བཀའ་ཆེམས་ཀ་ཁོལ་མ།

ལེའུ་གསུམ་པ། སྤྲུལ་སྐུས་འདུལ་བ།
      དེ་ནས་དེའི་ཚེ་ནམ་མཁའ་ལ་སྒྲ་དང་རིན་པོ་ཆེའི་མཆོད་རྫས་དང་བཅས་ཏེ་བྱང་ཆུབ་སེམས་དཔའ་སྤྱན་རས་གཟིགས་བྱོན་ནས། བཅོམ་ལྡན་འདས་ཀྱི་མདུན་དྲང་བོར་འདུག་པ་དང༌། འཁོར་དེའི་བྱང་ཆུབ་སེམས་དཔའ་རྣམས་ཀྱི་བསམ་པ་ལ། ཁྱེད་ཀྱང་ངོ་མཚར་ཅན་ཞིག་འདུག་སྟེ། ས་ལ་གནས་པའི་བྱང་ཆུབ་སེམས་དཔའ་ངེད་ཀྱང་ཡིན་སྙམ་ནས་ཕྱག་མི་བྱེད་པ་ལ་སྤྱན་རས་གཟིགས་དགྱེས་པར་གྱུར་ཏོ། །དེ་ནས་སྤྱན་རས་གཟིགས་ཀྱིས་བཅོམ་ལྡན་འདས་ཤཱཀྱ་ཐུབ་པ་ལ་འདི་སྐད་ཅེས་གསོལ་བ། བཅོམ་ལྡན་འདས་ཁྱེད་ཀྱི་དགོངས་པ་ནི་ད་དུང་མ་རྫོགས་ཏེ། ཁ་བ་ཅན་གྱི་སེམས་ཅན་རྣམས་ལ་ཆོས་ཀྱི་འཁོར་ལོ་བསྐོར་རོ་ཞེས་གསོལ་བ་དང༌། བཅོམ་ལྡན་འདས་ཀྱིས་གསུངས་པ། ཁ་བ་ཅན་དུ་སྐྱེས་པའི་སེམས་ཅན་འདི་རྣམས་ནི་ཤིན་ཏུ་འདུལ་དཀའ་བ་སྟེ། ད་རུང་སྨིན་པར་བྱ་བར་མི་ནུས་པས་ཕྱི་མའི་དུས་ན་བྱང་ཆུབ་སེམས་དཔའ་ཁྱོད་ལྟ་བུས་སྨིན་པར་བྱེད་པར་འགྱུར་གྱིས་ཞེས་གསུངས་པ་དང༌། དེ་ནས་སྤྱན་རས་གཟིགས་ཀྱིས་ཤཱཀྱ་ཐུབ་པ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལགས། ནུབ་ཕྱོགས་བདེ་བ་ཅན་ན་དེ་བཞིན་གཤེགས་པ་འོད་དཔག་མེད་བཞུགས་པས། ཁྱེད་མྱ་ངན་ལས་འདའ་བར་མཁྱེན་ཅིང་གཟིགས་ནས། མྱ་ངན་ལས་མི་འདའ་བར་གསོལ་བ་འདེབས་སུ་བཏང་སྟེ། མྱ་ངན་ལས་མི་འདའ་བར་ཅི་གནང༌། བཅོམ་ལྡན་འདས་ཀྱིས་གསུངས་པ། ངའི་གདུལ་བྱ་ཀུན་ཏུ་རྒྱུ་རབ་བཟང་དང༌། དྲི་ཟ་རབ་དགའ་མ་གཏོགས་པའི་དོན་རྫོགས་པས། ད་ནི་ལེ་ལོ་ཅན་ཆོས་ལ་བསྐུལ་བ་དང༌། ཐམས་ཅད་མི་རྟག་པར་བསྐུལ་པའི་ཕྱིར་ང་མྱ་ངན་ལས་འདའ་བའི་ཚུལ་སྟོན་ཏོ། །སྤྱན་རས་གཟིགས་ཀྱིས་གསོལ་བ། འོ་ན་བྱང་ཕྱོགས་ཁ་བ་ཅན་མ་ཀི་རྣམས་ལ་ཁྱེད་ཀྱི་ཞབས་ཀྱིས་མ་བཅགས། གསུང་གི་འོད་ཟེར་གྱིས་ཀྱང་མ་ཁྱབ་པོ་ཅེས་གསོལ་བ་དང༌། བཅོམ་ལྡན་འདས་ཀྱིས་གསུངས་པ། ཁ་བ་ཅན་དུ་སྐྱེས་པའི་སེམས་ཅན་མ་ཀི་རྣམས་ནི་དེ་བཞིན་གཤེགས་པའི་གདུལ་བྱར་མ་གྱུར་པས། མཚན་མོ་མུན་པའི་སྨག་རུམ་དུ་གྱུར་པས་ངན་འགྲོ་ནས་ངན་འགྲོའི་མིའི་འཇིག་རྟེན་དུ་སྐྱེས་པ། ཤི་བ་ཐམས་ཅད་གཅིག་ཀྱང་ཡར་ལ་མི་ཟློག་པར་མཚོ་ལ་ཁ་བ་བབ་པ་བཞིན་དུ་ངན་སོང་དུ་འགྲོ་བ་ཡིན་པས། མ་འོངས་པ་ཁྱོད་ལྟ་བུའི་བྱང་ཆུབ་སེམས་དཔས་འདུལ་བར་འགྱུར་རོ་ཞེས་གསུངས་པ་དང༌། སྤྱན་རས་གཟིགས་འཛེ་ཏའི་ཚལ་ནས་མི་སྣང་བར་གྱུར་ཏེ། བདེ་བ་ཅན་དུ་བྱོན་ནས་དེ་བཞིན་གཤེགས་པ་འོད་དཔག་མེད་པ་ལ་ཤཱཀྱ་ཐུབ་ཀྱིས་གསུངས་པ་རྣམས་འདི་སྐད་ཅེས་བཤད་དོ། །ཤཱཀྱ་ཐུབ་པ་དེའི་ཞལ་ནས་ཁ་བ་ཅན་དུ་སྐྱེས་པའི་སེམས་ཅན་རྣམས་ངའི་གདུལ་བྱར་མ་གྱུར་ཏེ། མ་འོངས་པ་ན་ཁྱོད་ལྟ་བུས་འདུལ་བར་འགྱུར་རོ་ཞེས་གསུངས་པ་དེ་བཤད་པ་དང༌། བཅོམ་ལྡན་འདས་འོད་དཔག་ཏུ་མེད་པའི་ཞལ་ནས་གསུངས་པ། རིགས་ཀྱི་བུ་ཕྱི་མའི་དུས་སུ་ཁ་བ་ཅན་དུ་སྐྱེས་པའི་སེམས་ཅན་དེ་རྣམས་ནི་ཤིན་ཏུ་འདུལ་དཀའ་བ་ཡིན་པས་དེར་སྐྱེས་པའི་སེམས་ཅན་དེ་རྣམས་ཤི་མ་ཐག་ཏུ་ངན་སོང་དུ་འགྲོ་བ་དེའི་ཐད་ཀའི་འོག་ནས་མར་མནར་མེད་པའི་དམྱལ་བ་ཁང་བ་ལྕགས་ཀྱི་ཟ་མ་ཏོག་གི་ཁ་བཅད་པ་འདྲ་བ་ཞིག་ཡོད་དོ། །ཁྱོད་ཀྱི་སྤྲུལ་པས་དེ་ཤིག་ལ་དེ་ནས་དངོས་སུ་འདུལ་དུ་བཏུབ་ཙ་ན། དང་པོ་ཟང་ཟིང་གིས་བསྡུས་ལ། དེ་ནས་བར་དུ་ཆོས་ཀྱིས་རྒྱུད་སྨིན་པ་གྲོལ་བར་གྱིས་ལ། དེ་ནས་མཐའ་མར་བདེ་བ་ཅན་གྱི་ཞིང་ཁམས་སངས་རྒྱས་ཀྱི་ཞིང་འདིར་ངའི་དྲུང་དུ་ཁྲིད་ལ་ཤོག་ཅིག ངས་ཀྱང་འདུལ་བ་དང་སེམས་ཅན་ངན་སོང་ནས་འདོན་པའི་གྲོགས་བྱའོ་ཅེས་གསུང་ངོ༌། །དེ་ལ་སྤྱན་རས་གཟིགས་དེས་སླར་མཉན་ནས་སྤྱན་རས་གཟིགས་ཀྱིས་གསོལ་བ། བཅོམ་ལྡན་འདས་འོད་དཔག་མེད་ལགས། ཉིད་རང་གཉིས་ལ་ལས་འབྲེལ་ཆེར་བཞག་པའི་སེམས་ཅན་རྣམས་མཐར་བདེ་བ་ཅན་གྱི་ཞིང་ཁམས་འདིར། སངས་རྒྱས་འོད་དཔག་མེད་ཁྱེད་ཀྱི་ཞབས་དྲུང་དུ་ཁྲིད་ལ་འོང་གི་གསུངས་ནས། བྱང་ཆུབ་སེམས་དཔའ་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་དེས་མི་མཇེད་འཇིག་རྟེན་གྱི་ཁམས་འཛམ་བུ་གླིང་འདིར་བྱོན་ཏེ་འོངས་ནས། རྒྱ་གར་གྱི་གནས་མཆོག་རི་པོ་ཏ་ལར་བཞུགས་སོ། །དེ་ནས་བཅོམ་ལྡན་འདས་ཤཱཀྱ་ཐུབ་པས་ཐུགས་ཀ་ནས་འོད་ཟེར་སྣ་ཚོགས་ཕྱོགས་བཅུར་བཀྱེ་ནས། སླར་ཞལ་དུ་ནུབ་པར་མཛད་པ་དང༌། ཀུན་དགའ་བོས་དེ་ཇི་ལྟར་ལགས་ཞེས་ཞུས་པས། བཅོམ་ལྡན་འདས་ཀྱིས་བཀའ་སྩལ་བ། དེ་འཕགས་པ་བྱམས་པ་ལ་དྲིས་ཞེས་གསུངས་སོ། །བྱམས་པས་སྨྲས་པ། འོད་ཟེར་འདི་ནི་བཅོམ་ལྡན་འདས་མྱ་ངན་ལས་འདའ་བའི་ལྟས་ཡིན། ཞུ་བར་འོས་པ་རྣམས་ཞུ་བ་དང་འདྲི་བའི་དུས་ལ་བབ་པོ་གསུང་ངོ༌། །དེའི་དུས་ན་རྒྱལ་བ་ཤཱཀྱ་ཐུབ་པ་སྐུ་མྱ་ངན་ལས་འདའ་བར་ཐོས་ནས་འཁོར་ཕལ་པོ་ཆེ་རྣམས་ན་རེ། སྟོན་པ་སྐུ་སྟོད་ནས་ཆུ་འབབ། སྐུ་སྨད་ནས་མེ་འབར་བའི་རྫུ་འཕྲུལ་བསྟན་ནས་དགྲ་བཅོམ་པ་ལྔ་བརྒྱ་ཙམ་ཞིག་མྱ་ངན་ལས་འདས་སོ། །བྱང་ཆུབ་སེམས་དཔའ་ཕལ་ཆེར་འཇིག་རྟེན་གྱི་ཁམས་གཞན་དུ་སོང་ངོ༌། །དེའི་ཚེ་འཕགས་པ་འཇམ་དཔལ་དང་ཀུན་དགའ་བོ་གཉིས་འཁོར་དེའི་ནང་ན་འདུག་པས། བཅོམ་ལྡན་འདས་ལ་འདི་སྐད་ཅེས་ཞུས་སོ། །ད་ལྟ་དད་པ་ཅན་རྣམས་ཞལ་ཡང་ཁྱེད་ལ་ལྟ། འཁོར་གྱི་ཐེ་ཚོམ་ཡང་ཁྱེད་ཀྱིས་གཅོད། སྦྱིན་བདག་གི་ཡོན་ཡང་ཁྱེད་ཀྱི་སྦྱོང༌། དྲུག་སྡེ་ཡང་ཁྱེད་ཀྱིས་འདུལ། མུ་སྟེགས་ཟིལ་གྱིས་གནོན་པ་ཡང་ཁྱེད་ཀྱིས་མཛད་ན། བཅོམ་ལྡན་འདས་ཁྱེད་མྱ་ངན་ལས་འདས་ནས་དྲུག་སྡེ་སུས་འདུལ། འཁོར་གྱི་ཐེ་ཚོམ་སུས་གཅོད། སྦྱིན་བདག་གི་ཡོན་སུ་སྦྱོང༌། མུ་སྟེགས་ཟིལ་གྱིས་སུས་གནོན། ཀྱི་ཧུད་འཇིག་རྟེན་གྱི་སྟོན་པ་མི་བཞུགས་སོ་ཞེས་སྨྲས་པ་དང༌། བཅོམ་ལྡན་འདས་ཀྱིས་གསུངས་པ། ང་འདས་ནས་ཡུན་རིང་བོ་མ་ལོན་པ་ན། ངའི་ཉན་ཐོས་དྲན་པའི་གཟུངས་ཐོབ་པ་རྣམས་ཀྱིས་ངའི་གསུང་རབ་རྣམས་བསྡུད་པར་འགྱུར་བས། འཁོར་གྱི་ཐེ་ཚོམ་ཡང་ངའི་གསུང་རབ་དེས་ཆོད། དྲག་སྡེ་འཇིག་རྟེན་གྱི་ཁམས་གཞན་གྱི་སངས་རྒྱས་ཀྱི་སྤྲུལ་པ་ཡིན་པས་རང་དུལ་ལ་འགྲོ། སྦྱིན་བདག་གི་ཡོན་ཡང་ངའི་ཉན་ཐོས་དགེ་སློང་རྣམས་ཀྱིས་སྦྱོང་བར་འགྱུར་རོ། །མུ་སྟེགས་ཟིལ་གྱིས་གནོན་པ་དང༌། སངས་རྒྱས་ཀྱི་བསྟན་པ་ཡུན་རིང་དུ་གནས་པའི་ཕྱིར་ངའི་སྐུ་ཚབ་བཞེངས་ཤིག་ཅེས་བཀའ་སྩལ་ཏོ། །དེ་མ་ཐག་ཏུ་ལྷའི་དབང་པོ་བརྒྱ་བྱིན་སྟན་ལས་ལངས་ནས། སངས་རྒྱས་བཅོམ་ལྡན་འདས་ཤཱཀྱ་ཐུབ་པའི་སྐུ་ཚབ་རྣམ་པ་གསུམ་ལ། ཡོན་བདག་ལྷའི་དབང་པོ་བརྒྱ་བྱིན་ངས་བྱེད་པར་ཞུ་ཟེར། ལྷའི་བཟོ་བོ་བི་ཤོ་ཀརྨན་རེ་སྐུའི་བཟོ་བོ་ངས་བྱེད་པར་ཞུ་ཟེར། དཔལ་མགོན་བདུན་བཅུ་རྩ་གཉིས་ན་རེ་སྐུའི་རིམ་གྲོ་ངས་བྱེད་པར་ཞུ་ཟེར། དཔལ་ཕྱག་ན་རྡོ་རྗེ་ན་རེ་སྐུའི་གསང་བ་འཛིན་པ་ངས་བྱེད་པར་ཞུ་ཟེར་བ་དང༌། ཡང་བཅོམ་ལྡན་འདས་ཀྱི་ཞལ་ནས་འོད་ཟེར་གསུམ་སྤྲོས་ཏེ་འོད་ཟེར་གཅིག་ནི་འཕགས་པ་བྱམས་པ་ལ་ཕོག་པར་མཛད། འོད་ཟེར་གཉིས་པ་ནི་ལྷ་ཚངས་པ་ལ་ཕོག་པར་མཛད། འོད་ཟེར་གསུམ་པ་ནི་གཟའ་ར་ཧུ་ལར་ཕོག་པར་མཛད་དོ། །འོད་ཟེར་དེ་གསུམ་ཞག་དྲུག་ཏུ་བྱུང་བར་གྱུར་རོ། །བྱམས་པས་དེ་ཇི་ལྟར་ཡིན་ཞུས་པ་དང༌། བཅོམ་ལྡན་འདས་ཤཱཀྱ་ཐུབ་པས་བཀའ་སྩལ་བ། བྱམས་པ་ཁྱོད་ཀྱིས་ཇི་ལྟར་སྤོབས་པ་བཞིན་དུ་སྨྲོས་ཤིག་ཅེས་བཀའ་སྩལ་བ་དང༌། བྱམས་པ་སྨྲས་པ། དེ་བཞིན་གཤེགས་པ་ནི་དགོངས་པ་ཡོངས་སུ་མྱ་ངན་ལས་འདའ་བས་དེའི་སྐུ་ཚབ་བཞེངས་ཤིག་པར་ལུང་བསྟན་པ་ཡིན་ནོ་ཞེས་པ་དང༌། གཟའ་ར་ཧུ་ལ་ན་རེ། བྱམས་པ་ལ་སྤྲུལ་པའི་སྐུའི་རྟེན་བཞེངས་པར་བསྐོས། ལྷ་ཚངས་པ་ལ་ལོངས་སྤྱོད་རྫོགས་པའི་སྐུའི་རྟེན་བཞེངས་པར་བསྐོས། གཟའ་ར་ཧུ་ལ་ང་ལ་ཆོས་སྐུའི་རྟེན་བཞེངས་པར་བསྐོས་ཟེར་ནས་ར་ཧུ་ལ་མི་སྣང་བར་གྱུར་རོ། །སྐུའི་རྒྱུ་རིན་པོ་ཆེའི་དབང་གི་རྒྱལ་པོ་དང༌། ལྷའི་མན་ཤེལ་དང༌། གསེར་ལ་སོགས་པ་འཇིག་རྟེན་ན་ཡོད་ཚོད་མིའི་རིན་པོ་ཆེའི་ཕུང་པོ་དཔག་ཏུ་མེད་པ་ཁྱེར་ནས་ལྷའི་བཟོ་བོ་བི་ཤོ་ཀརྨའི་མདུན་དུ་སྤུངས་སོ། །ལྷའི་བཟོ་བོ་བི་ཤོ་ཀརྨས་དེ་རྣམས་བཞུ་བཏུལ་བྱས་ནས་ཆོས་སྐུ་ཕྱོགས་བཅུར་བསྟན་པའི་ཕྱིར་བུམ་པ་ཟླུམ་པོར་བྱས། དེ་ཇེ་ཆེ་ལ་རེད་ནས་ནམ་མཁའ་ལ་དེངས་ཏེ་ཆོས་སྐུ་ནམ་མཁའ་དང་འདྲ་བར་བསྟན། དེའི་སྙིང་པོ་ལྷ་ཚངས་པའི་འདོམ་གང་བ་མདོག་མཐིང་ནག་དཔལ་དུད་པ་ལྟ་བུའི་མཆོད་རྟེན་དེ་ལ་ཡོན་ཏན་ཅི་ཡོད་ན། དེ་ལ་བསྐོར་བ་ཞག་བདུན་གྱི་བར་དུ་མ་ཆད་པར་བྱས་ན་མཆོག་གི་དངོས་གྲུབ་སྟེར་ནུས་པ་ཞིག་འབྱུང༌། དེ་མཁའ་འགྲོ་མས་སྤྱན་དྲངས་ནས་ཨུ་རྒྱན་ཧེ་རུ་ཀའི་རྒྱལ་ཁམས་ན་མི་མ་ཡིན་རྣམས་ཚོགས་གསོག་པའི་ཕྱག་རྟེན་བྱེད་དེ་ད་ལྟ་ཡང་དཔལ་རེག་པ་མེད་པའི་མཆོད་རྟེན་ཞེས་གྲགས་སོ། །དེ་མ་ཐག་ཏུ་ལྷ་ཚངས་པ་མི་སྣང་བར་གྱུར་ཏེ། སྐུའི་རྒྱུ་རིན་པོ་ཆེ་ཟེ་མེ་རུ་དང༌། བཀོད་མཛེས་དང༌། ཆུ་ཤེལ་ཞུན་མ་དཔག་ཏུ་མེད་པ་ཁྱེར་ནས། ལྷའི་བཟོ་བོ་བི་ཤོ་ཀརྨའི་མདུན་དུ་སྤུངས་པ་དང༌། བི་ཤོ་ཀརྨས་དེ་རྣམས་བཞུ་བཏུལ་བྱས་ཏེ་ལོངས་སྤྱོད་རྫོགས་པའི་སྐུའི་རྟེན་དཔག་ཚད་བརྒྱད་ཅུ་བ་མདོག་སྔོ་སྐྱ། དེ་ལ་ཡོན་ཏན་ཅི་ཡོད་ན་མཆོད་པ་ཕུལ་ནས་གསོལ་བ་བཏབ་པས་འབྲས་ཀྱི་ཆར་བ་ཉིན་ལམ་བཅུ་གཉིས་སུ་ཕེབས་སོ། །དེ་ནི་རྒྱ་གར་གསེར་གླེང་དུ་འགྲོ་བའི་ལམ་ཁ་ན་མཚོའི་དཀྱིལ་ན་བཞུགས་ཏེ། འཇིག་རྟེན་གྱི་ལྷ་དྲེགས་པ་ཅན་ཚོགས་གསོག་པའི་རྟེན་དུ་བཞུགས་ཏེ་མཚན་ཡང་མུ་སྟེགས་འདུལ་བྱེད་ཅེས་བྱའོ། །དེ་ནས་དེ་མ་ཐག་ཏུ་འཕགས་པ་བྱམས་པ་མི་སྣང་བར་གྱུར་ཏེ། ལྷའི་རིན་པོ་ཆེ་ལྔ། ཨིནྡ྄ར་ནཱི་ལ། ཨིནྡ྄ར་གར་བ། ཐོན་ཀ མརྒད། པདྨ་ར་ག མིའི་རིན་པོ་ཆེ་བྱི་རུ། མུ་མེན། མུ་ཏིག ལྷའི་རིན་པོ་ཆེ་བས་ངན་པ། མིའི་རིན་པོ་ཆེ་བས་བཟང་བ་མཆིང་བུ་ལྔ་བཅུ་རྩ་ལྔ་སྤྱན་དྲངས་ནས་ལྷའི་བཟོ་བོ་བི་ཤོ་ཀརྨའི་མདུན་དུ་སྤུངས་པ་དང༌། གཟུགས་ཁམས་ཀྱི་ལྷ་རྣམས་ན་རེ། བཅོམ་ལྡན་འདས་ཀྱི་སྐུ་ཚད་མིའི་ཁྲུ་སུམ་ཅུ་སོ་དྲུག་ཡིན་ནོ་ཟེར་རོ། །འདོད་ཁམས་ཀྱི་ལྷ་རྣམས་ན་རེ་མིའི་ཁྲུ་བཅུ་དྲུག་ཡིན་ནོ་ཟེར། རྒྱལ་པོ་གསལ་རྒྱལ་ལ་སོགས་པའི་མི་རྣམས་ན་རེ། གཅུང་དགའ་བོ་དང་དབུའི་གཙུག་ཏོར་ལས་ཁྱད་མེད་པ་ཡིན་ཟེར་སངས་རྒྱས་ཀྱི་སྐུ་ཚད་ལ་མ་མཐུན་ནོ། །བཟོ་བོ་བི་ཤོ་ཀརྨ་ན་རེ། སངས་རྒྱས་ཀྱི་སྐུ་ལ་ཐིག་གུས་འཇལ་ཟེར་ནས་བཟོ་བོ་བི་ཤོས་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞལ་མངོན་སུམ་བཞུགས་པའི་ཞབས་ཀྱི་མཐེའུ་ཆུང་ལ་ནི་རིན་པོ་ཆེའི་ཐིག་གུ་བཏགས་ཏེ། སྐུའི་སྨད་ནས་དབུའི་གཙུག་ཏོར་ལ་འཇལ་བས་མ་སླེབས། ཡང་བཟོ་བོ་བི་ཤོས་རྫུ་འཕྲུལ་གྱིས་ཡར་ལ་ལན་བདུན་དུ་ཐེན་ཡང་མ་སླེབས་ནས། དེའི་ཐད་ཀ་ནས་འཇིག་རྟེན་གྱི་ཁམས་མདངས་དགའ་བ་ཅན་བྱ་བ་ན། སངས་རྒྱས་ཀྱི་ཞིང་ཁམས་ཞིག་འདུག་པས་བཟོ་བོ་བི་ཤོས་བྱང་ཆུབ་སེམས་དཔའ་དགའ་བས་སྦྱིན་བྱ་བ་ལ་དྲིས་པ། བྱང་ཆུབ་སེམས་དཔའི་ཞིང་ཁམས་ཅི་སྐད་བྱ་བ་ཡིན། འདིའི་སྟོན་པའི་མཚན་ཅི་སྐད་བྱ་བ་ཡིན་དྲིས་པ་དང༌། བྱང་ཆུབ་སེམས་དཔའ་དགའ་བས་སྦྱིན་གྱིས་སྨྲས་པ། ལྷའི་བཟོ་བོ་འདི་ནི་འཇིག་རྟེན་གྱི་ཁམས་མདངས་དགའ་བ་ཅན་ཞེས་བྱ་བ་ཡིན། སྟོན་པ་ནི་དེ་བཞིན་གཤེགས་པ་དགའ་བའི་དཔལ་ཞེས་བྱ་བ་ཡིན། ཡང་བཟོ་བོ་བི་ཤོས་དྲིས་པ་བཅོམ་ལྡན་འདས་འོག་གི་ཕྱོགས་ཀྱི་མི་མཇེད་འཇིག་རྟེན་གྱི་ཁམས་དང་ཐག་ཉེ་རིང་ཅི་ཙམ་ཡོད་དྲིས་པས། ཡང་སངས་རྒྱས་དགའ་བའི་དཔལ་གྱིས་བཀའ་སྩལ་བ། འཇིག་རྟེན་གྱི་ཁམས་འདི་དང༌། འོག་གི་མི་མཇེད་ཀྱི་བར་ན་ཐག་རིང་བ་ནི། འཇིག་རྟེན་ཁམས་འདིའི་རྡུལ་ཕྲ་རབ་དང་མཉམ་མོ། །ཁྱོད་འདིར་ཡོང་བ་ཡང་ཁྱོད་ཀྱི་སྟོན་པ་ཤཱཀྱ་ཐུབ་པའི་མཐུས། དེ་བཞིན་བཤེགས་པའི་སྐུ་ལ་ཚད་མེད་པར་བསྟན་པའི་ཕྱིར་ཁྱོད་འདིར་འོངས་པ་ཡིན་ནོ། །ཁྱོད་རང་གི་རྫུ་འཕྲུལ་གྱིས་འདིར་འོངས་ན་ཁྱོད་དམའ་མོ་ཞིག་ཏུ་ཚེའི་དུས་བྱེད་དོ། །ཁྱོད་ཀྱིས་འདིར་འོང་བར་མི་ནུས་སོ་གསུངས་སོ། །བཟོ་བོ་བི་ཤོས་ཞུས་པ། འོ་ན་ང་མི་མཇེད་ཀྱི་འཇིག་རྟེན་དུ་འགྲོ་བར་འདོད་པས་ཇི་ལྟར་བྱས་ཏེ་འགྲོ་ཞུས་པས། ཡང་སངས་རྒྱས་དགའ་པའི་དཔལ་གྱིས་གསུངས་པ། ཁྱོད་རང་གི་སྟོན་པའི་ཡོན་ཏན་ཡིད་ལ་དྲན་པར་གྱིས་དང་འགྲོ་བར་ནུས་ཀྱིས་ཞེས་གསུངས་པ་དང༌། ཡིད་ལ་དྲན་པར་བྱས་པ་ཙམ་གྱིས་སྐྱེས་བུའི་ལག་པ་བརྐྱངས་པ་ལས་བསྐུམས་པ་ཙམ་གྱིས་རང་གི་ཡུལ་དུ་གཏོལ་བར་གྱུར་ཏོ། །ཡང་སངས་རྒྱས་དགའ་བའི་དཔལ་གྱིས་བཀའ་སྩལ་བ། ལྷའི་བཟོ་བོ་ཁྱོད་བས་ཉན་ཐོས་ཆེན་པོ་དགྲ་བཅོམ་པ་རྫུ་འཕྲུལ་ཐོབ་པ་དང༌། བྱང་ཆུབ་སེམས་དཔའ་ས་བཅུ་ཐོབ་པ་རྣམས་ཀྱིས་ཀྱང་སངས་རྒྱས་ཀྱི་གཙུག་ཏོར་ལྟ་བར་མི་ནུས། སངས་རྒྱས་ཀྱི་གཙུག་ཏོར་ནི་སངས་རྒྱས་ཀྱི་རྫུ་འཕྲུལ་ཡིན། ཉན་ཐོས་དང་བྱང་ཆུབ་སེམས་དཔའི་རྫུ་འཕྲུལ་གྱིས་ཀྱང་དེ་བཞིན་གཤེགས་པའི་རྫུ་འཕྲུལ་ཟིལ་གྱིས་གནོན་པར་མི་ནུས། ཉན་ཐོས་ཆེན་པོ་རྣམས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་རྫུ་འཕྲུལ་གྱིས་ཀྱང་དེ་བཞིན་གཤེགས་པའི་རྫུ་འཕྲུལ་ཟིལ་གྱིས་གནོན་པར་མི་ནུས་སོ། །ཞེས་པ་ལ་སོགས་པ་འཕགས་པ་དཀོན་མཆོག་བརྩེགས་པ་ཆེན་པོའི་དབུ་དུམ་ནང་ན་སྐུའི་གསང་བ་བསམ་གྱིས་མི་ཁྱབ་པར་བསྟན་པའི་ལེའུའི་ནང་ནས་ཀྱང་གསུངས་སོ། །ཚུལ་དེ་ལྟ་བུ་ནི་བུམ་ཐང་སྐྱེར་ཆུའི་ལྷ་ཁང་གི་རྒྱུད་རིས་སུ་བྲིས་ནས་ཡོད་དོ།།