མང་པོས་བཀུར་བའི་གདུང་རབས་ཀྱི་སྐབས།

        ༡.༣ སངས་རྒྱས་ཀྱི་མཛད་པའི་སྐབས། འདིར་གདགས་པར་འདུལ་བ་ལས་འབྱུང་བའི་རྒྱལ་པོའི་རབས་ཀྱི། སངས་རྒྱས་འོད་སྲུངས་དང་རྒྱལ་པོ་ཀྲྀ་ཀི་དུས་མཉམ་དུ་བྱུང་བའི་སྐབས་སུ་སངས་རྒྱས་འོད་སྲུངས་འཇིག་རྟེན་དུ་བྱུང་སྟེ། དེར་བྱང་ཆུབ་སེམས་དཔས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་སྲུངས་ལ་མ་འོངས་པའི་དུས་ན་བྱང་ཆུབ་ཐོབ་པར་བྱ་བའི་ཕྱིར་སྨོན་ལམ་བཏབ་ཅིང༌། ཚངས་པར་སྤྱོད་པ་སྤྱད་ནས་དགའ་ལྡན་གྱི་ལྷའི་རིས་སུ་སྐྱེས་ཏེ། དེ་དེ་ན་ཚེའི་ཚད་ཇི་སྲིད་པ་དེ་སྲིད་དུ་གནས་སོ་ཞེས་དགའ་ལྡན་པའི་ཚེའི་ཚད་དུ་གནས་པར་བཤད་ལ། རྒྱུ་གདགས་པ་ལས་ཀྱང༌། དགའ་ལྡན་པའི་ཚེའི་ཚད་ལོ་བྱེ་བ་ཕྲག་ལྔ་བཅུ་རྩ་བདུན་དང་ས་ཡ་དྲུག་ཏུ་གནས་པར་བཤད་དེ། དེ་དག་རྫོགས་ནས་བྱང་ཆུབ་སེམས་དཔས། རིགས་དང་ཡུལ་དང་དུས་དང་རྒྱུད་དང་བུད་མེད་དེ་གཟིགས་པ་ལྔ་ལ་གཟིགས་ཏེ། འདོད་པ་ན་སྤྱོད་པའི་ལྷའི་རིས་དྲུག་ལ། ཁོ་བོ་ཛམྦུའི་གླིང་དུ་སྒྱུ་འཕྲུལ་ཆེན་མོའི་ལྷུམས་སུ་ཉིང་མཚམས་སྦྱར་ནས་བདུད་རྩི་རྟོགས་པར་བྱེད་དེ། ཁྱེད་ཅག་ལས་སུ་བདུད་རྩི་རྟོགས་པར་འདོད་པ་དེ་ཡང་དེའི་ཡུལ་དུ་སྐྱེ་བ་ལོང་ཞིག་ཅེས་བསྒྲགས་ཏེ། ལྷ་རྣམས་ཀྱིས་མུ་སྟེགས་ཀྱི་སྟོན་པ་བཅོ་བརྒྱད་ཀྱིས་ཛམྦུའི་གླིང་ལྟ་བའི་ཉེས་པ་དང་ལྡན་པས་མི་གཤེགས་པར་གསོལ་བ་བཏབ་ཀྱང་མ་བཟློགས་ཏེ། གླང་པོ་ཆེའི་ཕྲུ་གུ་ཐལ་དཀར་དུ་བསྒྱུར་ནས་ཚེས་བཅོ་ལྔའི་གསོ་སྦྱོང་བླངས་པའི་ཡུམ་གྱི་རུམ་དུ་ཞུགས་སོ། ཉ་དེ་ཡང་ས་ག་ཟླ་བའི་ཉ་ཡིན་པར་རྒྱ་ཆེར་རོལ་པ་ལས་བཤད་དེ། ཟླ་བ་བཅུ་རྫོགས་པར་ལྷུམས་སུ་བཞུགས་ནས། དབོ་ཟླ་བའི་ཚེས་བཅོ་ལྔ་ལ་ལུམྦི་ནིའི་ནགས་སུ་སྐུ་བལྟམས་ཏེ། དེ་ཡང་སྐར་མ་རྒྱལ་འཆར་བ་དང་དུས་མཚུངས་པར་སྐུ་བལྟམས་སོ། དྲང་སྲོང་རྒྱས་པས། ཐུབ་པ་ཁྱོད་ནི་རྒྱལ་ལ་སྐྱེས། ཞེས་བརྗོད་པ་དང༌། ཀླུ་སྒྲུབ་ཀྱིས། སྐར་མ་རྒྱལ་ལ་བབ་པ་ན། །དེ་སྲས་རྩིབ་མའི་ལོགས་ནས་ནི། །ཞེས་བྱ་བ་ལ་སོགས་པ་འབྱུང་བའི་ཕྱིར་རོ། །དེ་ཡང་འཁྲུངས་པའི་ལོ་ནི། རྒྱའི་ཡུལ་དུ་ཅིའུའི་རིགས་ཀྱི་རྒྱལ་རབས་བཞི་པ་ཅིའུ་ཝང་ཞེས་པས། རྒྱལ་སར་ལོ་ཉི་ཤུ་ལྷག་ཙམ་སོང་བའི་ཚེ། ས་ཕྱོགས་ཐམས་ཅད་གསེར་གྱི་ཁ་དོག་ཅན་གྱི་འོད་ཀྱིས་ཁྱབ་པར་གྱུར། རྩིས་མཁན་རྣམས་ལ་དེ་ཅིའི་དོན་ཡིན་རྟོག་ཏུ་བཅུག་པས། དེ་རྣམས་ན་རེ། ནུབ་ཕྱོགས་ཀྱི་རྒྱལ་པོ་ཆེན་པོ་ཞིག་ལ་གསེར་གྱི་བུ་ཆུང་ཞིག་བཙས། དེའི་འོད་ཡིན་པར་འདུག་ཟེར། སངས་རྒྱས་འཇིག་རྟེན་དུ་བྱོན་པར་ཤེས། ངེད་རང་གི་རིང་ལ་དེའི་འཇ་ས་ཡོང་ངམ་དྲིས་པས། ངེད་རང་གི་རིང་ལ་མི་འོང་གིངེད་རང་ནས་རྒྱལ་པོའི་རབས་འདི་དང་ལོ་འདི་དང་ཉིན་ཞག་འདི་ལ་དེའི་འཇ་ས་ཁྱེར་བའི་མི་ཆ་ལུགས་འདི་ལྟ་བུ་བྱས་པ་བཞི་འོང་ཟེར། དེ་ངོ་མཚར་ནས། དོན་དེ་རྣམས་གཙུག་ལག་ཁང་ཞིག་གི་མདུན་ན་རྡོ་རིང་ཞིག་ཡོད་པ་ལ་བྲིས་ཏེ། འཁྲུངས་པའི་ལོ་དེ་ཤིང་ཕོ་སྟག་གི་ལོ་ཡིན་ཟེར། དེ་ནས་ཡུན་རིང་པོ་སོང་བ་ན་གཙུག་ལག་ཁང་དེ་ཡང་ཞིགརྡོ་རིང་དེ་ཡང་འགྱེལ། ནམ་ཞིག་ན་རྒྱ་གར་ནས་གསུང་རབ་མང་པོ་ཁུར་བའི་དགེ་སློང་བཞི་རྒྱའི་ཡུལ་དུ་ལྷགས། དེའི་དུས་ཀྱི་རྒྱལ་པོས། ཆ་ལུགས་མི་འདྲ་བ་འདི་རྣམས་ཇི་ལྟར་ཡིན་པ་ལྟོས་ཤིག་ཅེས་གསུངས་པ་ན། གཞན་སུས་ཀྱང་མ་ཤེས། རྒན་མོ་ཞིག་གིས། ཕྱོགས་འདི་ན་གཙུག་ལག་ཁང་ཡོད་པ་དང༌། དེར་རྡོ་རིང་ལ་འདི་འདྲ་བ་འབྱུང་བའི་ཡི་གེ་ཡོད། རྡོ་རིང་འགྱེལ་པ་དེ་སློང་ལ་ལྟོས་དང་ཟེར། བལྟས་པས་ལོ་དང་ཟླ་བ་ཐམས་ཅད་མཐུན་པར་བྱུང༌། ཞག་བདུན་མ་འགྲིག་ཅེས་འབྱུང་བ་ཡིན་ནོ། །དེ་ལྟར་ཐུབ་པ་བལྟམས་ནས་ཡི་གེ་སློབ་པ་དང་རོལ་རྩེད་སོགས་མཛད་དེ། གྲགས་འཛིན་མ་དང་ས་འཚོ་མ་ཁབ་ཏུ་བཞེས་ཏེ། ལོ་ཉི་ཤུ་རྩ་དགུར་ཁབ་ཏུ་བཞུགས། དེ་ནས་ཁྱིམ་ནས་བྱུང་ཞིང་རབ་བྱུང་གིས་བསྙེན་པར་རྫོགས་ནས། ལོ་དྲུག་ཏུ་དཀའ་བ་སྤྱད་པས་ཤིན་སྐུ་རིད་པར་གྱུར་པ་ལས། སླར་གྲོང་ཁྱེར་བདེ་ལྡན་གྱི་བུ་མོ་དགའ་མོ་དང་དགའ་སྟོབ་མས་བ་སྟོང་གི་མ་ལན་བཅུ་དྲུག་གི་བར་དུ་ཉིང་ཁུར་བྱས་པའི་འོ་ཐུག་སྦྲང་རྩི་དང་སྦྱར་བ་དྲངས་ཤིང་གསོལ་བས། སྐུ་གསེར་གྱི་གཏན་པ་ཕྱིས་པ་ལྟར་གྱུར་ཏོ། །དེ་ནས་ནཻ་རཉྫ་ན་དང་ཉེ་བའི་བྲག་ཞིག་གི་སྟེང་དུ་བཞུགས་པས་བྲག་དེས་མ་བཟོད་པར་ཞིག་པར་གྱུར་པས། ལྷས་རྡོ་རྗེ་གདན་དུ་གཤེགས་པར་བསྐུལ། བརྒྱ་བྱིན་གྱིས་རྩྭ་འཚོང་བཀྲ་ཤིས་སུ་སྤྲུལ་པ་ལས་རྩ་བླངས་ཏེ་བསྣམས་ནས། རྡོ་རྗེ་གདན་དུ་བྱང་ཆུབ་ཀྱི་ཤིང་དྲུང་དུ་རྩའི་སྟན་ལ་བཞུགས་སོ། །དེའི་ཚེ་བདུད་སྡིག་ཅན་གྱིས་དོགས་པའི་རྒྱལ་མཚན་གཡོས་པས་བསམས་པ་ན། བྱང་ཆུབ་སེམས་དཔའི་ཚུལ་ཤེས་ཏེ། བང་ཆེན་དུ་སྤྲུལ་ཏེ་བྱང་ཆུབ་སེམས་དཔའི་ཐད་དུ་འོང་ནས། སེར་སྐྱའི་གྲོང་ཁྱེར་ལྷ་སྦྱིན་གྱིས་མནན། ཕོ་བྲང་བཅོམ། ཤཱཀྱ་རྣམས་ཁ་བཏགས་སོ། ཁྱོད་ཅིའི་ཕྱིར་འདི་ན་འདུག་ཅེས་སྨྲས་པས། བྱང་ཆུབ་སེམས་དཔའ་ལ་འདོད་པ་དང་གནོད་སེམས་དང་རྣམ་པར་འཚེ་བའི་རྟོགས་པ་གསུམ་བྱུང་བ་དང༌། དེ་མ་ཐག་བདུད་ཀྱི་མཐུར་རིག་སྟེ། གཉེན་པོའི་ཐུགས་གསུམ་བསྐྱེད་དོ། །དེ་ནས་བདུད་ཀྱིས་བར་སྣང་དང་ས་གཞི་ནོན་པའི་དཔུངས་བཤམས་ཏེ། མཚོན་ཆ་སྣ་ཚོགས་ཀྱི་ཆར་ཕབ། འཇིགས་སུ་རུང་བའི་སྒྲ་མང་པོ་བསྒྲགས། བདུད་ཀྱི་བུ་མོ་ལས་བུད་མེད་མཛེས་མར་སྤྲུལ་ཏེ་བསླུས་པས་ཀྱང་མ་ཚུགས། དཔུང་ཐམས་ཅད་ཁོར་ཡུག་གི་ཕྱི་རོལ་ཏུ་བྱེར་ཏེ་ཞག་བཅུ་གཉིས་སུ་མ་འདུས་སོ། །དེ་ནས་ཐུན་དང་པོ་ལ་མངོན་ཤེས་དང་པོ་གསུམ་བསྐྱེད། གུང་ཐུན་ལ་སྔོན་གནས་རྗེས་སུ་དྲན་པ་བསྐྱེད། ཐུན་ཐ་མ་ལ་ལྷའི་མིག་དང་ཟག་པ་ཟད་པའི་མངོན་ཤེས་བསྐྱེད་དེ། བདེན་བཞི་ཐུགས་སུ་ཆུད་ནས་མངོན་པར་རྫོགས་པར་སངས་རྒྱས་སོ། །དེ་ཡང་མེ་མོ་ཕག་གི་ས་གའི་ཉ་ལ་སངས་རྒྱས་པ་ཡིན་ཏེ། ལུང་ལས། དེའི་མཚན་མོ་ཟླ་བ་སྒྲ་གཅན་གྱིས་བཟུང་བ་དང༌། སྒྲ་གཅན་ཟིན་དང་ཀུན་དགའ་བོ་ཡང་སྐྱེས་པར་བཤད་དོ། དེའི་གཟའ་འཛིན་གྱི་རི་མོ་ནི་གཞན་དུ་བཤད་དོ། །སངས་རྒྱས་ནས་ཞག་བདུན་ཕྲག་བདུན་ཆོས་མ་གསུངས་ལ། དེ་ནས་ཚངས་པས་བསྐུལ་ནས་བ་ར་ཎཱ་སིར་ལྔ་སྡེ་ལས་བརྩམས་ཏེ་ཆོས་ཀྱི་འཁོར་ལོ་བསྐོར་བས། ལྔ་སྡེས་དགྲ་བཅོམ་པ་ཐོབ་བོ། ལྷ་བརྒྱད་ཁྲིས་བདེན་པ་མཐོང༌། གྲགས་པ་ལ་སོགས་པའི་ཉེ་བའི་ལྔ་སྡེ་དང༌། གྲོང་པའི་ཁྱེའུ་ལྔ་བཅུས་ཀྱང་དགྲ་བཅོམ་པའི་འབྲས་བུ་ཐོབ་པར་མཛད། སླར་གྲོང་ཁྱེར་བདེ་ལྡན་དུ་གཤེགས་ཏེ་དགའ་མོ་དང་དགའ་སྟོབས་མ་བདེན་པ་ལ་བཀོད། དེ་ནས་ནཻ་རཱཉྫ་ནའི་འགྲམ་ན་གནས་པའི་ལྟེང་རྒྱས་འོད་སྲུངས་རལ་པ་ཅན་འཁོར་ལྔ་བརྒྱ་དང༌། ཆུ་ཀླུང་འོད་སྲུངས་དང་ག་ཡ་འོད་སྲུངས་གཉིས་འཁོར་ཉིས་བརྒྱ་ལྔ་བཅུ་ཉིས་བརྒྱ་ལྔ་བཅུ་དང་བཅས་པ་སྟེ། སྟོང་པོ་ཐམས་ཅད་རབ་ཏུ་བྱུང་སྟེ་རིམ་པར་གཤེགས་ཏེ། ཆོ་འཕྲུལ་གསུམ་གྱི་གདམས་པས་ཐམས་ཅད་ཀྱིས་དགྲ་བཅོམ་པ་ཐོབ་པར་གྱུར་ཏོ། དེ་ནས་མ་ག་དྷར་བཏང་བྲང་གི་ཚལ་དུ་གཤེགས་ཏེ། དེར་གཟུགས་ཅན་སྙིང་པོ་མི་འབུམ་ཕྲག་དུ་མ་དང་བཅས་པ་དང་ལྷ་བརྒྱད་ཁྲི་དང་བཅས་པ་བདེན་པ་ལ་བཀོད་དོ། དེ་ནས་རྒྱལ་པོའི་ཁབ་ཏུ་གཤེགས་ཏེ། ཤཱརིའི་བུ་དང་མོངྒལ་གྱི་བུ་འཁོར་ཉིས་བརྒྱ་ལྔ་བཅུ་དང་བཅས་པ་དགྲ་བཅོམ་པ་ལ་བཀོད་དེ། དེ་ནས་འོད་སྲུངས་ཀྱི་ཚོགས་དང་བཅས་པས་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཞེས་གྲགས་སོ། །དེ་ནས་མགོན་མེད་ཟས་སྦྱིན་གྱིས་སྤྱན་དྲངས་པས། རྒྱལ་པོའི་ཁབ་ནས་མཉན་ཡོད་དུ་གཤེགས་སོ། །དེའི་ཚེ་ཟས་གཙང་གིས་སེར་སྐྱར་སྤྱན་དྲངས་ནས། སེར་སྐྱའི་ནྱ་གྲོ་དྷའི་གཙུག་ལག་ཁང་བྱས་ཏེ། ལོར་བཞུགས། ཤཱཀྱ་མང་པོ་བདེན་པ་ལ་བཀོད་དོ། དེ་བཞིན་དུ་མཉན་ཡོད་པ་དང༌། ཡངས་པ་ཅན་དང༌། རྒྱལ་པོའི་ཁབ་དང༌། ཀཽ་ཤམྦྷི་དང༌། གནས་བཅས་དང༌། ཆུ་སྲིན་བྱིས་པ་གསོད་པ་ལ་སོགས་པར་བསྟན་པ་རྒྱས་པར་མཛད་ཅིང༌། སུམ་ཅུ་རྩ་གསུམ་གྱི་གནས་སུ་ཡུམ་གྱི་དོན་དུ་དབྱར་གནས་པ་དང༌། དེ་ནས་ཡུལ་ཀ་ཤིར་ལྷ་ལས་བབས་པ་ལ་སོགས་པ་མཛད་ཅིང༌། ཆོ་འཕྲུལ་ཆེན་པོས་མུ་སྟེགས་རྣམས་གདུལ་བ་ལ་སོགས་པ་མཛད་ཅིང༌། ཆོ་འཕྲུལ་ཆེན་པོས་མུ་སྟེགས་རྣམས་གདུལ་བ་ལ་སོགས་པ་མཛད་པ་རྒྱ་ཆེན་པོ་མཛད་ལ། དེ་དག་གི་སྔ་ཕྱིའི་རིམ་པ་ནི། འཕགས་པ་གནས་བརྟན་པ་རྣམས་ཀྱིས་སྟོན་པ་དབྱར་གནས་པའི་གོ་རིམ་རྣམ་པར་བཞག་པ་ལས་རྟོགས་པར་བྱ་སྟེ། འདུས་བྱས་དང་འདུས་མ་བྱས་རྣམ་པར་ངེས་པའི་ལེའུ་སུམ་ཅུ་རྩ་གསུམ་པ་ལས། བདག་ཅག་གི་སྟོན་པ་ཤཱཀྱ་ཐུབ་པ་ནི་ལོ་བརྒྱད་ཅུ་གནས་པའོ། །འདི་ལྟ་སྟེ་ལོ་ཉི་ཤུ་ཉེར་དགུ་ཁབ་ཏུ་བཞུགས་པ་དང༌། ལོ་དྲུག་ཏུ་དཀའ་སྤྱད་ལ་གནས་པ་དང༌། སངས་རྒྱས་པར་གྱུར་ནས་དབྱར་གནས་པ་དང་པོ་ཆོས་ཀྱི་འཁོར་ལོའི་གནས་སུ་མཛད་པ་དང༌། གཉིས་པ་བེ་ལུ་བ་ནེ་རུའོ། །ཡང་བེ་ལུ་བ་ནེར་ང་གསུམ་པའོ། ཡང་བཞི་པ་བེ་ལུ་བ་ནེ་རུའོ། །ལྔ་པ་བཻ་ཤཱལྱྃངོ༌། །དྲུག་པ་གོ་ལེར་རོ། །བདུན་པ་སུམ་ཅུ་རྩ་གསུམ་ལྷ་རུ་རྡོ་ཨ་རྨོ་ནིག་ཏུའོ། །བརྒྱད་པ་སུ་ཤུ་ར་མཱ་གི་རིར་འོ། །དགུ་པ་ཀཽ་ཤམྦྷི་རུའོ། །བཅུ་པ་སྤྲེའུ་བཏུལ་བ་ཞེས་བྱ་བ་གླང་པོ་ཆེ་བེ་རི་ལེ་ཡི་ནགས་སུའོ། །བཅུ་གཅིག་པ་རྒྱལ་པོའི་ཁབ་ཏུའོ། །བཅུ་གཉིས་པ་བཻ་རཉྫའི་གྲོང་དུའོ། །བཅུ་གསུམ་པ་མཆོད་རྟེན་གྱི་རི་ལའོ། །བཅུ་བཞི་རྒྱལ་པོ་ཛི་ཏ་བ་ནའི་ལྷ་ཁང་དུའོ། །བཅོ་ལྔ་པ་ཀ་པི་ལ་བསྟུ་ཤིང་ནྱ་གྲོ་དྷའི་ཀུན་དགའ་ར་བར་རོ། །བཅུ་དྲུག་པ་ཨ་ཊ་བ་གར་རོ། །བཅུ་བདུན་པ་རྒྱལ་པོའི་ཁབ་ཏུའོ། །བཅོ་བརྒྱད་པ་ཛྭ་ལི་ནིའི་བྲག་ཕུག་ཏུའོ། །ཡང་བཅུ་དགུ་པ་ཛྭ་ལི་ནིའི་བྲག་ཕུག་ཏུའོ། །ཉི་ཤུ་པ་རྒྱལ་པོའི་ཁབ་ཏུའོ། །དབྱར་གནས་བཞི་ནི། གཉན་ཡོད་ཤར་ཕྱོགས་མ་མོ་མྲྀ་ག་རིའི་ཀུན་དགའ་ར་བར་རོ། །གྲོང་ཁྱེར་མཉན་ཡོད་དུ་ལོ་ཉི་ཤུ་ཉེར་གཅིག་དབྱར་གནས་མཛད་དོ་ཞེས་འཕགས་པ་གནས་བརྟན་པ་འདོད་དོ། ཞེས་འབྱུང་ངོ༌། མཐར་གྱད་ཀྱི་ཡུལ་རྩྭ་མཆོག་གི་གནས་ཤིང་ས་ལ་ཟུང་གི་གནས་སུ་མྱ་ངན་ལས་འདའ་བར་མཛད་དེ། དེའི་ལོ་ནི་ཆུ་མོ་བྱའོ་ཞེས་ཁོ་བོ་འདོད་དོ། སྤྱིར་ན་སྟོན་པའི་འཁྲུངས་པ་དང་མྱ་ངན་ལས་འདས་པའི་ལོ་ལ། མཁས་པ་རྣམས་ལ་བཞེད་པ་མི་འདྲབ་མང་བར་གནས་སོ། སངས་རྒྱས་ཀྱི་མཛད་པའི་སྐབས་སོ། །