བཀའ་ཆེམས་ཀ་ཁོལ་མ།

ལེའུ་བཞི་པ། ཟང་ཟིང་གིས་བཏུལ་བ། 
      དེ་ནས་བར་མ་བསྟན་པ་ལ། སངས་རྒྱས་འདས་པའི་གསུང་གིས་འཛམ་བུའི་གླིང་གི་སེམས་ཅན་རྣམས་རིགས་གསུམ་མགོན་པོའི་རྣམ་འཕྲུལ་གྱིས་སེམས་ཅན་དྭ་ཕྲུག་གི་ཚུལ་དུ་སྐྱོང་སྟེ། འཛམ་བུའི་གླིང་གི་ནུབ་བྱང་ན་ལྕང་ལོ་ཅན་གྱི་ཕོ་བྲང་ན་བཅོམ་ལྡན་འདས་དཔལ་ཕྱག་ན་རྡོ་རྗེ་བཞུགས་ནས། དེའི་ཕྱོགས་ཀྱིས་ཕྲ་མེན་མ་རྣམས་ལ་ཆོས་སྟོན་ཏོ། །འཛམ་བུའི་གླིང་གི་བྱང་ཤར་ན་རི་བོ་རྩེ་ལྔ་ན་བཅོམ་ལྡན་འདས་འཕགས་པ་འཇམ་དཔལ་བཞུགས་ནས། མཁའ་འགྲོ་མ་རྣམས་ལ་གསང་སྔགས་ནང་པའི་ཆོས་སྟོན་ཏོ། །འཛམ་བུ་གླིང་གི་ལྷོ་ནུབ་ན་བཅོམ་ལྡན་འདས་ཤཱཀྱ་ཐུབ་པ་ཨུ་རྒྱན་པདྨར་སྐུ་འཁྲུངས་ཏེ་དུར་ཁྲོད་ལང་ག་རྩེགས་པའི་ཚལ་ཆེན་ན་མཁའ་འགྲོ་མ་རྣམས་ལ་གསང་སྔགས་ནང་པའི་ཆོས་སྟོན་ཏོ། །འཛམ་བུའི་གླིང་གི་ཤར་ལྷོའི་རི་པོ་ཏ་ལ་ན་བཅོམ་ལྡན་འདས་ཨཱརྱ་པ་ལོ་སྤྱན་རས་གཟིགས་ཐུགས་རྗེ་ཆེན་པོ་དེ་འགྲོ་བ་སེམས་ཅན་གྱི་དོན་ལ་དགོངས་ཏེ་བཞུགས་སོ། །དེ་ནས་ཡང་ཤར་ལྷོའི་རི་པོ་ཏ་ལ་ནས་ཐུགས་རྗེ་ཆེན་པོ་སྤྱན་རས་གཟིགས་དེ་བྱང་ཕྱོགས་ཁ་བ་ཅན་རྣམས་ཀྱི་དོན་མཛད་པ་ལ། དེའི་སེམས་ཅན་རྣམས་ཆོས་ཀྱི་སྣོད་དུ་མ་གྱུར་པས། ཐམས་ཅད་དམྱལ་བར་སྐྱེ་བར་གཟིགས་ནས་འཕགས་པ་ཐུགས་རྗེ་ཆེན་པོ་སྤྱན་རས་གཟིགས་དབང་ཕྱུག་གིས་སངས་རྒྱས་བྱང་ཆུབ་སེམས་དཔའ་ཕྱག་སྟོང་སྤྱན་སྟོང་ཞལ་བཅུ་གཅིག་བྱས་པ་ཞིག་སྤྲུལ་ནས། བོད་ཡུལ་ཁ་བ་ཅན་གྱི་ས་འོག་དཔག་ཚད་བརྒྱ་ན་ཡི་དྭགས་ཀྱི་གནས་རྣམས་ཡོད་དོ། །དེ་ནས་ས་ངམས་དཔག་ཚད་བརྒྱ་ན་ན་རག་དམྱལ་བའི་གནས་ལྕགས་ཀྱི་ཟ་མ་ཏོག་ཁ་བཅད་པ་འདྲ་བ་ཞིག་རིམ་གྱིས་ཡོད་པ་དེ་འོད་ཟེར་གྱི་ཚལ་བ་བཞིས་བཀབ་ནས་སྟེང་མེ་ཏོག་གི་བླ་བྲི་འདྲ་བ། འོག་མཚོ་ལ་པདྨ་ཁ་གྱེས་པ་འདྲ་བ། ལོགས་ལ་ལྷའི་གོས་ཀ་ཙ་ལིན་ད་ཀ་འདྲ་བ་བྱས་ཏེ་དམྱལ་བ་རྣམས་ཀྱིས་དེ་མཐོང་བས་གཅིག་ལ་གཅིག་འདི་སྐད་ཟེར་ཏེ། ཀྱཻ་གྲོགས་པོདག་སྐྱེས་བུ་འདོད་པའི་གཟུགས་ཅན་མེ་ཏོག་ཀུན་ད་ལའི་མདོག་ལྟ་བུ་རྒྱན་ཐམས་ཅད་ཀྱིས་བརྒྱན་པ། རལ་པའི་ཐོར་ཚུགས་ཅན་དེ་མཐོང་བས་བདག་ཅག་རྣམས་བསིལ་བར་གྱུར་ཏོ། །ཞེས་དབུགས་འབྱིན་པའི་གཏམ་སྨྲས་པས་ཤི་བ་དང་སུམ་ཅུ་རྩ་གསུམ་པའི་ལྷར་སྐྱེས་ནས་ཕྱིར་མི་ལྡོག་པར་གྱུར་རོ། །དེ་ནས་ཡང་ཨཱརྱ་པ་ལོ་ཐུགས་རྗེ་ཆེན་པོ་དེ་ནི་རི་པོ་ཏ་ལ་ན་བཞུགས་ཏེ་རི་པོ་ཏ་ལ་ནས་བྱང་ཕྱོགས་ཁ་བ་ཅན་པའི་སེམས་ཅན་རྣམས་འདུལ་བའི་དོན་དུ། ཉིན་ལན་གསུམ་མཚན་ལན་གསུམ་དུ་གཟིགས་ཀྱང་ས་ཕྱོགས་དེ་ན་སངས་རྒྱས་ཀྱི་བསྟན་པ་མེད་པ། དེ་བཞིན་གཤེགས་པའི་ཞབས་ཀྱིས་མ་བཅགས་པ། གསུང་གི་འོད་ཟེར་གྱིས་མ་ཁྱབ་པ། མཚན་མོ་མུན་པའི་སྨག་རུམ་དུ་གྱུར་པ་ལྟར་ནག་ཐིབ་བེ་འདུག་པ་ལྟར་གཟིགས་ཏེ། དེར་སྐྱེས་པའི་སེམས་ཅན་དུད་འགྲོ་དེ་རྣམས་ནི་མཚོ་ལ་ཆར་བབ་པ་ལྟར་གཅིག་ཀྱང་ཐོན་པ་མེད་པར་ངན་སོང་ནས་ངན་སོང་དུ་འགྲོ་སྟེ། སེམས་ཅན་མིའི་འགྲོ་བ་འདུག་པ་མ་མཐོང་ནས་འདུལ་བའི་སྐབས་མ་རྙེད་དོ།།
      དེ་ནས་ཡང་བོད་ཡུལ་ཁ་བ་ཅན་དེའི་སྟོད་ཁམས་གསུམ་ན་གངས་རི་དང༌། བྲག་རི་དང༌། གཡའ་རིའི་ར་བ་ན་སེངྒེ་དང་ལྕེ་སྤྱང་ལ་སོགས་པའི་གཅན་གཟན་སྣ་ཚོགས་དང༌། ཤ་རྒོ་སྙན་ལ་སོགས་པ་རི་དྭགས་སྣ་ཚོགས་གནས་པ། བར་ཁམས་གསུམ་ན་བྲག་དང་སྤང་དང་ནགས་ཀྱི་ར་བ་ན་བྲག་སྲིན་མོ་དང་སྤྲེའུ་དང༌། དོམ་དྲེད་ལ་སོགས་པ་སེམས་ཅན་དུད་འགྲོ་སྣ་ཚོགས་པས་དབང་བྱས། སྨད་ཁམས་གསུམ་ན་ནགས་ཀྱི་ལྗོངས་དང༌། མཚོ་དང་མཚེའུ་དང་ནེའུ་སིང་གི་ར་བ་འདབ་ཆགས་ཀྱི་བྱ་སྣ་ཚོགས་དང༌། གླང་པོ་ཆེ་དང་ཆུ་རྟ་ཆུ་གླང་ལ་སོགས་པ་དུད་འགྲོའི་རིགས་སུ་གྱུར་པ་སྣ་ཚོགས་པ་གནས་ཏེ། མིའི་འགྲོ་བ་ནི་གཅིག་ཀྱང་ཡེ་མེད་པས་འདུལ་བའི་སྐབས་མ་རྙེད་དོ། །དེའི་ཚེ་སྲིན་ཡུལ་ལང་ཀ་པུ་རི་ན། སྲིན་པོ་ལང་ཀ་མགྲིན་བཅུ་དང༌། ལྷའི་རྒྱལ་པོ་ར་མ་ཎ་གཉིས་ལྷ་མོ་གཟི་ལྡན་མ་ལ་མ་འཆམས་ནས་འཐབ་པའི་སྤྲེའུ་གྱད་ཧ་ལུ་མ་ད་བྱ་བ་སྤྱན་རས་གཟིགས་ཀྱི་སྤྲུལ་པའི་སློབ་མ་དེ་རི་པོ་ཏ་ལར་སྤྱན་རས་གཟིགས་ཀྱི་དྲུང་དུ་ཕྱིན་པ་དང༌། སྤྲེའུ་དེ་ལ་སྤྱན་རས་གཟིགས་ཀྱིས་གསུངས་པ། སྤྲེའུ་ཁྱོད་ཀྱིས་བྱང་ཕྱོགས་ཁ་བ་ཅན་གྱི་བྲག་རི་ལ་སྒོམ་དུས་སམ་གསུངས་པས། སྤྲེའུ་དེ་ན་རེ་ངས་བོད་ཡུལ་ཁ་བ་ཅན་གྱི་བྲག་རི་ལ་སྒོམ་ནུས་ལགས་ཞུས་པས། ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱིས་སྤྲེའུ་དེ་ལ་མི་སྡུག་པའི་སྒོམ་བསླབས། དགེ་བསྙེན་གྱི་སྡོམ་པ་ཕོག ཟབ་པ་དང་རྒྱ་ཆེ་བའི་ཆོས་བསླབས་སྤྲེའུ་བྱང་ཆུབ་སེམས་དཔའ་ཞེས་བྱ་བའི་མིང་བཏགས་ནས་བྱང་ཕྱོགས་ཁ་བ་ཅན་གྱི་རི་ལ་སྒོམ་དུ་བཏང་ངོ༌། །སྤྲེའུ་སྒོམ་བྱང་ཆུབ་སེམས་དཔའ་དེས་ཀྱང་རྫུ་འཕྲུལ་གྱིས་བོད་ཡུལ་བྱང་ཕྱོགས་ཁ་བ་ཅན་དུ་ཕྱིན་ཏེ། དེ་ནས་བྲག་རུམ་གྱི་དབུས་ཀྱི་བྲག་ཕུག་ཅིག་ན་སྒོམ་གྱིན་ཡོད་པའི་ཚེ། བྲག་སྲིན་མོ་ཞིག་སྤྲེའུ་མོའི་ཆ་བྱད་དུ་བརྫུས་སྤྲེའུ་སྒོམ་པའི་དྲུང་དུ་འོངས་ནས་འདོམས་བསྟན། ས་གཏོར་འདོད་པ་བརྟེན་པའི་བརྡའ་ཆོས་བྱས་ཏེ་སོང་ངོ༌། །ཚུལ་དེ་བཞིན་དུ་ཉིན་ཞག་བདུན་གྱི་བར་དུ་བྱས་ཀྱང༌། སྤྲེའུས་མི་སྡུག་པ་བསྒོམས་པས་སྤྲེའུ་མོའི་འདོད་པ་ལ་སེམས་གཡོ་བར་མ་གྱུར་ཏོ། །ཉི་མ་བརྒྱད་པ་ལ་བྲག་སྲིན་མོ་དེ་མིའི་བུད་མེད་མཚར་མོ་རྒྱན་ཐམས་ཅད་ཀྱིས་བརྒྱན་པ་གཅིག་ཏུ་སྤྲུལ་ནས་སྤྲེའུའི་དྲུང་དུ་འོངས་འདོམས་བསྟན་འདོད་པ་སྤྱོད་པའི་བརྡའ་ཆོས་བྱས་ས་གཏོར་བྱེད་ཀྱི་འདུག་པ་ལ་བལྟས་པས། སྤྲེའུ་སྒོམ་གྱི་བསམ་པ་ལ་སེར་ཀར་རླུང་འཇུག སྡིག་པ་ཅན་ལ་བདུད་ཀྱང་འཇུག་སྙམ་ནས་ཅི་ཡང་མ་བྱས་པར་བསྡད་པས། བྲག་སྲིན་མོ་དེ་ན་རེ་ཁྱོད་དང་ང་གཉིས་ཁྱིམ་ཐབས་བཟའ་ཚོ་བྱའོ་ཟེར་བ་ལ། སྤྲེའུ་སྒོམ་ན་རེ་ང་ཐུགས་རྗེ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་ཨཱརྱ་པ་ལོའི་དགེ་བསྙེན་ཡིན་པས་དེ་ལྟ་བུ་བྱར་མི་རུང་ཟེར་བས། བྲག་སྲིན་མོའ་སྤྲུལ་པ་བུད་མེད་ན་རེ། འོ་ན་ང་ཁྱོད་ལ་ཞེ་སྡང་སྐྱེས་ནས་འདི་ཉིད་དུ་ཚེའི་དུས་བྱས་ཏེ་ཤི་ནས་ངན་སོང་དང་ངན་འགྲོ་རྣམས་སུ་ཡང་ནས་ཡང་དུ་སྐྱེས་ཟེར་བས་སྤྲེའུ་སྒོམ་གྱི་བསམ་པ་ལ། ཁྱིམ་ཐབ་བྱས་ན་སྡོམ་པ་འཆོར། མ་བྱས་ན་འདི་ནི་ངན་སོང་དུ་འགྲོ་སྟེ་སྡིག་ཆེ་བས་བྱང་ཆུབ་སེམས་དཔའི་སྤྱོད་པ་ཉམས་འགྲོ་སྙམ་ནས་སྤྲེའུ་སྒོམ་དེ་སྙིང་རྗེ་སྐྱེས་ཏེ། བྲག་སྲིན་མོའི་གདོང་དུ་མིག་འབྲུ་ཚུགས་སུ་ཞག་གཅིག་ཏུ་བལྟས་ཀྱང་ཅི་ཡང་ཤེས་པར་མ་གྱུར་ཏོ། །ད་འཕགས་པ་ཐུགས་རྗེ་ཆེན་པོ་སྤྱན་རས་གཟིགས་ཨཱརྱ་པ་ལོ་དེ་ལ་འདྲི་དགོས་སྙམ་ནས། སྤྲེའུ་དེས་རྫུ་འཕྲུལ་གྱིས་རི་པོ་ཏ་ལར་ཕྱིན་པ་དང༌། སྤྲེའུ་སྒོམ་གྱིས་འཕགས་པ་ཐུགས་རྗེ་ཆེན་པོ་ཨཱརྱ་པ་ལོ་ལ་འདི་སྐད་ཅེས་ཞུས་སོ། །འཕགས་པ་ཨཱརྱ་པ་ལོ་ལགས། ངས་ཁ་བ་ཅན་དུ་ཕྱིན་དེ་བྲག་རུམ་གྱི་དབུས་ཀྱི་བྲག་ཕུག་ཅིག་ཏུ་སྒོམ་ཡིན་ཡོད་པའི་མདུན་དུ་བྲག་སྲིན་མོ་ཞིག་བྱུང་ནས། ཁྱོད་དང་ང་གཉིས་ཁྱིམ་ཐབ་བྱའོ་ཟེར་དུ་བྱུང་བའི་བྱར་རུང་ངམ་མི་རུང་ཞུས་པས། འཕགས་པ་ཨཱརྱ་པ་ལོའི་ཞལ་ནས་ཁྱིམ་ཐབ་ཀྱིས་ཤིག་གསུངས་ནས་བྱ་དགའ་གསུམ་གནང་ངོ༌། །འབྲུ་སྣ་ལྔ་གནང༌། རིན་པོ་ཆེའི་གཏེར་ཁ་འབྱེད་པའི་བྱིན་གྱིས་བརླབས། སྤྲེའུ་སྒོམ་ཁྱོད་ཀྱི་བུ་ཚ་བོ་རྣམས་སངས་རྒྱས་ཀྱི་རྒྱུར་འགྱུར་རོ་ཞེས་གསུངས་སོ། །དེའི་དྲུང་ན་རྗེ་བཙུན་མ་ཇོ་མོ་སྒྲོལ་མ་བཞུགས་འདུག་པས་ཀྱང་ལེགས་སོ་ལེགས་སོ་ཞེས་ཟེར་རོ། །དེ་ནས་སྤྲེའུ་སྒོམ་གྱིས་བྲག་སྲིན་མོ་དེ་ཤི་དོགས་ནས་མགྱོགས་ཤིང་མྱུར་བར་རྫུ་འཕྲུལ་གྱིས་བོད་ཡུལ་གྱི་བྲག་རུམ་དེར་ཕྱིན་ཏེ་ཁྱིམ་ཐབ་བྱེད་པར་ཁས་བླངས་ཁྱིམ་ཐབ་བྱས་པ་དང༌། ཟླ་བ་བཅུ་ན་བྲག་སྲིན་མོ་དེ་ལ་བུ་ཕ་ཡང་མི་འདྲ། མ་ཡང་མི་འདྲ། ལུས་ལ་སྤུ་མེད་པ་མཇུག་མ་མེད་པ། གདོང་བ་དམར་བ། ཟས་སུ་ཤ་དམར་པོ་ཟ་བ། སྐོམ་དུ་ཁྲག་དྲོན་མོ་འཐུང་བ་ཞིག་སྐྱེས་སོ། །དེ་སྐྱེས་པ་དང་མ་བྲན་སྲིན་མོ་དེ་གསུས་པ་ལྟོགས་ནས་བུ་དེ་ཟ་བར་འདུག་པ་དང༌། ཕ་སྤྲེའུ་དེས་འཁུར་ནས་ནགས་མ་བྱ་ཚོགས་ཅན་དུ་སྤྲེའུ་མང་པོའི་ཟླ་ལ་བསྐྱལ་ལོ། །སང་ཕོད་ལོ་དུས་སུ་ནགས་མ་བྱ་ཚོགས་ཅན་དུ་ཕྱིན་ནས་ངའི་བུ་དེ་ཅི་བྱེད་ཀྱི་ཡོད་དམ་སྙམ་ནས་ལྟར་ཡོང་ཙ་ན། སྤྲེའུ་མོ་རྣམས་དང་དལ་རྒྱགས་བྱས་ནས་འདོད་ཆགས་ལ་བརྩེས་པས། ཕྲུ་གུ་བཞི་བརྒྱ་སྐྱེས་ནས་འདུག་གོ །ཕྲུ་གུ་དེ་རྣམས་ཀྱང་མེས་པོ་སྤྲེའུ་སྒོམ་དེ་མི་འདྲ་བ། ཕ་དེ་མི་འདྲ་བ། མ་སྤྲེའུ་མོ་དེ་རྣམས་དང་མི་འདྲ་བ། སྤུ་དང་མཇུག་མ་མེད་པ་ཤིང་ལ་མི་ཐར་བ་ཤི་ལ་ཁད་པ་ཁ་དམར་ཏིང་ཏིང་འདུག་པས། དེ་རྣམས་ལ་མེས་པོ་སྤྲེའུ་སྒོམ་དེ་སྙིང་རྗེ་སྐྱེས་ནས་ཤིང་ཏོག་བཏུས་ཀྱིན་གསོས་པས་མ་ཤི་ཙམ་བྱུང༌། མེས་པོའི་ལུས་ཀྱི་སྤུ་ཐམས་ཅད་བྱི། རྐང་པ་དང་ལག་པ་ཡང་གས། མཇུག་མ་ཡང་སྐྱ་བ་བཞིན་སོང་ནས་ཀྱེ་མ་རེ་སྡུག་ན་འདི་ཅིས་ལན་ནམ་སྙམ་ནས་བསམ་པས། འདི་ནི་ཁྱིམ་ཐབ་བྱས་པས་ལན། དེ་འཕགས་པའི་གསུང་བསྒྲུབས་པས་ལན་སྙམ་ནས། ད་འཕགས་པ་ལ་འདྲི་དགོས་སྙམ་ནས་རྫུ་འཕྲུལ་གྱིས་རི་པོ་ཏ་ལར་ཕྱིན་ཏེ། འཕགས་པ་ལ་ཞེ་ས་ཕུལ་ནས་འདི་སྐད་ཅེས་ཟེར་རོ། །ཀྱེ་མ་ཁྱིམ་ཐབ་འཁོར་བའི་བཙོན་རར་མ་ཤེས་ཤིང༌། བུད་མེད་བདུད་ཀྱི་འཆིང་བར་མ་ཤེས་ཏེ། བུ་ཚ་འཁོར་བའི་རྡོས་སུ་མ་ཤེས་པར། འདོད་ཆགས་དུག་གི་ལོ་མར་མ་རྟོགས་ཏེ། སྙིང་རྗེས་ཆགས་པར་གྱུར་པས་བདག་སླུས་ཏེ། འདོད་པའི་འདམ་བྱིང་སྡུག་བསྔལ་རི་ཡིས་ནོན། ཉོན་མོངས་དུག་འཐུངས་ལས་ངན་རིམས་ཀྱིས་བཏབ། སྡུག་བསྔལ་གྱིས་ནི་བདག་ཉིད་མནར་གྱུར་ནས། འཁོར་བའི་གནས་སུ་བདག་ཉིད་རང་གིས་བཅིངས། མ་རིག་མུན་འཐིབས་རྟོག་པའི་དྲ་བར་ཚུད། འདི་ལྟ་བུ་ཡི་སྡུག་བསྔལ་མྱོང་གྱུར་ན། ད་ནི་ཇི་ལྟར་བུ་ཚ་བསྐྱང་བར་བགྱི། འཕགས་པས་གནང་བས་བདག་ནི་འདི་ལྟར་གྱུར། ཚེ་འདི་ཉིད་ལ་ཡི་དྭགས་གནས་སུ་གྱུར། ཕྱི་མ་དམྱལ་བར་འགྲོ་བར་ཐེ་ཚོམ་མེད། དེ་ཕྱིར་ཐུགས་རྗེས་བདག་ལ་བསྐྱབ་ཏུ་གསོལ། ཟེར་ནས་འཕགས་པ་ལ་འདི་སྐད་ཅེས་དྲིས་སོ། །འཕགས་པ་ལགས་བདག་གིས་བྲག་སྲིན་མོ་དང་ཁྱིམ་ཐབ་བྱས་པས་ཕྲུ་གུ་མང་པོ་བྱུང་ནས་མ་སོས་པར་སྡུག་བསྔལ་པར་གྱུར་ཏོ་ཞེས་ཞུས་པས། འཕགས་པའི་ཞལ་ནས་ཁྱོད་ཀྱི་རིགས་བརྒྱུད་དུ་གྱུར་པ་དེ་རྣམས་ནི་གཅིག་ནི་ཕའི་རིགས་སུ་གྱུར་པ། གཅིག་ནི་མའི་རིགས་སུ་གྱུར་པ་རིགས་བརྒྱུད་གཉིས་སུ་གྱུར་པ་ལས། ཕའི་རིགས་སུ་གྱུར་པ་དེ་དག་ནི་དད་པ་ཆེ་བ། མོས་གུས་ཆེ་བ། སྙིང་རྗེ་ཆེ་བ། ཤེས་རབ་ཆེ་བ། བརྩོན་འགྲུས་ཆེ་བ། བཟོད་པ་ཆེ་བ། ཆོས་ཟབ་མོ་སྟོང་པ་ཉིད་ཀྱི་དོན་ལ་མི་སྐྲག་པར་ལྷག་པར་མོས་པ། བསོད་ནམས་ཚོགས་བསོག་ཆུང་དུ་མི་ངོམས་ཤིང༌། དགེ་བའི་རྩ་བ་ཆུང་བས་མི་ངོམས་པ། བློ་རྒྱ་ཆེན་པོ་དང་ལྡན་པ། ཕྱག་གིས་འདུག་མི་ཚུགས་པ། རྡེའུ་དང་ཤིང་བུ་རྣམས་བཏུབ་པ། མིག་ཀྱང་ས་གཅིག་ཏུ་མི་ཚུགས་པར་ཕར་རིག་ཚུར་རིག་བྱེད་པ། བྱང་ཆུབ་སེམས་དཔའ་བློ་ཆེན་ལྡན་ཞེས་བྱ་བའི་རིགས་སུ་འགྱུར་རོ། །དེའི་རིགས་བརྒྱུད་ཀྱིས་སྟོན་པའི་བསྟན་པ་འཕེལ་བར་བྱེད་པ་དང་བྱང་ཆུབ་སེམས་དཔའ་ཆེན་པོའི་བྱ་བ་བྱེད་པར་འགྱུར་རོ། །མའི་རིགས་སུ་གྱུར་པ་ནི་དད་པ་ཆུང་བ། མོས་གུས་ཆུང་བ། སྙིང་རྗེ་ཆུང་བ། ཤེས་རབ་ཆུང་བ། བརྩོན་འགྲུས་ཆུང་བ། བཟོད་པ་ཆུང་བ། འདོད་ཆགས་ཆེ་བ། ཞེ་སྣང་ཆེ་བ། ང་རྒྱལ་ཆེ་བ། ཕྲག་དོག་ཆེ་བ། གཏི་མུག་ཆེ་བ། སྦྱིན་པ་གཏོང་བ་ལ་མི་དགའ་བ། ཤ་དམར་པོ་ཟ་བ། ཁྲག་དྲོན་མོ་འཐུང་བ་ལ་དགའ་བ། ཚོང་དང་ཁེ་སྤོགས་ཀྱི་སྦྱོར་བ་ལ་སེམས་པ། སྐད་རྒྱ་ཆེན་པོར་གཏོང་བ་ལ་དགའ་བ། རང་གི་སྐྱོན་ཐོས་ན་མི་དགའ་བ། གཞན་གྱི་སྐྱོན་ཐོས་པ་ལ་དགའ་བ། རང་མཐོང་ཆེ་བ། མི་མཐོང་ཆུང་བ། དགེ་བ་ཆུང་བ། སྡིག་པ་ཆེ་བ། ལུས་སྟོབས་ཆེ་བ། བསམ་པ་ངན་པ། མ་རུངས་པ། འདུལ་དཀའ་བ། གདོལ་བ་ཤིག་ཟ་ཤ་ཟན་ཞེས་བྱ་བའི་རིགས་སུ་འགྱུར་ཏེ། དེ་རྣམས་གསོས་ཤིག་སྐྱོངས་ཤིག་ངས་ཀྱང་བསྐྱང་གིས། དེ་རྣམས་ཀྱིས་མཐའི་རྒྱལ་པོ་འདུལ་བར་འགྱུར་རོ་ཞེས་གསུངས་པས། སྤྲེའུ་སྒོམ་བྱང་ཆུབ་སེམས་དཔའ་ན་རེ། ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ལགས། ངས་དེ་རྣམས་མ་སོས་མ་སྐྱོངས་པས་ང་ལ་སྡུག་བསྔལ་ཆེན་པོ་བྱུང་བ་ལགས་བྱས་པས། ཐུགས་རྗེ་ཆེན་པོ་འཕགས་པ་སྤྱན་རས་གཟིགས་ཀྱི་ཞལ་ནས། སྤྲེའུ་སྒོམ་ཁྱོད་ཀྱི་བུ་དང་ཚ་བོ་དང་ཡང་ཚ་རྣམས་ཀྱི་ཟས་སྐལ་འདི་ཡིན་པས་འདི་ལ་གྱིས་ཤིག་གསུངས་ནས། འབྲུ་རྣམ་པ་ལྔ་བསྐུར་བ་ནི་འདི་ལྟ་སྟེ། ནས་དང༌། གྲོ་དང༌། སོ་བ་དང༌། སྲན་མ་དང༌། སྲན་ཆུང་ངོ༌། །སྤྲེའུ་སྒོམ་གྱིས་འབྲུ་སྣ་ལྔ་བོ་དེ་ཁྱེར་ནས་བོད་ཁ་བ་ཅན་གྱི་ཡུལ་ལ་འགྲོ་བར་ཁ་བལྟས་པ་དང༌། འཕགས་པས་གསེར་ཕྱེ་སྙིམ་པ་གང་ཕྱག་ཏུ་བསྣམས་ཏེ། འདི་སྐད་ཅེས་གསུང་ངོ༌། །སྤྲེའུ་སྒོམ་ཁྱོད་ཀྱི་བུ་ཚ་བོ་དང༌། ཡང་ཚ་རྣམས་ཀྱིས་འཚོ་བ་ཡང་མཐར་རིན་པོ་ཆེའི་གསེར་གྱིས་འཚོ་བར་བྱ་ཡིས། སྐབས་སྐབས་སུ་བྱང་སེམས་དཔའ་ཐོད་རྒལ་བ་རེ་རེ་ཡང་འབྱུང་བར་འགྱུར་རོ་གསུང་ངོ༌། །སྤྲེའུ་སྒོམ་གྱིས་བྲག་སྲིན་མོ་ཁྱིམ་ཐབ་བཟའ་འཚོ་བྱས་པ་ལ། བྱ་དགའི་ཚུལ་དུ་གསེར་ཕྱེ་ཁྱོར་བ་གང་བོད་ཡུལ་ཁ་བ་ཅན་དུ་གཏོར་ནས་སྤྲེའུ་སྒོམ་ཁྱོད་ཀྱི་རིགས་བརྒྱུད་དུ་གྱུར་པ་རྣམས་འཚོ་བ་རིན་པོ་ཆེ་གསེར་གྱིས་འཚོ་བར་འགྱུར་རོ་གསུངས་ནས། བོད་ཀྱི་ས་ཆ་ལ་གསེར་ཁ་འབྱེད་པར་འབྱུང་བ་ནི་འཕགས་པ་ཐུགས་རྗེ་ཆེན་པོས་བོད་ཡུལ་ཁ་བ་ཅན་དུ་དུས་དུས་སུ་རིན་པོ་ཆེའི་གཏེར་ཁུངས་ཁ་འབྱེད་པ་དང༌། ཡུལ་ཕྱོགས་གཞན་ནས་ནོར་ངོ་མཚར་ཅན་ཡོང་བའི་ཕྱིར་ཕྱོགས་བཞིའི་སྒོ་ཐམས་ཅད་ཁ་འབྱེད་པ་དང༌། སྐབས་སྐབས་སུ་བྱང་ཆུབ་སེམས་དཔའ་ཐོད་རྒལ་རེ་རེ་འབྱུང་བར་བྱིན་གྱིས་བརླབས་སོ། །དེ་ནས་སྤྲེའུ་སྒོམ་གྱིས་འབྲུ་སྣ་ལྔ་བོ་ཁྱེར་ནས་ཁ་བ་ཅན་གྱི་ཡུལ་གྱི་དབུས་ཀྱི་ས་ལ་བརྟེན་པ། ས་གཞི་ཉམས་དགའ་བ། བཀྲ་ཤིས་པ། རང་བཞིན་གྱི་ཡོན་ཏན་ཐམས་ཅད་འབྱུང་བ། འབྲུ་སྣ་ཚོགས་སྐྱེ་བ། དྲོ་བ། བཞེད་པ་རྣམ་པ་དགུ་དང་ལྡན་པ། རྒྱ་གར་ཡུལ་གྱི་མ་ག་ཏའི་ས་ཆ་འདྲ་བ་ལ་བརྟེན་པ་ཁ་བ་ཅན་གྱི་སྙིང་པོ་དེར་ཕྱིན་ནས། འབྲུ་སྣ་ལྔ་པོ་དེར་བཏབ་ནས་བཞག་གོ །དེ་ནས་དབྱར་ཟླ་གསུམ་ནགས་མ་བྱ་ཚོགས་ཅན་དུ་བུ་དང་ཚ་བོ་རྣམས་གསོས་ནས་བསྐྱངས་ཏེ། གསེར་སྒང་འབྲུ་སྣ་ལྔ་བོ་དེ་བཏབ་པའི་སར་བུ་དང་ཚ་བོ་རྣམས་ཁྲིད་ནས་ཕྱིན་པ་དང༌། འབྲུ་སྣ་ལྔ་བོ་དེ་ཁམ་ཤར་རེ་སྨིན་ནས་འདུག་གོ །དེ་ནས་བུ་ཚ་རྣམས་ལ་སྨྲས་པ། ཁྱེད་བུ་ཚ་བོ་རྣམས་ལ་འཕགས་པ་ཐུགས་རྗེ་ཆེན་པོ་ཨཱརྱ་པ་ལོས་གནང་བའི་ཟས་སྐལ་འདི་ཡིན་ནོ་ཟོ་དང་བྱས་པས། སྤྲེའི་སྒོམ་གྱི་ཕྲུ་གུ་བུ་ཚ་བོ་བཞི་བརྒྱ་བོ་ཤིན་ཏུ་དགའ་འོ། །ཡུལ་འཛིན་པ་ལ་སྔ་བ་ཡར་ལུངས་ཟོ་ཐང་འདི་ཡིན་ནོ། །དེ་ནས་ཁོང་རྣམས་ཚོས་ཟོས་པས་མ་རྨོས་པའི་ལོ་ཏོག་ལྟར་ཞིམ་པར་གྱུར་ནས། ཁོང་རྣམས་ཀྱིས་སྙེ་མའི་གྲངས་བགྲངས་པས་འབྲུའི་གྲངས་ཁྲི་ཁྲི་འདུག་ནས་ཡར་ལུངས་ཁྲི་ཐང་ཞེས་ཀྱང་བྱའོ། །དེ་ཡང་རོ་མཆོག་ཞིམ་པར་གྱུར་ནས་ཟོས་པས་བརྒྱགས་པར་གྱུར་ཏེ་བརྩེས་དང་བྱས་པས་རྩེད་མོ་རྩེས་ཡས་ཡར་ལུངས་རྩེས་དང་བྱ་བ་བྱུང་ངོ༌། །ཡང་འབྲུའི་ལོ་ཏོག་ལ་ཟོས་ཏེ་བརྒྱགས་པར་གྱུར་ནས་རྒྱུ་དང་བྱས་པས་ཡར་ལུངས་འོལ་ཁ་རྒྱུག་ཐང་བྱ་བ་བྱུང་ངོ༌། །དེ་ནས་སྤྲེའུ་ཕྲུག་རྣམས་འཛིངས་འཐབས་ནས་མ་འཆམ་སྟེ། གཅིག་ལ་གཅིག་མི་འཇིགས་ཏེ་ཚན་པ་བཞིར་ཆད་དེ་གྱེས་སོ། །དེར་མེས་པོ་སྤྲེའུ་སྒོམ་གྱིས་བུ་ཚ་བོ་ཡང་ཚ་རྣམས་ལ་བརྟག་གཞི་བྱས་པས། ཚན་པ་གཅིག་ནི་སྣ་ལྡོང་ངེས་བྱས་པ་ཞིག་བྱུང་ནས། མིང་རུས་ལྡོང་བྱ་བར་བཏགས་ཏེ། ལྡོང་ལ་རུས་ཆེན་པོ་བཅོ་བརྒྱད་བྱ་བ་བྱུང་ངོ༌། །དེའི་འོག་མ་ནི་འགྲམ་ཤ་སྟོང་ངེ་བྱས་པ་ཞིག་བྱུང་ནས། མིང་རུས་སྟོང་བྱ་བར་བཏགས་ཏེ། སྟོང་ལ་རྗེ་བཞི་ཁོལ་བརྒྱད་བྱ་བ་བྱུང་ངོ༌། །དེའི་འོག་མ་ནི་མགོ་སེ་ཡང་ངེས་པ་ཞིག་བྱུང་ནས། མིང་རུས་སེ་བྱ་བར་བཏགས་ཏེ། སེ་ལ་འཇུག་ལེ་སྤྱན་དགུ་བྱ་བ་བྱུང་ངོ༌། །དེའི་འོག་མ་ནི་འཚུལ་བ་སྨུག་སྒོ་རེ་བྱས་པ་ཞིག་བྱུང་ནས། མིང་རུས་སྨུ་བྱ་བར་བཏགས་ཏེ། སྨུ་ལ་ཀོ་ལེའི་འཕྲ་བརྒྱད་བྱ་བ་བྱུང་ངོ༌། །ལྡོང་དང་སྟོང་གཉིས། སེ་དང་སྨུ་གཉིས་ཏེ་ནང་གི་མིའུ་རིགས་བཞི་བྱ་བར་གྲགས་ཏེ། བོད་ཡུལ་ཁ་བ་ཅན་གྱི་མི་ལ་སྔ་བ་ཡང་དེ་རྣམས་ཡིན་ནོ། །དེ་རྣམས་འཕགས་པ་སྤྱན་རས་གཟིགས་འོད་དཔག་ཏུ་མེད་པ་ཞེས་ཀྱང་བྱ་སངས་རྒྱས་ཚེ་དཔག་མེད་ཅེས་ཀྱང་བྱ་བ་ཨ་མི་དེ་བ་དེའི་དྲུང་དུ་ཁ་བ་ཅན་གྱི་སེམས་ཅན་རྣམས་ཟང་ཟིང་གིས་བསྡུས་ནས་སྨིན་པར་དམ་བཅས་ཁས་བླངས་ནས། ཆད་བཙན་པ་བསྟན་པར་བྱས་པ་ཡིན་སྐད་དོ། །ཟང་ཟིང་གིས་བཏུལ་བའི་ལེའུ་སྟེ་བཞི་པོའོ།། །།