ་འདུན་ཕལ་ཆེན་པ་ལ། དགེ་འདུན་ཕལ་ཆེན་པ་དང༌། ཤར་གྱི་རི་བོ་པ་དང༌། ནུབ་ཀྱི་རི་བོ་པ་དང༌། རྒྱལ་པོའི་རི་པ་དང༌། གངས་རི་པ་དང༌། མཆོད་རྟེན་པ་དང༌། དོན་གྲུབ་པ་དང༌། བ་ལང་གནས་པ་སྟེ་བརྒྱད་དུ་གྱེས་སོ། །རྣམ་པར་ཕྱེ་སྟེ་སྨྲ་བ་ལ། ས་སྟོན་པ། འོད་སྲུངས་པ། ཆོས་སྦས་པ། གོས་དམར་བ་སྟེ་བཞི་རུ་གྱེས་སོ། །དེ་ལྟར་ན་གནས་བརྟན་པའི་ཉིང་ལག་དྲུགདགེ་འདུན་ཕལ་ཆེན་པ་བརྒྱད། རྣམ་པར་ཕྱེ་བ་སྨྲ་བ་བཞི་སྟེ། བཅོ་བརྒྱད་དོ། །ཡང་ལུགས་གསུམ་པ་ནི། སངས་རྒྱས་མྱ་ངན་ལས་འདས་ནས་ལོ་བརྒྱ་དང་སུམ་ཅུ་རྩ་བདུན་ན། རྒྱལ་པོ་དགའ་བོ་དང་པད་མ་ཆེན་པོའི་དུས། གྲོང་ཁྱེར་པ་ཏྲ་བི་བུ་ཏར་འོད་སྲུངས་ཆེན་པོ་ལ་སོགས་པ་སོ་སོ་ཡང་དག་པར་རིག་པ་ཐོབ་པ་རྣམས་བཞུགས་པ་ན། བདུད་ཀྱི་ཕྱོགས་སུ་གྱུར་པའི་དགེ་སློང་གནས་བརྟན་ཀླུའི་སྡེ་ཞེས་བྱ་བ་དང༌། ཡིད་བརྟན་པ་ཞེས་བྱ་བ་མང་དུ་ཐོས་པ་དག་གིས་གཞན་ལ་ལན་གདབ་པ་མི་ཤེས་པ། ཡིད་གཉིས། ཡོངས་སུ་བརྟག་པ། བདག་ཉིད་གསོ་བར་བྱེད་པ་སྟེ། གཞི་ལྔ་བསྔགས་པར་བྱེད་པས་རྐྱེན་བྱས་ནས་སྡེ་པ་གཉིས་སུ་གྱེས་ཏེ། གནས་བརྟན་པ་དང༌། དགེ་འདུན་ཕལ་ཆེན་པའོ། །དེ་ལྟར་དྲུག་ཅུ་རྩ་གསུམ་གྱི་བར་དུ་དགེ་འདུན་བྱེ་ཞིང་འཁྲུག་ལོང་གིས་གནས་པ་ལས། སངས་རྒྱས་མྱ་ངན་ལས་འདས་ནས་ལོ་བརྒྱ་ཕྲག་གཉིས་སོང་བ་ན། གནས་བརྟན་གནས་མའི་བུས་བསྟན་པ་ཡང་དག་པར་བསྡུས་སོ། ལུགས་གསུམ་པ་འདི་ལ་ནི་ཕལ་པ་ཆེན་པ་དྲུག་སྟེ། །ཕལ་ཆེན་པ་དང༌། ཐ་སྙད་གཅིག་པ་དང༌། བ་ལང་གནས་པ་དང༌། མང་དུ་ཐོས་པ་དང༌། བཏགས་པར་སྨྲ་བ་པ་དང༌། མཆོད་རྟེན་པ་རྣམས་སོ། །ཐམས་ཅད་ཡོད་པར་སྨྲ་བ་བདུན་ཏེ། ཐམས་ཅད་ཡོད་པར་སྨྲ་བ་དང༌། རྣམ་པར་ཕྱེ་སྟེ་སྨྲ་བ་དང༌། མང་སྟོན་པ་དང༌། ཆོས་སྦས་པ་དང༌། གོས་དམར་བ་དང༌། འོད་སྲུངས་པ་དང༌། འཕོ་བ་པ་རྣམས་སོ། །གནས་མའི་བུ་པ་བཞི་སྟེ། །གནས་མའི་བུ་པ་དང༌། ཆོས་མཆོག་པ་དང༌། ལམ་བཟང་པ་དང༌། མང་པོས་བཀུར་བ་རྣམས་སོ། །དེ་ལྟར་བཅུ་བདུན་དང༌། གངས་རི་པ་དང༌། བཅོ་བརྒྱད་དོ། །ལུགས་གསུམ་པའི་སྐབས་འདིར་སོ་སོའི་གྲུབ་མཐའ་རྣམས་བྲིས་པ་ལས་ན། སློབ་དཔོན་ལེགས་ལྡན་འབྱེད་ནི་གསུམ་པ་ལྟར་བཞེད་པ་ཡིན་ནམ་སྙམ་མོ། །བོད་རྣམས་ལ་ཕལ་ཆེར་སྡེ་པ་ཆང་ལ་རྩ་བར་བྱེད་ཅེས་གྲགས་ཀྱང་པཎ་ཆེན་གྱི་ཞལ་སྔ་ནས་ཀྱི་ཕྱག་དཔེ་ཐ་སྙད་གཅིག་པ་དང་འཇིག་རྟེན་ལས་འདས་པར་སྨྲ་བ་གཉིས་ཀྱི་ཐུན་མོང་བའི་སོ་སོ་ཐར་པའི་མདོ་ཞིག་འདུག་པ་ན་མི་ཚངས་པར་སྤྱོད་པ་ཉིད་རྩ་བར་བྱས་སྣང་ངོ༌། །ཡང་སྡེ་པ་བཅོ་བརྒྱད་པོ་ཐམས་ཅད་ཀྱི་རྣམ་པར་གྲོལ་བའི་རས་ཡུག་མ་ཉམས་པར་གསུངས་པ་ནི། བདག་ཏུ་སྨྲ་བའི་སྡེ་པ་རྣམས་ལ་བདག་མེད་རྟོགས་པའི་ལམ་ཉིད་མེད་པས། བདག་ཏུ་སྨྲ་བ་དེ་རྣམས་ཀྱི་ཡང་རྣམ་པར་གྲོལ་བའི་ཐབས་ཀྱི་དང་པོ་སོ་སོ་ཐར་པའི་སྡོམ་པ་ནི་དེ་རྣམས་ལ་ཡོད་པས། རས་ཡུག་མ་ཉམས་པའི་དོན་ཡང་ལྷག་པ་ཚུལ་ཁྲིམས་ཀྱི་བསླབ་པ་མ་ཉམས་པ་ལ་བྱ་དགོས་སོ། །གཞུང་ཐ་དད་པ་རིམ་པར་ཀློག་པའི་འཁོར་ལོ་བཙུན་པ་དབྱིག་གཉེན་གྱིས་མཛད་པ་ལས་སློབ་དཔོན་དུལ་བའི་ལྷས་བསྡུས་པར་ནི། ཤར་དང་ནུབ་དང་གངས་རིའི་གནས། །འཇིག་རྟེན་འདས་པར་སྨྲ་བའི་སྡེ། །བཏགས་པར་སྨྲ་བའི་སྡེ་པ་དང༌། །ལྔ་ཚན་དགེ་འདུན་ཕལ་ཆེན་པ། །བཞི་པ་དང་ནི་འོད་སྲུངས་ཏེ། །ས་སྟོན་སྡེ་དང་ཆོས་སྲུངས་སྡེ། །མང་ཐོས་གོས་དམར་སློབ་མ་དང༌། །རྣམ་པར་ཕྱེ་སྟེ་སྨྲ་བའི་སྡེ། །ཐམས་ཅད་ཡོད་པར་སྨྲ་བ་ཡིན། །རྒྱལ་བྱེད་ཚུལ་གནས་འཇིགས་མེད་གནས། །གཙུག་ལག་ཁང་ཆེན་གནས་བརྟན་པ། །ས་སྒྲོགས་རི་དང་སྲུང་བ་པ། །གནས་མ་བུ་ཡི་སྡེ་རྣམས་ནི། །ཀུན་གྱིས་བཀུར་བ་རྣམ་པ་གསུམ། །ཡུལ་དོན་སློབ་དཔོན་བྱེ་བྲག་གིས། །ཐ་དད་རྣམ་པ་བཅོ་བརྒྱད་གསུངས། །ཞེས་འབྱུང་ངོ༌། །སློབ་དཔོན་པདྨ་འབྱུང་གནས་ཀྱིས་མཛད་པའི་དགེ་སློང་གི་ལོ་དྲི་བ་ཇོ་བོ་དང་ནག་ཚོས་བསྒྱུར་བ་ལས། འོད་སྲུངས་ཞེས་བྱ་ས་སྲུངས་དང༌། །ཆོས་སྲུངས་ཞེས་ནི་བྱ་བ་དང༌། །གཞི་ཀུན་ཡོད་པར་སྨྲ་བ་ནི། །ལྟ་བའི་བྱེ་བྲག་འབའ་ཞིག་གི། རྒྱུ་ཡིས་འདི་དག་ཐ་དད་བྱས། །སྟོན་པ་ཐ་དད་ཡོད་མ་ཡིན། །དགེ་འདུན་ཕལ་ཆེན་དབྱེ་བ་ནི། །དྲུག་སྟེ་ཛར་གྱི་རོ་བོ་དང༌། །དེ་བཞིན་ནུབ་རི་ཞེས་བྱ་དང༌། །གངས་གནས་ཞེས་བྱ་དེ་ལས་གཞན། །རྣམ་པར་ཕྱེ་སྟེ་སྨྲ་བ་དང༌། །གཞན་ནི་དེ་བཞིན་བཏགས་པར་སྨྲ། །འཇིག་རྟེན་འདས་སྨྲ་ཞེས་བྱ་བ། །དེ་དག་ཏུ་ནི་ཡང་དག་སྨྲ། །མང་པོས་བཀུར་བའི་བྱེ་བྲག་ནི། །རྣམ་པ་ལྔར་ནི་མཁས་པས་བསྒྲགས། །གོས་དམར་བ་དང་བསྲུང་བ་པ། །ཀུ་རུ་ཀུལླི་དེ་ལས་གཞན། །མང་དུ་ཐོས་པ་ཞེས་བྱ་དང༌། །གནས་མ་བུ་ཞེས་བྱའོ། །རྒྱལ་བྱེད་ཚལ་ན་གནས་པ་དང༌། འཇིགས་མེད་རི་ལ་གནས་པ་དང༌། གཙུག་ལག་ཁང་ཆེན་ལ་གནས་པ། །གནས་བརྟན་དབྱེ་བ་གསུམ་དུ་འདོད། །དེ་ལྟར་བྱེ་བྲག་བཅོ་བརྒྱད་དུ། །ཤཱཀྱ་སེང་གེའི་བསྟན་པ་ནི། །གྱུར་ཏེ་འགྲོ་བའི་བླ་མ་དེའི། སྔོན་གྱི་ཕྲིན་ལས་ཉེས་པ་ཡིན། ཞེས་བཤད་ལ། དགེ་ཚུལ་གྱི་ལོ་དྲི་བ་པནྚི་ཏ་ནཱ་ར་ཡཱ་ན་དེ་བ་དང་ཞང་ཞུང་བ་རྒྱལ་བའི་ཤེས་རབ་ཀྱིས་བསྒྱུར་བ་ལས་ནི། ས་སྲུངས་པ་ལ་ས་སྟོན་དང༌། ནུབ་ཀྱི་རི་བོ་པ་ལ་བྱང་གི་རི་པ་དང༌། གངས་གནས་པ་ལ་དབུས་པ་དང༌། ཀུ་རུ་ཀུ་ལླ་པ་ལ་ས་སྒྲོགས་རིས་ཞེས་འདོན་ཏེ། །ལོ་དྲི་བ་གཉིས་པོ་མཛད་པ་པོ་གཅིག་པས་གཅིག་ཏུ་འོང་དགོས་ནའང༌། །དཔེ་མི་འདྲ་བ་ལས་ཡིན་ནམ་སྙམ་མོ། །འོ་ན་སྡེ་པ་བཅོ་བརྒྱད་པོ་ཐམས་ཅད་རྒྱལ་པོ་ཀྲྀ་ཀྲིའི་རྨི་ལམ་ལུང་བསྟན་པ་ལས། སངས་རྒྱས་ཀྱི་བསྟན་པ་ནི་བསྡུས་ལ་སྡེ་པ་རྣམས་ལ་བསྙེན་པར་རྫོགས་པའི་ཆོ་གའི་ཚིག་ཤིན་ཏུ་མི་འདྲ་བ་ཡོད་ན། ཆོ་ག་དེ་དག་ཐམས་ཅད་ལས་སྡོམ་པ་སྐྱེ་རུང་ན། སྟོན་པ་ཉིད་ཀྱིས་ཆོ་ག་མི་འདྲ་བ་དག་གསུངས་པ་ཡིན་ནམ། ཕྱིས་ཀྱི་སློབ་དཔོན་སོ་སོས་ཆོ་ག་མི་འདྲ་བ་དག་བྱས་པ་ཡིན། སྟོན་པ་ཉིད་ཀྱིས་གསུངས་ན་ནི་དང་པོ་ནས་སྡེ་པ་གྱེས་པར་འགྱུར་ལ། ཕྱིས་སློབ་དཔོན་སོ་སོས་བྱས་ན་ནི་ཆོ་ག་དེ་ལས་བསྙེན་པར་རྫོགས་པའི་སྡོམ་པ་ཇི་ལྟར་སྐྱེ་ཞེ་ན། འདིར་དེ་ལྟར་དཔྱད་པར་བྱ་བ་ནི་འོས་མོད་ཀྱི། སྟོན་པ་ཉིད་ཀྱིས་དངོས་སུ་གསུངས་པ་མ་ཡིན་པས་དང་པོ་ནས་གྱེས་པར་མི་འགྱུར་ལ། ཕྱིས་སློབ་དཔོན་སོ་སོས་བྱས་པ་དག་ཀྱང་སྟོན་པའི་དགོངས་པ་དང་མི་འགལ་བས། ཆོ་ག་དེ་རྣམས་ལས་ཀྱང་བསྙེན་པར་རྫོགས་པའི་སྡོམ་པ་འཐོབ་བོ་ཞེས་བྱ་བ་ནི་མཁས་པ་དག་གི་བཞེད་པ་ཡིན་པར་འདོད་དེ། འོད་ལྡན་ལས་ཀྱང༌། སངས་རྒྱས་ཀྱི་བསྟན་པ་ནི་ཚིག་འབྲུ་ཉིད་ལ་མི་བྱ་བར་དོན་ལ་བྱ་བར་གསུངས་ནས། སྡེ་པ་བཅོ་བརྒྱད་པོ་ཐམས་ཅད་ནག་པོ་བསྟན་པ་མ་ཡིན་པར་ཆེན་པོ་བསྟན་པའི་ཁོངས་སུ་བསྡུས་སྣང་བའི་ཕྱིར་རོ། །སློབ་དཔོན་འཇིགས་མེད་འབྱུང་གནས་སྦས་པས་ཀྱང་ཐུབ་པ་དགོངས་པའི་རྒྱན་དུ། གལ་ཏེ་ད་ནི་སྡེ་པའི་གཞུང་འདི་རྣམས་བཀར་མི་འདོད་ན་བསྙེན་པར་རྫོགས་པ་ལ་སོགས་པའི་ལས་ཇི་ལྟར་འགྲུབ། དགེ་སློང་ཉིད་མེད་ན་སྐྱོན་མང་པོ་རྣམས་སུ་འགྱུར་རོ་ཞེ་ན། བསྙེན་པར་རྫོགས་པའི་དངོས་པོ་དེ་ཡང་ཡོད་པའམ་མེད་པ་ཇི་ལྟར་ཤེས་པར་བྱ་སྟེ། །མངོན་སུམ་ལས་མ་ཡིན་ཞིང་རྗེས་སུ་དཔག་པ་ལས་ཀྱང་མ་ཡིན་ཏེ། རྟགས་མེད་པའི་ཕྱིར་རོ། །འོན་ཀྱང་གཞུང་འདི་རྣམས་བཀའ་ཉིད་དམ་བཀའ་མ་ཡིན་པ་ཉིད་ན་ཡང་བསྙེན་པར་རྫོགས་པ་ལ་སོགས་པའི་ལས་རྣམས་འགྲུབ་བོ། །བསྙེན་པར་རྫོགས་པ་རྣམ་པ་བཅུའོ་ཞེས་འདུལ་བ་འཛིན་པ་རྣམས་སྨྲ་བ་འདི་ལྟ་སྟེ། རང་བྱུང་ཉིད་ཀྱིས་ནི་སངས་རྒྱས་རྣམས་དང་རང་སངས་རྒྱས་རྣམས་ཀྱིའོ། །སྐྱོན་མེད་པ་ལ་ཞུགས་པས་ཅང་ཤེས་ཀཽ་ཊི་ནྱ་དང༌། རྟ་ཐུལ་དང༌། བཟང་ལྡན་དང༌། རླངས་པ་དང༌། མིང་ཆེན་སྟེ་ལྔ་རྣམས་ཀྱིའོ། །དགེ་སློང་ཚུར་ཤོག་གིས་གྲགས་པ་ལ་སོགས་པ་རྣམས་ཀྱིའོ། །སྟོན་པར་ཁས་བླངས་པ་ལས་འོད་སྲུང་ཆེན་པོའི་འོ། །དྲིས་ཤིང་མཉེས་པས་ལེགས་བྱིན་གྱིའོ། །ལྕི་བའི་ཆོས་ཁས་བླངས་པས་སྐྱེ་དགུའི་བདག་མོ་ཆེན་མོའི་འོ། །འདུལ་བ་འཛིན་པ་དང་ལྔ་པས་ཡུལ་མཐའ་འཁོབ་རྣམས་སུའོ། །བཅུའི་ཚོགས་ཀྱིས་དབུས་རྣམས་སུའོ། །སྐྱབས་སུ་འགྲོ་བ་གསུམ་བརྗོད་པས་བཟང་སྡེའི་ཚོགས་དྲུག་ཅུ་རྣམས་ཀྱིའོ་ཞེས་སོ། །དེ་ལྟར་རྗེས་སུ་གནང་བའི་བཀའ་རྣམས་བཀླགས་པ་ཀྱང་གསོལ་བ་བྱེད་དེ། དོན་གྱིས་དེ་རྣམས་དེ་བཞིན་གཤེགས་པས་གསུངས་པ་ཉིད་དུ་ཁས་བླངས་པའི་ཕྱིར་རོ། །དེ་ཉིད་ཀྱི་ཕྱིར་གསུངས་པ། །སངས་རྒྱས་ཀྱི་གསུང་ནི་དོན་ལ་རྟོན་པ་སྟེ། ཚིག་འབྲུ་ལ་རྟོན་པ་ནི་མ་ཡིན་ནོ་ཞེས་སོ། །ཞེས་གསུངས་སོ། །སྡེ་པ་བཅོ་བརྒྱད་དུ་གྱེས་པའི་སྐབས་སོ། །