མང་པོས་བཀུར་བའི་གདུང་རབས་ཀྱི་སྐབས།
མང་པོས་བཀུར་བའི་གདུང་རབས་ཀྱི་སྐབས།
དེ་ལྟར་སྐུ་བཞི་ལ་ལེགས་པར་སྦྱར་བ་དང་བོད་ཀྱི་སྐད་གཉིས་ཀྱིས་མཆོད་པར་བརྗོད་ནས་ཐོག་མར་འོ་སྐོལ་གྱི་སྟོན་པ་འདིའི་གདུང་རབས་བྲི་བར་བྱ་སྟེ། དེ་ཡང་ལུང་ལས། སྟོན་པ་སེར་སྐྱ་ན་བཞུགས་པའི་ཚེ་ཤཱཀྱ་རྣམས་གང་ལས་སྐྱེས། །ཐོག་མ་གང་ཡིན། །སྔོན་གྱི་རིགས་རྒྱུད་གང་ཡིན་ཞེས་འདྲི་ན། ཇི་སྐད་ལུང་བསྟན། ཚུར་སྟོན་པ་ལ་ཞུའོ་ཟེར་ནས་སྟོན་པ་ལ་ཞུས་པས། སྟོན་པས་ཤཱཀྱི་རིགས་རྒྱུད་བཤད་ན་མུ་སྟེགས་པ་རྣམས་བདག་ཉིད་ལ་བསྟོད་ཅིང་ཤེས་པའི་གནས་ཡོད་ཀྱི། མཽངྒལ་གྱིས་ནུས་པ་དེ་སྟོན་དུ་གཞུག་གོ་སྙམ་སྟེ། མཽངྒལ་གྱི་བུ་ང་རྒྱབ་བསྙུང་བས་རེ་ཞིག་དེ་བསལ་གྱི། ཁྱོད་ཀྱིས་ཤཱཀྱའི་སྔོན་གྱི་རིགས་རྒྱུད་ལས་བརྩམས་ཏེ་སྤོབས་པར་གྱིས་ཤིགདེས་ཅང་མི་སྨྲ་བས་ཁས་བླངས་ཏེ། སྟོན་པ་རྣམ་སྦྱར་བལྟབ་སྟེ་འཕངས་སུ་སྔས་བཅུག་སྟེ་མནལ་ལོ། མཽངྒལ་གྱི་བུས་ཤཱཀྱའི་སྔོན་གྱི་རིགས་རྒྱུད་མཐོང་བའི་ཏིང་ངེ་འཛིན་ལ་ཞུགས་ནས། དེ་ལས་ལངས་ཏེ་སྟན་བཤམས་པ་ལ་འདུག་ནས་ཤཱཀྱ་རྣམས་ལ་སྨྲས་པ། འཇིག་རྟེན་འདི་ཞིག་པའི་ཚེ་སེམས་ཅན་ཕལ་ཆེར་འོད་གསལ་གྱི་ལྷར་སྐྱེས་ནས་སོགས་བསྐལ་པ་དང་པོ་འཆགས་པའི་ཚུལ། རྒྱལ་པོ་དང་པོ་བྱུང་བའི་བར་རྒྱས་པར་བཤད་ནས། །རྒྱལ་པོ་མང་པོས་བཀུར་བའི་ཚེ་མི་རྣམས་ཀྱི་མིང་སེམས་ཅན་ཞེས་བྱ། དེའི་བུ་འོད་མཛེས་ཏེ་དེའི་ཚེ་མི་ལ་ཚུར་ཤོག་ཤོག་ཅེས་ཟེར། དེའི་བུ་དགེ་བ་དེའི་ཚེ་མི་ལ་རྨེ་བ་ཅན། དེའི་བུ་དགེ་མཆོག་དེའི་ཚེ་མི་ལ་སྤྲིན་མགྲིན། དེའི་བུ་གསོ་སྦྱོང་འཕགས་དེའི་ཚེ་མི་ལ་ཏཱ་ལའི་རྐང༌། དེའི་སྤྱི་བོར་ཤ་རྨེན་ཅིག་བྱུང་བ་ལས་ང་ལས་ནུ་དེ་ཡི་ཚེ་མི་ལ་ཡིད་ལས་སྐྱེས། རྒྱལ་པོ་དྲུག་ཏུ་མི་ཚེ་ལོ་དཔག་ཏུ་མེད་པ་ཡིན་ནོ།། ང་ལས་ནུའི་བརླ་གཡས་པར་ཤ་རྨེན་བྱུང་བ་ལས་འཁོར་ལོས་སྒྱུར་བའི་རྒྱལ་པོ་མཛེས་པ། དེའི་བརླ་གཡོན་པར་ཤ་རྨེན་ཅིག་བྱུང་བ་ལས་འཁོར་ལོས་སྒྱུར་བ་ཉེ་མཛེས། ཉེ་མཛེས་ཀྱི་རྐང་པ་གཡས་པར་ཤ་རྨེན་ཅིག་བྱུང་བ་ལས་འཁོར་ལོས་སྒྱུར་རྒྱལ་མཛེས་ལྡན། དེའི་རྐང་པ་གཡོན་པར་ཤ་རྨེན་ཅིག་བྱུང་བ་ལས་ཉེ་མཛེས་ལྡན་ཏེ། དེ་བཞི་ནི་གླིང་བཞི་ནས་གཅིག་གི་བར་ལ་དབང་བའི་འཁོར་ལོས་སྒྱུར་རྒྱལ་ལོ། ཉེ་མཛེས་ལྡན་གྱི་བུ་བཟང་པོ་ནས་ཀུན་ནས་འོད་ཟེར་གྱི་བར་མིང་སྨོས་པ་སུམ་ཅུ། ཀུན་ནས་འོད་ཟེར་གྱི་བུ་བརྒྱུད་ལ་རྒྱལ་པོ་བརྒྱ་ཐམ་པ་ཡུལ་གྲུ་འཛིན་དུ་བྱུང་ངོ༌།། ཐ་མ་དགྲ་འདུལ་ཞེས་བྱའོ། །དགྲ་འདུལ་གྱི་བུ་བརྒྱུད་ལ་རྒྱལ་པོ་ལྔ་ཁྲི་བཞི་སྟོང་ཡུལ་དམག་གིས་མི་ཚུགས་པར་བྱུང་སྟེ། ཐ་མ་ལ་རྒྱལ་བ་ལས་རྒྱལ་པོ་ཞེས་བྱའོ། །དེའི་བུ་བརྒྱུད་ལ་རྒྱལ་པོ་དྲུག་ཁྲི་སུམ་སྟོང་ཡུལ་བ་ར་ཎཱ་སིར་བྱུང་སྟེ་ཐ་མར་རྒྱལ་པོ་བཟོད་དཀའ་ཞེས་བྱའོ། །དེའི་བུ་བརྒྱུད་ལ་རྒྱལ་པོ་བརྒྱད་ཁྲི་བཞི་སྟོང་ཀ་བི་ལའི་གྲོང་དུ་བྱུང་སྟེ། །ཐ་མ་ཚངས་བྱིན་ནོ།། དེའི་བུ་བརྒྱུད་ལ་རྒྱལ་པོ་སུམ་ཁྲི་ཉིས་སྟོང་གླང་པོ་ཆེའི་གྲོང་དུ་བྱུང་སྟེ། ཐ་མ་བལ་བུ་ཅན་ནོ། །དེའི་བུ་བརྒྱུད་ལ་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་བྲང་གིས་ཉལ་དུ་བྱུང་སྟེ། ཐ་མ་ཚན་པོ་ཆེ་འདུལ་ལོ། །དེའི་བུ་བརྒྱུད་ལ་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་མ་རྒྱལ་བ་ལས་རྒྱལ་བར་བྱུང་སྟེ། ཐ་མ་བརྒྱ་བྱིན་ཞེས་བྱའོ།།དེའི་བུ་བརྒྱུད་ལ་རྒྱལ་པོ་སུམ་ཁྲི་ཉིས་སྟོང་གྲོང་ཁྱེར་ཀ་ནྱ་ཀུབ་ཛར་བྱུང་སྟེ། ཐ་མ་རྒྱལ་བདེ། དེའི་བུ་བརྒྱུད་ལ་རྒྱལ་པོ་ཁྲི་བརྒྱད་སྟོང་གྲོང་ཁྱེར་ཙམྤར་བྱུང་སྟེ། ཐ་མ་ཀླུའི་ལྷ་ཞེས་བྱའོ། །དེའི་བུ་བརྒྱུད་ལ་རྒྱལ་པོ་ཉི་ཁྲི་ལྔ་སྟོང་གྲོང་ཁྱེར་ཏཱ་ལའི་ཕྲེང་དུ་བྱུང་སྟེ། ཐ་མ་མིའི་ལྷའོ། །དེའི་བུ་བརྒྱུད་ལ་རྒྱལ་པོ་ཁྲི་ཉིས་སྟོང་གྲོང་ཁྱེར་ར་མ་ལིར་བྱུང་སྟེ། ཐ་མ་རྒྱལ་པོ་རྒྱ་མཚོའི་ལྷ་ཞེས་བྱའོ། །དེའི་བུ་བརྒྱུད་ལ་རྒྱལ་པོ་ཁྲི་བརྒྱད་སྟོང་གྲོང་ཁྱེར་བ་སོའི་གྲོང་དུ་བྱུང་སྟེ། ཐ་མ་བློ་གྲོས་བཟང་པོ། དེའི་བུ་བརྒྱུད་ལ་རྒྱལ་པོ་ཉི་ཁྲི་ལྔ་སྟོང་རྒྱལ་པོའི་ཁབ་ཏུ་བྱུང་སྟེ། ཐ་མ་མུན་སེལ་ལོ། དེའི་བུ་བརྒྱུད་ལ་རྒྱལ་པོ་ཉི་ཁྲི་བ་ར་ཎཱ་སིར་བྱུང་སྟེ། ཐ་མ་རྒྱལ་པོ་དབང་ཕྱུག་ཆེན་པོའི་སྡེའོ། །དེའི་བརྒྱུད་ལ་རྒྱལ་པོ་བརྒྱད་ཁྲི་བཞི་སྟོང་གྲོང་ཁྱེར་རྩྭ་ཅན་དུ་བྱུང་སྟེ། །ཐ་མ་རྒྱ་མཚོའི་སྡེའོ། །དེའི་བརྒྱུད་ལ་རྒྱལ་པོ་སྟོང་གྲུ་འཛིན་དུ་བྱུང་སྟེ། ཐ་མ་དཀའ་ཐུབ་སྤྱོད་དོ། །དེའི་བརྒྱུད་ལ་རྒྱལ་པོ་བརྒྱད་ཁྲི་བཞི་སྟོང་གྲོང་ཁྱེར་རྩྭ་ཅན་དུ་བྱུང་སྟེ། ཐ་མ་སའི་གདོང་ངོ༌། །དེའི་བརྒྱུད་ལ་རྒྱལ་པོ་འབུམ་བ་ར་ཎཱ་སིར་བྱུང་སྟེ། ཐ་མ་སའི་བདག་པོའོ། །དེའི་བརྒྱུད་ལ་རྒྱལ་པོ་འབུམ་དམག་གིས་མི་ཚུགས་པར་བྱུང་སྟེ། ཐ་མ་རྒྱལ་པོ་ས་འཛིན་ནོ། །དེའི་བརྒྱུད་ལ་རྒྱལ་པོ་བརྒྱད་ཁྲི་བཞི་སྟོང་མི་ཐི་ལར་བྱུང་སྟེ། ཐ་མ་ལྷ་ཆེན་པོའོ། །དེའི་བརྒྱུད་ལ་རྒྱལ་པོ་བརྒྱད་ཁྲི་བཞི་སྟོང་མི་ཐི་ལར་བྱུང་སྟེ། ཐ་མ་མུ་ཁྱུད་དོ། །མུ་ཁྱུད་ཀྱི་བརྒྱུད་ལ་མིང་སྨོས་པ་ཞེ་དགུ། ཐ་མ་ཤིང་རྟ་སྲ་བ། དེའི་བརྒྱུད་ལ་རྒྱལ་པོ་བདུན་ཁྲི་བདུན་སྟོང་གྲོང་ཁྱེར་ཀུན་སྣང་དུ་བྱུང་སྟེ། ཐ་མ་ནམ་མཁའི་བདག་པོ། དེའི་བུ་ཀླུ་མཉམ་སྐྱོང་གི་བུ་བརྒྱུད་ལ་རྒྱལ་པོ་བརྒྱ་ཐམ་པ་བ་ར་ཎཱ་སིར་བྱུང་སྟེ། ཐ་མ་ཀྲྀ་ཀྲིའོ། དེས་འོད་སྲུང་གི་དྲུང་དུ་བྱང་ཆུབ་ཏུ་སེམས་བསྐྱེད་ནས་དགའ་ལྡན་དུ་སྐྱེས་སོ། དེའི་བུ་ལེགས་སྐྱེས། དེའི་བརྒྱུད་ལ་རྒྱལ་པོ་བརྒྱ་ཐམ་པ་གྲུ་འཛིན་དུ་བྱུང་སྟེ། ཐ་མ་རྣ་བ་ཅན་ནོ། དེ་ལ་བུ་གཽ་ཏ་མ་དང་བྷ་ར་དྷྭ་ཛ་གཉིས་ལས། གཽ་ཏ་མ་རབ་ཏུ་བྱུང་བ་ལ་མོས་པས་ཡབ་ལ་ཞུས་པས་གནང་སྟེ། དྲང་སྲོང་མདོག་ནག་པོ་ལ་རབ་ཏུ་བྱུང་ནས་བདག་དགོན་པའི་ཟས་ཀྱིས་འཚོ་བར་མི་ནུས་ཀྱིས་གྲོང་འདབ་ཏུ་གནས་སོ། །དེས་གནང་སྟེ་ལོ་མའི་སྤྱིལ་པོ་བརྩིགས་ཏེ་གནས་སོ། །དེའི་ཚེ་སྐྱེས་བུ་གཡོན་ཅན་པདྨའི་རྩ་ལག་གིས་སྨད་འཚོང་མ་བཟང་མོ་ལ་དགའ་མགུར་སྤྱད་པའི་ཕྱིར་གོས་རྒྱན་བསྐུར་རོ། །དེར་མི་གཞན་ཞིག་པ་ན་ལྔ་བརྒྱ་ཐོགས་ནས་བྱུང་བ་དང་མངག་གཞུག་མ་པདྨའི་རྩ་ལག་ཅན་མངགས་ཏེ་དེ་དང་དགའ་མགུར་སྤྱད། དེ་དེ་ཉིད་ལ་སོང་བ་དང༌། ཡང་མངག་གཞུག་མ་མངགས་ཏེ་སྐབས་ཡོད་དོ་ཞེས་སྨྲས་པས། སྐད་ཅིག་ལ་སྐབས་ཡོད་དང་སྐད་ཅིག་ལ་སྐབས་མེད་དོ་ཟེར་རམ། བུ་མོ་དེ་དེ་དང་རེག་མི་འཕྲོད་པ་ཞིག་པས་སྐབས་མ་མཆིས་པ་ལགས་མོད་ཀྱི་དེ་ཁྱོད་ཀྱི་གོས་རྒྱན་གྱོན་ནས་གཞན་དང་སྤྱོད་དོ། དེ་མི་བཟོད་པ་སྐྱེས་ཏེ། སོང་ལ་སྐྱེད་མོས་ཚལ་ག་གེར་ཤོག་བྱོས་ཤིགདེས་དེ་ལ་སྨྲས་ཏེ་སོང་བ་དང༌། དེས་ཁྱོད་ཁོ་བོའི་གོས་རྒྱན་གྱིས་སྐྱེས་པ་གཞན་དང་དགའ་མགུར་སྤྱོད་པ་རིགས་སམ། དེ་བདག་གིས་ནོངས་ཀྱི་བཟོད་པ་མཛོད་ཅིགདེ་བསད་དོ། བུ་མོས་ཇོ་མོ་བསད་དོ་ཞེས་ཀུ་ཅོ་བཏོན་ཏེ་སྐྱེ་བོ་ཀུན་གྱིས་རྒྱུགས་པ་དང༌། པདྨའི་རྩ་ལག་སྐྲག་སྟེ་རལ་གྲི་ཁྲག་ཅན་གཽ་ཏ་མའི་དྲུང་དུ་བཞག་ནས་སྐྱེ་བོའི་ནང་དུ་ཞུགས་སོ། །སྐྱེ་བོ་དེས་མཐོང་ནས་རབ་བྱུང་འདིས་བཟང་མོ་བསད་དོ་ཞེས། ཁྱེད་རབ་བྱུང་དྲང་སྲོང་གི་རྒྱལ་མཚན་ཐོགས་ནས་འདི་འདྲ་བའི་ལས་བྱེད་དམ། ཅི་བྱས། འདིའོ། ཁོ་བོ་སྡིག་པ་ཞི་བས་འདི་འདྲའི་ལས་མི་བྱེད་དོ་ཞེས་སྨྲས་ཀྱང་མ་ཉན་པར་དེའི་ལག་པ་ཕྱིན་ཀ་ལོག་ཏུ་བཅིངས་ནས་རྒྱལ་པོ་ལ་ཕུལ་ཏེ། འདིས་བཟང་མོ་དང་དགའ་མགུར་སྤྱད་ནས་བཀུམ་མོ། རྒྱལ་པོ་ནི་མི་རྟོག་པས་གསལ་ཤིང་ལ་ཁོལ་ཅིག་ཟེར་ནས་དེ་ལྟར་བྱས་སོ། དྲང་སྲོང་མདོག་ནག་པོ་དུས་དུས་སུ་དེར་འགྲོ་བས་སོང་ནས་དེ་མ་མཐོང་བ་དང་བཙལ་བས་གསལ་ཤིང་ལ་གཤོན་པར་མཐོང་ནས། བུ་ཅི་ཡིན། ལས་ལགས་མོད། རྨ་མ་ཕྱུང་ངམ། ལུས་ཀྱི་རྨ་ཕྱུང་སྟེ་སེམས་ཀྱིས་མ་ཡིན་ནོ། ཇི་ལྟར་ཤེས། བདེན་པའི་ཚིག་གིས་བདག་གི་ལུས་ཀྱི་རྨ་ཕྱུང་གི་སེམས་ཀྱིས་མ་ཡིན་ན་མཁན་པོའི་ལྤགས་པའི་མདོག་གསེར་གྱི་མདོག་ཏུ་གྱུར་ཅིག་ཅེས་སྨྲས་མ་ཐག་ཏུ་གསེར་མདོག་ཏུ་གྱུར་ཏེ་ཡིད་ཆེས་སོ། གཽ་ཏ་མས་མཁན་པོ་བདག་གི་འགྲོ་བ་ནི་གང༌། སྐྱེ་བ་ནི་གང༌། བུ་བྲམ་ཟེ་ན་རེ་བུ་མེད་པ་ལ་འགྲོ་བ་མེད་དོ་ཟེར་ན། བུ་བསྐྱེད་པའི་ནུས་པ་ལྟ་ཡོད་དམ། བདག་གཞོན་ནུ་ནས་རབ་ཏུ་བྱུང༌། བུད་མེད་ཀྱི་རྒྱུས་ཀྱང་མ་འཚལ་ན། ལྟ་ག་ལ་མཆིས། བུ་སྔོན་སྤྱད་པའི་ཡུལ་དྲན་པར་གྱིས་ཤིགགནད་འཆད་པའི་ཚོར་བས་ཉེན་ན་ཡུལ་དྲན་པར་ག་ལ་འགྱུར། དེས་རྫུ་འཕྲུལ་གྱི་རྫི་ཆར་ཆེན་པོ་ཕབ་སྟེ་ཆར་པའི་ཐིགས་པ་ལུས་ལ་ཕོག་ཅིང་རླུང་གྲང་མོས་ལུས་ལ་རེག་པས་སྡུག་བསྔལ་མནན་ནས། སྔོན་གྱི་ཡུལ་དྲན་པར་བྱས་ཏེ་འཁྲིག་པའི་འདོད་ཆགས་དྲན་ནས་ཁུ་བ་ཁྲག་དང་འདྲེས་པ་གཉིས་ལྷུང་ངོ༌། །དེ་གཉིས་སྒོ་ང་གཉིས་སུ་གྱུར་ནས་ཉི་མའི་འོད་ཟེར་གྱིས་སྨིན་ནས་བརྟོལ་བ་དང་ཁྱེའུ་གཉིས་བྱུང་སྟེ། དེ་དང་ཉེ་བའི་བུ་རམ་ཤིང་གསེབ་ཏུ་ཞུགས་སོ། གཽ་ཏ་མ་ཉི་མའི་འོད་ཟེར་གྱིས་ཤིན་ཏུ་ཚ་ནས་ཤིའོ། །དྲང་སྲོང་འོངས་ནས་ཉེ་འཁོར་ལ་བལྟས་པས། སྒོང་ལྐོགས་མཐོང་ནས་བཙལ་བས་བུ་རམ་ཤིང་གི་ཚལ་ན་ཁྱེའུ་གཉིས་འདུག་པ་མཐོང་སྟེ། དེ་དེའི་བུ་རུ་ཤེས་ཏེ་གནས་སུ་ཁྲིད་ནས་མནུན་བསྙོད་དེ་གསོས་པས། ཉི་མའི་འོད་ཀྱིས་སྨིན་པར་བྱས་པས་ཉི་མའི་རིགས། གཽ་ཏ་མའི་བུ་ཡིན་པས་གཽ་ཏ་མ། རང་གི་ཡན་ལག་ལས་སྐྱེས་པས་ཡན་ལག་སྐྱེས། བུ་རམ་ཤིང་གི་ཚལ་ནས་རྙེད་པས་བུ་རམ་ཤིང་པ་ཞེས་བཏགས་སོ། དུས་གཅིག་ན་རྒྱལ་པོ་བྷ་ར་དྷཱ་ཛ་བུ་མེད་པར་ཤི་ནས། བློན་པོ་རྣམས་གྲོས་བྱས་ནས་སུ་རྒྱལ་པོར་དབང་བསྐུར། འདི་ནི་གཅེན་ནོ། །དེ་དྲང་སྲོང་གི་དྲུང་དུ་སོང་ནས་གཽ་ཏ་མ་གང་དུ་མཆིས། ཁྱེད་ཀྱིས་བསད་དོ།། བདག་ཅིག་གིས་མཐོང་བ་ཡང་མི་དྲན་ན་ཇི་ལྟར་བསད། དྲན་པར་བྱའོ་ཞེས་རྒྱས་པར་བཤད་པས། སྡིག་པ་སྤྱོད་པ་དེའི་མིང་ཙམ་ཡང་བསྒྲགས་པ་མ་ལགས་ཀྱི། ཞོག་ཅིགསྡིག་པ་ཅི་བྱས། འདིའོ། །དེ་སྐྱོན་མེད་པར་ཁྱོད་ཀྱིས་བསད་པའི་རྒྱུ་མཚན་རྒྱས་པར་བཤད་པ་དང༌། ཁྱིའུ་དེ་གཉིས་ཕྱོགས་དེར་འོངས་སོ།། འདི་སུའི་བུ། དེ་ཁོ་ནའི་བུའོ། དེ་མཐོང་ནས་ངོ་མཚར་སྐྱེས་ཏེ་དེ་གཉིས་ཁྲིད་ནས་ཕུ་བོ་རྒྱལ་སྲིད་ལ་དབང་བསྐུར་རོ། དེའང་བུ་མེད་པར་ཤི་ནས་ནུ་བོ་རྒྱལ་སྲིད་ལ་དབང་བསྐུར་རྒྱལ་པོ་བུ་རམ་ཤིང་པ་ཞེས་པར་གྱུར། དེའི་བུ་བརྒྱུད་ལ་རྒྱལ་པོ་བུ་རམ་ཤིང་པ་བརྒྱ་ཡུལ་གྲུ་འཛིན་དུ་བྱུང༌།
