བཀའ་ཆེམས་ཀ་ཁོལ་མ།

ལེའུ་ལྔ་པ། རིགས་རྒྱུད་དང་རྒྱལ་པོའི་གདུང་རྒྱུད་ཀྱི་ལོ་རྒྱུས།
      དེ་ནས་ཡང་སྤྲེའུ་སྒོམ་གྱིས་བུ་ཚ་བོ་བཞི་བརྒྱ་བོ་དེ་ཚན་པ་བཞིར་གྱེས་ཏེ་འཐབས་པ་དང༌། མེས་པོ་སྤྲེའུ་སྒོམ་གྱིས་བར་མ་བྱས་ནས་ས་ཆ་བཞིར་བགོས་པ་ནི་དབུས་གཙང་རུ་བཞི་ཡིན་ནོ། །དབུས་གཙང་རི་བཞི་འདི་ལྟ་སྟེ། གཡུ་རུ་དང་དབུ་རུ་གཉིས། གཙང་གཡས་རུ་དང་གཡོན་རུ་སྟེ་བཞིའོ། །མིང་རུས་ཚན་པ་བཞིར་གྱེས་པ་ནི། ལྡོང་དང་སྟོང་གཉིས། སེ་དང་སྨུ་གཉིས་ཏེ་བཞིའོ། །ལྡོང་ལ་གཡུ་རུ་བྱིན། སྟོང་ནི་གཙང་གཡས་རུར་བསྐོས། སེ་ལ་གཙང་གཡོན་རུ་བྱིན། སྨུ་ནི་དབུ་རུར་བསྐོས་སོ། །སྐོས་ལུགས་གཞན་ནི་དུས་ཕྱིས་ཀྱི་རྒྱལ་པོ་རྣམས་ཀྱིས་མཛད་དོ་ཞེས་ལུང་བསྟན་ནོ། །ད་རུང་གར་མ་གཏོགས་ཀྱི་རུས་ངན་ཁེངས་པོ་བདུན་བྱ་བ་བྱུང་སྟེ་འདི་རྣམས་ཡིན་ནོ། །གར་ལོག་ཀྱུངས་སྐད་ཅན་དང་གཅིག་ཀེ་ལེ་མི་ཤ་ཅན་དང་གཉིས། སོག་པོ་སྤྲེ་སླག་ཅན་དང་གསུམ་དང༌། རྒྱལ་མོ་ཀྱི་ཁྱོ་ཅན་དང་བཞི། གློ་བུ་མིག་དམར་ཅན་དང་ལྔ། རྡོ་རུ་རྐང་སྔོན་ཅན་དང་དྲུག མོན་བུ་སྤྱི་འདུམ་ཅན་དང་བདུན་ནོ། །ད་རུང་ཕ་སྤྲེའུ་དང་མ་བྲག་སྲིན་མོ་གཉིས་ལ་བུ་ཚ་རིགས་བརྒྱུད་དུ་གྱུར་པ་དཔའ་བོ་མི་རྒོད་མི་གསུམ་བྱ་བ་བྱུང་བ་ལ། ལྟ་བ་མིག་རྣོ་དང༌། ཉན་པ་རྣ་གསང་དང༌། སྙོབ་པ་ལག་རིངས་དང་གསུམ་ཡིན་ཏེ་མ་སངས་འདི་རྣམས་ཡིན་ནོ། །ད་ནི་ཨ་མི་དེ་བའི་དྲུང་དུ། ཨཱརྱ་པ་ལོས་ཁ་བ་ཅན་གྱི་སེམས་ཅན་རྣམས་ཐ་མ་ཆོས་ཀྱིས་རྒྱུད་སྨིན་པ་དང་གྲོལ་བར་བྱེད་པའི་དམ་བཅས་པ་དེ་མི་ཉམས་པར་བྱ་བའི་ཕྱིར། བོད་ཡུལ་ཁ་བ་ཅན་གྱི་སེམས་ཅན་རྣམས་ནི་དུད་འགྲོའི་བུ་ཚ་དང་རིགས་བརྒྱུད་དུ་སོང་བས་ཤིན་ཏུ་ནས་ཀྱང་འདུལ་དཀའ་སྟེ། འདི་རྣམས་ཞི་བས་མི་ཐུལ་བས་དྲག་པོའི་ཆད་པ་དང་ཁྲིམས་ལ་བརྟེན་ཏེ་འདུལ་དགོས་པར་གཟིགས་ཏེ། དེ་ལ་དབང་ཆེ་ཞིང་རབ་ཏུ་ཆེ་བ་ཞིག་གིས་འདུལད་དགོས་པས་དབང་ཆེ་བ་ནི་རྒྱལ་པོ་ཡིན་པས། རྒྱལ་པོར་སྤྲུལ་ནས་འདུལ་བར་སེམས་སོ། །རྒྱལ་པོ་ནི་བསྐལ་པ་དང་པོའི་རྗེ་མང་པོས་བཀུར་བ་ནས་མགོ་བཙུགས་པ་དེ་ཡིན་ཏེ། དེ་ཅི་ལྟར་དུ་ཅི་ཙམ་ན་བྱུང་སྟེ་དེ་ནི་འདི་ལྟ་སྟེ། སྔོན་གྱི་བསྐལ་བའི་དང་པོ་ལ་བསྐལ་པ་མངོན་པར་དགའ་བ་ཞེས་བྱ་བའི་བསྐལ་པ་ཆེན་པོ་ཆགས་ནས་འདས། དེའི་ཕྱི་ལ་བསྐལ་པ་བཟང་ལྡན་ཞེས་བྱ་བའི་བསྐལ་པ་ཆེན་པོ་ཞིག་ཆགས་ནས་འདས། དེའི་ཕྱི་ལ་བསྐལ་པ་མཐོང་དགའ་ཞེས་བྱ་བའི་བསྐལ་པ་ཆེན་པོ་ཞིག་ཆགས་ནས་འདས། དེའི་ཕྱི་ལ་བསྐལ་པ་དགའ་བ་དང་ལྡན་པ་ཞེས་བྱ་བའི་བསྐལ་པ་ཆེན་པོ་ཞིག་འདས་ཏེ། དེའི་རྗེས་ལ་ཅི་ཡང་མི་སྣང་ཞིང་ཅི་ཡང་མི་སྲིད་པ་ལས་དང་པོ་ནི་སེམས་ཅན་སྤྱི་མཐུན་གྱི་ལས་དང་བསོད་ནམས་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཐུགས་རྗེ་དང་སྨོན་ལམ་གྱི་ནུས་མཐུ་ལ་བརྟེན་ནས། ད་ལྟར་གྱི་བསྐལ་པ་བཟང་པོ་འདི་བགས་ཀྱིས་འདི་ལྟར་ཆགས་ཏེ། ནམ་མཁའ་སྟོང་པ་ལ་རླུང་གི་དཀྱིལ་འཁོར་ཅིས་ཀྱང་མི་ཤིགས་པ་ཞིག་ཆགས་སོ། །དེའི་ཐད་ཀར་སྣ་ཚོགས་འདུས་པའི་སྤྲིན་ཆེན་པོ་ཞིག་ཆགས་ཏེ། ཆར་ཆེན་པོའི་རྒྱུན་གླང་བོ་ཆེའི་ཕོ་མཚན་ཙམ་བབ་ནས། དེ་ལ་ཆུའི་དཀྱིལ་འཁོར་སྔོ་དཀར་དུ་ཆགས་སོ། །དེ་ལ་རླུང་གིས་ཁྱོམས་པའི་ཁར་སྤྲིས་མའི་ཚུལ་དུ་སའི་དཀྱིལ་འཁོར་སེར་པོར་ཆགས། དེའི་སྟེང་དུ་རིན་པོ་ཆེའི་སྤྲིན་ཆགས་ཏེ། ཆར་གྱི་རྒྱུན་བབ་ནས་རིན་པོ་ཆེའི་མཚོ་རླུང་གིས་བསྲུབས་པ་ལས་དབུས་ཀྱི་རི་བོ་མཆོག་རབ། གསེར་གྱི་རི་བདུན་དང༌། རོལ་བའི་མཚོ་བདུན་དང༌། ལྕགས་རི་མུ་ཁྱུད། ཕྱིའི་རྒྱ་མཚོ་ཆེན་པོ་དང་བཅས་པ་ཆགས་སོ། །གླིང་བཞི་གླིང་ཕྲན་དང་བཅས་པ་ཡང་ཆགས་སོ། །དུས་དེ་ཙ་ན་བེམ་པོའི་རྒྱལ་པོ་ཆེན་པོ་བཞི་བྱུང་སྟེ། རིའི་རྒྱལ་པོ་མཆོག་རབ། རྡོའི་རྒྱལ་པོ་ཨར་མོ་ལེ་ཀ ཤིང་གི་རྒྱལ་པོ་ཤིང་ཆེན་ས་རྟོལ། མཚོའི་རྒྱལ་པོ་མཚོ་ཆེན་མ་དྲོས་པ་དང་བཞི་ཡིན་ནོ། །དེ་ནས་རིག་པ་ཅན་གྱི་རྒྱལ་པོ་བཞི་བྱུང་སྟེ། འདབ་ཆགས་མཁའ་ལྡིང་གི་རྒྱལ་པོ་བྱ་ཁྱུང་དང༌། གཅན་ཟན་གྱི་རྒྱལ་པོ་ཆེན་པོ་སེང་གེ་དང༌། བྱོལ་སོང་རྐང་འགྲོས་ཀྱི་རྒྱལ་པོ་ཆེན་པོ་གླང་བོ་ཆེ་དང༌། མཆོག་གྲུབ་མིའི་རྒྱལ་པོ་ཆེན་པོ་རྗེ་མང་པོས་བཀུར་བ་དང་བཞི་ཡིན་ནོ། །མིའི་རྒྱལ་པོ་ལ་ཡང༌། གདུང་བརྒྱུད་ཀྱི་རྒྱལ་པོ་དང༌། བསྐོས་པའི་རྒྱལ་པོ་དང༌། ཆོས་ཀྱི་རྒྱལ་པོ་དང༌། གློ་བུར་གྱི་རྒྱལ་པོ་བཞི་ཡིན་ནོ། །དེ་ལ་གདུང་བརྒྱུད་ཀྱི་རྒྱལ་པོ་དང་ཆོས་ཀྱི་རྒྱལ་པོ་ནི་གདུང་བརྒྱུད་གཅིག་གོ །དེ་ནི་དང་པོ་འོད་གསལ་གྱི་ལྷའི་བུ་ཤེད་ཅན་དང་ཤེད་ལ་གྲོགས་གཉིས་ལྷའི་ཚེ་དང་བསོད་ནམས་ཟད་པ་ལ་བརྟེན་ནས་ཡར་མར་རིམ་གྱིས་འཆུགས་ཏེ། འཛམ་བུ་གླིང་དུ་ལྷུང་ནས་དེ་གཉིས་པོའི་བཅུད་མེ་ཏོག་གི་ལྡུམ་བུ་འདྲ་བ་གཉིས་ལ་རྫུས་སྐྱེས་སུ་བྱུང་སྟེ། འདྲ་བ་ལྷ་འདྲ་སྟེ་སྐྱེས་པ་མིའི་ལུས་སུ་སྐྱེས་པ་ཡིན་ནོ། །དེའི་ཟས་བཞི་ཡང་དང་རིམ་པ་བཞིན་མི་ཐོག་གཉིས་དང་གསུམ་དང་བཞི་དང་ལྔ་ལ་ཟས་མི་གཅིག་པ་རེ་རེ་བྱུང་བ་ཡིན་ནོ། །དེའི་དུས་སུ་ཚེ་ལོ་ཡང་དཔག་ཏུ་མེད་བརྗོད་དུ་མེད་པ་ཐུབ་པ་ཡིན་ནོ། །ཕོ་མོའི་མཚན་མ་ཡང་མེད། ལུས་ཀྱི་ཆགས་པ་སྤྱོད་པ་ཡང་མེད་པས་གཅིག་གིས་གཅིག་ལ་མིག་གི་བལྟས་པས་ལུས་གྲུབ་སྟེ་སྐྱེ་བ་ཡིན། ལས་བྱེད་པ་ཡང་མེད། ཟས་ནི་སའི་བཅུད་གང་སྐྱེས་པ་དེ་ཟ་བ་ཡིན། མི་ནི་ཡང་མཚན་ཅན་རེ་རེ་མིན་པ་མིང་མེད་ཅིང་མི་ནི་མང་དུ་བྱུང་སྟེ་མིའི་མིང་སེམས་ཅན་ཟེར་བ་ཡིན་ནོ། །དེ་འོད་གསལ་གྱི་ལྷའི་བུ་ཤེད་ཅན་གྱིས་ཤེད་ལ་གྲགས་ཀྱི་ལུས་ལ་མིག་གིས་བལྟས་པས་ལུས་གྲུབ་སྟེ་བུ་ནི་ལྷ་ཆེན་ཤེད་བུ་བྱ་བ་བྱུང་ངོ༌། །ཟས་ནི་སའི་བཅུད་མར་དཀར་འདྲ་བ་ཟ་བ། འོད་ནི་རང་རང་ལ་ཡོད་པ་དེ་དེ་ནི་བསྐལ་པ་ཕྲན་བུ་ཞིག་གནས་སོ། །འོད་ཕྲན་བུ་དེ་ཟད་རང་རང་གི་འོད་དེ་ནུབ་ནས་མུན་པའི་བསྐལ་པ་གཅིག་བྱུང་ངོ༌། །ཤེད་བུའི་རྒྱུད་ལ་སྟོངས་པར་བུ་ནི་ལྷ་ཆེན་དུང་བྱམས་བྱ་བ་བྱུང༌། དེའི་བུ་ལྷ་ཆེན་རུ་བྷེ་བྱམས་བྱ་བ་བྱུང༌། དེའི་བུ་ལྷ་ཆེན་འཁོར་བ་དུང་སྐྱོང་བྱ་བ་བྱུང་ངོ༌། །དེ་གསུམ་གྱི་མི་ཐོག་ལ་ཟས་ནི་སའི་བཅུད་དོང་ཀའི་མེ་ཏོག་འདྲ་བ་ཟ། འོད་ནི་རང་རང་ལ་བྱུང་སྟེ་མུན་པའི་བསྐལ་པ་སངས་སོ། །དེ་ཡང་བསྐལ་པ་ཕྲན་བུ་ཞིག་གནས་སོ། །ཕྲན་བུ་དེ་ཟད་རང་རང་གི་འོད་དེ་ནུབ་ནས་མུན་པའི་བསྐལ་པ་ཞིག་བྱུང་ངོ༌། །ལྷ་ཆེན་འཁོར་བ་དུང་སྐྱོང་གི་རྒྱུད་མ་སྟོངས་པར་བུ་ནི་ལྷ་ཆེན་ཉེ་བའི་བཀྲ་ཤིས་བྱ་བ་བྱུང༌། དེའི་བུ་ལྷ་ཆེན་བཀྲ་ཤིས་འོད་དཔལ་བྱ་བ་བྱུང༌། དེའི་བུ་ལྷ་ཆེན་གཟི་ལྡན་བྱ་བ་བྱུང༌། དེའི་བུ་ལྷ་ཆེན་རྒྱལ་བ་བྱ་བ་བྱུང༌། དེའི་བུ་ལྷ་ཆེན་བདེ་ལྡན་རྒྱལ་བ་བྱ་བ་བྱུང་ངོ༌། །ཟས་ནི་སའི་བཅུད་ཤ་མོ་འདྲ་བ་ཟ། རང་ལ་འོད་རེ་བྱུང་བས་མུན་པའི་བསྐལ་པ་དེ་སངས་སོ། །དུས་དེ་ཙ་ན་གཅིག་གིས་གཅིག་ལ་ལག་པ་བཅངས་པས་ལུས་ཆགས་ཏེ་སྐྱེས་པ་ཡིན། དེ་ཡང་བསྐལ་པ་ཕྲན་བུ་ཞིག་གནས་སོ། །བསྐལ་པ་ཕྲན་བུ་དེ་ཟད་རང་གི་འོད་དེ་ནུབ་ནས་ཡང་མུན་པའི་བསྐལ་པ་ཞིག་བྱུང་ངོ༌། །ལྷ་ཆེན་བདེ་ལྡན་གྱི་རྒྱུད་མ་བོར་བར་དེའི་བུ་ནི་ལྷ་ཆེན་སྣང་བ་མུན་སེལ་འཛིན་ཞེས་བྱ་བ་བྱུང་ངོ༌། །ལྷ་ཆེན་སྣང་བ་མུན་སེལ་འཛིན་གྱི་དུས་སུ་ཉི་མ་དང་ཟླ་བ་ཡང་བྱུང་ངོ༌། །ཉི་ཟླའི་ནུས་པ་ལ་བརྟེན་ནས་འབྲས་ས་ལུའི་ལྗང་བ་ནང་བར་བརྔས་ཀྱང་ནུབ་མོ་སྐྱེ་བ། ནུབ་མོ་བརྔས་ཀྱང་ནང་བར་སྐྱེ་བ་སྙེ་མ་མདངས་དང་ལྡན་ཞིང་རོ་མཆོག་བརྒྱ་དང་ལྡན་པ། ནུས་པ་སྟོང་དང་ལྡན་པ་ཞིག་བྱུང་ངོ༌། །དེ་ལ་མི་རྣམས་ཀྱིས་ཟས་དེ་ཟོས་ཟོས་པས་ཟས་དེའི་ནུབ་པ་ལ་བརྟེན་ནས་ཕོ་མཚན་དང་མོ་མཚན་ཡང་བྱུང་ངོ༌། །དེ་ནས་མི་ལ་ལ་ཞིག་གིས་ནང་བར་གྱི་སྐལ་བ་དོ་ནུབ་དགོང་མོ་ནས་བརྔས་པས་རྗེས་ཆེན་པོ་བྱུང་སྟེ་སུས་ཐོབ་བྱས་པས། ང་བདག་བྱུང་ནས་སྒོག་ངན་པ་དང་ཆུང་བ་རྣམས་ལ་ཟས་ཀྱིས་སྐལ་བ་ཆད་དོ། །དེ་ནས་ལྷ་ཆེན་བདེ་ལྡན་རྒྱལ་བའི་བུ་ལྷ་ཆེན་སྣང་བ་མུན་སེལ་འཛིན་ཅེས་བྱ་བ་ལྷའི་བུ་གཟུགས་དང་བསམ་པ་བཟང་བ་དེས་བདག་པོ་བྱས་ནས་མི་གཞན་མ་རྣམས་ལ་བྱམས་སྡང་མེད་པར་བགོས་པས། ལྷ་ཆེན་སྣང་བ་མུན་སེལ་འཛིན་བྱ་བ་ལ་ཟས་དེའི་སྐལ་བ་ཆད་པས། མི་གཞན་པ་རྣམས་ཀྱིས་འབྲས་ས་ལུ་ཐོ་རྩེ་རེ་བསྡུས་ནས་ཁོང་ལ་ཕུལ་བས་ཁོང་ཤིན་ཏུ་རབ་ཏུ་རྒྱས་བ། ཐོ་རྩེ་བསྡུས་པའི་རྒྱལ་པོ་ཞེས་ཀྱང་བྱ། མིའི་སྐྱེ་བོ་མང་པོས་འབྲས་ས་ལུའི་བསྙེན་བཀུར་མང་པོ་བྱས་ཏེ་རྒྱལ་པོར་མངའ་གསོལ་བས་རྗེ་མང་པོས་བཀུར་བའི་རྒྱལ་པོ་ཞེས་ཀྱང་བྱའོ། །དེ་ནས་མི་རྣམས་ཀྱིས་གཅིག་ལ་གཅིག་འཁྱུད་ནས་ཕོ་མོའི་མཚན་མ་གཉིས་བུ་གའི་སྒོ་སྦྱར་བས་དུས་དེ་ནས་སྐྱེས་པ་དང་བུད་མེད་ཀྱི་འཁྲི་བ་ཡང་བྱུང༌། ངོ་ཚའི་ཁང་བ་ཡང་དུས་དེ་ནས་བྱུང༌། ཉི་ཟླ་ཡང་དུས་དེ་ནས་བྱུང་ངོ༌། །དེ་གོང་ཡན་ཆད་ལ་ཉི་ཟླ་མེད། སྐྱེས་པ་དང་བུད་མེད་ཀྱི་འཁྲི་བ་མེད་དོ།།
      མིའི་རྒྱལ་པོ་རྗེ་མང་པོས་བཀུར་བ་ཉིད་ནས་ཉི་ཟླ་ཡང་བྱུང༌། སྐྱེས་པ་དང་བུད་མེད་ཀྱི་འཁྲི་བ་བྱུང་ངོ༌། །རྒྱལ་པོ་ལ་སྔ་མ་རྗེ་མང་པོས་བཀུར་བ་ཡིན་ནོ། །དེའི་བུ་ནི་འོད་མཛེས། དེའི་བུ་དགེ་བ། དེའི་བུ་དགེ་མཆོག དེའི་བུ་ཏ་ལའི་རྐང༌། རྒྱལ་པོ་གསོ་སྦྱོང་འཕགས་ཞེས་ཀྱང་བྱའོ། །གསོ་སྦྱོང་འཕགས་ཀྱི་སྤྱི་བོར་བུ་ཞིག་སྐྱེས་པས་རྒྱལ་བོ་སྤྱི་བོ་སྐྱེས་ཡིན་ནོ། །རྒྱལ་པོ་གྲགས་པ་མཐའ་ཡས་ཞེས་ཀྱང་བྱའོ། །རྗེ་མང་པོས་བཀུར་བ་དང་གདུང་རྒྱུད་གཅིག་གོ །དེའི་བུ་འོད་མཛེས་དང་གཉིས། དེའི་བུ་དགེ་བ་དང་གསུམ། དེའི་བུ་དགེ་མཆོག་དང་བཞི། དེའི་བུ་གསོ་སྦྱོང་འཕགས་པ་ལྔ། དེའི་བུ་སྤྱི་བོ་སྐྱེས་དང་དྲུག་ཡིན་པས་བསྐལ་པ་དང་པོའི་རྒྱལ་པོ་སྡེ་དྲུག་ཞེས་ཀྱང་བྱའོ། །རྒྱལ་པོ་སྤྱི་བོ་སྐྱེས་ཀྱི་བུ་མཛེས་པ། དེའི་བུ་ཉེ་མཛེས། དེའི་བུ་འོད་མཛེས་ལྡན། དེའི་བུ་བཟང་པོ། དེའི་བུ་ཀུན་ནས་འོད་ཟེར་ནས་རྒྱུད་པ་བརྒྱད་ཁྲི་བཞི་སྟོང་ནི་ཡུལ་གྲུ་འཛིན་དུ་བྱུང་ངོ༌། །དེའི་བུ་ཐ་ཆུང་དགྲ་འདུལ། དེའི་བུ་ཚ་བོ་ལྔ་ཁྲི་བཞི་སྟོང་ནི་ཡུལ་དམག་གིས་མི་ཚུགས་པར་བྱུང་ངོ༌། །དེའི་བུ་ཐ་ཆུང་དམག་ལས་རྒྱལ་བ། དེའི་བུ་ཚ་ཡང་ཚའི་རྒྱུད་སུམ་ཁྲི་དྲུག་སྟོང་ནི་ཡུལ་དང་གྲོང་ཁྱེར་བ་ར་ཎཱ་སིར་བྱུང་ངོ༌། །དེའི་ཐ་ཆུང་བཟོད་པ་དཀའ་ཐུབ་ཀྱི་རྒྱུད་བརྒྱད་ཁྲི་བཞི་སྟོང་ནི་ཀི་མ་པ་ལའི་གྲོང་ཁྱེར་དུ་བྱུང་ངོ༌། །དེའི་བུ་ཚ་ཐ་ཆུང་གླང་པོས་བྱིན་གྱི་རྒྱུད་སུམ་ཁྲི་ལྔ་སྟོང་ནི་གྲོང་ཁྱེར་རྡོ་འཇོག་ཏུ་བྱུང་ངོ༌། །དེའི་བུ་ཚ་ཐ་ཆུང་བ་ལ་བུ་ཅན་གྱི་རྒྱུད་སུམ་ཁྲི་ཉིས་སྟོང་ནི་གྲོང་ཁྱེར་ཉི་ཅན་དུ་བྱུང་ངོ༌། །དེའི་བུ་ཚ་ཐ་ཆུང་ཚ་ཆེན་གྱིས་འདུལ་བའི་རྒྱུད་སུམ་ཁྲི་ལྔ་དང་ཉིས་སྟོང་ཡང་གྲོང་ཁྱེར་དམག་ལས་རྒྱལ་བར་བྱུང་ངོ༌། །དེའི་བུ་ཚ་ཐ་ཆུང་རྒྱལ་སྦྱིན་གྱི་རྒྱུད་སུམ་ཁྲི་ལྔ་དང་ཉིས་སྟོང་ཡང་གྲོང་ཁྱེར་ཀ་བྱ་ཀར་བྱུང་ངོ༌། །དེའི་བུ་ཚ་ཐ་ཆུང་རྒྱལ་པོ་ལྡེའི་གདུང་རྒྱུད་སུམ་ཁྲི་ཉིས་སྟོང་ནི་གྲོང་ཁྱེར་ཙམ་པ་ལར་བྱུང་ངོ༌། །དེའི་བུ་ཚ་ཐ་ཆུང་ཀླུའི་ལྷ་ཞེས་བྱའོ། །དེའི་བུ་ཚ་ཡང་ཚའི་རྒྱུད་ཉིས་ཁྲི་ལྔ་སྟོང་ནི་གྲོང་ཁྱེར་ཏ་ལའི་ཕྲེང་བར་བྱུང་ངོ༌། །དེའི་བུ་ཚ་ཐ་ཆུང་ནི་མིའི་ལྷ་ཞེས་བྱའོ། །དེའི་བུ་ཚ་ཡང་ཚའི་རྒྱུད་ཉིས་སྟོང་ནི་གྲོང་ཁྱེར་ཏ་མ་ལིར་བྱུང་ངོ༌། །དེའི་བུ་ཚ་ཐ་ཆུང་ནི་རྒྱ་མཚོའི་ལྷ་ཞེས་བྱའོ། །དེའི་བུ་ཚ་ཡང་ཚའི་རྒྱུད་ཁྲི་བརྒྱད་སྟོང་ནི་ཡུལ་བ་ར་ཎཱ་སིའི་གྲོང་ཁྱེར་དུ་བྱུང་ངོ༌། །དེའི་བུ་ཚ་ཐ་ཆུང་ནི་བློ་གྲོས་བཟང་པོ་ཞེས་བྱའོ། །དེའི་བུ་ཚ་ཡང་ཚའི་རྒྱུད་ཉིས་ཁྲི་ལྔ་སྟོང་ནི་གྲོང་ཁྱེར་རྒྱལ་པོའི་ཁབ་ཏུ་བྱུང་ངོ༌། །དེའི་བུ་ཚ་ཐ་ཆུང་ནི་རྒྱལ་བོ་མུན་སེལ་ཞེས་བྱའོ། །དེའི་བུ་ཚ་ཡང་ཚའི་རྒྱུད་བརྒྱ་ཐམ་པ་ནི་ཡུལ་བ་ར་ཎཱ་སའི་གྲོང་ཁྱེར་དུ་བྱུང་ངོ༌། །དེའི་བུ་ཚ་ཐ་ཆུང་ནི་དབང་ཕྱུག་ཆེན་པོའི་སྡེ་ཞེས་བྱའོ། །དེའི་བུ་ཚ་ཡང་ཚའི་རྒྱུད་བརྒྱད་ཁྲི་བཞི་སྟོང་ནི་གྲོང་ཁྱེར་རྩ་ཅན་དུ་བྱུང་ངོ༌། །དེའི་བུ་ཚ་ཐ་ཆུང་ནི་རྒྱ་མཚོའི་སྡེ་ཞེས་བྱའོ། །དེའི་བུ་ཚ་ཡང་ཚའི་རྒྱུད་སྟོང་ཐམ་པ་ནི་ཡུལ་གྲུ་འཛིན་གྱི་གྲོང་ཁྱེར་དུ་བྱུང་ངོ༌། །དེའི་བུ་ཚ་ཐ་ཆུང་ནི་དཀའ་ཐུབ་ཅན་ཞེས་བྱའོ། །དེའི་བུ་ཚ་ཡང་ཚའི་རྒྱུད་བརྒྱད་ཁྲི་བཞི་སྟོང་ཡང་གྲོང་ཁྱེར་རྩ་ཅན་དུ་བྱུང་ངོ༌། །དེའི་བུ་ཚ་ཐ་ཆུང་ནི་སའི་གདོང་ཞེས་བྱ་བ་བྱུང་སྟེ། དེའི་བུ་ཚ་ཡང་ཚའི་རྒྱུད་འབུམ་ཐམ་པ་ཡང་ཡུལ་བ་ར་ཎཱ་སའི་གྲོང་ཁྱེར་དུ་བྱུང་ངོ༌། །དེའི་བུ་ཚ་ཐ་ཆུང་ནི་སའི་བདག་པོ་ཞེས་བྱ་བ་སྟེ། དེའི་བུ་ཚ་ཡང་ཚའི་རྒྱུད་འབུམ་ཐམ་པ་ཡང་ཡུལ་དམག་གིས་མི་ཚུགས་པའི་གྲོང་ཁྱེར་དུ་བྱུང་ངོ༌། །དེའི་བུ་ཚ་ཡང་ཚའི་རྒྱུད་བརྒྱད་ཁྲི་བཞི་སྟོང་ནི་གྲོང་ཁྱེར་མི་ལིར་བྱུང་ངོ༌། །དེའི་བུ་ཚ་ཐ་ཆུང་ནི་རྒྱལ་པོ་ལྷ་ཆེན་པོ་ཞེས་བྱ་སྟེ། དེའི་བུ་ཚ་ཡང་ཚའི་རྒྱུད་བརྒྱད་ཁྲི་བཞི་སྟོང་ནི་གྲོང་ཁྱེར་མི་ལར་ཚངས་པར་སྤྱད་པ་སྤྱོད་དོ། །དེའི་བུ་ཚ་ཐ་ཆུང་ནི་རྒྱལ་པོ་མུ་ཁྱུད་ཅེས་བྱ་སྟེ། དེའི་བུ་ཚ་ཡང་ཚའི་རྒྱུད་བཞི་ཁྲི་དྲུག་བརྒྱ་ནི་གྲོང་ཁྱེར་སྣང་འོད་ཅན་དུ་བྱུང་ངོ༌། །དེའི་བུ་ཚ་ཐ་ཆུང་ནི་ཤིང་རྟ་བསྲ་བའོ། །དེའི་བུ་ཚ་ཡང་ཚོའི་རྒྱུད་བདུན་ཁྲི་བདུན་སྟོང་ནི་གྲོང་ཁྱེར་ཀུན་ཏུ་སྣང་བར་བྱུང་སྟེ། དེའི་བུ་ཚ་ཐ་ཆུང་ནི་རྒྱལ་པོ་ཀྲི་ཀྲི་ཞེས་བྱའོ། །དེ་ནི་སངས་རྒྱས་འོད་སྲུངས་དང་དུས་མཚུངས་སོ། །རྒྱལ་པོ་ཀྲི་ཀྲིའི་སྲས་ནི་རྒྱལ་པོ་ལེགས་སྐྱེས་ཡིན་ནོ། །རྒྱལ་པོ་ལེགས་སྐྱེས་དེའི་བ་ཚ་ཡང་ཚོའི་རྒྱུད་བརྒྱ་ཐམ་པ་ནི་གྲུ་འཛིན་གྱི་གྲོང་ཁྱེར་དུ་བྱུང་ངོ༌། །དེའི་བུ་ཚ་ཐ་ཆུང་ནི་ཉི་འོད་ཀྱི་རྒྱལ་པོ་རྣ་བ་ཅན་ཞེས་བྱའོ། །དེའི་སྲས་ནི་གཉིས་ཏེ་བ་ར་དྷྭ་ཙ་དང་གོའུ་ཏ་མ་ཞེས་བྱའོ། །གོའུ་ཏ་མས་ནི་སངས་རྒྱས་དྲང་སྲོང་མདོག་ནག་གི་དྲུང་དུ་བཙུན་པ་བྱས་ནས་རབ་ཏུ་བྱུང་ངོ༌། །སངས་རྒྱས་དྲང་སྲོང་མདོག་ནག་དང་རྒྱལ་བུ་གོའུ་ཏ་མ་ནི་ཆུའི་འཚོ་བས་དཀའ་ཐུབ་ནུས་ཏེ། རྒྱལ་བུ་བ་ར་དྷྭ་ཙ་ནི་ཆུའི་འཚོ་བས་དཀའ་ཐུབ་མ་ནུས་ནས་བཙུན་མོ་བླངས་ནས་རྒྱལ་སྲིད་བཟུང་ངོ༌། །གོའུ་ཏ་མས་ནི་མཁན་པོ་དྲང་སྲོང་མདོག་ནག་ལ་ཞུས་ཏེ་གྲོང་ཁྱེར་གྲུ་འཛིན་དང་སྐྱེར་ཏེའི་གྲོང་ཁྱེར་གྱི་བར་དུ་རྩྭ་འི་སྤྱིལ་པོ་བྱས་ནས་བསྒོམ་ཡིན་ཡོད་པའི་དུས་ན། གྲོང་ཁྱེར་གྲུ་འཛིན་ན་སྨད་ཚོང་མ་འགྲོ་བཟང་བྱ་བ་ཡོད་པས། སྐྱེར་ཏའི་གྲོང་ན་སྐྱེས་བུ་གཡོན་ཅན་པདྨའི་རྩ་ལག་བྱ་བ་ཡོད་པས་ཁོས་སྨད་ཚོང་མ་ལ་གོས་དང་རྒྱན་སྟེར་རོ་ངའི་ཕག་ཏུ་ཤོག་ཅིག་བྱས་པས་མོས་ཁས་བླངས་སོ། །ཁས་བླངས་པ་དེ་ཆད་མ་བཙན་ནས་དེའི་བར་དུ་ཚོང་བ་ཨ་རི་ལིས་ཀར་ཤ་བ་ནི་ལྔ་བརྒྱ་བྱིན་ནས་སྨད་ཚོང་མ་འགྲོ་བཟང་ངའི་ཕག་ཏུ་ཤོག་ཅིག་བྱས་པས་སྔོན་ལ་ཚོང་བ་ཨ་ཀི་ལིའི་ཕག་ཏུ་ཕྱིན་ཏེ་དགའ་མགུར་སྤྱོད་ཀྱིན་ཡོད་ཙ་ན། འགྲོ་བཟང་གི་བུ་མོ་གྲོགས་སྤྱོད་བཟང་པོས་ཚོང་བ་ཨ་རི་ལི་ལ་སྨད་བཙོངས་ནས་ཀར་ཤ་བ་ནི་ཉོར་ཡོངས་པས། ཨ་མ་འགྲོ་བཟང་ནི་ཚོང་བ་ཨ་རི་ལའི་ཕག་ན་ཉལ་བ་མཐོང་ནས། བུ་མོ་གྲོགས་སྤྱོད་བཟང་མོས་སྐྱེས་བུ་གཡོན་ཅན་པདྨའི་རྩ་ལག་ཅན་དུ་ཕྱིན་ནས། ངའི་ཨ་མ་ནི་ཚོང་བ་ཨ་རི་ལི་དང་དགའ་མགུར་སྤྱོད་ཀྱིན་འདུག་གོ་བྱས་པས། སྐྱེས་བུ་གཡོན་ཅན་པདྨའི་རྩ་ལག་ཁྲོས་ནས་སྨད་ཚོང་འགྲོ་བཟང་གི་སྐེ་རལ་གྲིས་བཅད་དེ་བསད་དོ། །དེ་ནས་བུ་མོ་གྲོགས་སྤྱོད་བཟང་མོས་སྐད་ངན་བཏོན་པས་ཡུལ་གྲུ་འཛིན་གྱི་གྲོང་ཁྱེར་གྱི་མི་ཀུན་གྱིས་ཐོས་ནས་དེད་པས། པདྨའི་རྩ་ལག་གིས་སྨད་ཚོང་འགྲོ་བཟང་བསད་པའི་རལ་གྲི་ཁྲག་ཅན་དེ་གོའུ་ཏ་མ་རྩྭའི་སྤྱིལ་བོ་ན་སྒོམ་བྱེད་ཀྱིན་ཡོད་པའི་མདུན་དུ་བོར་ནས་བྲོས་སོ། །ཚོང་བ་ཨ་རི་ལིས་ཡང་འགྲོ་བཟང་གི་བུ་མོ་གྲོགས་སྤྱོད་བཟང་མོའི་སྐེ་རལ་གྲིས་བཅད་དེ་བསད་ནས། རལ་གྲི་ཁྲག་ཅན་དེ་ཡང་གོའུ་ཏ་མའི་མདུན་དུ་བོར་ནས་བྲོས་སོ། །ར་མདའ་རྒྱུག་པའི་འདེད་མི་རྣམས་ཀྱིས་འགྲོ་བཟང་མ་སྨད་གཉིས་པདྨའི་རྩ་ལག་དང་ཚོང་བ་ཨ་རི་ལི་གཉིས་ཀྱིས་བསད་པའི་རལ་གྲི་ཁྲག་ཅན་དེ་གཉིས་གོའི་ཏ་མའི་མདུན་ན་འདུག་པ་མཐོང་ནས། ར་མདའི་འདེད་མི་རྣམས་ན་རེ། དགེ་སྦྱོང་གོའུ་ཏ་མ་འདིས་སྔོན་ལ་བུད་མེད་མ་སྨད་གཉིས་ལ་ཆགས་སྤྱད། དེ་ནས་དེ་གཉིས་བསད་འདུག་གོ་ཟེར་ནས། དགེ་སྦྱོང་གོའུ་ཏ་མ་དེ་ར་མདའ་བའི་འདེད་མི་རྣམས་ཀྱིས་ཁྲིད་ནས་ཕོ་བོ་ཨ་བོ་རྒྱལ་པོ་བ་ར་དྷྭ་ཙ་ལ་མི་འདིས་ཉེས་པ་ཆེན་པོ་བྱས་སོ། །འདི་ལ་ཆད་པ་ཆེན་པོ་ཆོད་ཅིག་ཟེར་ནས་ཕུལ་ལོ། །རྒྱལ་པོ་བ་ར་དྷྭ་ཙས་གཅུང་པོ་གོའུ་ཏ་མ་ཡིན་པ་དང༌། ཉེས་པ་མེད་པར་མ་ཤེས་ཏེ། གོའུ་ཏ་མ་གསལ་ཤིང་སྡོང་པོའི་རྩེ་ལ་བཅིངས་ནས་བཞག་ཡོད་པའི་དུས་ན་ཤིན་ཏུ་སྡུག་བསླང་བར་གྱུར་པའི་དུས་ན། གོའུ་ཏ་མའི་བླ་མ་མཁན་པོ་དྲང་སྲོང་མདོག་ནག་གིས་ཤེས་ཏེ་དྲང་སྲོང་མདོག་ནག་གིས་གོའུ་ཏ་མའི་དྲུང་དུ་ཕྱིན་ནས་དྲིས་པས། ཁྱོད་ཀྱིས་ཉེས་པ་ཆེན་པོ་བྱས་སམ་དྲིས་པས་གོའུ་ཏ་མ་ན་རེ་ངས་ད་ལན་ཉེས་པ་མ་བྱས་ཏེ། ཚེ་སྔོན་གྱི་ལས་སུ་བྱུང༌། ལས་སུ་བྱུང་ཡང་ང་ལ་དཔང་པོ་ཡོད་དོ་ཟེར། ཁྱོད་ལ་དཔང་པོ་སུ་ཡོད་བྱས་པས། གོའུ་ཏ་མས་ང་ལ་ལན་ཉེས་མེད་ནས་ངའི་དམོད་མོ་དང་དཔང་པོ་བདེན་ན་ངའི་མཁན་པོ་དྲང་སྲོང་མདོག་ནག་འདི་སྐུ་མདོག་གསེར་ལྟ་བུར་གྱུར་ཅིག་བྱས་ཏེ་དམོད་མོ་བྱས་པས། མཁན་པོ་དྲང་སྲོང་མདོག་ནག་གི་སྐུ་མདོག་གསེར་ལྟ་བུར་གྱུར་ཏོ། །དྲང་སྲོང་མདོག་ནག་གི་མིང་ནི་དྲང་སྲོང་གསེར་མདོག་ཅན་ཞེས་བྱའོ། །དེ་ནས་གོའུ་ཏ་མས་ང་གར་སྐྱེ་དྲིས་པས་དྲང་སྲོང་མདོག་ནག་གི་ཞལ་ནས། གོའུ་ཏ་མ་ཁྱོད་ལ་སྒྲིབ་པ་དང་དྲི་མ་མེད་པས་མིར་སྐྱེའོ། །བུ་བཞག་པར་ནུས་ན་ད་བུ་ཁྱོད་ལ་སྐྱེ་བ་ཡོད་པས་ཁྱོད་ཀྱི་བུ་ཚ་རིགས་བརྒྱུད་བཞག་པར་ནུས་སམ་གསུངས་པས། གོའུ་ཏ་མ་ན་རེ་ང་ལ་ཨ་བོ་རྒྱལ་པོ་བ་ར་དྷྭ་ཙས་ཉེས་མེད་ཀྱི་ཆད་པ་བཅད་པས་ཤིན་ཏུ་སྡུག་བསྔལ་བར་གྱུར་པས། བུ་ཚ་རིགས་བརྒྱུད་བཞག་པའི་ཐབས་དང་ནུས་པ་མེད་དོ་ཞུས་པས། དྲང་སྲོང་མདོག་ནག་གིས་སེར་བུ་དང་བསིལ་ཆར་ཕབ་ནས། གོའུ་ཏ་མའི་སྡུག་བསྔལ་མེད་པར་བྱས་ནས། སྨད་ཚོང་མ་འགྲོ་བཟང་མ་སྨད་གཉིས་གཡོན་ཅན་པདྨའི་རྩ་ལག་དང་ཚོང་བ་ཨ་རི་ལིས་བསད་པས་རལ་གྲི་ཁྲག་ཅན་དེ་གཉིས་དྲང་སྲོང་གི་བླངས་ཏེ་གོའུ་ཏ་མའི་ཕོ་མཚན་གྱི་ཐད་ཀར་བཞག་ནས། ཁྱོད་ལ་བུ་ཚ་རིགས་རྒྱུད་མེད་ན་སངས་རྒྱས་མེད་པར་འགྱུར་རོ། །ཁྱོད་ཀྱིས་སྔོན་ཡུལ་ཆགས་སྤྱོད་དྲན་པར་གྱིས་དང་གསུངས་པས། གོའུ་ཏ་མས་སྡུག་བསྔལ་གནས་ཀྱི་གསལ་ཤིང་གི་རྩེ་ནས་ཚེ་སྔོན་གྱི་འདོད་ཆགས་སྤྱོད་པ་རྗེས་སུ་དྲན་པར་བྱས་པ་ལས། ཁུ་བའི་ཐིག་པ་གཉིས་རལ་གྲི་ཁྲག་ཅན་དེ་གཉིས་ཀྱི་སྟེང་དུ་བྱུང་བས། དེ་ཀུན་དྲང་སྲོང་གིས་བུ་རམ་ཤིང་གི་ནགས་ཚལ་གྱི་ལོ་མའི་གསེབ་ཏུ་སྤྲུགས་ནས་བཞག་པ་ལས། དེ་ཉི་མའི་འོད་ཀྱིས་དྲོས་ཤིང་སྨིན་པ་ལས་སྒོ་ང་གཉིས་བྱུང་ངོ་དེ་གཉིས་སྨིན་ཅིང་རྡོལ་བ་ལས་བུ་ཁྱེའུ་འགྲོ་ཤེས་སྨྲ་ཤེས་གཉིས་བྱུང་ངོ༌། །དེ་གཉིས་ནི་ཟས་སུ་བུ་རམ་གྱི་བཅུད་ལ་ཟ། སྐོམ་དུ་བུ་རམ་གྱི་བཅུད་ལ་འཐུང༌། གོས་སུ་ནི་བུ་རམ་གྱི་ཤུན་པ་གྱོན་པ་ཡིན་ཏེ་དེ་གཉིས་ལ་རྒྱལ་པོ་བུ་རམ་ཤིང་པ་ཟེར་ནས་མིང་གཅིག་ཏུ་བཤད་པ་ཡོད་དེ་མིང་ནི་གཉིས་སུ་བྱུང་ངོ༌། །གཉིས་ཀ་ཉི་མས་སྨིན་ཅིང་རྡོལ་ཡང་མིང་ནི་གཉིས་ཡིན། ཨ་མ་སྨད་ཚོང་འགྲོ་བཟང་མའི་ཁྲག་ལ་སྨིན་པ་ནི་སྔོན་ལ་འགྲོ་ཞིང་སྨྲ་ཤེས་པས་ན་རྒྱལ་བུའི་ཕོ་བོ་ནི་ཨུ་ཉི་མ་བ་ཡིན། བུ་མོ་གྲོགས་སྤྱོད་བཟང་མོའི་ཁྲག་ལ་སྨིན་པ་ནི་ཕྱི་ལ་འགྲོ་ཞིང་སྨྲ་ཤེས་པས་ན་རྒྱལ་བོའི་ནུ་བོ་གཅུང་པོ་ནི་བུ་རམ་ཤིང་བ་ཡིན་ནོ། །དེ་ནས་དྲང་སྲོང་གིས་ཉི་འོད་ཀྱི་རྒྱལ་པོ་བ་ར་དྷྭ་ཙས་གཙོ་བྱས་པའི་རྣ་བ་ཅན་མང་པོ་བོས་ཕྱོགས་བཞིའི་རྒྱལ་ཆེན་རིགས་བཞི་ཡང་སྤྱན་དྲངས་ནས། གོའུ་ཏ་མ་གསལ་ཤིང་གི་རྩེ་ལ་བཅིངས་པ་བཀྲོལ་ནས་ས་ལ་ཕབ་པས་ཤི་བར་གྱུར་ཏོ། །དེ་ནས་དྲང་སྲོང་གསེར་མདོག་ཅན་གྱིས་བདེན་པའི་ཚིག་ནི་འདི་སྐད་དུ་བརྗོད་དོ། །གོའི་ཏུ་མས་སྨད་ཚོང་འགྲོ་བཟང་མ་སྨད་མ་བཟད་ན་ལས་ཀྱི་རྣམ་པར་སྨིན་པ་དེ་ནི་གཡོན་ཅན་པདྨའི་རྩ་ལག་དང་ཚོང་བ་ཨ་རི་ལིའི་སྟེང་དུ་ཤོག་ཅིག་བྱས་པས། རྒྱལ་ཆེན་རིགས་བཞིའི་ལྷ་རྣམས་ནམ་མཁའ་ལ་བྱོན་ནས། གོའུ་ཏ་མ་དཔའ་བོ་ཁྱོད་ལ་ནི་གསེར་གྱི་མདོག་དང་བསོད་ནམས་བརྒྱའི་མཚན་དང་ལྡན་པ། བལྟ་ན་སྡུག་ཅིང་མིག་ཏུ་མངོན་པར་མཛེས་ལ། ལྷ་སྟོང་བྱེ་བ་རབ་ཏུ་དགའ་བར་བྱེད་པ་ཡིན། སྐྱེ་བོ་མང་པོས་མཐོང་ན་དགེ་བའི་ལུས་རྟག་ཏུ་ཐོབ་པ་ཡིན། བསྐལ་པ་དག་ནི་བྱེ་བ་བརྒྱ་སྟོང་ཕྲག་དགུ་བཅུ་རྩ་དགུར་འཁོར་ལོས་བསྒྱུར་བའི་རྒྱལ་པོའི་སངས་རྒྱས་སུ་འགྱུར་རོ། །ས་སྟེང་གནས་པའི་མི་རྣམས་ཀྱིས་རལ་གྲི་དེ་གར་སོང་ལྟོས་ཤིག་ཅེས་པའི་ཆེད་དུ་སྨྲས་པ་དང༌། རྒྱལ་ཆེན་རིགས་བཞི་རྣམས་ཀྱིས། རལ་གྲི་ཁྲག་ཅན་དེ་ནམ་མཁའི་དབྱིངས་ལ་བོར་ནས་སྨད་ཚོང་མ་འགྲོ་བཟང་མ་སྨད་གསོད་པའི་མི་དེ་སུ་ཡིན་པ་དེའི་སྟེང་དུ་ཤོག་ཅེས་དམོད་བོར་བས། རལ་གྲི་དེ་འགྱུས་ཐོག་ཏུ་གྱུར་ནས་སྐྱེས་བུ་གཡོན་ཅན་པདྨའི་རྩ་ལག་གི་སྟེང་དུ་བབས་ཏེ་ཤི་བར་གྱུར་ཏོ། །ཐོག་ཟེར་དེ་ཚོང་བ་ཨ་རི་ལིའི་སྟེང་དུ་ཕོག་སྟེ་ཤི་བར་གྱུར་ཏོ། །གོའུ་ཏ་མ་དེ་ཉིད་སུམ་ཅུ་རྩ་གསུམ་དགའ་ལྡན་ལྷའི་ཡུལ་ཏུ་སྐུ་གསུམ་གྱི་སྟོན་པ་ཀུན་ཏུ་འཆང་དུ་སྐྱེ་བ་བཞེས་སོ། །རྒྱལ་ཆེན་རིགས་བཞིའི་ཁྲིམས་ལ་མཁས་པར་གྱུར་ཏོ། །དེ་ནས་རྒྱལ་བུ་གོའུ་ཏ་མའི་སྲས་གཉིས་སུ་བྱུང་བ་ལས། ཕོ་བོ་ཉི་མ་བ་ནི། གཅེན་ཡིན་ཏེ་རབ་ཏུ་བྱུང་བས་གདུང་རྒྱུད་ཀྱི་རྒྱལ་པོ་ལ་སྲས་མེད་པས་དགེ་སློང་ཤཱི་ལ་བྱ་བ་ཡིན་ནོ། །རྒྱལ་སྲས་བུ་རམ་ཤིང་བ་དེའི་ཕྱི་ལ་བྱུང་བས་གཅུང་པོ་ཡིན། ཐ་ཆུང་བུ་རམ་ཤིང་བ་གཅུང་པོའི་རིགས་ལས་སྐྱེས། རྒྱལ་པོ་གོའུ་ཏ་མའི་བུ་ཡིན་པས་ན་གོའུ་ཏ་མ་ཞེས་བྱའོ། །ཉི་མའི་འོད་ཀྱིས་སྨིན་པས་ན་ཉི་མའི་རིགས་ཞེས་བྱའོ། །དྲང་སྲོང་གི་ལག་གིས་གསོ་བསྐྱངས་བྱས་པ་ན་ལག་སྐྱེས་ཞེས་བྱའོ། །བུ་རམ་ཤིང་གི་ཚལ་ནས་རྙེད་པས་ན་བུ་རམ་ཤིང་བ་ཞེས་པར་གྱུར་ཏོ། །དེ་ལ་སྲས་གསུམ་སྐྱེས་ནས་བཙུན་མོ་དེ་ཤི་བས་རྒྱལ་པོ་བཙུན་མོ་ཤི་ནས་མྱ་ངན་ཆེ་བ་བསལ་བའི་ཕྱིར་བཙུན་མོ་གཞན་ཞིག་བླངས་པས། བཙུན་མོ་དེའི་ཕ་ན་རེ་ངའི་བུ་མོ་ལ་སྲས་པོ་སྐྱེས་བྱུང་ན་རྒྱལ་སྲིད་གདན་ས་འདི་དགའ་བས་སྟེར་དགོས་བྱས་པས་ཁས་བླངས་ནས་བུ་མོ་དེ་བཙུན་མོར་བྱིན་པས། བུ་གཅིག་དང་བུ་མོ་གསུམ་བྱུང་ནས་བུའི་མིང་ཡང་རྒྱལ་སྲིད་དགའ་ཞེས་བྱ་བར་བཏགས་སོ། །སྔར་གྱི་བུ་ཕོ་བོ་གསུམ་པོ་དེ་གྲོང་ཁྱེར་སེར་སྐྱེར་སྤྱུགས་སོ། །ཕྱིས་ཀྱི་སྲོང་མོ་གསུམ་ཡང་ཕོ་བོ་གསུམ་གྱི་གཡོག་ལ་སོང་ཞིག་བྱས་ནས། དུས་དེར་ཕ་གཅིག་ལ་མ་མི་གཅིག་པའི་མིང་སྲིང་དྲུག་སྤྱུགས་པས། རྒྱལ་པོ་འཕགས་སྐྱེས་པོའི་བཙུན་མོ་ཕྱི་མ་དེ་ཡང་ཤི་སྟེ་མེད་ནས། ཕ་རྒྱལ་པོ་དེ་སྔར་གྱི་སྲས་ཕོ་བོ་གསུམ་ལ་བོས་ནས། ཕྱིས་ཀྱི་མ་ཡར་མོ་དེ་ཤི་ནས་མེད་ཕོ་བོ་གསུམ་པོ་ད་ཚུར་བྱོན་དང་བྱས་ནས་བོས་པས། སྲས་རྒྱལ་བུ་གསུམ་པོ་དེས་སྐོ་ལོང་མཛད་ནས་ཡུལ་གྲོང་འཕགས་རྒྱལ་དུ་རྒྱལ་པོ་འཕགས་སྐྱེས་པའི་རྩར་མ་ཕྱིན་པར། བུ་ཕོ་བོ་གསུམ་པོ་དེས་ཕ་གཅིག་ལ་མ་མི་གཅིག་པའི་སྲིང་མོ་གསུམ་པོ་དེ་རང་རང་གིས་ཁྲིད་ནས་གངས་ཀྱི་རི་དང་ཉེ་བར་ཆུ་བོ་སྐལ་ལྡན་ཤིང་རྟའི་འགྲམ། དྲང་སྲོང་སེར་སྐྱའི་བཞུགས་གནས་དང་ཉེ་བ་ཞིག་ཏུ་ཕྱིན་ནས་མིང་སྲིང་དེ་རྣམས་ཀྱིས་ལོ་མའི་སྤྱིལ་པོ་བྱས་ཏེ། སྡོད་སའི་གནས་བཏབ་ནས་རི་དྭགས་བསད་ཅིང་འཚོ་བ་བྱེད་པའི་དུས་སུ་དྲང་སྲོང་སེར་སྐྱའི་གནས་སུ་ལས་དགེ་སྡིག་གི་གཏམ་དྲིལ་བ་ལ་འགྲོ་བར་བྱེད་དོ། །