བོད་ཆེན་པོའི་སྲིད་ལུགས་དང་འབྲེལ་བའི་རྒྱལ་རབས་དེབ་ཐེར་དཀར་པོ་ཞེས་བྱ་བ་བཞུགས་སོ། །

      གཡོ་མེད་སྙིང་རྗེའི་དབང་ཕྱུག་སྤྱན་རས་གཟིགས། །ཡུད་ཙམ་ཁྲོས་པའི་སྤྱན་གྱི་སྡང་མིག་གིས། །གསེར་འབྲུག་སྡེར་ལྔའི་ཁྲི་ལ་འགྱིངས་པ་ཡི། །མཐུ་ལྡན་གནམ་གྱི་བུ་ཡང་འདར་བར་བྱས། །ཞེས་བྱ་བ་ནི་རྒྱལ་པོ་སྲོང་བཙན་སྒམ་པོའི་སྐབས་སོ། །
      སྲོང་བཙན་གྱི་རྗེས་སུ། བཙན་པོ་མང་སྲོང་མང་བཙན་བོད་ཀྱི་ཁྲི་ལ་བཞུགས་པ་ཡིན་ཅིང་། མང་སྲོང་འདི་སྔར་བཤད་པ་ལྟར་སྲོང་བཙན་གྱི་སྐུའི་ཚ་བོ་ཡིན། འདི་ཁྲི་ལ་འཁོད་དུས་སྐུ་ན་ཤིན་ཏུ་ཕྲ་བས། དོན་ལ་བློན་ཆེན་པོ་མགར་སྟོང་བཙན་གྱིས་སྲིད་ཀྱི་གཉེར་ཁ་ཐམས་ཅད་བཟུང་སྟེ་ཁྲི་ལོ་བཅོ་ལྔའི་བར་ཆབ་སྲིད་བསྐྱངས། འདིའི་ཁྲི་ལོ་ལྔ་པའི་ཤིང་སྟག་ལོ་ནས་བཟུང་འདུན་མ་བསྡུས་བྱ་བའི་སྒྲོས་བྱུང་ཞིང་། དེ་ཡང་རྗེ་བློན་ཐམས་ཅད་འཛོམས་ཏེ་ལོ་རེ་བཞིན་གྱི་ཆབ་སྲིད་སྐོར་ལ་བཀའ་མོལ་གནང་བའི་ཚོགས་འདུ་ཆེན་པོ་རེ་ཡོད་པར་སྣང་ལ། ཁྲི་ལོ་ཉེར་གསུམ་པའི་དུས་ནས་དབྱར་འདུན་དང་དགུན་འདུན་གྱི་ཚོགས་འདུ་གཉིས་དང་། ཡང་མདོ་སྨད་ཀྱི་འདུན་མ་བྱ་བའི་ཚོགས་འདུ་ཞིག་མདོ་སྨད་རང་དུ་ཚོགས་རྒྱུ་ཡོད་པ་སོགས་ཀྱང་འོག་གི་སྒྲོས་ལ་གསལ་ལོ། །
      ༼ཀ༽ གོང་དུ་དྲངས་པའི་འཕྲོས།༼སངས་རྒྱས་འདས་རྗེས་ཀྱི ༡༡༩༤ ལྕགས་ཕོ།༽ཁྱིའི་ལོ་ལ་བབས་ཏེ། བཙན་པོ་མྱེས་ཁྲི་སྲོང་བཙན་གྱི་སྤུར་ཕྱིང་བའི་རིང་ཁང་ན་མཁྱུད་ཅིང་བཞུགས་ཏེ། བཙན་པོ་དབོན་ཁྲི་མང་སློན་མང་བཙན་མེར་ཀེ་ན་བཞུགས་པར་ལོ་གཅིག ༼སངས་རྒྱས་འདས་རྗེས་ཀྱི ༡༡༩༥ ལྕགས་མོ།༽ཕག་གི་ལོ་ལ་བབས་ཏེ། བཙན་པོ་ཉེན་ཀར་ན་བཞུགས་ཤིང་། ཕྱིང་བར་བཙན་ཕོ་མྱེས་ཁྲི་སྲོང་བཙན་གྱི་མདང་བཏང་བར་ལོ་གཅིག ༼སངས་རྒྱས་རྗེས་འདས་ཀྱི ༡༡༩༦ པ་ཆུ་ཕོ།༽ བྱི་བའི་ལོ་ལ་བབས་ཏེ། བཙན་པོ་༼མང་སྲོང་མང་བཙན་ཕོ་བྲང་།༽ཉེན་ཀར་ན་བཞུགས་ཤིང་། བློན་ཆེན་༼མགར༽སྟོང་བཙན་གྱིས། གློ་བ་དང་རྩང་རྒྱའ་༼འབངས་སུ༽བཀུག་པར་ལོ་གཅིག ༼འདས་རྗེས་ཀྱི ༡༡༩༧ པ་ཆུ་མོ་གླང་གི་ལོ་ལ་བབས་ཏེ༽བཙན་པོ་ཉེན་ཀར་ན་བཞུགས་ཤིང་བློན་ཆེན་སྟོང་བཙན་གྱིས། གཡུག་ཏུ་གནག་ལིངས་༼ཏེ་ཤ་ཁྲལ་ཆེན་པོ༽བཏབ། ང༵་「ད」རྒྱ༵ལ་མ༵ང་པོ༵་རྗེས་ཞིང་གི་ཕྱིང་རིལ་༼ཏེ་ཡུལ་མིའི་སོ་ནམ་གྱི་གཉེར་ཁ༽བགྱིས། ར༵་ས༵ང་རྗེ༵་བློ༵ན་རིས་སྟག་རྷྱ་དང་ཞིང་གི་ཚོང་ཆེན་སྦྱར།༼འདི་ནི་སྟག་རྷྱ་བྱ་བའི་རྒྱལ་ཁབ་ཅིག་དང་བོད་གཉིས་ཚོང་འབྲེལ་བྱས་སམ་སྙམ།༽ཞང་ཞུང་ཡུལ་གྱི་མང་ན་༼ཏེ་རྫོང་དཔོན༽དུ་སྦུག་གྱིམ་བཙན་རྨང་ཆུང་བཅུག༼པ་སྟེ་བསྐོས། རྨང་ཆུང་འདི་སྔར་སྲོང་བཙན་གྱི་སྐབས་བང་ཆེན་དུ་བྱས་ཏེ་ཞང་ཞུང་ཡུལ་དུ་བཏང་བ་དེ་ཡིན་ནམ་སྙམ།༽མདོ་སྨད་དུ། ཀ༵མ༵་ཁྲི༵་བཟ༵ང་བྱེ༵་མད༵འ། ཐོང་མྱིས་བཀུམ་སྟེ་ཤ་གཉེརད་བ་༼སྟེ་དགྲ་ཤ་གླན༽པར་ལོ་གཅིག
      ༼འདས་རྗེས་ཀྱི ༡༡༩༨ ཤིང་ཕོ།༽སྟག་གི་ལོ་ལ་བབས་ཏེ། བཙན་ཕོ་མེར་ཀེ་ནའ་བཞུགས་ཤིང་། བློན་སྟོང་བཙན་གྱིས་༼ཡུལ༽མོང་ཕུ་སྲལ་འཛོང་དུའ་༼འདུན་མ༽བསྡུས་ཏེ། རྒོད་གཡུང་༼སྟེ་ཕོ་རྒོད་དང་ཕལ་བའི་ཁྱད་པར༽དབྱེ་ཞིང་། མཁོ་ཤམ་༼སྟེ་གྲབས་ཤོམ༽ཆེན་པོ་བགྱི་བའི་རྩིས་མགོ་བགྱིས་པར་ལོ་གཅིག ༼འདས་རྗེས་ཀྱི ༡༡༩༩ ཤིང་མོ།༽ཡོས་བུའི་ལོ་ལ་བབས་ཏེ། བཙན་པོ་མེར་ཁེ་ན་བཞུགས་ཤིང་། བློན་ཆེན་སྟོང་བཙན་གྱིས་༼ཡུལ༽འགོར་ཏིང་བཀའ་ཁྲིམས་ཀྱི་ཡི་གེ་བྲིས་པར་ལོ་གཅིག
      ༼འདས་རྗེས་ཀྱི ༡༩༠༠ མེ་ཕོ།༽འབྲུག་གི་ལོ་ལ་བབས་ཏེ། བཙན་པོ་མེར་ཀེ་ན་བཞུགས་ཤིང་། བློན་ཆེན་སྟོང་བཙན་གྱིས་གཙང་གི་ཡུལ་མར་དུའ་ཤ་ལིངས་༼ཏེ་ཤ་ཁྲལ༽ཆེན་པོ་བཏབ་པར་ལོ་གཅིག ༼འདས་རྗེས་ཀྱི ༡༩༠༡ མེ་མོ།༽སྦྲུལ་གྱི་ལོ་ལ། བཙན་པོ་མེར་གེ་ན་བཞུགས་ཤིང་། བློན་ཆེན་སྟོང་བཙན། དབྱར་སྙིང་དྲུང་གི་གཡོ་ཐལ་བ་གོང་ན་མཆིས་པར་ལོ་གཅིག ༼འདས་རྗེས་ཀྱི ༡༩༠༢ ས་ཕོ།༽རྟའི་ལོ་ལ་བཙན་པོ་མེར་ཀེ་ན་བཞུགས་ཤིང་། བློན་ཆེན་སྟོང་བཙན་དབྱར་སྙིང་དྲུང་གི་སྣ་རིངས་ན་མཆིས་པར་ལོ་གཅིག ༼ལོ་འདི་མགར་སྟོང་བཙན་རྒྱ་ནག་ཏུ་སླེབས་པའི་ལོ་ཡིན་པ་རྒྱལ་རབས་ང་པར་གསལ་བས། སྙིང་དྲུང་བྱ་བའི་ཡུལ་དེ་ཡང་མདོ་སྨད་ཀྱི་ཡུལ་ཞིག་ཡིན་ནམ་སྙམ་ལ། མཚོ་སྔོན་ལྷོ་ངོས་སུ་བློན་པོ་གསེར་ཆེན་བྱ་བའི་རི་ཡོད་པ་དེར་མགར་ཡུན་རིང་བཞུགས་ཚུལ་ཨ་མདོ་རྣམས་ལ་ངག་སྒྲོས་ཀྱང་སྣང་། དེས་ན་ལོ་རྗེས་མར་རྒྱ་ནག་ནས་སླར་འཁོར་ཏེ་འ་ཞ་ཡུལ་དུ་ཕེབས་པ་ཡིན་ནམ་སྙམ།༽
      ༼འདས་རྗེས་ཀྱི ༡༩༠༣ ས་མོ།༽ལུག་གི་ལོ་ལ་བས་ཏེ། བཙན་པོ་སྤྲགས་ཀྱི་ཤ་ར་ན་བཞུགས་ཤིང་། བློན་ཆེན་སྟོང་བཙན་འ་ཞ་ཡུལ་ན་མཆིས་ཏེ། ད་རྒྱལ་མང་པོ་རྗེས། མཚོ་ནག་སྟོང་རུར། རྒྱ་སེའུ་དེན་སང་དང་། ནོལ་ཐབས་༼སྟེ་གཡུལ་ཐབས༽བགྱིས་ཏེ། ད་རྒྱལ་ཀྱང་གུམ་ཞིང་བརྒྱད་ཁྲི་སྟོང་ལ་རྡུགས་པར་ལོ་གཅིག༼ཨ་མདོ་རྡོ་བིས་བྱ་བའི་ཡུལ་དུ་སྟོང་རུའི་མཚོ་ནག་ཏུ་གྲགས་པ་ཡོད་པས་ཡུལ་དེ་ཕྱོགས་སུ་དམག་འཐབ་པར་མངོན། རྒྱ་དམག་ཁྲི་ཕྲག་བརྒྱད་ཀྱིས་བོད་དམག་ཆིག་སྟོང་མ་ཐུབ་པར་ཐབས་རྡུག་པ་བྱ་བའི་དོན་ནོ། །༽ ༼འདས་རྗེས་ཀྱི  ༡༩༠༤ ལྕགས་ཕོ།༽སྤྲེའུའི་ལོ་ལ། བཙན་པོ་མལ་དྲོའི་སྐེ་བྱེ་ན་བཞུགས་ཤིང་། བློན་ཆེན་སྟོང་བཙན་འ་ཞ་ཡུལ་ན་མཆིས་པར་ལོ་གཅིག
      ༼ ༡༢༠༥ ལྕགས་མོ།༽བྱ་གག་གི་ལོ་ལ། བཙན་པོ་མེར་ཀེ་ན་བཞུགས་ཤིང་། བློན་ཆེན་སྟོང་བཙན་འ་ཞ་ཡུལ་ན་མཆིས་པར་ལོ་གཅིག༼ ༡༢༠༦ ཆུ་ཕོ།༽ཁྱིའི་ལོ་ལ། བཙན་པོ་རྐོང་གཡུག་ཏུ་འགོརད་མཛད་ཅིང་། བློན་ཆེན་སྟོང་བཙན་གྱིས། དུ་གུལ་དུ་ཞང་ཞུང་གི་འཁོས་༼ཏེ་གཉེར་ཁ༽གྱིས་པར་ལོ་གཅིག༼ལོ་འདི་མགར་གྱིས་གྲུ་གུ་ལ་དམག་རྒྱབ་པའི་ལོ་ཡིན་པས་དུ་གུལ་བྱ་བ་ཡང་གྲུ་གུ་ལ་ཟེར་རམ་སྙམ།༽༼ ༡༢༠༧ ཆུ་མོ།༽ཕག་གི་ལོ་ལ། བཙན་པོ་སྣམ་སྟོང་ན་བཞུགས་ཤིང་། བློན་ཆེན་སྟོང་བཙན་འ་ཞ་ཡུལ་ན་མཆིས་པར་ལོ་གཅིག༼ ༡༢༠༨ ཤིང་ཕོ།༽བྱི་བའི་ལོ་ལ་བཙན་པོ་བྱང་རོལ་དུ་བཤེགས་ཤིང་། བློན་ཆེན་སྟོང་བཙན་འ་ཞ་ཡུལ་ན་མཆིས་པར་ལོ་གཅིག༼༡༢༠༩ ཤིང་མོ།༽གླང་གི་ལོ་ལ། བཙན་པོ་ཟྲིང་གི་ལྡུ་ནག་ན་བཞུགས་ཤིང་། བློན་ཆེན་སྟོང་བཙན་འ་ཞུ་ཡུལ་ན་མཆིས་པར་ལོ་གཅིག ༼ ༡༢༡༠ མེ་ཕོ།༽སྟག་གི་ལོ་ལ་བབས་ཏེ། བཙན་པོ་ཟྲིང་གི་ལྡུ་ནག་སླད་མ་ན་བཞུགས་ཤིང་། བློན་ཆེན་སྟོང་བཙན་འ་ཞ་ཡུལ་ནས་སླར་འཁོརད་ཏེ་༼ཡུལ༽ཟྲིང་མདར། ཐོང་མྱིག༼འབྲས་ཀྱི་ནད་ཚ༽བྱུང་བར་ལོ་གཅིག ༼༡༢༡༡ མེ་མོ།༽ཡོས་བུའི་ལོ་ལ་བཙན་པོ་འོར་མང་དུ་གཤེགས་ཏེ། བློན་ཆེན་སྟོང་བཙན་རིས་པུར་གུམ་པར་ལོ་གཅིག༼ལོ་འདིར་མགར་གྲོངས་པ་ཡིན་ཞིང་། དེ་ཡང་དེབ་ཐེར་དམར་པོ་དང་སྔོན་པོར་རྒྱའི་རྒྱལ་རབས་དྲངས་པ་ལས། མགར་གྱིས་གྲོགས་བྱས་ནས་ལོ་བཅོ་ལྔ་རྒྱལ་སྲིད་བསྐྱངས་ཞེས་བྱུང་ལ། འདིར་ཡང་བྱི་བ་ནས་སྟག་གི་བར་གྱི་ལོ་བཅོ་ལྔ་ལ་མགར་གྱི་བྱ་བ་རྣམས་བྲིས་ནས། ལོ་དེའི་རྗེས་མར་མགར་གྲོངས་ཞེས་བྲིས་པ་རྣམས་གུང་འགྲིགས་པར་སྣང་།༽
      ༼ ༡༢༡༢ ས་ཕོ།༽འབྲུག་གི་ལོ་ལ་བཙན་པོ་སྒྲགས་ཀྱི་ཤ་ར་ན་བཞུགས་ཤིང་། དྲི་མ་ཁོལ་དུ་དགྲ་བཞི༼སྟེ་དམག་སྒར་༽བརྩིགས་པར་ལོ་གཅིག༼ ༡༢༡༣ ས་མོ།༽སྦྲུལ་གྱི་ལོ་ལ་བཙན་པོ་ཟྲིང་གི་ལྡུ་ནག་ན་བཞུགས་ཤིང་། འ་ཞ་མང་པོ་ཕྱག་བཙལ་ཏེ་གཏེའུ་བསྡུས་པར༼ཏེ་འབངས་སུ་སྡོད་པའི་གན་རྒྱ་ཕུལ་བར༽ལོ་གཅིག༼ ༡༢༡༤ ལྕགས་ཕོ།༽རྟའི་ལོ་ལ། བཙན་པོ་འོ་དང་ན་བཞུགས་ཤིང་། ཇི་མ་ཁོལ་དུ་རྒྱ་མང་པོ་བཏུངས་པར༼སྟེ་བསད་པར༽ལོ་གཅིག༼འདིའི་འོ་དང་བྱ་བ་ལྷ་ས་ལ་ཟེར་བར་མངོན། དེབ་སྔོན་དུ་མང་སྲོང་གི་ཁྲི་ལོ་ཉེར་གཅིག་པ་རྟའི་ལོ་ལ་བོད་དམག་གིས་ཐང་གི་རྒྱལ་ཁམས་རྒྱབ། ཡུ་གུར་གྱི་ཡུལ་ཐུད་བླངས་བྱ་བའི་ལོ་འདི་ཡིན་པར་འདུག༽༼ ༡༢༡༥ ལྕགས་མོ།༽ལུག་གི་ལོ་ལ་བབས་ཏེ། བཙན་པོ་དཔྱརད་ལྟམ་གྱི་ར་སྔོན་བཞུགས་ཏེ། དགུན་ཉི་མ་ངས་ཚལ་དུ་གཤེགས་ཤིང་། བཙན་མོ་སྙ་མོ་སྟེངས༼ཡུལ༽སྙ་ཤུར། སྤུངས་རྒྱ་རྒྱུག་ལ་བག་མར་གཤེགས་པར་ལོ་གཅིག ༼འདི་རྒྱལ་པོའི་སྐུ་མཆེད་ཅིག་ཡིན་པར་སྣང་། ༡༢༡༦ ཆུ་ཕོ།༽སྤྲེའུའི་ལོ་ལ་བབས་ཏེ། བཙན་པོ་དབྱརད་ཤངས་ཀྱི་སུམ་ཆུ་བོ་ན་བཞུགས་ཤིང་། དགུན་ན་བ་གླིང་དུ་གཤེགས་ཏེ། ནད་འབྲུམ་བུས་བསྙེངས་པར༼ཏེ་སྙུངས་པར༽ལོ་གཅིག ༼ཡོས་ལོ་ལ་མགར་གྲོངས་ནས། སྤྲེལ་ལོའི་བར་གྱི་ལོ་དྲུག་པོ་འདི་ལ། མགར་གྱི་ཚ་བོ་ཞང་བློན་པྲ་མོ་དང་། འབངས་ཀྱི་དཔྱའ་གཅོད་མཁན། དབའ་སུམ་སྣང་གིས་བྱས། དེ་ནས་མགར་སྙན་བློ་ཆེན་དུ་བསྐོས་པ་ཤོག་དྲིལ་ག་པར་གསལ།༽
      ༼ ༡༢༡༧ ཆུ་མོ།༽བྱ་གག་གི་ལོ་ལ་བཙན་པོ་དབྱར་སྟོད། ཕོ་དམ་མདོ་ན་བཞུགས་ཤིང་། དབྱར་སྨད་སུམ་ཅུ་པོར་སྤོར་ཏེ། འདུན་མ༼སྟེ་དབྱར་གྱི་ཚོགས་འདུ༽འདོང་ཀའི་ནེ་ཙོ་ལུང་དུ༼མགར་གྱི་བུ་ཆེ་བ༽མགར་བཙན་སྙ་ལྡོམ་བུ་དང་།༼བུ་འབྲིང་པོ༽ཁྲི་འབྲིང་བཙན་བྲོད་གཉིས་ཀྱིས་བསྡུས་ཏེ། འབྲོག་མཁོས་ཆེན་པོ་བགྱིས། དགུན༼བཙན་པོ༽ཕོ་བྲང་ཤངས་ཀྱི་རབ་ཀ་ཚལ་དུ་གཤེགས་ཤིང་།༼དགུན་གྱི༽འདུན་མ་དུངས་དུངས་ཀྱི་སྟག་ཚལ་དུ་བསྡུས་ཏེ། མུན་མིག་རྐང་ཏོན་བགྱིས། ཕ་ལོས༼འབངས་སུ༽བཀུག་པར་ལོ་གཅིག
༼ ༡༢༡༨ ཤིང་ཕོ།༽ཁྱིའི་ལོ་ལ་བབས་ཏེ། བཙན་པོ་དབྱར་ཟྲིང་ན་བཞུགས་ཤིང་། ལྕོག་ལ༼ངོ༽ལོག་པ་དང་། དགུན་ཚང་བང་སྣར་གཤེགས་ཏེ། འདུན་མ་གླག་གི་པུ་ཆུང་དུ་འདུས་ཏེ། ཞུགས་ལོང་དམར་པོ་རྩིས་པར་ལོ་གཅིག ༼ཞུགས་ལོངས་དམར་པོ་བྱ་བ་དམག་རུ་ཞིག་གི་མིང་ཡིན་ནམ་སྙམ།༽
      ༼ ༢༡༩ ཤིང་མོ།༽ཕག་གི་ལོ་ལ་བབས་ཏེ། དཔྱིད་ཞེ་ཤིང་དུ་གཤེགས་ཏེ། བཙན་མོ་ཁྲི་མ་ལོད་ཀྱིས། སྟོན་མོ་ཆེན་མོ་གསོལད།༼འདི་ལ་ཕྱི་ཁྲི་མ་ལོད་ཅེས་འབྱུང་བས། སྲོང་བཙན་གྱི་བཙན་མོ། ཁྲི་བཙུན་ཡིན་སྲིད་དམ་དཔྱད་ལ། རྒྱལ་མོ་འདི་དབང་ཤུགས་ཆེན་པོ་བྱུང་ཡོད་ཚོད་འདུག༽འབོན་ད་རྒྱལ་ཁྲི་ཟུང་གིས། གསེར་ཟངས་ཆེན་པོ་གསོལ་པ་དང་། དབྱརད་བལ་པོ་ན་བཞུགས་ཤིང་། བློན་བཙན་སྙས། ཤིམས་ཀྱི་གུ་རན་དུ་ཞང་ཞུང་གི་མཁོས་བགྱིས་ཏེ། གྲུ་གུ་ཡུལ་དུ་ལྟང་ཡོར་མཆིས། དགུན་བཙན་པོ་འོན་གྱི་སྣ་བོ་ནར་བཞུགས་པར་ལོ་གཅིག
      ༼ ༡༢༢༠ མེ་ཕོ།༽ བྱི་བའི་ལོ་ལ་བབས་ཏེ། དབྱརད་བཙན་པོ་སྤྲགས་ཀྱི་ཤ་ར་ན་བཞུགས་ཤིང་། དགུན་ཚང་བང་སྣ་ནས་ཁྲི་མང་སློན་ཏེ་༼མང་སྲོང་མང་བཙན༽དགུང་དུ་གཤེགས། བཙན་ཕོ་སྲས་ཁྲི་འདུས་སྲོང་། སྒེགས་ཀྱི་ལྷ་ལུང་དུ་བལྟམ་༼པ་སྟེ་སྐུ་འཁྲུངས།༽ བློན་བཙན་སྙས་གྲུ་གུ་ཡུལ་དུ་༼དམག༽དྲངས་ཏེ། ལྡུམ་བུ་ཁྲི་བཤོས་ཁྲོམ་འཚལ་པར་ལོ་གཅིག
      ༼ ༡༢༢༡ མེ་མོ།༽གླང་གི་ལོ་ལ། བཙན་པོ་ཡབ་ཀྱི་སྤུར༼ཏེ་སྐུ་གདུང༽བ་ལམ་ན་མཁྱུད་ཅིང༼སྟེ་སྦས་ཤིང༽བཞུགས་ཏེ། རྒྱེ་ཤིན་ཁུ་བུལ་བུ་དང་། ལྕོག་ལ་རིང་ཙུག་སྐོར་གཉིས། གློ་བ་རིངས་ཏེ། ཞང་ཞུང་ངོ་ལོག་ཅིང་། བཙན་པོ་ཁྲི་འདུས་སྲོང་ཉེན་ཀར་ན་བཞུགས་པར་ལོ་གཅིག
      ༼ ༡༢༢༢ ས་ཕོ།༽སྟག་གི་ལོ་ལ་བབས་ཏེ། བཙན་པོ་ཡབ་ཀྱི་རིང་༼སྟེ་སྐུ་གདུང༽བ་ལམ་མཁྱུད་ཅིང་༼སྟེ་སྦས་ཤིང༽བཞུགས་ཏེ་དགུན་སྟོད་འདུན་མ་གླིག་རྒྱུ་བྱེར་འདུས། དགུན་སྨད་མངན་དུ་འདུས་ཏེ། ར་སང་རྗེ་སྤུངས་རྒྱེ་རྒྱུག་དང་། ཁུ་ཁྲི་སྙ་དགྲུ་ཟུང་ལ་བཀྱོན་ཕབས་ཏེ། བཙན་པོ་ཉེན་ཀར་ན་བཞུགས་ཤིང་ཡབ༼གྲོངས་པའི་གསང༽བཏོལ་བར་ལོ་གཅིག
      ༼ ༡༢༢༣ ས་མོ།༽ཡོས་ཀྱི་ལོ་ལ། བཙན་པོ་ཉེན་ཀར་ན་བཞུགས་ཤིང་།༼ཕོ་བྲང༽ཕྱིང་བར་བཙན་པོ་ཡབ་ཀྱི་མདང་༼སྡེ་གདུང་མཆོད༽བཏང་བར་ལོ་གཅིག
      དཀྱུས།  འདིར་རྒྱལ་རབས་ཕན་ཚུན་རྭ་འཕྲོད་ལུགས་ངོ་མཚར་བ་འདི་ལྟར་སྣང་སྟེ། དེ་ཡང་མང་སྲོང་འདི་དོན་ལ་མེ་བྱིའི་ལོ་ལ་སྐུ་འདས་པ་ཡིན་མོད། དེབ་སྔོན་དུ་རྒྱའི་རྒྱལ་རབས་དྲངས་པར་ས་མོ་ཡོས་ལ་འདས་ཞེས་བཤད། རྒྱལ་རབས་༼ཀ༽པ་འདིར་གླང་དང་སྟག་གི་ལོ་ལ་ཡབ་ཀྱི་སྐུ་གདུང་སྦས་ནས་བཞག་ཅེས་བཤད། དེས་ན་ལོ་གསུམ་གྱི་རིང་ལ་བཙན་པོ་གྲོངས་པ་གསང་རྒྱ་བྱས་ནས་བཞག་སྟེ། ས་མོ་ཡོས་ཀྱི་ལོར་གདུང་མཆོད་བཏང་ནས་བཙན་པོ་འདས་སོ་ཞེས་ཀུན་ལ་གོ་བར་བྱས་པས། རྒྱ་ནག་ཏུ་ལོ་དེ་རང་ལ་བཙན་པོ་གྲོངས་པ་ལ་ཆ་བཞག་ནས། རྒྱའི་རྒྱལ་རབས་སུ་ཡང་། མང་སྲོང་ས་མོ་ཡོས་ལ་འདས་ཞེས་ཐོ་བཀོད་པར་གསལ་ལོ། །གསང་རྒྱ་བྱེད་དགོས་པའི་རྒྱུ་མཚན་ཡང་། མང་སྲོང་གྲོངས་པའི་ལོ་དེ་རང་ལ།
      འདུས་སྲོང་སྐུ་འཁྲུངས་པས། ལོ་གསུམ་ཙམ་མ་ལོན་པར་རྒྱལ་སར་འགོད་མི་ནུས་སྙམ་པས་ཡིན་ངེས། ལོ་ཚིགས་གཞན་རྣམས་ཀྱང་རྒྱལ་རབས་ང་པ་དང་བསྡུར་ནས་ཞིབ་ཏུ་དཔྱད་པར་འཚལ། དེ་ལྟར་རྒྱའི་རྒྱལ་རབས་སུ་བོད་ཀྱི་བཙན་པོ་རྣམས་ཁྲི་ལ་འཁོད་པ་དང་། འདས་པའི་ལོ་བྲིས་པ་ཕལ་ཆེར་ཞིག རྒྱ་ནག་ཏུ་གནས་ཚུལ་དེ་འབྱོར་པ་ན། བྲིས་པར་གསལ་བས་ཞིབ་ཏུ་ཤེས་པར་བྱ་ལ། བཙན་པོ་མང་སྲོང་རང་ལོ་བཅུ་གསུམ་པར་ཁྲི་ལ་འཁོད་ཅེས་དེབ་སྔོན་དུ་བྲིས་པ་དེ་ཡང་རྒྱའི་རྒྱལ་རབས་ལ་བརྟེན་པར་གསལ་མོད། གལ་ཏེ་མང་སྲོང་འདི་སྲོང་བཙན་གྱི་སྲས་ཀྱི་སྲས་ཡིན་པ་བདེན་ན་ཁྲི་ལ་བཞུགས་དུས་དགུང་ལོ་བཅུ་གསུམ་ལོན་སྟངས་མེད་པས། འདི་ཡང་སྔར་བཤད་པ་ལྟར་འདས་རྗེས་ཀྱི ༡༢༠༢ པ་ས་ཕོ་རྟའི་ལོ་ལ་མགར་རྒྱ་ཡུལ་དུ་སླེབས་ཚེ། བཙན་པོ་དགུང་ལོ་བཅུ་གསུམ་ལོན་ཚུལ་དང་། ཁྲི་ལ་བཞུགས་ཡོད་ཚུལ་སོགས་རྒྱ་ནག་པས་གསར་དུ་ཐོས་པ་ལ་བརྟེན། ལོ་བཅུ་གསུམ་ལོན་ཚེ་ཁྲི་ལ་བཞུགས་ཞེས་རྒྱའི་རྒྱལ་རབས་སུ་བྲིས་པར་གདོན་མི་ཟ་ལ། འགོས་ཀྱིས་དེ་ཀུན་དབྱེ་བསལ་མ་མཛད་པར་རང་ལོ་བཞི་བཅུ་རྩ་གཉིས་པ་ས་མོ་ཡོས་ལ་གྲོངས་སོགས་གསུངས་པར་སྣང་། དེས་ན་མང་སྲོང་རང་ལོ་བཞི་བའི་སྐབས་ཁྲི་ལ་འཁོད་ནས་དགུང་ལོ་ཉེར་བདུན་པ་མེ་བྱིའི་ལོ་ལ་འདས་པ་ཡིན་ནམ་སྙམ་སྟེ། གཟུར་གནས་དག་གིས་དཔྱད་པར་འཚལ།
      ཤོག་དྲིལ།༼ཁ༽པར་མང་སྲོང་མང་བཙན་གྱི་སྐོར་མ་བྱུང་བས། འདིར༼ང༽པ་ལས་དྲངས་ན།༼ང༽སྲོང་བཙན་གྱི་རྗེས་སུ། མཚན་མི་གསལ་བའི་བཙན་པོ་ཞིག་བོད་ཀྱི་ཁྲི་ལ་བཞུགས། ཞན་ཙིང་གི་ལོ་གསུམ་པ།༼སངས་རྒྱས་འདས་རྗེས་ཀྱི ༡༢༠༢ ༽ལ་མགར་སྟོང་བཙན་སླར་ཡང་རྒྱ་ནག་ཏུ་སླེབས། གོང་མ་ལ་གསེར་གཞོང་ཆེན་པོ་ཞིག་ཕུལ། བཙན་པོ་གསར་པའི་བཙུན་མོར། ཀོང་ཇོ་ཞིག་ཀྱང་གནང་བར་ཞུས། དེ་ནས་ལོ་ལྔ་སོང་བ་ན། གྲུ་གུ་རྣམས་རྒྱ་ལ་ཤོར་བ་མགར་གྱིས་ཐོས་ཏེ། དམག་བཟང་པོ་རྣམས་འཁྲིད་ནས་གྲུ་གུའི་ཐོག་ཏུ་སོང་། དེའི་ཚེ་གྲུ་གུའི་དཔོན་སོ༵་ཧོ༵་གེ༵་བྱ་བ་བོད་ཀྱི་ཕྱོགས་སུ་བྲོས་ཏེ། རང་ཡུལ་གྱི་ནང་རྣམས་ཐམས་ཅད་སྦྲན། དེར་བོད་དང་གྲུ་གུ་གཉིས་ཀ་གཡུལ་བཀྱེས། ཕྱོགས་གཉིས་ཀ་ནས་གོང་དུ་ཡི་གེ་ཕུལ་ཏེ། གྲོགས་ཏན་བྱེད་པར་ཞུས་ཀྱང་། གོང་ནས་སུའི་ཕྱོགས་ཀྱང་མ་གནང་། མཐར་བོད་དམག་གིས་གྲུ་གུ་ཕམ་སྟེ། གྲུ་གུའི་རྒྱལ་པོ་མུ་ཡུན་ནོ་ཧེ་པོ་དང་། རྒྱལ་མོ་ཝཾ་ཕཱ་གཉིས་འཁོར་དང་བཅས་པ། རང་ཡུལ་བོར་ཏེ་ལན་ཇོ་ཕྱོགས་སུ་བྲོས། བོད་དམག་གིས་གྲུ་གུའི་རྒྱལ་པོའི་རྗེས་སྙེགས་པ་འགོག་པའི་ཆེད་དུ། གོང་ནས་དམག་དཔོན་འཛེན་ཞེན་ཐེ་དང་། ཐུའུ་གུ་ཙེང་ཡུན་གཉིས། ལན་ཇོ་དང་། ཧྲན་ཇོར་བཏང་། པུ་དིན་ཁན་ལ་དམག་དཔོན་ཆེན་པོའི་ལས་ཀ་བསྩལ།
      དེའི་རྗེས་སུ་བོད་ཀྱི་བློན་ཆེན་འཇི༵ན་འཇིན་བྱ་བ་གྲུ་གུའི་མགོ་ལ་ནག་བསྐྱེད་པའི་ཆེད་དུ་སླེབས་ཀྱང་། གོང་ནས་མཇལ་འཕྲད་ཀྱང་མ་གནང་བར། བློན་པོ་ལ་བཀའ་བཀྱོན་པས། ཁོང་རང་སླར་ལོག་དགོས་པ་བྱུང་། དེའི་འོག་ཏུ་སླར་ཡང་བོད་ཀྱི་ཕོ་ཉ་ཞིག་བཏང་སྟེ། གྲུ་གུ་དང་བོད་གཉིས་འདུམ་བྱེད་དགོས་ན། རྒྱ་ནག་གི་ཞིང་ཆེན་ཆེ་ཤུའི་བྱ་བ་དེ་བོད་ལ་སྤྲོད་དགོས་ཚུལ་གོང་མ་ལ་ཞུས་ཀྱང་། གོང་ནས་གསན་དུ་མ་བཞེད། དེ་དུས་ཙ་ན་བོད་ཀྱི་བློན་ཆེན་མགར་སྟོང་བཙན་ཏེ་གྲོངས། མགར་འདི་ཡི་གེ་མི་ཤེས་ཀྱང་། རང་བཞིན་གྱིས་བློ་རྣོ་ཞིང་། ངང་ཚུལ་བརྟན་ལ། དམག་ཐབས་མཁས། བོད་དུ་ཁོང་ལ་མཐོང་ཆེ་ཞིང་། ཁོང་ལ་བརྟེན་ནས་བོད་ཀྱི་རྒྱལ་ཁམས་སྟོབས་ཤུགས་ཆེར་སོང་བ་ཡིན། ཁོང་པ་རྒྱའི་ཕོ་བྲང་དུ་ཡང་སླེབས་ཏེ། ཐེ་ཙུང་གི་སྐབས། གོང་ནས་ནུབ་ཕྱོགས་ཀྱི་སྐུ་སྲུང་དམག་དཔོན་བྱ་བའི་གོ་གནས་ཀྱང་བསྩལ།༼ཚལ་བའི་དེབ་དམར་དུ་དྲངས་པར། ཡཱང་ཡིའུ་ཡུའི་ཐ་མི་ཚུན་ཀུན་བྱ་བའི་གོ་གནས་མགར་ལ་གནང་ཞེས་བྲིས།༽གོང་མ་ཡང་ཁོས་སྨྲས་པའི་གཏམ་རྣམས་ལ་ཐུགས་ཤིན་ཏུ་མཉེས་པ་ཡིན། གོང་མའི་ཚ་མོ་ཞིག་ཀྱང་ཆུང་མར་གནང་།
      མགར་ལ་བུ་བཞི་སྟེ། མགར་བཙན་སྙ་ལྡོམ་བུ།༼ལོན་ཙིན་ལིན།༽མགར་ཁྲི་འབྲིང་བཙན་བྲོད།༼ལོན་ཙན་སུ།༽བློན་ཟི་མདོ་ཡེ། བློན་འབལ་ལོན་རྣམས་ལས། བཙན་སྙ་ལྡོམ་བུས་ཕའི་གོ་ས་བཟུང་། བུ་གཞན་གསུམ་དམག་དཔོན་དུ་བྱས་ཏེ། ལོ་དེ་རང་ལ་རྒྱའི་ས་མཚམས་སུ་དམག་དྲངས། འཇང་གི་རིགས་ཀྱི་ཞིང་ཆེན་བཅུ་གཉིས་བཅོམ། གོང་མའི་མདུན་གྲོས་པ་རྣམས་ནས། གྲུ་གུ་རྣམས་ལན་ཇོའི་ལྷོ་སྒོ་ཕྱོགས་སུ་འཇོག་རྩིས་བྱས། གོང་མ་རང་ཉིད་ནས་ཐོག་མར་བོད་ལ་གཡུལ་འགྱེད་པར་དགོངས་ཏེ། བློན་ཛ༵ན་ཅོ༵་དང་། ཡན་མོ་འབེན། དམག་དཔོན་ཅི་བྷི་ཧེ་ལི་རྣམས་མདུན་དུ་བོས་ཏེ་བཀའ་གྲོས་མཛད་པར། ཡན་མོ་འབེན་གྱིས་གོང་མ་ལ། ད་ལྟ་རང་ཡུལ་དུ་མུ་གེ་ཆེ་བས། དམག་བྱེད་པ་མི་འོང་བྱ་བ་ཞུས། ཅི་བྷི་ཧེ་ལི་ན་རེ། བོད་རྣམས་ནུབ་ཕྱོགས་ཀྱི་ས་ཐག་རིང་པོ་ན་སྡོད་ཅིང་། རང་རེའི་དམག་གིས་དེར་སླེབས་ཚེ་ཁོང་རྣམས་རི་ལ་འབྲོས་པར་ངེས། རི་ལ་རྗེས་དེད་པས་རྗེས་མི་ཟིན། སླར་དཔྱིད་ཀ་ཤར་བ་དང་མཉམ་དུ། ཁོང་རྣམས་ཕྱིར་འོངས་ཏེ་སླར་ཡང་གྲུ་གུ་བཅོམ་པར་ངེས། དེས་ན་རེ་ཞིག་གྲུ་གུ་རྣམས་ལ་གྲོགས་ཏན་བྱེད་རྒྱུ་བཞག་ན་ལེགས། དེ་ནས་བོད་རྣམས་ཀྱིས་རང་རེ་ལ་དམག་བྱེད་པའི་སྟོབས་ཤུགས་མི་འདུག་སྙམ་ནས། དྲེགས་པ་སྐྱེས་ཤིང་སོས་དལ་དུ་སྡོད་པའི་སྐབས། གློ་བུར་དུ་དམག་དྲངས་ན་རྒྱལ་ཁ་ལོན་པར་ངེས་ཟེར། བློན་ཛ༵ན་ཅོ༵་ན་རེ། ད་ལྟ་གྲུ་གུ་རྣམས་ཉམས་ཐག་པའི་སྐབས་སུ་གྲོགས་མ་བྱས་ན། ཡུལ་དེ་རྩ་བ་ཉིད་འཇིག་པར་ངེས། དེ་བས་ད་ལྟ་རང་དམག་དྲངས་ཏེ་གྲུ་གུ་བོད་ཀྱི་ལག་ཏུ་མ་ཤོར་ཙམ་བྱུང་ན། རྗེས་སོར་ཐབས་ཅི་ཡང་བྱེད་དུ་གཏུབ་ཟེར། དེ་ལྟར་གྲོས་ལ་མ་མཐུན་པས་དོན་ཐག་མ་ཆོད་པར་ལུས་ཤིང་། གྲུ་གུ་རྣམས་ཡུལ་སྤོ་བའི་ཐབས་ཀྱང་མ་འགྲིག ༼འདས་རྗེས་ཀྱི ༡༢༠༦ པའི་ལོ་ལ།༽བོད་དམག་སླེབས་ཏེ། ནུབ་ཕྱོགས་ཀྱི་གྲུ་གུ་ཚོ་ཆེན་བཅུ་ཆབ་འོག་ཏུ་བསྡུས། ཞེང་ཕེན་གྱི་ལོ་དང་པོ་༼ ༡༢༡༤ པའི་ལོ།༽ལ་སླར་ཡང་བོད་དམག་སླེབས་ཏེ། རྒྱའི་ཞིང་ཆེན་བཅོ་བརྒྱད་ཙམ་བཅོམ། བོད་དང་ལི་ཡུལ་པ་གཉིས་གྲོགས་སུ་བསྡེབས་ནས་གུ་ཅིའི་གྲོང་ཁྱེར་གྱི་ལྕགས་རི་ཡང་བཤིག དེ་ནས་རྒྱའི་ཞིང་ཆེན་བཞི་བོད་ཀྱི་ལག་ཏུ་ཤོར། གོང་ནས་དམག་དཔོན། ཟེ་ཞིན་ཀེ་དང་གོ་ཞི་ཕཱན་གཉིས་ལ་བཀའ་ཕབ་སྟེ། དམག་འབུམ་ཕྲག་གཅིག་ཙམ་འཁྲིད་ནས། ཏཱ་ཚོན་ཡུལ་དུ་སླེབས། དེར་བུའུ་ཧེའི་ཕྱོགས་སུ་འགྲོ་གྲབས་བྱས་པ་ན། དམག་དཔོན་ཟེ་ཞིན་ཀེ་ན་རེ། ཡུལ་དེ་ཐག་རིང་བས། དམག་གི་ཁལ་རྟ་དང་བཅས་བགྲོད་པར་དཀའ། དེ་བས་ཁལ་རྟ་རྣམས་རྟ་ཕཱི་ལིན་དུ་ཤིང་གི་རྭ་བས་བསྐོར་ཏེ་བཞག་ནས། དམག་རྐྱང་པ་གང་མགྱོགས་སུ་སོང་སྟེ། བོད་ཀྱི་སྟེང་དུ་གློ་བུར་དུ་འཛིང་ན་རྒྱལ་ཁ་ལོན་པར་ངེས་ཟེར། འོན་ཀྱང་གོ་ཞི་ཕཱིན་ཡང་ཁོ་རང་དང་གོ་གནས་མཉམ་པའི་དམག་དཔོན་དུ་སོང་གཤིས། ཁོས་ངག་ལ་མ་བརྩིས་པར། དམག་མི་ཁལ་རྟ་དང་བཅས་པ་བོད་ཀྱི་དཔུང་དང་ཉེ་བར་འཁྲིད་དེ་འཐབ་པས། རྒྱ་དམག་རྣམས་ཤིན་ཏུ་འཚབས་ཆེ་བར་ཕམ་སྟེ། ཁལ་རྟ་རྣམས་ཀྱང་བསྐྱུར་ནས་སླར་བྲོས། ཟེ་ཞིན་ཀེ་དམག་དང་བཅས་པ་ཏཱ་ཚོན་བར་དུ་སླེབས། འོན་ཀྱང་དེར་ཡང་བོད་དམག་གིས་རྗེས་དེད་ནས་སླེབས་ཏེ། རྒྱ་རྣམས་འཚབས་ཆེ་བར་ཕམ། དམག་ཕལ་ཆེར་བསད་ཅིང་རྨས། མཐར་བོད་ཀྱི་བློན་ཆེན་མགར་བཙན་སྙ་དང་། ཟེ་ཞིན་ཀེ་གཉིས་ཀྱིས་བར་དུ་འདུམ་བྱས་ཏེ་དམག་དཔོན་སླར་རྒྱ་ཡུལ་དུ་ལོག དེ་ལྟར་བོད་ཀྱི་དམག་གིས་གྲུ་གུ་ཕམ་སྟེ། གྲུ་གུའི་ས་ཐམས་ཅད་ཆབ་འོག་ཏུ་བྱས། གོང་ནས་སླར་ཡང་དམག་དཔོན་ཛན་ཅོ་དམག་གསར་པ་དང་བཅས། བོད་ལ་འཐབ་ཏུ་བཏང་ཡང་། དམག་དཔོན་ལམ་དུ་ཤི་སྟེ་དམག་ཕྱིར་ལོག་༼འདས་རྗེས་ཀྱི་ལོ ༡༢༡༦༽ལོ་ལ་ཀྱི་བློན་པོ་འཇིན་འཇིན་རྒྱ་ནག་ཏུ་བཏང་། བློན་པོ་དེ་གཞོན་དུས་སུ་རྒྱ་ནག་གི་ཡིག་གྲྭར་ཡོན་ཏན་སྦྱངས་པའི་མཁས་པ་ཡིན། གོང་ནས་ཁོ་མདུན་དུ་བོས་ཏེ། བོད་ཡུལ་དང་བཙན་པོའི་སྐོར་རྣམས་འདྲི་རྟོག་མཛད་པར། བོད་བློན་ན་རེ། ངེད་ཅག་གི་བཙན་པོ་ནི་སྟོབས་ཤུགས་དང་མཁྱེན་རྒྱ་རྗེ་སྔ་མ་ལས་ཀྱང་ལྷག་པ་ཙམ་བཞུགས། རྒྱལ་སྲིད་དོ་དམ་ཆེ་ཞིང་། བློན་རྣམས་ཀྱིས་དབུ་བསྐོར་དུ་མི་བཏུབ་པ་ཞིག་ཡིན། བོད་འབངས་རྣམས་གྲང་བའི་ཡུལ་དུ་སྡོད་པས། སྟོན་ཐོག་ཉུང་ཞིང་ནོར་ཕྱུགས་སྐྱོང་། བུའི་ཧེ་ཙེའི་བྱང་དུ་དབྱར་ཁ་ཡང་གངས་མི་བཞུ། མི་རྣམས་དབྱར་དུས་སུ་བལ་གྱི་ཕྱིང་པ་དང་། དགུན་ནི་སློག་པ་གྱོན་ཏེ་ལུང་ཁུག་ཏུ་བབས་ནས་སྦྲ་ནག་དང་སྤྱིལ་པོ་ཕུབ་སྟེ་སྡོད། གཞན་རྩྭ་ཆུ་གར་བཟང་ལ་བལྟས་ནས། གནས་འཕོ་སྐྱེལ་བྱེད། ཚོང་ཟོང་ནི་རྒྱའི་ཡུལ་ལས་ཤིན་ཏུ་དཀོན། འོན་ཀྱང་དབུལ་ཕྱུག་ཐམས་ཅད་སེམས་གཅིག་ཏུ་མཐུན་ཞིང་། གཅིག་གྲོགས་གཅིག་གིས་བྱེད་པས་བོད་ཀྱི་རྒྱལ་ཁབ་སྟོབས་ཤུགས་ཆེ་བའི་རྒྱུ་མཚན་ཡང་དེ་ཡིན་ཞེས་ཞུས། དེར་གོང་མས། འོ་ན་ཁྱོད་བོད་དང་གྲུ་གུའི་རྒྱལ་རིགས་གཉིས་གཉེན་ཚན་དུ་གཏོགས་པས་མཐུན་འགྲིག་བཟང་པོ་དགོས་རྒྱུ་ལ། གྲུ་གུའི་དཔོན་པོ་ཟོ་ཧོ་ཀེ་རང་ཡུལ་ལ་ངོ་ལོག་སྟེ་བོད་དུ་བྲོས་པར། བོད་ཀྱི་བཙན་པོས་ཁོ་ལ་གོ་གནས་སྤྲད། དེ་ནས་བོད་དམག་དྲངས་ཏེ་གྲུ་གུ་བཅོམ། ངེད་ཀྱིས་དམག་དཔོན་ཟེ་ཞིན་ཀེ་འདུམ་བྱེད་དུ་བཏང་བར་བོད་དམག་གིས་ད་དུང་། མུ་ཡོན་བཅོམ་ཞིང་། ངེད་ཅག་གི་ལན་ཇོ་ཡང་བཅོམ་པ་དེ་ཅི་ཡིན་གསུངས་པར། བོད་ཀྱི་བློན་པོ་ཡར་ལངས་ཏེ་གོང་མ་ལ་ཕྱག་ཕུལ་ནས། ཁོ་བོ་ནི་རྗེ་བཙན་པོས་གོང་མ་ལ་སྐྱེས་འབུལ་དུ་བཏང་བ་ལས། གཞན་ལས་སུ་བྱ་བ་གང་ཡང་མེད་ཅེས་ལན་མ་ཞུས་པས་གོང་མ་ཡང་མཉེས།༼འདིར་ཟེ་ཞིན་ཀེ་དམག་བྱེད་དུ་བཏང་བ་ལ། འདུམ་བྱེད་དུ་བཏང་བ་ཞེས་མཛེས་མོས་ཀྱིས་གསུང་བྱོན་པར་སྣང་།༽
      ཞང་ཡོན་གྱི་ལོ་གསུམ་པ། ༡༢༡༩ བའི་ལོ་ལ། བོད་ཀྱི་བློན་པོ་ཏོ་རེ་འཕན་བུ་བྱ་བ་རྒྱ་ལ་སླེབས་ཏེ། བོད་དང་འདུམ་བྱེད་པར་ཞུས་ཀྱང་གོང་ནས་མ་གསན། ལོ་དེའི་རྗེས་མར། བོད་དམག་གིས། ཤ་ཇོ། ཀོ་ཇོ། ཧེ་ཇོ། ཕཱིན་ཇོ་རྣམས་བཅོམ། དཔོན་པོ་དང་འབངས་རྣམས་བསད་ཅིང་། ནོར་ཕྱུགས་རྣམས་འཕྲོག་སྟེ་འཁྱེར། དེར་གོང་ནས་བཀའ་ཕབ་སྟེ། དམག་སྒར་གཉིས་ལས་ཡན་ལག་བཅུ་གཉིས་ཡོད་པའི་དཔུང་ཞིག་དཔོན་གུང་ལོ་ཞན་ལ་འཁྲིད་དུ་བཅུག་ནས། ཏ་ཇོའི་ཕྱོགས་སུ་བཏང་། དཔུང་ཡན་ལག་གཉིས་ཡོད་པ་ཞིག་དམག་དཔོན་ལི་ལོན་གྱིས་འཁྲིད་དེ་ལན་ཇོ་ལ་འགྲོ་རྒྱུ་བྱས་ཀྱང་། དམག་དཔོན་གཉིས་རྒྱལ་ས་ནས་མ་སོང་བར་སྡོད་ཡོད་པའི་བར་ལ། སླར་ཡང་བོད་དམག་སླེབས་ཏེ། ཐེ་ཇོ་བཅོམ་ཞིང་། གྲོང་ཁྱེར་མི་གོང་དང་། ཏིན་ལང་གཉིས་ཀ་བཟུང་། ཕྲུ་ཇོ་ཡང་བཅོམ་སྟེ། དེར་ཡོད་པའི་རྒྱ་དམག་རྣམས་ཕམ་པར་བྱས། དེའི་དོན་དུ་དམག་དཔོན་ཟི་ཞིང་ཀེ་ལ་གོང་ནས་བཀའ་ཕེབས་ཏེ། ཏོ་ཧེའི་ཡུལ་དུ་བཏང་ཡང་། ཁོས་བོད་དང་དམག་མ་འཐབ་པར་རང་དགར་བསྡད། དེ་དུས་བོད་རྣམས་གྲུ་གུ་དང་བསྡེབས་ནས། ཀན་ཟིའི་བྱང་ཕྱོགས་ཀྱི་གྲོང་ཁྱེར་ཨན་ཤི་བཅོམ། གོང་ནས་ལི་ཞིན་ཀེའི་ཚབ་ཏུ། རྒྱལ་སྲིད་ཀྱི་ཡིག་མཁན། ལི་ཟིང་ཞོན་དམག་དཔོན་དུ་བསྐོས་ཏེ་ཏོ་ཧེ་ལ་བཏང་། དེ་ཡང་ཁོ་དམག་དཔོན་ཆེན་པོ་ཟེ་ཞིན་ཀེ་དང་སེམས་མི་མཐུན་པས། དམག་དཔོན་གྱི་བཀའ་ལ་མ་བརྩིས་སྟབས། དཔོན་ཆེན་ཀྱང་མ་དགའ་སྟེ། ཁོ་ལ་དམག་དཔོན་གྱི་ཤེས་རྒྱ་མེད་པར་རིག་ནས། བསམ་ངན་བྱས་ཏེ་ནུབ་ཕྱོགས་ཀྱི་དམག་དཔོན་དུ་བཙན་ཐབས་ཀྱིས་བསྐོས་པ་ཡིན། དེའི་ཕྱིར་ལི་ཟིང་ཞོན་གྱིས་གོང་དུ་དགོངས་པ་ཞུས་ཀྱང་མ་གནང་། དེར་ཁོ་རང་དབང་མེད་པར་བོད་ལ་དམག་འཐབ་ཏུ་འགྲོ་དགོས་པ་བྱུང་། ལི་ཟིང་ཞོན་བོད་ཀྱི་སྟེང་དུ་དམག་ལ་ཆས་པ་ན། གོང་མ་རང་གིས་ཀྱང་སྐྱེལ་ཐུང་མཛད། ད་དུང་གྱན་ནན་དང་། ཁྲན་ནན་ཡུལ་གཉིས་ནས་ཀྱང་དམག་གཏོང་དགོས་པའི་བཀའ་ཕབ། དམག་དེ་རྣམས་ལོང་ཇི་ལ་སླེབས་ནས་བོད་དང་འཐབ་པས་བོད་རྣམས་ཕམ། དེར་ལི་ཟིང་ཞོན་གྱིས་དམག་ཆིག་འབུམ་ལྔ་ཁྲི་འཁྲིད་དེ། བོད་ཀྱི་དམག་དཔོན་ཆེན་པོ་མགར་བཙན་སྙ་དང་ཐུག་ནས། མཚོ་སྔོན་པོའི་འགྲམ་དུ་དམག་ཆེན་འཐབ་པས། ལི་ཟིང་ཞོན་གྱི་གྲོགས་ལི་ཞོན་ལི་བྱ་བ་དམོག་ནང་དུ་འགྲོ་ཐལ་ཆེ་ནས་གཡུལ་དུ་བསད། ལི་ཟིང་ཞོན་གྱིས་དེ་ལ་རྒྱབ་གནོན་ཅི་ཡང་བྱེད་མ་ནུས་པར། དམག་རྣམས་གོ་རིམ་མེད་པར་འཁྲིད་ནས་ཅིན་ཕཱུན་ལང་དུ་བྲོས། འོན་ཀྱང་ཡུལ་དེ་ས་རོང་དོག་པས། བོད་དམག་རྣམས་དེར་སྔོན་ལ་སླེབས་ཏེ་དམག་སྒར་བཏབ་ནས་རྒྱ་དམག་གི་ལམ་བཀག་པར། དམག་དཔོན་ཧེ་ཅི་ཆན་ཟེར་བ་ཞིག་གིས། དམག་སྟོབས་རྩལ་ཅན་ལྔ་སྟོང་འཁྲིད་ནས། མཚན་མོ་ཞིག་ལ་བོད་ཀྱི་སྒར་ཐོག་ཏུ་རྒྱུགས་པས། བོད་རྣམས་འཇིགས་དྲགས་ཏེ། གཅིག་སྟེང་དུ་གཅིག་འགྱེལ་བཞིན་ཕྱིར་བྲོས་ནས་ལམ་ཕྱེས། དེར་ལི་ཟིང་ཞོན་གྱིས་རྒྱ་དམག་ལྷག་མ་འཁྲིད་ནས་ཤ་ཇོ་ལ་ལོག དེ་ལྟར་རྒྱའི་དཔུང་ཤིན་ཏུ་འཚབས་ཆེ་བར་ཕམ་པ་ལ། གོང་མ་ཡང་ཐུགས་འཁྲུགས་ཏེ། བློན་པོ་རྣམས་བསྡུས་ནས་བོད་དམག་འགོག་ཐབས་ཀྱི་གྲོས་མཛད། དེར་གོང་མའི་ཞལ་ནས། ཁོ་བོ་ནི་ཁྲབ་གྱོན་མ་མྱོང་ཞིང་དམག་ལ་འགྲོ་མ་མྱོང་སྟེ། འོན་ཀྱང་སྔར་རང་རེས་ཀོ་ལི་རྣམས་ཕབ། དེ་ནས་ལོ་ཤས་བར་དམག་འཐབ་བྱས། སླར་རྒྱ་ཡུལ་དུ་ནང་འཁྲུག་བྱུང་། ད་ལྟ་བོད་ཀྱི་དམག་སླེབས་པས་སེམས་ཁྲལ་ཤིན་ཏུ་ཆེ། ངེད་ཀྱི་དམག་དཔོན་ལི་ཙི་གྲོངས་ནས་བཟུང་། དམག་དཔོན་བཟང་པོ་གཅིག་ཀྱང་མ་བྱུང་། ད་ལན་ཀྱང་ཧེ་ཏེ་ཕྱོགས་སུ་སྡོད་པའི་དམག་རྣམས་ཀྱིས་དགྲ་ཁེགས་པར་ངེས་ཀྱང་། དམག་དཔོན་རྣམས་ངེད་ཀྱི་བཀའ་ལ་མ་བརྩིས་པས་ཕམ། ད་ཅི་བྱེད་ཀྱི་གྲོས་སྟོན་ཅིག་གསུངས་པར། བློན་ཁ་ཅིག་གིས། བོད་དང་འདུམ་བྱེད་པ་འཐད་ཟེར། ཁ་ཅིག་གིས། རེ་ཞིག་བསྒུགས་ནས་དམག་རྗེས་སོར་བྱེད་པ་འགབ་སོགས་ཞུས།
      ཅའོ་ལུན་གྱི་ལོ་དང་པོ༼འདས་རྗེས་ཀྱི ༡༢༢༣ པ།༽ལ། བོད་ཀྱི་བཙན་པོ་སྐུ་འདས་ཤིང་། སྲས་ཁྲི་འདུས་སྲོང་དགུང་ལོ་བརྒྱད་ལ་ལོན་པ་ཞིག་ཁྲི་ལ་འཁོད་དོ། །
      མི་བཟད་དགུན་གྱི་རླུང་དང་ལྷན་ཅིག་ཏུ། །མི་སྡུག་ཁ་བའི་ཡུལ་ནས་ཕྱིར་འཐོན་པའི། །མི་ཐུབ་སེང་གེ་དཀར་མོའི་དམག་དཔུང་ལ། །མི་ཡི་དབང་པོ་འཇིགས་པ་ཅིས་མི་བདེན། །ཞེས་བྱ་བ་ནི་བཙན་པོ་མང་སྲོང་མང་བཙན་གྱི་སྐབས་སོ། །མདོ་སྨད་པ་དགེ་འདུན་ཆོས་འཕེལ་གྱིས་མཛད་པའོ། །རང་སྡེའི་རིགས་ལ་ཞེན་པ་དཀར་པོའི་མདངས། །རང་བྱུང་སྙིང་གི་དབུས་ན་གནས་པ་འདིས། །རང་ཡུལ་ཁ་བ་ཅན་གི་རྗེ་འབངས་ལ། །རང་གི་ནུས་པས་སྲི་ཞུ་ཅུང་ཟད་སྒྲུབ། །ཅེས་རྒྱལ་རབས་རྩོམ་འཕྲོ་ཅན་ཏེ་རེ་ཞིག་རྫོགས་སོ།། །།
      མཇུག་རྩོམ་འདི་ཉིད་ཀྱང་མཛད་ཅིང་། ལྷག་པར་ཆོས་ཀྱི་རྒྱལ་པོ་སྲོང་བཙན་ནས། ད་ལྟའི་བར་གྱི་དེབ་ཐེར་ཞིག་སྒྲིག་དགོངས་ཡོད་ཀྱང་། རྐྱེན་མང་གིས་བར་གཅོད་དུ་གྱུར་ཏེ་འཕྲོ་ཅན་དུ་ལུས་པ་འདི་ཉིད་པར་དུ་བསྐྲུན་ཆེད་ཞལ་འདེབས་གནང་བ་རྣམས་དམ་པ་གང་གིས་སྤྱན་གྱི་འབྲས་བུ་ལྟར་བསྐྱངས་པ་ཕྲན་ཧོར་ཁང་སྲས་བསོད་ནམས་དཔལ་འབར་ནས་དོ་དམ་གྱིས་བསྐྲུན་ཏེ།
སྨྲས་པ།
འཇིག་རྟེན་མེས་པོའི་དཔལ་ལ་འགྲན་བཟོད་པའི། །
མཁྱེན་ལྡན་གཟུར་གནས་འགའ་ཡིས་མཐུན་རྐྱེན་གྱིས། །
སྦྱར་བའི་ཕྱག་རྫས་མེས་པོའི་རལ་པའི་ཀླུང་། །
སྔོན་མེད་དེབ་དཀར་ལྗོན་པའི་རྩ་བར་སིམ། །
འདི་ལས་བྱུང་བའི་དགེ་བའི་འབྲས། །
རོ་མངར་གཡུར་དུ་ཟ་བའི་བཅུད། །
བོད་རིགས་སྤྱི་ཡི་དཔལ་ཐོབ་ནས། །
མངའ་བདག་རྒྱལ་པོས་རྗེས་བཟུང་ཤོག །
དགེ་ལེགས་འཕེལ།། །།