གནས་མཆོག་ཁ་བ་དཀར་པོ།

ཀྱེ་ཧོ་རི་བོ་དེ་ཡི་རྩེ་མོ་ལ།།
ཞི་བའི་ལྷ་ཚོགས་ནམ་མཁའི་སྤྲིན་ལྟར་གཏིབ།།
རི་བོ་དེ་ཡི་སྐེད་པའི་ཞིང་ཁམས་ལ།།
ཁྲོ་བོ་ལྷ་ཚོགས་བར་སྣང་སྐར་ལྟར་འཁྲུག།
རི་བོ་དེ་ཡི་རྩ་བ་ཡན་ཆད་ལ།།
བོན་སྐྱོང་སྲུང་མ་དྲག་པོའི་སེར་ལྟར་འདྲིལ།།
རི་བོ་དེ་ཡི་ཕྱོགས་བཞི་མཚམས་བརྒྱད་ལ།།
བོན་གཏེར་ལ་སོགས་རིན་ཆེན་གཏེར་ཁ་དང་།།  
སྦས་ཡུལ་རྣམས་སུ་མི་དང་འབྲུ་གཏེར་ཡོད།།
ཁྱད་པར་རྩེ་ལ་བླ་མ་རིག་འཛིན་གནས།།
སྐེད་པར་ཡི་དམ་མཁའ་འགྲོ་གནས་པ་སྟེ།།
རྩ་བར་བོན་སྐྱོང་སྡེ་བརྒྱད་ཀླུ་ཡི་གནས།།
སྟེང་ན་ལྷ་ཡི་སྤྲིན་དཀར་བླ་བྲེས་ཕུབ།།
འོག་ན་ཀླུ་ཡི་རྒྱ་མཚོས་ཡོན་ཆབ་འབུལ།།
བར་ན་མི་ཡིས་དད་གུས་བསྟོད་པའི་གནས།།
འདས་དང་མ་འདས་དྷ་ཀི་དེ་རུ་འཚོགས།།
མ་རྒྱུད་སྒྲུབ་པ་གང་བྱས་མྱུར་དུ་འགྲུབ།།
རི་བོ་དེ་ལ་སྒོམ་པའི་རྣལ་འབྱོར་རྣམས།།
དོན་གཉིས་མཐར་ཕྱིན་སངས་རྒྱས་ས་ནོན་འགྱུར།།ཞེས་དང་།
སྒོས་སུ་རང་བཙན་ཁ་བ་དཀར་པོ་ལ།།
རིག་འཛིན་མཁའ་འགྲོ་ཐམས་ཅད་འདུས་པའི་གནས།།
སྒྲུབ་གནས་གསང་ཕུག་སྦས་ཡུལ་གྲངས་མང་ཡོད།།
ཤར་ཕྱོགས་གླང་ཆེན་འདྲ་བའི་རི་བོ་ལ།།
ཞི་བའི་བོན་གཏེར་གཡུང་དྲུང་རྒྱས་བཏབ་ཅིག།
སྒྲུབ་གནས་ལྔ་ལ་མཁའ་འགྲོའི་གསང་ཕུག་ཡོད།།
རིག་འཛིན་རྣམས་ཀྱི་ཚེ་ཆུ་རང་རྡོལ་ཡོད།།
བླ་ཆེན་དྲན་པའི་ཞབས་རྗེས་གསུམ་ཙམ་ཡོད།།
གྲོང་ཁྱེར་དཔའ་བོ་དཔའ་མོའི་འཚོགས་ར་ཡོད།།
ཤ་མདོག་དཀར་ལ་མིག་ཟླུམ་ལུས་འཇམ་དར།།
སྐད་སྙན་སེམས་དགེའི་རྒྱུན་མི་འཆད།།
དྲན་པས་བྱིན་རླབས་རྒྱ་ནག་མཁའ་འགྲོའི་རིགས།།
གནས་སྲུང་རྒྱལ་རིགས་ཀླུ་ཡིས་དབང་བྱེད་འགྱུར།།
བྱང་ཕྱོགས་རྟ་མཆོག་འདྲ་བའི་རི་བོ་ལ།།
རྒྱས་པ་ཚེ་སྒྲུབ་འཕྲུལ་བོན་མང་བར་འདུག།
ཕྱག་ཆ་རིགས་རྟགས་རྒྱན་ཆ་གྲངས་མང་དང་།།
གསེར་དང་བཅུད་ལེན་པྲ་ཕུད་གྲངས་མང་ཡོད།།
དབང་གི་ཐོད་ཞལ་འདྲ་བའི་ས་གནས་སུ།།
དངུལ་གྱི་མཚོ་མོ་མཐོང་ཆོག་སྒྲིབ་སྦྱངས་ཡོད།།
སྟག་གཟིགས་མཁའ་འགྲོ་ལྔ་ཡི་བླ་མཚོ་ཡོད།།
ཚེ་དབང་ཞབས་རྗེས་སྐུ་གཟུགས་འོད་འབར་ཡོད།།
རྨ་བྱ་འདྲ་བའི་རི་ལ་སྦས་ཡུལ་ཡོད།།
རིག་འཛིན་མཁའ་འགྲོའི་སྒྲུབ་ཕུག་མཐོང་གྲོལ་ཡོད།།
གྲོང་ཁྱེར་དཔའ་བོ་དཔའ་མོའི་འདུ་གནས་ཡོད།།
ཤ་མདོག་སེར་དང་ལྗང་ལ་ལུས་གྲུ་བཞི།།
ཤུགས་ལྡན་བློ་རྣོ་ཕོ་མོ་རྒྱུན་མི་འཆད།།
ཚེ་དབང་བྱིན་རླབས་སྟག་གཟིགས་མཁའ་འགྲོའི་རིགས།།
གནས་སྲུང་རྗེ་རིགས་ཀླུ་ཡིས་དབང་བྱེད་འགྱུར།།
ནུབ་ཕྱོགས་གཡུ་འབྲུག་འདྲ་བའི་རི་བོ་ལ།།
དབང་ཆེན་ཁྲོ་བོའི་སྒྲུབ་སྐོར་རྒྱས་པ་དང་།།
མཁའ་འགྲོའི་སྒྲུབ་པ་རིན་ཆེན་ཕྲེང་བ་དང་།།
ཁམས་ཆེན་སྐུ་འབུམ་ཟླ་གམ་དཀྱིལ་འཁོར་དང་།།
ཕྱྭ་གཡང་དབང་སྡུད་རླུང་དར་རེ་གཅོད་དང་།།
ཡིད་བཞིན་ནོར་བུའི་གཏེར་དང་འབྲུ་གཏེར་ཡོད།།
ཆུ་མིག་ནག་རིང་ཤུག་པ་ཁེར་སྐྱེས་དང་།།
དྲིལ་དཀར་ཕ་འོང་གད་པ་སྐྱ་རིང་དང་།།
མུ་མིག་མདུང་ནུབ་ཅན་དན་དགུ་སྒྲིལ་དང་།།
རྦ་ཕྱར་ཁ་འདྲ་སྡིག་པ་འདྲ་བའི་རྡོ།།
སྣ་ཚོགས་ཤིང་ཕུག་སྟག་འདྲ་ཕ་འོང་དང་།།
ཆུ་མིག་སྐྱ་རིང་ནག་པ་གཡུ་ལེ་དང་།།
ཆུ་སྲིན་ཁ་འདྲ་བྱ་ཡི་སྒྲོ་འདྲ་དང་།།
བཀྲ་ཤིས་སྒོ་སྲུང་རྡོ་རིང་དམར་པོ་ལ།།
ཕྱི་ནང་གསང་བའི་བོན་གཏེར་སྣ་ཚོགས་ཡོད།།
མཁའ་འགྲོ་མཆོག་ཕུར་ཀུན་གྲོལ་ཡོལ་ཆེན་དང་།།
གཤེན་རབ་གདུང་རུས་དངུལ་དང་བྱི་རུ་ཡོད།།
ལྷོ་ནུབ་ཤ་བ་མ་བུའི་རི་བོ་ལ།།
གནས་མཆོག་དེ་ལ་གཏེར་ཁ་སྦས་ཡུལ་ཡོད།།
མཁའ་འགྲོའི་སྒྲུབ་ཕུག་ཨོ་རྒྱན་ཞབས་རྗེས་ཡོད།།
གྲོང་ཁྱེར་དཔའ་བོ་དཔའ་མོའི་རྒྱུན་མི་འཆད།།
མ་མདོག་དམར་ལ་ལུས་མཛེས་སྐད་སྙན་ཅིང་།།
མོ་ལ་ཕོ་ཆས་ཕོ་ལ་མོ་རྟགས་ཅན།།
ཨོ་རྒྱན་བྱིན་རླབས་ཨོ་རྒྱན་མཁའ་འགྲོའི་རིགས།།
གནས་སྲུང་སྨྲང་རིགས་བྲམ་ཟེ་ཀླུ་ཡི་དབང་།།
ལྷོ་ཕྱོགས་ཁྱུང་ཆེན་འདྲ་བའི་རི་བོ་ལ།།
དྲག་པོ་མཐུ་ཡི་སྒྲུབ་སྐོར་གཏད་ཁྲམ་དང་།།
མ་མོའི་དྲག་སྔགས་བཙན་དམག་གཏད་ཁྲམ་དང་།།
གནམ་ལྕགས་ཕུར་པ་ཐོག་སེར་རང་དབབ་དང་།།
བོན་གཏེར་དངུལ་གཏེར་འབྲས་གཏེར་གྲངས་མེད་ཡོད།།
ནུབ་ཕྱོགས་དབང་རྒྱས་འདྲ་བའི་རི་བོ་ལ།།
དྲག་པོའི་ལས་རྣམས་གྲུ་གསུམ་རྒྱས་བཏབ་ཡོད།།
དྲན་པའི་ཞབས་རྗེས་ཨོ་རྒྱན་སྒྲུབ་ཕུག་ཡོད།།
ཁྱུང་གཤོག་འདྲ་བའི་གཡས་ཕྱོགས་ཚེ་ཆུ་ཡོད།།
ཀུན་གྲོལ་ཞབས་རྗེས་རང་བྱོན་སྐུ་གཟུགས་ཡོད།།
མཚན་མ་འདྲ་ལ་སྲིད་སློང་བྱེད་ས་ཡོད།།
མཁའ་འགྲོའི་གསང་ཕུག་ཡུམ་སྲས་བླ་མཚོ་ཡོད།།
རྒྱ་གར་མཁའ་འགྲོ་ལྔ་ཡི་བླ་མཚོ་ཡོད།།
གྲོང་ཁྱེར་དཔའ་བོ་དཔའ་མོ་འདུ་ར་ཡོད།།
ཤ་མདོག་འཐིང་དང་སྔོ་ནག་མིག་ཟུར་གསུམ།།
དྲག་ཤུལ་སྟོབས་ཆེན་ཕོ་མོ་རྒྱུན་མི་འཆད།།
ཀུན་གྲོལ་བྱིན་རླབས་རྒྱ་གར་མཁའ་འགྲོའི་རིགས།།
གནས་བདག་གདོལ་པ་ཀླུ་ཡི་དབང་བྱེད་འགྱུར།།
ཁྱད་པར་བྱང་ཤར་ཟླ་གམ་འདྲ་བའི་ཡུལ།།
གནས་ཆེན་དེ་རུ་ལས་ཅན་རྒྱུན་མི་འཆད།།
གཏེར་དང་བཀའ་རྟགས་འཁོར་ལོའི་རྒྱས་བཏབ་ཡོད།།
བྱང་ནུབ་བྱ་ཕོ་འདྲ་བའི་རི་བོ་ལ།།
བཀྲ་ཤིས་གཏེར་གྱི་གསས་ཁང་ཆེན་པོ་ཡོད།།
དགོས་འདོད་གཏེར་ཁ་སྣ་ཚོགས་གྲངས་མང་ཡོད།།
གཞུ་མཆོག་འདྲ་བའི་རྩེ་ལ་བོན་གཏེར་ཡོད།།
སྦྲུལ་ནག་འཁྱུག་འདྲའི་སྐེད་ལ་བྱི་རུའི་གཏེར།།
བྱི་རུའི་གཏེར་ཁ་ཆུ་བྲག་འཕྲང་ལ་ཡོད།།
བཻ་རོ་ཙ་ནའི་རིན་ཆེན་འབྲུ་གཏེར་ཡོད།།
ལྷོ་ནུབ་ཆུ་བྲག་འཐབ་པའི་ལུང་པ་དང་།།
གནམ་ས་ཟླ་གམ་འདྲ་བའི་ཡར་སྣེ་ལ།།
པདྨའི་ཆོས་གཏེར་མི་གཅིག་དྲུག་ཙམ་ཡོད།།
བཻ་རོ་ཙ་ནའི་གཏེར་ཁ་མང་དུ་ཡོད།།
མཁའ་འགྲོའི་གསང་ཕུག་སྒྲུབ་གནས་བྱིན་ཆེན་ཡོད།།
སྤུ་གྲི་འདྲ་བའི་རྩེ་ལ་མཁའ་འགྲོའི་ཚོགས།།
གྲོང་ཁྱེར་དཔའ་བོ་དཔའ་མོའི་རྒྱུན་མི་འཆད།།
གཡུ་དང་དུང་གི་གཏེར་ཁ་གྲངས་མང་ལ།།
སྐུ་གཟུགས་པདྨ་རྣམས་ཀྱིས་རྒྱས་བཏབ་ཡོད།།
ལྷོ་ནུབ་ཁྲི་ཚོ་གསུམ་ཤོང་སྦས་ཡུལ་ཡོད།།
དབྱར་དགུན་མེད་པར་ན་བུན་གཞའ་ཚོན་འཐིབ།།
ཆུ་དང་རྫ་གངས་བྲག་འཐབ་རྫོང་མཁར་ཡོད།།

       ཞེས་གསུངས་ཡོད། སྤྲུལ་སྐུ་བློ་ལྡན་གྱི་སློབ་མར་གཏོགས་པ་ཚ་རོང་ལ་དབྱིལ་རྒྱལ་མཚན་འོད་ཟེར་མཆོག་གིས་ཁ་བ་དཀར་པོར་སྒྲུབ་པ་ཉམས་ལེན་གནང་མྱོང་བ་རེད། དུས་རབས་བཅོ་ལྔ་པའི་མཇུག་ཏུ་བྱོན་པའི་བོན་གྱི་གཏེར་སྟོན་ཁྱུང་པོ་བཀྲ་ཤིས་རྒྱལ་མཚན་གྱིས་རང་བཙན་ཁ་བ་དཀར་པོར་སྒོམ་སྒྲུབ་ཉམས་ལེན་གནང་བ་དང་བོན་སྡེ«དྲན་པ་ཨ་དཀར་དགོངས་འདུས»སོགས་ཟབ་གཏེར་བཞེས། དེའི་རྗེས་སུ་ལྷོ་རོང་རྫོང་གི་ཁོངས་གཏོགས་དམར་རིས་ཤང་དུ་སྤྱི་ལོ༡༦༨༤ལོར་སྐུ་འཁྲུངས་པའི་ཉག་སྒོམ་རིན་ཆེན་རྒྱལ་མཚན་མཆོག་དགུང་ལོ་ཞེ་དྲུག་ཐོག་ཁ་བ་དཀར་པོར་ཞབས་སྐོར་ཕེབས་ཏེ་ལམ་བར་དུ་སྒོམ་སྒྲུབ་གནང་བ་དང་ཞོར་དུ་གནས་མཆོག་ཁ་བ་དཀར་པོའི་དཀར་ཆག་དང་བསང་མཆོད་བརྩམས་གནང་ཡོད། ཁོང་གིས་ཁ་བ་དཀར་པོ་ནི་སྟོན་པ་འཆི་མེད་གཙུག་ཕུད་ཀྱི་ཐུགས་ལས་སྤྲུལ་པ་ཡིན་པ་དང་གནས་ལ་ཕྱོགས་བཞི་དབུས་ལྔ་ཡོད་པ་ལས་དབུས་ཀྱི་གནས་རི་ནི་ཀུན་བཟང་གི་གནས་རི་ཡིན་པ་དང་། ཀུན་བཟང་ཐུགས་སྤྲུལ་གཤེད་བཞི་ལོ་པ་ཞིག་གིས་འགྲོ་དོན་མཛད་པ། ཤར་ཕྱོགས་ཀྱི་གནས་ནི་དྲན་པས་བྱིན་གྱིས་བརླབས་པའི་གནས་ཡིན་པ་དང་། དྲན་པའི་ཐུགས་སྤྲུལ་སྟག་ཡོས་ལོ་པ་དྲུང་མུའི་མཚན་ཅན་ཞིག་གིས་འགྲོ་དོན་མཛད་པ། བྱང་ཕྱོགས་ཀྱི་གནས་ནི་ཚེ་དབང་རིག་འཛིན་གྱིས་བྱིན་གྱི་བརླབས་པའི་གནས་ཡིན་པ་དང་། ཚེ་དབང་ཐུགས་སྤྲུལ་བྱི་ཕག་ལོ་པ་རདྣའི་མཚན་ཅན་ཞིག་གིས་འགྲོ་དོན་མཛད་པ། ནུབ་ཀྱི་གནས་རི་ནི་ཨོ་རྒྱན་བྱིན་གྱིས་བརླབས་པའི་གནས་ཡིན་པ་དང་། ཨོ་རྒྱན་ཐུགས་སྤྲུལ་བྱ་སྤྲེལ་ལོ་པ་ནེ་རའི་མཚན་ཅན་ཞིག་གིས་འགྲོ་དོན་མཛད་པ། ལྷོ་ཡི་གནས་རི་ནི་མཁའ་འགྲོས་བྱིན་གྱི་བརླབས་པའི་གནས་ཡིན་པ་དང་། མཁའ་འགྲོའི་ཐུགས་སྤྲུལ་རྟ་སྦྲུལ་ལོ་པ་མཚན་ལྡན་མ་ཞིག་གིས་འགྲོ་དོན་མཛད་དགོས་པ་བཅས་བསྟན་ཡོད། དེའི་རྗེས་སུ་སྤྱི་ལོ༡༨༩༩ལོར་ཉག་གཏེར་གསང་སྔགས་གླིང་པ་དང་མཁའ་འགྲོ་དབང་གི་སྒྲོལ་མ་གཉིས་གཙོས་པའི་ཉག་རོང་གི་དད་ལྡན་འགའ་གནས་མཆོག་ཁ་བ་དཀར་པོར་ཆེད་དུ་མཇལ་སྐོར་ཕེབས། ལོ་དེར་ཉག་གཏེར་མཆོག་གིས་ཁ་བ་དཀར་པོ་ནས«སྤྱི་སྤུངས་གསང་འདུས་ཐབས་ཆེན་ཡབ་རྒྱུད»སོགས་བོན་སྡེ་མང་པོ་ཟབ་གཏེར་བཞེས་གནང་ཡོད། ཉག་གཏེར་མཆོག་གི་རྣམ་ཐར་དང་མཁའ་འགྲོ་དབང་གི་སྒྲོལ་མའི་རྣམ་ཐར་ནང་དུ་གནས་མཆོག་ཁ་བ་དཀར་པོའི་བཀོད་པ་དང་གནས་དེར་བཀའ་རྟགས་ཞབས་རྗེས་དང་སྒྲུབ་ཕུག་གང་འདྲ་ཡོད་པ་སོགས་འཁོད་ཡོད། སྤྱི་ལོ༡༨༦༦ལོར་ཁམས་ཁྱུང་ཡུལ་དུ་སྐུ་འཁྲུངས་པའི་བོན་གྱི་བླ་མ་རྣལ་འབྱོར་བཟོད་པ་རྒྱལ་མཚན་མཆོག་ཐེངས་ལྔ་ཙམ་ལ་ཁ་བ་དཀར་པོར་མཇལ་སྐོར་བྱོན་མྱོང་བ་དང་། ཁོང་གིས་ཁ་བ་དཀར་པོའི་རྒྱུད་དུ་ཡུན་རིང་བཞུགས་ཏེ་སྒྲུབ་པ་ཉམས་ལེན་གནང་བ་དང་བོན་སྡེ་འཆད་ཉན་སྤེལ་ཡོད། བོན་གྱི་གྲྭ་ས་ཆེན་མོ་སྨན་རི་དགོན་གྱི་མཁན་རབས་ཉེར་བརྒྱད་པ་ཕུན་ཚོགས་བློ་གྲོས་དབང་གི་རྒྱལ་པོ་མཆོག་གནས་མཆོག་ཁ་བ་དཀར་པོའི་ལྷོ་ནུབ་ཕྱོགས་ཁུ་བྱུག་ལ་ཕར་ནང་གི་སྦྲུལ་ཤོད་ཡར་གྲོང་ངམ། དེང་གི་སྲིད་འཛིན་ས་ཁུལ་གྱི་དབང་དུ་བྱས་ན་རྫ་ཡུལ་རྫོང་བྲག་ནག་ཤང་གི་ཁོངས་སུ་བོད་རབ་བྱུང་བཅོ་ལྔ་པའི་མེ་བྱི༡༨༧༦ལོར་སྐུ་འཁྲུངས་པ་རེད་ལ། གྲྭ་ས་འོག་མ་རབ་ལེགས་གཡུང་དྲུང་གླིང་གི་མཁན་རབས་ལྔ་པ་ཚུལ་ཁྲིམས་དབང་རྒྱལ་ལགས་ཀྱང་སྤྱི་ལོ༡༨༦༩ལོར་གྲོང་ཚོ་འདིར་སྐུ་འཁྲུངས་པ་རེད། གཞན་ཡང་གནས་མཆོག་ཁ་བ་དཀར་པོའི་གཡས་གཡོན་དང་སྟོད་སྨད་སོགས་སུ་གནའ་བོའི་བོན་དགོན་ཆགས་ཤུལ་དང་། བོན་དང་འབྲེལ་བའི་ཡུལ་སྲོལ་གོམས་གཤིས་མང་པོ་ཞིག་ད་ལྟ་མཐོང་ཡུལ་དུ་ལྷག་ཡོད་པས་ཡུལ་འདིར་སྔ་མོའི་དུས་ནས་བོན་བསྟན་ཤུགས་ཆེར་དར་མྱོང་བ་དང་། གནའ་ནས་ད་བར་དུ་བོད་ཡུལ་སྟོད་སྨད་བར་གསུམ་ནས་ཡོང་མཁན་བོན་གྱི་གནས་མཇལ་བ་མཚམས་ཆད་མྱོང་མེད་པ་རེད།